ތިޔަ އިންތިޒާރުގައި

ފިރިހެންވަންތަ ހިނގުމެކެވެ. ހިތްތައް ކަތިލެވޭހާ ރީތި ދެލޮލެވެ. އަޖާއިބެއްފަދަ ނޫ ކަޅި އެވެ. ރީތިވަރަކަށް ކޮށާލެވިފައިވާ ބޮލުގައި ކުލައެއް ޖައްސާފައިވާއިރު އެ މޫނާ ވަރަށް ގުޅެއެވެ. ލާފައިވާ މަޑު ނޫކުލައިގެ ގަމިހާއި ގަދަ ނޫކުލައިގެ ސްކިނީގައި ވަރަށް ފުރިހަމަ އެވެ. އެއް އަތުން ލަގެޖްގަ ހިފަހައްޓާލައިގެން ހުރިއިރު ހީވަނީ ފެޝަން ޝޯއަކަށް ތައްޔާރުވެހުރި ފިރިހެން މޮޑެލެއް ހެންނެެވެ.

“ދޮންބޭ! ފައިނަލީ ޔޫ ކޭމް… އިނގޭތަ ހާދަ މިސްވިއޭ. ދެންނުދާނަންދޯ! ޕްލީޒް…..” ސަނާ ދިޔަގޮތައް ތަތްވީ އޭނަގެ ދޮންބެ މާއިޝް ގެ މޭގައެވެ. ” ކިރިޔާނު ދޮންބެ ނުވެއްޓުނީ… ނާއްކޮ އަދިވެސް ބޮޑެއްނުވޭދޯ..” ސަނާގެ ބޮލުގައި ފިރުމާލަމުން މާއިޝް ބުނެލިއެވެ. އަދި ސަނާ ދުރުކޮއްލަމުން މަރީނާ އާއި ސަލީމް ގައިގަ ބައްދާލިއެވެ. އަހަރުތަކަކަށް ފަހު ދަރިފުޅާ ބައްދަލުވުމުން ދެމަފިރިންގެ ލޮލުން ކަރުނައައީ އެއެއް މިއެއް ބަލާފައެއްނޫނެވެ. ވާނީވެސް އެހެންތާއެވެ.

އުމުރުން ސޯޅަ އަހަރުގައި އޯލެވެލް ނިންމާލުމަށްފަހު އޮސްޓްރޭލިއާއަށް އިތުރަށް އުނގެނުމަށް މާއިޝް ދިޔައީ މަަރީނާމެން ކިޔާވަރުންނެވެ. ކިތަންމެ ދާން ބޭނުންނުވިޔަސް މަޖުބޫރުވީއެވެ. މަންމަމެންގެ ހުވަފެންތައް ހަޤީގަތަކަށް ހެދުމައް ބޭނުންވީއެވެ. ޑޮކްޓަރަކަށް ވުމަށް މާއިޝް އޮސްޓްރޭލިޔާ އަށް ފުރީ މާލެ އަންނާނީ އެމީހުން އެދޭކަހަލަ މޮޅު ހިތުގެ ޑޮކްޓަރަކަށް ވެގެން ކަމަށް ބުނަމުންނެވެ. އޮސްޓްރޭލިޔާގައި އޭލެވެލް ހެދުމަށްފަހު، ޑޮކްޓަރުކަން ކިޔަވަން ފެށީ ހިތުގައި އެތައް އަޒުމެއް ކަނޑައަޅަމުންނެވެ.

އެގާރަ އަހަރު ފަހުން މާއިޝް މާލެ އެ އައީ މަރީނާ އާއި ސަލީމްގެ ހުވަފެންތައް ހަޤީގަތަކަށް ހަދައިދީފައެވެ. މިހާރު އެއީ ހިތުގެ ބަލީގެ ޙާއްސަ ޑޮކްޓަރެކެވެ. މާއިޝްއަށްޓަކައި އެ ދެމަފިރިން މިއަދު ފަޙުރުވެރިވެއެވެ.

