ހިތުގެ މިލްކުވެރިޔާ (އަށްވަނަ ބައި)

ބޮލުގައި އަތް އަޅާލެވުނީ ބޮލަށް ބަރުވާން ފެށުމުންނެވެ. މުޅިތަން އެނބުރޭހެން ހީވުމާއެކު އަރިއަޅާލައިގެން ވެއްޓޭން ދިޔައެވެ. މިމަންޒަރު ފެނުނީ އާރާވް އާއި ޒިވާން އަށް އެއްކޮށެެވެ. އަރުޝީއާއި ދިމާއަށް ދުއްވައިގަނެވުނީވެސް ދެމީހުންނަށް އެއްކޮށެވެ. ނަމަވެސް އޭގެއިން މީހެއް އަރުޝީ ގައިގައި އަތްލުމުގެ ކުރިން އަރުޝީ ގައިގާ ހިފެހެއްޓިއެވެ.އެހެނީ ޒިވާން އާއި އާރާވްއަކީ އަރުޝީއަށް ހިލޭފިރިހެނުންނެވެ. ރައިހާނާ މަޑު މަޑުން އަރުޝީ ސޯފާގައި ރީތިކޮށް ބާއްވާލިއެވެ. އަދި އާރާވް ކައިރީގައި ފެންތައްޓެއް ހިފައިގެން އައުމަށް ބުންޏެވެ. އާރާވް ތައްޔާރަށް ހުރި ކަހަލައެވެ. ފެންތަށި ބަލާ ކާމޭޒު ކައިރިއަށް ދިޔައީ ރައިހާނާއަށް ޖުމްލަވެސް ފުރިހަމަ ނުކުރެވެނީހެވެ.
ރައިހާނާ އަރުޝީ މޫނުގައި ދެތިން ފަހަރަކު ފެންފޮދެއް ހާކާލުމާއެކު އަރުޝީއަށް ތަންދޮރު އެނގޭ ވަރުވިއެވެ. އޭރުވެސް ލޮލުގެ އެއްކަނަކުން ކަރުނަ ފައިބަމުން ދެއެވެ.
ޒިވާން އާއި އާރާވް ކޮޓަރިއަށް ނިދަން ފޮނުވާލުމަށްފަހު އަރުޝީ ގޮަވައިގެން ރައިހާނާ ވަނީ އޭނާގެ ކޮޓަރިއަށެވެ. ގިނައިރުތަކެއް ވަންދެން ރައިހާނާ ހޭދަކުރީ އަރުޝީއަށް ނަސޭހަތް ތެރިވުމުގައެވެ. **************
އުއްޑުން އޮތް އާރާވްގެ ނަޒަރު ހުއްޓިފައިވަނީ ސީލިންގަށެވެ. އަރުޝީގެ ކޮންމެ ހަރަކާތެއް މިހާރުވެސް އާރާވްއަށް ފެންނަ ކަހަލައެވެ. ދެތިން ގަޑިއިރު ތެރޭގައި އާރާވްއަށް މިއައީ ކޮންކަހަލަ ބަދަލެއް ހެއްޔެވެ. އަރުޝީ ފެނުނީއްސުރެ އާރާވްއަކީ މުޅިން އެހެން މީހެއްކަހަލައެވެ. އަރުޝީއަކީ ކާކު ހެއްޔެެވެ. އާރާވްގެ ހިތުން ނުފިލައިގެން މިއުޅެނީ ކީއްވެ ހެއްޔެވެ. ބޭބެގެ ވާންއުޅޭ އަންހެނުންކަން އެނގޭއިރުވެސް މިފަދަ ގޮތަކަށް އަރުޝީއާއި މެދު ވިސްނެނީ ކީއްވެ ހެއްޔެވެ. މީގެ ކުރިން ދުވަހަކު ދެކެފައިނުވާ މި އަންހެންކުއްޖާއާއި އާރާވްގެ އޮތީ ކޮންގުޅުމެއް ހެެއްޔެވެ. ކޮންމެގޮތެއްވިޔަސް އާރާވް ޖެހޭނީ މިވިސްނާ ވިސްނުންތަކާ ދުރުވާށެވެ. އެއީ ޒިވާންެގެ ވާންއުޅޭ އަނބިމީހާއެވެ. އާރާވްގެ ހިތުގައި އިހްތިރާމްނޫން އެހެން އެެއްޗެއް އަރުޝީއަށްޓަކާ އޮވެގެން ނުވާނެއެވެ. އާރާވް ކައިރީގައި އޮތް ބާލިސް ނަގާ މޫނުމަތީގައި އަޅާލީ އިތުރަށް ނުވިސްނަންވެގެންނެވެ. ނަމަވެސް ވަމުންދާ އިހްސާސްތަކަށް އާރާވް އަށް ބާރުފޯރުވޭ ގޮތެއް ނުވެއެވެ. ވިސްނި ވިސްނިހެން ރޭގެ ނިދި އާރާވްއާއި ދުރަށް ދަނީއެވެ. ފަތިސް ނަމާދަށް ބަންގި ގޮވީވެސް އާރާވް މިކަހަލަ ވިސްނުމެއްގައި އޮއްވައެވެ. ތެދުވެ ވުޝޫކޮށްލައިގެން ނަމާދަށް ދިޔައީ ހިތާއި ސިކުނޑިއަށް ހަަމަޖެހުމެއް ލިބޭތޯއެވެ.
