ޔާރު މިވަނީ ލޯތްބޭ ޙަޤީގީ (ވިހިވަނަ ބައި)

“އުނހު ނުދާނަން…. އަހަންނަށް އެނގޭ އަހަރެންގެ ގާތުގައި ދާށޭ ބުންޏަސް އަސްލު މިވަގުތު ޝިއު ބޭނުންވާނީ އަހަރެން މިތާ މަޑުކުރަންކަން….. އަދި ޝިއު އެހެން ތިބުނީ ރުޅިއައިސްގެން ނޫންކަންވެސް އަހަންނަށް އެނގޭ…… މާ ބޮޑަށް ދެރަވެފައި އިނީމަ އެ ހުރިހާ އާހެއް ބޭރުކޮށްލުމަށްޓަކައި ޝިއުއަށް ރުޅި އިޚްތިޔާރު ކުރެވުނީކަންވެސް ވަރަށް ރަނގަޅަށް އެނގޭ…….” ޝިއުރީގެ ގާތުގައި އިށީންނަމުން މިޝަލް ބުނެލިއެވެ. ޝިއުރީ ފެނުމުން އޭނާގެ ހިތަށް ކުރި އަސަރުތައް ހިތުގައި ފޮރުވާލީއެވެ. އޭރު އޭނާގެ ދެލޯ ސީދާވެފައިވަނީ ޝިއުރީއަށެވެ.
_________________________

މިޝަލްގެ ޖަވާބުން ޝިއުރީއަށް މިޝަލާއި ދިމާއަށް ބަލާލެވުމުން ދެމީހުންގެ ހަތަރުކަޅި ބައްދަލްވެގެން ދިޔައެވެ. އެއާއިއެކު އަނެއްކާވެސް ޝިއުރީއަށް ރޮވެން ފެށުނެވެ. ނަމަވެސް މިފަހަރު އޭނާ ކަރުނަތައް ހިފަހައްޓާކަށް މަސައްކަތެއް ނުކުރެއެވެ. މިޝަލްވެސް ޝިއުރީ ހުއްޓުވާކަށް ނޫޅެއެވެ. ރޯލުމުން ޝިއުރީގެ ހިތަށް ކުޑަނަމަވެސް ހަމަޖެހުމެއް ލިބޭނެކަން އޭނާއަށް ވިސްނޭތީއެވެ. ހިތް ފުރޭވަރަށް ރޯލުމަށްފަހު ޝިއުރީ ވާހަކަ ދެއްކޭތޯ މަސައްކަތްކުރިއެވެ.

“ކީއްވެތަ އަހަރެން ބޭނުންވާގޮތް ނުބުންޏަސް މިޝަލްއަށް ވިސްނޭހެން އެހެން މީހުންނަށް ނުވިސްނެނީ….. އަދި އެވެސް އަހަރެންގެ އެންމެ ގާތް މީހުންނަށް……” ކަރުނުން ފުރިފައިވާ ދެލޮލުން މިޝަލަށް ބަލަހައްޓައިގެން އިނދެ ޝިއުރީ އަހާލިއެވެ. އެ ސުވާލުގެ ޖަވާބު ދިނުމުގެ ބަދަލުގައި މިޝަލް ޝިއުރީއަށް ބަލަހައްޓައިގެން އިނީއެވެ. އޭނާއަށް އެ ސުވާލުގެ ޖަވާބު ދޭކަށް ނޭނގެއެވެ. އެނގޭހާވެސް އެއްޗަކީ މިވަގުތު ޝިއުރީއަށް މީހެއްގެ އެހީތެރިކަން ބޭނުންވެފައިވާ މިންވަރެވެ. އަދި އޭނާ މިހުރީ އެފަދަ ކޮންމެ ވަގުތެއްގައިވެސް ޝިއުރީއަށް އެހީވެދޭން ތައްޔާރަށް ކަމެވެ.

“މިޝަލް……” މިޝަލް އަނގައިން ނުބުނެ އޭނާގެ މޫނަށް ބަލަން އިނުމުން ޝިއުރީއަށް ގޮވާލެވުނެވެ. އެ އަޑުގައި އަދިވެސް ވޭނީ އަސަރު އެކުލެވިފައިވެއެވެ. މިޝަލަށް ހޭވެރިކަންވީ ޝިއުރީ ގޮވާލުމުންނެވެ. ތުނިކޮށް ފަޅާފައިވާ ތުނބުޅީގައި އަތް ހިންގާލަމުން މިޝަލް ދުރު ބަލާލިއެވެ.

“ކީއްވެ ތިރޮނީ……؟؟؟؟؟” އެ އިންގޮތަށް އިނދެ މިޝަލް އަހާލިއެވެ. ޝިއުރީ، އޭނާގެ ދެލޮލުން އައިސްފައިވާ ކަރުނަތައް އަތުގެ ނުފުށުން ފުހެލަމުން ދުރު ބަލާލިއެވެ.

