ސިއްރުން މިހިތާ ކުޅެނީހޭ (އެކާވީސްވަނަބައި)

“ޑޭޑް” ޒިޔާދު ސިހުނީ ހާސްވެފައި ޔާނާ ގޮވާލިއަޑަށެވެ. “ޑޭޑް ކީއްވެ ރޮނީ ކަމެއް ވީތަ” ޔާނާ އައިސް ޒިޔާދު ކައިރި އިށީއިނެ ހާސްވެފައި އަހާލިއިރު އޭނާއަށް ވެސް ރޮވިއްޖެއެވެ. އޭނާގެ ލޯބިވާ ބައްޕަ ރޯތަން ބަލަން އޭނާއަށް ކެތްވާނީ ކިހިނަކުން ހެއްޔެވެ.

ޒިޔާދު އަމިއްލަ ނަފްސް ހަމައަކަށް އަޅުވަން މަސައްކަތް ކުރަމުން ދެލޯފޮހެލިއެވެ. “ދަރިފުޅާ ކީއްކުރަނީ؟ ކޮބާ މިކްޔަން؟”

“ޑޭޑް ކީއްވެ ތިރޮނީ. އަޅުގަނޑު ކައިރި ވެސް ނުބުނާނަންތަ؟” ފެންކަޅިވެފައި ހުރެ ޔާނާ ބުނެލިއެވެ.

“ދަރިފުޅު ނުރޮއި. ދަރިފުޅު ރޯތަން ބަލާކަށް މި ބައްޕައަކަށް ކެތެއްނުވާނެ” ޒިޔާދު ލޯބިން ޔާނާގެ ދެލޯފޮހެލަދިނެވެ.

“ދެން އަޅުގަނޑަށް ކެތްވާނެތަ ޑޭޑް ރޯތަން ބަލަން.؟” ޔާނާ ޝަކުވާ ކޮށްލިއެވެ. “ދަރިފުޅުގެ މަންމަ މަތިން މާ ބޮޑަށް ހަނދާން ވީ. މިއަދު ދަރިފުޅުގެ މަންމަހުރިނަމަ ދަރިފުޅު އުފާވެރި ހަޔާތެއް ފަށައިގެން އުޅޭތީ ހާދަ އުފާވާނޭ”

“ޑޭޑް” ޔާނާ ޒިޔާދުގައިގަ ބައްދާލިއެވެ. “އަޅުގަނޑު ވަރަށް ދެރަވޭ އަޅުގަނޑުމެންނަށްޓަކައި ޑޭޑް އަމިއްލަ ލައިފްގައި ސްޓަކް ވެފައި ހުންނާތީ. ޑޭޑް އަޅުގަނޑު ބޭނުން ޑޭޑް ނިއު ލައިފްއެއް ފަށަން”

“ދަރިފުޅާ. ކޮއްކޮ ނުރުހެންޏާ ޑޭޑް އަށް ކައިވެންޏެއް ނުކެރެވޭނެ. ކޮބާ މިކްޔަން ނާދޭތަ؟” ޒިޔާދު އަވަސް އަވަހަށް މައުޟޫ ބަދަލު ކޮށްލިއެވެ. “ހޫމް ނިދައިފައި އޮތީ. އެހެންވެ އެކަނި މިއައީ” ޔާނާ ބުނެލިއެވެ. “ހިނގާ އަޅުގަނޑާއެކީ ކޮފީ ބޯން. އަޅުގަނޑަށް މިހާރު ވަރަށް މީރުކޮށް ކޮފީ ހަދަން އިނގެޔޭ” ޒިޔާދުގެ އަތުގައި ހިފާ ނަގަމުން ޔާނާ ބުނެލިއެވެ. ޒިޔާދު ހިނިތުންވެލާފައި އެހެންހޭ ބުނެ ޔާނާއާއެކީ ދިޔައެވެ.