…………………………………
ރިހާނީގެ އެދުމުގެ މަތިން މަރިޔަމްއާއި އަރުޝީ ރިހާނީއާއި ކައިލް އުޅޭ އެޕާޓްމެންޓަށް ބަދަލުވީ އޭގެ އަނެއް ދުވަހުއެވެ. ރައިހާނާވެސް އިތުރަށް ދެކޮޅު ނުހަދާ އަރުޝީ ރިހާނީއާއި އެއްކޮށް ފޮނުވީ ކައިވެނީގެ ކުރިން ޒިވާންއާއި ދެމީހުން އެއް ގެއެއްގައި އުޅުމުން މީހުންގެ ފާޑުކިޔުން ރައްދުވާނެތީއެވެ. ދަރިންނަށް ކިތަންމެ އިތުބާރެއް އޮތަސް އެހެން މީހެއްގެ ދޫމައްޗަށް ނާރާވާނެ ގޮތެއް ނުވާނެއެވެ. ހާއްސަކޮށް މުއްސަނދި ވިޔަފާރިވެރިން އުޅޭ ނޫޅޭގޮތް ވަރަށް ރަނގަޅަށް ބަލަމުންދާނެއެވެ.
ޕްރި މެރިޖް ކޯރސް ހަދަން އަރުޝީއާއި ޒިވާން ކޯޓަށް ދިޔައީ އެގެއަށް ބަދަލުވިތާ ތިންވަނަ ދުވަހުއެވެ. ޒިވާން އަރުޝީ ބަލާއައީ ކާރުގައެވެ. ނަމަވެސް ކާރަށް އަރަން އަރުޝީ އިންކާރު ކުރިއެވެ. ކައިވެނީގެ ކުރިން އެއްގޮތަކުންވެސް ޒިވާން އާއި އެކު އެކަހެރި ވާކަށް އަރުޝީ ބޭނުމެއް ނުވެއެވެ. ޒިވާން އެކަމަށް އެއްބަސްވުމާއެކު އަރުޝީ ކޯޓަށް ދިޔައީ އެކަނި ހިނގާލާފައެވެ. ފެމިލީ ކޯޓާ އަރާހަމަވުމާއެކު ހަނދާންވީ އަރުޝީގެ އަލަތު ކައިވެނީގެ ދުވަސް މަތިންނެވެ. އިރުކޮޅަކު ހުއްޓުން އަރާފައި ދޮރާދިމާއަށް ބަލަން ހުރެވުނީ އެދުވަހުގެ އެންމެ އުފާވި ހިނދުކޮޅުތައް މަތިން ހިތަށް އަރާފައެވެ. ކައިސަންގެ އަނގައިން އަނބި ގަބޫލުކޮށްފީމޭ ބުނުމާއެކު އަރުޝީއަށް އުފަލުން ރޮވުނެވެ. އެވަގުތު ކައިސަން އެންމެންގެ ކުރިމަތީގައި އަރުޝީ ގަޔާ ކައިރިކޮށްލުމަށްފަހު ނިތްކުރިއަށް ބޮސްދިނެވެ. އަދި ނުރުއިމަށް ބުނެ ﷲގެ އިރާދަފުޅުން ކުރިއަށް އޮތީ އުފާވެރި ދުވަސްތަކެކޭވެސް ބުންޏެވެ. އެތަނުން ނުކުމެގެން ކާރާ ހަމައަށް ދެވެންދެންވެސް ކައިސަން ހުރީ އަރުޝީ އަތްމައްޗަށް އުފުލާލައިގެންނެވެ. ފޮނި ހިޔާލަށް ގެއްލިފައި ހުރި އަރުޝީ ސިހިގެން ދިޔައީ ތަންކޮޅެއް ކައިރިން ޒިވާން ގޮވާލި އަޑު އިވުމުންނެވެ.