“މިއަދުވެސް މަންމަ ރުޅިއައިސްގެން އެއްޗެހިކީ…. އުފަން ދަރިއަކާ ދިމާއަށް ކިޔަން ނުވާވަރުގެ އެއްޗެހިވެސް….. އަހަންނަކަށް ނޭނގެ އަހަރެންގެ މަންމަ އަހަރެން ދެކެ އެހާ ރުޅިއަންނަނީ ކީއްވެގެން ކަމެއް… ހިތުން ރުހުމުން ވާހަކަ ދައްކާލަނީ މަދު ފަހަރަކު….. އަހަރެން ހަނދާންވާން ފެށީއްސުރެ މަންމަ އަހަރެންދެކެ ރުޅިއާދޭ….. ސަބަބެއް އަހަންނަކަށް ނޭނގޭ….. މަންމަ އެގޮތަށް ކަންތައް ކުރާތީ އަހަރެން ވަރަށް ދެރަވޭ….. ދޮންތައާއި، ދޮންބެއާއި ވާހަކަ ދައްކާނީ ވަރަށް ލޯބިން……. އަހަންނަށް ބައެއްފަހަރު ހީވެ އަހަރެން މީ މަންމަގެ ދަރިއެއް ނޫނޭވެސް….. އެކަމަކު އުފަންދުވަހުގެ ސެޓްފިކެޓުންވެސް އެއީ އަހަރެންގެ މަންމަކަން އެނގޭ…..” މިހިސާބަށް ވާހަކަ ކިޔާދެވުމުން ޝިއުރީއަށް އަނެއްކާވެސް ގިސްލާ ރޮވެން ފެށުނެވެ. ވާހަކަ ދައްކަން އުނދަގޫ ވުމުން އޭނާގެ ވާހަކަ މަޑު ޖައްސާލިއެވެ. އިސްޖަހާލައިގެން އިނދެ ރޮމުން ދިޔަ ޝިއުރީއަށް ބަލާލި މިޝަލްގެ ލޮލުންވެސް ކަރުނަ ތިއްކެއް ވެއްޓުނެވެ. ނަމަވެސް ހިތާމައިން ފޯވެފައިވާ ޝިއުރީއަށް މިކަމެއް ނޭނގެއެވެ. މިޝަލް ނުގޮތަކަށް ދެލޯ ފުހެލުމަށްފަހު ބެންޗުގައި އަތް ވިއްދާލައިގެން އިން ޝިއުރީގެ އަތްމަތީ އަތް ބާއްވާލިއެވެ. ޝިއުރީ މިޝަލަށް ބަލާލުމުން މިޝަލް ދެފަރާތަށް ބޯ ހޫރާލަމުން ނުރޯށޭ ބުނެލިއެވެ. އަދި ޝިއުރީގެ މަޑުމަޑު އަތްތިލަ އޭނާގެ ދެއަތްތެރެއަށްލާ ބާރަށް ފިއްތާލިއެވެ. މިޝަލްގެ މި އަމަލުން މީހެއްގެ އޯގާތެރިކަމަށް ފެން ބޮވައިގެންފައިވާ ޝިއުރީގެ ހިތާމަތަކަށް ކުޑަނަމަވެސް ލުޔެއް ލިބި އިތުރު ހިތްވަރެއް ލިބުނުހެން ހީވިއެވެ. އެހެންކަމުން ލޮލުން އައިސްފައިވާ ކަރުނަތައް ފުހެލަމުން ޝިއުރީ އަނެއްކާވެސް ވާހަކައާއިގެން ކުރިޔަށް ދިޔައެވެ.

“މިޝަލްއަށް އިނގޭތަ….؟؟؟ އަހަރެން ހަނދާންވާން ފެށީއްސުރެ އެންމެ ރެއެއްވެސް ނުދާނެ ނިދަން އޮވެ އަހަރެންގެ ހާލާއިމެދު ކަރުނައަޅާ ނުރޯ ރެއެއް…. މަންމަ އަހަންނާ ދޭތެރޭ ކަންތައް ކުރަމުން އެދާގޮތް ބަދަލުވުމަށް އެދި މާތްﷲ ގެ ޙަޟްރަތަށް ކެތްތެރިކަމާއިއެކު ދުޢާވެސްކުރަން……” މިހެން ބުނެވުނުއިރު ޝިއުރީގެ އަޑު ބެދި އަނެއްކާވެސް ރޮވެން ފެށުނެވެ. ނަމަވެސް އޭނާ ހިތްވަރުކޮށްފައި ވާހަކަދެއްކޭތޯ ބެލިއެވެ. މިޝަލްއަށް އޭނާގެ ސިއްރު ވާހަކަތައް ޚިއްސާ ކުރަން ފަސޭހައީ ކީއްވެކަން ނޭނގުނުނަމަވެސް، އެކަމުން އޭނާއަށް ހިތްހަމަ ޖެހުން ލިބޭތީ، ޝިއުރީ ބޭނުންވީ، މިއަދާ ޖެހެންދެން ހިތުގައި ބަންދުކޮށްގެން ގެންގުޅުނު އުދާސްތައް ބޭރުކޮށް ހިތަށް ހަމަޖެހުން ހޯދައިދޭށެވެ. ކޮޅަށް ތެދުވުމަށްފަހު ދެފިޔަވަޅު ކުރިޔަށް ޖެހިލަމުން މިޝަލަށް ފުރަގަސްދީގެން މަޑުކޮށްލުމަށްފަހު، އަނެއްކާވެސް ވާހަކަ ދައްކަން ފެށީ އެހެންވެއެވެ.

