ސިއްރުން މިހިތާ ކުޅެނީހޭ (ބާވީސްވަނަބައި)

“ކަމަކާ ވިސްނަނީތަ؟” ޔާނާ އަހާލިއެވެ. މިކްޔަން ހުރިހާ ވާހަކައެއް ކިޔާދޭން ހިތަށް އެރިނަމަވެސް މިފަހަރު ވެސް ކިޔާދޭކަށް ނުކެރުނެވެ. “ނޭނގޭ އަހަރެންގެ އެކައުންޓަށް އެބަހުރި ބައިވަރު ފައިސާ އައިއްސަ. ނޭނގެ. މީހަކަށް އޮޅިގެން ކަމަށް ވާނީ” ޔާނާ ބޯމެޑެން ފެށުމުން މިކްޔަން ލޯމަރާލަމުން ވާހަކަ ދެއްކިއެވެ. ތެދެކެވެ. މިކްޔަން މިއަދު ބޭންކްއަށް ގޮސް ބަލާލިއިރު ކޮންމެވެސް މީހަކު ރުފިޔާ ތަކެއް އޭނާގެ އެކައުންޓަށް ޓްރާންސްފާ ކޮށްފައި އިނެވެ. “ކިހާވަރެއް؟” ޔާނާ އަހާލިއެވެ. “އެއްލައްކަ ވަރު” މިކްޔަން ބުނެލިއެވެ. “ތިމީހަކު ހޯދާނީ ފަހުން. އިހަށް ނިދާލެވޭތޯ ބަލާ އިނގޭ” ހުއްޓުމެއްނެތި މިކްޔަންގެ ބޯމެޑެދެމުން ޔާނާ ބުނެލިއެވެ.

********************************

މިކްޔަން އަށް ނިދުނުކަން ޔަގީން ވުމުން ޔާނާވެސް މިކްޔަން އޮތްފަޅި ނޫން އަނެއްފަޅިއަށް އަރާ އޮށޯއޮތެވެ. ޔާނާއަށް ދެފަރާތަށް ފުރޮޅިލާ ފުރޮޅިލާ އޮވެވުނީއެވެ. އެހިތް ނޭނގޭ ބާރުމިނެއްގައި ތެޅެމުން ދިޔައެވެ. ކަމެއް ވާން އުޅޭހެން އެހިތަށް ހީވަނީއެވެ.

********

ޒާއިންއަށް ކުއްލިއަކަށް ލޯހުޅުވާލެވުނެވެ. މިފެނުނީ ކޮންކަހަލަ ހުވަފެނެއްހެއްޔެވެ. ލާރާ އޭނާއާ ދުރަށް އެދަނީ ކީއްވެހެއްޔެވެ. އަދިވެސް ލާރާގެ ފެންކަޅިވެފައި ހުރި ލޯ ޒާއިންއަށް ސިފަވަމުން ދިޔައެވެ. އަނެއްކާ ލާރާ އަހަރެންނާ ގެއްލެނީބާވައެވެ. ނޫނެކެވެ. އަހަރެން އެހެންވިޔަކަ ނުދޭނަމެވެ. ވީހާވެސް އަވަހަކަށް ލޯބި ހުށައެޅުމަށް ޒާއިން ނިންމިއެވެ. އަނެއްކާވެސް ޒާއިން ނިދޭތޯ ބެލީ މާދަމާ ހެދުނު އޮފީހަށް ނުގޮއްސިއްޔާ ނާސިހް ރުޅިއަންނާނެކަން އިނގޭތީއެވެ.

*****

“އޭ ކަމަނާ ހާދަވަރަކަށް ތި ނިދަނީ. ހޮސްޕިޓަލްއަކަށް ނުދާނަންތަ؟” މިކްޔަން ބެގީ ކޮށްލަމުން ޔާނާއަށް ގޮވާލިއެވެ. ޔާނާ ކަންނެތްގޮތަކަށް ލޯހުޅުވާލިއެވެ. “އަހަރެން ނުދާނަން މިއަދު.”

“އެކީއްވެ.. ބަލީތަ؟”

“ނޫން ދެން މިއަދު ދާހިތް ނެތީ”

“އޯކޭ އަހަރެން ދަނީ” މިކްޔަން ހިނިތުންވެ ހުރެ ނިކުތެވެ. އޭނާ ހުރީ ހިތްހަމަޖެހިފައެވެ. ދެން ނަޝްވާ އެއް އެދެމެދަކަށް ނުވަންނާނެކަން އިނގޭތީއެވެ.

