އެދެމޭ ކަލާޔާ ގާތުގާ ވުމަށް (ނަވާރަވަނަބައި)

އެމީހުން އެންމެން އެއްކޮށް ފުރަތަމް ރެންސްޓޯރެންތަކަށް ދިޔައީ ސައި ބޯލާށެވެ. އެޔަށް ފަހު ހަތަރު ކުދިން ވާހަކަ ދައްކަން ތިބުމަށްފަހު އެންމެ ފަހުން ރުއާ ދާންޖެހިގެން ދިޔައީއެވެ. އެވާނީ ޖޮނަތަންގެ ކަމެއްކަމަށް އަލާނިޔާމެން ނިންމިއެވެ. އެއީ މާކުރިން ވެސް އެމީހުން ރާޥާފައި ވާގޮތަށް ވާތީއެވެ. ލައިތް މަޑުން އިނދޭ ޔުސްރާއަށް މެސެޖެއް ކޮށްލިއެވެ. އެޔާ އެކު ޔުސްރާ  ހަޅޭއްލަވައި ގަނެފައި ނުވާނެއޭ ކިޔާ ހަޅޭއްލަވައިގަތެވެ.

އަލާނިޔާ ސިއްސައިގެން ގޮސް ގޮނޑީންވެސް ނުވެއްޓުނީ ކިރިޔާއެވެ. “ތި ކޮން ހަޅޭކެއްތަ ތި ލަވަނީ… ދަތްޕިލަ އަތަށް ލައިގެން އިން ފާޑު ބަލާބަލަ.” އަލާނިޔާ ލަދުގަތްވަރުން ޔުސްރާއާ ދިމާއަށް އެއްޗެހި ގޮވާލިއެވެ. އޭރުވެސް ޔުސްރާ ފޯނަށް ބަލަބަލާފައި ހަމަ ހެނީއެވެ. އެންމެ ފަހުން ލައިތްވެސް އެތަނުން ތެދުވީ އެ މެސެޖު ނުފޮނުވުންނަމައޭ ހިތަށް އަރާ ހާލުއެވެ. ތިން މީހުން ގެޔަށް ދިޔައީ ލައިތް ހުކުރަށް ދާން ވާއިރަށް ގެޔަށް ދިއުމަށެވެ.

ގެޔަށް ވަދެވުމާއެކު ލައިތް ވަނީ އޭނާގެ ކޮޓަރިއަށެވެ. އަލާނިޔާމެންވެސް އެމީހުންގެ ކޮޓަރިއަށް ވަނީ ވަރުބަލި ފިލުވާލުމަށެވެ. އެޔާއެކު އެނދުމަތީގައި އޮތް ޕާރިސަލް ދެމީހުންގެ ލޮލުގައިވެސް އަޅައިގަތެވެ. “އެންމެ ލޯބި ލާނީއަށް.” ޔުސްރާ އެހެން ކިޔާލުމާއެކު އަލާނިޔާ އައިސް މީ ކޮންކަމެއްހޭ ކިޔާ އޭތި ކަނޑާލިއެވެ. އެ ފޮށީގެ ތެރޭގައި އޮތީ ވަރަށް ރީތި ހުދުކުލައިގެ ހެދުމެކެވެ. އަތާއިކަރު ރީތި ވިދާ ލޭހަކުން ވީއިރު އެއީ ވަށްތިރި އަދި ކުރުހެދުމެކެވެ. ކަރުގައި މުތީތަކެއްފަދައިން މިނާވެސްހަރުކުރެވިފައި ހުއްޓެވެ. ފަހަތުން ބޮޑުކަރެއް އިންއިރު އެބައި އިނީ ވާފަށެއް ފުރާލާހެން އައްސާލާ ގޮތަށެވެ. އެ ހެދުން ވަރަށްވެސް ފުރިހަމައެވެ. އޭގެ އިތުރަށް ރިހީގެ ޖަވާހިރު ތަކަކަން ޖަރީ ކުރެވިފައިވާ ހާރަކާ ހުދުކުލައިގެ ހީލްއެއް އޮތެވެ. އަދި ބޮލުގައި އަޅާ ކުދިކުދި ޖަވާހިރުތަކެއްހުރި ބޭންޑެއްވެސް އޮތެވެ. އަލާނިޔާގެ ކުރުކުރު އިސްތަށިކޮޅާ ނުހަނު ގުޅޭނެކަން ޔަގީނެވެ.