“އަހަރެން ހިތަށް އަރާ އަހަރެންގެ ކުށަކީ ކޮބައިބާވައޭ…..؟؟؟ ގައިމުވެސް އަހަންނަށް ނޭނގިނަމަވެސް ކޮންމެވެސް ކަމެއް ގޯސްކޮށް ކުރެވިފައި އޮތީމަ މަންމަ އަހަރެންދެކެ އެހާ ރުޅިއަންނާނީ….. އަހަރެންގެ އަމިއްލަ ނަފްސު ކުށްވެރިކޮށް އެކަމާ އަހަރެން ހިތާމަކުރާވަރު މާތްﷲ ދެނެވޮޑިގަންނަވާނެ….. ބައެއްފަހަރު އަހަންނަށް އަމިއްލަ ނަފްސުދެކެ ރުޅިވެސް އާދެވޭ….. އަމިއްލައަށް މަރުވުން އެއީ ފާފައަކަށް ނުވާނަމަ އަހަރެން މިހާރު އެކަންވެސް ކުރީސް…….” އެ ހުރިގޮތަށް ހުރެ ޝިއުރީ ބުނެލިއެވެ.

“ޝިއުރީ…….” ފަސްދީގެން ހުރި ޝިއުރީގެ އަތުގައި ހިފައި މަގަތަށް އަނބުރާލަމުން މިޝަލަށް އަތްމަޅާލެވުނީ ޝިއުރީގެ މޫނުގައި ޖެހުމަށެވެ. ނަމަވެސް، އެއީ ހަމަ ހޭގައި ހުރެގެން އޭނާއަށް ކުރެވޭނެ ކަމެއް ނޫނެވެ. މިޝަލްގެ ކުއްލި ހަރަކާތުން ދެލޯ ބޮޑުކޮށްލައިގެން މިޝަލަށް ބަލަން ހުރި ޝިއުރީގެ ދެލޮލުން ރާސްލާފައި ކަރުނަތައް ފައިބައިގަތީ އޭނާއަށް ބުނެވުނު އެއްޗަކާއިމެދު އަމިއްލައަށް ވިސްނާލެވުމުންނެވެ. މިޝަލަށް ކެތްވީ އެހިސާބަށެވެ. ޝިއުރީގެ ހިތަށް ކޮށްފައިވާ އަސަރު އޭނާއަށް އަންދާޒާ ކޮށްލުމަށްވެސް ދަތިވިއެވެ. ކުއްލިއަކަށް ގެނައި ހަރަކާތަކާއިއެކު ޝިއުރީ ގެނެސް އޭނާގެ މެޔާލާ ބޮނޑިކޮށްލެވުނު ގޮތްވެސް ނޭނގެއެވެ. ދެލޯ މަރާލަމުން އިތުރަށް ދެއަތަށް ބާރުކޮށްލެވުނެވެ. ޝިއުރީއަށް ހަމައަށް ނޭވާލެވޭނެ ކަމާއިމެދުވެސް ޝައްކެވެ. އޭނާއަށް އެހާވެސް ބޮޑަށް ޝިއުރީ މެޔާލާ ބޮނޑިކޮށްލެވުނެވެ.

“ދެން ދުވަހަކުވެސް ތިހެން ނުބުނާތީ…… ދުވަހަކުވެސް ނުބުނާތި…..” އެހުރިގޮތަށް ހުރެ އެއްއަތުން ޝިއުރީގެ ބޮލުގައި ފިރުމަމުން މިހެން ބުނެލިއިރު، އޭނާގެ ދެލޮލުންވެސް ކަރުނަތައް އޮހިގެންފިއެވެ. ނަމަވެސް ދެވަން ސިކުންތުގައި ބޮޑުވާ އިނގިލީގެ ކުރިން ކަރުނަ ތިކިތައް ފުހެލިއެވެ. އޯގާތެރި އަތެއްގެ ޙިމާޔަތާއި ފިރުމުންތަކަށް ފެންބޮވައިގެންފައިވާ ޝިއުރީއަށް ދެލޯ މަރާލަމުން މިޝަލްގެ މޭގައި ބޯ އަޅާލައިގެން ހުރެވުނީ އެފަދަ އޯގާތެރިކަމަކަށް ބޭނުންވެފައިވާލެއް ބޮޑުކަމުންނެވެ. އިރުކޮޅަކު އެގޮތުގައި ތިބުމަށްފަހު މިޝަލް މަޑުމަޑުން ޝިއުރީ އޭނާއާއި ދުރުކޮށްލިއެވެ. އަދި އޭނާގެ ދެކޮނޑުގައި ހިފަހައްޓާލަމުން ޝިއުރީގެ ގަދަ އަޅިކުލައިގެ ދެލޮލަށް ބަލާލިއެވެ.

“ޝިއު ތީ ވަރަށް ކެތްތެރި ކުއްޖެއްނު ދޯ…. އެހެން މީހަކަށް ނޭނގުނަސް ހަމަ ގައިމުވެސް އަހަންނަށް އެކަން އެނގޭ… ޝިއުއަށް އެނގޭތަ.؟، އަހަރެމެންގެ ދިރިއުޅުން މީ އިމްތިހާނެއް…. ދިރިއުޅުމުގައި ދިމާވާ ކަންތައްތަކަކީވެސް އިމްތިހާނުގެ ބައެއް…. އެހެންވީމަ، އަހަރެމެން ޖެހޭނީ ކެތްތެރިކަމާއިއެކު، މި އިމްތިހާނުން ފާސްވޭތޯ ހިތްވަރާއިއެކު ގަދައަޅާ މަސައްކަތްކުރަން….. ދަތި އުނދަގޫކަމެއް ދިމާވާ ކޮންމެ ފަހަރަކު އަމިއްލައަށް މަރުވުން އެއީ އަދި ޙައްލެއް ނޫން…. އެހެންވީމަ، ދެން އެގޮތަށް ނުވިސްނައްޗޭ އެނގޭ…..” ޝިއުރީގެ ދެކޮނޑުގައި ހިފަހައްޓާލައިގެން ހުރެ އޯގާތެރިކަމާއިއެކު މިޝަލް ހުރިހާ ވާހަކައެއް ދެއްކުމުން ޝިއުރީ ބޯ ޖަހާލިއެވެ.

