އެ ކީއްވެހޭ ހިތަށް މަގޭ މިހެންވަނީ 39

” ދަރިފުޅާ, މި ބައްޕައަށް މާފް ކުރޭ, ބައްޕަމެން ވަރަށް ބޮޑަށް ދަރިފުޅު އެކަހެރި ކޮއްފި, ދެން އެހެނެއް ނުވާނެ, ދަރިފުޅު ނުރޮއެ, ބައްޕަ ވަޢުދުވަން ބައްޕަގެ މި ދަރިފުޅަށް, ދަރިފުޅުގެ ލޯބި ހޯދާ ދޭނެ ކަމަށް, މީ މި ބައްޕަ ވާ ވައުދެއް” އާމިރު އެހެންބުނުމާއެކު އަރުޝް ބައްޕާއޭ ކިޔައި އަނެއްކާވެސް ބައްދައިގަތެވެ.

ބައްޕައަކާއި ދަރިފުޅުގެ ލޯބި ލޯބި މި ވަގުތު ފެންނަ ކޮންމެ މީހެއްގެ ހިތަށް އަސަރު ކުރާހާ އެދެ ބަފައިންނަށް ވަނީ އަސަރު ކޮއްފައެެވެ. އާމިރު ވެއްޓުމުގެ ސަބަބުން ލިބުނު ކުދި ކުދި ޒަހަމްތަކަށް ޝިފާ ލިބުނު ފަދައެވެ.އަރުޝްގެ ހިތުގައި އާމިރުއަށް އޮތް ހުރިހާ ޝަކުވާއެއް ވެސް ފިލާ ދިޔަކަހަލައެވެ. އާމިރު އަރުޝްގެ ގައިން ދޫކޮއްލުމަށްފަހު އަރުޝް ގެންގޮސް ސޯފާ ގައި ބޭންދިއެވެ. އަދި ފެންތައްޓެއް ގެނެސް އަރުޝްއަށް ދިނެވެ. މައިންބަފައިންނަށް ދަރިން ދުވަހަކުވެސް ބޮޑެއް ނުވާނޭ ބުނަނީ މިހެންވެކަން އާމިރުއަށް އެނގުނެވެ. އެންމެ ތުއްތު ކުދިން މަސަލަސް ކުރާގޮތަށް މަސަލަސް ކުރަން އުޅުމަކީ ދަރިން ބޮޑު ނުވާ ކަމުގެ ހެއްކެކެވެ.

ދަރިއަކު ހުރިކަން އާމިރުއަށް އިހްސާސް ކުރެވި, މީގެ ކުރިން ދުނިޔޭގެ ވަގުތީ އުފަލަށް އިސްކަންދެވުނީ ހުރިހާވެސް އެއްޗަކީ ފައިސާ ކަމުގައި ދެކެވުނީތީއެވެ. އެހެންނަމަވެސް މިއަދު ލޯތްބަކީ ކިހާ މާތް, އުފާވެރި, އަދި ހިތާމަ އެކުލެވިގެންވާ ގުޅުމެއްކަން އާމިރުއަށް އިހްސާސް ކުރެވިއްޖެއެވެ.