*****

“މީގެ ފަހުން ސަބް ދިނުން ނިމުނީ. ކާލަޔޭ ދޯ. އެއް ސަބް ހުސްކޮށްލާފައި އަދި އަހަރެންގެ އެތިންވެސް ފަޅިއެއް ކާލާފި” ޒާއިން ބުނެލީ ފާޑަކަށް މޫނު ކުނިކޮށްގެން އިން ލާރާއަށެވެ. “އޯކޭ އެހެން އެއްޗެއް ދެން ދޭށޭ ބުނާނީ. އޯކޭއެއްނު” ލާރާ ބަނޑުގައި އަތްކާއްތަމުން ބުނެލިއެވެ. “ތިހާވަރަށް ކާއިރުވެސް ފަލަޔެއް ނުވޭތަ. ދަނޑިބުރި” ޒާއިން ބުނެލިއެވެ. “ޒުމްބާ ޖައްސަމޭ” ލާރާ ހިނިތުންވެފައި ނިއްއަރުވާލަމުން ބުނެލިއެވެ. “އެހެންވެ ޑާންސް ވަރަށް ސަޅިވާނެ ދޯ ލާރާގެ” ޒާއިން ބުނެލިއެވެ. “މީގެ ތަންކޮޅެއް ކުރިން ޒާއިން ބުނީ ހަޑި ވާހަކަ. ހޫން ހިނގާ ދެން ދާން” ލާރާ ކިޔާނެ އެއްޗެއް ކިޔާފައި ދާން ތެދުވިއެވެ.

ޒާއިން ދެފަރާތަށް ބޯހޫރުވާލީ ލާރާ ކިޔާނެ އެއްޗެއް ކިޔާފައި އޭނައަށް ވާހަކަ ދައްކަން ފުރުސަތު ނުދީ ތެދުވީމައެވެ. މި ލާރާގެ ގޮތެވެ. “މިގޮއްޔަށް ހެޔޮވާނެ މީނަގެ ބޭނުން ފުދުނީމަ. ވަރަށް ފޫހިވޭ” ތެދުވެ ލާރާއާ އެއްވަރު ކުރަމުން ޒާއިން ބުނެލިއެވެ.

“ޒާއިން އެހެން ކަމެއް ބޭނުންދޮ؟” ލާރާ ހައިރާންވެފައި އަހާލިއެވެ. ޒާއިން އެކެއްޗެކޭވެސް ނުބުނެ ހިނގަމުން ދިޔައެވެ.

*****

މިކްޔަންއަށް ހޭލެވުނީ މާވަރަކަށް ފޯނު ރިންގްވާތީއެވެ. ކުޑަކޮށް ލޯހުޅުވާލާފައި އެނދުގެ އަނެއްފަރާތަށް ބަލާލީ ޔާނާ ކޮބާތޯއެވެ. މިހާރު ޔާނާ ނެތެވެ. ހަމައަހަރެންނަށް ނިދެން ދެން ހުރީ ކަންނޭގެއެވެ. ކޮންމެއަކަށް އެކަމާ ނުވިސްނާ މިކްޔަން މާވަރަކަށް އެގުޅަނީ ކާކުތޯ ބަލާލުމަށްޓަކައި ފޯނު އަތުޖެހޭތޯ ބެލިއެވެ. އެނދުމަތީ ނެތުމުން ކުޑަކޮށް ތެދުވެ ސޯފާ ބަލާލިއިރު ސޯފާގައި ފޯނު އޮތުމުން ކަންނެތް ކަމާއެކީ ތެދުވެ ސޯޓް ލިއެވެ. އޭރު އަނެއްކާ ފޯނު ރިންގްވާން ފެށުމުން އަވަސް އަވަހަށް ގޮސް ފޯނު ނެގިއެވެ. ގުޅަނީ ނުދަންނަ ނަންބަރަކުން ކަމުން ނުނަގަން ހުރެފާވެސް މާވަރަކަށް ގުޅާފައި ހުރުމުން ފޯނު ނަގައި ކަންފަތުގައި ޖައްސާލިއެވެ.