“މާތްﷲ އިރާދަކުރެއްވިއްޔާ ޝިއުއަށް ޝިއުގެ މަންމަގެ ލޯބި އަދި ލިބޭނެ….. އަދި ޝިއުގެ މަންމައަށް ތީ އެ މަންމަދެކެ ކިހާ ލޯބިވާ ދަރިއެއްކަންވެސް ވިސްނޭނެ…. ޝިއުއަށް ޝިއުގެ މަންމަގެ ލޯބި ލިބޭތޯ އަހަރެން މާތްﷲ ގެ ޙަޟްރަތަށް ދުޢާކޮށްދޭނަން…..” ޝިއުރީގެ ދެލޮލުން އައިސްފައިވާ ކަރުނަތައް ލޯތްބާއިއެކު ފުހެލައިދެމުން މިޝަލް ހިނިތުންވެލިއެވެ. ބަދަލުގައި ޝިއުރީވެސް ހިނިތުންވެލިއެވެ. ޝިއުރީގެ ހިތް ހަމަޖައްސައިދޭން މަސައްކަތް ކުރަމުން ދިޔަ މިޝަލް ހުރީ ކެތްކުރެވޭ އެންމެ މަތީ ދަރަޖައަށް ކެތްކޮށްލައިގެންނެވެ. އޭނާގެ ހިތުތެރޭގައިވެސް ވަނީ ބޮޑު ތޫފާނެއް އުފެދިފައެވެ.

ދުރުގައި މަޑުކޮށްލައިގެން ހުރި މިޝްޔާއަށް އެ ދެމީހުންގެ ދެމެދުގައި ދެކެވުނު ހުރިހާ ވާހަކައެއްވެސް ވަރަށް ރީއްޗަށް އަޑުއިވުނެވެ. ދެލޯ ބޮޑު ކޮށްލައިގެން ހުރެވުނީ އެދެމެދުގައި ދެންމެ ދެކެވުނު ވާހަކަތަކާއި ހިނގާދިޔަ ކަންތައްތައް ފެނި ޝޮކެއް ލިބިފައެވެ. ވާނީވެސް އެހެންތާއެވެ. ޝިއުރީގެ މަންމަ ޝިއުރީދެކެ ރުޅިއައިސްގެން އުޅޭ ވާހަކަ ބުނެލިޔަސް ދުވަހަކުވެސް އެއިން ވާހަކައެއްގެ ތަފްޞީލެއް އޭނާ ނުދޭނެއެވެ. އިތުރަށް އެ ވާހަކައެއް ނުވެސް ދައްކާނެއެވެ. އެހެނަސް، އެހާ ތަފްޞީލްކޮށް އޭނާގެ ހިތުގެ ޙާލު މިޝަލަށް ކިޔައިދިނުމުން މިޝްޔާއަށް އެކަމުން ހައިރާންކަން ލިބުނީއެވެ. އަދި އެއަށްވުރެވެސް ބޮޑަށް ހައިރާންވީ، ޝިއުރީ އަމިއްލައަށް މަރުވާ ވާހަކަ ދެއްކުމުން މިޝަލް ކަންތައް ކުރިގޮތުންނެވެ. ޝިއުރީ މެޔާލައި ބޮނޑިކޮށްލައިގެން ހުރިއިރު އެދެލޮލުން ފޭބި ކަރުނަތައް ޝިއުރީއަށް ނުފެނުނު ނަމަވެސް އޭނާއަކަށް އެ ކަރުނަތަކެއް ސިއްރެއް ނުވެއެވެ. އެންމެ ބޮޑަށް ހައިރާންވާން ޖެހުނު ސަބަބަކީ އެއީއެވެ. އެވަގުތު އޭނާގެ ހަނދާނަށް އައީ މީގެ ތިން ދުވަސްކުރިން ޔަލްވީއާއި މިޝަލް ދެއްކި ވާހަތަކެވެ. އެމީހުންނަށް ނޭނގި އޭނާ ވަނީ އެވާހަކަތައް ރެކޯޑްކޮށްފައެވެ. އަދި އެ ރެކޯޑިންގ އޭނާވަނީ އަޑުވެސް އަހާފައެވެ. ޔަލްވީއާއި މިޝަލާއި ދެމެދު ދެކެވިފައިވާ ވާހަކައިން މިޝަލް ވަރަށް ލޯބިވާ ކުއްޖަކު ހުންނަކަންވެސް އޭނާއަށް ވަނީ އެނގިފައެވެ. އެވާހަކަތަކާއި އޭނާގެ ކުރިމަތިން ދެންމެ ފެނިގެން ދިޔަ މަންޒަރުތަކުން މިޝަލްގެ ހިތުގައި ރައްކާކޮށް، ފޮރުވައިގެން އެއުޅޭ ކުއްޖަކީ ޝިއުރީ ކަމުގައި މިޝްޔާގެ ހިތް ބުނުމުން، އޭނާއަށް ހިތާއި ދިމާއިން މޭގައި އަތް އަޅާލެވުނެވެ. އެއީ ތެދަކަށް ވެއްޖެނަމަ ދެން ކަންތައް ވާނީ ކިހިނެއްބާއޭ އޭނާގެ ހިތަށް އެރިއެވެ. ޖަވާބު ނުލިބޭ ސުވާލުތަކަކުން އޭނާގެ ސިކުނޑި ހާސްކުރުވަމުން ދިޔައެވެ.