” ދަރިފުޅާ ބައްޕައަށް މާފްކުރޭ, ބައްޕައަަށް އެނގޭ ދަރިފުޅު ނުބުންޏަސް ދަރިފުޅަށް ވަރަށް ދެރަ ދެވިއްޖެކަން, ދަރިފުޅު އުފަންވީ ސުރެ ބައްޕަ އުޅުނީ ލިބޭ ރުފިޔާ މަދުވެގެން ރުފިޔާ އެއް ކުރުމުގަ, ދަރިފުޅާ ދޭތެރޭ ކުޑަކޮއްވެސް ވިސްނާލާނެ ފުރުސަތެއް ނުލިބި, އެކަމް ބައްޕަ މިއަދު މިހުރީ ދަރިފުޅަށް ދަރިފުޅުގެ އުފާ ހޯދަ ދޭން ތައްޔާރަށް, ބައްޕަގެ ފުރާނައިން ގުރުބާން ވެގެން ވިޔަސް ސާރާގެ ލޯބި ހޯދަދޭނަން, ސާރާ ފެނުނު ފުރަތަމަ ދުވަހުވެސް ބައްޕައަށް އެނގުނު އެއީ ވަރަށް ރަނގަޅު ކުއްޖެއްކަން, ޕާޓީ އޮތް ރޭވެސް ބައްޕަގެ ހިތްބުނި, އަދި އެރޭ ތިދެ މީހުނީ ދެމެދު ހިނގި ކަންތަަށްވެސް ބައްޕައަށް އެނގުން” އާމިރު އަރުޝްއަށް ބަލާލަމުން ބުނެލިއެވެ. އާމިރުގެ ވާހަކައިން އަރުޝް ހައިރާންވި ނަމަވެސް އެއްޗެކޭ ނުބުނެއެވެ.

ސާރާވެސް ދަރިފުޅު ދެކެ ވަރަށް ލޯބިވޭ, އޭނައަށް ދިމާވި ގޮތުން ދެރަވެފަ ހުރީމަ އެގޮތަށް ކަންތައްކުރަނީ” އާމިރު ކުޑަކުއްޖަކަށް ވިސްނައިދޭ ފަދައިން އަރުޝްގެ ބުރަކަށީގައި ފިރުމާލަމުން ބުނެލިއެވެ. އަރުޝް ފެންތަށިން ފަހަރަކު ކޯވަރެއް ބޮމުންދެއެވެ. އޭރު އަރުޝްގެ ދެލޯ ވެސް ވަނީ ރަތްވެފައެވެ.
” އެކަމަކު މަންމަ” އަރުޝް އެހިސާބަށް ބުނުމަށްފަހު ހުއްޓާލީ އިތުރަށް ބުނާނެ އެއްޗެއް ނޭނގިގެންނެވެ.
” ދަރިފުޅު ނުވިސްނާ, ބައްޕަ މިހުރީނު, ބައްޕަ އަބަދުވެސް ދަރިފުޅާއެކީ ވާނަން, ދަރިފުޅު ބޭނުން ކޮންމެ ކަމެއް ކޮއްދޭނަން, ކުރިންވެފަ ހުރި ކަންތަށް ހަނދާން ނައްތާލާ” އާމިރު މިހެންބުނެ އަރުޝްގެ ގައިގަ ލޯތްބާއެކު ބައްދާލިއެެވެ. އަރުޝްއަށް ހުރިހާ އުފަލެއް ލިބުނުކަހަލައެވެ. ދުވަހަކުވެސް އިހްސާސް ނުކުރެވޭހާ އުފާވެރިކަން މިއަދު އިހްސާސް ކުރެވުނެވެ.

ހަފީޒާ ފޯނާ ކުޅެމުން އައިސް ހައިފާގެ ކޮޓަރި ދޮރު ހުޅުވާލީ އެފްބީ ޕޭޖަކުން ފެނުނު ވެޑިންގް ޑްރެސް އެއް ދެއްކުމަށެވެ. ކޮޓަރިއަށް ވަތް އިރު ދެކޮޅަށް ހިނގަ ހިނގާ ހުރި ހައިފާ ފެނިފައި ނިތަށް ރޫ އަރައިގެންދިޔައެވެ. ހަފީޒާ ފެނި ހައިފާގެ ފިޔަވަޅު ތަކަށް މަޑު ޖެހުމެއް އައެވެ. ހަފީޒާއަކީ ހައިފާ ހުންނަ ގޮތަކުންވެސް ކަމެއް ވެއްޖެކަން ދެނެގަންނަ މީހެކެވެ.