ކެބިންގައި އިން މިކްޔަން ވިސްނަމުން ދިޔައީ އެގޮތްނޭނގޭ ފައިސާތަކާ މެދުއެވެ. އޮޅިގެންވިއްޔާ މިހާރު މީހަކު ގުޅާނެހާވެސް އިރުވެއްޖެއެވެ. މި ޖެހުނީ ކަންތަކާއެވެ. އެހެން މީހެއްގެ ފައިސާވީ އަހަރެން ބަލާށެވެ. އެވަގުތު ފޯނު ރިންގްވާން ފެށުމުން މިކްޔަން ފޯނު ނެގީ ސިކްރީނަށް ބަލާވެސް ނުލައެވެ. “ހަލޯ” އެކޮޅުން ބަރު ފިރިހެނެއްގެ އަޑު އިވުމުން މިކްޔަން ފޯނު ދުރުކޮށްލާ ސިކްރީނަށް ބަލާލިއެވެ. މިކްޔަން އަމިއްލަބޮލުގައި ޖަހާލީ ނުދަންނަ ނަންބަރަކުން ގުޅުމުންވެސް ނެގުނީމައެވެ. ނަމަވެސް ދެވަނަ ސިކުންތުގައި ވިސްނުނީ ފައިސާގެ ކަންތަކުގައި މީހަކު ގުޅީ ކަމަށެވެ.

“މިސާލަކަށް އަހަރެން ނަޝްވާއާ ކަލޭއާ ގައިގޯޅިވެފައި ހުރި ފޮޓޯތައް ޔާނާއަށް ދައްކާފިއްޔާ” އެމީހާ ފުރަތަމަވެސް ބުނެލީ މިހެނެވެ.

“އެސްކިއުޒް މީ. ހޫއިޒް ދިސް؟” މިކްޔަން ދެބުމަ ކައިރި ކޮށްލިއެވެ. އެމީހާ ޖަހާލީ ހިނިގަނޑެކެވެ. “ކާކު ކަން ނުބަލާ އަހަރެން މިބުނި ވާހަކައާ މެދު ވިސްނަބަލަ”

“ބުނަން ވާހަކައެއް. ފޮޓޯ ދައްކާކަށް އަހަރެންނާ ނަޝްވާއާ ތިހާ ގާތެއް ވެސް ނުވަން”

“އެކަކު އަނެއްކަކު ގައިގަ ބައްދަމެއްނު”

މިކްޔަން ހިނިގަނޑެއް ޖަހާލިއެވެ. “އާން އެއަކީ ކުރިން. އަހަރެންނަށް ހެޔޮ ޔާނާއަށް ތި ދެއްކިޔަސް. އޭނަ ގަބޫލެއް ނުކުރާނެ”

“ރޭގައި އޮޅުލާ މަންޑި ކުޅެނިކޮށް ނަގާފައި އިން ފޮޓޮއެއްގެ ވާހަކަ މިކިޔަނީ. އަހަރެންގެ މޮޅު ފޯނުން ނެގީ. ޑޭޓް ވެސް އިންނާނެ ގަޑިއާ އެއްކޮށް” އެމީހާ ބުނެލިއެވެ. މިކްޔަންގެ ދެބުމަ ގޮށްޖެހުނެވެ.

“އަހަރެން އޮޅުލާ” މިކްޔަންއަށް މިހިސާބަށް ބުނެވުނު ތަނާ ހަނދާންވީ ރޭގައި ނަޝްވާ ބައްދާލި މަތިންނެވެ. އެހެންވެ އެމަންޒަރު މިމީހާ ފޮޓޯ ނެގީތާއެވެ. މިކްޔަން ފުންނޭވާއެއް ލިއެވެ.

“އަހަރެން ޔާނާއަށް ކިޔާދޭނަމޭ ރޭގަ ވީކަންތައް ސޯ ނޯވޮރީސް”

“ހަހަހަ. މިސާލަކަށް އަހަރެން އެ ފޮޓޯ އެހެންގޮތަކަށް ޔާނާ އަށް ދައްކާފިއްޔާ؟ ލައިކް” އެމީހާ މިހިސާބަށް ބުނިތަނާ މިކްޔަންގެ ފޯނަށް ވައިބާއިން މެސެޖެއެއް އައެވެ. މިކްޔަން ފޯނު ދުރުކޮށްލާފައި ބަލާލިއެވެ. ފޮޓޮއެކެވެ. އޭގައި އިނީ ރާއްޖޭންބޭރު އެކްޓަރެއްގެ ފޮޓޮއެވެ. ލައިގެން ހުރީ ގަމީހަކާ ޖިންސެކެވެ. މި ކޯއްޗެއް ހެއްޔެވެ. އަނެއްކާ ފޮޓޮއެއް އައުމުން މިކްޔަން ލޯޑް ކޮށްލާފައި އެބަލާލިއެވެ. މިކްޔަންގެ ދެލޯބޮޑުވިއެވެ. މޫނު މަތީ އަތްއަޅާލެވުނީ ބޭއިހްތިޔާރުގައެވެ.