މިޝަލްގެ މިންނެތް މަސައްކަތުން ޝިއުރީ ހަމައަކަށް އެޅުނެވެ. އޭނާ ގެއަށް ދާން އެނބުރުމުން މިޝްޔާ އަވަސްއަވަހަށް ގޭތެރެއަށް ދެމިގަތީ އެދެމީހުންނަށް ފެނިދާނެތީއެވެ. އޭނާ އެތާހުރިކަން އެވަގުތު އެ ދެމީހުންނަށް އަންގާކަން މިޝްޔާ ބޭނުމެއް ނުވެއެވެ. ނަސީބަކުން އެމީހުނަށް ނުފެނި މިޝްޔާއަށް ފިލުނެވެ.
*******************

ޝިއުރީ ގެއަށް ދިއުމުން ބާރަށް ހިނގާލާފައި ގޮސް މިޝަލް ވަނީ އޭނާގެ ކޮޓަރިއަށެވެ. ބަންލާފައި ދޮރު ލެއްޕުމަށްފަހު، އަތް މުށްކަވާލަމުން ފާރުގައި ދެތިން ފަހަރު ޖަހާލެވުނެވެ. އެވަރުންވެސް ހިތްހަމަ ނުޖެހިގެން ރީތިވާ މޭޒުމަތީގައި ހުރި އެއްޗެހިތައް އަތުން ޖަހާ އުކާލިއެވެ. އެއަށްފަހު، އެނދުގެ މަގަތުގައި އިށީނދެ ބޮލުގެ އިސްތަށިގަނޑުގެ ތެރެއަށް ދެއަތް މަހާލިއެވެ. ޝިއުރީ ހިތުގައި ޖެހިފައިވާވަރު ފެނުމުން އޭނާގެ ހިތުގެ ހަމަޖެހުންވެސް ވަނީ ގެއްލިފައެވެ. އެވަގުތު ސިހިފައި ދޮރާއި ދިމާއަށް ބަލާލެވުނީ ދޮރު ހުޅުވާލާފައި މިޝްޔާ ވަނުމުންނެވެ. މިޝްޔާ ފެނުމުން މިޝަލް އަވަސްވެގަތީ ކޮޓަރިއަށް އުކާލާފައިހުރި ރީތިވާ ސާމާނުތައް ނެގުމަށެވެ. މިޝްޔާވެސް ލަސް ފިޔަވަޅުތަކެއް އަޅަމުން އައިސް ވެއްޓިފައި އޮތް ލޯޝަން ފުޅިނަގައި މޭޒުމަތީގައި ބެހެއްޓިއެވެ. އޭރު މިޝަލް ދެންހުރި އެއްޗެހި މޭޒުމަތީގައި ބަހައްޓަނީއެވެ.

“ކުރީ ދުވަހު ދޮންބެއާއި ޔާލްއާއި ދެމެދު ދެކެވުނު ވާހަކަ އަހަންނަށް އެނގޭ…… ދޮންބެ އެހެން ކުއްޖަކު ދެކެ ލޯބިވާކަންވެސް އަހަންނަށް އެނގޭ…..” ފަރުވާތެރިކަމާއިއެކު މިޝަލަށް ބަލަން ހުރެ މިޝްޔާ ވާހަކަ ދައްކަން ފެށިއެވެ. މޭޒުމަތީގައި ހުރިހާ އެއްޗެއް ބެހެއްޓުމަށްފަހު، މިޝަލް އެއްޗެއް ނުބުނެ ހިނގައިގަތީ މިޝްޔާ ދެއްކި ވާހަކަ އަޑު ނީވޭތީއެއް ނޫނެވެ.

“އެކުއްޖަކީ ޝިއުތަ……؟؟؟؟؟” މިޝްޔާގެ ދުލުން ބޭރުވި ޖުމްލައާއިއެކު މިޝަލްގެ ފައިގައި ކަސްތޮޅު ލެވުން ކަހަލައެވެ. ޙަރަކާތެއް ގެންނަން ނެނގިފައި ހުރި ފިޔަވަޅުމަތީ ހުއްޓުން އަރާފައި ހުރެވުނީއެވެ.