” ދޮގު ނަހަދާ ބުނޭ, ކޮން ކަންތައް ގަޑެއް ހިންގާލައިގެން ތިއުޅެނީ” ހަފީޒާގެ އެ ސުވާލުން ހައިފާގެ ހިތް ހީވީ ހުއްޓުނު ހެންނެވެ. ބުނާނެ އެއްޗެއް ނޭނގި މީހާ ދާހިތްލާ ފޯވާން ފެށިއެވެ. އެވަގުތު ހައިފާގެ ފޯން ރިންގްވާން ފެށުމުން ހައިފާ ފޯނު ނުނަގަން ހުރެފަވެސް ތެޅިތެޅި އޮތް ހިތަކާ އެކު ފޯނު ކަންފަތުގައި ޖަހާލިއެވެ. ހަމަ އެވަގުތު ހަފީޒާ ބަލާކަށް ނުހުރެ ފޯނު ދަމައިގަނެ ސްޕީކަރަށް ލިޔެވެ.

” ބޭބް” ޑޯންޓް ވޮރީ, ބޭސް ހޯދައިފިން, މިރޭ ގެންގޮސް ދޭނަން, ކައިވެނި ކުރަންވާ އިރަށް ތިކަން ނިމޭނެ، އެކަމް ބަލައިގެން އުޅެއްޗޭ, މީހަކަށް ޝައްކެއް ވިޔަ ނުދޭތި ހައި ޕްރެގްކަން” އެމީހާގެ އެ ޖުމްލަޔާއެކު ހައިފާއަށް ދެލޯ މަރާލެވުނެވެ. ހަފީޒާއަށް ސިއްރުކުރަން ބޭނުންވި ކަންތަށް ހަފީޒާގެ ކުރިމަތީ މިއޮތީ ހާމަވެފައެވެ. ހަފީޒާގެ އަތުން ފޯނު ވެއްޓުނީ ލިބުނު ހަބަރުގެ ސަބަބުންނެެވެ. އަދި ހައިފާގެ ބަނޑަށް ބަލާލެވުނީ ރުޅިވެރި ނަޒަރަކުންނެެވެ.
” ކަލެއާ ހެދި ކިހާ ބޮޑު އުނދަގުލެއް, އަނެއް ފަހަރު އަނެއް ހަކަންތަށް, ހައްތާވެސް މަގްސަދަށް ވާސިލް ނުވެވޭ ވަރު އެބަ ކުރެޔޭ, ކާކުގެ ދަރިއެއް ބަނޑުގަ ތި އޮތީ ” ހަފީޒާ ހައިފާގެ ކުރިމައްޗަށް އަރާ ސުވާލުކުރިއެވެ. ހައިފާ އިސްޖަހައިގެން ހުރި ގޮތަށް ހުރީއެވެ.

” ކާކުގެ ދަރިއެއްހޭ ތީ” ހަފީޒާގެ ބާރުގަދަ އަޑާއެކު ހައިފާ ދިޔައީ ސިއްސައިގެންނެވެ.
” ނޭ ނޭނގެ” ހައިފާގެ ޖަވާބުން ހަފީޒާގެ އަތުގެ ހޫނު ހަމަލާއެއް ހައިފާގެ ކަންކަށި މައްޗަށް އެރިއެވެ. ވީ ތަދުން ހައިފާ ރޮއެގަނެ އައްދިއްޔޯތް އޭ ބުނެ އެ ޖެހި ތަނުގަ އަތް އެޅުނެވެ.

