ވިންދޭ ލޯބި ތީ އެދޭ 58

އިއާން މިންހާގެ އިންތިޒާރުގައި ކާރުގައި މަޑުކޮށްލައިގެން އިނެވެ. މާގިނައިރަކު އިންތިޒާރު ކުރާކަށް ނުޖެހުނެވެ. ގޭގެ ބޮޑު ދޮރު ހުޅުވާލުމަށްފަހު ބޭރަށް ނިކުން މިންހާ ފެނި އިއާންގެ ތުންފަތަށް ހިނިތުންވުމެއް ވެރިވިއެވެ. ކަޅު ކުލައިގެ އަބާޔާއަކާއެކު މަޑު ޕީޗް ކުލައިގެ ޝޯލްގައި މިންހާ ފެންނަލެެއް ނުހަނު ހިތްގައިމެވެ. މޫނުގައި ކޮށްފައިވި ލުއި މޭކަޕުން އިތުރު ފުރިހަމަ ކަމެއް ގެނެސްދެއެވެ. ތުނި ތުންފަތުގައި ރީތި ހިިނިތުންވުމެއްވީއިރު އެހިނިތުންވުމުން އިއާންގެ ހިތާއި ކުޅެލައެވެ. ކަޅު ކުލައިގެ ވާގަނޑު ދިގު ދަބަސް ވައަތުގެ ކޮނޑުގައި އަޅުވާފައިވީއިރު އެއަތުގައި ހުދު ކުލައިގެ ޑޮކްޓަރސް ކޯޓު އަޅުވާލާފައިވެއެވެ. ފަރި ހިނގުމެއްގައި އައިސް މިންހާ ކާރަށް އެރިއިރުވެސް އިއާންއަށް ބަލަހައްޓާއިގެން އިނދެވުނެވެ. ” އާން… ދެން ތިވަރަށް ނުބަލަބަލަ… ” ކާރަށް އެރުމުންވެސް އިއާންގެ ނަޒަރު އޭނަގެ މޫނުން ވަކިނުވުމުން އިއާންގެ ލޯ މަތީގައި އޭނަގެ އަތް އަޅަމުން މިންހާއަށް ބުނެލެވުނެވެ. ” ބެލޭނެދޯ އެހާ ރީތިވެފަ ފުރިހަމަވީމަ… ނަޒަރު އެހެން ދިމާލަކަށް ބަދަލެއް ނުކުރެވެޔޭ… ކާކު ނޭދޭނީ އެހާ ފުރިހަމަ މަލެއް ބިންނަން… ” މިންހާގެ އަތް އޭނަގެ ލޯމަތިން ނަގަމުން އިއާން ބުނެލިއެވެ. އެއަޑުގައިވި އަސަރަކުން މިންހާއަށް އިސްއުފުލާލަމުން އިއާންގެ ދެލޮލާއި ހަތަރު ކަޅި ހަމަކޮށްލެވުނެވެ. އެވަގުތު ހީވީ އޭނަގެ ވަށާއިގެންވީ މާހައުލު ހުއްޓުމަކަށް އައިހެންނެވެ. ” މިހާރު ބަލަން ހިތް އެދުނަސް ދުވަސްކޮޅަކުން އާންވެސް ފޫހިވެދާނެ… ” ހިނދުކޮޅަކަށް ދެމިގެންދިޔަ ވަގުތުކޮޅަކަށްފަހު އިއާންގެ ދެލޮލުން ނަޒަރު ވަކިކޮށްލާ އިސްޖަހާލަމުން މަޑުމައިތިރިކަމާއެކު މިންހާ ބުނެލިއެވެ. އިއާން މަޑުމަޑުން މިންހާގެ ދަތްދޮޅީގައި ހިފާ އިސްއުފުލާލިއެވެ. އެވަގުތު ކަރުނައިގެ ތެެތްކަން އެކުލެވިފައިވި މިންހާގެ ބޮޑު ދެލޯ ފެނި އިއާންގެ ހިތުގައި ރިއްސާލިއެވެ. ”ރޭގަވެސް ބުނީމެއްނު މިރީތި ދެލޮލުން އެންމެ ކަރުނަ ތިއްކެއްވެސް ވެއްޓޭކަށް މިހިތެއް ނޭދެޔޭ… އިޓްސް މޯރް ޕްރީޝިޔަސް… އަހަރެންމީ އަލޫފްއެއް ނޫނޭ ދުވަސްކޮޅަކުން މިންނުދެކެ ފޫހިވެ އެހެން އަންހެން ކުއްޖެއް ގާތަށް ދާން… ދެން ދުވަހަކުވެސް ނުބުނާތި ތިހެން… އޭރުން މިހިތަށް ވަރަށް ތަދުވާނެ… އަހަރެން ދުވަހަކުވެސް މިންނު ދޫކޮށެއްނުލާނަން… އިން ޝާ ﷲ… ތީ އަހަރެންގެ ދިރިއުޅުުގެ އެއްބައި… މިހިތުގެ ވިންދު… ކިހިނެއް މިންނުއާ ނުލައި އުޅޭނީ… ” މަޑުމައިތިރިކަމާއެކު އިއާން ދައްކަމުންދިޔަ ވާހަކަތަކުން މިންހާގެ ހިތުގެ އެންމެ ހިމަ ނާރަށްވެސް އަސަރުކުރުވިއެވެ. އެފަދަ ބައިވެރިއެއް އޭނަގެ ހަޔާތުގައި ލެއްވިކަމަށްޓަކައި ހިތާހިތުން ﷲ ގެ ހަޟްރަތަށް ތަކުރާރުކޮށް ޝުކުރުއަދާކުރެވުނެވެ.

