ބީރައްޓެހިޔާ 2

އޭނާ އެގެޔަށް ބަދަލުވުމަށްފަހު ވަރަށް ގަދަޔަށް މަސައްކަތްކުރިއެވެ. ފުރާޅު މަރާމާތުކޮށް ތެޅިފައި ހުރި ކުޑަދޮރުތައްވެސް އާކުރިއެވެ. ކުލަލާ، ގެ ޒީނަތްތެރިކުރިއެވެ. ގެ މުޅިން ބަދަލުކޮށްލިއެވެ. އަވަށުގެ މީހުން މިކަމާ ތިބީ ވަރަށް ހައިރާންވެފައެވެ.
އެކާވީސް ޑިސެމްބަރު ވީ ހޯމަދުވަހުގެ ހެނދުނު އަވަށުގެ މީހުންނަށް އެގޭގެ ބޭރުގައި ބޮޑު އަކުރުން ‘ދަ ކޯނަރ ޝޮޕް- ޑޭވް ސްޓެޓިން’ ލިޔެފައި ވަނިކޮށް ފެނުނެވެ. އެމީހުންނަށް އެކަން ޤަބޫލެއް ނުކުރެވުނެވެ. ވުޑެންޑުގައި ފިހާރައެއް ހުޅުވަނީ ހެއްޔެވެ؟ ހުރިހާ އެންމެންވެސް އެކަމާ ބެހޭގޮތުން ވާހަކަދެއްކިއެވެ.
އެއްފަހަރަކު ވުޑެންޑުގައި ފިހާރައެއް ހުޅުވިއެވެ. އެކަމަކު މީގެ ވިހިއަހަރު ކުރިން އެތަން ވަނީ ބަންދުކޮށްފައެވެ.
ބައެއް މީހުން ފިހާރަ ހުޅުވަން ތާއީދުކުރިއިރު އަނެއްބައި މީހުން އެކަމާ ދެކޮޅުހެދިއެވެ.
އަވަށުގެ ހޯލުގައި އެރޭ އެމީހުން ބައްދަލުކުރިއެވެ. ހުރިހާ އެންމެންވެސް އެތަނުގައި ތިއްބެވެ. ހުޅުވަން އުޅޭ އާ ފިހާރައާމެދު އެންމެންވެސް ތިބީ ޝައުޤުވެރިވެފައެވެ.
“ކޯނަރ ޝޮޕް ހުޅުވުމަކީ ހަމަ ވަރަށް ރަނގަޅު ޚިޔާލެއް.” ކޮންމެވެސް މީހަކު ބުންޏެވެ. “އަހަރެމެންނަށް ކޮންމެހެންވެސް ބޭނުންވޭ ފިހާރައެއް. އޭރުން ލިޑްނީއަށް ދާކަށް ނުޖެހޭނެ.”
“އަހަރެން އެއްބަސް. އަވަށުގަ ފިހާރައެއް ހުރުމަކީ ރަނގަޅު ކަމެއް. މިތަން މާ މަޑުމައިތިރި. ކަމެއް ނެތް. ވުޑެންޑަށް ފިހާރައެއް ބޭނުންވޭ.” މިސަޒް ހެރީސަން ވާހަކަދެއްކިއެވެ. އޭނާ ޑޭވް ސްޓެޓިންދެކެ ގަޔާވެއެވެ.
“ބޭކާރު ވާހަަކަ ނުދައްކާ!” މިސް ބްރައުން ބުންޏެވެ. އޭނާއަކީ އަވަށުގެ ސްކޫލުގެ ޓީޗަރެކެެވެ. “ލިޑްނީ ހުރީ މާ ދުރަކު ނޫން. އެތަނުގަ ވަރަށް ގިނަ ފިހާރަތައް އެބަހުރި.”
އިރުކޮޅެއް ނުވެ އެންމެން އަޑުގަދަކުރަން ފެށިއެވެ.
މިސްޓަރ ހާޓް ކޮޅަށް ތެދުވެ ވާހަކަދެއްކިއެވެ. އޭނާއަކީ ބިޔަކޮށް ހުންނަ، އަޑުވެސް ގަދަ މީހެކެވެ.
“ހުރިހާ އެންމެން އަޑުއަހާ!” އޭނާ ހަޅޭއްލަވައިގަތެވެ. “މީގެ ކުރިން މިއަވަށުގަ ހަމަނުޖެހުމެއް ނުހިނގާ. އަހަރެމެން އަބަދުވެސް އުފަލާ އަމާންކަމުގަ އުޅުނީ. މިހާރު މިފިހާރައަކާ ހެދި ހަމަޖެހުން ނަގާލައިފި.”
“މިސްޓަރ ސްޓެޓިނަށް ވާހަކަދެއްކުމުގެ ފުރުސަތު ދީ.” ކޮންމެވެސް މީހަކު އެދުނެވެ. “އެއީ އޭނަގެ ފިހާރަ. އޭނައަށް ވާހަކަދެއްކުމުގެ ފުރުސަތު ދީ.”