” އައްދިއްޔޯތް ބުނި އިރު ނޭނގޭތަ މިހެންވާނެކަމެއް, ކައިވެނި ކުރަން ކައިރިވެފަ އޮއްވާ ތިޔޮއް ހޭވި ހަޑިއެއް ބަލާބަލަ, ދުވަހަކުވެސް އަހަރެން ބުނާ ކަމެއް ނުކޮއް ހުރެގެން އަހަރެންގެ ބޯ ގޮވާ ކަންތަށް ކުރާނީ” ހަފީޒާ ހީވަނީ ރުޅި އައިސްގެން ހަލާކުވެދާނެ ހެންނެވެ. އެ ރުޅިން ހައިފާވެސް ފިއްސަން އުޅޭ ކަހަލައެެވެ. ހަދާނެ ގޮތެއް ނޭނގި ހަފީޒާ ބޮލުގައި އަތް އަޅައިގެން ހުރެ ދެކޮޅަށް ހިނގަމުންދެއެވެ. ހައިފާ އެނދުމަތީ އިށީނެވެ. އޭރުވެސް އެ ޖެހި ތަނުން ދިލަ ނަގާތީ އިނީ އެތާ އަތް އަޅައިގެންނެވެ.

“ބުނަން ދެންވެސް އަހަރެން ބުނާ ގޮތް ހަދާ, ތިކަމެއް ވަކި ކޮޅެއްގަ ޖެހެންދެން ބޭރަށް ނުނިކުމެ ހުންނާތި, މިހެން ބުނީމަ އަހަރެންނަށް ދޮރުން ނުނުކުމެވި އުޅެނިކޮށް ދުއްވައި ގަންނާނީ ކީ ނޫން”ހަފީޒާ އެހެންބުނެ ނުކުމެގެން ދިޔައީ ކުދި ކިޔަމުންނެވެ.

އާމިރު ކޮޓަރިއަށް ވަތްގޮތަށް އެނދުމަތީ ދެ އަތް ޖޯޑު ކޮއްލައިގެން އިނެވެ. ބެލެވޭ ގޮތުގައި އާމިރު ކަމަކާ ވިސްނަނީއެވެ.

” އަހަ, ތައްޔާރު ނުވަންތަ, ޗެކިންއަށް ދާންޖެހޭނެ އެއްނު ކުރިން” އަރީޝާ ކޮޓަރިއަށް ވަންނަމުން ބުނެލިއެވެ. އަރީޝާގެ ޖުމްލަ އަޑު އިވޭ ވަރަށް ވުރެ އާމިރުގެ ވިސްނުންވަނީ ވަރަށް ބޮޑު ކަމަކަށް ގެއްލިފައެވެ. އަނެއްކާވެސް އާމިރު ކައިރީ އިށީނދެ ދެވަނަ ފަހަރަށްވެސް ހަމަ އެ ސުވާލު ތަކުރާރު ކުރިއެވެ.

” މިދަތުރު އަހަރެންނެއް ނުދާނަން, އެމީހުންނަށް އޮންނާނީ އަންގާފަ އޮފީހުގެ ގަފޫރު ދާނޭ, އެމީހުންނަށްވެސް އެކަހަލަ ފުރުސަތު ދޭންވާނެ އެއްނު” އާމިރު ހަމަޖެހިލަމުން ބުނެލިއެވެ.
” އެ ގަފޫރުތަ, އަަހަރެން އެވަރަށް އޭނަ ނުވައްދާށޭ ބުނީމަވެސް އޮފީހަށް ވައްދާފަ, އަނެއްކާ މިހާރު އޭނަ ފޮނުވަން, ކިހިނެއް ވެގެން ތިއުޅެނީ, އަހަރެމެންގެ ފެންވަރާއި ގާތްވެސް ނުކުރާ މީހެކޭ އެއީ” އަރީޝާގެ ބަސްބަގު ހުރި ގޮތުން އާމިރު ވަރަށް ހިތްހަމަ ނުޖެހުނެވެ.
އެކަން އާމިރު ގެނައި ހަަރަކާތުންވެސް ވަރަށް ރަނގަޅަށް އެނގުނެވެ. އެ އިން ތަނުން ތެދުވެ ފޮއްޓަށް އަޅާފަ ހުރި އެއްޗެހިތަށް ނަގަންފެށީ އަރީޝާ ދެކެ ހިތްހަމަ ނުޖެހުމުންނެވެ.

