ނުހައްޤު ލޯބި (7 ވަނަ ބައި)

އޭނާ ހަަމަ އެ މަސައްކަތްކުރަނީ ޝިޔާމެންނަށްޓަކައި ނޫން ހެއްޔެވެ؟ މިކޮޅަށް އައިސް އޭނާ ޝިޔާމެންނާ ގުޅާލި އެންމެ ފުރަތަަމަ ދުވަހު ވެސް އޭނާގެ ހިތް ރޮއްވާލާފިއެވެ. އޭރުވެސް އެއްކަލަ ކުދިންތައް ދިއައީ ރާހުލް އަށް ބަލަބަލާފައި މަލާމާތްކުރަމުންނެވެ. އޭނާގެ ހިތަށް އަރަމުންދިއައެވެ. ހުސް އެއްކަހަލަ ބައެކެވެ. އޭނާގެ އެއްވެސް އިހުސާސެއް ދެނެނުގަނެވޭ ބައެކެވެ. އެވަގުތު އޭނާގެ ދެލޯ ފެންކަޅިވެގެން ދިއައީ އޭނާގެ އަމިއްލަ އިޚުތިޔާރުން ބޭރުގައެވެ. ޝިޔާ ވާހަކަ ދައްކަ ދައްކައި ހުއްޓާ އޭނާ ފޯނު ކަނޑާލިއެވެ. އަދި ގެއަށް ދާން ހިނގައިގަތް ވަގުތު އޭނާގެ ކޯތާފަތް މައްޗަށް ހޫނު ކަރުނަތައް ފައިބައިގަތެވެ. އަތުގެ ނުފުށުން ކަރުނަތަށް ފުހެލަމުން އޭނާ ހިނގައިގަތް ވަގުތު އެތަނުން ކުއްޖެއް ގޮވާލި އަޑު އިވުނެވެ. “ކަލޯ… ބިޓު ކެޓީތަ؟” ނަމަވެސް ރާހުލް އަޅާވެސް ނުލައި ހިނގަމުން ދިއައެވެ. އެ ބަސްތަކުން އޭނާ އިތުރަށް ދެރަވާގޮތް ވިއެވެ. އޭނާ ހިނގުން ބާރު ކޮށްލީ އަވަހަށް ގެއަށް ދިއުމުގެ ނިޔަތުގައެވެ.

އެދުވަހަހު ރާހުލްގެ މޫޑު ހުރީ އެއްކޮށް ކަހަލަ ގޮތަކަށް ސަކަރާތްވެފައެވެ. އާމިނާ ކަމެއް ކުރަން ބުނުމުންވެސް އޭނާއަށް އެކަމުގައި އުޅެވެނީ ނުލާހިކު ކަންނެތްކަމާ އެކުގައެވެ. އޭނާ ހަމަ އެއްވެސް ކަމެއް ކުރާ ހިތް ނެތީއެވެ. އޭނާގެ ހަރަކާތްތައް ހުރި ގޮތުން އާމިނާ ދެތިން ފަހަރު އޭނާއާ ދިމާއަށް އެއްޗެހި ވެސް ކިޔެވެ. ނަމަވެސް އޭނާގެ ހަރަކާތްތަކަކަށް ބަދަލެއް ނައެވެ. އޭނާ ހުރީ އެއަށްވުރެ މާ ބޮޑަށް ދެރަވެފައެވެ.

އާދައިގެން މަތިން އެ ދުވަހު މެންދުރުފަހު ރާހުލް އުޅުނީ ގޭތެރެ ކުނި ކަހައި މޮއްޕު ލުމުގެ މަސައްކަތުގައެވެ. އެގޭގެ ބާކީ ހުންނަ ތިން ކޮޓަރީގައި އެއްވެސް މީހަކު ނޫޅުނު ނަމަވެސް ކޮންމެ ދުވަހަކު އާމިނާ އޭނާއަށް އެހުރިހާ ތަނެއް ސާފުކުރަން ޖައްސައެވެ. ރާހުލް އާމިނާމެން ކޮޓަރި ސާފުކޮށް ނިންމާލުމަށްފަހު އޭނާ ހިނގައިގަތީ ޖެހިގެން ހުރި ކޮޓަރިއާ ދިމާއަށެވެ. އޭނާއަށް އެކޮޓަރީގައި އެއްވެސް މީހަކު ނޫޅޭކަން އެނގޭތީވެ، އޭނާ ދޮރު ހުޅުވާލީ ޓަކި ނުޖަހައެވެ. އިސްޖަހައިގެން ދޮރު ހުޅުވާލި ރާހުލް ކޮޓަރިއަށް ވަންނަން އެތެރެއަށް ބަލާލި ވަގުތު އޭނާއަށް ފެނުނު މަންޒަރަކުން އޭނާގެ ހުރިހާ ހިއްސުތައް ގަނޑުކޮށްލި ކަހަލައެވެ. ދެއަތުން ފިހިގަނޑު ހިފަހައްޓައިގެން އޭނާ އެދިމާއަށް ބަލަހައްޓައިގެން ހުރީ އާޝޯޚުވެފައެވެ.