” ކައިސަން މިސްވަނީތަ” ޒިވާން ކޮށްލި ސުވާލުން އަރުޝީއަށް ޒިވާން އާއި ދިމާއަށް ބަލާލެވުނެވެ. ހަމައެއާއެކު އިސްޖަހާލެވުނީ ޒިވާން ރުޅިއައީ ކަމަށް ހީކޮށެވެ. މަޑުމަޑުން ސޮރީއޭ ބުނިއަޑަށް ޒިވާންއަށް ހެވުނެވެ. މިއަޑަށް އަރުޝީއަށް ބަލާލެވުނީ ހައިރާންވެހުރެއެވެ.
” ކީއްވެ ތިހެނީ” ލަދުގަނެފައި ހުރެ އަރުޝީ އަހާލިއެވެ.
” އަރުޝީ ހުރި ގޮތުން ހަމަ ހެވުނީ.. ހިނގާ އެތެރެއަށް” އަރުޝީ ދާން މަގުދައްކަމުން ޒިވާން ބުނެލިއެވެ. އަރުޝީވެސް ހީލަން މަސައްކަތް ކުރަމުން އެތެރެއަށް ވަންނަން ދިޔައެވެ.
……………………………………………………………………
ކޯސް ނިންމާފައި އަރުޝީއާއި ޒިވާންއަށް ނިކުމެވުނީ ރޭގަނޑު ނުވައެއް ޖަހަން އުޅެނިކޮށެވެ. އަރުޝީ އެކަނިން ގެއަށް ފޮނުވަން ހިތްހަމަ ނުޖެހުމުން ޑްރައިވަރަށް ގުޅާފައި ކާރު ޕާކް ކޮށްފައި ހުރިތަނުން ކާރު ނަގަން އަންނަން ބުނުމަށްފަހު ޒިވާން ގެއަށް އައީ އަރުޝީއާއި އެއްހަމައެއްގައި ހިނގާފައެވެ. ދެމީހުން އެކީގައި އައި އިރުވެސް އެކަކު އަނެކަކާ އެއްވެސް އިތުރު ވާހަކައެއް ނުދައްކައެވެ.
ރައިހާނާގެ އެދުމުގެ މަތިން ޒިވާން ގެއަށް އައީ އަރުޝީވެސް ގޮވައިގެންނެވެ. އަރުޝީ ފެނުމާއެކު އެންމެ ފުރަތަމަވެސް ރައިހާނާ އަރުޝީ ގައިގައި ބައްދާލިގޮތުން ހީވީ އަމިއްލަ ދަރިއެއް ގައިގާ ބައްދާލެވުނު ހެންނެވެ. ރައިހާނަ އަރުޝީ ގޮވައިގެން ދިޔައީ ކާމޭޒު ކައިރިއަށެވެ.
” މިރޭ ތަންކޮޅެއް ރަނގަޅަށް ކައްކާލެވުނީމަ ހިތަށް އެރީ އަރުޝީ ގެންނަން.. އިށީނދޭ” ތަށި ތަކުގެ މަތި ނަގަމުން ރައިހާނާ ވާހަކަ ދެއްކިއެވެ. ޒިވާންވެސް އަވަހަށް އަތް ދޮވެގެން އައިސް އިށީނީ ބަނޑުހައިވެފައި ހުރި ވަރުންނެވެ. އަރުޝީވެސް އަތްދޮވެގެން އައިސް އިށީންވަގުތު ފެނުނު މަންޒަރު މޫނުގެ ކުލަ އޮއްސުނެވެ. މޭޒުމަތި ފުރާލާފައިވަނީ ކައިސަންއަށްވެސް އެންމެ މީރު ކާއެއްޗެހިންނެވެ. ބަނބުކޭލީ ބަތާ ރިހާކުރުގެ އިތުރުން ކަނޑުކުކުޅުވެސް ހުއްޓެވެ. ކައިސަން ނިޔާވި ދުވަހު އަރުޝީވެސް ހަމަ މިގޮތަށް ކެއްކިއެވެ. ނަމަވެސް ކައިސަންއަށް އޭގެ މީރުރަހައެއް ނުލިިބުނެވެ. އަރުޝީ ފެންކަޅިވާން ނެގީ ކުޑަ ހިނދުކޮޅެކެވެ.