“ހަލޯ ޔަން. އަހަރެން މަތިން ހަނދާން ނައްޓާލީތަ މިހާރު. ކީއްވެ.” އެކޮޅުން އިވުނީ ނަޝްވާގެ އަޑެވެ. “ކީއްވެ އަހަރެންގެ ނަންބަރު ބްލޮކް ކޮށްލީ” އަނެއްކާވެސް ނަޝްވާ ބުނެލިއެވެ. މިކްޔަން އިރުކޮޅަކު އެހެން ހުރެލާފައި ވާހަކަ ދައްކަން ފެށިއެވެ. “ނަޝް ސޮރީ. އަހަރެންނަށް ނަޝް އާއެކީ އުޅެވޭކަށް ނެތް. އަހަރެންމަތިން ހަނދާން ނައްޓާލާ”

ދެން އިވެން ފެށީ ނަޝްވާގެ ރުއިމުގެ އަޑެވެ. މިކްޔަން ދެރަވިއެވެ. ނަމަވެސް އޭނާއަށް މިހިއްމީ ޔާނާއެވެ. އޭނާގެ އަނބިމީހާއެވެ. ވިސްނުމެއްގައި ހުރި މިކްޔަން ސިހުނީ ނަޝްވާ ވާހަކަ ދައްކަން ފެށުމުންނެވެ. “އެއްމެ ރަނގަޅު. އެކަމް އެއްމެ ފަހަރަކު އަހަރެންނާ ބައްދަލު ކޮށްލާ. އެހާ ގިނައިރެއް ނުވާނެ. ޕްލީޒް. ހުޅުމާލޭގައި އަހަރެމެން އަބަދުވެސް ބައްދަލު ކުރަމެއްނު އަތިރިއެއް އެތަނަށް. ޕްލީޒް. މީގެ ފަހުން އަހަރެންގެ އުނދަގުލެއް ނުފޯރާނެ” ނަޝްވާ އާދޭސް ކޮށްލިއެވެ. މިކްޔަން އެއްބަސް ވިއެވެ. އެއްމެ ފަހުފަހަރަށް ބައްދަލު ކޮށްލުމަކުން ގޯހެއް ނެތްތާއެވެ.

******

ފޯނު ބޭއްވި ނަޝްވާ ކުރިމަތީ ހުރި ނަޒީހް އަށް ބަލާލިއެވެ. އެމޫނު މަތީ ވަނީ ކާމިޔާބީގެ ހިނިތުންވުމެވެ. “ނަޒީހް ބުނީމެއްނު ރުފިޔާ އެއް ބޭނުމެއް ނޫނޭ. ދެން ކީއްވެ ތިގޮތަށް ކަންތައް ކުރަން ތިއުޅެނީ.” ނަޝްވާ ހާސްވެފައި އަހާލިއެވެ. “މިކްޔަން ބޯ ގޮއްވަން. އޭރުން ހުންނާނެ ރަނގަޅަށް ބޮނޑި ބޮވިފަ” ނަޝްވާ ބޯހޫރާލީ ނަޒީހްއަށް ވިސްނައިނުދެވޭނެކަން އިނގޭތީއެވެ. “އެކަމް އަހަރެން ކިހިނެއް” ނަޝްވާ ބުނަން އުޅުނެވެ. “އަހަރެންނާ ކައިވެނި ކުރަން ބޭނުން ވިއްޔާ އަހަރެން ބުނާ ގޮތަށް ކަންތައް ކުރޭ. އަހަރެން ވިއްޔާ ކަލޭއާ އިންނަން އެއްބަސް ވެފީމެއްނު. އެހެން މީހެއް ނަމަ ކަލޭއާ ވައިވެސް ނޭޅުނީސް” ނަޒީހް އެތަނުން ދިޔައީ ހިތަށް އައިހާ އެއްޗެއް ކިޔާލާފައެވެ. ނަޝްވާއަށް ރޮވެން ފެށުނެވެ. ކޮންމެ މީހެއް އޭނާއަށް ކުރިން ކުރެވިފައި ހުރި ކަންތައް ހަނދާން ކޮށްދެނީ ކީއްވެހެއްޔެވެ. ކޮންމެ ކުށަކަށް ތައުބާވުން އޮވެޔެވެ. އަހަރެން ވެސް ތައުބާވީމެއްނޫންހެއްޔެވެ. ކޮންމެޔަކަށް އަހަރެންވެސް ދިރިއުޅުމެއް ބޭނުމެވެ. ނަޒީހް އެހެދީ މުޅިއަކުން ދޮގެއް ވެސް ނޫނެވެ. އެއްމެން އޭނަދެކެ ފޫހިވެއެވެ. އިންނާނެ މީހެއް ނުވާނެއެވެ. ދެން މިލިބުން މީހަ ދޫކޮށްލާނީ ކިހިނެއް ހެއްޔެވެ. ނަޝްވާ ނަޒީހް ބުނާގޮތަށް ކަންތައް ކުރަން ނިންމިއެވެ.