ރާހުލްގެ ލޮލުގައި އެންމެ ފުރަަތަމަ ވެސް އަޅައިގަތީ ދޮން ދޮން ދެފައެވެ. އޭނާގެ ހަށިގަނޑު ނިވާކުރެވިފައި ވަނީ މެއާ ހިސާބުން އޮޅާލެވިފައިވާ ފިޔާތޮށި ކުލައިގެ ތުވާއްޔަކުންނެވެ. އެއްއަތުން އެ ތުވާލީގައި ހިފަހައްޓާލައިގެން ހުރި އިރު އޭނާގެ މަޑު މުށި ކުލަ ޖައްސާލެވިފައިވާ އިސްތަށިގަނޑުން ފެންތިކިތައް ވިދާ ބަބުޅަމުން ދިއައެވެ. އުނަގަނޑާ ހަމައަށް އަރާ އެ އިސްތަށިގަނޑުން ފެންތިކިތައް ތަޅުންގަނޑަށް ފައިބަމުން ދިއައެވެ. ރާހުލް ދޮރު ހުޅުވާލި އަޑު އިވުމުންކަންނޭނގެއެވެ. އޭނާ ދޮރާ ދިމާއަށް ބަލާލާފިއެވެ. އެވަގުތު އެ މުށި ކުލައިގެ ދެލޮލުގައިވާ ރީތި ވިދުވަރުން ރާހުލްގެ ހިތް ކަތިލާލި ކަހަލައެވެ. ނޭވާ ހިފަހައްޓާލައިގެން އޭނާއަށް އެ ރީތި ޖިންސުއްލަތީފާ ދިމާއަށް ބަލަން ހުރެވުނީ އޭނާގެ އަމިއްލަ އިޚުތިޔާރުން ބޭރުގައެވެ.

ރާހުލް އަށް ހޭވެރިކަމެއްވީ އެ އަންހެން ކުއްޖާ މެއާ ދިމާއިން އަތް ހުރަސްކޮށްލަމުން ތޫނު އަޑަކުން ހަޅޭއްލަވައިގަތުމުންނެވެ. ރާހުލް ތެޅިގަނެފައި އަވަސް އަވަހަށް ދޮރު ޖަހާލަމުން އެތަނުން ނިކުތެވެ. އޭނާއަށް ކުރެވުނު ކަންތަކާމެދު ދެރަވެ ލަދުގަތެވެ. އޭރު އެ އަންހެން ކުއްޖާ ހަޅޭއްލަވާ އަޑަށް އާމިނާ ދުވެފައި އެދިމާއަށް އާދެއެެވެ. ދޮރު ކައިރީގައި ހުރި ރާހުލް އަށް އާމިނާ ބަލާލީ ދެބުމަ ގޮށް ޖަހައިގެން ހުރެއެވެ. އާމިނާ ދޮރު ތަޅުގައި ހިފާލިއިރު އެ ހުރީ ތަޅުލާފައެވެ.

“ދަރިފުޅާ! ދަރިފުޅާ އަންޖޫ! ކިހިނެއްވީ ތިޔަ ހަޅޭއްލަވަނީ؟” އާމިނާ ދެތިން ފަހަރު ދޮރުގައި ޖަހާލަމުން ގޮވާލިއެވެ. އެވަގުތު ރާހުލް ސުވާލުން ފުރިގެންވާ ނަޒަރަކުން އާމިނާއާ ދިމާއަށް ބަލާލިއެވެ. އާމިނާމެންގެ ދަރިއެއް ހުންނަކަމެއް ކުރިއަކުން އޭނާއަކަށް ނޭނގެއެވެ. އޭނާ ދެއަތަށް ބޯ ހޫރާލިއެވެ. އެއީ އޭނާއަށް އެނގެެން ޖެހޭ އެއްޗެއް ވެސް ނޫނެވެ. އޭނާ އަކީ އެ ގޭގައި ގެންގުޅޭ ނޯކަރެއް ވިއްޔާއެވެ.

“މަންމާ! ކާކުތަ މިތަނަށް އެވަނީ ދެންމެ؟ ފާޑެއްގެ ފިރިހެނެއް ވަތީ!” އެކޮޅުން އަންޖޫދާ ގޮވާލި އަޑު އިވުނެވެ. އެވަގުތު އާމިނާ ރާހުލް އާ ދިމާއަށް ބަލާލީ ރުޅިވެރިކަމާއެކީ ގައެވެ.