” މަންމާ ކޮބާ އާރާވް.. އޭނަގެ ކަންތައް ދޯ މޭޒުމަތިން މިފެންނަނީ” ޒިވާން މިހެން ބުނި ވަގުތު ވީ އާރާވްވެސް ފޯނާ ކުޅެމުން މޭޒާ ދިމާއަށް އައި ވަގުތަށެވެ. ފޯނަށް ބަލަން ހުރެ އާރާވްއަށް އިށިނދެވުނީ އަރުޝީއާއި ޖެހިގެން ހުރި ގޮނޑީގައެވެ. އަރުޝީއިންކަން އާރާޥް އަށް ނޭނގޭކަން އެނގުމުން ޒިވާން އާއި ރައިހާނާ ކައިރިއަށް ހިނިއަންނަ ގޮތްވީ ކުރެވުނު ކަންތައް އެނގިއްޖެނަމަ އާރާވް ލަދުގަންނާނެވަރު ހިތަށް އަރާފައެވެ. ކަންތައްވީވެސް އެހެންނެވެ. ކައިރީގައި އިން އަރުޝީ ފެނުމާއެކު އާރާވް އަށް ތެދުވެވުނީ ފޫކޮޅަށް ކައްޓެއް ހެރިގެން ތެދުވާހެނެވެ. އެހާ ކުއްލިއަކަށް ތެދުވުމުން އަރުޝީވެސް ދިޔައީ ސިއްސައިގެނެވެ. ރައިހާނާ ކައިރިއަށް ހިނިއައެއްކަމަކު ހިނިގަނޑު އެތެރެއަށް ހިންދާލިއެވެ. ޒިވާންވެސް ހިނިގަނޑު އޮއްބާލީ އަރުޝީ ލަދުގަންނާނެވަރު ހިތަށް އަރާފައެވެ. އާރާވް މޭޒުގެ އަނެއް ފަރާތަށް ގޮސް ޒިވާން ކައިރީގައި އިށީނެވެ. އަދި ރައިހާނާއަށް ބަލާލަމުން ތައްޓަށް ކާއެއްޗެހި އަޅާދިނުމަށް ބުންޏެވެ.
” މިރޭ މިތާ މުޅިންވެސް މިހުރީ އާރާވްއަށް އެންމެ މީރު އެއްޗެހި… އާރާވްއަށް އެންމެ މީރުވާނީ ކަނޑުކުކުޅާއި ބަތާ.. ރިހާކުރާ ބަނބުކޭލީ ބަތްވެސް އެހާ މީރުވާނެ.. ހަފްތާއަކު ދެތިން ދުވަހު މިއެއްޗެހި ނުހަދާ ފަހެއް ނުޖެހޭނެ..” އާރާވް އަށް ކާއެއްޗެހި އަޅާދެމުން ރައިހާނާ ވާހަކަ ދެއްކިއެވެ. އަރުޝީ ގަދަކަމުން ހީލައިގެން އިނދެ ކައިސަން އަށް އެންމެ މީރު ކެއުން ތައްޓަށް އަޅާލިއެއް ކަމަކު ކައިސަން މަތިން ހަނދާންވާ ވަރުން އަރުން އެތެރެއަށް އެންމެ އެތިކޮޅެއްވެސް ނުދިޔައެވެ. އަތުގައި ހުރި ބައި ތައްޓަށް އަޅެލެވުނީ މަޑު މަޑު އާހެއް ދޫކޮށްލަމުންނެވެ. އަރުޝީގެ ހަރަކާތްތައް އެންމެ ރަނގަޅަށް ބަލަމުން ދިޔައީ އާރާވް އެވެ. އަރުޝީގެ މޫނުމަތިން އާރާވް އަށް ހިތްދަތިކަން ނޫން އެހެން ކަމެއް ނުފެނެއެވެ.