*****

ޒިޔާދު ކައިރި ދަނިއްޔޭ ބުނެފައި ނިކުމެގެން އައި ޔާނާއަށް ފެނުނީ ދޮރުމަތީ ވާހަކަ ދައްކަން ހުރި ޒާއިން އަދި ލާރާއެވެ. “ކޮއްކޯ ހޮސްޕިޓަލްއަށް ނުދަނީތަ؟” ޔާނާ އައިސް ހުއްޓިލަމުން އަހާލިއެވެ. “ދޮންތާ” ލާރާ ޔާނާގެ ގައިގައި ބައްދާލިއެވެ. ލާރާ ގަޑިޖެހުނީ ކަމަށް ބުނުމުން ޔާނާ ލާރާގެ ގައިގައި ބޮނޑިއެއް އަޅާލިއެވެ.

“އަމް މާދެން ހަވީރު ޒާއިންއާ ޒާޔާ އާއެކީ އިޔާޒް މެން ގެއަށް ކޮއްކޮ ދާން ވާނެ. މިމީހުން ފޫހިވާތީ ދާން އެއުޅެނީ. ކޮއްކޮވެސް ދޭ. އިޔާޒް އާވެސް ބައްދަލު ވާނެއްނު ދޯ ޒާއިން” ޔާނާ މިހެން ބުނުމުން ލާރާ ފުންމާލާފައި އޯކޭއޭ ބުނިއިރު ޒާއިން ހުރީ ވާނުވާގައެވެ. މާދެން ހަވީރު އެގެއަށް ދާން އުޅޭ ކަމެއް ހުދު އަހަރެންނަކަށް ވެސް ނޭނގެއެވެ. ދެން ދޮންބެދައްތަ އެހެން މިބުނީ ކީއްވެހެއްޔެވެ. “އެކަމް” ޒާއިން ބުނަން އުޅުނެވެ. “ހިނގާ ދޮންބެ ދައްތައާއެކީ ގެއަށް ދާން ދެން. ކޮއްކޮ ދޭ އެތެރެއަށް” ޔާނާ އަވަސް އަވަހަށް ބުނެލިއެވެ. ލާރާ އޯކޭއޭ ބުނެލާފައި އެތެރެއަށް ވަނެވެ. ޔާނާ ފުންނޭވާއެއްލިއެވެ.

“ހިނގާބަލަ” ހިނގައިގަންނަމުން ޔާނާ ޒާއިންއާ ދިމާލަށް ބުނެލިއެވެ. ޒާއިންވެސް އިތުރުސުވާލެއް ނުކޮށް ޔާނާއާ އެއްވަރަށް ހިނގައިގަތެވެ. ދިޔަ މަގުމަތީ ޔާނާ ޒާއިން އަށް ވެގެން އުޅޭ ގޮތް ކިޔާދިނެވެ. ޒާއިން ވެސް އަޒުމް ކަނޑައެޅީ ލާރާގެ ވިސްނުން ބަދަލުކޮށްލުމަށެވެ.

*****

“ޔަން. ކޮންތާކަށް؟” ޔާނާ ކޮޓަރިއަށް ވަންއިރު މިކްޔަން ބޭރަށް ދިޔުމަށް ނިކުންނަނީއެވެ. “އަންނާނަން. ލަހެއް ނުވާނެ” މިކްޔަން ޔާނާގެ ކޮލުގައި މަޑުމަޑުން ޖަހާލަމުން މިހެން ބުނެ ހިނގައިގަތެވެ. “ޔަން” ޔާނާ މިކްޔަންގެ އަތުގައި ހިފެހެއްޓިއެވެ. “އަހަރެން ދެރަވާ ވަރު ކަމެއް ނުކުރައްޗޭ. އައި ޓްރަސްޓް ޔޫ އެކަމްވެސް ބުނެލީ” ޔާނާ މިހެން ބުނުމުން މިކްޔަން ޔާނާ ގެނެސް އެ ނިއްކުރީގައި ބޮސްދިނެވެ. “އަހަރެން މީ މިހާރު ކުރީގައި ނުވިސްނިގެން އުޅުނު މިކްޔަންއެއް ނޫން. އަހަރެންނަށް ވިސްނޭ. ބޭބީ ދެރަވާވަރު ކަމެއް ނުކުރާނަން. އައި ޕްރޮމިސް.” މިކްޔަންގެ ޖަވާބުން ޔާނާގެ ހިތަށް ހަމަޖެހުން ލިބިގެން ދިޔައެވެ.