“ކަލޭ ޓަކި ޖަހާފަ ވަންނަ ނަމަ ދޯ…” އާމިނާ ރުޅިއައިސްފައި ރާހުލް އާ ދިމާއަށް ބުނެލިއެވެ. ރާހުލް އިސްޖަހާލިއެވެ. އެ ކޮޓަރީގައި މީހަކު އުޅޭކަމެއް އޭނާއަށް އެނގޭނީ ކިހިނަކުން ހެއްޔެވެ؟

“އަހަރެން ނޭނގެނީ މީހަކު ހުންނަނީކަމެއް..” ރާހުލް މަޑުމަޑުން ބުނެލިއެވެ. އެވަގުތު ކޮޓަރީގެ ތަޅު ހުޅުވާލި އަޑު އިވިގެން ދިއައެވެ. ފަރި ހިނގުމެއްގައި އެތެރެއިން ނިކުތް އަންޖޫދާ އާ ދިމާއަށް ރާހުލް ބަލާލިއެވެ. އޭނާ މިހާރު ލައިގެން ހުރީ ކަޅު ކުލައިގެ ކަކުލާ ހަމައަށް އަރާވަރުގެ ހެދުމެކެވެ. އެއާއެކު ފަޔަށް ބާރު ކަޅުކުލައިގެ ސްކިނީ ޖީންސު ލާފައި ހުރުމުން އެ ހިމަތޮޅި ހަށިގަނޑުގެ ފުރިހަމަކަން ހާމަވެއެވެ. އެ މުށި ކުލައިގެ އިސްތަށިގަނޑު މިހާރު ވަނީ ކުރިމައްޗަށް ގެނެސް ވައްޓާލާފައެވެ. އޭރުވެސް އެ އިސްތަށިގަނޑުގައި ފެންތިކިތައް ވިދަމުންދިއައެވެ. ރާހުލް ބަލަން ހުރުމުން އޭނާ ދެބުމަ ގޮށް ޖަހާލިއެވެ. އެއާއެކު ރާހުލް އިސްޖަހާލީ ޖެހިލުންވެ ހުރެއެވެ.

“މީ ކާކުތަ މަންމާ؟ އަހަރެން ފެންވަރައިގެން އައިސް ފެން ހިއްކަން ހުއްޓަ މީނަ އައިސް ވަނީއޭ..” އަންޖޫދާ އާމިނާ ގާތު އަހާލީ މޫނުމައްޗަށް ރުޅިވެރިކަން ގެންނަމުންނެވެ.

“ތީ މަންމަ ބުނެގެން ބައްޕަ މިގެއަށް ގެނައި ބަންގާޅިއެއް…” އާމިނާ ބުނެލިއެވެ.

“ކީއްކުރަން ގެނައި މީހެއްތަ؟ އަހަރެން ހާދަ ފޫއްސެއް ވެއްޖޭ މީނަ ދެކެ…” އަންޖޫދާ ތުން އަނބުރާލަމުން ރާހުލް އަށް ބަލާލަމުން އެހެން ބުނެލި ވަގުތު ރާހުލް އިސްއުފުލާލާ ބަލާލިއެވެ. އެއާއެކު އެދެމީހުންގެ ހަތަރު ކަޅި ބައްދަލުވެގެން ދިއައެވެ. ރާހުލް ވަގުތުން ދުރު ބަލާލީ އަންޖޫދާގެ އެހެރަ ތޫނު ރުޅިވެރި ބެލުމުން އުނދަގޫވެގެންނެވެ.

“ކިހިނެއް ވީތަ މިތާ؟ ދަރިފުޅާ އަންޖޫދާ… ކީއްވެ އެހާ ރުޅި އައިސްފަ ތިހުރީ؟” ތިން މީހުން ވެސް ގޭ ދޮރާ ދިމާއަށް ބަލާލީ އެތެރެއަށް ވަދެގެން އައި ސައްތާރު ގެ އަޑު އިވުމުންނެވެ.

“ބައްޕާ.. މީނަ އަހަރެން ގައިގައި ތުވާލި އޮޅައިގެން ހުއްޓަ ވަނީ ކޮޓަރިއަށް.. ޓަކިވެސް ޖަހާނުލާ… އަދި ވަދެފަ ބަލަހައްޓައިގެން ހުރީއޭ…” އަންޖޫދާ ސައްތާރާ ދިމާއަށް ބަލާލަމުން ބުނެލިއެވެ. އެވަގުތު ސައްތާރު ބަލާލީ ޖެހިލުންވެފައި ހުރި ރާހުލް އާ ދިމާއަށެވެ.

“ދަރިފުޅާ.. ރާހުލް އަކަށް ނޭނގޭނެ އޭ ދަރިފުޅު މިގެއަށް އައި ކަމެއް… އެހެންވެއޭ އޭނަ ޓަކި ނުޖަހާ އެ ވަނީ… ދެން އަންޖޫދާ ވެސް ހަނދާންކުރަންވާނެ ދޮރު ތަޅުލައިގެން ހުންނަން.. އިނގޭ..” ސައްތާރު އަންޖޫދާގެ ބޮލުގައި ފިރުމާލަމުން ލޯތްބާއެކު ބުނެލިއެވެ.

“ރާހުލް… މީ މަގޭ ހުރި ހަމައެކަނި ދަރި، އަންޖޫދާ… އޭނަ އެއައީ މިޔަދު.. މާލޭގަ ހުރެފަ…” ސައްތާރު ރާހުލް އާ ދިމާއަށް ބަލާލަމުން އެހެން ބުނެލީ ހިތްހެޔޮ ކަމާއެކީގައެވެ. އަންޖޫދާ އެވަގުތު ތުން އަނބުރާލީ އޭނާގެ ބައްޕަ ރާހުލް އާ އެހާ ރީތިކޮށް ވާހަކަ ދެއްކުމުން ހިތްހަމަނުޖެހިފައެވެ.