އެއަކީ ހަމަ ކުރިން ފޮނުވި ފޮޓޯއެވެ. އެއްވެސް ތަފާތެއް ނެތެވެ. ނަމަވެސް އެމީހާގެ އެއްވެސް ފޭރާމެއް ނެތެވެ. މިކްޔަން އަވަހަކަށް އެ ޑިލިޓް ކޮށްލާފައި ފޯނު ކަންފަތުގައި ޖައްސާލިއެވެ.

“އަހަރެން ކިހިނެއް ގަބޫލު ކުރާނީ އަހަރެންގެ ފޮޓޯ ކަލޭ އަތުގައި ހުރި ކަމަކަށް؟” މިކްޔަން ބުނެލިއެވެ. އެމީހާ ހޭން ފެށިއެވެ. “ފޮނުވާލަފާނަން. އެކަމް ބަލަން ކެރޭނެތަ. އަހަރެން އިންނާނީ މިހާރު އެ ފޮޓޯ އެޑިޓް ކޮށްފަ. ބޯތް އޮފް ޔޫ. ފުލް ނޭކެޑް. އަން މިފޮނުވާލީ.” މިކްޔަން ފޯނުބަލާލިއެވެ. އެއްކޮށް ލޯޑް ނުވި ނަމަވެސް ނަޝްވާގެ ބުރަކަށި ހާމައަށް ފެންނަން އޮތެވެ. އިތުރަށް ބަލަން ނުކެރިގެން މިކްޔަން އެ ޑިލިޓްކޮށްލިއެވެ. އެ ފޮޓޯގެ ބެކްގްރައުންޑް ވެސް ބަދަލުކޮށްފައި ވާއިރު ހީވަނީ އަސްލެއްހެންނެވެ. އެޑިޓް ކޮށްފައި ހެން ހީވެސް ނުވެއެވެ. މިކްޔަންއަށް ހަދާނެ ގޮތެއް ނޭގުނެވެ.

“ކަލޭ ބޭނުންވަނީ ކޮންކަމެއް؟” މިކްޔަން ބުނެލިއެވެ. އެމީހާ އަނެއްކާވެސް ހިނިގަނޑެއް ޖަހާލިއެވެ. “ތި އައީނުން އަދި ޕޮއިންޓަށް. އަހަރެން އަޑު އެހިން މިތާ ކައިރި ރަށެއްގައި ކަލޭމެންގެ ވަރަށް ސަޅި ގެއެއް ހުންނަ ވާހަކަ. އެ ގެ އަހަރެންގެ ނަންމައްޗަށް ހަދަން ވީ. އޭރުން މި ފޮޓޯއަކީ ނެތް އެއްޗެއް ކަމަށް ހީކޮށްލާ” އެމީހާ ބުނެލީ މަލާމާތުގެ ރާގަށެވެ.

މިކްޔަންއަށް ހީވީ އޭނާގެ މޫނުމަތީ މީހަކު ޖެހިހެންނެވެ. ތެދެކެވެ. އޭނާގެ ގެއެއް ހުންނާނެއެވެ. ނޫނެކެވެ. އޭނާގެ މާމަ އަދި ކާފަގެ ގެއެވެ. ކާފާ ނިޔާވުމުން މާމަ އެގެ ބެލެހެއްޓީ ނުލާހިކު ލޯބިންނެވެ. ކާފަގެ ހަމައެކަނި ހަނދާނޭ ކިޔާފައެވެ. މާމައަށް އެގެ މުހިއްމު ކަން އިހްސާސް ވެ ނާސިހް އެ ގެ ޒަމާނީ ފެންވަރަށް ހެދިއެވެ. މާމަގެ އެއްމެ ފަހު ވަސިއްޔަތަކީވެސް އެގެ ރީތިކޮށް ބެލެހެއްޓުމަށެވެ. އެ ގޭގެ މަތިން ހަނދާން ވާފަހަރަކު މިކްޔަން އޭނާގެ މާމަ މަތިން ހަނދާންވެއެވެ. އެހެންވެ ޔާނާ ކައިރިވެސް މި ގެއާ ބެހޭގޮތުން އެއްޗެކޭ ބުނެފައެއް ނޯންނާނެއެވެ.