” އެގާރަ އަހަރު ފަހުން އައިމަވެސް މިތާތަ ބަހައްޓަނީ. ގެއައްވެސް ނުގެންދާނަންތަ.” މާއިޝް ހެމުން ބުނެލިއެވެ. ” އެތައް އަހަރަކު ނުފެނި ހުރެފަ ފެނުމުން ވާނީ މިހެންނު. ދަރިފުޅު ބޭނުމެއް ނުވިވިއްޔަ ފޮޓޮއެއް ފޮނުވާކަށް ވެސް. ފޯނުން ގުޅައިގެން ވާހަކަ ދެއްކިޔަސް ހުންނަ ގޮތެއް ނޭނގޭނެއެއްނު. އެހެންވެ ހިތްފުރެންދެން ބަލަން ހުރެވުނީ. ހިނގާ އަވަހަށް ގެއައް ދާން. މީރާ ދަރިފުޅާ! ހާދަ ދުރެއްގަ ތިހުރީ. މީ މަންމަގެ މާއިޝް. ސަނާގެ ދޮންބެ. ފޯނުން ވާހަކަ ދެއްކީމެއްނު. ދެން މިހާރު ކީއްވެ ދުރުގަ ތިހުރީ. އާދެބަލަ މިކޮޅަށް.” މާއިޝް އަށް ޖަވާބު ދީފައި ތަނކޮޅެއް ދުރުގައި ހުރި މީރާއަށް މަރީނާ ގޮވާލީ ލޮލުން ވެއްޓުނު ކަރުނަ ތިކި ފޮހެލަމުންނެވެ.

” ސޮރީ މަންމާ. ނޭނގުނީ. ހާއި މާއިޝް..” މީރާ މަރީނާ ގާތުން މާފަށް އެދެމުން މާއިޝް އަށް އަތް ދިއްކޮއްލީ ސަލާމް ކުރުމަށެވެ. އަލަށް ދިމާވުމުން މީރާ ހުރީ ލަދުންނެެވެ. ސަލީމް މާއިޝް ގެ ލަގެޖްތައް ހިފައިގެން ތަންކޮޅެއް ދުރުގައި އޮތް ކާރާ ދިމާއަށް މިސްރާބު ޖެހިއެވެ. މީރާވެސް އެތާ ހުންނަން ލަދުން ސަލީމް ފަހަތުން ހިނގައިގަތެވެ. ” ވެއިޓް ދޮންތާ.. ނާއްކޮވެސް ދާނަން.. މަންމަވެސް އާދޭ ދޮންބެ ގޮވައިގެން.” މީރާ ގާތު މަޑުކުރުމަށް ބުނަމުން ސަނާ ހިނގައިގަތީ މަރީނާއާވެސް ވާހަކަ ދައްކަމުންނެވެ. ” މަންމާ! ކީއްވެ މީރާ މަންމަ އަށް މަންމަ ކިޔާފަ އަޅުގަނޑަށް ދޮންބެ ނުކިއީ. އެން މީރާ އަކީ ކާކު.. ނާއްކޮ އެބުނީ ދޮންތަ އޭ.. މަންމަގެ ތިބެނީ އަޅުގަނޑުމެން ދެކުދިން.. ދެން ކިހިނެއް ނާއްކޮގެ ދޮންތައެއް ހުންނަންވީ.” މީރާ ދިއުމުން ހައިރާންވެފަ މާއިޝް ސުވާލު ކުރީ އޭނަގެ މަންމަ އާއެވެ.

“ފަހުން ކިޔައިދޭނަން. އެހައް ހިނގާ ގެއަށްދަމާ..” ހީލަމުން މަރީނާ އެހެންބުނެ ދަރިފުޅުގެ އަތުގައި ހިފައިގެން ހިނގައިގަތީ ކާރާ ދިމާއަށެވެ.