” އާން… އައިމް ސޮރީ… އަހަރެންގެ ބަސްތަކުން އާންގެ ހިތަށް ހާޓްކުރެވިއްޖެ… އައިމް ރިއަލީ ސޮރީ… ސިކުނޑިއަށް ވެރިވެގަތް ޚިޔާލަކުން އެހެން ބުނެވުނީ… އައި ނޯ އާން އަހަރެން ދޫކޮށްނުލާނެކަން… އާންގެ ލޯތްބާއިމެދު އަހަރެންގެ ހިތުގަ އެއްވެސް ޝައްކެއްނެތް… އަހަރެން އާންއަށް ފުރިހަމަ އިތުބާރުކުރަން… ” ތުންފަތް މައްޗަށް ހިނިތުންވުމެއް ވެރިވެގެންދިޔަ ހިނދު މިންހާއަށް ވާހަކަ ދެކެވުނެވެ. ” އިޓްސް އޯކޭ…” އިއާން ވެސް ހިނިތުންވުމަކާއެކު ބުނެލިއެވެ. ލަސްނުކޮށް އިއާން ހޮސްޕިޓަލަށް ދިޔުމަށް ކާރު ދުއްވާލިއެވެ. މިންހާ އަދިވެސް އެއްފަހަރު އިއާންއަށް ބަލާލާ ހިނިތުންވެލިއެވެ. އެތައް އަހަރެއް ވޭތުވެގެން ދިޔައިރުވެސް އިއާންގެ ހިތުގައި އޭނައަށްޓަކައި އުފެދިފައިވި ލޯތްބަށް އެއްވެސް ބަދަލެއް އައިސްފައިނުވާއިރު އެލޯތްބަށް ޝައްކުކުރުމުގެ އެއްވެސް ޖާގައެެއްނެތެވެ. އިއާންގެ ކޮންމެ އަމަލަކުން އެހިތުގައިވާ ސާފު ތެދުވެރި ލޯބި ހާމަވެގެންދެއެވެ. ” އާން ގާތ ބުނީމެއްނު އޯކޭއޭ މިގަޑީގަ ގެންގޮސްދެން ނަޔަސް… ބައްޕައާއެކު ނޫނީ ޓެކްސީއެއްގަވެސް ދެވޭނެއެއްނު… އާންއަށް ނިދާލެވޭނެއެއްނު ޑިއުޓީ ނެތް ދުވަހު… މިރޭ ނައިޓް ޑިއުޓީއެއްނު… ” ޚިޔާލުތަކުން އެއްފަރާތްވެލާ ކާރު ދުއްވަމުންދިޔަ އިއާންގެ މޫނަށް ނަޒަރު ހުއްޓާލަމުން މިންހާ ވާހަކަ ދެއްކިއެވެ. ”ނިދުމަށްވުރެ ތިރީތި ސޫރަ ދެކެލުން މާމުހިއްމު… ދެން ކީއްކުރަން ނިދަންވީ… ނިދިދާނެއެއްނު ފަހުންވެސް… ” ކާރު ދުއްވަން އިނދެ މިންހާއަށް އަވަސް ނަޒަރެއް ދެމުން އިއާން ބުނެލިއެވެ. އެއާއެކު މިންހާގެ ތުންފަތަށް އަނެއްކާވެސް ފުރިހަމަ ހިނިތުންވުމެެއް ވެރިވިއެވެ. ” ތިރީތި މޫނު ބީހިލުން އެދޭ… ތިތުންފަތުން އުފާ ލިބުން އެދޭ… ހޯދަން ދެވެނީ ލޯބިވާވަރުން… ނުރުހުން ނުވޭ… މަގެ ޖާނު އެކީގާ އަދު ލޯބިން ދެމޭ… ” އެއްލޯ މަރާލަމުން އެފިރިހެންވަންތަ އަޑުން އިއާން ލަވައެއްގެ ތަންކޮޅެއް ކިޔާލިއެވެ. މިންހާގެ މޫނަށް ވަގުތުން ޖަންބުކުލަ ވެރިވެގަތެވެ. އިއާންއަށް ކަޅިޖަހާނުލައި އެރީތި މޫނަށް ބަލަން އިނދެވުނެވެ. ” ލަދުގަތީމަ އަދި މާފުރިހަމަ… ” އިއާންގެ ދުލުން އެބަސްތައް ބުނެވުނީ އިޚްތިޔާރުން ބޭރުގައެވެ. އިއާންގެ ބަސްތަކުން އިސްއުފުލާލަމުން ލަދުރަކި ހިނިތުންވުމަކާއެކު މިންހާ ބަލައިލިއެވެ. ”ދެން… އާން… މަގުމައްޗަށް ބަލާބަލަ ކާރު ދުއްވާއިރު… ” ލަދުން އިންނަމަވެސް އޭނަގެ އަތުން އިއާންގެ ކޯތާފަތުގައި ޖައްސާ މޫނު އަނބުރާލަމުން މިންހާ ވާހަކަ ދެއްކިއެވެ. ލުއި ހުނުމަކާއެކު އިއާން އޭނަގެ ފުރިހަމަ ސަމާލުކަން މަގުމައްޗަށް ދިނެވެ. ހޮސްޕިޓަލާއި ހަމައަށް ދެވެންދެންވެސް އެދެމެދުގައި ވާހަކަ ދެކެވެމުން ދިޔައެވެ. އެމީހުންގެ މަންޒިލަށް ވާސިލްވުމާއެކު އިއާން ކާރު ހުއްޓާލިއެވެ. ” ތޭންކްސް އާން… ” ކޮނޑުގައި ދަބަސް އަޅުވާލަމުން މިންހާ ބުނެލިއެވެ. ” ހަމައެކަނި ތޭންކްސްތަ… ” މޫނު މައްޗަށް މަޑުމޮޅިކަން ވެރިކުރުވަމުން އިއާން އެހެން ބުނެ މަގުގެ އަނެއް ފަރާތަށް ނަޒަރު ހުއްޓާލިއެވެ. އޭރު އެމޫނު މަތިން ފެންނަނީ ލާނެއްކަމެވެ. ” ލަވް ޔޫ ޖާން… ” މިންހާ މަގުގެ ދެފަރާތަށް ބަލައިލާ އިއާން އައި ގާތަށް ޖެހިލުމަށްފަހު އިއާންގެ ކޯތާފަތުގައި އޭނަގެ ތުންފަތް ޖައްސާލަމުން ބޮސްދިނެވެ. އަދި ލަދުރަކި ހިނިތުންވުމަކާއެކު ކާރުން ފައިބަން އަވަސްވެގަތެވެ. އިއާން ހައިރާންކަމާއެކު މިންހާގެ މޫނަށް ބަލައިލިއެވެ. މިންހާގެ ފަރާތުން އެފަދަ އަމަލެއް ފެނިދާނެ ކަމަކަށް އޭނާ ހިޔެއްނުކުރެއެވެ. ” ލަވް ޔޫ ޓޫ ޖާން… ” އޭނަގެ ކޯތާފަތުގައި އަތުން ފިރުމާލަމުން އިއާން ބުނެލީ އޭނަގެ ފިރިހެންވަންތަ ހިނިތުންވުމާއެކުގައެވެ. މިންހާ އަވަސް އަވަހަށް ކާރުން ފައިބާ ގޮސް ހޮސްޕިޓަލަށް ވަނެވެ.