“ހުރިހާ ބޭފުޅުން.” މިސްޓަރ ސްޓެޓިން ވާހަކަދައްކަން ފެށިއެވެ. “އަހަރެން ބޭނުމެއްނޫން އެއްވެސް ހަމަނުޖެހުމެއް ހިންގާކަށް. އަހަންނަކީ އަދިވެސް ބީރައްޓެއްސެއް މިއަވަށުގަ. އެކަމަކު އަހަރެން ބޭނުން ކަލޭމެންގެ މީހަކަށް ވާން. އަހަރެން ބޭނުން ކަލޭމެންގެ ރައްޓެއްސަކަށް ވާން. ވުޑެންޑުގެ މީހުންދެކެ އަހަރެން ގަޔާވަން.” އޭނާ ހިނިތުންވެލިއެވެ. އަދި ބައެއް މީހުން އަތްޖެހިއެވެ. އެމީހުން އޭނަދެކެ ގަޔާވެއެވެ.
“ކޯނަރ ޝޮޕް ބައިވަރު އެއްޗެހި ވިއްކާނެ.” މިސްޓަރ ސްޓެޓިން ކުރިއަށް ގެންދިޔައެވެ. “އަހަރެން ކާއެއްޗެހި ކަހަލަ އެއްޗެހި ވިއްކާނަން. ހުރިހާ އެއްޗެއްވެސް އަގުހެޔޮވާނެ. އަހަރެން ވައުދުވަން.”
ހުރިހާ އެންމެން ތިބީ ކަނުލާ އަޑުއަހާށެވެ.
“އަދި އެހެން ޚިޔާލެެއްވެސް އެބައޮތް.” ޑޭވް ބުންޏެވެ. “މިއަވަށުގެ އެއްޗެހި އަހަރެން ވިއްކާނަން.”
“މިއަވަށުގެ އެއްޗެހި ތި މާނަކުރަނީ ކިހިނެއް؟” މިސް ބްރައުން އެހިއެވެ.
“އަހަރެން ބުނެދޭނަން، މިސް ބްރައުން. އަހަންނަށް އެނގޭ މިސް ރީތި ކޭކުތަކާއި ޕާން ތައްޔާރުކުރާކަން.” ޑޭވް ބުންޏެވެ.
މިސް ބްރައުން ހީލިއެވެ. އެންމެންނަށްވެސް މިސް ބްރައުން ތައްޔާރުކުރާ އެއްޗެހި އެނގެއެވެ.
“އަދި މިސްޓަރ ހާޓް، އަހަންނަށް ފެނުނު މިސްޓަރގެ މާތައް. ކަލޭ ވަރަށް ރީތި މާތައް ހައްދަމެއްނު.”
މިހާރު މިސްޓަރ ހާޓް ހިނިތުންވެލިއެވެ. އާނއެކެވެ. އޭނަގެ މާތައް ރީއްޗެވެ. ހުރިހާ އެންމެންނަށްވެސް އެކަން އެނގެއެވެ.
“އަދި މިސްޓަރ އެވެރެޓް ޕޮޓް ހަދާ.” ކޮންމެވެސް މީހަކު ބުންޏެވެ.
“މިސަޒް ޑޭވީސް ކުޅޭ ބުދު ހަދާ.” އަނެކަކު ބުންޏެވެ.
“އަދި އަހަރެން މިއަވަށުގެ ކުރެހުންތައް ކުރަހަން.” މުސްކުޅި މިސް ލޫސީ ގްރޭ ބުނެލިއެވެ.
“އާނ. ކަލޭމެންކުރެ ކޮންމެ މީހަކަށްވެސް ކޮންމެވެސް ކަމެއް ކުރެވިދާނެ. ކަލޭމެން ވަރަށް ބޯ ރަނގަޅު. ކަލޭމެން ބައިވަރު އެއްޗެހި ހަދާ. އެއްޗެހި ފަތުރުވެރިންނަށް ވިއްކިދާނެ. ހޫނު މޫސުމުގަ ވުޑެންޑަށް ބައިވަރު ފައިސާ އެތެރެކުރެވިދާނެ.” ޑޭވް ބުންޏެވެ.
“އެކަމަކު ފައިސާއަށް ހަދާނީ ކިހިނެއް؟” މިސްޓަރ ހާޓް އެއްސެވެ. “ކިހިނެއް ކަލޭ އަހަރެމެންނަށް އަގު އަދާކުރާނީ؟”
“ރަނގަޅު ސުވާލެއް.” ޑޭވް ބުނެލިއެވެ. “އަދި މިއޮތީ ޖަވާބު. ކަލޭމެންގެ އެއްޗެހި އަހަރެންނާ ހަވާލުކުރީމަ އަހަރެން އެއްޗެހި ކަލޭމެންނަށް ވިއްކަދޭނަން. އަހަރެން އޭގެން ބައެއް ނަގާފަ ދެން ހުރި ފައިސާ ކަލޭމެންނަށް.”

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.