އިންތިޒާރުގައި ހުންނަމޭ ލޯބިން 22

” އަހަރެން މީގެ ފަސް އަހަރު ކުރިން ޔައިޝްއަށް ޖަވާބެއް ދިނީމެއްނު… ” ޔައިޝްގެ ލޮލުން ނަޒަރު ވަކިކޮށްލަމުން މަޑުމައިތިރިކަމާއެކު ޝައުނާ ޖަވާބު ދިނެވެ. ” ތީގެ މާނައަކީ އަދިވެސް ޝައު ލޯބި ވަނީ އެ ޔާފިއުދެކެ އޭ ތަ… އަހަންނަށްޓަކައި ތިހިތުގަ އެއްވެސް އިހުސާސެއް ނުވޭތަ… ” ޔައިޝް ވާހަކަ ދެއްކި ރާގުންވެސް އޭނަގެ ހިތަށް އަސަރުކޮށްފިކަން ހާމަވެގެންދެއެވެ. ޔައިޝްގެ އަޑުގައިވި ރިހުން ޝައުނާއަކަށް ސިއްރެއްނުވިއެވެ. އެކަން އިހުސާސް ވުމާއެކު އޭނައަށް ޔައިޝްއާ ހަތަރު ކަޅި ހަމަކޮށްލެވުނެވެ. އެދެ ލޮލުން އޭނައަށް މާޔޫސްކަން ފެނިގެން ދިޔައެވެ. އޭނަގެ ލޮއެބަށް އެދޭވަރު އެދެ ލޮލުން ހާމަވެގެންދެއެވެ. އެކަން އިނގިހުރެެވެސް ޝައުނާ އެކަން ގަބޫލުކުރާކަށް ބޭނުމެއްނުވިއެވެ. އޭނަގެ ހިތުގައި ޔައިޝްއަށްޓަކައި އެހެން އިހުސާސެއް އުފެދިފައިވާތާ މިހާރު ކިތަންމެ ދުވަހެކެވެ. ޔައިޝް ފެނުމުން ކުރިން އޭނައަށް ނުވާ ކިތަންމެ ގޮތެއް މިހާރު އޭނައަށް ވެއެވެ. އަތް ފައި ފިނިވެ ހިތުގެ ތެޅުން އަވަސްވެއެވެ. ޔައިޝް ކައިރިވުމުން ނޭވާ ކުރުވެ މުޅިން ތަފާތު އިހުސާސެއް ކުރެވިގެން ދެއެވެ. އެކަން އިނިހުރެވެސް އެ އިހުސާސްއަކީ ލޯބިކަން ގަބޫލުކުރާކަށް އޭނަގެ ސިކުނޑި ހަމަހިލާ އެއްބަހެއްނުވެއެވެ. ކޮންމެ މީހަކުވެސް ރައްޓެހިނުވާ އިރު ލޯބިވާކަމަށް ބުނެ ފޮނި ވާހަކަ ދައްކައެވެ. ރައްޓެހިވެ ދުވަސްކޮޅެއް ފާއިތުވާއިރު އެ ލޯބީގެ އެއްވެސް މާނައެއް ނުވެއެވެ. އެމީހެއްގެ އަމަލުތައް މުޅިންހެން ބަދަލުވެދެއެވެ. އެކުގައި ވާހަކަ ދައްކާލާނެ ވަގުތުކޮޅެއް ނުލިބެއެވެ. އަބަދުވެސް އޮންނާނީ ބިޒީވެފައެވެ. ޔައިޝްގެ ލޮލަށް ގެއްލިފައި އިން ޝައުނާގެ ސިކުނޑީގައި ދިޔައީ މިފަދަ ހިޔާލުތަކެއް އެނބުރެމުންނެވެ. ” އަހަ… އަހަރެންގެ ހިތުގަ ޔައިޝްއަށްޓަކައި… އެއްވެސް… އެއްވެސް އިހުސާސެއް ނުވޭ… ” ޔައިޝްގެ ލޮލުން ނަޒަރު ވަކިކޮށްލަމުން ޝައުނާ ބުނެލިއެވެ. ޝައުނާގެ ޖަވާބުން މިފަހަރުވެސް ޔައިޝްގެ ހިތް މާޔޫސްކުރުވިއެވެ. ” ބޭރުގަ މިހިރީ… ޔައިޝް އާދޭ ޕޭކޮށްފަ… އަދި ހުންނާނެ ނުނިމި ބައެއް މަސައްކަތްތައް… އަވަހަށް އޮފީހަށް ދާން ބޭނުމީ..” އިސްޖަހައިލައިގެން އިނދެ އެހެން ބުނުމަށްފަހު ޝައުނާ އިށީނދެ އިން ގޮނޑިން ތެދުވެ ރެސްޓޯރެންޓުން ނިކުންނަން ހިނގައިގަތެވެ. ޔައިޝްވެސް އެންމެ ރަނގަޅޭ ބުނެ ބިލް ދައްކަން އަވަސްވެގަތެވެ. ޔައިޝް ބިލް ދައްކާފައި ނުކުތުމުން ޝައުނާ ޔައިޝްއާއެކު ސައިކަލުގައި އޮފީހަށް ދިއުމަށް މިސްރާބުޖެހިއެވެ. ” ތޭކްސް ފޯ ދަ ލަންޗް… ” އޮފީސް ކުރިމައްޗަށް ސައިކަލު އައިސް ހުއްޓުމާއެކު ޝައުނާ ހިނިތުންވެލަމުން ޝުކުރު އަދާކުރިއެވެ. ބަދަލުގައި ޔައިޝް ހިތި ހިނިތުންވުމެއް ރައްދުކޮށްލިއެވެ. ޝައުނާއަށް ހަމަ ރަނގަޅަށްވެސް އެކަން ފާހަގަވިއެވެ. އެހެނަސް އޭނަ އިތުރު އެއްޗެކޭ ނުބުނެ ޔައިޝްއަށް ފަސްދީފައި އޮފީހަށް ވަންނަން ހިނގައިގަތެވެ. ޝައުނާ ލޯ ކުރިމަތިން ގެއްލުމުން ޔައިޝްވެސް އޭނަގެ އޮފީހަށް ދިއުމަށް ސައިކަލު ދުއްވާލިއެވެ.                           