” އޭތް އޭތް… ހާދަ އަވަސްކޮށްލާފަ ތިދަނީ… މަޑުކޮށްބަލަ… ބައިދަވޭ ކޮންގްރޭޖުލޭޝަންސް މިންނު… ކާންދޭން ޖެހޭނެ އިނގޭ… ރިލޭޝަންއަކަށް ދިޔައިރު އެކަން ސެލެބްރޭޓްކުރަން ޓްރީޓް އޮންނަންވާނެއެއްނު… ” ގްރައުންޑް ފްލޯގެ ރިސެޕްޝަން ކައިރި ހުއްޓިލައިގެން ހުރި ޒިޔަލް އަވަސް ހިނގުމެއްގައި ލިފްޓާ ދިމާލަށް މިސްރާބުޖެހި މިންހާ އާއި އެއްވަރުކޮށް ވާހަކަ ދެއްކިއެވެ. ” ތޭންކްސް… ޒިޔަލް ދޯ އޫޝީ ގާތު ބުނީމަ… ކޮންގްރާއޭ ކިޔާފަ މެސެޖު ކުރި ރޭގަ… މަށަށް އޭރުވެސް އިނގޭ ޒިޔަލްއަށް އެނގިއްޖިއްޔާ އޫޝީއަށް ސިއްރުނުވާނެކަން… ” ލިފްޓަށް އަރާ ހިނިތުންވުމަކާއެކު ޒިޔަލްއަށް އަވަސް ނަޒަރެއް ދެމުން މިންހާ ބުނެލިއެވެ. ” އާނ… ދެން އޫޝީ ނޫނީ ކާކު ކައިރި ބުނާނީ… ” ބޮލުގައި އަތް ހިންގާލަމުން ޒިޔަލް ބުނެލިއެވެ. ޒިޔަލްއަށް ވީގޮތުން މިންހާއަށް ހެވުނެވެ. ” އާންއާ ވާހަކަ ދައްކާފަ ޓްރީޓްގެ ކަންތައް އަންގާލާނަން… ” މިންހާގެ އެޖަވާބާއެކު ޒިޔަލްވެސް ލުއި ހުނުމަކާއެކު އޯކޭއޭ ބުނެލިއެވެ. ލިފްޓު ހުއްޓުމާއެކު ދުވަހުގެ މަސައްކަތާއެކު ކުރިއަށް ދިޔުމަށް ދެމީހުންވެސް މިސްރާބުޖެހީ އެމީހެއްގެ ކެބިންއަށެވެ.

އޮފީހަށް ދާން ތައްޔާރުވެގެން ތިން މީހުނަށްވެސް ނުކުމެވުނީ ދާދި އެކުއެކީގައެވެ. ނާއިލްގެ ނަޒަރު އަޝްރާއަށް ހުއްޓުނުއިރު އަޝްރާ ނާއިލްއަށް އަވަސް ނަޒަރެއް ދީ އޭނަގެ ނަަޒަރު އެހެން ދިމާލަކަށް ބަދަލުކޮށްލިއެވެ. ” ކަމްއޯން… ލެޓްސް ގޯ… ” ޒަހާ އެހެން ބުނުމާއެކު އަޝްރާ އާއި ނާއިލް ޒަހާގެ ފަހަތުން ހިނގައިގަތެވެ. ޒަހާގެ އެދުމުގެ މަތިން އެމީހުން ދާބް ނިންމީ ޒަހާގެ ބައްޕަގެ ކާރުގައެވެ. ނާއިލް ޑްރައިވިން ސީޓަށް އެރިއިރު އަޝްރާ އާއި ޒަހާ އެރީ ފަހަތު ސީޓަށެވެ. އެމީހުން ނިންމީ ޒަހާ އޮފީހަށް ލުމަށްފަހު އެމީހުންގެ މަސައްކަތަށް ދާށެވެ. ނާއިލް ޒަހާގެ އިރުޝާދުގެ މަތިން ކާރު ދުއްވަމުން ދިޔައިރު ކާރުގެ މަތީގައި އިން ލޯގަނޑު ކޮޅުން އިރުއިރުކޮޅުން އަޝްރާއަށް ބަލައިލައެވެ. އަޝްރާގެ ހަރަކާތްތައްވެސް ހުރީ އެހެންނެވެ. އިރުއިރުކޮޅުން ލޯގަނޑުކޮޅުން ފެންނަމުންދިޔަ ނާއިލްގެ ސޫރައަށް ބަލައިލުމަށްފަހު ނާއިލްގެ ނަޒަރު އޭނައަށް ސީދާވުމުން އަޝްރާ އެހެން ދިމާލަކަށް ބަލައިލައެވެ. މިހުރިހާ މަންޒަރެއް ދިޔައީ ކައިރީގައި އިން ޒަހާ ދިރާސާކުރަމުންނެވެ. އޭރު ޒަހާގެ ތުންފަތުގައިވީ މާނަފުން ހިނިތުންވުމެކެވެ. ޒަހާ އޮފީހަށް ލުމަށްފަހު ދެން ނާއިލް މިސްރާބުޖެހީ ގެސްޓް ހައުސްއަށް ދިޔުމަށެވެ. މިހާރު ގެސްޓް ހައުސްގައި ކުރެވެމުން ދަނީ އެންމެ ފަހުގެ މަސައްކަތްތަކެވެ. އެތަނުގެ އިދާރީ ކަންކަން ބެލެހެއްޓުމަށް ގެސްޓް ހައުސްއާއެކު އޮފީހެެއްވެސް އިމާރާތްކުރެވިފާވެއެވެ. ގެސްޓް ހައުސް އާއި ހަމައަށް އާދެވުނުއިރުވެސް ދެމީހުން ކުރެ އެކަކުވެސް އެއްވެސް ވާހަކައެެއް ނުދައްކައެވެ. ވާހަކަ ދައްކަން ހިތް އެދުނުނަމަވެސް އަނެކާ ހީކުރާނެ އެއްޗެެއް ނޭނގޭތީ ދެމީހުންވެސް ތިބީ އެހާދިސާ އާއި ބެހޭގޮތުން ވާހަކަ ދައްކަން ޖެހިލުންވެފައެވެ. ކާރު ހުއްޓުމާއެކު ކާރުން ފައިބާ ބޭރުގައި އެމީހުންގެ އިންތިޒާރުގައި މަޑުކޮށްލައިގެން ހުރި އަރުޝަދުއާއެކު އަޝްރާ އެތެރެއަށް ވަންނަން ހިނފައިގަތެވެ. ކާރު ޕާކުކޮށްލުމަށްފަހު ނާއިލްވެސް ގޮސް އެތެރެއަށްވަނެވެ.