“އެއީ ޝިއުތަ……؟؟؟؟؟؟؟” ފިޔަވަޅުތަކަށް ބާރުލަމުން ހިނގާލާފައި އައި މިޝްޔާ މިޝަލްގެ ކުރިމަތީގައި މަޑުކޮށްލަމުން ސުވާލު ތަކުރާރުކޮށްލިއިރު، އޭނާގެ މޫނުމަތީގައިވާ ކުލަވަރުތައް ދެނެގަންނާކަށް މިޝަލަކަށް ނޭނގުނެވެ. މިޝަލްގެ މޫނުން ނަޒަރު ވަކިކޮށްނުލާ އޭނާ ހުރީ ޖަވާބެއް ބޭނުންވެފައެވެ. މިޝްޔާއަށް ބަލާލި މިޝަލްގެ ދެލޯ ފެންކަޅިވާންފެށިއެވެ. ވާހަކަ ދައްކަން އުނދަގޫވުމުން ތުނިކޮށް ފަޅާފައިވާ ތުނބުޅީގައި އަތްހިންގާލަމުން ދިމަދިމާއަށް ބަލަންފެށުނެވެ. ބަލަބަލާ ހުއްޓާ މިޝަލްގެ ދެލޯ ފުރިގެންގޮސް ކަރުނަތައް އޮހިގަތެވެ. ކަނޑާ ވައްޓާލި ރުކެއްހެން ދެކަކޫ މައްޗަށް ތިރިވިއިރު އޭނާއަށް ހަމަ ރަނގަޅަށްވެސް ރޮވިއްޖެއެވެ. ކެތްތެރިކަން ކޮޅުންލީއެވެ. އޭނާއަކީވެސް އިންސާނެއް ވިއްޔާއެވެ. ހިތުގައި އުފެދިފައިވާ ޖަޒުބާތުތައް ހިފަހައްޓާލެވޭނީވެސް ވަކިވަރަކަށެވެ.

މިޝަލްގެ ވޭނީ ރުއިމުގެ އަޑު ކަންފަތުގައި ޖެހުމުން މިޝްޔާގެ ގައިން ދިޔައީ ހީބިހި ނަގައިގެންނެވެ. އޭނާ ރޯތަން ފެނުމުން މިޝްޔާގެ ދެލޯވެސް ފެންކަޅިވިއެވެ. އޭނާ ހަނދާންވާން ފެށީއްސުރެ އަދި މި ނޫނީ މިޝަލް ރޮނިކޮށް ފެނިފައެއް ނުވެއެވެ. މިޝަލްގެ ރުއިމުގައި، ވޭނާއި ރިހުން އެކުލެވިފައިވެއެވެ. މިޝްޔާ މަޑުމަޑުން ތިރިވެ “ދޮންބޭ” އޭ ކިޔާ ގޮވާލަމުން އިސްޖަހާލައިގެން ރޯން އިން މިޝަލްގެ އަތްތިލަމަތީގައި އަތް ބާއްވާލިއެވެ. އެއާއިއެކު، ގެނައި ކުއްލި ޙަރަކާތަކާއިއެކު މިޝަލް މިޝްޔާގެ ގައިގައި ބައްދާލިއެވެ.

“މިޝް…. އެކުއްޖަކީ ޝިއު…. ދޮންބެ ލޯބިވަނީ ޝިއުދެކެ…. ވަރަށް ވަރަށް ބޮޑަށް ލޯބިވޭ….” އެއިންގޮތަށް އިނދެ މިޝަލް ބުނަމުން ދިޔައެވެ. މިޝަލްގެ ގައިގައި ހިފަހައްޓާލަމުން ދެލޯމަރާލި މިޝްޔާގެ އެސްފިޔަތައް ފޫދުއްވާލުމަށްފަހު ކަރުނަތައް ފައިބައިގަތީ މިޝަލްގެ ޙަރަކާތްތައް ހުރިގޮތުން ހިތްދަތިވީ ވަރުންނެވެ. އެގޮތުގައި އިރުކޮޅަކު އިނުމަށްފަހު މިޝަލް މިޝްޔާގެ ގައިން ދޫކޮށްލުމަށްފަހު ލޮލުން އައިސްފައިވާ ކަރުނަތައް ފުހެލިއެވެ. އަދި ކޮޅަށް ތެދުވެ އެނދުގެ ބޯލާކޮޅުގައި ހުރި ޓިޝޫ ފޮށިން ޓިޝޫއެއް ނަގާ ނޭފަތް ފޮޅާލަމުން އެނދުގެ މަގަތުގައި އިށީނެވެ. މިޝަލްގެ ޙަރަކާތްތަކަށް ބަލަން އިނދެފައި މިޝްޔާވެސް އައިސް މިޝަލްގެ ގާތުގައި އިށީނެވެ.

“ދޮންބެ ކީއްވެ ޝިއުދެކެ ލޯބިވާ ވާހަކަ އަހަރެންގާތު ނުބުނެ ސިއްރުކުރީ…..” މިޝަލް ހަމައަކަށް އެޅުމުން މިޝްޔާ ސުވާލުކޮށްލިއެވެ. މިޝަލް ފަޒާގެ ތެރެއަށް ފުންނޭވާއެއް ދޫކޮށްލަމުން ދެއަތް ޖޯޑު ކޮށްލުމަށްފަހު ދެއަތަށް ބަލަހައްޓައިގެން އިނދެ ވާހަކަ ދައްކަންފެށިއެވެ.