އަލާނިޔާ އަނގަހުޅުވާލައިގެން ހުއްޓާ ޔުސްރާ މިރޭ މީހަކު ނުގެއްލިއްޖެޔާ ވާ ރަނގަޅޭ ބުނަމުން ފެންވަރަން ވަނެވެ. ޔުސްރާ ފެންވަރައިގެން ނިކުތްއިރުވެސް އަލާނިޔާ އެ އިން ގޮތަށް އިނުމުން ޔުސްރާ ހިނިގަނޑު ކޮންޓްރޯލް ކޮށްލިއެވެ. “ރުއާގެ ކަމެއްހެން ހީވަނީ..ރީތި ދޯ.. ދެން ދޭ ފެންވަރަން.” ޔުސްރާ އެންމެ ފަހުން ބުނެލިއެވެ. އެޔާއެކު އަލާނިޔާ އޭނަ އަދި ދެއްކެން އެބަ އުޅޭ ނޫންހޭ ބުނަމުން ފާހަނަޔަށްވަނެވެ.

ހުކުރަށް ފަހު ތިން އެކުވެރިން ވެސް މުޅި ދުވަސް ހޭދަކުރީ ބޭރުގައެވެ. ފިހާރަތަކާ ރެސްޓޯރެންޓުތަކުގައެވެ. އެއީ އެންމެ ރައްކާތެރި ގޮތް ކަމަށް ވީތީއެވެ. ހަގީގަތުގައި އެމީހުން އެއްޗެއްހި ގަތީކީވެސް ނޫނެވެ. ހަމަ ވަގުތު ނަގާލުމަށް ހިނގާލީއެވެ. އެންމެ ފަހުން އެމީހުން ގެޔަށް އައީ ހަގަޑި ބައިވަނިކޮށެވެ. އަށެއް ޖަހާއިރަށް ޕާޓީއަށް ދާން އޮތުމާއެކު ކޮންމެ މީހަކުވެސް ދެން އުޅުނީ ރީތި ވާންށެވެ.

އެންމެ ފުރަތަމަ ރީތި ވެވުނީ ޔުސްރާއަށެވެ. ހުދުކުލައިގެ ދިގު ހެދުމެއްގައި ޔުސްރާ ފެންނަނީ ވަރަށްވެސް ފުރިހަމަކޮށެވެ. އެ ދިގު އިސްތަށިގަނޑު ދޫކޮށްލެވިފައި ވީއިރު ޖަހާލައިފައި އިން ރިހި ކުލައިގެ މަލުން ރީތިކަންއިތުރު ކޮށްދިނެވެ. ކޮށްފައިވާ ލުއި މޭކަޕާއެކު ޔުސްރާ ސިފަވީ ޕަރީއެއް ފަދައިންނެވެ. އެވަގުތަކީ އަލާނިޔާވެސް ހެދުން ލައިގެން ރީތިވާން އައި ގަޑިކަމުން އޭނާވެސް ޔުސްރާގެ ރީތިކަމަށް ތައުރީފުބަސްތައް އޮއްސާލިއެވެ.

އަލާނިޔާ ރީތިވާން އުޅެން ފެށުމުން ޔުސްރާ އަލާނިޔާއަށް އެހީ ވާން ފެށިއެވެ. އެގޮތުން އަލާނިޔާ މޭކަޕްކޮށްދީ ފުނާއެޅުވިއެވެ. އަދި ރީތިވާނޭހެން ބޭންޑޫއަޅުވާލަދީ ފަށްވެސް އަޅުވާލަދިނެވެ. އަލާނިޔާ ހީވީ ސާދަވިލޭރޭގެ ހަނދެއްހެނެވެ. އެހާވެސް ޔުސްރާ އޭނާ ރީތިކޮށްދިންލެއް ފުރިހަމައެވެ. އެހެދުމުގައި ހުރި މިނާތަކާ ހުދު އެނސްތަކަށް އަލި އެޅިފައި ވީއިރު އެހެދުމާ ބޭނުން ކޮށްފައި ހުރި ގަހަނާގެ ސަބަބުން އަލާނިޔާވެސް ހީވީ ޖަވާހިރެއްހެނެވެ. ކޮންމެ މީހަކަށްވެސް ހަނދާންވާނީ ސިންދްރެއްލާ ކާޓޫނުކަން ޔަގީނެވެ.

