ސިއްރުން މިހިތާ ކުޅެނީހޭ (އަށާރަވަނަބައި)

ނަޝްވާ ބޭރަށް ނިކުމެ މުޅި މަގަށް ނަޒަރު ހިންގާލިއެވެ. ހަލަބޮލިވެފައިވާ އެމަގުން އޭނާ ނުދަންނަ މީހަކު ހޯދާނީ ކިހިނެއްހެއްޔެވެ. ނަޝްވާ އަށް އެއްލިކަޅިއަކުން ފެނުނީ ދުރުގައި ހުރި މީހަކު ހަނާއަޅާތަނެވެ. ދުރުގައި ހުރުމުން މޫނު އެހާސާފު ނުވިނަމަވެސް އެއަކީ ޒިޔާން ކަމަށް ނިންމައި އެދިމާލަށް ހިނގައިގަތެވެ. ކައިރިއަށް ދިޔަވަރަކަށް މޫނު ސާފުވަމުން ދިޔައެވެ. ވަރަށް ކައިރިއަށް ދިޔަފަހުން ނަޝްވާއަށް އެކާކު ކަން އިނގުނެވެ.

“ތި ޒިޔާން؟” ނަޝްވާއަށް އަހާލެވުނެވެ. ޒިޔާން ބޯޖަހާލިއެވެ. “އަހަރެން ގައިގަ ހެދިކާ ކޮތަޅުން ޖެހީ ޒިޔާން؟” މިފަހަރުވެސް ޒިޔާން ހިނިތުންވެ ހުރެ ބޯޖަހާލިއެވެ. “ދެން އަހަރެން އޭގެން ޖެހިޔޭ ކިޔާފަ ފޫހިވާނީތަ؟” ޒިޔާން މިހެން ބުނުމުން ނަޝްވާ އަވަސް އަވަހަށް ބޯޖަހާލިއެވެ. “ކޮބާ އަހަރެންނަށް ދޭންބުނި އެތި؟” ނަޝްވަ އަހާލިއެވެ.

“ދޭނަމޭ. ފުރަތަމަ ހިނގާބަލަ މިނޫން ތާކަށް” ޒިޔާން މިހެން ބުނުމުން ނަޝްވާ ބޯޖަހާލިއެވެ. އެއަށްފަހު ދެމީހުންވެސް ހިނގައިގަތީ ވަކި މިސްރާބެއް ނެތިއެވެ.

*****

“ކޮއްކޯ” ޔާނާ، ލާރާގެ ކޮޓަރިއަށް ބޯދިއްކޮށްލަމުން ބުނެލިއެވެ. ލާރާ އެކޮޓަރި ކުޑަދޮރުކައިރި ހަށަން ބަދެލައިގެން ފުރަގަސްދީގެން ހުއްޓެވެ. ޔާނާ މަޑުމަޑުން ގޮސް ލާރާ ކައިރި ހުއްޓި ކޮނޑުގައި އަތްއަޅާލިއެވެ. ލާރާ އެއަތްފޮޅުވާލިއެވެ.

“ދޮންތަ އަށް މައްސަލައަކަށް ނުވިޔަސް އަހަރެންނަށް މައްސަލައެއް ޑޭޑް އެހެން މީހަކާ ކައިވެނި ކުރުމަކީ” ލާރާގެ އަޑުން އޭނާއަށް ހުރީ ރޮވިފަކަން ވަރަށް ރަނގަޅަށް އިނގެއެވެ. “ދޮންތައަށް ފަސޭހަވިޔަސް އަހަރެންނަކަށް ފަސޭހައެއް ނޫން މޯމްގެ ޖާގަ އެހެން އަންހެނަކަށް ދޭކަށް” މިފަހަރުވެސް ލާރާ ވާހަކަ ދެއްކިއެވެ. ޔާނާ ވާހަކަ ނުދައްކައި މަޑުކޮށްލީ ލާރާ ވިސްނަނީ ކޮންކަމަކާތޯ ބަލާލާށެވެ. “އެހެން އަންހެނަކަށް އަހަރެންގެ މަންމައަކަށް ވުމުގެ ފުރުސަތެއް އަހަރެން ނުދޭނަން. ދޮންތަ ޑޭޑް ކައިރި ބުނޭ މި ކައިވެނި ކޮށްގެން ނުވާނޭ.” ރުޅިވެރިކަމާއެކީ އެހުރިގޮތަށްހުރެ ލާރާ ބުނެލިއެވެ.