“ފުރާވަރަށް އެރީއްސުރެ ދޮންބެގެ ހިތުގައި ޝިއުއަށްޓަކައި ތަފާތު ގޮތަކަށް ވިންދު ޖަހާކަން ދޮންބެއަށް ފާހަގަކުރެވުނު…. އަދި އެހެން އެވަނީ ޝިއުދެކެ ލޯބިވެވުމުންކަންވެސް އެނގުނު…. އެކަމަކު ލޯބި ހުށަހެޅުން ފަސްކޮށްލީ އޭރު ޝިއުގެ އުމުރުން ޅަވެފައި އެފަދަ ކަމަކަށް ޝިއު އާވާނެކަން އެނގޭތީ، ޝިއު ބޮޑުވެލަންދެން….. އެކަމަކު ބަލަބަލާ ހުއްޓާ ތެޔޮނާށި ކާޅު ޖަހައިގަތީ….. އެވެސް އެންމެ ގާތްކޮށް އުޅޭ އެކުވެރިންގެ ތެރެއިން މީހަކު…… އޭގައި ނަހީކްގެ ކުށެއް ނެތް….. ނަހީކަށް އަދިވެސް އަހަރެން ޝިއުދެކެ ލޯބިވާކަމެއް ނޭނގޭނެ….. އެކަން އެނގޭ ހަމައެކަނި މީހަކީ ޒީކް….. ދެން މިޝް…..” މިޝަލްގެ ވާހަކައިން ހައިރާންވީ ވަރުން މިޝްޔާއަށް މިޝަލާއި ދިމާއަށް ބަލަހައްޓައިގެން އިނދެވުނީ އެ ހުރިހާ ކަމެއް ޒިކާނަށް އެނގޭއިރުވެސް އޭނާއަށް އެނގިފައި ނުވާތީއެވެ. މިޝަލް ނުބުނި ނަމަވެސް ޒިކާން އޭނާގެ ގާތުގައި ނުބުނެ ހުރުމުން ހިތްހަމަ ނުޖެހުނެވެ. މިޝްޔާގެ މޫނަށް އަރާ ފޭބި ކުލަވަރުތަކުން އޭނާގެ ހިތުތެރޭގައި ހިނގާ ކަންތައްތައް މިޝަލަށް ނަގައިގަނެވުނެވެ.

“ޒީކްއަކީ އިތުބާރުހިފޭ ރަނގަޅު އެކުވެރިއެއް… ދޮންބެ ޒީކް ލައްވާ ހުވާކުރުވިން އެއްވެސް މީހެއްގެ ގާތުގައި އެވާހަކަ ނުބުނުމަށް….. އެހެންވެ އޭނަ މިޝްގެ ގާތުގައިވެސް އެވާހަކަ ނުބުނީ……” މިޝަލް އޮޅުން ފިލުވައިދިނެވެ.

“އަހަރެން ވަރަށް ދެރަވެއްޖެ ދޮންބެއަށް ކަންތައްވީގޮތުން….. ދޮންބެ ދެރަވާނެވަރު އަހަންނަށް ވިސްނޭ…..” މިޝްޔާ ދެރަވެލާފައި މިޝަލްގެ ކޮނޑުގައި ބޯ އަޅާލަމުން ބުނެލިއެވެ.

“މިޝް…. ދޮންބެ މިހުރިހާ ދުވަހުވެސް ކެތްކުރީނު…. ދެންވެސް ކެތްކުރެވޭނެ….. ޝިއު މިއަދު ދެރަވެގެން ވަރަށް ރޮއުނު…. އޭނާގެ ކުރިމަތީ ނުރޮއެ ދޮންބެއަށް ހުރެވުނީ ހަމަ ކިރިޔާ…. ވަރަށް ކެތްކޮށްގެން…. އެހެންވެ ކޮޓަރިއަށް އައިއްސަ ދޮންބެއަށް އިޙްސާސްތައް ކޮންޓްރޯލް ކުރަން އުނދަގޫވީ…..” މިޝްޔާގެ ބޮލުގައި ފިރުމާލަމުން މިޝަލް ބުނެލިއެވެ.

“ދޮންބެ ނިންމައިގެން ހުރީ ޝިއު ކައިވެނި ކުރި ދުވަހަކުން ދޮންބެގެ ޙަޔާތަށް ކުއްޖަކު ގެނައުމަށް….. އެކަމަކު އެކުވެރިންގެ އެދުމާއިއެކު، ހުހަށް ނުހުންނަންވެގެން ޔާލްކަހަލަ ރަނގަޅު ކުއްޖަކު ފެނުނީމަ ގުޅެން ބޭނުންވީ….. ފަހަރެއްގައިވެސް ޔާލް ދެކެ ލޯބިވެގެންނެއް ނޫން……. ދޮންބެއަކަށް ހިއެއްނުވެ ޝިއު ނޫން އެހެން ކުއްޖަކުދެކެ ލޯބި ވެވޭނެހެންނެއް…..” މިޝަލް އިސްޖަހާލަމުން މިހެން ބުނެލިއިރު، އަނެއްކާވެސް އޭނާގެ އަޑު ތަފާތުވެގެން ދިޔަކަން މިޝްޔާއަށް ފާހަގަކުރެވުނެވެ.

“ދޮންބޭ ދެރަނުވޭ… މާތްﷲ އިރާދަކުރެއްވިއްޔާ ދޮންބެއަކަށް ދެރަގޮތެއް މެދުވެރިއެއް ނުކުރައްވާނެ….. އަހަރެން އަބަދުވެސް ދޮންބެއާއިއެކު ވާނަން…..” މިޝަލްގެ ޙާލަށް ޙަމްދަރުދީވާޙާލު މިޝްޔާ ބުނެލިއެވެ.

އެވަގުތު މިޝްޔާގެ ފޯނަށް މެސެޖެއް އައުމުން ކިޔާލިއެވެ. ފޫކޮޅުގައި ކަށްޓެއް ޖެހިހެން ތެދުވެވުނީ މެސެޖުގައިވާ ޢިބާރާތްކޮޅު ފެނުމުންނެވެ. މިޝްޔާ އެ މެސެޖު މިޝަލަށް ދައްކާލުމުން އޭނާއަށްވެސް ވީ ހަމަ އެހެންނެވެ.