*****

ޒިޔާން ނަޝްވާ މެންގޭ މަގުން ހިނގާލަން ދިޔައީ ކޮންމެހެން ނަޝްވާ ފެންނާނެ ކަމުގެ އުއްމީދުގައެއް ނޫނެވެ. ނަމަވެސް ނަޝްވާ ފެނުމުން އެދިމާލަށް ހިނގައިގަތެވެ. ނަމަވެސް ހުއްޓެން މަޖުބޫރުވީ ނަޝްވާ ގޮސް އެހެން ފިރިހެނެއް ކައިރި ހުއްޓުމުންނެވެ. ނަޝްވާގެ މޫނު މަތިން ނުތަނަވަސްކަން ފެންނަމުން ދިޔައިރު ކައިރީގައި ހުރި ފިރިހެން ކުއްޖާ ނަޝްވާއަށް ހިތްވަރު ދެމުން ދިޔައެވެ. ޒިޔާންގެ ހިތުގެ ކަނަކުން އެއަކީ ނަޒީހްއޭ ބުނެލިއެވެ. މިދެމީހުން މިއުޅެނީ ކީއްކުރަން ހެއްޔެވެ. އެދެމީހުން ހިނގައިގަތުމުން ޒިޔާންވެސް އެމީހުންގެ ފަހަތުން ދިޔައީ އިތުރު ވިސްނުމަކަށް ނުގޮހެވެ.

އަތިރިއާ ހަމައަށް ދެވުމުން ނަޒީހް ގޮސް ގަހެއް ނިވަލަށް ވަދެ ފިލިއެވެ. ނަޝްވާގޮސް އެއްވެސް މީހެއް ނެތް އެއަތިރިމަތީ ހުއްޓުނެވެ. ޒިޔާން އެމީހުނަށް ނުފެންނަގޮތަށް ގަސްތަކެއްގެ ދޭތެރޭ އިށީއިނދެލިއެވެ. ޒިޔާން އިންތަނުން ނަޝްވާ ގެ އިތުރުން ނަޒީހް ވެސް ފެނެއެވެ. އިރުކޮޅެއްފަހުން އެތަނަށް އެހެން ފިރިހެނަކު އައުމުން ޒިޔާން އެމީހުން ދައްކާ ވާހަކަ އަޑުއެހުމަށް ސަމާލުވިއެވެ.

މިކްޔަން އައި ގޮތަށް އައިސް ފުރަތަމަވެސް ބުނެލީ އެއްމެ ބަހެކެވެ. “ފަށާ”

“ޔަން. ކީއްވެ އަހަރެން ދެކެ ފޫހި ވީ. އަހަރެންނަށް ކީއްކުރެވުނީ. ނޭނގޭތަ އަހަރެން ލޯބިވާވަރެއް. ނޭނގޭތަ މިހިތަށް ތަދުވާވަރެއް” ނަޝްވާ ގިސްލެވޭ ހާލު ވާހަކަ ދެއްކިއެވެ. އެކްޓް ޖައްސަންވެސް މޮޅީއެވެ.

“ނަޝް އަހަރެން ގެނައީ ތިވާހަކަ ދައްކަން ވިއްޔާ އަހަރެންގެ އިންޓެރެސްޓްއެއް ނެތް.” ފޫހި ގޮތަކަށް މިކްޔަން ބުނެލިއެވެ. ނަޝްވާ ނޫނޭ ކިޔާ ކުއްލިއަކަށް މިކްޔަންގެ ގައިގައި ބައްދާލިއެވެ. މިކްޔަންއަށް ލިބުނު ސިހުމުގައި މީހާ ބެލެންސްކޮށްލަން ނަޝްވާގެ ކޮނޑުގައި ހިފަހައްޓާލެވުނެވެ.