ގެއަށް ވަދެގެން އައި އިއާންގެ ތުންފަތުގައިވީ ފުރިހަމަ ހިނިތުންވުމެކެވެ. މޫނު މަތީގައިވަނީ އުފާވެރިކަމެވެ. އޭނަގެ ޚިޔާލުގައިވީ ކާރު ތެރޭގައި ހިނގާދިޔަ ހާދިސާއެވެ. މިންހާގެ އެލޯބިވެތި އަމަލުން އޭނަގެ ހިތަށް ލިބިފާވަނީ ބަޔާންކުރަންދަތި އުފަލެކެވެ. ” އާން… އިއާން… ” އާސިމާ ބަދިގެ ދޮރުމަތީގައި ހުރެ އެތެރެއަށް ވަން އިއާން ފެނި ދެފަހަރަކު ގޮވާލިއެވެ. އެހެނަސް އިއާންގެ ކަންފަތާ ހަމައަކަށް އެއަޑެއް ނުފޯރިއެވެ. އޭނަ ހުރީ އަމިއްލަ ލޯބީގެ ދުނިޔޭގައި ގެއްލިފައެވެ. އާސިމާގެ  މޫނު މަތިން ހައިރާންކަން ފެނިގެން ދިޔައެވެ. ” އާން… ދަރިފުޅާ… މަންމަ ގޮވާ އަޑެއްވެސް ނީވޭތަ މިއަދު… ” އިއާންގެ ފަހަތުގައި ހުއްޓި އާސިމާ ވާހަކަ ދެއްކި އަޑަށް އިއާންއަށް އޭނަގެ ޚިޔާލީ ދުނިޔެއިން ނިކުމެވުނެވެ. ” ކީކޭ މަންމާ… އެއްޗެކޭ ބުނިންތަ… ” ހިނގުން ހުއްޓާލާ ފަސްއެނބުރި އޭނަގެ މަންމަގެ މޫނަށް ބަލައިލަމުން އިއާން އަހާލިއެވެ. ” އާދެބަލަ… މިތާ އިށީންދެބަލަ… މަންމަ ކިތައް ފަހަރު ގޮވައިފިން އާންއަށް މިހާރު… އެކަމަކު ހަމަ ހެވިފަ ހުރެ އަޅާވެސްނުލާ ތިދަނީ… ކޮން ކަމަކަށް ގެއްލިފަތަ ތިހުރީ… ” އިއާންގެ އަތުގައި ހިފައިގެން ގެނެސް ސޯފާގައި އިށީންނަމުން އާސިމާ ވާހަކަ ދެެއްކިއެވެ. އޭނަގެ ފުރިހަމަ ސަމާލުކަން ހުއްޓުފައިވީ އިއާންގެ މޫނަށެވެ. އެމޫނު މަތިން ކަމެއް ދެނެގަންނަން އުޅޭ ފަދައިން އިއާންގެ ކޮންމެ ހަރަކާތެއް އާސިމާ ދިރާސާކުރަމުން ދިޔައެވެ. ” މަންމާ… އެއްވެސް ކަމެއް ނުވެޔޭ… އެއީ ކުޑަ ކަމަކާމެދު ވިސްނާލީ…” އިއާން ހިނިތުންވުމަކާއެކު ބުނެލިއެވެ. ” އެހެންތަ… އެހާ ބޮޑަށް ކޮންކަމަކާ ތިވިސްނާލީ… ” އިތުރަށް ދެނެގަންނަން ބޭނުންވުމުން އާސިމާ ސުވާލުކުރިއެވެ. ” ދެން މާބޮޑު ކަމެއް ނޫން… އެހާ މުހިއްމު ކަމެއް ނޫނޭ މަންމާ… ” އިއާން މޫނަށް ވައްތަރެއް ޖައްސާލަމުން ޖަވާބުދިނެވެ. ” ހޫމް… އެހާ މުހިއްމު ކަމެއް ނޫން… އެކަމަކު މަންމަ ތިން ހަތަރޔ ގޮވިއިރުވެސް އާންއަކަށް އަޑެއް ނީވުން… ރޭންސުރެ މަންމައަށް އާންގެ އުޅުން ތަފާތުކަން ފާހަގަކުރެވޭ… ތިމޫނު މަތިން އެހެންޏާ ނުފެންނަފަދަ އުފާވެރިކަމެެއް ފެނޭ… އެއުޖާލާކަމާއި އެއުފާވެރިކަމުގެ އަސްލަކީ ކޮބާކަން މަންމަ ގާތު ނުބުނާނަންތަ… އާންގެ ހިނިތުންވުން ގުޅިފައިވަނީ ކޮންކަމަކާ ކަމެއް މަންމައަކާ ހިއްސާއެއްް ނުކުރާނަންތަ… ” އާސިމާ އިއާންގެ މޫނަށް ބަލަހައްޓާއިގެން އިނދެ ލުއި ހިނިތުންވުމަކާއެކު ވާހަކަ ދެއްކިއެވެ.

” މަންމައަށް އެއްވެސް ކަމެއް ސިއްރެއްނުވޭދޯ… މަންމަ ބުނީމެއްނު… މަންމަ މިހާރު އެންމެ ދެކެން ބޭނުންވަނީ އަޅުގަނޑު ދިރިއުޅުމެއް ފަށާ ދުވަހޭ… އެކަމާ ވިސްނާލީ… މަންމަ ބުނީމެއްނު މަންމަ ބޭނުންވަނީ މިންނު ކަހަލަ ކުއްޖެކޭ އަޅުގަނޑުގެ އަންހެނުންގެ ގޮތުގަ މިގެއަށް އަންނަން… އަޅުގަނޑު ބޭނުންވާފަދަ… މަންމަވެސް ބޭނުންވާފަދަ ކުއްޖެއް އަޅުގަނޑުގެ ހަޔާތަށް އަތުވެއްޖެ… މަންމަގެ އެއުންމީދު މާގިނަ ދުވަހެއް ނުވެ އިންޝާ ﷲ ފުރިހަމަވާނެ… އެއީވެސް މަންމަ އެންމެ ބޭނުންވި ގޮތަށް… މަންމަ އެންމެ ބޭނުންވި ކުއްޖާ އަޅުގަނޑުގެ ހަޔާތަށް ގެންނަން މިއުޅެނީ… މިހިނިތުންވުމާ އުފާވެރިކަމުގެ އަސްލަކީ މިންހާ… ” އާސިމާގެ އަތުގައި ހިފަހައްޓާލައިގެން އިނދެ އިއާން އޭނަގެ ވާހަކަތައް ހިއްސާކުރިއެވެ. ” ހަމަތެދެއްތަ ދަރިފުޅު ތިބުނީ… ” ލޮލުން އުފާވެރިކަމުގެ ކަރުނަ ނީރާލި އާސިމާ ބުނެލިއެވެ. އިއާން މަޑުމަޑުން ބޯ ޖަހާލިއެވެ. ” އާން… މަންމަ ވަރަށް ވަރަށް އުފާވެެއްޖެ ދަރިފުޅު ތިދިން ޚަބަރަކުން… މިހާރު ބޭނުންވަނީ އެދުވަސް ދެކިލަން… އެހާ ލަސްނުކޮށް އެދުވަސް ފެންނާނެދޯ އާން… ” އުފާވެރިކަމާއެކު އިއާންގެ ބޮލުގައި ފިރުމާލަމުން އާސިމާ ބުންޏެވެ. ” އިން ޝާ ﷲ… ” އިއާން ހިނިތުންވުމަކާއެކު ބޯ ޖަހާލަމުން ބުނެލިއެވެ. ކުޑައިރުކޮޅަކު ވާހަކަ ދައްކަން އިނުމަށްފަހު އިއާން އޭނަގެ ކޮޓަރިއަށް މިސްރާބުޖެހިއެވެ. އާސިމާ އިއާން ދިޔަ ދިމާލަށް ބަލަން ހިނިތުންވެފައި އިނެވެ. އެދރިފުޅުގެ މޫނު މަތިން ފެންނަމުންދިޔަ އުފާވެރިކަމުން އޭނަގެ ހިތަށް ފިނިކަން ލިބިގެން ދިޔައެވެ. އޭނަގެ އަބަދުގެވެސް ދުޢާއަކީ އޭނަގެ ދެދަރިންވެސް އުފަލާއި ހިތްހަމަޖެހުމާއެކު ދިރިއުޅުމެވެ. އިރުކޮޅަކު އިއާން ދިޔަ ދިމާލަށް ބަލަން އިނުމަށްފަހު އާސިމާވެސް ގޮސް ބަދިގެއަށް ވަނެވެ.