“ކޮއްކޯ. ދޮންތަ ނޫޅެމޭ މޯމްގެ ޕްލޭސް އެހެން މީހަކަށް ދޭކަށް. ކޮއްކޮވެސް ނުޖެހޭނެ ދޭކަށް. ޑޭޑް ވެސް ނުބުނެއެއްނު އެހެނެއް. އެކަމް ވިސްނާލަބަލަ ޑޭޑް ވެސް ލައިފް އެއްބޭނުންވާނޭ. ކޮންމެ ދުވަހަކު އޮފީހަށް. އޮފީހުން ގެއަށް. ދެޓްސް އިޓް. އެވެސް ލައިފް އެއްތަ. ޑޭޑް އަހަރެމެންނަށްޓަކައި އެހެން މީހަކާ ކައިވެނި ނުކޮށް މިއޮއް ހުރިހާ އަހަރަކު ހުރީ. ދެން އަހަރެމެންވެސް ޑޭޑް އުފަލަށް ވިސްނާލަން ވާނެއްނު ކޮއްކޯ” ޔާނާ ލާރާއަށް ވިސްނަދެވޭތޯ މަސައްކަތް ކުރިއެވެ.

“އަހަރެންނަކަށް ނޭނގެ. ޑޭޑް ނުޖެހޭނެ އެހެން މީހަކާ އިންނާކަށް. ދެޓްސް އިޓް. އަހަރެންނަށް ހެޔޮ އަހަރެންނަކީ ވަރަށް ގޯސް މީހެކޭ ބުންޏަށް. މޯމްގެ ޖާގައިގަ އެހެން މީހަކު ހުއްޓަ ބަލާކަށް އަހަރެންނަކަށް ކެތެއް ނުވާނެ. ދޮންތަ އަށް ހެޔޮވާނެ. ދޮންތަ އުޅޭނީ އެހެން ގެއެއްގަ ވިއްޔަ. އެހެން އަންހެނަކާއެކީ އުޅެންޖެހޭނީ އަހަރެންނަށް.” ލާރާ ފުންނޭވާއެއްލިއެވެ. “އަހަރެންނަށް ރަނގަޅީ ދޮންތަ މިތަނުން ދިޔައްޔާ.” ލާރާ އެހެން ބުނުމުން މާޔޫސްވެފައި ހުރި ޔާނާ އެއްޗެކޭ ބުނަންއުޅުނެވެ. “އަހަރެން ބޭނުމީ އެކަނިވެލަން. ދޭ މިތަނުން” ލާރާ މިހެން ބުނުމުން ޔާނާ ދެރަވެފައި ހުރެ ކޮޓަރިން ނިކުތުމަށް ދިޔައެވެ. ކޮޓަރިން ނިކުމެ އަދިވެސް އެއްފަހަރު ޔާނާ ލާރާގެ ކޮޓަރިއަށް ބަލާލިއެވެ. އެއަށްފަހު ހިނގައިގަތް ޔާނާ ސިހުނީ ކުއްލިއަކަށް ޒިޔާދު ކުރިމައްޗަށް އެރުމުންނެވެ. ޒިޔާދުގެ މޫނުމަތީ ހުރިކުލަވަރުން ޒިޔާދުއަށް ލާރާދެއްކި ހުރިހާވާހަކައެއް އަޑުއިވިއްޖެކަން އިނގެއެވެ.