މަޑު ދުވެލީގައި ދުއްވާފައި އައި ކާރު މ.މަންޒިލް ގޭގެ ގޭޓާހިސާބުގައި މަޑުކޮއްލިއެވެ. ސެކިއުރިޓީ ދޮރު ހުޅުވާލުމުން ކާރު ދުއްވާލިއެވެ. ޓެރަސް އަކާ އެކު އަށް ބުރިއަށް ނަގާފައިވާ ގޭގައި ވަނީ ވިލު ނޫކުލަލާފައެވެ. ބަލާ ބެލުމަށް ބޭރު ޤައުމު ތަކުގައި ހުުންނަ ކަހަލަ ގަނޑުވަރެކޭ އެއްފަދައެވެ. އެހާވެސް ފުރިހަމަ އެވެ. ގޭޓުން ވަންނައިރު ދެފަރާތުގައި އޮންނަ ބަގީޗާގައި ތަފާތު ވައްތަރުގެ މާމެލާމެލި ވަނީ ފަރިވެ ފޮޅިފައެވެ. ބަގީޗާއިން ދުވާ މީރުވަހުން މުޅި މަންޒިލް ގޭ ވަނީ އިތުރައް ފުރިހަމަ ކޮއްދީފައެވެ. ކާރު ގޮސް މަޑުކޮއްލީ މަންޒިލް ގޭގެ މައި ދޮރުމަތީއެވެ. ހުރިހާ އެންމެން ކާރުން ފައިބާ ގޭގެ އެތެރެއަށް ވަދެ ހަމަޖެހުމުގެ ނޭވާއެއްލިއެވެ.

ނަމަވެސް މާއިޝް ދޮރުން ވަތްގޮތައް ހުރީ ހައިރާންވެ ބުނާނެ އެއްޗެއް ނޭނގިފައެވެ. ” ބައްޕާ! ސީރިއަސްލީ… ހަމަ އެގޮތައް. އެއްވެސް ތަފާތެއް ނެތް. ކޮންއިރަކު ކިހިނެއް.” ހައިރާންވެފައިވާހާލު އުފަލުންހުރެ މާއިޝް ކޮއްލި ސުވާލަށް ސަލީމް ޖަހާލީ ހަމަ އެކަނި ބޮލެވެ. އެ ގެ ފަރުމާ ކޮއްފައިވަނީ މާއިޝް ގްރޭޑު ދިހައެއްގައި އުޅެމުން އޭނަ އެ ގެ ފަރުމާ ކުރަން ކީ ގޮތަށެވެ.

ގެއަށް ވަދެވޭއިރު ފެންނަނީ ބޮޑު ތަނަވަސް ސިޓިންގރޫމެކެވެ. ސިޓިންގރޫމުގެ ދެފަރާތުން މައްޗައް އަރަން ހުންނަ ދެ ސިޑި ވާއިރު، ސިޓިންގރޫމުގެ ކަނާތް ފަރާތުގައި އެއްފަހަރާ ދިހަ މީހުންނަށް ކާން އެރޭވަރުގެ ޑައިނިންގ ޓޭބަލް ބެހެއްޓިފައިވެއެވެ. ކާ މޭޒާ ތަންކޮޅެއް ދުރުގައި ކައްކާބައި ވެއެވެ. ކައްކާބައިވެސް ތަނަވަސް ވެފައި ބޮޑެވެ. ސިޓިންގރޫމުގެ ވައާތް ފަރާތުގައި ލިފްޓް ހަރުކުރެވިފައިވެއެވެ. ކޮންމެ އެޕާޓްމަންޓެއްގައި ހަތަރު ކޮޓަރިއާ އެކު، ސިޓިންގރޫމް އެއް ވެއެވެ. އަދި ކައްކާ ކެވޭގޮތައް ކާ ބައެއް ހުރެއެވެ. ޓެރަސްގައި ފަތާ ފެންގަނޑަކާއެކު ކޮފީބޯން ތިބެން ތަނެއް ހަދާފައިވެއެވެ.