ޒިޔާން ގެ ދެބުމަގޮށްޖެހުނީ ނަޒީހް ފޯނު ދިއްކޮށްގެން ހުރުމުންނެވެ. ހީވާގޮތުން ފޮޓޯ ނަގަނީއެވެ. ކޮންމެވެސް ވަރަކަށް ޒިޔާންއަށް ވާނުވާ ރޭކާލިއެވެ. ނަމަވެސް ކަމެއް ނުކުރެވޭނެތީ އެތާ މަޑުން އިނެވެ.

“މޮޔަވީތަ ނަޝްވާ. އަހަރެންގެ މަތިން ހަނދާން ނައްޓާލާށޭ ބުނީމަ ހަނދާން ނައްޓާލާނީ” މިކްޔަން ހަޅޭ ލަވައިލަމުން ނަޝްވާ ކޮށްޕާލިއެވެ. ނަޝްވާ ގޮސް ޖެހުނީ ދޮންވެލިގަނޑު މައްޗަށެވެ. މިކްޔަން އެންމެ ހިނދުކޮޅަކުވެސް އެތާ މަޑުނުކޮށް ދިޔައެވެ.

ގަހުގެ ނިވަލުގައި ހުރި ނަޒީހްގެ މޫނުމަތީ ވަނީ ނުތަނަވަސް ކަމެވެ. ނަމަވެސް ތެދުވެގެން އަންނަ ނަޝްވާ ފެނި ހިނިތުންވެލިއެވެ. “މިޝަން ކޮންޕްލީޓް” ނަޒީހް ނުތަނަވަސް ކަން ފޮރުވަމުން ބުނެލިއެވެ. ނަޝްވާ ފަނޑުހިނިތުންވުމެއް ދިނެވެ. “ހިނގާ ދާން ދޯ ގެއަށް” ނަޒީހް ބުނެލިއެވެ. “ނަޒީހް ދޭ. އަހަރެން ދާނަން އިރުކޮޅަކުން” ނަޝްވާ މިހެން ބުނެ އަތިރި މައްޗަށް ނިކުމެލިއެވެ. ދުރުން މިކްޔަން ދާތަން ބަލާލި ނަޒީހް އަތްމުއްކަވާފައި އަނެއްއަތުގައި ޖަހާލީ ރުޅިއައިވަރުންނެވެ. އެއަށްފަހު އެނބުރި ހިނގައިގަތެވެ.

ދުރުގައި ހުރި ޒިޔާންއަށް ނަޒީހް އަށް ވީގޮތް ފެނި ވީ ހައިރާނެވެ. ފޮޓޯ ނެގިއްޖޭނޫންހެއްޔެވެ. ދެން ކޮންރުޅިއެއް އަންނާކަށް ހެއްޔެވެ. ކޮންމެއަކަސް ނަޒީހް ދިޔުމުން ޒިޔާން ނަޝްވާ ކައިރިއަށް ދިޔުމަށް ހިނގައިގަތެވެ.

“ނަޝްވާ ތީ ތިހާ ދަށުދަރަޖައިގެ މީހެއްތަ މީހެއްގެ ދިރިއުޅުން ހަލާކުކޮށްލަން ތިއުޅެނީ؟” ފުރަގަސްދީގެން މޫދާ ދިމާލަށް ބަލަން ހުރި ނަޝްވާ ސިހުނީ ޒިޔާންގެ އަޑުންނެވެ. އަވަސް އަވަހަށް ފަހަތަށް އެނބުރި ބަލާލީ ޔަގީން ކުރާށެވެ. “ޒިޔާ”

“އަހަރެންނަށް ފެނިއްޖޭ ތި ގަންގަނޑު. ނަޒީހް އެއްދެކެ ލޯބިވިޔަސް ދެން ތީ ބޮޑުވަރު.”

