ހުވަފެން (11)

ކުއްލިއަކަށް ފޯނު ރިންގުވާން ފެށުމުން ސިހިފައި އޭނާއަށް ޚިޔާލުން ބޭރަށް ނުކުމެވުނެވެ. ޚިޔާލުގެ އެންމެ ފޮނި ހިސާބުން ފޯނެއް އައުމުން ފޫހިވެފައިހުރެ ރިޒްނާ ފޯނަށް ބަލާލިއެވެ. އެވަގުތު ސްކްރީނުން ފެންނަން އޮތް ނަންބަރު ފެނުމުން އޭނާއަށް ފުންމައިގެން ތެދުވެވިއްޖެއެވެ.

“ހެލޯ! ރިޒްނާތަ؟ މީ ހޮސްޕިޓަލުންނޭ. ހުޒާމް ހޭއަރައިފި.” ރިޒްނާ ފޯނު ނެގުމާއެކު އެކޮޅުން ބުނެލިއެވެ. އެޔާއެކު ރިޒްނާއަށް ވީގޮތްވެސް ނޭނގުނެވެ. އުފަލުން ގޮސް އޭނާ ހީވަނީ މޮޔަވެދާނެހެންނެވެ.

“ޝަރީއްތާ! ޝަރީއްތާ!” ރިޒްނާ ދުވަމުން ކަހަލަ ގޮތަކަށް ކޮޓަރިން ނުކުތީ ޝަރީފާއަށް ގޮވަމުންނެވެ.

“ކިހިނެއްތަ ވީ މާބާރަކަށް ތިގޮވަނީ؟ ތަނެއްގަ ރޯވީތަ؟” ރިޒްނާގެ އަޑަށް ކޮޓަރިން ނުކުތް ޝަރީފާ އަހާލިއެވެ.

“ޒާމް ހޭއަރައިފި. ޒާމް ހޭއަރައިފި. މާތް ﷲ އަހަރެމެންގެ ދުޢާ އިޖާބަކުރައްވައިފި.” ރިޒްނާ އުފަލުން ބުންޏެވެ. ޝަރީފާއަށް ވީއުފަލެއްގެ ބޮޑުކަމުން ވަގުތުން ރޮވިއްޖެއެވެ. އޭނާ އެތައްފަހަރަކު ﷲއަށް ޙަމްދު ކުރިއެވެ. އޭނާގެ ދުޢާ އިޖާބަކުރައްވާ ހުޒާމް އެނބުރި އޭނާގެ ހަޔާތަށް ދެއްވީތީއެވެ.

“ހިނގާ އަވަހަށް ހޮސްޕިޓަލަށް ދާން. ދެން އެންމެ އިރުކޮޅަކުވެސް ގެއަކު ނުހުރެވޭނެ.” ޝަރީފާ އެހެން ބުނެފައި ރިޒްނާގެ އަތުގައި ހިފައިގެން ދާން ހިނގައިގަތެވެ.

“އެބަ އަންނަން ފޯނާ ހޭންޑްބޭގް ހިފައިގެން.” ރިޒްނާ އެހެން ބުނެފައި ގޮސް އޭނާގެ ކޮޓަރިއަށް ވަނެވެ. އަދި އެނބުރި އައީ ފޯނު ހިފައިގެންނެވެ.

“ކޮބާ ދަބަސް؟” ޝަރީފާ އެހެން ބުނެލުމުން ރިޒްނާ ބޮލުގައި އަތް އަޅާލިއެވެ. އަވަސްކުރަން ހަދައިގެން އޭނާއަށް އާދެވުނީ އަތްދަބަސް ބާއްވާފައެވެ. ދެން އޭނާ ކޮޓަރިއަށް ވަދެފައި އައީ ފޯނު ބާއްވާފައި އަތްދަބަސް ހިފައިގެންނެވެ. އުފާވެފައި ހުރިވަރުންނާއި ހުޒާމް ދެކިލަން ދާން ބޭނުންވެފައި ހުރިވަރުން އޭނާއަށް ފޯނާއި އަތްދަބަހާއި ދެއެތި ހިފައިގެން ނުކުމެވުނީ ދެތިން ފަހަރު ވަދެ ނުކުމެ ވީފަހުންނެވެ.

ދެމީހުން އަވަހަށް ޓެކްސީއެއް ނަގައިގެން ހޮސްޕިޓަލަށް މިސްރާބު ޖެހިއެވެ. ކާރުގައި އިންއިރު ރިޒްނާ އިނީ ދެއަތް އުނގުޅާލަ އުނގުޅާލައެވެ. ހުޒާމްއާ ވާހަކަދައްކަން ކެތްމަދުވެފައި އިންވަރުން އޭނާއަށް އެދަތުރުގަައި ހޭދަވި ފަސްވަރަކަށް މިނެޓުވެސް ހީވީ އެތައް ގަޑިއިރެއްހެންނެވެ.

“ތި ތަންކޮޅެއް ބާރަށް ދުއްވަބަލަ. މިހާރު ކޮންއިރެއްތަ ދުއްވާތާ؟ ގައިމު ހިނގާފަވެސް މިއަށްވުރެ އަވަހަށް ދެވޭނެ ކަންނޭނގެ. ތަނަކަށް ދާން ލަސްވެގެން އުޅެންޏާ އަދި މިމީހުން ހީވާނީ އެހެންފަދަ ކަމެއް ވެގެން އުޅޭހެން. ހައްތާވެސް ލަސްވާނެ ގޮތެއް ހަދޭތޯ ބަލާނީ.” ރިޒްނާ ޑްރައިވަރާއި ދިމާއަށް ހަޅޭއްލަވައިގަތެވެ. އެޔާއެކު ޑްރައިވަރ މަގުގެ އެއްފަރާތަށް ކާރު މަޑުކޮށްލިއެވެ.

“ފައިބާ! ހަމަ މިހާރު ފައިބާ!” ޑްރައިވަރ އަމުރުކުރިއެވެ.