ބްރޭކް ގަޑިއަށްވުމާއެކު ޝަމްހާ ގޮސް ކެންޓީނަށް ވަނެވެ. ކޮފީއަކަށް އޯޑަރުކޮށްލުމަށްފަހު ގޮސް ހުސް މޭޒެއް ކައިރި އިށީނެވެ. ކޮފީ ގެނައުމާއެކު އެކަނި އިނދެ މަޑުމަޑުން ކޮފީ ބޮމުން ދިޔައެވެ. ކޮފީ ބޮމުން ދިޔައިރު އޭނަގެ ނަޒަރު އެއްދިމާލަކަށް ހުއްޓިފައިހުރުމުން ކޮންމެވެސް ކަމަކާމެދު ވިސްނަނީކަން ބަލައިލި މީހަކަށް އިނގޭނެކަން ކަށަވަރެވެ. މަޑުމައިތިރިކަމާއެކު ކޮފީ ބޮއެ ނިންމާލުމަށްފަހު ޝަމްހާ ކެންޓީނުން ނުކުތެވެ. ބްރޭކް ގަޑި ނިމެން ފުދޭވަރަކަށް ވަގުތު އޮތުމާއެކު އޮފީހުގެ ބިއްދޮށުގައި ހައްދާފައިވި ބަގީޗާއަށް ޝަމްހާ މިސްރާބުޖެހިއެވެ. އެތަނުގައި ފޮޅިފައިވި އެކި ކުލަކުލައިގެ މާތަށް ފެނުމުން އޭނަގެ ހިތަށް ކުޑަ ހަމަޖެހުމެއް ލިބިގެން ދިޔައިރު އެމާމެލާމެލީގެ ލުއިލުއި މީރުވަހުން ސިކުނޑި ތާޒާކުރުވިއެވެ. ބަގީޗާގައި ވަގުތުކޮޅެއް ހޭދަކޮށްލުމަށްފަހު ފޯނަށް ބަލަހައްޓާއިގެން ހުރެ ދާން ހިނގައިގަން ވަގުތު ފައި އެޅުނު ގޮތަކުން އަރިއަޅާލިއެވެ. ސިހުން ލިބުނު ޝަމްހާއަށް ދެލޯ ބޮޑުކޮށްލެވުނުއިރު އަގައިން ތޫލި އަޑެއް ބޭރުވިއެވެ. ވެއްޓެންދިޔަ ޝަމްހާގެ އުނަގަނޑުގައި ބާރުގަދަ ދެއަތުން އަޅުވާލާ ދަމާލުމާއެކު ޝަމްހާ ގޮސް ޖެހުނީ އެޒުވާނާގެ ހަށިގަނޑުގައެވެ. އިސްއުފުލާލަމުން ބަލައިލި ހިނދު އެހާ ގާތުން އަލޫފްގެ މޫނު ފެނި ވަގުތުން ޝަމްހާގެ ހިތުގެ ތެޅުން ބާރުވެގެން ދިޔައެވެ. ނޭވާ އަރުތެރޭގައި ތާށިވެ ފިނިވެގެން ދިޔައެވެ. އަލޫފްގެ ތޫނު ދެލޮލާއި އޭނަގެ ލޯ އަމާޒުވީ ވަގުތު އެތައް ހަނދާންތަކަކުން އޭނާ ވަށާލިއެވެ. އަލޫފްއަށްވެސް ޝަމްހާގެ މޫނަށް ނަޒަރު ހުއްޓާލައިގެން ހުރެވުނެވެ. އެމޫނު މަތިން މިހާރު ފެންނަނީ ތަފާތު އަސަރުތަކެކެވެ. ކުރީގެ ހަރުކަށިމަކާއި ކިބުރުވެރިކަމުގެ ސިފަ ލިބިފައިވި ޝަމްހާ މިހާރު އޭނައަށް ފެންނަނީ އަބަދުވެސް ހިމޭންވެފާ ހުއްޓައެވެ. އަލޫފް ބަލަބަލާ ހުއްޓާ ޝަމްހާގެ ދެލޮލަށް ތާޒާ ކަރުނަތައް ޖަމާވާން ފެށިއެވެ. އެކަމުން ހިތަށް ކޮންމެވެސް ވަރެއްގެ އުނދަގުލެެއްވެގެން ދިޔައިރު އޭނަގެ ނިތައް ރޫތައް ޖަމާވިއެވެ. ” ސޮރީ… ” ހިންދިރުވާލުމަށްފަހު ކަރުނަތައް ހިންދަން މަސައްކަތްކުރަމުން މަޢާފަށް އެދިފާ ޝަމްހާ އަލޫފް އާއި ދުރުވެލިއެވެ. އަދި އެންމެ ސިކުންތެއްވެސް މަޑުކުރުމެއްނެތި އެތަނުން ދިޔުމަށް ހިނގައިގަތެވެ.