މިއަދު މާ ބުރަކޮށް ދިއުމުން ތިން ކުދިންވެސް ތިބީ ވަރަށް ވަރުބަލިވެފައެވެ. ޝައުނާ ކޮޓަރިއަށް ވަދުން ގޮތަށް އަތް ދަބަސް އެނދުމަތީގައި ބޭންދުމަށްފަހު އޮށޯވެލިއެވެ. ” ޝައު… ހިނގާ ކާން… ނުކައި ޖައްސާލީތަ އަދި… ” އަތް ދަބަސް ސައިޑް ކަބަޑް މަތީގައި ބައިންދަމުން އައިލީން އަހާލިއެވެ. ” ނުކާނަން… މީ… ޔައިޝް އާއެކު ލަންޗަށް ދިޔައިމަ މިއަދު… ” ޝައުނާ އެ އޮތް ގޮތަށް އޮވެ ބުނެލިއެވެ. ” އޯ ހޯ… އަސްލުތަ… އެއީ ދޯ މިވީ ގޮތަކީ… ހިނގާ އައިލީ އަހަރެމެން ދެމީހުން ކާން… އޭނަ އެއައީ މާ ޚާއްސަ ފަރާތަކާއެކު ލަންޗު ކުރައްވައިގެން… ހަހަހަ… ” ޝައުނާ އާއި ދިމާ ކުރުމުގެ ގޮތުން ރިފްޝާ ބުނެލިއެވެ. އެއާއެކު ޝައުނާ އެނދުން ތެދުވެ ބާލީހެއް ނަގައި ރިފްޝާ އާ ދިމާލަށް އެއްލިއެވެ. އެހެނަސް އެ ބާލީސް ރިފްޝާގެ ގަޔަކު ނުޖެހުނެވެ. އިތުރު ހަމަލާއެއް އޭނައަށް އަމާޒުކޮށް އައުމުގެ ކުރިން ރިފްޝާ ޝައުނާ އާ ދިމާލަށް ދޫ ނެރި ވައްތަރެއް ޖައްސާލުމަށްފަހު އަވަސް އަވަހަށް ކޮޓަރިން ނިކުތެވެ. ޝައުނާ ދެ ބުމަ ގޮށްޖަހާލަމުން ރިފްޝާއަށް ބަލައިލިއެވެ. އައިލީން ވެސް ހެމުން ހެމުން ކޮޓަރިން ނިކުމެ ކާބަޔަށް މިސްރާބުޖެހިއެވެ. އައިލީންމެން ކައިގެން އައިސް ފެންވަރައިގެން އަޞްރު ނަމާދުކޮށްލުމަށްފަހު އަރާމުކޮށްލަން ޖައްސާލިއެވެ.                                       ޔޫހާން އާއި އިފާން އަދި ޔައިޝް ވެސް އޮފީހުން އައިސް މެންދުރުގެ ކެއުން ނިންމާލުމަށްފަހު އަޞްރު ނަމާދު ވަގުތު ޖެހެންވާއިރަށް ފެންވަރާ ތާޒާވެލިއެވެ. އަޞްރު ނަމާދުކޮށްގެން ތިން ކުދިން އެކުގައި މިސްކިތުން ފައިބައިގެން މިސްރާބު ޖެހީ ޔައިޝްގެ ގެޔަށް ދިއުމަށެވެ. ތިން ބައިވެރިންވެސް ގޮސް އެމީހުންގެ މަސައްކަތް ފެށިއެވެ. މަސައްކަތް ނިންމާލުމަށްފަހު ތިން ބައިވެރިންވެސް ސިޓިން ރޫމު ސޯފާގައި ވަރުބަލި ފިލުވާލަން ޖައްސާލި ތަނާ ޔޫހާންގެ ފޯނު ރިންގުވާން ފެށިއެވެ.                               ފޯނުގެ ސްކްރީނަށް ބަލައިލި ޔޫހާންގެ މޫނުމަތީގައި ވަނީ އުފާވެރިކަމެވެ. ” އެއްކަލަ ލިއްޓު އެބަ ގުޅާ… ” ޔޫހާން އެހެން ބުނެލުމުން އިފާން ސްޕީކަރަށް ލާށޭ ބުންޏެވެ. ” ހެލޯ… ކޮބާ ކިހިނެއްތަ… ހާދަ ޚަބަރެއް ނުވެޔޭ ދޯ… ” ޔޫހާން ފޯނު ނަގައި ސްޕީކަރަށް ލުމަށްފަހު ވާހަކަ ދެއްކިއެވެ. ” ރަނގަޅޭ… ތިކޮޅު ކިހިނެއް… އޮފީހުގަ ބިޒީކަމުން ހަމަ ޚަބަރެއް ނުވެވެނީ… ” ލިޝާން ޖަވާބުގައި ބުނެލިއެވެ. ” އަހަރުމެން ރަނގަޅޭ… މިކޮޅުންވެސް ބިޒީކަމުން ޚަބަރެއް ނުވެވެނީ… ” ލިޝާން އެހެން ބުނުމުން އެއާއި ގުޅުވައިގެން އިފާން ބުނެލިއެވެ. ” ހެހެހެ… އެންމެން އެއްކޮށް ދޯ ތިބީ… ކީއްކުރަނީ އެންމެން އެއްވެގެން… ”ހިނިގަނޑެއް