“ޑްރައިވަރ! އަޅުގަނޑަށް މަޢާފްކުރައްވާ! ވަރަށް މުހިންމު ކަމަކު ވަރަށް އަވަހަށް ހޮސްޕިޓަލަށް ދާން ޖެހިގެން މިދަނީ. އެހެންވެ މާ ލަސްވާހެން ހީވެގެން ރުޅި އާދެވުނީ. އަދިވެސް އެއްފަހަރު ވަރަށް ބޮޑަށް މަޢާފަށް އެދެން.” ރިޒްނާ މަޢާފަށް އެދުނެވެ. ކާރު ދުއްވަން އިނީ މެދު އުމުރުގެ ހެޔޮ ވިސްނޭ މީހަކަށް ވުމުންވެސް ކަންނޭނގެއެވެ. އޭނާ ރިޒްނާއަށް މަޢާފްކޮށް ޝަރީފާއާއި ދެމީހުން ހޮސްޕިޓަލަށް ގެންގޮސްދިނެވެ. ޑްރައިވަރަށް ފައިސާ ދިނުމަށްފަހު ރިޒްނާ އެތެރެއަށް ހިނގައިގަތްއިރު އޭނާއާއެކު އިތުރު މީހަކު އައިކަންވެސް ހަނދާން ނެތް ކަހަލައެވެ. އޭނާ އަވަސް ފިޔަވަޅުތަކެއްގައި އެތެރެއަށް ވަދެގެން ދިޔައެވެ. ޝަރީފާވެސް ރިޒްނާގެ ފަހަތުން އެތެރެއަށް ވަނެވެ.

އައިސީޔޫއަކީ އާންމުކޮށް ބަލިމީހާގެ އެހީތެރިންނަށްވެސް ވަދެވޭ ތަނެއް ނޫނެވެ. އަދި އެކަކަށްވުރެ ގިނައިންނެއްވެސް ނުވަދެވޭނެއެވެ. ނަމަވެސް ހުޒާމްގެ ގާތަށް އެކުގައި ވަނުމަށް ޝަރީފާއާއި ރިޒްނާއަށް ހުއްދަ ލިބުނެވެ. ހުޒާމް ހެޔޮ ހާލުގައިވާތަން ފެނުމުން ދެމީހުންނަށްވެސް ހަމަޖެހުމުގެ ނޭވައެއް ލެވުނެވެ. ރިޒްނާ ހުޒާމްގެ އަތްތިލައިގައި ހިފާލިއެވެ. އަދި އެއަތް ގެންގޮސް މަޑުމަޑުން އޭނާގެ ތުންފަތުގައި ޖައްސާލިއެވެ.

“އަހަރެން ވަރަށް އުފާވެއްޖެ. ވަރަށް ވަރަށް އުފާވެއްޖެ ޒާމް އެނބުރި އައިމަ. ދެން އަހަރެމެން ދޫކޮށްލާފަ ނުދައްޗޭ.” ރިޒްނާ އެހެން ބުނެލުމުން ހުޒާމް ބޯޖަހާލިއެވެ. ޝަރީފާވެސް އައިސް ހުޒާމްގެ ގައިގައި ކުޑަ ގޮތަކަށް ބައްދާލާފައި އޭނާގެ ހިތުގެ ޝުޢޫރުތައް ބަޔާންކުރިއެވެ. އެވަގުތު ހުޒާމް އައިސީޔޫގެ ދޮރާއި ދިމާއަށް ބަލާލިއެވެ. އޭނާ އެހޯދަނީ ކާކުކަން އެދެމީހުންނަށްވެސް އެނގެއެވެ.

“ކޮބާ ސާރާ؟” ބަލި އަޑަކުން ހުޒާމް އަހާލިއެވެ. އެޔާއެކު ޝަރީފާއާ ރިޒްނާއަށް އެކަކު އަނެކަކުގެ މޫނަށް ބަލާލިއެވެ. އިރުކޮޅަކު އެދެމީހުން ހިމޭންވެފައި ތިބީ ދޭނެ ޖަވާބެއް ނުވިސްނިފައެވެ. އެކަމުން ހުޒާމްއަށް ކޮންމެވެސް އެއްޗެއް ވިސްނުނެވެ. އަނެއްކާ ސާރާއަށް ކަމެއްވީބާއެވެ. ނޫނެކެވެ. އެހެންނެއް ނުވާނެއެވެ.

“ކިހިނެއްވީ؟ ކީއްވެ އެއްޗެކޭ ނުބުނެ ތިތިބީ؟ ކޮބާހޭ ސާރާ؟” ހުޒާމް ބަލި އަޑަކުން އަހާލި ނަމަވެސް އެއަޑުގައި ހަރުކަށިކަން އެކުލެވިގެންވެއެވެ.

“ދަރިފުޅާ! އިހަށް ހަމަޖެހިބަލަ. ސާރާ ވީ އޭނަ މަންމަ ބަލިވެގެން ކުއްލި ގޮތަކަށް ރަށަށް ގޮސް. އޭނަ ދަމުން ބުނި ދަރިފުޅަށް ވަރަށް ގިނައިން އޭނަގެ ސަލާމް ބުނެދޭށޭ.” ޝަރީފާ ހުޒާމްއަށް އޮޅުވާލީ އޭނާ ހޭއެރި ވަގުތު އޭނާއަށް ހިތްދަތިކަން ލިބޭނެފަދަ އެއްވެސް ޚަބަރެއް ނުދިނުމަށް ޑޮކްޓަރ އަންގާފައިވާތީއެވެ.

“ރަށަށޭ!؟ އެކަމަކު…” ހުޒާމް ބުނަން އުޅުނު ޖުމްލަ މެދުކަނޑާލިއެވެ.

“އެކަމަކު ކިހިނެއްވީ؟ އޭނަ ރަށަށް ދާނެހެން ހީނުވަނީތަ؟” ޝަރީފާ އެހެން އަހާލުމުން ހުޒާމް ބޯޖަހާލިއެވެ.