“ޑޭޑް ބޭނުމީ ދަރިފުޅުމެން އުފަލުގައި ހުރުން. ލާރާއަށް ކަމުނުދަންޏާ މިއަކީ ޑޭޑް ނުދައްކާ ވާހަކައެއް. ދަރިފުޅުވެސް ނުވާނެ ދެން ލާރާއާ މިކަމާބެހޭގޮތުން ވާހަކަ ދައްކާގެންނެއް އިނގޭ.” ޒިޔާދު މިހެން ބުނުމުން ޔާނާ ބޯޖަހާލިއެވެ. ނަމަވެސް ޔާނާ އަދިވެސް ލާރާގެ ރުހުން ހޯދޭތޯ ފުރިހަމައަށް މަސައްކަތްކުރަން ހިތުން އަޒުމް ކަނޑައެޅިއެވެ. ލާރާއާ ހެދިން ޑޭޑް ގެ މިއުފާ ޑޭޑްގެ އަތުން ދޫވާކަށް ޔާނާ ނޭދެއެވެ. “ދަނީ ޑޭޑް. ލަސްވެސް ވެއްޖެ” ޒިޔާދު ބޯޖަހާލުމުން ޔާނާ ފަހަތުގައި ހުރި މިކްޔަން އާއެއްކޮށް އެގެއިން ނިކުންނަން ހިނގައިގަތެވެ.

“އަހަރެން ހިތަށްއަރަނީ ކޮއްކޮއަށް ކީއްވެބާއޭ ނުވިސްނެނީ” މިކްޔަންގެ ސައިކަލު ފަހަތަށް އަރަމުން ޔާނާ ބުނެލިއެވެ. “ވިސްނަދިނީމަ ވިސްނޭނެ. އެކަމް އެހެން ކަހަލަ ގޮތަކަށް. މިހާރު ޒާއިންއާ ވަރަށް ޕާޓެއްނު. އަބަދުހެން އެކީއުޅޭނީ. އޭނަ ކައިރި ބުނަންވީނު އޭނަ ލާރައަށް ވިސްނަދީފާނެ.”

“ހޫމް. އަހަރެންނަށް ވެސް ފެންނަނީ ތިގޮތް. އެކަމް ޒާއިންވެސް ސީދާ އެމައުލޫ އާ ވާހަކަ ދައްކަންޏާ އެގޮޔަ އެއްބަހެއް ނުވާނެ. ވަރެއްގެ ގޮއްޔެއް އެވެސް. އެހެންގޮތަކަށް އޯކޭ ކުރަން ޖެހޭނީ” ޔާނާ ބުނެލީ ހިނިތުންވުމަކާއެކީއެވެ. މިކްޔަންވެސް ބޯޖަހާލީ އެކަމާ އެއްބަސް ވުމުގެ ގޮތުންނެވެ.

“އައި ލަވްޔޫ. ދުވަހަކުވެސް އަހަރެން ދޫކޮށްނުލައްޗޭ” ޔާނާ ސައިކަލު ދުއްވަމުންދިޔަ މިކްޔަންގެ ގައިގައި ބައްދާލިއެވެ.

“އައި ލަވް ޔޫ. ގަބޫލު ނުކުރެވިދާނެ. ޔާނާގެ މާމަ ނިޔާވި ފަހުން އަހަރެންނަށް ޔާނާއަށް ހާއްސަ ސަމާލު ކަމެއް ދެވެން ފެށުނު. އަހަރެން ހީކުރީ ހަމްދަރުދީ ކަމަށް. ވަރަށް ފަހަކަށް ދާންދެންވެސް އެހެން ހިތަށްއަރުވައިގެން ހުރީ. އެކަމް އެރޭ ޕާޓީގައި އަބަދު ޔާނާއަށް ބެލުމާ އެވީ ޖެލެސީއިންނާ އަހަންނަށް ރަނގަޅަށް އިހުސާސްވި މި ލޯބިކަން. އައި ލަވް ޔޫ. އެންޑް ކޮންމެ ކަމެއް ދިމާވިޔަސް އަހަރެން ޔާނާ އެއް ދުލެއްނުކޮށްލާނަން. އެންޑް ދެޓްސް އަ ޕްރޮމިސް” މިކްޔަން އެއްމެ ފަހު ޖުމްލަ ބުނެލީ ހިޔާލަކަށް ގެއްލި ހުރެއެވެ. އަނެއްކާ ނަޝްވާ އޭނާ ހޯދަން އައިއްސިއްޔާ ހަދާނީ ކިހިނެއް ހެއްޔެވެ. ލަސްނުކޮށް ޔާނާއަށް ހުރިހާ ވާހަކައެއް ކިޔާދޭންވީއެވެ. އޭރުން މިހިތަށްވެސް ހިތްހަމަޖެހުމެއް ލިބޭނެއެވެ.