ދެ ކުދިން އެކުގައި ފޮޓޮއެއް ނަގާލުމަށްފަހު ބޭރަށް ނިކުތް އިރު ހުދު ކޯތު ފަޓުލޫނެއް ލައިގެން އިން ލައިތް ފެނުނެވެ. ލައިތް އަލާނިޔާ ފެނުމާއެކު ކަޅިޖަހާނުލާ ބަލަން ފެށުމުން އަލާނިޔާ ލަދުން ހަލާކުވާވަރު ވިއެވެ. ލައިތްވެސް ނޫންކަމަށް ހަދާލުމަށްފަހު ޔުސްރާއާ ދިމާއަށް ހީލަމުން ގެއިން ނިކުތުމަށް ހިނގައިގަތެވެ. އޭރުވެސް އަލާނިޔާ ހުރީ އިސްޖަހާލައިގެނެވެ.

ކާރެއްގައި އަލާނިޔާމެން އައީ ދަރުބާރުގެއަށެވެ. އެތަނުން އެމީހުންނާރުއާ ބައްދަލު ކުރިއެވެ. އަދި އަލާނިޔާމެންގެ ރީތިކަމަށް ތައުރީފު ކޮށްލިއެވެ. ހެދުމުގެ ވާހަކަ އަލާނިޔާ ނުދެއްކުމުން ޔުސްރާ ހުރީ ވަރަށް ހިންހަމަ ޖެހިފައެވެ. ދަރުބާރުގޭ ރަންނަބަނޑޭރި މާލަމް އޮތީ އެއްކޮށް ހުދުކުލައިލް ޖަރީވެފައެވެ. ކޮންމެ މީހަކުވެސް ހުދުހެދުމެއް ލައިފައި ވީއިރު ބޭނުން ކޮށްފައިވަނީ އަގު ބޮޑު ގަހަނާއެވެ. އެތަށް ރީތި އަންހެން ކުދިންނެއް އެތާ ތިބި އިރުވެސް ދުރގައި ވަކިން ހުރި ލައިތްގެ ނަޒަރު ހުއްޓިފައިހުރީ އަލާނިޔާއަށެވެ.

އެ މާހައުލުން އިވެނީ ވަރަށްވެސް ފުރިހަމަ ލަވައެކެވެ. “އެދެމޭ ކަލާޔާ ގާތުގާވުމަށް…. ފެންނާތީ ޔާރާގެ މޫން…” ލައިތް މަޑުމަޑުން އަލާނިޔާ މެންގެ ގާތަށްޖެހެމުން ދިޔައެވެ.އަދި މަޑުމަޑުން އަލާނިޔާއަށް ގޮވާލިއެވެ. އޭރުވެސް ލަވައިގެ އަޑު މަޑުމަޑުން އިވެމުން ދިޔައެވެ. “ތެދެކޭ ތިއީޔޭ ހުވަފެނުގެ ރާނީ…ފެނުނީއެ ޖާދޫވީމޫން..ބެލިގޮތަކުން އެޅުނީ ހިތުކޫރު…އަލިމޫނޭ ސިފަވާ ހޫރު،،”

ލައިތް އެންމެ ފަހުން އެއްފައި މައްޗަށް އިށީނެވެ. އެވަގުތު އެންމެންމެން ލައިތްމެން ވަށާލުމުން އަލާނިޔާވެސް ސިހިފައި ފަހަތަށް އެނބުރުނެވެ. އެވަގުތު ލައިތްފެނުމުން އަނގަމތީ އަތް އަޅާލެވުނެވެ. ލައިތް އިނީ ވަރަށް ލޯބި ޖަވާހިރެއް ޖަހާލައިފައި އިން ރިހި އަނގޮޓިއެއް ހިފައިގެނެވެ. “އަލާނިޔާ..ވިލް ޔޫ ބީ ދަ ޕީނަޓް ބަޓާ އިން މައި ޕީނަޓް ބަޓާ ސޭންޑް ވިޗް؟” ލޯބިން ފުރިގެންވީ ބެލުމަކުން ބަލާލަމުން ލައިތް އަހާލިއެވެ. އަލާނިޔާ ލަދުން ހުރެވެސް އޭނާގެ އަތް ދައްކާލިއެވެ. އަދި މަޑުމަޑުން ބޯ ޖަހާލިއެވެ. އެޔާއެކު އެންމެންތައް އެއްއަޑަކުން ހަޅޭއްލަވާލިއެވެ. ލައިތްވެސް އަލާނިޔާގެ އިނގިލީގައި އަނގޮޓި އަޅުވާލުމަށްފަހު ތެދުވެ ބައްދާލިއެވެ. އަނެއްކާވެސް މީހުންތައް އެހެން ކަންކަމައިގެން އުޅެން ފެށުމުން ލައިތް އަލާނިޔާ ގޮވައިގެން ދިޔައީ އެތަނުން ބޭރަށެވެ. އޭރު ދެމީހުންގެ ހިތްވެސް އެއްބާރު މިނެއްގައި ތެޅެމުން ދިޔައެވެ. ލައިތްގެ އަތް އަލާނިޔާގެ އަތާ ގުޅާލެވިފައި ވީއިރު އެ ދެ މީހުން ނުހަނު ގުޅެއެވެ.