“އޭނަވެސް ބުނި ތިމަންނަ ހަނދާން ހުންނަން ފެށީއްސުރެ ދާދި އިހަކަށް ދުވަހާ ޖެހެންދެން ބެލި މީހުންނަށް އެކަހަލަ ގޮތެއް ދިމާވީމަ އެހީތެރިވާންވާނެ ނޫންހޯ. މަންމަވެސް ބުނިން ތީ ރަނގަޅު ވާހަކައެކޭ. ދަރިފުޅަށް ވިސްނޭނެޔޭ.” ޝަރީފާ ވަރަށް މޮޅަށް ވާހަކައެއް ހަދާ ހަމަޖައްސާލިއެވެ. ހުޒާމް އިތުރަކަށް އެކަމާ ބެހޭގޮތުން ސުވާލެއް ނުކުރެއެވެ. ޝަރީފާއާއި ރިޒްނާ އެނބުރި ގެއަށް ދިޔައީ ހުޒާމް ގާތުގައި އަރާމުކޮށްލުމަށް ބުނެފައެވެ. އަދި ފަހުން އަންނާނެ ވާހަކަވެސް ބުނެފައެވެ.

“އަހަރެންނަށް ހަމަ ޔަޤީން ސާރާ ރަށަށް ނުދާނެކަން. އަދި އެވެސް މަންމަ ބަލިވެގެންނޭ ބުނެގެން. އެކަމަކު ކޮންތާކަށްބާ އޭނަ ދާނީ؟ އަނެއްކާ އަހަރެންނަށް މިހެންވީމަ އެކަމުގެ ޒިންމާ އޭނަގެ ބޮލުގައި އަޅުވާފަ ގެއިން ނެރެ އެއްލާލީބާ؟ ނޫން ނޫން. އެހެނެއް ނުވާނެ. އިރާދަކުރެއްވިއްޔާ ސާރާ ހުންނާނީ ހެޔޮ ހާލުގަ.” ހުޒާމް އޭނާގެ ހިތުގައި ވަރުގަދަ ޢަޒުމެއް ކަނޑައެޅިއެވެ. އޭނާ ގަދަވުމުން ސާރާ ހޯދުމެވެ. އެއަށްފަހު އޭނާގެ އަނތްބަކަށް ސާރާ ހެދުމެވެ. މީގެފަހުން އޭނާ އެދެމެދަށް އެއްވެސް ހުރަހެއް އެޅުނަކަ ނުދޭނެއެވެ.

**********

ދުވަސްތައް ފާއިތުވަމުންދެއެވެ. ސާރާއަކަށް އަދިވެސް ހުޒާމްގެ މަތިން ހަނދާން ނައްތައެއް ނުލެވެއެވެ. އޭނާ ރެޔާއި ދުވާލު އެކިއެކި ކަންކަމުގައި މަސްއޫލުވެ އުޅުމަކުންވެސް ހުޒާމްގެ ހަނދާންތަކަކާ ދުރަކަށް ނުދެވުނެވެ. އޭނާ ކިތަންމެ ބޭނުންވިޔަސް ހުޒާމްގެ އަނތްބަކަށްވުމަކީ ވެވޭނެ ކަމެއް ނޫންކަން އޭނާއަށް އެނގެއެވެ. އެހެންކަމުން އޭނާ ބޭނުންވަނީ އޭނާގެ ލޯބި ޤުރުބާން ކުރާށެވެ. ސާރާ ހިފައިގެން އިން ފޮތުގެ ތެރެއިން ހުޒާމްގެ ފޮޓޯގަނޑެއް ނެގިއެވެ. އެއީ ރިޒްނާ ގޮވައިގެން ސިންގަޕޫރަށް ދިޔަ ދަތުރުގައި ނަގާފައިވާ ފޮޓޯއެކެވެ. އޭނާ އެފޮޓޯއަށް ބަލަން އިންއިރު އެދެލޮލުން ހޯސްލާފައި ކަރުނަތައް އޮހެމުން ދިޔައެވެ. އޭނާ މަޑުމަޑުން އެފޮޓޯގަނޑު ގެނެސް އޭނާގެ މޭގައި ޖައްސާލިއެވެ. އެވަގުތު އޭނާގެ ކޮޓަރީ ދޮރުގައި ޓަކި ޖަހާލި އަޑު އިވުނެވެ. އޭނާ ދެލޯ ފޮހެލާފައި ގޮސް ދޮރު ހުޅުވާލިއިރު ދޮރުމަތީގައި ހުރީ އެހޮޓަލުގައި މަސައްކަތްކުރާ ކުއްޖެކެވެ. ކިހިނެއްވީތޯ އަހާލުމުން އޭނާ ދިއްކޮށްލީ ސިޓީ އުރައެކެވެ. އޭނާ އެ ސިޓީ އުރަޔާ ހަވާލުވުމުން އެކުއްޖާ ދިޔައެވެ. އޭނާ އަވަސްއަވަހަށް ކޮޓަރި ތަޅުލާފައި ގޮސް ސޯފާގައި ޖައްސާލިއެވެ. އަދި ސިޓީ އުރަ ކަނޑާ ބަލާލިއިރު އެއީ ފިލްމް ޕްރޮޑިއުސަރެއްގެ ފަރާތުން އައިސްފައިވާ ސިޓީއެކެވެ.

— ސިޓީ —

ސާރާއަށް،

އަހަރެންނަކީ އިންޑިއާގެ ފިލްމް ޕްރޮޑިއުސަރަކީމެވެ. އަހަރެންގެ އާ ފިލްމަށް ބޭނުންވަނީ ޒުވާން އާ ތަރިންނެވެ. އެގޮތުން އަހަރެމެން ހޯދަމުން ދިޔަ ހޯދުންތަކުން އަހަރެމެންނަށް ވަނީ ސާރާ ފެނިފައެވެ. ސާރާއަކީ އެކްޓްކުރުމުގެ ހުނަރު ޤުދުރަތުން ލިބިފައިވާ ވަރަށް ހުނަރުވެރި އެހާމެ ރީތި ކުއްޖެއްކަމަށް އަހަރެމެންގެ ޓީމަށް ފާހަގަކުރެވިފައިވެއެވެ. އެހެންކަމުން އަހަރެންގެ އާ ފިލްމުން ސާރާއަށް ފުރުސަތެއް ދޭން އަހަރެން ބޭނުމެވެ. މިކަމާމެދު ސާރާ އެދޭގޮތެއް އަހަރެންނަށް އަންގާލަދިނުން އެދެމެވެ.