“އަންޖޫދާގެ ފޮށިތައް ބަލާ ދާން ހިނގާބަލަ ސައްތާރުބޭ އާ އެކީ… އަދި ބޯޓުން ނުބާލާ ހުރީ އެއެއްޗެހި… އިހަށް ތި ފިހިގަނޑު ބަހައްޓާފަ ހިނގާ…” ސައްތާރު ރާހުލް އާ ދިމާއަށް އެހެން ބުނެލަމުން ހިނގައިގަތީ ގެއިން ނިކުންނާށެވެ. ރާހުލްވެސް ފާރުގައި ފިހިގަނޑު ލަންގާލުމަށްފަހު ސައްތާރުގެ ފަހަތުން ހިނގައިގަތީ ރުޅި މޫނު ހަދައިގެން ހުރި އަންޖޫދާއާ ދިމާއަށް ސިއްރު ސިއްރުން ބަލާލާފައެވެ.

“އަންޖޫ… ހިނގާ ކާން.. ބަނޑުހައެއް ނުވޭތަ؟” އާމިނާ އަންޖޫދާގެ އަތުގައި ހިފާލައި އެހެން ބުނެލުމުން އޭނާ އާމިނާ އާ އެކު ކާގެއަށް ދާން ހިނގައިގަތެވެ. އޭނާ ގޮސް ކާމޭޒު ދޮށުގައި އިށީނުމުން އާމިނާ ތައްޓަކަށް ބަތާއި ރިހަ އަޅައިގެން ގެނެސް އޭނާގެ ކުރިމަތީގައި ބެހެއްޓިއެވެ. އެވަގުތު އަންޖޫދާ ސަމުސަލެއް ނަގައި ބަތް ކޮޅެއް އަނގައަށް ލީ ހިޔާލެއްގައި ހުރެގެންނެވެ.

އަންޖޫދާ އަކީ އާމިނާ އާއި ސައްތާރުގެ ހުރި ހަމައެކަނި ދަރިފުޅެވެ. އެދެމަފިރިންވެސް އޭނާ ދެކެ ދެލޮލުގެ ކޮއި ފަދައިން ލޯބިވެއެވެ. އޭނާ ބުނެފިނަމަ އެދަމަފިރިން ނުކޮށްދޭ ކަމެއް ނޯވެއެވެ. ރަށުން ގްރޭޑް ދިހައެއް ނިންމުމަށްފަހު އެދެމަފިރިން އަންޖޫދާ މާލެ ފޮނުވީ މޮޅަށް ކިޔަވައި ދިނުމުގެ މަޤުސަދުގައެވެ. މާލޭގައި 11 12 ކިޔަވައި ނިމުމުން އަންޖޫދާ ބޭނުންވީ ކޭކު އަޅާ ކޯހެއް ހަދާށެވެ. އޭނާ މިފަހަރު ރަށަށް އެއައީ އެ ކޯސްވެސް ފުރިހަމަކޮށްގެންނެވެ.

“ދަރިފުޅާ.. ދެން އެއްކޮށް މިކޮޅަށް އައީ ދޯ ތި؟ ކޯސް ވެސް ނިމުނީނު… ދެން ހުންނަން ޖެހޭނީ މަންމަމެން ގާތު…” އާމިނާ ލޯތްބާއެކު ބުނެލިއެވެ. މާލޭގައި އަންޖޫދާ ހުރި 3 އަހަރު ތެރޭގައި އޭނާ އަހަރަކު ދެ ފަހަރު ރަށަށް އައި ނަމަވެސް އެކަމުން އާމިނާ އަކަށް ހިތްހަމަޖެހުމެއް ނުލިބެއެވެ. އޭނާ ބޭނުންވަނީ އަބަދުވެސް އަންޖޫދާ އޭނާއަށް ފެންނަ ހިސާބުގައި ހުރުމަށެެވެ.

“ހޫމްމް..” އަންޖޫދާ އަނގައިގައި ހުރި ބަތްތައް ހަފަމުން ކުރު ޖަވާބެއް ދިނެވެ.

“ދެން މިހާރު މިގޭ ބޭރު ފާރުގައި ހިއްޕަންވީނު މިގެއިން ކޭކު އަޅައިދެމޭ ކިޔާފަ.. އޭރުންނެއްނު އަންޖު އަށް ވެސް ލާރިއެއް ލިބޭނީ…” އާމިނާ ދަތްތައް ދައްކާލަމުން ބުނެލިއެވެ. މިފަހަރުވެސް އަންޖޫދާ ބުނީ ހަމައެކަނި އާއެކޭ އެވެ.

“މަންމާ… ބައްޕަ ކީއްވެތަ އެ ބަންގާޅި އާ އެހާ ރީތިކޮށް ކަންތައް ކޮށްދެނީ އެ؟” އަންޖޫދާ އެއްޗެއް ހަނދާންވާ ފަދަ ގޮތަކަށް އެހެން ބުނެލިއެވެ.

