މިޝްކާ ******* (1)

= އަމާޒް = (ޢާޒިފް)

ގެއަށް އައިގޮތަށް އަހަރެން ވަނީ ކޮޓަރިއަށެވެ. އަތަށް ލެވުނުހާ ބާރެއް ލުމަށްފަހު ދޮރު ލައްޕާލީމެވެ. ދޮރު ޖެހުނުލެއް ބާރުކަމުން އިވުނު އަޑުން އަހަރެން ސިއްސައިގެނެއް ނުދިޔައެވެ. ދެން ވީ އެންމެ އަވަހަކަށް ތަޅުލީމެވެ. އެނދުމައްޗަށް ވެއްޓިގަތީމެވެ. ބާލީހުގައި ބައްދައިގެންއޮވެ އަހަރެން ދެން ފެށީ ރޯށެވެ. ލޮލުން އަންނަމުން ދިޔަ ކަރުނަތައް ބާލީހުގެ ތެރެއަށް ފޭދެމުން ދިޔައެވެ.

އަހަރެން ބޭނުންވަނީ ރޯށެވެ. ލޮލުން ކަރުނަ ހިކެންދެނެވެ. އިތުރަށް ދެން ދުވަހަކުވެސް ރޯން ނުޖެހޭވަރަށެވެ. އެކަމަކު އެކަން އެހެން ވާނެހެއްޔެވެ؟ މަޑުމަޑުން ގިސްލަމުން އަހަރެން ރުއީ ކިހާއިރެއްވަންދެންކަމެއް ޚުދު އަހަންނަކަށްވެސް ނޭނގެއެވެ. ދެތިން ފަހަރަކަށް މީހަކު ދޮރުގައި ޓަކި ޖެހި އަޑުވެސް އިވުނެވެ. އެވާނީ އަހަރެންގެ މަންމައަށެވެ. ދޮރު ނުހުޅުވުމުން، އަހަންނަށް ކޮންމެވެސް ކަމެއްވެގެން އުޅޭކަން މަންމައަށް އިނގޭނެއެވެ. އެހެންވެ، އިތުރަށް އެއްވެސް މީހަކަށް އަހަންނަށް ދެން އުދަނގޫކުރާކަށް ނުކެރޭނެއެވެ.

އަހަރެން ރޮމުން ގެންދިޔައީމެވެ. ކަރުނަ އަޅައެވެ. ގިސްލަމުންނެވެ. ތެދެކެވެ. ހިތުގަ ޖެހިގެން ރުއިމަކީ ކިހާ ހިތްދަތިކަމެއްކަން އަހަންނަށް އިޙްޞާޞްމިކުރެވުނީ އަދި ކިރިޔާއެވެ. މިވަރަށް ދުވަހަކުވެސް އަހަރެން އަދި ނުރޮމެވެ. ހިތްހަލާކުވެގެން ރޯންޖޭހޭ މީހާގެ ހިތުގައި އަދި ކިހާ ވޭނެއް އަޅާނެހެއްޔެވެ؟ އެކަން އިޙްޞާޞްކުރެވޭނީ އެކަން ތަޙައްމަލުކޮށްފައިވާ މީހަކަށެވެ. ފިނިފެންމަލުގެ ބަގީޗާއެއްގައި ހިނގާ މީހަކަށް، ކަށިކުނބުރު ޖަންގައްޔެއްގެ އަސަރެއްނުފެންނާނެއެވެ. މާމަލުން ފޮނިބޮމުންދާ ކޮކާތަކަށް އުހައުވެރިކަން ނޫން އެހެންކަމެއް ނޯންނާނެތެވެ. ދުނިޔެއަކީ އެކަހަލަ ތަނެކެވެ. ބައެއް ސިކުންތުގައި އުފާވެރިކަމެވެ. އުފަލުން ގޮސް ހިތްބަންޑުން ކޮށްލައެވެ. ދެން ހީވެސް ނުކުރާހެން ޙަޔާތަށް ޒަލްޒަލާތައް އާދެއެވެ. އޭގެ ދަށުވެ، ސަލާމާތް ނުވާ ހިސާބަށް އިންސާނާ ގެންދަނީވެސް މަދެއްކޮށެއް ނޫނެވެ.