” ކީއްވެތަ އެއްޗެކޭ ނުބުނީ ތިކަަަހަލަ ކަމެއް ކުރާއިރު އެންމެ ފަހަރަކުވެސް އަހަރެން ކައިރީ އަހާލަން ކީއްތަވާނީ” އަރީޝާ ހިތްހަމަ ނުޖެހިފަ ބުންޏެވެެ.

” އަހަރެން އެއްޗެކޭ ބުނީމަ ބުނާ މީހާ ގޯސްވާނީ, ގަފޫރު އާ ދިމާލަށް ތިހެން ބުނާއިރު ކިހިނެއް އެނގެނީ މާދަމާ އަހަރެމެން އޭނަގެ ހާލަށް ނުވެއްޓޭނެކަމެއް, ރުފިޔާ މަދުވެގެން ދުވާލު ހަތަަރު ދަމު އެކަމުގަ ނަމާދެއް ނުކޮށް އުޅުން އިރު އެއްވެސް އެއްޗެކޭ ހިތަކަށްވެސް ނާރަ, އެވަރަށް މަސައްކަތް ކުރީމަވެސް އަހަރެމެންގެ ހިތް ފުރުނުތަ, އަހަރެމެން މިއޮއް ހުރިހާ ދުވަހު އެ އެއްކުރި ފައިސާ އަހަރެމެން މަރުވެގެންދާ އިރު ގެންދެވޭނެތަ, އަދި އެ ފައިސާއިން އަަހަރެމެން ކޮށްފަ ހުރި ފާފަ ފުހެވޭނެތަ, އަތުން މަދުވާނެތީ އެހީއަށް އަންނަ މީހުންނަށް އެހީ ނުވާއިރު ދެން ކާކަށް އެހީވާނީ, އަހަރެމެންގެ ހުރި ހަމަ އެކަނި ދަރިފުޅަށް އަޅާލެވުން ނަމަ އެއްނު އެހެންމީހަކަށް އަދި އަޅާލެވޭނީ” އާމިރުގެ އަޑު އިސާހިތަކު ބެދުނެވެ. ދެލޯ ފެންކަޅިވެ ދެންމެ ދެންމެ ރޮވި ދާނެހެން ހީވެއެވެ. އާމިރު ދައްކަމުން ދިޔަ ވާހަކަ އަޑުއަހަން ޖެހި ބުދެއްހެން އަރީޝާ އިނެވެ.

“މިއަދު އަހަރެން ވަރަށް ދެރަވެއްޖެ, ކުރިން އުޅުނު ހުރިހާ ގޮތެއް ލޯ ކުރިމަތީ ސިފަވޭ, އަހަރެން އެކުއްތަކަށް ތައުބާވަން, އަރީޝާވެސް ތިލާ ހެދުންތަށް ދޫކޮއްލުމަށްފަހު، ގައިގެ ވަނާތަށް ނޭނގޭ ދޫ ހެދުންލާފަ ބުރުގާ އަޅަންފެނޭ, އަހަރެން މި ބުނި އެއްޗެއް ވިސްނޭނެ ކަމަށް އުއްމީދު ކުރަން” އާމިރު މިހެން ބުނެ މަޑުވެސް ކޮއްނުލާ ނުކުމެގެެންދިޔައެވެ. އާމިރު ދިޔަ ދިމާލަށް ބަލަހައްޓައިގެން ގަބޫލު ނުކުރެވިފަ އިނީ އެއީ ހަމަ އާމިރު ބާއޭ ހިތަށް އަރާތީއެވެ.

” ކޮންފަދަ ކަންތައްގަޑެއް މީ, ކުއްލިއަކަށް މިހާ ބޮޑު ބަދަލެއް މިއައީ ކީއްވެ, މިވީހާ ދުވަހު ނުދައްކާ ވާހަކަ މިއަދު ވަކި ކީއްކުރަން އެ ދެއްކީ, ވަރިހަމަ އަހަރެން އުޅޭ ގޮތަކަށް ނުބެހެވޭނެ, އެހެން ހަމަ ހުންނަން ޖެހޭނީ” އަރީޝާވެސް ގޮތް ދޫކުރަން ބޭނުން ނުވިއެވެ.