“ޔާނާ އަހަރެން ވާހަކައެއް ބުނަންތަ؟” މިކްޔަން މިހެން ބުނުމުން ޔާނާ ހޫމް ލައްވާލިއެވެ. “އުނހު. ފަހުން ބުނާނަން” މިކްޔަންގެ ހިތުގެ ކަނަކުން އެވާހަކަ ނުބުނުމަށް ބުނަމުން ދިޔައެވެ. އެހިތުގައި ޔާނާ ގެއްލިދާނެކަމުގެ ބިރުހީވިއެވެ. “ދެން ޔަން. އެހާ ކިއުރިއަސް ކޮށްލާފައި. ބުނަންވީ” ގެއަށް އާދެވުމުން މިކްޔަންއާއެކީ ގެއަށް ވަންނަންދަމުން ޔާނާ ބުނެލިއެވެ.

މިކްޔަން ޔާނާގެ ކަންފަތްބުޑުގައި އެއްޗެކޭ ބުނެލިއެވެ. ޔާނާގެ މޫނަށް ޖަންބުކުލަ އަރައިގެން ދިޔައެވެ. “ކިހިނެއްވީ؟ ހިޔާލު ކަމުނުދަނީ؟” މިކްޔަން ޔާނާގެ އަތުގައި ހިފާ ގާތަށް ދަމާލަމުން ބުނެލިއެވެ. އެމީހުނަށް ހުރެވުނީ ގެއަށް ވަންނަ ދޮރުމަތީކަންވެސް އެމީހުން ހަނދާންނެތެވެ. “ނޫން. އަހަރެން ވަރަށް ބޭނުން ބޭބީއެއް” މިކްޔަންގެ ލޮލަށް ބަލާލަމުން ޔާނާ ބުނެލިއެވެ. “މިރޭއިން ފަށައިގެން ޓްރައި ކުރާނީދޯ” ޔާނާގެ މޫނާ މޫނު ކައިރިކޮށްލަމުން މިކްޔަން ބުނެލިއެވެ.

“އުނހޫ. ސާބަސް ތިމީހުނަށް. ކޮޓަރިއަށް ވަދެވެންދެންވެސް ކެތްނުކުރެވެ” ދޮރު ކައިރި ހުއްޓިލަމުން ޒާޔާ ބުނެލިއެވެ. ފަހަތުގައި ޒާއިންވެސް ހެވިފައި ހުއްޓެވެ. ޔާނާ އަދި މިކްޔަން އަށް އަވަސް އަވަހަކަށް ދުރުވެވުނެވެ. “ނަސީބެއްނު ބޭބެ ނޫނީ ދައްތައަށް ނުފެނުނު ކަން” ޒާޔާ އަނެއްކާވެސް ބުނެލިއެވެ. ޔާނާ ލަދުރަކި ހިނިތުންވުމަކާއެކީ އެތެރެއަށް ވަންނަން ދިޔައެވެ. ފަހަތުން މިކްޔަން ވެސް ހިނގައިގަތެވެ.

“މަޑުކޮށްބަ ޔާނާ. މާދެން ހެނދުނު 10 ޖަހާއިރު އިޔާޒް މެން ގެއަށް ޖައްސާލައްޗޯ އިޔާޒް މަންމަ ބުނީ. މި ޒާއިން ބުނި ދާނަމޭ އަހަރެންނާއެއްކޮށް. އެކަމް ގާލް އެއްނެތީމަ. ޔާނާއަށް ދެވިދާނެތަ؟” ޒާޔާ ބުނެލިއެވެ.