– ޝާހިދު ޚާން (ފްރޮޑިއުސަރ) –

ސިޓީ ކިޔާ ނިމުމާއެކު ސާރާއަށް އުފަލުން ފުމެން ފެށުނެވެ. އޭނާ އަވަހަށް ފޮތުގެ ތެރެއިން ހުޒާމްގެ ފޮޓޯ ނެގިއެވެ. އަދި ހުޒާމްގެ ފޮޓޯއާއި އެވާހަކަ ހިއްސާކުރިއެވެ.

“ޒާމް! މިއަދު އަހަރެން ވަރަށް އުފާވެއްޖެ. ޒާމް ހުރިނަމަ އަދި މިއަށްވުރެވެސް އުފާވީސް. އަހަރެންގެ ހުވަފެން ހަޤީޤަތަކަށް ވާން އުޅެނީހެން ހީވަނީ. އަހަރެން އަބަދުވެސް ބޭނުންވަނީ މަޝްހޫރު ފިލްމީ ތަރިއަކަށް ވާން. އެނގޭތަ؟ މިއަދު އަހަރެންނަށް ފިލްމް ޕްރޮޑިއުސަރެއްގެ ސިޓީއެއް ލިބިއްޖޭ. އޭނަ ދެން ހަދާ ފިލްމުން އަހަރެންނަށް ފުރުސަތެއް ދޭން ބޭނުންކަމަށް ބުނެފަ އޮތީ.”

ސާރާ އެސިޓީގައި އޮތް ފޯނު ނަންބަރަށް ގުޅާލިއެވެ. އޭނާ ކުރިމަތިލާން މިއުޅޭ ކަންތަކުގެ ބޮޑުކަން ހިތަށް އަރާފައި އޭނާ ހުރީ ވަރަށް ފިނިވެފައެވެ. ނަމަވެސް މިއީ ކުޑައިރުއްސުރެ ފެށިގެންވެސް އޭނާ އެންމެ ކުރާހިތްވާ އަދި ދެކެމުން އައި ހުވަފެންކަމަށްވުމުން އޭނާ މިކަން ކުރަންވެސް ބޭނުންވެއެވެ. އިރުކޮޅަކު ރިންގުވުމަށްފަހު އެކޮޅުން ފޯނު ނަގައިފިއެވެ. ފޯނު ނެގީ ސީދާ ޝާހިދު ޚާންއެވެ. އޭނާ ސާރާގެ ހާލު އޮޅުންފިލުވާ އެތައް ވާހަކައެއް ދެއްކިއެވެ. ގާތްގަނޑަކަށް ފަންސަވީހަކަށް މިނެޓު ވާހަކަ ދެއްކުމަށްފަހު ދެމީހުން ފޯނު ބޭއްވީ ބައްދަލުކުރާނެ ތަނަކާއި ގަޑި ހަމަޖައްސާފައެވެ.

ދެދުވަހެއް ފަހެވެ. އާދައިގެ މަތިން ސާރާ އިނީ ވާހަކައިގެ ތެރެއަށް ގެއްލިފައެވެ. މިހާރު ފެންވަރަން ދާންވެސް ދެތިން ފަހަރަކު އުޅެފިއެވެ. އެކަމަކު ކިޔަން އިން ވާހަކަ ފޮތުގެ ޝައުޤުވެރިކަމުން ފޮތް ދޫކޮށްލާފައެއް ނުދެވުނެވެ. ބިރުވެރި ވާހަކައަކަށް ވުމުން އަދި މާބޮޑަށް ޝައުޤުވެރިވިއެވެ. އޭނާ ކިޔަން އިނީ ކިޔަން ފަށާފައި އެއްކޮށް ނިންމާނުލާ ދޫކޮށްލާހިތްވާ ކަހަލަ ވާހަކައެއް ނޫނެވެ. އެއީ ބިރުވެރިކަމުން ފުރިފައިވާ ފާޠިމަތު ނަހުލާގެ މަންޖެ ވާހަކައެވެ. ފޮތް ކިޔަމުން ދިޔައިރު ސާރާއަށް ދޭތެރެ ދޭތެރެއިން ފަރާތް ފަރާތަށް ބަލާލެވެއެވެ. ހަމަ ކައިރީގައި މީހަކު އުޅޭހެން ހީވަނީއެވެ. އެހާވެސް ބޮޑަށް އޭނާއަށް އިނީ ވާހަކައިގެ ތެރެއަށް ވަދެވިފައެވެ. އެހެން އިންދާ ކުއްލިއަކަށް ފޯނުގެ ރިންގު އަޑާއެކު އޭނާ ސިހުނުވަރުން ހަޅޭއްލަވައިގެންފައި ފޮތްވެސް އެއްލިއްޖެއެވެ. ފުން ނޭވައެއްލަމުން އޭނާ މޭގައި އަތްއަޅާލިއެވެ. އަދި ނޭވާ ހަމައަކަށް އަޅުވާލަމުން ފޯނަށް ބަލާލިއިރު ގުޅަނީ ސަލީމްއެވެ. އޭނާ އަވަސްއަވަހަށް ފޯނު ނެގިއެވެ.

“ހެލޯ! ބިޒީތަ؟” ސަލީމް އަހާލިއެވެ.

“ނޫން. ބިޒީއެއް ނޫން. ހަމަ އިނީ.” ސާރާ ބުނެލިއެވެ.