“ނޭނގެ މަންމައަކަށް… ދެން އެކަމާ އަންޖު އަޅާނުލާ..” ރާހުލްގެ ވާހަކަ ދެއްކުމުން އާމިނާގެ ނިތަށް ކުޑަކޮށް ރޫތަކެއް ޖަމާވިއެވެ. އަންޖޫދާ ދެކޮނޑު އަރުވާލުމަށްފަހު ކެއުމާއިގެން ކުރިއަށް ދިއައެވެ.

***

ސައްތާރާއެކު އަންޖޫދާގެ ފޮށިތައް ހިފައިގެން ރާހުލް އައި އިރު ސޯފާގައި ދެފައި ދަމާލައިގެން ޓީވީ ބަލަން އަންޖޫދާ އިނެވެ. ގެއަށް އައި ގޮތަށް ރާހުލް އަވަސްވެގަތީ ކުނިކަހައި ނުނިމެ އޮތްބައި ކުނިކަހައި ނިންމާލުމަށެވެ. ސިޓިންގރޫމު ތެރެ ކެހުމަށްޓަކައި އޭނާ ސިޓިންގރޫމުގައި ޖައްސާފައި ހުރި ފަންކާ ނިވާލީ އެއްވެސް ފިކުރެއް ނެތިއެވެ. ސިޓިންގރޫމް ދޮރުމަތީގައި އަޅާފައި އޮތް ފައިފުހި ނަގައި އެ ބޭރަށް ފޮޅާލުމަށްފަހު އެނބުރެލިތަނާ އޭނާ ދިއައީ ސިއްސައިގެންނެވެ. ދެބުމަ ގޮށް ޖަހައިގެން ކުރިމަތީގައި މިހުރީ އަންޖޫދާއެވެ. ރުޅިއައިސްގެން ގޮސް އެ ދޮން މޫނު އެވަގުތު ވަނީ ރަތް ވެފައެވެ. އެ ލޯބި މޫނު އެހާ ކައިރިން ފެނުމުން ރާހުލް އަށް ހިން ދިރުވާލެވުނެވެ. އެ ރީތި މުށި ކުލައިގެ ދެލޮލުގެ ތެރެއަށް ވިރިގެން ދާން އޭނާގެ ހިތް އެދެން ފެށީ ކީއްވެކަމެއް އޭނާއަކަށް ވެސް ނޭނގުނެވެ. ރުޅިއައިސްފައި ހުރި އިރު ވެސް އެ އަޖައިބެއް ފަދަ ރީތިކަމަކަށް ބަދަލެއް ނާދެއެވެ.

“ނުފެނޭތަ މަ މިތާ ސޯފާގައި ހުރި ތަނެއް ފަންކާ ތި ނިވާލީ؟ ” އަންޖޫދާ ރުޅި އައިސްފައި އެހެން ބުނުމުން ރާހުލް އަވަސް އަވަހަށް އިސްޖަހާލިއެެވެ. އޭނާއަށް މި ކުރެވެނީ ކޮންކަހަލަ އިހުސާސްތަކެއް ހެއްޔެވެ؟ ނޫނެކެވެ. މިއީ ގޯހެކެވެ. އޭނާ ގެ ސާހިބުމީހާގެ ދަރިއާ މެދު މިފަދަ ނަޒަރަކުން ދެކެން ހެޔޮނުވާނެއެވެ.

“ހޫނުވެޔޭ ފަންކާ ނިވީމަ… މީނަ ގަނޑާ ހެދި މަށަށް ގޭގައި ހަމަޖެހިގެން ޓީވީ ބަލާލަން އިނދެވެނީކީ ވެސް ނޫނޭ!” އަންޖޫދާ އެހެން ބުނެލަމުން ދުރަށް ހިނގައިގަތީ ފަންކާގެ ސުވިޗު ޖައްސާލުމަށްފަހުގައެވެ. އޭނާގެ މި ބަސްތަކުން ރާހުލްއަށް ވާނެ ގޮތަކާ މެދު ވިސްނާވެސް ނުލައެވެ.

އަންޖޫދާ އޭނާ ދެކެ ރުޅި އަންނާތީވެ ރާހުލް އިންތިހާއަށް ދެރަވި ނަމަވެސް ފަންކާ ޖަހާފައި ހުރި އިރުވެސް އޭނާ ބެލީ އެތަން ކުނިކެހޭތޯއެވެ. އޭނާ ފިހިގަނޑު ކާތާލާ ކޮންމެ ފަހަރަކު ފަންކާގެ ވަޔާއެކު އެކުނިތައް ބުރައިގެން ދަނީއެވެ. އެންމެ ފަހުން އޭނާ އަށް އެކަން ނުވެގެން ހުއްޓާލީ އާމިނާ ރުޅިއަންނާނެކަން އެނގިހުރެއެވެ. އޭނާ ކުރާނީ ވަކި ކީއްހެއްޔެވެ؟ އަންޖޫދާ ރުޅިއަރުވާކަށް ވެސް އޭނާ ބޭނުމެއް ނުވެއެވެ.

އާމިނާ އެވަގުތު ވީ ބޭރަށް ގޮހެވެ. އޭނާ އައި ގޮތަށް އައިސް ރާހުލް އާ ދިމާއަށް އެއްޗެހި ކިޔަން ފެށީ އަދިވެސް ސިޓިންގރޫމް ތެރެ ކުނި ނުކަހަ އޮތީމައެވެ.