ސަނާ އާއެކު ތަންތަން ބަލާލަފާ އައިސް މާއިޝް ސަލީމްގެ ގައިގާ ބައްދާލިއެވެ. ” ގެ ރަނގަޅު ދޯ. ދަރިފުޅުގެ ހުވަފެން ބައްޕަ ފުރިހަމަ ކޮއްދިނީ، ދަރިފުޅުވެސް ބައްޕަމެންގެ ހުވަފެން ހަޤީގަތަކަށް ހަދައިދިނީމަ. ދެން ބުނަން އަށްވަނަ ފްލޯގައި ހުންނާނީ މީރާ އާއި ދަރިފުޅުގެ ކޮޓަރި.. ސަނާވެސް ބޭނުންވަނީ ދަރިފުޅުމެން ބައިގަ އުޅޭށޯ. އެހެންވީމަ ތިންކުދިން އެއްބައިގަ. ފުރަތަމަ ތިން އެޕާޓްމަންޓް ހުންނާނީ ކުއްޔައް ދީފައި. ހަތްވަނަ ބައިގަ ބައްޕަމެން. އެކަމް ކާން އަންނަންވާނީ ތިރިއަށް. ދަރިފުޅަށް ރަނގަޅުތަ.” ސަލީމް އެއް ނޭވާއިން އޮޅުން ފިލުވައިދިނެވެ.

” ދަރިފުޅުމެން އާދޭ ސައިބޯން. މިހާރު އެހެރަ ދިހަގަޑި ބައިވަނީ.” މަރީނާ ސައި ތައްޔާރު ކުރަމުން ގޮވާލިއެވެ. މަރީނާ އަށް އެހީވާން ކައިރީގައި މީރާ އުޅެއެވެ. އެތައް އަހަރެއް ފަހުން އެންމެ އެކީގައި ސައިބޯން އެރުމުން ތަފާތު އެތައް ވާހަކައެއް ދެކެވުނެވެ. މީރާ ފިޔަވައެވެ. މީރާ އިނީ އެމީހުންގެ ވާހަކައަށް ހީލަ ލީލައެވެ.

ސައިބޮއެނިމިގެން ވާހަކަ ދައްކާލުމަށް ސޯފާގައި ޖައްސާލީ މަރީނާގެ އެދުމަށެވެ. މާއިޝް ގެ ކިޔެވުމުގެ ވާހަކައެވެ. އޮސްޓްރޭލިޔާގެ ވާހަކަތަކެވެ. މިގޮތައް އެތައް ވާހަކައެކެވެ. ” ދަރިފުޅާ މާއިޝް. ދޭ ފެންވަރައިގެން އަރާމު ކޮއްލަން. މިހާރު މާ ގިނަ ވަޤުތު ދަރިފުޅު ބޭންދިއްޖެ. މާފުކުރޭ. މީރާ ދަރިފުޅާ! ދޭބަލަ މާއިޝް ކޮޓަރި ތަޅުދަނޑި ދޭން.. ދަރިފުޅު އަތުގައެއްނު ވާނީ..” މަރީނާ މާއިޝް ގާތުން މާފަށް އެދެމުން މީރާއަށް ބުންޏެވެ. ލައްބައޭ ބުނެފައި މީރާ ލިފްޓާ ދިމާއަށް ހިނގައިގަތެވެ. ” މަންމަ ކޮންކަމަކާތަ މާފަށް އެދެންވީ. އަޅުގަނޑު އެހާވަރުބައްޔެއް ނޫނޭ. އެކަމްވެސް މިދަނީ މަންމަ ބުނީމަ..” މާއިޝް މަރީނާ ގައިގަ ބައްދާލާފައި މީރާގެ ފަހަތުން ހިނގައިގަތެވެ…

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.