“ތައްޔާރު ނުވަންތަ؟ ބުނީމެއްނު މިއަދު ޝާހިދު ޚާންއާ ބައްދަލުކުރަން ދާންޖެހޭ ވާހަކަ.” ސަލީމް އެހެން ބުނެލުމާއެކު ސާރާ ފުންމައިގެން ތެދުވިއެވެ. ތެދެކެވެ. އޭނާ އެހުރީ އެކަމުގެ މަތިން ހަނދާން ނެތިފައެވެ. ސަލީމް ގުޅިކަން ނަސީބެކެވެ. ނޫންނަމަ މިލިބުނު ފުރުސަތު އޭނާގެ އަތުން ބީވެދިއުން ވަރަށް ގާތެވެ.

“އޭތް. ވަރަށް ބޮޑަށް ތޭންކްސް އިނގޭ. އަހަރެން މިހިރީ ހަނދާންވެސް ނެތިފައޭ. ނަސީބެއް ސަލީމް ގުޅިކަން. ނޫންނަމަ ނޭނގެ ވާނެ ގޮތެއްވެސް. އޯކޭ. މިދަނީ ފެންވަރަން. ފަހުން ގުޅާނަން އިނގޭ.” ސާރާ އެއްނޭވައިން ހުރިހާ އެއްޗެއް ކިޔާލާފައި ފޯނު ބޭއްވިއެވެ. އެވަގުތު ދެންމެގައި ހިނގި ހާދިސާގެ މަތިން ހަނދާންވެ އޭނާ ގާތަށް ވަރަށް ހިނިއައެވެ. ފޮތް ނަގައި މޭޒުމަތީގައި ބާއްވާފައި އަވަސްއަވަހަށް ތުވާލި ހިފައިގެން ފާޚާނާއާ ދިމާއަށް ހިނގައިގަތެވެ.

ފެންވަރައިގެން ނުކުމެ އޭނާ އަލަމާރި ހުޅުވާލިއެވެ. ލާނެ ހެދުމެއް ކަނޑައަޅަން އޭނާއަށް އުނދަގޫވިއެވެ. ވަރަށް ވިސްނާލާފައި އޭނާ ގޮތެއް ނިންމިއެވެ. އޭނާ އަލަމާރިން ނެގީ ގަދަ ދަނބުކުލައާއި ގަދަ ރީނދޫ ކުލައިގެ ދޯޕައްޓާ ހެދުމެކެވެ. ހެދުމުގެ މޭމަތިން ތިރިއަށް މެދުން ފަޅާލާފައިވާއިރު ހެދުމުގެ މޭމަތި ވަނީ އެސްތަކަކުން ޖަރީކުރެވިފައެވެ. ހެދުމުގެ ފަޅާފައިވާ ތަނުގެ ކައިރިމަތި ވަނީ ރޭނދާ އަޅާ ފަރުމާކޮށްފައެވެ. އެ ހެދުމަކީ އޭނާގެ އުފަންދުވަހު ހުޒާމް އޭނާއަށް ދީފައިވާ ހެދުމެކެވެ. އެދެމީހުން އެންމެފަހުން ދުއްވާލަން ދިޔަ ރޭ ސާރާ ލީވެސް އެހެދުމެވެ. ހެދުން ގަޔަށް މަހާލުމަށްފަހު ސާރާ އޭނާގެ ދިގު އިސްތަށިގަނޑުގައި ފުނާ އަޅާލާ އޮމާންކޮށްލިއެވެ. އެއަށްފަހު ލުއި މޭކަޕެއް ކޮށްލިއެވެ. ހިތްހަމަޖެހޭވަރަށް ތައްޔާރުވެވުމުން ގަޑި ބަލާލިއިރު ހަވީރު ހަތަރެއް ޖަހަން ފަނަރަ މިނެޓަށްވީއެވެ. ޝާހިދުއާ ބައްދަލުކުރަން ދާންޖެހެނީ ހަތަރުގަޑި ފަނަރައަށެވެ. އޭނާ ދާންޖެހޭ ތަނަކީ ވަރަށް ދުރު ތަނަކަށްވުމުން އޭނާ އަވަސްއަވަހަށް ދާންވެގެން ނުކުތެވެ.

ބޭރަށް ނުކުމެފައި އޭނާ ސަލީމްއަށް ގުޅާލިއެވެ. ދެތިން ފަހަރަކު ގުޅާލިފަހުން ސަލީމް ފޯނު ނެގިއެވެ. އަދި ބިޒީކަމަށް ބުނެލިއެވެ. އެއަށްފަހު ސާރާއަށް ކާމިޔާބަށް އެދޭ ވާހަކަ ބުނެފައި ފޯނު ބޭއްވިއެވެ. ސާރާ އަވަހަށް މަގުމައްޗަށް ނުކުމެ އޮޓޯއެއް ނަގައިގެން އޭނާގެ މަންޒިލަށް ދަތުރު ފެށިއެވެ. އޭނާ އިނީ ފިނިވެފައެވެ. އޭނާއަށް މިކަން ކާމިޔާބު ވާނެބާއެވެ. ޝާހިދު ބުނެފައިވާ ގޮތުގައި އޭނާއަށް ސާރާ ފެނުނީ އޮޑިޝަންއަކަށް އިޢުލާންކުރަން ތައްޔާރުވަމުން ދަނިކޮށެވެ. ނަމަވެސް ސާރާ ފެނުމުން އޭނާ އޮޑިޝަންގެ ކަންތައް ފަސްކޮށްލީއެވެ. ސާރާ ފިލްމަށް އެއްބަސްވެއްޖެނަމަ އޮޑިޝަންއަކާނުލާ ތަރިން ހަމަޖެހޭނެއެވެ. ނޫންނަމަ ތަރިން ހޮވާނީ އޮޑިޝަންއަށްފަހު ކަމަށްވެސް އޭނާ ބުނެފައިވެއެވެ.