“ޒިޔާ އަހަރެން ދައްކާ ވާހަކަ އަޑުއަހާބަލަ. އަހަރެން ވެސް މިހެން މިއުޅެނީ ބޭނުންވާތީއެއް ނޫން. އާން އަހަރެން ނަޒީހް ދެކެ ލޯބިވަން. އެ ލޯބީގެ ހައްގުގައި އަހަރެން މިހެން މިއުޅެނީ. މިކަން ކޮށްގެން އަހަރެންނަށް އެލޯބި ލިބެންއޮތިއްޔާ އަހަރެން މިކަންވެސް ކުރާނަން. އަހަރެންނަކަށް ނަޒީހް ދުލެއް ނުކުރެވޭނެ. އަހަރެން މީ ކުރީގެ ނަޝްވާއެއް ނޫން. އަހަރެންވެސް ބޭނުން ލައިފްއެއް. އެންޑް އަހަރެންނަށް ލައިފްއެއް ހޯދާދޭން ތައްޔާރުވި މީހަކީ ހަމައެކަނި ނަޒީހް. އަހަރެން ނަޒީހް ބުނާ ގޮތަށް ކަންތައް ކުރާނަން. ދެޓްސް އިޓް” ނަޝްވާ ވާހަކަ ފެށީ މަޑުމައިތިރި ކަމާއެކު ނަމަވެސް ނިންމި އިރު އެ އަޑުގައި ރުޅިވެރިކަން ވެސް ވިއެވެ.

“ނަޝް ތީ ނުވިސްނޭ ވަރު ކުޑަކުއްޖެއް ނޫން. ނަޝް ތިކިޔާ ލައިފްއެއް ހޯދާދެވޭނީ ހަމައެކަނީ ނަޒީހް އަކަށް ނޫނޭ. ތި އަމިއްލަ އެދުމާހެދި މީހުންގެ” ޒިޔާންގެ ވާހަކަ ނަޝްވާ މެދުކަނޑާލިއެވެ.

“ޔޫ ވިލް ނެވާ އަންޑަސްޓޭންޑް” ނަޝްވާ އެތަނުން ދިޔައެވެ. ޒިޔާން ނަޝްވާ ދިޔަދިމާލަށް ބަލަން ހުއްޓެވެ. އެހިތުގައި ދެންމެ އައި ނުދަންނަ ޒުވާނާއާމެދު ހަމްދަރުދީ އުފެދުނެވެ. ނަޝްވާއަށް ވިސްނޭނެނަމައެވެ. ޒިޔާން ފަޒާގެ ތެރެއަށް ފުން ނޭވާއެއް ދޫކޮށްލިއެވެ.

******

މިކްޔަންގެ އިންތިޒާރުގައި ނުނިދިފައި އޮތް ޔާނާ އަށް މިކްޔަން ވަދެގެން އަންނަތަން ފެނުމުން އެނދުން ތެދުވިއެވެ. “ކައިފިންތަ؟ ކާން ހިނގާ” ޔާނާ ބުނެލިއެވެ.

“އެހާ ބަނޑުހައެއް ނޫން ބޮލުގައި ވެސް ރިއްސާ. ނިދާލަން ބޭނުމީ” މިކްޔަން އެނދަށް ވެއްޓިގަތެވެ. ޔާނާގޮސް މިކްޔަންގެ ބޮލުގައި ފިރުމާލިއެވެ.

“ކަމަކާ ވިސްނަނީތަ؟” ޔާނާ އަހާލިއެވެ. މިކްޔަން ހުރިހާ ވާހަކައެއް ކިޔާދޭން ހިތަށް އެރިނަމަވެސް މިފަހަރު ވެސް ކިޔާދޭކަށް ނުކެރުނެވެ. “ނޭނގޭ އަހަރެންގެ އެކައުންޓަށް އެބަހުރި ބައިވަރު ފައިސާ އައިއްސަ. ނޭނގެ. މީހަކަށް އޮޅިގެން ކަމަށް ވާނީ” ޔާނާ ބޯމެޑެން ފެށުމުން މިކްޔަން ލޯމަރާލަމުން ވާހަކަ ދެއްކިއެވެ. ތެދެކެވެ. މިކްޔަން މިއަދު ބޭންކްއަށް ގޮސް ބަލާލިއިރު ކޮންމެވެސް މީހަކު ރުފިޔާ ތަކެއް އޭނާގެ އެކައުންޓަށް ޓްރާންސްފާ ކޮށްފައި ހުއްޓެވެ. “ކިހާވަރެއް؟” ޔާނާ އަހާލިއެވެ. “އެއްލައްކަ ވަރު” މިކްޔަން ބުނެލިއެވެ. “ތިމީހަކު ހޯދާނީ ފަހުން. އިހަށް ނިދާލެވޭތޯ ބަލާ އިނގޭ” ހުއްޓުމެއްނެތި މިކްޔަންގެ ބޯމެޑެދެމުން ޔާނާ ބުނެލިއެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.