ޝަމްހާ އެދިޔަ ބާރުމިނުގައި ގޮސް އޭނަގެ ކެބިންއަށް ވަނެވެ. ކެބިންގައި ހުރި ސޯފާގައި އިށީންދެ ދެލޯ މަރާ ބާރުކޮށްލުމާއެކު ދެލޮލަށް ޖަމާވި ކަރުނަތައް ކޯތާފަތުގައި ބޮސްދެމުން ރޮނގަކަށް ފައިބައިގަތެވެ. އަލޫފްގެ ލޯބި ލިބެން ނެތްކަން ހިތަށްވެރިވާ ކޮންމެ ފަހަރަކު އެދެލޮލުން ކަރުނަ އާދެއެވެ. އަލޫފްގެ މަޢާފު ދުވަހަކުވެސް ލިބެން ނެތްކަން ހަނދާންވުމުން ހިތުގައި ރިއްސާލައެވެ. އަލޫފްގެ އެތައް ޚިޔާލުތަކުން އޭނަގެ ސިކުނޑި ވަށާލުމާއެކު ބޮލަށް ބާރުކުރަން ފެށިއެވެ. އެޚިޔާލުތަކުން ދުރުވުމަށް ކަރުނަތައް ފޮހެލާ ސޯފާއިން ތެދުވުމަށްފަހު މޭޒު ކައިރިއަށް ގޮސް އިށީނެވެ. މޭޒު މަތީގައި އޮތް ފައިލް ނަގައި ގަނޑަކަށް ފަހު ގަނޑެއް ބަލަމުން ދިޔައިރު ކޮމްޕިއުޓަރުންވެސް ދޭތެރެ ދޭތެރެއިން އެއްޗެއް ޓައިޕްކޮށްލައެވެ. އެގޮތަށް މަސައްކަތުގައި ހޭދަކުރުމުން އެފަދަ ޚިޔާލުތަކުން ކޮންމެވެސް ވަރަކަށް ދުރުވެލެއެވެ.

ޑިއުޓީ ނިންމާލާފައި ޒިޔަލްއާއެކު ހޮސްޕިޓަލުން ނިކުން މިންހާގެ ލޮލުގައި ކާރަށް ލެނގިލައިގެން ހުރި އިއާން އަޅާއިގަތެވެ. ކަޅު ކުލައިގެ އަތް ކުރު ޓީޝާޓަކާއި ގަދަ ނޫ ކުލައިގެ ޖިންސުގައި ހުރިއިރު ޖިންސުގެ ޖީބަށް އަތް ޖަހާލައިގެން ހުރުމުން ނުހަނު ފިރިހެންވަންތައެވެ. ބޮލުގެ އިސްތަށިކޮޅު ސްޕައިކް ކޮށްލާފާވާއިރު އިއާންގެ އަސަރުގަދަ ދެލޯ ފޮރުވާލާފާވަނީ ކަޅު ކުލައިގެ އަވި އައިނަކުންނެވެ. ފެންނަ ކޮންމެ އަންހެން ކުއްޖެއްގެ ހިތް ކިޔާނެކަން ޔަގީނެވެ. ޒިޔަލް އާއި ދެމީހުން އިއާންގެ ގާތަށް މިސްރާބުޖެހިއެވެ. ”ބްރޯ… މަބުނީ ކެއުން ދޭންޖެހޭނޭ އިނގޭ… ” އިއާންގެ ކޮނޑަށް އަތް ވައްޓާލަމުން ޒިޔަލް އެެހެން ބުނެލީ އެއްލޯ މަރާލަމުންނެވެ. ” ޔަގީނެއްނު… އެހާ ދުވަސްފަހުން އިންތިޒާރަށް ނިމުމެއް އައިމަ ކެއުން ދޭންވާނެތާދޯ… ” އައިނު ލޮލާ ދުރުކޮށްލަަމުން ބުނެލިއެވެ. މިންހާ އެއްވެސް އެއްޗެކޭ ނުބުނެ ހިނިތުންވުމަކާއެކު އެދެމީހުންގެ ވާހަކަތައް އަޑު އަހަން ހުއްޓެވެ. ” ޒިޔަލް… ކުޅެން ދާންވާނެ އިނގޭ… ” އިރުކޮޅަކު އެތަނުގައި ހުރެލުމަށްފަހު ޒިޔަލް ދާން ހިނގައިގަތުމާއެކު އިއާން ބުނެލިއެވެ. ” އާނ… ޗޭންޖްކޮށްލައިގެން ދާނަން… ” ފަސްއެނބުރި ބަލައިލުމަށްފަހު ޒިޔަލް އެހެން ބުނުމާއެކު ބޯ ޖަހާލަމުން އިއާން މިންހާއަށް ކާރަށް އެރުމަށް އިޝާރާތްކުރިއެވެ.

އިއާންވެސް ކާރަށް އަރައި މަންޒިލަށް ދިޔުމަށް ދަތުރު ފެށިއެވެ. އިއާން ގޮވާލުމާއެކު ލޯގަނޑުން ބޭރު ބަަލަން އިން މިންހާ ހޫމް ލައްވާލިއެވެ. ”އަހަރެން މަންމަ ކައިރި ބުނެފިން އަހަރެމެންގެ މިގުޅުމުގެ ވާހަކަ… ” އިއާންގެ ވާހަކަ އަޑުއިވިފައި މިންހާއަށް ސިހިފައި އިއާންގެ މޫނަށް ބަލައިލެވުނެވެ. ” ދެން… އާސިމާއްތަ ކީކޭ ބުނީ… ރުޅިއައިސްފަތަ ހުރީ… ” ކަންބޮޑުވެފައި އިނދެ މިންހާ އަހާލިއެވެ. ” މަންމަ ވަރަށް އުފަލުން ހުރީ… އަބަދުވެސް މަންމަ ބޭނުންވީ މިންނު އަހަރެންގެ ހަޔާތަށް އަންނަން… އެހެންވީމަ އަދި ކިހާ އުފާވާނެ… ދެން ތިހާ ލޯބި ކުއްޖަކާ ގަބޫލުނުވާނީވެސް ކާކު… ” މިންހާއަށް އަވަސް ނަޒަރެއްދެމުން އިއާން ވާހަކަ ދެއްކިއެވެ. އިއާންގެ ވާހަކަތަކުން މިންހާގެ ހިތަށް ހަމަޖެހުމެއް ލިބިގެން ދިޔައެވެ. ”  މިގުޅުން ސިއްރުކުރާކަށް ބޭނުމެއްވެސް ނޫން… އަހަރެން ބޭނުންވަނީ ވީހާވެސް އަވަހަކަށް ޖާން އަހަރެންގެ ހައްގަކަށް ހަދަން… ” މިންހާއަށް ބަލައިލަމުން އިއާން ބުނެލިއެވެ. ” އަހަރެންވެސް… ” ލަދުރަކި ހިނިތުންވުމަކާއެކު މިންހާ ބުނެލިއެވެ. މިންހާ ގެއަށް ލުމަށްފަހު އިއާން އޭނަގެ ގެއަށް ދިޔުމަށް ކާރުގައި ދަތުރު ފެށިއެވެ. ގެއަށް ގޮސް އަވަހަށް އެއްޗެހި ބަދަލުކޮށްލައިގެން ފުޓުބޯޅަ ކުޅެން ދަނޑަށް ދިޔުމަށް އަވަސްވެގަތެވެ. އެއީ އިއާންގެ އާދައެވެ. ފުޓުބޯޅައަކީ އިއާން ނުހަނު ލޯބިވާ ކުޅިވަރަކަށްވެފައި ޑިއުޓީ ނޯންނަ ދުވަހެއްނަމަ ގިނަ ދުވަސްތަކުގައި ކުޅެން ދާނެެއެވެ. އެކަމުން ހަށިގަނޑަށް އެތައް ފައިދާއެއް ކުރާއިރު އަމިއްލަ ހިތްހަމަޖެހުންވެސް ލިބިގެންދެއެވެ.