ބައްދަލުކުރަން ހަމަޖެހިފައިވާ ތަނަށް އާދެވުމުން ސާރާ ޝާހިދަށް ގުޅާލިއެވެ. އަދި އޭނާ އެތަނުގައި ހުރިކަމަށް ބުންޏެވެ. އިރުކޮޅެއްނުވެ ބޮޑު ބަނޑެއްލާފައި ހުރި ފަލަފަލަ ފިރިހެނަކާއި އާދައިގެ އިސްކޮޅެއް ހުރި ޖާނުން ވަރުގަދަ ފިރިހެނަކު ނުކުތެވެ. ފަލަ މީހާއަށް އާދައިގެ ވަރަށްވުރެ ކަޅު ހަންގަނޑެއް ލިބިފައިވާއިރު ބޮލުގައި އެންމެ އިސްތަށްޓެއްވެސް ނެތެވެ. ބަލާބެލުމަށް އޭނާގެ އުމުރު ސާޅީހަށްވުރެ މައްޗަށް ގޮސްދާނެހެނެއް ހިއެއްނުވެއެވެ. ދެން ހުރީ ޔޫރަޕްގެ ދޮންކަން ލިބިފައިހުރި ބައިމަތި ފުޅާ ރީތި ޒުވާނެކެވެ. ވަރުގަދަ އިސްތަށިގަނޑު ރީތި ގޮތަކަށް ކޮށާލާފައިވާއިރު އަޅާފައި ހުރި ހެދުމުން އެއީ އެފަލަ މީހާގެ ބޮޑީގާރޑްކަން އެނގެއެވެ. އެހެންކަމުން އެ ފަލަ މީހާއަކީ ޝާހިދު ޚާންކަން ސާރާއަށް ދެނެގަނެވުނެވެ.

“އައްސަލާމް ޢަލައިކުމް! މީ ޝާހިދު ޚާން.” ސަލާމަށް އަތް ދިއްކޮށްލަމުން އެފަލަ މީހާ ތަޢާރަފުވެލީ އިނގިރޭސި ބަހުންނެވެ.

“ވަޢަލައިކުމުއްސަލާމް! މީ ސާރާ.” ސާރާވެސް ތަޢާރަފުވެލިއެވެ.

“ހިނގާ އެތެރެއަށް.” ޝާހިދު އެތެރެއަށް އިޝާރާތްކުރަމުން ބުނެލިއެވެ. ސާރާ ކިޔަމަންތެރިކަމާއެކު އޭނާގެ ފަހަތުން އެތެރެއަށް ވަތްއިރު އޭނާގެ އަތްފައި ފިނިވެގެން ހީވަނީ ގަނޑު ފެންކޮޅެއްހެންނެވެ. އެތެރެއަށް ވަންނަމުންދިޔަ ވަރަކަށް އޭނާއަށް އެނގެމުން ދިޔައީ އެއާދެވުނީ ސްޓޫޑިއޯއަކަށްކަމެވެ. އޭރު އެކި މީހުން އެކި މަސައްކަތުގައި އުޅޭތަން ފެނެއެވެ. ޝާހިދު އެތަނުގެ ނަން ބުނިއިރު އޭނާއަށް އެއީ ސްޓޫޑިއޯއެއްކަން ނުވިސްނުނީ ކީއްވެ ހެއްޔެވެ؟ ސާރާގެ ހިތަށް އެރިއެވެ. ކޮންމެއަކަސް މިއޮތީ މިތަނަށްވެސް އާދެވިފައިތާއެވެ. އެތަނުގައި މަސައްކަތްކުރަމުން ދިޔަ ޓީމަށް ބަލާލުމުން އޭނާ ހައިރާންވިއެވެ. ގައިމުވެސް ފަންސާހަކަށް މީހުން އެވަގުތުވެސް އެތާގައި މަސައްކަތުގައި އުޅޭނެއެވެ. ރާއްޖެއާއި މުޅިން ތަފާތެވެ.

ސާރާއަށް ހީވީ މިއުޅެވެނީ ހުވަފެނެއްގައިހެންނެވެ. އޭނާ ޔަޤީންކޮށްލުމަށް އަތުގައި ވިކައިވެސްލިއެވެ. ނޫނެކެވެ. ހުވަފެނެއް ނޫނެވެ. ހަމަ ހަޤީޤަތެކެވެ. ޝާހިދު ގޮސް ވަނީ ބޮޑު ކޮޓަރިއަކަށެވެ. އެއީ މީޓިންގ ރޫމެވެ. ޝާހިދު، މޭޒުގެ ކޮޅުގައި ހުރި ގޮނޑީގައި އިށީންނަމުން ސާރާއަށް އިށީނުމަށް އިޝާރާތްކޮށްލިއެވެ. ސާރާ ކިޔަމަންތެރިކަމާއެކު ގޮނޑީގައި އިށީނދެލިއެވެ.

“ޕާރޕެކްޓް!” ޝާހިދު ބުނެލިއެވެ. ޝާހިދު އެހެން އެބުނީ ކީއްވެކަމެއް ސާރާއަކަށް ނޭނގުނެވެ. އެހެނެއްކަމަކު އެއީ ކީއްވެތޯ އަހާލާކަށް އޭނާއަކަށް ނުކެރުނެވެ. ފުރަތަމަ ފަހަރުކަމަށްވުމުން އޭނާ އިނީ ފިނިވެފައެވެ. ޝާހިދަށް ސާރާގެ ނުތަނަވަސްކަން ފާހަގަވިއެވެ. އެހެންކަމުން ޝާހިދު، ފުރަތަމަ ސާރާގެ ނުތަނަވަސްކަން ކަނޑުވާލަން ފިލްމުގެ ވާހަކައެއް ނުދައްކައެވެ. އޭނާގެ ހާލު އޮޅުންފިލުވާލާފައި ފޯނުން މީހަކަށް ގުޅާލިއެވެ. އަދި މީޓިންގ ރޫމަށް ކޮފީއާއި ހެދިކާ ގެނައުމަށް ބުންޏެވެ.