ޙަޤީޤަތެކެވެ. މިއަދަކީ އަހަރެންގެ ދުވަހެއްނޫނެވެ. ބަޔަކު މީހުން ރާވައިގެން ނަމަވެސް، މިއަދު އަހަރެން ރޮއްވާލީއެވެ. އަހަރެންގެ ހިތުގައި ވަރަށް ބޮޑަށް ޖައްސައިފިއެވެ. އަހަރެންގެ ކުށަކީ ކޮބައިކަން ޚުދު އަދިވެސް އަހަންނަކަށް ނޭނގެއެވެ. އަހަރެން ވިސްނަވިސްނާ ބޯގޮވާ ވަރުވެއްޖެއެވެ. އަހަރެންގެ ހިތަށް އެރިއެވެ. ތިން ދުވަހުގެ މެހެމާނަކަށް އޭނާވީ ކީއްވެގެން ހެއްޔެވެ؟ އެއީ ރޭވުމެއް ހެއްޔެވެ؟ ނުވަތަ އަހަންނަށް ފެނުނު ދަޅައެއް ހެއްޔެވެ؟ ބޯވިލާ ގަނޑުގެ ފަހަތުގައި ރިހި ހަނދުވަރުވާކަމަށް މީހުން ބުނެއެވެ. އަހަންނަށް އަދި އެމަންޒަރެއް ނުފެނެއެވެ. ކީއްވެގެން ހެއްޔެވެ؟ އަހަރެންގެ ފަރާތުން މީހަކަށް ދެރައެއް އަދި ނުދެމެވެ. ނުވެސް ދޭނަމެވެ.

އަހަރެން މަޑުމަޑުން އެނދުން ތެދުވީމެވެ. ގޮސް މޫނު ބަލާ ލޯގަނޑުގެ ކުރިމައްޗަށް ހުއްޓިލީމެވެ. އަހަންނަށް ރޮވުނު ވަރުން ދެލޯވެސް ވަނީ ރަތްވެފައެވެ. ބޭރަށް ފެންނަ ހުރި ކަންތައްތަކަށްވުރެ، އެތެރޭގައި ހިނގާ ކަންތައްތައް ބަޔަކަށް ނުފެންނާނެއެވެ. އަހަރެންގެ ހިތްނަގާ ދެވޭނެނަމަ، އެކަންވެސް އަހަރެން ކުރަން ބޭނުމެވެ. އަހަރެންގެ ހިތަށް ދެން އެރިއެވެ. މިހެން އޮވެ، ރޮއިމަކުން ކުރާނެ ރާހަތެއް ނޯންނާނެއެވެ. އަހަންނަށް ދެން ކުރެވޭނެކަމަކީ ކެތްކުރުމެވެ.

މޫނު ދޮވެލައިގެން އައިސް އަނެއްކާވެސް އެނދުގައި ޖައްސާލީމެވެ. ބާލީސް މޫނު މަތީގައި އަޅަން ހިތްލާލި ވަގުތު އަހަރެންގެ ލޮލުގައި އަޅައިގަތީ ފޮޓޯގަނޑެކެވެ. މީގެ ދެތިން މަސްކުރިން ނަގާފައިވާ އެފޮޓޯގަނޑު ފެނުމުން އަހަރެން އިތުރަށް ރުޅި އައެވެ. އަހަރެންގެ ހިތަށް އެރިއެވެ. އެފޮޓޯގަނޑު ވީދާ ކުދި ކުދި ކޮށްލަންވީއެވެ. ފޮޓޯގަނޑުގައި ހިފާ ވީދާލަން ހިފާލީމެވެ. ދެވަނަ ސިކުންތުގައި ހިތަށް އެރިއެވެ. އަދި މިކަން ކުރާކަށް ނުވެއެވެ. ތާރީޚާއި ހަނދާނަށްޓަކައި އަދި މިފޮޓޯގަނޑު ބާއްވާނީއެވެ. ކޮންމެވެސް ދުވަހަކުން އަދި އޭގެ ބޭނުން ޖެހިދާނެތާއެވެ.

ކަޅިޖަހާ ނުލާ އަހަރެން އެފޮޓޯގަނޑަށް ބަލަހައްޓައިގެން ހުރީމެވެ. މީގެ ދެތިން މަސްކުރިން ނަގާފައިވާ އެފޮޓޯގަޑުގައި އެއިނީ އަހަރެންގެ ހިތުގެ ރާނީއެވެ. އެއީ އަހަރެންގެ ޙަޔާތުގެ އެންމެ ބޮޑު އެއް ހުފަވެނެވެ. ފެނުނު ފުރަތަމަ ސިކުންތުން ގަޔާނުވެވުނު، ނަމަވެސް އެއީ އަހަރެންގެ ހިތުގެ ރިހުމެވެ. އެފޮޓޯނެގި ރެޔާއި، އެރޭގެ ވަގުތާއި ސިކުންތައްދާންދެން އަދިވެސް އަހަރެން ހަނދާން އެބަހުއްޓެވެ. އަހަރެންގެ ހިތުން އެކަން ފިލާދާނެ ހެއްޔެވެ؟ ނުދާނެއެވެ. އެކަން ހަނދާނުން ފިލާހާ ދުވަހެއް އަދި ނުވެއެވެ. އެއީ އަހަރެންގެ ހިތުގެ އިޙްޞާޞްތަކާއި ކުޅެނި ހަމައެކަނި އަންހެން ކުއްޖާއެވެ. ވީއިރު، ހިތުން އެހާ އަވަހަށް ފިލުވާ ލެވޭހެއްޔެވެ؟ ފުރަތަމަ ގަޔާވާ އަންހެން ކުއްޖެއްގެ ނަން އެހާ އަވަހަށް ފިލުވާލެވޭހެއްޔެވެ؟ ފުރަތަމަ ލޯބީގެ ނަން ރަން އަކުރުން ލިޔާ މީހުން އުޅެއެވެ. އަހަރެން އެކަން ކުރަން ބޭނުން ނުވިޔަސް، ފުރަތަމަ ލޯބީގެ ހުރި އަސަރާއި ހޫނު އަހަންނަށްވެސް މިއަދު ކޮންމެވެސް ވަރަކަށް އިޙްޞާޞްކުރެވެއެވެ.