ޖަހާލަމުން ލިޝާން ބުންޏެވެ. ” އާނ… އެންމެން އެއްކޮށް މި ތިބީ… މީ މިރޭ ރިފޫގެ ބާރްޑޭ ސެލެބްރޭޓްކުރަންވެގެން ކުޑަކޮށް ޑެކަރޭޓްކޮށްލަން އައިސް އެކަންތައް ނިންމާލާފަ މިހާރު ރެސްޓެއް ނަގަނީ… ” ޖަވާބުގައި ޔައިޝް ބުންޏެވެ. ” އޯހް… މިހާރު މައްސަލަ ހައްލުވީތަ… ” ލިޝާން އެހެން އަހާލުމާއެކު އިފާން އަދިވެސް އޭނަ އާއި ރިފްޝާގެ ދެމެދު ކަންތައްތައް ރަނގަޅު ނޫންކަމުގައި ބުންޏެވެ. އަދި މިރޭ ކޮންމެ ގޮތެއް ހަދާފައިވެސް އެ ދުރުކަން އޭނަ ނައްތާލާނެކަމުގެ ޔަގީންކަން ދިނެވެ. ” ޔައި އާ ޝައުގެ ކަންތައްތައް ކިހިނެއް މިހާރު… ޔައި ނޫޅެންތަ އެކަމަކާ… ” އެކި އެކި ވާހަކަ ދައްކަމުން ގޮސް ލިޝާން ކޮށްލި ސުވާލުން ޔައިޝްގެ މޫނުމަތީގައިވި ހިނިތުންވުން ފިލައިގެން ދިޔައެވެ. ޔައިޝް އަދި އެދެވޭ ޖަވާބެއް ނުލިބޭ ކަމުގައި ބުނެ މިއަދު ކަންތައް ހިނގާދިޔަ ގޮތް އެކުވެރިންނާ ހިއްސާކުރިއެވެ. ” ހޫނ… އަހަރެންގެ ވާހަކަ ބާއްވާފަ ލިއްޓު ބުނެބަލަ… ލިއްޓު ނޫޅެންތަ އެކަހަލަ ކަމަކާ… ” ޔައިޝް އެހެން އަހާލުމުން އަދި ކަމުދާ ކުއްޖަކު ނުފެންނަ ކަމުގައި ލިޝާން ބުނެލިއެވެ. އަދި ކަމުދާ ކުއްޖަކު ފެނުނުހާ އަވަހަކަށް އެކަމާ އުޅެންވީ ކަމުގައި ބުނީ ހިނގަނޑެއް ޖަހާލުމަށްފަހުއެވެ. ” ދެން މިކޮޅަށް އައިސްލާކަށް ނުވޭތަ… ” ޔޫހާން އަހާލުމުން ޗުއްޓީއެއްގައި ތިކޮޅަށް ޖައްސާލާނެކަމަށް ލިޝާން ބުންޏެވެ. އެގޮތުގައި އެތައް އިރަކު ވާހަކަ ދައްކަން އެމީހުން ތިއްބެވެ.                                       ފާޚާނާގެ ދޮރު ހުޅުވާލި އަޑަށް ސޯފާގައި ތިބި އައިލީން އާއި ޝައުނާ އެދިމާލަށް ބަލައިލިއެވެ. ދަނބު ކުލައިގެ އެ ހެދުމުގައި ރިފްޝާ ފެންނަލެއް ނުހަނު ރީއްޗެވެ. ހުދު ކުލައިގެ ކުދި އެސްތަކަކުން މޭމަތި ޖަރީކުރެވިފައިވީއިރު ކުރިމަތިން ކަކުލުން ކުޑަ ތަންކޮންޅެއް ތިރިއަށް އަންނަ އެ ހެދުމުގެ ފަހަތް ވަނީ ފައިތިލަ އާއި ހަމައަށް ދިގުކޮށެވެ. އެ ހެދުމަށް އިތުރު ފުރިހަމަ ކަމެއް ގެނެސްދެނީ ބޭނުންކޮށްފައިވި ލޭސް ފޮތިންނެވެ. ކުރުކޮށް ފަހައިފައިވި އަތުން ރިފްޝާގެ ދޮންކަން ހާމަވެގެން ދެއެވެ. ” ވަރަށް ރީތި… ” އައިލީން ހިނިތުންވެލަމުން ބުނެލިއެވެ. ޝައުނާވެސް ހުރީ ހިނިތުންވެލައިގެންނެވެ. ” އާދޭ އަވަހަށް… މިރޭ އަހަރުމެން ދެމީހުން ރިފޫ ރީތި ކުރަނީ… އޯކޭ.” ޝައުނާ އެހެން ބުނުމުން ފުޅާ ހިނިތުންވުމަކާއެކު ރިފްޝާ އައިސް ޓްރެސިން ޓޭބަލްގެ ކުރިމަތީގައި ހުއްޓުނެވެ. ޝައުނާ އައިސް ރިފްޝާ މޫނުގައި ލުއި މޭކަޕެއްކުރުވިއެވެ. ޝައުނާ މޭކަޕްކުރުވާ ނިމުމުން އައިލީން އައިސް ވަރަށް ރީތިކޮށް ރިފްޝާގެ އިސްތަށިގަނޑުގައި ހުޅިއެއް ޖަހާލަދިނެވެ. ކުރުކޮށް ކޮށާލެވިފައިވި އިސްތަށިތައް މޫނުމައްޗަށް ދޫކޮށްލާފާވީ ގޮތުން އިތުރު ފުރިހަމަ ކަމެއް ގެނެސްދެއެވެ. ހެދުމާ ގުޅޭނޭހެން ބޮލުގައި ވަރަށް ރީތި މަލެއްވެސް އައިލީން ހަރުކޮށްލަދިނެވެ. ” ތޭންކްސް