“އަޅޭ ޒާޔާ. އަހަރެން ޑިއުޓީ އޮންނާނެ. މިހެން ހަދާބަ. އަހަރެންގެ ކޮއްކޮ ލާރާ ގޮވައިގެން ދާންވީނު. އޭނަ ހީވަނީ ހަވީރު ހެން ހޮސްޕިޓަލްއަށް ދާންޖެހެނީ މާދެން” ޔާނާ ފަހަތަށް އެނބުރިލަމުން ބުނެލިއެވެ. “ހޫމް ޒާއިންގެ ދޯ” ޒާޔާ މިހެން ބުނުމުން ޒާއިންގެ ދެލޯ ބޮޑުވިއިރު މިކްޔަން އަދި ޔާނާއަށް އެކަކު އަނެއްކަކަށް ބަލާލެވުނެވެ. “މިބުނީ ޒާއިން އަބަދު ފައިޓް ހިންގާ ކުއްޖާއޭ ދޯ. ބައްދަލު ވެސް ވިއޭ ދޯ ޒާއިން. އެހެންވެ ލާރާ ގޮވައިގެން ދާނީ. ޒާއިން ލާރާ ނަންބަރު ފޮނުވައްޗޭ” ޒާއިން ބޯޖަހާލިއެވެ. ޔާނާ އަދި މިކްޔަން ހިނިތުންވެލާފައި ކޮޓަރިއަށް ގޮސް ވަނެވެ. “ސާބަސް ޒާޔާ. ކިރިޔާ އެއްނު” ޒާއިން ޒާޔާ ގައިގަ ބޮނޑިއެއް އަޅާލިއެވެ. ދެން އިވިގެން ދިޔައީ ޒާޔާގެ ހުނުމުގެ އަޑެވެ.

*****

“ހޫން ދެން ދީބަލަ ތި ދޭން އުޅޭ އެއްޗެއް.” އަތިރިމަތީ އިށީއިނެވުމުން ނަޝްވާ ބުނެލިއެވެ. “މިރެޔަކު ނޫން. އެހެން ރެޔަކުން. ކޮބާ ނަޒީހް؟” ނަޝްވާގެ ދެލޯ ބޮޑުވިއެވެ. ނަޒީހްގެ ވާހަކަ ޒިޔާންއަށް އިނގުނީ ކިހިނެއް ހެއްޔެވެ.

“އަހަރެން ބުނީމެއްނު އަހަރެންނަށް ނަޝްވާ ވަރަށް ރަނގަޅަށް އިނގެޔޭ”

“ދެން ކިހިނެއްކަންވެސް ބުނެބަލަ” މޫނަށް ގޮތެއް ހަދާލަމުން ނަޝްވާ ބުންޏެވެ.

“ކޮބާ ނަޝްވާގެ ގޭމީހުން؟”

“މާމައަކާ ދައްތައެއް ހުންނާނީ. މާމާވީ އިންޑިއާގައި ޑޮކްޓަރަށް ދައްކަން ގޮސް. ދައްތަ ވެސް ވީގޮސް މާމައާ އެކީ. ދައްތަ އުޅެނީ މީހަކާ މެރީކޮށްގެން. އިންޑިއާގައި މެރީކުރީ. މާމަ ބުނި އިންޑިއާއަށް ހިނގާށޭ މާމަމެންނާއެކީ. ދައްތަވެސް ދައްތަ މެރީކުރާއިރު ދައްޗޭ ބުނި. އަހަރެން މިހާރު ވަރަށް ދެރަވޭ އެއްވެސް އިރަކު ނުދެވުނީމަ. މާމާ މެން ނުވެސް އަންނާނެ ކަންނޭގެ ދެން. ދައްތަގެ ފިރިމީހާގޭގައި އުޅެނީ” ވެއްޔާ ކުޅެމުން ނަޝްވާ ބުނެލިއެވެ.