ފޯނު ބޭއްވުމަށްފަހު ޝާހިދު ސާރާގެ ދިރިއުޅުމުގެ ބައެއް ކަންތައްތަކާ ބެހޭގޮތުން ސުވާލުކުރިއެވެ. މީހަކާ އިނދެގެންތޯ ނޫނީ ކުއްޖަކާ ރައްޓެހިވެގެންތޯ އަހާލުމުން ސާރާއަށް ފުރަތަމަ ވިސްނުނީ މުޅިން އެހެން ގޮތަކަށެވެ. އެއަށް ޖަވާބެއް ނުދީ އިރުކޮޅަކު މަޑުކޮށްލުމުން ޝާހިދު އެސުވާލު ކުރި ސަބަބު އޮޅުންފިލުވައިދިނެވެ. އޭނާ އެސުވާލު ކުރީ ސާރާ މީހަކާ އިނދެގެން އުޅޭނަމަ ފަހަރުގައި ފިރިމީހާ ނުޤަބޫލުވުންފަދަ ކަމެއް ދިމާވެދާނެތީކަމަށް ބުންޏެވެ. ސާރާ އޭނާގެ އެކަހަލަ އެއްވެސް މީހަކު ނެތްކަމަށް ބުންޏެވެ. ތަޢުލީމީ ދުވަސްވަރު ތަމްސީލު ކުޅުން ކަހަލަ ކަމެއް ކުރިންތޯ ސާރާ ގާތު ޝާހިދު އަހާލުމުން ސާރާ ނޫނެކޭ ބުނެލިއެވެ.

ސާރާއަށް ހީކުރެވުނީ އޭނާ އެހެން ބުނުމުން އޭނާއަށް ޝާހިދުގެ އާ ފިލްމުން ފުރުސަތު ނުލިބޭނެ ކަމަށެވެ. ނަމަވެސް ކަންތައްވީ އޭނާއަށް ހީކުރެވުނު ގޮތަކަށް ނޫނެވެ. ޝާހިދު އޭނާގެ އާ ފިލްމުން ސާރާއަށް ފުރުސަތު ދިނުމުން ސާރާއަށް ވަރަށް ބޮޑު އުފަލެއް ލިބުނެވެ.

“ސާރާއަކީ ޤުދުރަތުން ވަރަށް ފުރިހަމައަށް އެކްޓިންގ ހުނަރު ލިބިފަ ހުރި ކުއްޖެއް. ސާރާއަށް މިދާއިރާއިން ކުރިމަގު އެބައޮތް. އެކަން އަހަރެން ބެލި އެންމެ ވީޑީއޯއަކުންވެސް ޔަޤީންވެއްޖެ.” ޝާހިދުގެ އެންމެފަހު ޖުމްލައިން ސާރާ ވަރަށް ހައިރާންވިއެވެ. އޭނާއަކީ ކުރިން ދުވަހަކުވެސް އެކްޓްކުރި މީހެއް ނޫންވިއްޔާއެވެ. ދެން ޝާހިދު އެ ދައްކަނީ ކޮން ވީޑިއޯއެއްގެ ވާހަކައެއްބާއެވެ. ސާރާ ހައިރާންވެފައި އިނުމުން ޝާހިދު އޭނާގެ ލެޕްޓޮޕް ހުޅުވާލާފައި އަޅުވާލީ ވީޑިއޯއެކެވެ. ސާރާ އިނީ ބުނާނެ އެއްޗެއް ނޭނގިފައެވެ. އެއީ އޭނާ ޕާކުގައި ވާހަކަ ކިޔަން އިން ދުވަހުގެ ވީޑީއޯއެކެވެ. އޭނާ ގެއަށް ދާން ތެދުވި ވަގުތު އޭނާއަށް މީހަކު ގަސްތަކާ ނިވާވިތަން ފެނުނެވެ. އެވީޑިއޯއަކީ އެމީހާ ކުރި ވީޑީއޯއެއްބާއެވެ. އެއީ ކާކުބާއެވެ. އެއީ ކޮންމެ މީހަކަށްވިޔަސް އެމީހާއަށް ހިތުގެ އަޑިން ޝުކުރު އަދާކުރިއެވެ. އޭނާގެ ހުވަފެނުގައި ކުލަޖެއްސުމަށް އެހީތެރިވެދިނީތީއެވެ. ސަޔަށް އިންސާފުކުރަމުން ދިޔައިރު ޝާހިދު ސާރާއަށް ފިލްމުގެ ކުރު ޚުލާސާއެއް ކިޔައިދިނެވެ. އަދި އެފިލްމުގައި ސާރާގެ ގައިގޯޅި އެއްވެސް މަންޒަރެއް ނުހިމެނޭނެކަމުގެ ޔަޤީންކަންދިނެވެ. އެހެންކަމުން ސާރާ އެފިލްމާ ނުހަނު ގަޔާވިއެވެ. އެދުވަހުގެ ބައްދަލުވުން ނިންމާލީ ސާރާ އެފިލްމަށް އެއްބަސްވެ ދެން ބައްދަލުކުރާނެ ދުވަހެއް ކަނޑައެޅުމަށްފަހުގައެވެ.

**********

ހުޒާމްގެ ހާލު މަޑުމަޑުން ރަނގަޅުވަމުން އާދެއެވެ. ނަސީބު ރަނގަޅުކަމުން ހުޒާމްގެ ހަނދާނަކަށް އެއްވެސް އަސަރެއް ނުކުރެއެވެ. މަސްދުވަސް ވަންދެން ކޯމާގައި އޮތުމުގެ ސަބަބުން ހިކިފައިވާ ހަށިގަނޑުގެ ރޫފަ މަޑުމަޑުން ރަނގަޅުވަމުން އާދެއެވެ. މަދުމަދުން މޫނުމަތިން ހިނިތުންވުން ފެންނަމުންދެއެވެ. މޫނުމަތިން ހިނިތުންވުން ދައްކައިގެން ހުރިނަމަވެސް އޭނާގެ ހިތް ރޮމުންދާކަން އެނގޭނީ ކާކަށް ހެއްޔެވެ؟ ހުޒާމް ކުރީގެ ހާލަތަށް ރުޖޫޢަވަމުން އަންނާތީ ރިޒްނާ ހުންނަނީ ހިތްހަމަޖެހިފައެވެ. އޭނާ ސާރާގެ ވާހަކަ ނުދައްކާތީ ރިޒްނާއަށް ލިބޭ އުފާ ދެގުނައެވެ. އެހެންކަމުން އޭނާގެ ހިތުގައި އުއްމީދުގެ ހުޅުކޮޅު ރޯވަމުން ދިޔައެވެ.