އައިލީ އެން ޝައު.. ” ފުޅާ ހިނިތުންވުމަކާއެކު ރިފްޝާ ބުނެލިއެވެ. އައިލީން އާއި ޝައުނާ ހިނިތުންވެލަމުން ރިފްޝާގެ ގައިގައި ބައްދާލިއެވެ. ” ހޫމް… ދެން އަވަހަށް ތި ދެމީހުން ދޭ ރެޑީވާން… މިހާރު ޔޫން މެން އަހަރެންގެ ބާތްޑޭ ސެލްބްރޭޓް ކުރާގޮތް ބަލާލަން މިހިރީ ހަމަ ކެތްމަދުވެފަ… ” ރިފްޝާ އެހެން ބުނުމުން ދެމީހުންވެސް އަވަސް އަވަހަށް ތައްޔާރުވާން ފެށިއެވެ. ލޯގަނޑުން އެންމެ ފަހު ފަހަރަށް އަމިއްލަ ސޫރައަށް ބަލާލުމަށްފަހު އެނދުމަތީގައި އޮތް އޭނަގެ ފޯނު ހިފައިގެން އައިލީން ކޮޓަރިން ނިކުތެވެ. އޭރު ސިޓިން ރޫމުގައި ރިފްޝާ އާއި ޝައުނާ އައިލީންގެ އިންތިޒާރުގައި އިނެވެ. އެކަކު އަނެކަކަށް ތައުރީފުކޮށްލުމަށް ފަހު ތިން ބައިވެރިންވެސް ގެއިން ނިކުންނަން ހިނގައިގަތެވެ. ގެއިން ނިކުންތަނާ އައިލީންގެ ފޯނަށް ޔޫހާން ގުޅިއެވެ. ” މިހާރު މި އަރަނީ ލިފްޓަށް… ” ފޯނު ނެގުމާއެކު ޔޫހާން އެމީހުން ބަލައި އައިސް އިން ވާހަކަ ބުނުމުން އައިލީން ޖަވާބު ދިނެވެ. އެއަށްފަހު ލިފްޓަށް އަރައިގެން ތިރިއަށް ފޭބިއެވެ. އޭރު ޔޫހާން ކާރުގައި އެމީހުންގެ އިންތިޒާރުގައި އިނެވެ.                                                 ކާރުގެ ފަހަތު ސީޓަށް ޝައުނާ އާއި ރިފްޝާ އެރި އިރު އައިލީން އެރީ ކާރުގެ ކުރީ ސީޓަށެވެ. އޭނަ އާއި ޖެހިގެން އިން ސީޓުގައި އިށީން އައިލީން ފެނި ޔޫހާންއަށް ކަޅި ޖަހައި ނުލާ ބަލަން އިނދެވުނެވެ. ދަނބުކުލައިގެ އެ ހެދުމުގައި އައިލީންގެ ރީތިކަން އިންތިހާއެވެ. ދަނބު ކުލައިގެ ބޯ ފޮތީގެ މަތިން ހުދު ކުލައިގެ ކުދި އެސްތަކަކުން ޖަރީކޮށްފައިވި ހަމަ އެކުލައިގެ ލޭސް ފޮތި ބޭނުންކޮށްގެން ފަހާފައިވި އެ ރީތި ހެދުން އައިލީންގެ ދޮން ހަންްގަނޑާ ނުހަނު ގުޅެއެވެ. ފަން ދިގު އިސްތަށިގަނޑު އާދައިގެ ގޮތަކަށް އެއްފަރާތުން ކަފިކޮށްލުމަށްފަހު ކުރު އިސްތަށިކޮޅުތައް މޫނު މަތިން ދެފަރާތުން ދޫކޮށްލާފާވުމުން ވަރަށް ވެސް ރީއްޗެވެ. މޫނުގައި ލުއި މޭކަޕެއް ކޮށްފާވީއިރު އިތުރު ފުރިހަމަ ކަމެއް ގެނެސްދެނީ ފިޔާތޮށި ކުލައިގެ ލިޕްސްޓިކްއިން ފަވާލާފާވި ތުންފަތުގައިވި ފަރި ހިނިތުންވުމުންނެވެ. ޔޫހާން ކަޅި ޖަހައި ނުލާ އޭނައަށް ބަލަން އިނުމުން އައިލީން އިނީ ލަދުން ގޮސް ކުރާނެ ކަމެއް ނޭނގިފައެވެ. އައިލީންގެ ދޮން ކޯތާފަތަށް ވަނީ ޖަންބު ކުލަ ވެރިވެފައެވެ. ލަދުން އިން ނަމަވެސް އައިލީންވެސް ޔޫހާންއަށް ނަޒަރެއް ދިނެވެ. ހުދު ކުލައިގެ ސްކިނީ އަކާއެކު ދަނބު ކުލަ އާއި ހުދު ކުލައިގެ ރޮނގު ދެމި ގަމީހުގައި ޔޫހާން ފެންނަނީ ވަރަށް ސްމާޓުކޮށެވެ. ފަން އިސްތަށިގަނޑުވެސް ވަނީ ރީތި ގޮތަކަށް ސްޓައިލް ކޮށްލާފައެވެ. ” އެހެމް އެހެމް… ޔޫން… ފުރަތަމަ އަހަރެމެން ދާންވީ ތަނަކަށް ދަމާ… ގޮއްސަ ތިދެމީހުންގެ ރޮމޭންސް ކޮންޓިނިއު ކުރަން… އޯކޭ… ” އެކަކު އަނެކަކަށް ގެއްލިފައި ތިބި ދެމީހުނަށްވެސް ސިހުން ގެނުވީ ޝައުނާ ކަރުކެހިލަމުން ވާހަކަ ދެއްކުމުންނެވެ. ޝައުނާ އެހެން ބުނުމުން އައިލީން އިތުރަށް ލަދުގަތެވެ. ޔޫހާންވެސް އޭނަގެ ބޮލުގައި އަތުން ފިރުމާލުމަށްފަހު ހިނިތުންވެލަމުން ކާރު ދުއްވާލިއެވެ.                                               