އޮފީސް ނިންމާލާފާ ތިން މީހުނަށްވެސް ގެއަށް އާދެވުނުއިރު ގަޑިން ހަތަރު ގަޑި ބައިވެ ބޮޑުވެއްޖެއެވެ. އޭރު ބޯކޮށް ވާރޭ ވެހެމުން ދިޔައެވެ. އިރުއިރުކޮޅުން ގުގުރިއެެއް ޖަހާލާ އަޑުވެސް އިވިގެންދެއެވެ. ތިން މީހުންވެސް ބަނޑުހައިވެފައި ހުރުމާއެކު އަވަސްވެގަތީ މެންދުރުގެ ކެއުމަށް އިންސާފުކުރާށެވެ. ތިން ކުދިންނާއެކު ޒާހިޔާވެސް ކެއުމުގައި ބައިވެރިވިއެވެ. ކައި ނިމުމުން ތިން މީހުންވެސް ގޮސް ކޮޓަރިއަށް ވަނެވެ. ވެފައިހުރި ވަރުބަލިން ފެންވަރާލައިގެން އެނދުގައި ޖައްސާލިތަނާ ތިން މީހުންވެސް ނިދީގެ ފުން ކަނޑަށް ގެނބިގެން ދިޔައެވެ.

ރޭގަނޑުގެ ވަގުތެވެ. ސިޓިންރޫމުގައި އިނދެފައި ޒަހާ ގޮސް ނާއިލްގެ ކޮޓަރީގެ ދޮރުގައި ޓަކިދިނެވެ. މާގިނަ އިރެއްނުވެ ނާއިލް ކޮޓަރީގެ ދޮރު ހުޅުވާލިއެވެ. ” ބިޒީ ގަޑިއެއްތަ… ފޫހިވެގެން… ” ޒަހާ މޫނަށް ވައްތަރެއް ޖައްސާލަމުން ބުނެލިއެވެ. ނާއިލް ދެފަރާތަށް ބޯ ހޫރުވާލިއެވެ. ” ވަނަސް އޯކޭތަ… ” ޒަހާ އަހަން ނާހަން ހުރެފައިވެސް އަހާލިއެވެ. ” ޔެއަރ ޝުއަރ… ” އެތެރެއަށް ވަނުމަށް ތަން ދައްކަމުން ނާއިލް އެހެން ބުނުމާއެކު ޒަހާ ހިނިތުންވެލަމުން ކޮޓަރިއަށް ވަނެވެ. ދެމީހުން ގޮސް ކޮޓަރީގެ އެއްފަރާތުގައި ހުރި ސޯފާގައި އިށީންދެ ވާހަކަ ދައްކަން ތިއްބެވެ. ބައެއް ފަހަރު ކޮޓަރީގައި ދެމީހުންގެ ހުނުމުގެ އަޑުވެސް ގުގުމާލައެވެ. ” ނާއިލް އަޝްރާދެކެ ލޯބިވޭދޯ… ” މޫނު މައްޗަށް ސީރިއަސްކަން ގެނުވަމުން ޒަހާ ބުނި އެއްޗަކުން ނާއިލްއަށް ސިހުން ލިބުނެވެ. އޭނައަށް ހަމައަކަށް އެޅިލަން ވަގުތުކޮޅެއް ނެގިއެވެ. ” އަހަންނަށް އިނގޭ ނާއިލް އަޝްރާދެކެ ލޯބިވާކަން… މިރަށަށް އައިތާ އަދި މާގިނަ ދުވަސްތަކެއް ނުވިނަމަވެސް ތިދެމީހުންގެ ހަރަކާތަކުން އަހަންނަށް ޔަގީންވެއްޖެ… ދެމީހުން އެކަކު އަނެކަކަށް ބަލާލާާ ގޮތާ އެކަކު އަނެކަކު ފެންނަ ހިސާބުގައި ހަތަކާތްތައް ހުންނަ ގޮތުން ކޮންމެ މީހަކަށްވެސް އެނގޭނެ… ނާއިލް އަހަންނާ ވާހަކަ ދައްކާއިރު އަޝްރާގެ މޫނު މައްޗަށް އަރާ ކުލަވަރު ފެނި ބައެއް ފަހަރު ނުހީ ހުރެވެނީ ކިރިޔާ… ހެހެހެ… ޝީ ފީލްސް ޖެލަސް… އިތުރަށް ދެން އަޝްރާ ނުތަޅުވާ ލޯބި ހުށައަޅާ… ނޫނީ ތެޔޮނާށި ކާޅު ޖަހައިގަންފާނެ… ޝީ ލަވްސް ޔޫ… ދެމީހުންވެސް އެކަކު އަނެކަކު ހީކުރާނެ އެއްޗެއް ނޭނގޭތީ ނުބުނެ ހުންނަނީހެން ހީވަނީ… މިހާރު ހަމަގައިމުވެސް ނާއިލްއަށް އެނގޭނެ އަޝްރާވެސް ލޯބިކަން… ތިދެމީހުން ވަރަށް ގުޅޭ… އަހަންނަށް ހަމަޔަގީން އަޝްރާގެ ޖަވާބަކަށް ވާނީ އާއެނކޭ ކަން… ” ހިނިތުންވުމެެއްގައި އިނދެ ޒަހާ ދެއްކި ވާހަކަތަކުން ނާއިލްއަށް ބޭއިޚްތިޔާރުގައި ހިނުތުންވެލެވުނެވެ. އެކަމާ އެއްބަސްވުމުގެ ގޮތުން ނާއިލް މަޑުމަޑުން ބޯ ޖަހާލިއެވެ.