“ވިސްނާ ވިސްނާ. އަހަރެން ދޭނަން ދިހަ ދުވަސް. 9 ވަނަ ދުވަހު އަހަރެން ފޮނުވާނަން ލިޔުން ތަކެއް. އޭގައި ސޮއި ކޮށްފައި 10 ވަނަ ދުވަހު އަހަރެންނާ ހަވާލު ކޮށްލާ. އެދުވަހުން އިނގޭނެ އަހަރެން މީ ކާކުކަންވެސް އަދި އަހަރެންގެ އަސްލު ބޭނުން ވެސް” މިކްޔަން ސިހުނީ އެމީހާ ވާހަކަ ދައްކަން ފެށުމުންނެވެ.

“ޕްލީޒް އަހަރެން ކަލޭ ބުނި ވަރަކަށް ރުފިޔާ ދޭނަމޭ. އެކަމް އެ ގެއެއް ނޫން” މިކްޔަން އާދޭސް ކުރަން ފެށިއެވެ. އެގެ ދީފިއްޔާ ނާސިހް މެންވެސް އޭނައަށް ނަފްރަތު ކުރާނެއެވެ. “އަހަރެން މިބުނީ ފައިނަލް ކޮށް. 10 ޑޭސް. ބާއި” އެކޮޅުން ފޯނު ކަނޑާލިއެވެ. މިކްޔަންގެ ދެލޯ ފެންކަޅިވިއެވެ. މިވީ ކިހިނެއްހެއްޔެވެ. އޭނާއަށް މިނޫން ގޮތެއް ހަމަ ނެތީބާއެވެ. އެއްކޮޅުން އޭނާގެ އަލަތު ތެދުވެރި ލޯތްބެވެ. އަނެއްކޮޅުން އޭނާގެ މާމަގެ ވަސިއްޔަތެވެ.

******

ފޯނު ބޭއްވި ނަޒީހްގެ މޫނުމަތީ ވަނީ ކާމިޔާބީގެ ހިނިތުންވުމެވެ. މިފަހަރު ރަނގަޅަށް މިކްޔަން ރޮއްވާލާނަމެވެ. އެކަކަށް ދެރަ ދީފައި އަނެއްކަކު އުފަލުގައި ހުރިޔަ އަހަރެން ދޭނެހެއްޔެވެ. ކުރިން އޭނަ ވިސްނީ ރުފިޔާ ހޯދަން ނަމަވެސް ރުފިޔާ ދިނުމަށް މިކްޔަން އަށް ފަސޭހަ ވާނެއެވެ. ނަމަވެސް އެގެ ދިނުމަށް މިކްޔަން އަށް އުނދަގު ވާނެއެވެ. ދާދި ފަހުން ވިޔަސް އެގެ ހުރިކަން ނަޒީހް އަށް އެނގުމުން ނަޒީހް އުފާވިއެވެ.

*******

ނާސިހް އިނީ ކޮފީއެއްބޯށެވެ. ކައިރީގައި އާލިމާވެސް އިނެވެ. “އިނގޭތަ ރޭގައި އެރަށުގައި ހުއްޓަ އެއްކަލަހެން މެޔަށް އުނދަގުވާން ފެށީ. ހަދާނެ ގޮތްވެސް ނޭނގުން” ނާސިހް ބުނެލިއެވެ. “އޭން. ދެން ރަނގަޅުތަ. ހިނގާ ޑޮކްޓަރަށް ދައްކަން” ނާސިހްއަކީ ހިތުގެ ބަލި ހުންނަ މީހެއް ކަމުން އާލިމާ ހާސް ވިއެވެ. “ރަނގަޅޭ މިހާރު. ނަސީބް ރޭގައި ނުދަންނަ ސޮރަކާ ދިމާވީމަ. އޭނަ އަހަރެން ގެއަށް ގެންގޮސްދީ ޑޮކްޓަރަށް ވެސް ގުޅީ. އޭ އާލިމާ ހާސްވީމަ އަދިވެސް ހާދަ ލޯތްބޭ” ލާނެތްކަމާއެކީ ނާސިހް ބުނެލިއެވެ. އާލިމާ ކަޅިއަޅާލިއެވެ. ދެން އިވުނީ ނާސިހްގެ ހިނިގަނޑުގެ އަޑެވެ. ދެބައިއުމުރަށް އެޅިފައި ހުއްޓަސް އެދެމީހުންގެ ލޯތްބަށް ބަދަލެއް ނާދެއެވެ.