ކާރު އައިސް މަޑުކޮށްލީ ޔައިޝްގެ ގޭގެ ކުރިމައްޗަށެވެ. އައިލީން މެން ކާރުން ފޭބުމާއެކު ޔޫހާން ކާރު ޕާކުކޮށްލުމަށްފަހު އެމީހުނާ ބައިވެރިވެލިއެވެ. ހަތަރު މީހުން ގޭޓުން އެތެރެއަށް ވަން އިރު އިފާން އާއި ޔައިޝް އެއްފަރާތުގައި ހައްދާފައިވާ ބަގީޗާގައި ތިއްބެވެ. އެމީހުން ފެނުމާއެކު ދެ މީހުންވެސް އައިސް އެ މީހުންގެ ކުރިމަތީގައި ހުއްޓިލިއެވެ. ރިފްޝާގެ ނަޒަރު އެންމެ ފުރަތަމަ ވެސް ދަތުރުކޮށްލީ ދަނބު ކުލައިގެ ގަމީހަކާއެކު ކަޅު ކުލައިގެ ސްކިނީގައި ހުރި އިފާންއަށެވެ. އޭރު އިފާންގެ ނަޒަރުވެސް ސީދަވެފައި ވަނީ ރިފްޝާއަށެވެ. ރިފްޝާގެ އެ ރީތި ސޫރަ ފެނި އިފާންގެ ހިތަށް ކުޑަ ނަމަވެސް ހަމަޖެހުމެއް ލިބިގެން ދިޔައެވެ. އެ ރީތި ސޫރައަށް ގެއްލިފައި އޭނައަށް އެތައް އިރަކު ހުރެވުނެވެ. ރިފްޝާއަށް އިފާންގެ ސޫރަ ފެނުމާއެކު ރަސްފަންނުގައި ހިނގާ ދިޔަ ހާދިސާ އޭނަގެ ލޯ ކުރި މަތީ ސިފަވެގެން ދިޔައެވެ. އެ މަންޒަރުތައް ސިފަވުމާއެކު ރިފްޝާ އޭނަގެ ނަޒަރު އިފާންގެ ލޮލުން ވަކިކޮށްލިއެވެ. އެއަށްފަހު އިފާންއަށް ބަލާވެސް ނުލިއެވެ. ރިފްޝާގެ މި ހަރަކާތުން އިފާންގެ ހިތަށް ވަރަށް އަސަރުކުރިއެވެ. އެހެނަސް އޭނަ ހިތްވަރުކޮށްލަމުން ތުންފަތަށް ހިނިތުންވުމެއް ވެރިކުރުވިއެވެ.                                             ޔައިޝްވެސް އާޝޯޚުވެފައި ޝައުނާއަށް ބަލަން ހުއްޓެވެ. ދަނބުކުލައިގެ ފައިތިލަ އާ ހަމައަށް އަންނަ މެކްސީގައި ޝައުނާ ފެންނަލެއް ވަރަށް ވެސް ފުރިހަމައެވެ. މޭމަތި ވަނީ އައިލީން އާއި ރިފްޝާއެކޭ އެއްފަދައިން ހުދު ކުލައިގެ ކުދި އެސްތަކަކުން ޖަރީކުރެވިފައެވެ. ބުޅި އިސްތަށިގަނޑު ހާމައަށް ދޫކޮށްލާފައި ވާއިރު މޫނުގައި ވަނީ ލުއި މޭކަޕެއް ކޮށްފައެވެ. ޔައިޝް މޫނަށް ނަޒަރު ހުއްޓާލުމަށްފަހު ޝައުނާ އަވަސް އަވަހަށް އޭނަގެ ނަޒަރު އެހެން ދިމާލަކަށް ބަދަލުކޮށްލިއެވެ. މިއަދު ރެސްޓޯރެންޓުގައި ދެކެވުނު ވާހަކައަށްފަހު ޔައިޝް އާއި ހަތަރު ކަޅި ހަަމަކުރުންވީ ޝައުނާއަށް ވަރަށް އުނދަގޫ ކަމަކަށެވެ. ”އެހެމް އެހެމް… އެތެރެއަށް ވަންނަމާ… ” އެ ހަތަރު މީހުންގެ ހަރަކާތްތަކަށް ބަލަން ތަންކޮޅެއް ފަހަތުގައި ހުރި ޔޫހާން ކަރުކެހިލަމުން ބުނެލިއެވެ. އެއާއެކު އެންމެންވެސް ގޭގެ ބޮޑު ދޮރާ ދިމައަށް ހިނގައިގަތެވެ.                                                         ”ބާތްޑޭ ގާލްް ދޯ އެންމެ ކުރިން ވަންނާނީ… ” ގޭގެ ބޮޑު ދޮރާ ހަމައަށް ގޮސް ޔައިޝް އެހެން ބުނުމުން އެންމެންވެސް އެކަމާާ އެއްބަސް ވެލައި ރިފްޝާއަށް ވަންނަން ފުރުސަތު ދިނެވެ. ރިފްޝާ މަޑުމަޑުން އެތެރެއަށް ވަނެވެ. އޭނާ އެންމެ ފުރަތަމަވެސް ވަށައިގެން ސިޓިންރޫމަށް ނަޒަރު ހިންގާލިއެވެ. ރީތި ގޮތަކަށް ދަނބު ކުލައިގެ ހަން އެލުވާފާ ވީއިރު ޓައިލްސަތަކުގެ މަތީގައިވެސް ފުދޭވަރަކަށް ހަންތައް އުކާލެވިފައި ވެއެވެ. ފާރުގައި ދަނބު ކުލައިގެ ބޮޑު އަކުރުން ހެޕީ ބާތްޑޭ ރިފޫ ލިޔެފައިވެއެވެ. ކުދި ބޮކި ފަތިތައްވެސް ވަނީ ހަމަ އެކުލައިންނެވެ. ކުރު ގޮތަކަށް ބުނާނަމަ މުޅި ސިޓިންރޫމުވެސް ޒީނަތްތެރި ކުރެވިފައިވަނީ ރިފްޝާއަށް އެންމެ ރީތި ކުލައިންނެވެ. ސިޓިން ރޫމުގެ މެދުގައި ހުރި މޭޒުމަތީގައިވެސް އަޅާފައިވަނީ ދަނބު ކުލައިގެ ފޮތި ގަނޑެކެވެ. މޭޒު މަތީގައި ޗޮކުލެޓު ކުލައިގެ ވަށް ކޭކެއް އިން އިރު މޭޒުގެ އެއްފަރާތުގައި ކޮންމެވެސް ވައްތަރެއްގެ ޑްރިންކް ފުޅިއެއް ހުއްޓެވެ. އެއާ ޖެހިގެން ބިއްލޫރި ތަށިތަކެއް ހުއްޓެވެ. ”ތޭންކްސް ގާއިސް… ” ހިނިތުންވެލަމުން ރިފްޝާ ބުނެލިއެވެ. އެންމެންވެސް ފަހަތުގައި އޭނަގެ ހަރަކާތްތަކަށް ބަލަން ހުއްޓެވެ. ” ހޫމް ދެން ކޭކު ފަޅަމާ ދޯ..” ޔޫހާން އެހެން ބުނުމުން ހިނިތުންވެލަމުން ރިފްޝާ މޭޒު ގާތަށް ޖެހިލިއެވެ. ރިފްޝާ ކޭކު ފަޅަން ފެށުމުން އެންމެންވެގެން ބާތްޑޭ ސޯންގް ކިޔަންފެށިއެވެ. ކޭކު ފެޅުމަށްފަހު ކޮންމެ މީހަކަށްވެސް ރިފްޝާ ކޭކު ކޮޅެއް ލަވަމުން ދިޔައެވެ. ޔޫހާންއަށް ކޭކު ކޮޅެއް ލެވުމަށްފަހު އެނބުރުނު ރިފްޝާ ސިހުނީ ދާދި ކައިރީގައި ހުރި އިފާން ފެނިފައެވެ. ” ކޭކު ” ހުއްޓުން އަރާފާ ރިފްޝާ ހުރުމުން އިފާން އެހެން ބުނެލުއެވެ. ރިފްޝާ މަޑުމަޑުން އޭނަގެ އަތުން އިފާންއަށް ކޭކު ކޮޅެއް ލެވިއެވެ. އިފާން ކޭކު ކޮޅު ކާލުމުން ފަސްއެނބުރި ދާން ހިނގައިގަތް ތަނާ އިފާން ރިފްޝާގެ އަތުގައި ހިފެހެއްޓިއެވެ. އިފާން އެދުނީ އޭނަގެ އަތުންވެސް ރިފްޝާ ކޭކު ކޮޅެއް ކާލުމަށެވެ. އެހެން މީހުންވެސް ތިބުމާއެކު ރިފްޝާ އިފާން އެދުނު ގޮތަށް ކަންތައްކުރިއެވެ. ” އަދި އެބެއް ރިފޫއަށް ވަރަށް ބޮޑު ސަޕްރައިޒްއެއް… ” ރިފްޝާ ފަސްއެނބުރުނު ތަނާ މިފަހަރުވެސް އިފާން ވާހަކަ ދެއްކިއެވެ. އެއާއެކު ރިފްޝާ އިފާންއަށް ބަލައިލިއެވެ. އައިލީން އާއި ޝައުނާވެސް ހުރީ އިފާން އެބުނި ސަޕްރައިޒެއް ބަލާލާހިތުން ކެތްމަދުވެފައެވެ. ޔޫހާން އާއި ޔައިޝްއަށް އިފާން ކުރަން އެ އުޅޭ ކަމެއް އެނގުނު ނަމަވެސް އައިލީން އާއި ޝައުނާގެ އިތުރުން އަދި ރިފްޝާއަކަށް އެއީ ކޮން ސަޕްރައިޒެއް ކަމެއް އެއްގޮތަކަށްވެސް ނޭނގެއެވެ.                                                  ސުވާލުގެ ނަޒަރަކުން ރިފްޝާ އިފާންއަށް ބަލަހައްޓައިގެން ހުއްޓެވެ. ” ފަހަތައް އެނބުރި ބަލަ… ” އިފާން އެހެން ބުނުމުންވެސް ރިފްޝާ އެހުރި ގޮތަށް ހުރީއެވެ. ” މިތާ އައިލީ މެންވެސް އެބަ ތިއްބެއްނު… ރިފޫއަށް ގޮތެއް ހަދާކަށް ނޫޅެމޭ… ” އިފާން އެހެން ބުނުމުން ރިފްޝާ ފަހަތަށް އެނބުރުނެވެ. ރިފްޝާ ފަހަތަށް އެނބުރު ތަނާ އިފާން ރިފްޝާއަށް ނުފެންނާނޭ ހެން ލޯ މަތީގައި ކަޅު