ވަގުތުތަށް ފާއިތުވަމުންގޮސް ރޭގަނޑުގެ ވަގުތެވެ. ސާރާ ފައުޒާން ނިންދަވާލުމަަށް ފަހު ފަޒީލްއަށް ކާން ހެދުމަށްޓަަކައި އުޅުނެވެ. އޭރު ފަޒީލް ސޯފާގައި ދެލޯ މަރާލައިގެން ނިތްކުރިމަތީ އަތް ބާއްވާލައިގެން އޮތެވެ. ބަލާބެލުމަށް ނިދާފަކަމެއް ނުވަތަ ފުން ވިސްނުމަަކަށް ގެއްލިފަ ކަމެއް ނޭނގެއެވެ. ސާރާ ކާން ހެދުމަށްފަހު ފަޒީލް އޮތް ސޯފާޔާ ޖެހިގެން އިން ސޯފާ އިށީނދެ ދެފަހަރަކު ފަޒީލްއަށް ގޮވާލިއެވެ. ފަޒީލް ދެލޯ ހުޅުވާލުމުން ކާން އައުމަށް ބުނެލިއެވެ. އެހިނދު ފަޒީލް ހިނިތުންވެލަމުން އެތަނުން ތެދުވިއެވެ. އެހެންނަމަވެސް ބޮލަށް އެރި ތަދާއެކު ބޮލުގައި އަތް އަޅާލަމުން އެތަނުގައި އިށީނެވެ.

” ފަޒީލް ކިހިނެއްވީ, އަނެއްކާ އެއްކަލަ ގޮތަށް ތަދުވަނީތަ, މިހާރު ބުނެފިން ޑޮކްޓަރަށް ދައްކަންވެސް, ތިހެން އުޅޭކަށް ނުވާނެ, ހިނގާ ޑޮކްޓަރަށް ދައްކަން ދާން” ސާރާ ފަޒީލްގެ ހާލާމެދު ކަންބޮޑުވާ ހާލް ބުނެލިއެވެ.

” ސާރާ މާ އަވަހަށޭ ސީރިއަސް ވަނީ, މީ ކުޑަ ކުޑަ ކަމެއް, އެކަމް ދެ ހަފްތާ ވަރު ވެއްޖެ މިހާލުގަ އުޅޭތާ މާދަން ދައްކާލަން ދާނަން, އެކަމާ ނުވިސްނާ” ފަޒީލް މަޑުމަޑުން އެ ރިހެމުންދާ ދިމާލަށް ދެފަހަރަކު އޮބާލިއެވެ. އަދި ވަރަށް މަސައްކަތުން އެ ތަނުން ތެދުވެ ގޮސް ކެއުމަށް އިންސާފު ކުރަންފެށިއެވެ.

އިރުކޮޅެއްނުވެ ދޮރުގައި ޓަކި ޖެހުމާއެކު ސާރާ ގޮސް ދޮރު ހުޅުވާލިއެވެ. ކުރިމަތީ ހުރި އަރުޝް ފެނިފައި ސާރާގެ ހިތް ނެގިނެގިފައި ޖެހެންފެށިއެެވެ. ސާރާގެ މައުސޫމް ކަމުން ފުރިގެންވާ މޫނާއި, ފިޔާތޮށި ކުލަ އަރާފައިވާ ރީތި ތުންފަތް ފެނި އަރުޝް ހިން ދިރުވާލިއެވެ. އަލަށް މީހަކު ފެނިގެން ބަލަމުންދާ ބީދައިން އަރުޝް ސާރާއާ ދިމާލަށް ބަލަމުން ދިޔައެވެ.