“ދައްތާ.. އަންޖޫދާ ހުންނަނީމާ ނުކެެހެނީ.. އޭނަ ބުނަނީ ފަންކާ ނުނިވަނީ އޭ..” ރާހުލް އިސްޖަހައިގެން ހުރެ ބުނެލިއެވެ. ޓީވީ ބަލަން އިން އަންޖޫދާ ބޯ ހިއްލާލުމަށްފަހު އެދިމާއަށް ބަލާލިއެވެ.

“މިހާރު އެއުޅެނީ މަ ބޮލަށް ޖަހާކަށްނު؟ އަން…! ކުނި ކަހާ..!” އަންޖޫދާ ރުޅިއައިސްފައި އިން ތަނުން ތެދުވެގެން ކޮޓަރިއާ ދިމާއަށް ހިނގައިގަތީ ބާރުބާރަށެވެ. ” މި ބަންގާޅިންގެ ވައްތަރޭ ހަމަ މީ!” އެހެން ބުނެލުމަށްފަހު އޭނާ ކޮޓަރިއަށް ވަދެ ދޮރުޖެހިލެއް ބާރުކަމުން ފާރުގައި ހުރި ގަޑި ވެސް ގުޑާލިހެން ރާހުލްއަށް ހީވިއެވެ.

އާމިނާ ދެއަތަށް ބޯހޫރާލުމަށްފަހު އެތެރެއަށް ވަންނަން ހިނގައިގަތެވެ. އެއާއެކު ރާހުލް އަނެއްކާ ވެސް ފިހިގަނޑު ނަގައި ކުނިކަހަން ފެށިއެވެ. އޭނާ ހިތަށް އަރަމުންދިއައެވެ. އަންޖޫދާ މިހާރު އޭނާ ދެކެ ރުޅިއަންނަންވީ ކީއްވެގެން ހެއްޔެވެ؟ އޭނާ ގޯސްކޮށް ކަމެއް ނުކުރެއެވެ. އޭނާ ކުނިކަހަން ވެގެން ފަންކާ ނިވާލީމަ އަލުން އެ ފަންކާ ޖެހީ އަންޖޫދާއެއް ނޫން ހެއްޔެވެ؟ އޭނާ އަށް ކުނި ނުކެހުނީ އެހެންވެ އެއް ނޫން ހެއްޔެވެ؟ އޭނާ ދެރަވިއެވެ. އަނެއްކާވެސް ނުކުރާކަމެއް އޭނާގެ ބޮލުގައި އެޅުނީމައެވެ.

***

ރޭގަނޑުގެ ވަގުތު އެތަން ފެންނަނީ ވަަރަށް ހިތްގައިމުކޮށެވެ. އިރުއިރުކޮޅާ ޖެހޭ ތެތް ފިނި ވައިރޯޅި ތަކުގެ ސަބަބުން ގަސްތަކުގެ ފަތްތައް ހިތްގައިމު ގޮތަކަަށް ހެލިލައެވެ. ހަނދުވަރުދޭ ރީތި ރެއެއް ކަމުން އެ ގަސްތަކުގެ ތެރެއަށް ހަނދުގެ އަލި ރީތި ގޮތަކަށް ފޭދިފައިވެއެވެ. ގޮނޑުދޮށަށް ރާޅު ބީއްސާލާ އަޑު އެ ހިސާބަށް އިވެމުން ދިއައީ ލުއި ލުއި މިޔުޒިކެއް ފަދައިންނެވެ. ގަސްތަކުގެ ތެރޭގައި އިން ހިޔަންޏެއް ދެއަތަށް ހެލިލާފިއެވެ. އެއާއެކު ހުދު އައްޔެއް ދިއްލިގެން ދިއައެވެ. އެތަނުގައި އިން މީހާގެ މޫނު އެއަލީގެ ސަބަބުން ފާޅުވެގެން ދިއައެވެ.

ފޯނުގެ ހުދު އަލި އަންޖޫދާގެ މޫނަށް އެޅިފައިވީއިރު އެ މޫނު ފެންނަނީ ވަރަށް ލޯބިކޮށެވެ. ތުންކޮޅު އޫ ކޮށްގެން ހުރެ އޭނާ އަވަސް އަވަހަށް ފޯނުގެ ޓަޗް ސްކްރީނާއި ކުޅެމުން ދިއައިރު އެ މޫނުމަތިން ކޮންމެވެސް ވަރަކަށް ނުރުހުމުގެ އަސަރުވެސް ފާޅުވަމުން ދިއައެވެ. އިރުކޮޅަކުން އޭނާ ސިހިގެން ދިއައީ ފަހަތުން މީހަކު އައިސް އޭނާގެ ލޯ މަތީގައި އަތް އެޅުމުންނެވެ.