ކުލައިގެ ފޮތިކޮޅަކުން އައްސާލިއެވެ. ” ފާން ކީއްކުރަން ތިއުޅެނީ… ” ރިފްޝާގެ އަޑުންވެސް އޭނަ ހާސްވެފައި ހުރިކަން ހާމަވެގެންދެއެވެ. ރިފްޝާ އެހެން ބުނުމުން ކުޑަ އިރުކޮޅެއްގެ ތެރޭގައި އިނގިގެން ދާނެކަމަށް އިފާން ބުންޏެވެ. އިފާން މަޑުމަޑުން ރިފްޝާގެ ލޯމަތީގައި އައްސާފާވި ފޮތިކޮޅު މޮހާލިއެވެ. އެއާއެކު ރިފްޝާގެ ނަޒަރު އެންމެ ފުރަތަމަވެސް ހުއްޓުނީ އޭނަގެ ކުރިމަތީގައި ހުރި މޭޒުމަތީގައި އިން ހިތުގެ ބައްޓަމުގެ ޗޮކްލެޓް ކޭކަށެވެ. ރަތް ކުލައިގެ އައިސިން އިން އައި ލަވް ޔޫ ރިފޫ ޖަހާފައި އިންއިރު އެއްފަރާތުގައި ރަތް ކުލައިގެ ދެ ފިނިފެންމާވެސް ވެއެވެ. ބަލައިލަން ކިތަންމެ ހާވެސް ހިތްގައިމެވެ. ރިފްޝާ ފަހަތަށް އެނބުރި އިފާންއަށް ބަލައިލިއެވެ. ރިފްޝާ ބަލައިލުމުން އިފާން އޭނަގެ އެއް ފައި މައްޗަށް ތިރިވިއެވެ. ”ރިފޫ.. އައި ލަވް ޔޫ… އައި ރިއަލީ ޑޫ… އެރޭ އަހަރެން މާޝާގެ ލޯބި ގަބޫލެއް ނުކުރަން… މާޝާ އަހަރެންގެ ގަޔާ ދުރުކޮށްލަންވެގެން އޭނަގެ ކޮނޑުގައި ހިފާލި ވަގުތު ރިފޫ ފެނިފަ އަހަންނަށް އިތުރު ހަރަކާތެއްވެސް ގެންނަން ނޭނގިފަ ހުރެވުނީ… އެން ރިފޫގެ ކުރިމަތީގައި މާޝާއަށް ތައުރީފުކޮށް ހަދަނީވެސް ރިފޫ ޖެލަސްކުރުވަން… ހަމަ މަޖަލަކަށް އެހެން ކަންތައް ކުރީ… ހިތަކަށް ނާރާ ރިފޫއަށް އެހާވަރަށް ހާޓް ވެދާނެކަމަކަށް… އައި އޭމް ރިއަލީ ސޮރީ ފޯ ދެޓް… އައި އޭމް ރިއަލީ ވެރީ ސޮރީ ފޯ އެވްރިތިން… ޔޫ އާ ދަ ގާލް އައި ލަވް… އައި ލަވް ޔޫ ސޯމަޗް… ވިލް ޔޫ ބީ ގާލް ރިފޫ… ” އެއްފައި މައްޗަށް ތިރިވެ އިނދެ ވަރަށް އަސަރާއެކު އިފާން ވާހަކަ ދެއްކިއެވެ. އައިލީންްމެން ވެސް ކެތްތެރިކަމާއެކު އިންތިޒާރު ކުރަމުން ދިޔައީ ރިފްޝާ ދޭނެ ޖަވާބަކަށެވެ. ” ޔެސް… ” އަނގޮއްޓި އަޅަން އަތްތިލަ ދިއްކޮށްލަމުން ރިފްޝާ އޭނަގެ ޖަވާބު އިއްވާލިއެވެ. އޭރު އޭނަގެ ލޮލަށް ވަނީ އުފާވެރިކަމުގެ ކަރުނަ ޖަމާވެފައެވެ. އިފާންގެ ތުންފަތަށް ފުޅާ ހިނިތުންވުމެއް ވެރިވި އިރު އައިލީންމެންވެސް ތިބީ ނުހަނު އުފަލުންނެވެ. އިފާން ރިފްޝާގެ އަތުގައި އަނގޮއްޓި އަޅުވާލަ ދިނުމަށްފަހު ތެދުވެ ރިފްޝާގެ ގައިގައި ބައްދާލިއެވެ. ދެ ހިތަށްވެސް ލިބިފައިވަނީ ބަޔާންކުރަން ދަތި ހިތްހަމަޖެހުމެކެވެ. އެކަކު އަނެކަކުގެ ގައިގައި ބައްދާލައިގެން ތިބި ދެމީހުން ވެސް ސިހިފައި ދުރަށް ޖެހިލީ ގާތުގައި ތިބި ގާތް ރަހުމަތްތެރިންގެ އަތްތިލަ ބަޑީގެ އަޑަށެވެ. އެންމެންވެސް އެދެ މީހުނަށް މަރުހަބާ ކިޔެވެ.                             