އެނދުގައި އޮވެއޮވެ ނިދި ނައުމުން އަޝްރާ ކޮޓަރިން ނުކުތެވެ. ނާއިލްގެ ޚިޔާލުތައް އޭނައަށް މިރޭ މާބޮޑަށް އުނދަގޫކުރަމުން ދިޔައެވެ. ކޮޓަރިން ނިކުން އަޝްރާއަށް ނާއިލްގެ ކޮޓަރިން ހީހީފާ ޒަހާ އާއި ނާއިލް ވާހަކަ ދައްކާ އަޑު އިވިފައި އޭނަގެ ހިތަށް އުނދަގޫވިއެވެ. އޭނަގެ ހިތުގައި ޖެހުނެވެ. ޒަހާގެ ބަދަލުގައި އޭނާ ވުމަށް އެދެވުނެވެ. އިރުކޮޅަކު އެތަނުގައި ހުރެލުމަށްފަހު އެބައިގައި ނުކުމެވެން ހުންނަ ބޮޑު ބެލްކަންޏަށް ނިކުތެެވެ. ބެލްކަނީގެ ރެއިލިން ކައިރި ހުއްޓިލަމުން އަޝްރާ އުޑު މައްޗަށް ނަޒަރު ހުއްޓާލިއެވެ. އުޑުމަތި ވަނީ ކަޅު ވިލާތަކުން ބައްދާލާފައެވެ. ހީވަނީ ހަމަ ދެންމެ ދެންމެވެސް ވާރޭ ވެހިފާނެހެންނެވެ. ކަޅު ބޯ ވިލާތަކުން އުޑުމަތި ބައްދާލާފައިވުމުން އެންމެ ތަރިއެއްވެސް ފެންނާކަށް ނެތެވެ. ހަވީރު ބޯކޮށް ވާރޭ ވެހުމުގެ ސަބަބުން މާހައުލުގައި ވަނީ ތެތްފިނިކަމެވެ. ރެއިލިންގައި ބާރަށް ހިފަހައްޓާލަމުން އަޝްރާ ފުން ނޭވާއެއް ދޫކޮށްލިއެވެ. ހީވާގޮތުން އެތެރެ ހަށީގައި އުފެދިފައިވި ހައިޖާނުގަނޑަށް ލުއިކަމެއް ހޯދޭތޯ މަސައްކަތްކުރަނީއެވެ. ފަހަތުގައި މީހަކު ހުރިހެން ހީވުމުން ފަސްއެނބުރި ބަލައިލިއިރު ނާއިލް އައިސް އޭނަ އާއި އަރާ ހަމަކުރަނީއެވެ. ވަގުތުން އަޝްރާގެ ހިތް ނުތަނަވަސްވާން ފެށިއެވެ. ނާއިލްއަށް ފަސްދީ ކުރިންވެސް ހުރި ގޮތަށް އަޝްރާ ރެއިލިން ކައިރި ހުއްޓިލިއެވެ. ”ނުނިދަންދޯ އަދިވެސް… ” އަޝްރާ ކައިރީ އައިސް ހުއްޓިލަމުން ނާއިލް ބުނެލިއެވެ. އަޝްރާ ހަމައެކަނި މަޑުމަޑުން ހޫމް ލައްވާލީއެވެ. އެއާއެކު އަނެއްކާވެސް އެދެމެދަށް ހަމަހިމޭންކަން ވެރިވެގަތެވެ.

ހިތުގެ އިހުސާސްތައް ހާމަކުރުމަށް ދެހިތްވެސް ދިޔައީ ކެނޑިނޭޅި ބާރު އަޅަމުންނެވެ. ދެމީހުން އެހާ ގާތުގައިވުމުން ހިތުގެ އިހުސާސްތައް ހަމައަކަށް އަޅުވަންވީ ދެމީހުނަށްވެސް އުނދަގޫކަމަކަށެވެ. ކޮންމެ މީހެެއްގެ ނަޒަރުވެސް ބަނަވެފައިވި އުޑުމައްޗަށް ހުއްޓިފާވީއިރު އަނެކާގެ ފަރާތުން ބަހެއް ނަމަވެސް ބުނެލާތޯ އިންތިޒާރު ކުރެވެމުން ދިޔައެވެ. ހިނދެއް ހިނދަކަށް ގަދަވަމުން ދިޔަ ވަޔާއެކު ވާރޭގެ ކަނިތައް ދެންމެ ދެންމެ ދުނިޔެއަށް އަމާޒުވެދާނެހެން ހީވެއެވެ. ކުއްލިއަކަށް ވިދާލި ވިދުވަރާއި ޖަހާލި ބާރު ގުގުރީގެ އަޑާއެކު އަޝްރާއަށް ދެލޯ މަރާ ބާރުކޮށްލަމުން ނާއިލްގެ ހަށިގަނޑުގައި ބައްދާލެވުނެވެ. އޭރު އެހިތް ދިޔައީ އޮބިނޯންނަ ވަރަށް ތެޅެމުންނެވެ. ލިބިގެންދިޔަ ސިހުމާއެކު ނާއިލްއަށް ހަރަކާތެއްނުކޮށް ހުރެވުނެވެ. މަޑުމަޑުން އަޝްރާގެ ހަށިގަނޑުގައި ދެއަތް ވަށާލުމަށް ނާއިލް އޭނަގެ ދެއަތް އުފުލާލިއެވެ. އެހެނަސް އެވަގުތު ހޭވެރިކަންވި އަޝްރާ ނާއިލް އާއި ދުރުވެލިއެވެ. ނާއިލްގެ މޫނަށް ބަލައިލުމަށްފަހު އިތުރަށް އެންމެ ސިކުންތަކުވެސް މަޑުނުކޮށް އެތަނުން ދިޔުމަށް ހިނގައިގަތެވެ. އަޝްރާ ބަލައިލި ގޮތުން ހީވީ ބިރެއް ފެނުނުހެންނެވެ. އަޝްރާއަށް ހުއްޓެން މަޖުބޫރުވީ ކުރިއަށް ނެގި ފުރަތަމަ ފިޔަވަޅާއެކު ނާއިލް އޭނަގެ އަތުގައި ހިފެހެއްޓުމުންނެވެ. ދެލޯ މަރާ ބާރުކޮށްލަމުން އަޝްރާއަށް ހުރި ތަނުގައި އެއްވެސް ހަރަކާތެެއްނެތި ހުރެވުނެވެ. އޭރު އޭނަގެ ހިތް ހީވަނީ ބޭރަށް ނުކުމެދާނެ ހެންނެވެ. ދެލޯ މަރާ ތަގުޅިކޮށްގެން ހުރި އަޝްރާއަށް އިތުރު ސިހުމެއް ލިބުނީ ލުއްކެއްޖަހާ ނާއިލް އޭނަ އަތުގެ ތެރޭގައި ހައްޔަރުކޮށްލުމުންނެވެ. އެވަގުތު ދެލޯ ބޮޑުކޮށްލަމުން ނާއިލްގެ މޫނަށް ބަލައިލެވުނެވެ. ނާއިލްގެ ދެލޮލުން ފެނިލި އަސަރަކުން އަޝްރާއަށް ހިންދިރުވާލެވުނުއިރު ހިތަށް ބުނެދެން ނޭނގޭ ގޮތެއްވެގެން ދިޔައެވެ. ހިތުގެ ހިނގުން ބާރުވެ ނޭވާވެސް ލާން ނޭނގިފައި އަޝްރާއަށް އެތޫނު ދެލޮލަށް ބަލަން ހުރެވުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.