“ވިޝް!” އަންޖޫދާއަށް އެހެން ބުނެލެވުނީ ހިނިތުންވެލަމުންނެވެ. އެއްމިޔަކުން ހީލަމުން ވިޝާން އަންޖޫދާގެ ކުރިމައްޗަށް އައިސް ހުއްޓުނެވެ. އެވަގުތު އަނެއްކާ ވެސް އަންޖޫދާގެ މޫނު މައްޗަށް ވެރިވީ ނުރުހުމެވެ. އަދި ތުން އަނބުރާލަމުން ވިޝާންގެ އަތުގައި ވިކައި ގަތެވެ.

“އައްދޯތް އަންޖޫ…” ވިޝާން ވަރަށް ތަދުވާކަމަށް ހެދިފައި އެހެން ބުނެލިއެވެ.

“ކީއްވެ ލަސްވީ؟ އަހަރެން ކައިރީ ދާށޭ ކިޔާފަ ވިޝް ތިއައީ ހާދަ ލަހަކުންނޭ…” އަންޖޫދާ ހަށަން ބަނދެލަމުން އެހެން ބުނެލީ ތުން އޫކޮށްލަމުންނެވެ. ވިޝާން އަކީ އަންޖޫދާ ރައްޓެހިވެގެން އުޅޭ ކުއްޖާއެވެ. އޭނާ ގުރޭޑް ދިހަޔަކުއްސުރެ ވިޝާން އާ ރައްޓެހިވެގެން އެއުޅެނީ ވިޝާން ދެކެ ވާ ލޯތްބެއްގެ ބޮޑުކަމުންނެވެ. މާލޭގައި ހުރެފައި ރަށަށް އާދެވޭ ކޮންމެ ފަހަރަކު އޭނާ ވިޝާން އާ ބައްދަލުކުރަން އާދެއެވެ. ނަމަވެސް އެއީ އޭނާގެ މަންމަމެންނާ ސިއްރުންނެވެ. ވިޝާންގެ އާއިލާގެ ގޮތުން އާމިނާމެން އޭނާއާއި ވިޝާން ގެ އެ ގުޅުމަށް ނުރުހޭނެކަން އެނގޭތީއެވެ.

“ލަސްތަ؟” ވިޝާން އަންޖޫދާގެ އުނަގަނޑުގައި ދެއަތް ވަށާލަމުން އެހެން ބުނެލީ އަންޖޫދާގެ ކަޅިރަވަ ރީތި، ތޫނު ދެލޮލަށް ފުންކޮށް ބަލާލަމުންނެެވެ. އަންޖޫދާ އެވަގުތު ލަދުން އިސްޖަހާލިއެވެ. އެއާއެކު ވިޝާން އޭނާގެ ދަތްދޮޅީގައި ހިފައި އޭނާގެ އިސްނެގުވިއެވެ.

“ލޯބިވޭތަ އަހަރެން ދެކެ؟” ވިޝާން ވައިއަޑުން އެހެން އަހާލީ ހަމައެކަނި އަންޖޫދާ އަށް އަޑު އިވޭ ވަރަށެވެ. އަންޖޫދާ މަޑުމަޑުން ބޯ ޖަހާލިއިރު އޭނާގެ މޫނަށް ވެރިވެފައިވަނީ ރަކި ހިނިތުންވުމެކެވެ.

ވިޝާން އޭނާގެ މޫނު މަޑުމަޑުން އަންޖޫދާގެ މޫނާ ކައިރިކުރަމުން ދިއައެވެ. އޭނާގެ ހޫނު ނޭވާތައް އަންޖޫދާގެ މޫނަށް އެޅެމުން ދިޔައިރު ދެމީހުންގެ ނޭވާވެސް ދިއައީ އަވަސްވަމުންނެވެ. ދެ ހިތުގެ ހިނގުންވެސް ދިއައީ ހިނދެއް ހިނދަކަށް ބާރުވަމުންވެ. ވިޝާންގެ ތުންފަތް އައިސް އަންޖޫދާގެ ފިނި ތުންފަތުގައި ބީހިލުމާއެކު އަންޖޫދާގެ ދެލޯ މެރިގެން ދިއައެވެ. ވިޝާންގެ ދެއަތް އަންޖޫދާގެ ވަށާލެވިފައިވާއިރު އޭނާ ގެންދިއައީ އަންޖޫދާގެ ބުރަކަށީގައި މަޑުމަޑުން ފިރުމަމުންނެވެ. އެއްހަށިގަނޑު އަނެއް ހަށިގަނޑާ ޖެހި ފިތިފައިވީއިރު އެ ދެމެދަށް ވައިރޯޅިއަކަށް ވެސް ނުވަދެވޭނެކަން ޔަޤީނެވެ.