“ހޫމް. ދެން ހިނގާ ގެއަށް ދާން. ލަސްވެއްޖެ”

“އެކީއްވެ ކުއްލިއަކަށް.”

“އެހެން އިރަކުން ބައްދަލު ކުރާނީ” ޒިޔާން މިހެން ބުނެ ތެދުވިއެވެ. ނަޝްވާއަދި ޒިޔާން ދިޔަ މަގުމަތީ ވާހަކައެއް ނުދައްކައެވެ. ޒިޔާން އެއްޗެކޭ ނުބުނާތީ ނަޝްވާއަށް ވާހަކަ ދައްކަން ނުކެރިފައި ހުރިއިރު ޒިޔާން ވިސްނަމުން އެދަނީ ކޮންކަމަކާކަން އެކަކަށްވެސް ބުނާކަށް ނޭނގޭނެއެވެ.

“ގުޅާނަން އިނގޭ” ނަޝްވާ ގެއަށް ވަންނަށް ހިނގައިގަތުމުން ޒިޔާން ބުނެލިއެވެ. ނަޝްވާ ބޯޖަހާލާފައި އެތެރެއަށް ވަނެވެ. ނަޝްވާ ދިޔުމުން ޒިޔާން ފޯނު ނަގާ ނަންބަރަކަށް ގުޅާލިއެވެ.

*****

“ދަރިފުޅާ” ޒިޔާދު ލާރާގެ ކޮޓަރިއަށް ވަދެ ގޮވާލިއެވެ. ނިދަން ތައްޔާރުވެގެން އޮތް ލާރާ އެނދުމަތީ އޮށޯއޮވެގެން އޮތެވެ. ޒިޔާދު އައުމުން ލާރާ ބޯ އަނެއްފަރާތަށް އަނބުރާލީއެވެ. “ޑޭޑް އެއްގޮތަކަށްވެސް ދަރިފުޅު ދެރަކުރާކަށް ނޫން އެހެން ބުނީ. ޑޭޑްގެ އެދުމަށްވުރެ ޑޭޑް އަށް މުހިއްމީ ދަރިފުޅުގެ އުފާ. ޑޭޑް އެހެން ކައިވެންޏެއް ނުކުރާނަން. ދަރިފުޅު ޑޭޑް އާ ވާހަކަ ދައްކަބަލަ” އެނދުގައި އިށީއިންނަމުން ޒިޔާދު ބުންޏެވެ. ލާރާ ފުންމައިގެން ތެދުވެ ފެންކަޅިވެފައި ހުރެ ޒިޔާދުގެ ގައިގައި ބައްދާލިއެވެ. “އަޅުގަނޑަށް އިނގޭ ޑޭޑް އެހެން ކައިވެންޏެއް ނުކުރާނެކަން. އަޅުގަނޑު ވަރަށް އުފާވެއްޖެ. އައި ލަވްޔޫ ޑޭޑް” ޒިޔާދުގެ ގައިގައި ބައްދާލައިގެން ހުރެ ލާރާ ބުނެލިއެވެ. ޒިޔާދު ހިނިތުންވެލިއެވެ. ނަމަވެސް ހިތުގެ ކަނަކުން އެހިތަށް ތަދުވެގެން ދިޔައެވެ.

ޒިޔާދު ދިޔުމުން ލާރާ ފޯނަށް ބަލާލިއެވެ. ނުދަންނަ ނަންބަރަކުން މެސެޖެއް ފޮނުވާފައި ހުރުމުން އެކިޔާލިއެވެ. *ހޭއި އިޓްސް މީ ޒާޔާ. އިނގޭ ދޯ.* މީގެ އިތުރުން އެމެސެޖްގައި ވަނީ އޭނާ އިންނަން އުޅޭ ކުއްޖާގެ ގެއަށް ޒާއިން އާ ޒާޔާ އާއެކީ ދިޔުމަށް އެދިފައެވެ. ލާރާގެ ހިތް ނަށާލީ ޒާޔާ އަދި ޒާއިންގ ގުޅުމެއް ނެތްކަން ޔަގީން ވުމުންނެވެ. އެ ހިނިތުންވުމުގައި ހުރެ އޯކޭ އޭ ޖަހާ މެސެޖެއް ފޮނުވާލިއެވެ.