ތެދެކެވެ. މިއީ އެހެން ކަހަލަ ދުނިޔެއެކެވެ. އަންހެން ކުއްޖަކަށްޓަކައި، މީހުން ދޮގުހަދާ ހެއްޔެވެ؟ ދޭތެރެ ޖައްސާހެއްޔެވެ؟ އަހަންނަށްވެސް އިނގެއެވެ. މިއީ ބާޒާރުގައި ބޮޑު އަގުގައި ދޮގު ވިއްކޭ ޒަމާނެވެ. ޚާއިނުންނާއި ޤައްދާރުން ބަޠަލުންނަށް ވާ ޒަމާނެއެވެ. ތެދުވެރި ވަފާތެރިންގެ ބޭނުންނެތި، އެމީހުންނަކީ ވަގުންނަށް ހަދާލި ޒަމާނެއެވެ. ވީއިރު، މިއަސަރު އެންމެންގެ ދިރިއުޅުމުންވެސް ފެންނާނެ ނޫންހެއްޔެވެ؟ ފަހުން، ނޫނީ މަރުވުމުން ވާނެ ގޮތެއް ވިސްނާނެ ބަޔަކު ނެތެވެ. ނަމުން ޞޯލިހުންކަމުގައި ވިޔަސް އަމަލުން ހަމަ ހަރާންކޯރުވާ މީހުން ގިނައެވެ. ވާނީވެސް އެހެންތާއެވެ. ހުސް އަމިއްލަ އެދުުމުން ތެެމި ފޯވެފައިވާ

މީހުންނެވެ.ޖެހުނު އެއްޗެއް ޖެހުނު ގޮތަކަށް ކަމުން، ދިރުވާލާ މީހުން އުޅޭ ޒަމާނެއްގައި

ތެދުވެރިންގެ ބޭނުމެއް އެބައޮތްހެއްޔެވެ؟

މަރުވާނެކަމެއް ހިތަކަށް ނާރައެވެ. މިނޫން އެހެން ދުވަހެއް ވާކަން

ދަންނަ ބަޔަކުވެސް ނޫޅޭ ކަހަލައެވެ.ހީވާކަހަލައެވެ. ބޭނުން ގޮތެއް ހަދާލާނަމެވެ.

ނޫންނަމަ، އަހަރެންގެ އެންމެ ގާތްމީހުން އަހަރެންގެ އަތުން ‘އެ’ ޖަހައިގަނެގެން

ގެންދަން ވިސްނާނެހެއްޔެވެ؟

އަހަރެންގެ އެންމެ ގާތް ރައްޓެހިޔާ އަންހެން ކުއްޖަކަށްޓަކައި އަހަންނާއި ޢުމުރަށް ގުޅުން ކަންޑަންވީ އެހެން ނޫންނަމަ، ކޮން ސަބަބެއް އޮވެގެން ހެއްޔެވެ؟ އަހަރެން އެންމެ ބިރު ގަންނަނީވެސް އެފަދަ މީހުން ދެކެއެވެ. މާތެދުވެރި ވަފާތެރިންގެ މޫނުމަތި އަޅައިގެން އައިސް، ދެން ތިބި މީހުންގެ ބޮލަށް ސަވާރުވެ، އެމީހުންގެ ދިރިއުޅުމުގައި ކަތުރުފަނި އަޅުވާ މީހުންނެވެ. އެކަމަކު އަދިވެސް އަހަންނަކަށް ނުވިސްނެއެވެ.

” މިޝްކާ!” ފޮޓޯގަނޑުގައި މަޑުމަޑުން ފިރުމާލަމުން އަހަންނަށް ބުނެވުނެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.