ހުޒާމް ރަނގަޅުވަމުން އަންނާތީ އުފާވިއެއްކަމަކު ޝަރީފާ ހުންނަނީ ނުތަނަވަސްވެފައެވެ. ހުޒާމްގެ ހިތުގެ ހާލަތު އޭނާއަށް އެނގެއެވެ. ހުޒާމްގެ ހިތުގެ ރިހުން އޭނާއަށް އިހުސާސްކުރެވެއެވެ. ހުޒާމްއަކީ އޭނާ ބަނޑުއަޅާ ވިހޭ ދަރިއަކަށް ނުވިޔަސް އޭނާ ހުޒާމްދެކެ ލޯބިވަނީ އަމިއްލަ ދަރިއަކުދެކެވެސް މަޔަކު ވާނެފަދަ މަތިވެރި ލޯތްބެކެވެ. ސާރާގެ މައްޗަށް ހުޒާމްގެ ހިތުގައިވަނީ ހަމައެކަނި ހަމްދަރުދީ ނޫންކަން އޭނާއަށް ރަނގަޅަށް އެނގެއެވެ. އޭނާ ބޭނުންވަނީ ހުޒާމް ލޯބިވާ ކުއްޖާ ހުޒާމްއަށް ލިބޭށެވެ. އެހެންކަމުން އޭނާ ހުޒާމްއާ އެވާހަކަ ދައްކަން ނިންމިއެވެ. ނަމަވެސް އޭނާއަށް ހުޒާމްއާ މިނިވަންކަމާއެކު ވާހަކަދައްކާލެވޭނެ ފުރުސަތެއް ލިބުނީ އޭގެ ދެދުވަސް ފަހުންނެވެ.

ހުޒާމް ގެއަށް އައީ ހަވީރު ހަތަރެއް ޖެހި ފަހުންނެވެ. އޭރު ރިޒްނާ ގެއަކު ނެތެވެ. ޝަރީފާ އިނީ ސޯފާގައި ޚިޔާލަކަށް ގެއްލިފައެވެ. ސޯފާ ހުރީ ދޮރާއި ފުރަގަސްވާ ގޮތަށްކަމަށްވެފައި ޝަރީފާ ވިސްނުމަކަށް ގެއްލިފައި އިނުމުގެ ސަބަބުން ހުޒާމް އައިކަމެއް އޭނާއަކަށް ނޭނގެއެވެ. ހުޒާމް މަޑުމަޑުން އައިސް ޝަރީފާގެ ކޮނޑުގައި އަތް ބާއްވާލިއެވެ. އެޔާއެކު ސިހިފައި ޝަރީފާ ބަލާލިއެވެ. އަދި ހުޒާމް ފެނުމާއެކު ގަދަކަމުން ހިނިތުންވެލިއެވެ.

“މަންމާ! ކިހިނެއްވެފަ ތިއިނީ؟” ހުޒާމް އަހާލިއެވެ.

“މިދެން މާބޮޑު ކަމެއްނުވޭ. ހަމަ އިނީ.” ޝަރީފާއަކަށް ހުޒާމް ގާތު ސާރާގެ ވާހަކަ ދައްކަން ފަށާނެ ގޮތެއް ނޭނގުނެވެ.

“އެހެން ނުވާނެ. ކޮންމެވެސް ކަމެއްވެއްޖެ. ބުނެބަލަ އަހަރެން ގާތު.” ހުޒާމް އައިސް ސޯފާގައި އިށީނދެލަމުން ބުނެލިއެވެ.

“މީ.. ދަރިފުޅު މިހާރަކަށް އައިސް ކަމަކާ ވަރަށް ވިސްނާކަން މަންމައަށް ފާހަގަކުރެވޭ. އެހެންވެ އެކަމާ މި ވިސްނެނީ. މަންމަ ގާތު ބުނެބަލަ. ކޮންކަމަކާތަ މާބޮޑަށް ތި ވިސްނަނީ؟” ޝަރީފާ އެހެން ބުނެލުމުން ހުޒާމް ޝަރީފާއަށް ބަލާލިއެވެ. އޭނާގެ ކޮންމެ އިހުސާސެއް ޝަރީފާއަށް ދެނެގަނެވެއެވެ. ލޭގެ ގުޅުމެއް ނެތްނަމަވެސް އެއީ ދަރި ކުލުނު ޖެހުމުން ވާގޮތެއްކަން ޔަޤީނެވެ.

“މި ވިސްނެނީ ސާރާއާ ދޭތެރޭ. އޭނަ ދެން އަންނާނެބާއޭ މި ހިތަށް އަރަނީ.” ހުޒާމް ހަޤީޤަތް ހާމަކުރިއެވެ.

“މަންމައަށްވެސް ވަރަށް ވިސްނޭ ސާރާއާ ދޭތެރޭ. އޭނަ ކުއްލިއަކަށް ގެއިން ނުކުމެގެން ދިއުމާއި ދިޔަ ތަނެއް ނުބުނުމާ މިކަހަލަ ކަންތައްތަކުން މަންމައަށް ހީވަނީ ކޮންމެވެސް ގޯހެއް އެބަ އުޅޭހެން.” ޝަރީފާ އެހެން ބުނެލުމުން ހުޒާމް ބަލާލީ ހައިރާންކަމާއެކުގައެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.