” އާރޫ ދަރިފުޅާ ނުބައީތަ” އަރުޝީ އިންގޮތް ފެނި ރައިހާނާ އެހިއެވެ. އަވަސް އަވަހަށް ނޫނެކޭ ބުނުމަށްފަހު ކާންފެށީ އެތައް ހިތްވަރެއް ކޮށްފައެވެ. ރައިހާނާ ދެރަ ކުރަން ބޭނުން ނުވާތީއެވެ. އަރުޝީ ކުރިމަތީގައި އިނުމުން އާރާވްއަށް ވެސް ކެވޭ ގޮތެއް ނުވިއެވެ. މަދު އެތިކޮޅަކުން ފުއްދާލުމަށް ފަހު އެތަނުން ތެދުވެގެން ބޭރު ބަގީޗާއަށް ނިކުތެވެ. އަރުޝީ ދާން ނިކުތީވެސް ބަގީޗާގައި ހުރި ހިލަގޮނޑިތަކުން ގޮނޑިއެއްގައި އާރާވް އިންދައެވެ. ރައިހާނާ ކައިރިން ހުއްދަ ހޯދުމަށް ފަހު އަރުޝީ ގޭޓާ ދިމާއަށް މިސްރާބު ޖެހިއެވެ.
އަރުޝީ ކާރުގަ ނުދިޔައީ ކީއްވެބާއޭ އާރާވްގެ ހިތަށް އެރިއެވެ. އަރުޝީ ގޭޓުން ނިކުތުމުން އާރާވްވެސް ފަސްފަހަތުން ނިކުތެވެ. އޭރު އަރުޝީ ގެކައިރީގައި ޓެކްސީގެ އިންތިޒާރުގައި ހުއްޓެވެ. އާރާވް ނިކުތްތަން ފެނުމުން އަރުޝީ ހީލިއެވެ. ނަމަވެސް ހީލުމުގެ ބަދަލުގައި އާރާވްއަށް އަރުޝީއާއި ދިމާއަށް ބަލަހައްޓައިގެން ހުރެވުނީއެވެ. އެހިނިތުންވުމުން އާރާވްގެ ހިތުގެ އެންމެ އަޑިޔަށް އަސަރުކުރިއެވެ. އަރުޝީ އަނެއް ފަރާތަށް މޫނު އަނބުރާލީ އާރާވްގެ ތޫނު ނަޒަރުން އުނދަގޫވެގެންނެވެ.
” ދޮންބެ ނުދޭތަ” ހިތްވަރުކޮށްފައި ވާހަކަ ދެއްކޭތޯ މަސައްކަތް ކުރަމުން އާރާވް އަހާލިއެެވެ. އަރުޝީ އާއެކޭ ބުނުމަށްފަހު ކުރިން ހުރި ގޮތަށް އަނެއްފަރާތަށް އެނބުރިގެން ހުއްޓެވެ.
” ގެއަށް ދޯ ތިދަނީ.. އަހަރެންވެސް އެބަޖެހޭ ކައިލް ކައިރިއަށް އެއްޗެއް ބަލާދާން.. އޯކޭތަ ޓެކްސީ ޝެއަރ ކުރިޔަސް” އާރާވް މިހެން ބުނީ އަމިއްލަ ބޭނުމެއްވެސް އޮތީމައެވެ.
” ކާރުގަ ނޫންތަ ދަނީ” އަރުޝީ އަހާލީ ހައިރާންވި ވަރުންނެވެ.
” ކާރުގަ ދިޔައީހީ އެކަމް ފިރާގު ބެއަށް އޮތީ ނިދިފަ.. އަހަރެން އަތަކު ނެތް ލައިސެންސެއް.. އެހެންވެ.. ހިތްހަމަ ނުޖެހެންޔާ އޯކޭ.. އެހެން ޓެކްސީއެއް ނަގާލަފާނަން” އާރާވް ބުނެލިއެވެ.
” ނޫން އޯކޭ.. އެންމެ ރަނގަޅު” ޓެކްސީ އައިސް މަޑުކޮށްލީ އަރުޝީ މިހެން ބުނި ވަގުތުއެވެ. އަރުޝީ ޓެކްސީގެ ދޮރުހުޅުވުުގެ ކުރިން އަރާވް ބާރަށް ހިނގާފައިގޮސް އަރުޝީއަށް ދޮރު ހުޅުވާދިނެވެ. އެވަގުތު ދޮރު ހުޅުވަން އައިސް އައިސް ހުރި އާރާވް ގައިގާ ލައިނުގަތީ ހަމަކިރިޔާއެވެ. އަރުޝީ ކާރަށް އެރުމުން އާރާވް ވެސް އަނެއްކޮޅުން ދޮރުހުޅުވައިގެން ކާރަށް އެރިއެވެ.

-ނުނިމޭ-

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.