“ލައިތް..މިރޭ ކޮންމެ ގޮތަކަށް ކަންތައް ވިޔަސް އަހަރެންދެކެ އަބަދުވެސް ލޯބި ވައްޗޭ…އަހަރެން ނުބުންޏަސް އަހަރެން ލައިތްދެކެ ވަރަށް ލޯބި ވަން… މިރޭ އަހަރެންގެ ފުރާނަ ވަކިވިޔަސް އަބަދުވެސް ލޯބި ވާނަން” އަލާނިޔާ ފެންކަޅިވެފައި ހުރެ ބުނެލި ވާހަކައިން ލައިތްގެ ހިތް އުފަލުން ނަށާލިއެވެ. ހަމަ އެވަގުތު ބިރުވެސް ގަތެވެ. އޭނާ ހިތުގެ އަޑީން އަލާނިޔާ ހިމާޔަތް ކުރުމަށް އަޒުމު ކަނޑައަޅާލިއެވެ. ވަރަށް ދުވަހަށް ފަހު ދެމީހުންގެ ހިތުގެ އުދާސްތަށް ބޭރުކޮށްލިއެވެ. އަދި އެކަކު އަނެކަކާ ހިއްސާކޮށްލިއެވެ. އެކުގައި ލޯބިން ވަގުތުކޮޅެއް ހޭދަކޮށްލުމަށްފަހު ދެމީހުން އެތެރެޔަށް ވަތްއިރު އިލްމު ރިލީޒް ކުރުމުގެ ހަފްލާ ފަށަން އެންމެންވެސް ތައްޔާރު ވަމުން ދިޔައެވެ. ޔުސްރާ އަލާނިޔާ އަދި ލައިތް އެއްމޭޒެއްގެ ދަށުގައި އިށީންދެލިއެވެ. “ރެޑީތަ؟” އަލާނިޔާ ކަންބޮޑުވެފައި އިންދެ ސުވާލުކޮށްލުމުން ލައިތް ބޯ ޖަހާލިއެވެ.

ކުއްލިޔަކަށް މުޅިމާހައުލުން ސެކިއުރިޓީ އެލާމްގެ އަޑު އިވެންފެށިއެވެ. އެޔާއެކު ހަޅޭއްލަވަމުން މީހުންތައް އެތަނުން ނިކުންނަން ފެށިއެވެ. އެތަނުގެ ބޮކީގެ އަލި ފަނޑު ރަތަކަށް ބަދަލުވެފައި ވީއިރު އެލާމުގެ އަޑަކަށް ބަދަލެއް ނާދެއެވެ. އަލާނިޔާމެން އެތެރޭގައި ތިބިއިރު ރުއާވެސް ހުރީ އެތެރޭގައެވެ. ވަމުންދާގޮތް ނޭންގޭ ހާލުއެވެ. އެތަނުގައި ކުރިންވެސް ތިބި ސިފައިންގެ ޓީމު އައިސް ހަތަރު ފަރާތުން ރުއާ ބައްދާލިއެވެ. ހާސްވެފައި ހުރި ރުއާއަށް ހުރިހާކަމެއް ރޭކާލާން ފެށީ އެހިސާބުންނެވެ.އަދި ނުރައްކާތެރި ބެލުމަކުން އަލާނިޔާ މެންނާ ދިމާއަށް ބަލައިލިއެވެ. އޭރު ބަޑި ދިއްކޮށްގެން ހުރެ ލައިތްވެސް އެދިމާއަށް އާދެއެވެ. ދެން އިވެންވފެށީ ރުއާގެ އަތްތިލަ ބަޑީގެ އަޑެވެ.