***

ވިޝާން އާ ބައްދަލުކޮށް ނިންމުމަށްފަހު އަންޖޫދާ ގެއާ ދިމާއަށް މިސްރާބު ޖެހިއެވެ. އޭރު ގޭ ބޭރު ޖޯލީގައި އާމިނާ އާއި ސައްތާރު އޭނާ އަންނަ ދިމާއަށް ބަލަހައްޓައިގެން ހުއްޓެވެ. އެވަގުތު ގެއިން ނިކުތް ރާހުލްއަށް ދުރުން އަންނަ އަންޖޫދާ ފެނި ހިނދުކޮޅަކަށް ހުއްޓުން އެރިއެވެ. ކަކުލާ ހަމައަަށްް އަރާ ފެހި ކުލައިގެ ޓޮޕުކޮޅާއި ހުދުކުލައިގެ ސްކިނީގައި އޭނާ ފެންނަލެއް ނުހަނު ހިތްގައިމެވެ. އޭނާގެ މުށިކުލައިގެ އިސްތަށިގަނޑު ހުޅިއަކަށް މައްޗަށް ނެގިފައިވީއިރު ބައެއް އިސްތަށިކޮޅު އޭނާގެ ދޮން މޫނަށް ވެއްޓިފައިވާ ގޮތުން އެ މޫނު އިތުރަށް ފުރިހަމަކަމަށް ދައްކައެވެ. އަންޖޫދާ އެއައި ގޮތަށް އައިސް އާމިނާ އާ ޖެހިގެން ހުރި ޖޯލީގައި އިށީނީ ރާހުލް އާ ދިމާއަށް ފާޑަކަށް ބަލާލަމުންނެވެ.

“އަންޖޫ؟ ކޮންތާކުން ތި އައީ؟” އާމިނާ އަންޖޫދާ އާ ސުވާލުކުރިއެވެ. އަންޖޫދާ ހުރީ ކުރިން ވެސް އޭނާގެ މަންމަގެ އެ ސުވާލަށް ޖަވާބު ދޭން ތައްޔާރުވެގެންނެވެ.

“މިއައީ އެ އުޅޭ ރަސްމާ މެންނާ ވާހަކަ ދައްކާލަން އިނދެފަ…” އަންޖޫދާ ދޮގެއް ހަދާލިއެވެ. އޭނާ އެ ދިޔައީ ވިޝާން އާ ބައްދަލުކުރަންށޭ އާމިނާ ގާތު ބުނަން އޭނާއަށް ލާހިކެއް ނޫނެވެ.

“އަންޖޫދާ ވެސް މިހާރު ރޭގަނޑު އެހާ ގިނައިން ބޭރަށް ނުދާންވީ އިނގޭ..” ސައްތާރު ބުނެލިއެވެ. އޭނާގެ ހުރި ހަމައެކަނި ދަރިފުޅު ގޯސްގޮތަކަށް އުޅޭކަށް އޭނާ ނޭދެއެވެ.

“ބައްޕާ.. އަހަރެން ނުދަމެއްނު އެހާ ގިނައިންނެއް… އެހެން ނޫނަސް މިހާރު އަހަރެންމީ ކުޑަ ކުއްޖެއް ނޫނޭ…” އަންޖޫދާ އެހެން ބުނެލި އިރު އެ މޫނުމަތިން ކޮންމެވެސް ވަރަކަށް ނުރުހުމުގެ އަސަރު ފާޅުވިއެވެ. އެއްލި ކަޅިއަކުން އޭނާގެ ލޮލުގައި އަޅައިގަތީ އެދިމާއަށް ބަލަހައްޓައިގެން ގޭ ދޮރާށި ކުރިމަތީގައި ހުރި ރާހުލްއެވެ. ” އަދި މީނަ އެބަ ބަލައެއްނު؟” އޭނާ ތުން އަނބުރާލަމުން އެހެން ބުނެލުމުން ރާހުލް އިސްޖަހާލިއެވެ. އާމިނާ ވެސް ނުރުހިފައި ރާހުލް އާ ދިމާއަށް ލޯ އަޅާލިއެވެ. ނަމަވެސް ސައްތާރު ބަލާލީ ރާހުލް އާ ދިމާއަށް ބަލަހައްޓައިގެން ދެބުމަ ގޮށް ޖަހައިގެން ހުރި އަންޖޫދާ އަށެވެ.

“އަންޖޫދާ ވެސް ދަސްކުރަންވާނެ އެހެން މީހުންނަށް އިހުތިރާމް ކުރަން އިނގޭ..” ސައްތާރު އެހެން ބުނެލީ މަޑުން ނަމަވެސް އެއަޑުގައިވާ ނުރުހުން އަންޖޫދާއަށް ރަނގަޅަށް ވެސް ނަގައިގަނެވެ. އޭނާ ސައްތާރާ ދިމާއަށް ބަލާލީ ޝަކުވާއިން ފުރިގެންވާ ނަޒަރަކުންނެވެ. ސައްތާރު އޭނާ ގޯސްކޮށްފައި އެ ހިމާޔަތް ކުރީ ރާހުލް ހެއްޔެވެ؟ އެ ނިކަމެތި ބަންގާޅި މީހާ ހެއްޔެވެ؟ ބައްޕަގެ އެ ބަސްތަކުން އަންޖޫދާގެ ހިތްހަމަ ނުޖެހުން ނަމަވެސް އޭނާ އިތުރު އެއްޗެކޭ ނުބުނެ ހިމޭނުން އިނެވެ. އޭނާގެ ހިތުގައި އެ ބަންގާޅި މީހާއަށް އުފެދިފައިވާ ނަފުރަތު ހަގުނައަށް އިތުރުވެގެން ދިޔަހެން އޭނާއަށް ހީވިއެވެ.

#ނުނިމޭ#

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.