*****

ޒާއިން އަދި ޒާޔާ ކާރުގައި ލާރާ ބަލައި އައިއިރު ލާރާ ބޭރުގައި ހުއްޓެވެ. ލާރާ އަވަހަކަށް ގޮސް ޒާޔާ ކައިރި ފަހަތު ސީޓަށް އެރިއެވެ. “ދާހިތްވެފައި ހުރިވަރުން ބަލާލަ މިހާރު ބޭރުގަ ވިއްޔަ އެހުރީ” ޒާއިން ދިމާކޮށްލިއެވެ. ލާރާ ތުންއަނބުރާލިއެވެ. “އޭ އަހަރެންމެން މިއުޅެނީ ކައިވެނި އަވަސް ކޮށްލަން އަންނަ ހަފްތާ ބުދަ އަށް” ޒާޔާ ބުނެލިއެވެ. ލާރަ އަވަސް އަވަހަށް އިނގިލިން ދުވަސް ގުނަން ފެށިއެވެ. ޒާއިން އަށް ބުނެލެވުނީ ވަޓް އެވެ. “އެންމެ 8 ޑޭސް. ކީއްވެ؟” ލާރާ ބުނެލިއެވެ.

“އިޔާޒްގެ ދޮންބެ އަކަށް ނުލިބެ ޗުއްޓީއެއް ނެކްސްޓް މަންތްއަކު. ދެން އިޔާޒް ބޭނުންވަނީ އެއްމެން ހުންނަ އިރަކުން ކުރަން. އެހެންވެ. ދޮންބެ އާއި ދޮންބެ އިނދެގެން އުޅޭ މީހަ އަންނާނެ އަންނަ ހަފްތާގައި ހަމަ ޕާޓިއަށް” ޒާޔާ އޮޅުން ފިލުވަދިނެވެ. ލާރާ އަދި ޒާއިން އަށް އެއްފަހަރާ އޯ އޭ ހަދާލެވުނެވެ. “އެހެންވެ ވަރަށް މަސައްކަތް އޮންނާނެތާ ދޯ” ޒާއިން ބުނެލީ ޝައުގުވެރިކަމާއެކީ ނަމަވެސް އޭނަގެ ސަމާލުކަން ހުރި މަގަށެވެ. “ހޫމް. ޒާއިން މެންނަށް. އަހަރެން ވެޑިންގްޑްރެސް ވެސް ލިބިއްޖެ. ބައްޕަވެސް އަންނާނެ ވަރަށް އަވަހަށް” “ހޫމް ހޫމް” ޒާޔާ ފޮނި ވި ވަރުން ޒާއިންއަށް ބުނެލެވުނެވެ.

****

ލާރާ މެން އިޔާޒް މެން ގޭގައި ހުއްޓި ބެލް އަޅާލިއެވެ. ދޮރު ހުޅުވާލުމާއެކީ އިޔާޒް ޒާޔާގެ އަތުގައި ހިފައިގަތެވެ. ޒާޔާ ސިހުނު ވަރުން ކުޑަކޮށް ހަޅޭވެސް ލަވައިގަތެވެ. “ހަމަ ގަޑިއަށް ތިއައީ. ހިނގާ ކާޑް ފައިނަލް ކުރަންދާން” އިޔާޒް ލާރާ މެންނަށް އެއްލޯމަރާލަމުން ބުނެލިއެވެ. ޒާއިން އަދި ލާރާއަށް ޖަހާލެވުނީ ހިނިގަނޑެކެވެ. “ހޫމް ހިނގާބަ. އަހަރެންވެސް ވަރަށް ބޭނުން ތިކަން ކުރަން” ޒާޔާ މިހެން ބުނުމުން އިޔާޒް ޒާޔާ އަތުގައި ހިފައިގެން އެނބުރި ދިޔައީ ޒާއިން އަދި ލާރާ ކައިރި ވަނުމަށް ބުނެފައެވެ.