“ވާއު ވާއު… ހާދައޭ ތިމީހުން މޮޅީދޯ…ފުރަތަމަ އެހެރަ އަލާނިޔާ މުލައިލް އޭނާގެ މަޅީގަ ޖެއްސީ..މިހާރު ލައިތް… ތިއޮއް ކުޅަދާނަ ކަމެއްދޯ…. މަކަރުވެރި ނުލަފާ އަންހެނާ…ކަލޭ މެން އުފަލުގަ އުޅުނަކަ ދުވަހަކުވެސް އަހަންނެއް ނުދޭނަން.” އެހެން ބުނުމަށްފަހު ކުއްލިޔަކަށް ވަޅިއެއްނެގުމަށްފަހު ލައިތްގެ ބަނޑަށް ހަރާލިއެވެ. އެޔާއެކު އަލާނިޔާ އަދި ޔުސްރާގެ ހަޅޭކުގެ އަޑު އިވުނެވެ. ހަމަ އެވަގުތު އަލާނިޔާގެ ފަޔަށް މީހަކު ބަޑި ޖެހިޔެވެ. ޑާޓެކެވެ. މެރެމުން ދިޔަ އެންފިޔަ ތަކުގެ ތެރެއިން ޖޮނަތަން ފެނުމާއެކު ރުއާއަށް އޭނާ ބަލިވެއްޖެ ކަމުގެ އިހުސާސް ކުރެވެން ފެށިއެވެ.

އިމާޖެންސީގައި ލައިތް ހޮސްޕިޓަލަށް ގެންދެވުނެވެ. އޭރު ވެސް ބަނޑުން ބޮކި ޖަހާފައި ލޭ އަންނަމުން ދިޔައިރު އަލާނިޔާގެ އަތުގައި ހިފާލިއެވެ. އަދި ވޭނީ ގޮތަކަށް ހީލުމަށްފަހު ލޯ މަރާލިއެވެ. އެހިސާބުން ލައިތް އައިސީ ޔޫއަށް ވެއްދުމާއެކު އަލާނިޔާއަށް އެއަތުން ދޫކޮށްލަން މަޖުބޫރު ވިއެވެ. އަލާނިޔާ އަދި ޔުސްރާއަށް އެތާހުރި ގޮންޑިއަށް ތިރިވެވުނެވެ.އޭރު ޝިފާންވެސް އެތަނަށް އައިސް ހުއްޓެވެ. އަލާނިޔާގެ ހެދުމުގައި ބައިވަރު ލޭ ހުރިއިރު އަލާނިޔާގެ ހާލަތު ފެނުމުން ޔުސްރާ ކަންބޮޑުވެފައި ޝިފާންއަށް ބަލާލިއެވެ. އެޔާއެކު ޝިފާން ބޯޖަހާލަމުން އަލާނިޔާގެ ގާތުގައި އިށީނެވެ.

“ލާނީއަށް އިނގޭތަ. ލައިތް އެއީ ވަރަށް ހިތަވަރުގަދަ ކުއްޖެއް. އަހަރެމެން އެންމެ ފުރަތަމަ ސްޕެޝަލް ފޯސް އަށް ވަންނަންވެގެން ތައްޔާރު ވީއިރު ލައިތްގެ މޭދަށަށް ވަޒަނެއް އެރި. އެކަމަކު އޭނަ ހިތްވަރުކޮށްފަ އަމިއްލަޔަށް އެ ނެގީވެސް. އެތަން ފެހީވެސް. އެވަރުންވެސް އޭނަ ބެލީ އަހަރެނގެ އަނގަޔަށް ޖައްސައިގެން ހުރި ވައްތަރާ ބެހެވޭތޯ…” ޝިފާން ކުރީގެ ދުވަސްތަށް ހަނދާންކޮށްލުމުން ކިޔައިދިން ވާހަކައިން އަލާނިޔާވެސް ހީލިއެވެ. ލައިތްގެ ލާނަތްކަން ހަނދާންވުމުންނެވެ.