އެންމެންގެ މޫނުމަތިންވެސް ފެންނަނީ އުފާވެރިކަމެވެ. ކޭކު ފެޅުމަށްފަހު ކެއުމުގައި އެންމެންވެސް ހަރަކާތްތެރިވަމުން ދިޔައެވެ. ކޭކު ކޮޅެއް ތައްޓަކަށް ލުމަށްފަހު ސޯފާގައި އިން ޔޫހާންއަށް އެ ގެންގޮސްދޭން އައިލީން ހިނގައިގަތެވެ. އެވަގުތު ޑްރިންކް ތަށި ހިފައިގެން އައި ޝައުނާގެ ގައިގައި ޖެހި އޭނަގެ އަތުގައި ހުރި ޑްރިންކް ތަށިން އެއްބައި އައިލީންގެ ހެދުމަށް ވެރުނެވެ. އަދި އައިލީންގެ އަތުގައި ހުރި ކޭކު ތަށިން ޝައުނާގެ އަތުގައިވެސް ކޭކު ހޭކުނެވެ. ދެ މީހުންނަށްވެސް ވީގޮތް އެނގުމުން ހެވުނެވެ. އަދި މައާފަށް އެދުނެވެ. ޝައުނާ ޑްރިންކް ތަށި ބެހެއްޓުމަށްފަހު ދިޔައީ ކާބަޔަށް އަތް ދޮވެލުމަށެވެ. އައިލީން އެދިޔަ ގޮތަށް ދިޔައީ ޔޫހާންއަށް ކޭކު ތަށިދޭށެވެ. ޔައިޝްވެސް ފެން ފުޅިއެއް ބަލައި އެވަގުތު ކާބަޔަށް މިސްރާބު ޖެހިއެވެ. އަތް ދޮވެލުމަށްފަހު ޝައުނާ ބާރު ހިނގުމުގައި ކާބައިން ނިކުންނަން ހިނގައިގަތެވެ. އެވަގުތު ކާބަޔަށް ވަންނަން އައި ޔައިޝްގެ ގައިގައި ޖެހިފައި ދެމީހުންވެސް ވެއްޓުނެވެ. ޝައުނާގެ ހަޅޭކުގެ އަޑަށް ސިޓިންރޫމުގައި ތިބި ހަތަރު މީހުންވެސް އަވަސް އަވަހަށް ކާބަޔަށް މިސްރާބު ޖެހިއެވެ. ކާބައިގެ ދޮރު މަތީގައި ވެއްޓިފައި އޮތް ދެ މީހުން ފެނި އައިލީންމެންގެ ހިނިގަނޑު ފަޅާއިގެން ދިޔައެވެ. ޝައުނާ އޮތީ ޔައިޝްގެ ގައިމައްޗަށް ވެއްޓިފައެވެ. މަޑުމަޑުން ބޯ ހިއްލާލުމަށްފަހު ތެދުވަން އުޅުނު ޝައުނާގެ އަގައިން މަޑު އާހެއް އިވިގެން ދިޔައެވެ. އޭނަގެ އިސްތަށިގަނޑުން ބައެއް ވަނީ ޔައިޝްގެ ގަމީހުގެ ގޮށެއްގައި އަޅާއިގަންފައެވެ. ޝައުނާ އެތައް މަސައްކަތެއް ކުރުމުންވެސް އެނެއްޓޭ ގޮތެއް ނުވިއެވެ. ޔައިޝް އޮތީ ހަރަކާތެއްވެސް ކޮށްލެވޭނެ ހާލެއްގައެއް ނޫނެވެ. ޝައުނާ އޭނަގެ ގައި މަތީގައި އޮތް އިރު އޭނައަށް ހަރަކާތެއް ކޮށްލެވޭނީ ކިހިނެއް ހެއްޔެވެ. އޭރުވެސް މަންޒަރު ބަލަން ތިބި ހަތަރު މީހުން ދިޔައީ ހުއްޓުމެއްނެތި ހެމުންވެ. އޭރު ޝައުނާ އާއި ޔައިޝް ދިޔައީ އެމީހުނަށް ކުދި ކިޔަމުންނެވެ. ޝައުނާ ތަދުވިޔަސް ހެޔޮކަމަށް އޭނަގެ އިސްތަށިގަނޑުގައި ހިފާ ދަމައިގަތެވެ. މިފަހަރުވެސް ޝައުނާގެ އަގައިން މަޑުއާހެއް އިވިގެން ދިޔައެވެ. ޝައުނާ އިސްތަށގަނޑަށް ދަމައިގަތުމުން ޔައިޝްގެ ގަމީހުގެ ގޮށްވެސް މާ ދުރަށް ވިއްސައިގެން ދިޔައެވެ. އެމަންޒަރު ފެނި އައިލީންމެންގެ ގާތަށް އިތުރަށް ހިނިއައެވެ. ވަރަށް އުނދަގުލުން ދެ މީހުންވެސް އޮތް ތަނުން ތެދުވިއެވެ. އޭރުވެސް އައިލީންމެންގެ ހުނުމަކަށް ބަދަލެއް ނާދެއެވެ. ޝައުނާ ހުރީ ލަދުން ގޮސް ކުރާނެ ކަމެއް ނޭނގިފައެވެ. ” އަހަރެންގެ ގަމީހުގެ ގޮށެއްނު ތި ނައްޓުވާލީ… އަދި މިރޭ ލީ ގަމީހެކޭ މީ… ނައްޓާލި މީހަކު ޖެހޭނެ ގަމީހުގެ ގޮށް ހަރުކޮށްދެންވެސް… ” ޔައިޝް އެތަނުން ތެދުވުމަށްފަހު ވިއްސައިގެން ދިޔަ އޭނަގެ ގަމީހުގެ ގޮށް ނަގައި އެންމެނަށް ދައްކާލަމުން ވާހަކަ ދެއްކިއެވެ. އެއާއެކު އެންމެންވެސް އެކަމާ އެއްބަސްވެ އެހެން ކިޔަން ފެށުމުން ޝައުނާއަށް ޖެހުނީ ގޮށް ހަރުކޮށްދޭށެވެ. ގޮށް ހަރުކުރުމަށް ބޭނުންވާނެ އެއްޗެހި ހުރީ ޔައިޝްގެ ކޮޓަރީގައި ކަމުން ޝައުނާ މަޑުމަޑުން ޔައިޝްގެ ފަހަތުން އޭނަގެ ކޮޓަރިއަށް ދިޔުމަށް މިސްރާބު ޖެހިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.