ސާރާ އެއްވެސް އެއްޗެކޭ ނުބުނެ އެތަނުން ގޮސް ފައުޒާންގެ ކޮޓަރިއަށް ވަނެެވެ. ފަޒީލް ކާކުތޯ އަހާލީ އެމީހަކު ގެޔަށް ނުވަނުމުންނެވެ. އަރުޝް ގޭތެރެއަށް ވަދެގެންއައެވެ.

“އަހަ, އަރުޝް, ރަނގަޅު ގަޑިއަކަށް ތި ޖައްސާލީ އަވަަހަށް އާދޭ ބައިވެރިވާން” ފަޒީލް އަރުޝްއަށް ގޮނޑި ދައްކާލަމުން ބުނެލިއެވެެ.
” ނޫނޭ ދެންމެ މިއައީ ކައިގެން, ދެން އެހެންފަހަރަކުން” އަރުޝް ގޮނޑީގައި އިށީންނަމުން ބުނެލިއެވެ. އަދި ފަރާތް ފަރާތަށް ނަޒަރު ހިންގާލިއެވެ.
” ސާރާދޯ ތި ހޯދަނީ, ހާސްނުވޭ, ސާރާ ހަމަޔަކަށް އެޅިދާނެ, އެހާވަރަށް ވިސްނާ އެއްޗެއް ނޫން” ފަޒީލް އަރުޝް ހިތްހަމަ ޖައްސާ ދިނުމުގެ ގޮތުން ބުނެލިއެވެ.

އެރޭ ސާރާ ކޮޓަރިން ނުކުތީ އަރުޝް ދިޔަކަން ޔަގީންކޮއްފައެވެ. އަރުޝްއަށް އެހާ ފަސޭހަތް މާފް ކުރަން ސާރާގެ ހިތް ދެކޮޅު ހަދަމުންދިއުމާއެކު, ސާރާ, ސާރާގެ ހިތުގެ އަޑުއެހިއެވެ.

ރޭގަނޑު ނިދަން އޮތް އާމިރު ވިސްނަމުންދިޔައީ މިއަދު ހިނގާ ދިޔަ ކަންތަކާއެެވެ. އިރުކޮޅެއް ނުވެ އަރީޝާވެސް އައިސް ޖައްސާލިއެވެ.
” އަރީ، ކިހާވަރަަކަށް ހަފީޒާއަށް އިތުބާރުކުރަން” އަރީޝާ އައިސް ޖައްސާލުމާއެކު އާމިރުގެ އެ ސުވާލުން އާމިރާ ދިމާލަށް ބަލާލިއެވެ.

” ކިހިނެއްވީ އަނެއްކާ، މިފަހަރު ކޮން ދީނީ ނަސޭހަތެއް އޮތީ, ނޫނީ ކާކު ކޯއްޗެކޭ ކިޔަންވެފަ އޮތީ” އަރީޝާ އެ ތަނުން ތެދުވެ ހަމަ ޖެހިލަމުން ބުނެލިއެވެ.

” ކަމެއް ވެގެންތަ އަހާނީ, އަރުޝް އެގޭ ކުއްޖަކާ ގުޅޭއިރު ބަލަން ވާނެ ދޯ، ކިހާ ވަރެއްގެ, ކޮންބައެއްތޯ” އާމިރު އަރީޝާއަށް ބަލާލިއެވެ.

” އާމިރު ތިކަމާ ވިސްނާކަށް ނުޖެހޭނެ, އޭނަ އެއީ އަހަރެންގެ ދުވަސްވީ އެެކުވެރިޔާ, އާމިރު ނުބެލިޔަސް އަހަރެން ބަލާނެދޯ, އަނެއްފަހަރު އަނެކައްޗެކޭ ކިޔާފަ ފަށާ” އަރީޝާ މިހެން ބުނެ އަނެއް ފަރާތަށް އެނބުރުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.