“އަނހަ ދެކުދިން އާދޭ. އިށީއިނޭ. އަޅެ ދައްތަ ހަވީރު ހެދިކާ އެއްވެސް ނަހަދަން. ދަރިފުޅާ ޒިޔާން ދޭބަލަ ހެދިކާ ކޮޅެއް ގަނެލައިގެން އަންނަން” ކޮމްޕިއުޓަރާ ކުޅެން އިން ޒިޔާން ކައިރިން އާބިދާ އެދުނެވެ. “ނޫނޭ. އެ އޯކޭ ވާނެ” ލާރާ ބުނެލިއެވެ. “އޯކޭ އެއްނުވާނެ. ދަރިފުޅު ދޭ” ޒިޔާން ތެދުވެ ހިނގައިގަތެވެ. “އަހަރެންވެސް ދާނަން.” ޒާއިން އަވަސް އަވަހަށް މިހެން ބުނެ ތެދުވެ ޒިޔާން އާ އެއްވަރުކޮށްލިއެވެ. ޒިޔާން ރަނގަޅު ބްރޯއޭ ބުނެލީ ޒާއިންގެ ބުރަކަށި ޖަހާލަމުންނެވެ. އެއަށްފަހު ދެމީހުން ހިނގައިގަތެވެ.

“އިޔާޒްގެ ބައްޕަ ނޫޅޭތަ؟” ލާރާ އޭނާގެ ހިތުގައި ވާ ސުވާލު ކޮށްލިއެވެ. އާބިދާ އިސްދަށަށް ޖަހާލިއެވެ. “ދައްތަ ވަރިވެގެން މިއައީ.” އާބިދާ ދިނީ ކުރުޖަވާބެކެވެ. ލާރާ އޯ އޭ ލައްވާލިއެވެ. “ބޭބެ ކަޑައީތަ” ކިތަންމެ ނާހަން ހިތަށް އެރިޔަސް އަނގަ ގަދަކަމުން އަނެއްކާ ލާރާއަށް އަހާލެވުނެވެ. “ހެހެ ކޮއްކޮގެ ތިހުންނަނީ ހަމަ ދައްތަގެ އެކުވެރިއެއްގެ ގޮތް. ދައްތަ އަށް ކޮއްކޮ ހާދަ ވައްތަރުވެސް ވައްތަރޭ އޭނައާ” ނާހީ މަތިން ހަނދާން ކުރަމުން އާބިދާ ބުނެލިއެވެ. “އެހެންވިއްޔާ މީ ދައްތަގެ އެފްރެންޑް ކަމަށް ދެކިބަލަ” ލާރާ އަމިއްލަ މޭގައި އަތް ބާއްވާލަމުން ބުނެލިއެވެ. އާބިދާ ހީލިއެވެ. “އިނގޭތަ އޭނާ ނިޔާވެއްޖެ. ހާދަ ދެރަވިޔޭ ނާދެވުނީމަ. އެކަމް މަޖުބޫރިވީ. އަންނަން ބޭނުންވިޔަސް ދައްތައަށް ނާދެވުނީ. ދައްތައެއް ގޮތަށް ދެކުން މީހެއް އެއީ” މާޔޫސީ ގޮތަކަށް އަބިދާ ބުނެލިއެވެ. “އެކީއްވެ”

“ކޮއްކޮއަށް ނޭގުނަސް ދައްތައަށް ނުވިސްނި ގޯސް ކަމެއް ކުރެވުނު. ދައްތަ ބޭނުމެއް ނުވޭ އެވާހަކަ ދައްކާކަށް. ދައްތަ އެކަނިވެރިވަފަ މިހުންނަނީ އޭނަ ނެތީމަ. ހިތަށް އަރާ އަހަރެން ގެ ލޯބިވާ އެކުވެރިޔާ ހުންނަނަމައޭ” އާބިދާ މިހެން ބުނުމުން ލާރާ އިން ސޯފާއިން ތެދުވެ ގޮސް އާބިދާ ކައިރި އިށީއިނދެލިއެވެ. “ނޭނގެ ކޮއްކޮ އޭނައާ ވައްތަރު ކަމުން ކަންނޭގެ މިވާހަކަ ތައް މިކިޔައިދެވެނީވެސް.” ލާރާ ހިނިތުންވެލިއެވެ. “ދައްތަ ދެން އެހެން މީހަކަށް ކައިވެނި ކުރަން ނުވިސްނަންތަ؟”

“ކައިވެނި ކުރަން ބޭނުމެއް ނޫން. އެކަމް އެކުވެރިޔާއަށް ޓަކައި އެކަން ވެސް ކުރަން ބޭނުން. އެކަމް އެކަން ވާކަށް ނެތް މިވަގުތު. އެކަމުގައި ދައްތަގެ ޝަކުވާއެއް ވެސް ނެތް”