“ހިނގާ އަވަހަށް ދަމާ….” މިޝަލް މިހެން ބުނެފައި ކޮޓަރިން ނުކުންނަން ހިނގައިގަތުމުން މިޝްޔާވެސް ހަލުވިކޮށް ހިނގާލާފައި އޭނާގެ ފަހަތުން ދިޔައެވެ.
********************

މިޝަލްމެން ސައިކަލްގައި ގޮސް މަޑުކޮށްލީ ޔަލްވީމެން ގޭ ކައިރިއަށެވެ. އެ ގެއަށް ވަންއިރު ޔަލްވީގެ ކޮޓަރި ކައިރީގައި މަޑުކޮށްލައިގެން އަޔާނީ ހުއްޓެވެ.

“ކިހިނެއްވީ ޔާލްއަށް…..” އަޔާނީގެ ގާތުގައި މަޑުކޮށްލަމުން މިޝްޔާ އަހާލިއެވެ. މިޝަލްވެސް ވީގޮތް އޮޅުންފިލުވަން ބޭނުންވެފައި ހުރިވަރުން އަޔާނީއަށް ބަލާލެވުނެވެ.

“ބޭރު ޖޯލީގައި އަހަރެމެން ތިބީ ވާހަކަ ދައްކަން….. އެހެން އިނދެފައި ކުރީ ދުވަހު ވީގޮތަށް ކުއްލިއަކަށް ޔާލްގެ އަނގައިން ފޮނު އަންނަންފެށީ……. ދެލޯވެސް މެރިފަ އޮތީ…. ހީވަނީ ހޭނެތިފައިހެން އޮތީ….” އަޔާނީ ވީގޮތް ކިޔައިދެމުން ދިޔައެވެ.

“ދެން ކިހިނެއް ހެދީ….. މިހާރު ކޮބާ އޭނާ….” ހިތް އަވަސްވެފައިހުރެ މިޝަލަށް އަހާލެވުނެވެ.

“ނަސީބު ރަނގަޅުކަމުން އެވަގުތުވީ ސުލައިމާނުބޭވެސް ރުޤްޔާ ކިޔަވާ މީހާ ގޮވައިގެން އައި ވަގުތަށް…. މިހާރު ރުޤްޔާއަށް ކިޔަވަމުން އެދަނީ އެތެރޭގައި….. ދައްތަ އާއި ކާފަވެސް ވެއްޖެ އެތެރޭގައި….” އަޔާނީ ބުނެދިނެވެ. އަދި ތިން މީހުން ވާހަކަ ދައްކަމުން މިސްރާބުޖެހީ ބޭރުގައި ހުރި ޖޯލިތަކާއި ދިމާއަށެވެ. އެވަގުތު ގެއަށް ވަދެގެން އައި ޝިއުރީ ފެނުމުން ތިންކުދިންގެ ހިނގުންވެސް މަޑުޖެހިލިއެވެ. ޝިއުރީ އައުމުން ހަތަރު ކުދިން އެއްކޮށް ހިނގާލާފައި ގޮސް ޖޯލިތަކުގައި އިށީނެވެ. ޔަލްވީއަށް ވީގޮތާއި ބެހޭގޮތުން ޝިއުރީ ސުވާލުކުރުމުން، އަޔާނީ ޔަލްވީއަށް ވީގޮތް ކިޔައިދޭންފެށިއެވެ. އަޔާނީގެ ވާހަކައަށް ސަމާލުވެލައިގެން އިން ޝިއުރީގެ މޫނަށް ބަލަހައްޓައިގެން މިޝަލަށް އިނދެވުނެވެ. މިޝްޔާއަށް މި މަންޒަރު ފެނުމުން އޭނާއަށް ވީ އެހެންކަހަލަ ގޮތެކެވެ. މިޝަލް ޝިއުރީއަށް ބަލާލާ ގޮތުންވެސް އޭނާ ޝިއުރީދެކެ ލޯބިވާވަރު ހާމަވެގެންދެއެވެ. ނަމަވެސް، މިވީހާ ދުވަހު އެކަހަލަ ކަމެއް ފާހަގަ ނުކުރެވުނީ ކީއްވެބާއޭ މިޝްޔާގެ ހިތަށް އެރިއެވެ.

ހަތަރު ކުދިން އިންތިޒާރު ކުރަމުން ދިޔައީ ޔަލްވީގެ ޚަބަރެއް ވާނެ އިރަކަށެވެ. އެކުދިން އެހެން ތިއްބާ މެންދުރު ނަމާދު ކޮށްލައިގެން ނުކުތް ހަލީމާވެސް އައިސް އެކުދިންގެ ގާތުގައި އިށީނެވެ. ހަލީމާ އައިތާ މާގިނައިރެއް ނުވަނީސް ގޭތެރެއިން ނުކުތް ސުލައިމާނުބޭ އާއި ރުޤްޔާ ކިޔަވާ މީހާ ފެނުމުން މިޝަލްމެންނަށް ކޮޅަށް ތެދުވެވެނެވެ. އެމީހުންގެ ފަހަތުން ފަހުމީވެސް ނުކުމެގެން އައިސް އެންމެން މަޑުކޮށްލީ މިޝަލްމެންގެ ގާތުގައެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.