******

ލާރާ ގޭން ނިކުތީ ޒާޔާ ގުޅާފައި ބޭރުގައޭ ބުނުމުންނެވެ. ލާރާ ނިކުތް އިތު ކާރުގެ ޑްރައިވަރު ސީޓުގައި ޒާއިން އިނެވެ. “ހޭއި” ކުރީ ސީޓްގައި ޒާއިން ކައިރި އިން ޒާޔާ ނިކުންނަމުން ބުނެލިއެވެ. ލާރާވެސް ހޭއި އޭ ހަދާލިއެވެ. “އަހަރެމެން ދެމީހުން ފަހަތަށް ދޯ އަރާނީ. ޑްރައިވަރު އެކަނި ބައިންދާ” ޒާޔާ ލާރާގެ އަތުގައި ހިފާލާފައި ބުނެލިއެވެ. ލާރާ ހިނިތުންވެ ހުރެ ޔެސް އޭބުނެލިއެވެ. ލާރާ އަކީ ފެންނަކޮންމެ މީހަކާ ފަސޭހައިން ވާހަކަ ދައްކާ އުޅޭ މީހަކަށް ވުމުން ލާރާ ވަރަށް އަވަހަށް ޒާޔާއާއި ގުޅުން ބަދަހިކޮށްލިއެވެ. ޒާޔާއަކީވެސް ސަކަ މިޒާޖެއްގެ މީހަކަށް ވުމުންކަމަށްވެސް ވެދާނެއެވެ.

“ސާބަސް ދެ އަނގަ. މިއޮއް އާދެވުނީ. ފައިބާ” ހުއްޓައި ނުލައި ވާހަކަ ދައްކަމުން ދިޔަ ޒާޔާ އަދި ލާރާ ގާތު ޒާއިން ބުނެލިއެވެ. 3 މީހުން އެކީ ގޮސް އެޕާޓްމެންޓް ގެ ބެލް ޖަހާލިއެވެ. ގިނައިރެއް ނުވެ ދެބައިއުމުރުގެ އަންހެނެއް ދޮރު ހުޅުވިއެވެ. “އަނހަ މިއޮއް އައީ ޒާޔާ މެން” އިޔާޒްގެ މަންމަ އާބިދާ ބުނެލިއެވެ.

ގޭތެރެއަށް ވަންނަން ހަދާލި ލާރާއަށް ފުރަތަމަވެސް ފެނުނީ ފައިބުޑުގައި އޮތް ބުޅަލެވެ. ގަންބިރުން ހަޅޭލަވައިގެން ފައި ދުއްވައިގަންނަށް އުޅުން ލާރާ މިފަހަރުވެސް އުޅުނީ ވެއްޓޭށެވެ. ނަމަވެސް ހުޝިޔާރު ކަމާއެކީ ވެއްޓެންދިޔަ ލާރާގެ ދެކޮނޑުގައި އާބިދާ ހިފަހައްޓާލިއެވެ. “ދަރިފުޅާ ބަލައިގެން” އާބިދާ ބުނެލީ ހާސްވެ ހުރެއެވެ. ލާރާ ތެދުވެ ހަމަޖެހިލަމުން ހިނިތުންވެލެވުނީ ބޭއިހްތިޔާރުގައެވެ. ޒިޔާދު ނޫން މީހަކު މިހާރު އޭނައަށް ދަރިފުޅާ އެއް ނުގޮވާނެ ވިއްޔާއެވެ. އެކަމުންވެސް ޒާޔާގެ ވާންއުޅޭ މައިދައިތަ ގެ ހިތްހެޔޮކަން އިނގިގެން ދިޔައެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.