“ކީއްވެ ވާން ނެތީ. ދައްތަ އަށް ކަމުދާ މީހަކު ދައްތަ އާ އިންނަން އެއްބަސް ނުވީތަ؟ އަހަރެން ކައިރި ބުނެބަލަ އެމީހަކު. އޯކޭ ކޮށްލާނަން އެއްބުރުން” ލާރާ ފޮނިވެލާފައި ބުނީ އާބިދާގެ މޫޑު ރަނގަޅުކޮށްލުމަށެވެ. އެކަން ކާމިޔާބު ވެސް ވިއެވެ. އާބިދާ ހިނިތުންވެލިއެވެ. “ނާހީ. ހަމަ ނާހީ ގެ ގޮތް” ލާރާގެ މޫނުގައި ޖަހާލަމުން އާބިދާ ބުނެލިއެވެ. ލާރާ ގެ ހިނިތުންވުން ގެއްލުނެވެ. ނާހީ އަކީ އަހަރެންގެ މަންމަގެ ނަމެވެ. “ނާހީ” ލާރާ އެއްޗެކޭ ބުނަން އުޅުނެވެ.

“ހާދަ އޮލަ ވާހަކަ އެއްގައޭ ދޯ” އެތެރެއަށް ޒިޔާންއާއެކީ ވަން ޒާއިން ބުނެލިއެވެ. އާބިދާ މެން ހިނިތުންވެލިއެވެ. ލާރާވެސް ގަދަކަމުން ހިނިތުންވެލިއެވެ.

******

“ހަލޯ ނަޝްވާ ކަލޭ ކޯއްޗެއް ބޭނުންވެގެން އަހަރެންނަށް ތިހެންތިހެދީ” މިކްޔަން ގުޅާލީ ނަޝްވާއަށެވެ. “ޔަން ކީއްވީ” މައުސޫމު އަޑަކުން ނަޝްވާ ބުނެލިއެވެ. “ކީއްހޭވީ. ރޭގަ އަހަރެން ގައިގަ ބެއްދީ އަހަރެންގެ ދިރިއުޅުން ހަލާކު ކޮށްލަންށެއްނު. މީހަކު ލައްވާ ފޮޓޯ ނެގިޔަސް އަހަރެން ކަލޭއަކަށް ދެން ހެވެއް ނުވާނެ ހަނދާންކުރާތި. “ކީކޭ ފޮޓޮއޭ. އަހަރެންނަކަށް ނޭނގޭ” ނަޝްވާ މިހެން ބުނުމުން މިކްޔަން ރުޅިއައިއްސަ މިއަދު ވީކަންތައް ކިޔާދިނެވެ. “ވަޓް. އަޅޭ. ކޮންމެވެސް ގޮތަކުން އެ ފޮޓޯ ލީކްވިޔަ ނުދެއްޗޭ. އަހަރެންގެ ލައިފް” ނަޝްވާ ރޯންފެށިއެވެ. “އެކަމާ ވިސްނާނެ ކަމެއް ނެތް. އަހަރެން އެކަމާ އުޅޭނަން.” މިކްޔަން ފޯނު ކަނޑާލިއެވެ. ނަޝްވާގެ ވާހަކައިން މިކަމުގައި ނަޝްވާގެ އަތެއް ނެތް ކަން މިކްޔަންއަށް އިނގުނެވެ. މިކްޔަން ފަޒާގެ ތެރެއަށް ނޭވާއެއް ދޫކޮށްލިއެވެ.

ފޯނު ބޭއްވި ނަޝްވާގެ މޫނުމަތީ ވަނީ ހިތާމަވެރި ކަމެވެ. އަހަރެން މިކުރަނީ ރަނގަޅު ކަމެއްބާވައެވެ. ޒިޔާން ބުނި ބަސް ގަބޫލު ކުރަންވީބާވައެވެ. ނޫނެކެވެ. ނަޝްވާ ދެފަރާތަށް ބޯހޫރުވާލިއެވެ. ނަޒީހްވެސް މިކްޔަން ދެކެ އެހާ ރުޅިއަންނާނީ މިކްޔަން ކަމެއް ކޮށްގެން ނޫން ހެއްޔެވެ.

*****

ދުވަސްތައް ހަލުވިކަމާއެކު ފާއިތުވަމުން ދިޔައިރު އެކަކު ވެސް އަމިއްލަ ދިރިއުޅުމަށް ސުނާމީ އަރަން އުޅޭކަން ރޭކާ ނުލައެވެ. އެއްމެންވެސް ދިޔައީ ހޭބޯނާރާ ޒާޔާގެ ކައިވެނި ޕާޓީއަށް ތައްޔާރު ވަމުންނެވެ. ޔާނާ ހޮސްޕިޓަލްއިން ޗުއްޓީ ނެގީ އޭނައަށް މިހާރު އާދަޔާ ހިލާފު ވަރުބަލި ކަމެއް އިހްސާސް ވާތީއެވެ. ހަށިގަނޑަށް ލޮނޑުކަމެއް އިހްސާސް ވާތީއެވެ. އަނެއްކޮޅުން މިކްޔަން ކޮންމެ ދުވަހަކު ހާސްވެފައި ހުންނާތީ ޔާނާ ހުންނަނީ ހަދާނެ ގޮތް ހުސްވެފައެވެ. ކިތަންމެ ވަރަކަށް އެހިޔަސް މިކްޔަން ކަމެއް ނުވެޔޭ ބުނެ ވާހަކަ އޮއްބާލާނެއެވެ.