އިރުކޮޅަކން ނަރުސް ކުއްޖަކު އެތަނުން ނިކުތެވެ. އަދި ވަރަށް އަވަހަށް އޭ ނެގެޓިވް ލޭ ބޭނުންވާކަމަށް ބުނުމުން އެ ކުއްޖާޔާއެކު ޝިފާން އެތެރެއަށް ވަނެވެ. އަލާނިޔާ ކުރަމުން ދިޔަ ސުވާލްތަކަށް ޖަވާބު ދިނުމެއް ނެތިއެވެ. މާޔޫސްކަންމަތީ ހުރެ އަލާނިޔާ އަނެއްކާވެސް އިށީނެވެ. މިފަހަރު ޔުސްރާ އަލާނިޔާއަށް ހިތްވަރު ދިނެވެ. ނަމަވެސް ޔުސްރާވެސް ވަނީ އެތެރެއިން މުޅިން ބަލިވެފައެވެ. އަލާނިޔާއަށް އެކަން އިނގުމާއެކު ޔުސްރާވެސް ނުވިސްނުމަށް ބުންޏެވެ. ދެމީހުން އެކަކު  އަނެކެއްގެ އަތުގައި ހިފާލައިގެން ކޮނޑުގައި ބޯ އަޅާލައިގެން ތިއްބާ ލޯ މެރުނީއެވެ. ވެފައި ވާ ވަރުބައްޔާއެކު ރޮއެރޮއެ ނިދުނީއެވެ. ދެމީހުންނަށްވެސް ހޭލެވުނީ ޝިފާން ގޮވާލުމުންނެވެ. ޔުސްރާ ގަޑިބަލާލަމުން އިރު އެރީހޭ އަހާޅިއެވެ. އަދި ލައިތް ކޮބާތޯވެސް އަހާލިއެވެ. އެވަގުތު ހުރިހާ ކަމަކާ ހަވާލުވެ ހުންނެވި ޑޮކްޓަރު އައެވެ.

“އަލާނިޔާތޯ؟” ޑޮކްޓަރު އަލާނިޔާއާ ދިމާއަށް ބަލައިލަމުން އަހާލިއެވެ. ހައިރާންވެފައި ހުރެ އަލާނިޔާ ބޯ ޖަހާލިއެވެ.”ތީ ވަރަށް ނަސީބުގަދަ ކުއްޖެއް. ލައިތް އޮޕަރޭޝަންގެ ވަގުތުގައިވެސް ކިޔަމުން ދިޔައީ ތިނަން. ދެން މިހާރު އަލާނިޔާގެ މޫނަށް ބަލާލުމުންވެސް ތިޔައީ އަލާނިޔާކަން އިނގިއްޖެ. ހާސް ނުވޭ އޮޕަރޭޝަން ކާމިޔާބު. އެކަމު އަދި ހޭ ނާރާތީ..ބޭނުމިއްޔާ ވަދެލިޔަސް އޯކޭ..” ޝުކުރު އަދާކޮށްލަމުން އަލާނިޔާ އެތެރެޔަސް ވަނެވެ. އޭރު ލައިތްގެ ގަޔަށް އެތަށް ހޮޅިތަކެއް ގުޅާފައިވާ މަންޒަރު ފެނުމުން އަލާނިޔާގެ ދެލޯފެންކަޅިވިއެވެ. މަޑުމަޑުން ގޮސް ލައިތްގެ ގާތުގައި ހުރެ ލައިތްގެ ގަނޑު ފެންކޮޅެއްފަދަ އަތުގައި ހިފާލިއެވެ. އެވަގުތު އެސްފިޔަ ތަޅުވާލުމަށްފަހު ލޯ ހުޅުވާލިއެވެ. އަދި ކުރިމަތީގައި ހުރި އަލާނިޔާ ފެނުމުން ހިނިތުން ވެލިއެވެ.

ލައިތް ކޮންމެސް އެއްޗެއް ބުނަން މަސައްކަތް ކުރަމުން ދިޔައީތީ އަލާނިޔާ ގުދުވެލިއެވެ. މަޑުމަޑުން ލައިތްގެ އަޑު ފޯރިއެވެ.”ތި މޭކަޕް ތަށް ހުރި ފާޑުން ހީވަނީ ފުރޭތައެއްހެން. ޑޮކް ވެސް ލާނީ މިތަނަށް ވެއްދީ ތިހުރި ސިފައިން ބިރުން ކަންނޭންގެ.”…

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.