ތިޔަ އިންތިޒާރުގައި…

އިރުގެ ރަންދޯދިތައް ދުނިޔެމައްޗަށް ދިއްލާލީ އެތައް ބައެއްގެ ހިތްތަކަށް އުފާވެރިކަން ގެނުވަމުންނެވެ. ހަމަ އެހެންމެ އެތައް ހިތްތަކެއް ނުތަނަވަސް ކުރުވަމުންނެވެ. މާޔޫސް ވެފައިވާ ހިތްތަކަށް އާ އުއްމީދެއް ގެނުވަމުންނެވެ. ތޮއްޖެހިފައިވާ މި މާލޭގައިވެސް މިފަދަ އެތައް ބައެއްވާނެކަން ޔަޤީނެވެ.

މާލޭގެ މަގުތައްވަނީ މީހުންނައިގެން ފުރި ބާރުވެފައެވެ. ހަފްތާ ފެށޭ ދުވަސް ކަމުން ގަޑި ނުޖެހި އޮފީހަށްދާ މީހުންނާއި، ސްކޫލްތަކަށްދާ ކުދިންނާއި ކުދިންގެ ބެލެނިވެރިންނެވެ. މިނޫންވެސް އެކި ކަންކަމުގައި ހޭލަމޭލައުޅޭ އެތައްބައެކެވެ.

“މަންމާ! އަދިވެސް ނުނިމޭތަ. މިހާރު ތިންފަހަރަށް ބައްޕަ ބުނެފި އަވަހަށް އަންނާށޭ. މިހާރު އަތުވެދާނެޔޯ.” ފާޙަނާގައި ހުރި މަންމަ މަރީނާއަށް މީރާ ގޮވާލީ ދެެން ނުކުންނާށޭ ބުނަމުންނެވެ. “ސާބަސް ދަރިފުޅަށް. ތިވަރަށް ނުގޮވިޔަސް މި ނުކުތީއޭ. ދަރިފުޅުގެ ބައްޕަވެސް އެއީ ވަރެއްގެ މީހެއް. ދަރިފުޅު ދޭބަލަ ކޮއްކޮ ނިމުނީތީ ބަލާލަން. މަންމަ މި ދަނީ ބައްޕަ ގާތަށް.” ފާޙަނައިން ނުކުތް ގޮތައް މަރީނާ އެއް ނޭވާއިން ބުނެލިއެވެ. މީރާ ހެމުންހެމުން ނުކުމެ މަރީނާގެ ކޮޓަރިއާ ޖެހިގެން ހުރި ކޮޓަރިއަށް ވަނީ ކޮއްކޮ ސަނާއަށް ގޮވަމުންނެވެ. “ނާއްކޯ! ޕިސްޕިސް. މީ އަނެއްކާ އަނެކަކު. ދެން ނިންމަން ވެއްޖެއެއްނު. މަންމަ ބުނެގެން ބަލާ މިއައީ. ދެންވެސް ހިނގަބަ. ބައްޕަވެސް އެބަހުރި ލަސްވެގެން. މިހާރު ހުންނާނީ ރުޅިވެސް ގަދަވެފަ ކަންނޭނގެ.” ސަނާގެ އަތުގައި ހިފާލަމުން މީރާ ބުންޏެވެ. “ވެއިޓް ދޮންތާ. އެހައް ބުނެބަ ނާއްކޮ ރީތިތަ. މި ޓޮޕްކޮޅު ގުޅޭތަ.” ލޯގަނޑު ކުރިމަތީ ހުރެ ލައިގެންހުރި މަޑު ނޫ މަތިކޮޅާއި ގަދަ ނޫ ސްކިނީއަށް ބަލާލަމުން މީރާ ގާތު އަހާލިއެވެ. “ހްމްމްމްމް. ނާއްކޮއާ ވަރަށް ގުޅޭ. އޯކޭ. ދެންވެސް ހިނގާބަ.” ސަނާއަށް ތަޢުރީފު ކުރަމުން މީރާ ހިނގައިގަތުމުން ފަހަތުން ސަނާވެސް ނުކުތެވެ. ދެމީހުން ނުކުތްއިރު ސަލީމް ހުރީ ގަރާޖުގައި އޮތް ކާރު ނެރެ ފަހަތު ޝީޓުގެ ދޮރުހުޅުވާލައިގެން ކުދިންގެ އިންތިޒާރުގައެވެ. މީރާ އާއި ސަނާ ކާރަށް އެރުމުން ސަލީމް ދޮރު ލައްޕާލުމަށްފަހު، ކުރީ ޝީޓަށް އަރާ ކާރު ދުއްވާލިއެވެ. “ދަރިދުޅުމެން ހާދަ ލަސްވީ. ކޮއްކޮއާއި ހެދި ދޯ. ކޮއްކޮގެ އެހުންނަނީ ދަރިފުޅުގެ މަންމަގެ ތަތްކަން.” ހީލަމުން ސަލީމް ބުނެލި އެއްޗަކުން އެންމެން އެއްފަހަރާ ހޭންފެށިއެވެ.

މާލޭގެ ތޮއްޖެހިފައިވާ މަގުތަކުންގޮސް ކާރު މަޑުކޮއްލީ ހުޅުލެއަށް އައިސް ގޮސްވާ ފެރީ ޓާރމިނަލް ކައިރިއަށެވެ. މަރީނާއާއެކު ދެކުދިން ފޭބުމުން ކާރު ޕާކުކޮއްލާފައި އަންނާނަން ކަމައްބުނެ ކާރުދުއްވާލިއެވެ. މަރީނާމެންގޮސް މަޑުކޮއްލީ ފެރީން އަންނަ މީހުން ނުކުންނަ ދިމާގައެވެ. ފުދޭވަރަކަށް މީހުންވެސް ގިނައެވެ. އިރުކޮޅެއްނުވެ ސަލީމްވެސް އެތަނައް އައެވެ. “ދެންމެ ގުޅި. ބުނީ ވަރަށް ކައިރީގައޭ.” މަރީނާއަށް ބަލާލަމުން ސަލީމް ބުނެލިއެވެ. ފަސްވަރަކަށް މިނެޓް ފަހުން ހުޅެލެއިން މާލެ އައި ފެރީ ތާރމިނަލްއަށް ބަނދަރުކުރިއެވެ. ހުޅުލެއިން އައި މީހުންގެ އެގްޒިޓް ދޮރުން ނުކުތް ޒުވާނާއަށް އެންމެންގެ ނަޒަރު ހުއްޓިގެން ދިޔައެވެ……