ލާރާ އަދި އާބިދާގެ ގުޅުން ދިޔައީ ވަރުގަދަ ވަމުންނެވެ. ނާހީ އަކީ ކާކުތޯ އަހަން ލާރާ އުޅެއެވެ. ނަމަވެސް މީހުން ހުންނާތީ އަހަން ނުކެރެނީއެވެ. ޒާއިން ލާރާއަށް ލޯބި ހުށައަޅާނެ ގޮތަކާ ވިސްނަމުން ދިޔައީ ލާރާ ގެއްލިދާނެ ކަމުގެ ބިރަށްޓަކައެވެ. މިހާރަކަށް އައިސް އަބަދުވެސް އޭނާއަށް ލާރާ ވަކިވެދާތަން ހުވަފެނުގައި ފެނޭ ވިއްޔާއެވެ.

*****

ޔާނާ އަދި ލާރާ، ޒާޔާ ތައްޔާރު ކުރަމުންދިޔައީ ޕަރީއެއްފަދައިންނެވެ. ވާނީވެސް އެހެންތާއެވެ. މިއަދު މީ ކައިވެނި ކުރަން ހަމަޖެހިފާވާ ރެއެވެ. ރީތި ކޮށް ނިމުމުން ލާރާ އަދި ޔާނާ ޒާޔާއަށް ބަލާލިއެވެ. “މާ ޝާ ﷲ ޒާޔާ. ހަމަ ހީވަނީ ޕަރީއެއްހެން” ޔާނާ ބުނެލިއެވެ. “ހޫމް ދެން ތިމީހުންވެސް ދޭ ތައްޔާރުވާން. ގަޑިއަށް ތައްޔާރުވާތި” ޒާޔާ އަމުރުކޮށްލުމުން ލާރާ އަދި ޔާނާ އޯކޭ ބޮސްއޭ ކިޔާ ހިނިތުންވެފައި ނިކުމެގެން ދިޔައެވެ.

ގޭގެ ބެލް ޖެހި އަޑަށް މިކްޔަން ގޮސް ދޮރު ހުޅުވާލިއެވެ. މީހަކު ފެންނަން ނެތުމުން ދޮރު ލައްޕާލަން އުޅެނިކޮށް ދޮރުމަތީ ބާއްވާފައި ހުރި ލިޔުންތައް ފެނުމުން އެކޯއްޗެއްކަން މިކްޔަންއަށް އިނގުނެވެ. އަވަސް އަވަހަށް އެހިފައިގެން މިކްޔަން ގޮސް ވަނީ ގޭގެ ލައިބްރަރީއަށެވެ. ލައިބްރަރީއަށް ހަމަ ވަންތަނާ އެއްކަލަ ނަންބަރުން ގުޅަން ފެށިއެވެ.

“ހަލޯ. މާއަވަހަށް ދޯ މި ފޮނުވުނީ. ދެން ލިޔުންތައް ތައްޔާރު ވީމަ ހަމަ ފޮނުވާލީ. ހޭއި ޓޫ ޑޭސް ޓް ގޯ އިނގޭ. ސޮއި ކޮށްލާފައި އަހަންނާ ހަވާލު ކުރާތި. އެހެންނޫނީ. ހަހަ” މިކްޔަން ވީފޫހިން ފޯނު ކަނޑާލިއެވެ. އެއަށްފަހު އެ ލިޔުންތަކަށް ބަލާލިއެވެ. އަހަރެން މީގައި ސޮއިކޮށްފިއްޔާ ބައްޕަމެން ހާދަ ރުޅިއަންނާނެއެވެ. ނަމަވެސް އަހަރެންނަށް މިނޫން ގޮތެއްވެސް ނެތެވެ. މާޔޫސް ކަންމަތީ މިކްޔަންގޮސް އެ ލިޔުންތައް އެތާހުރި ވަތްގަނޑަކަށް ލާ ތަޅުލިއެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.