ޓެކްސީ(ތިންވަނަ ބައި)

ކާރުދުއްވަމުން ދިޔައިރު ޑްރައިވަރުގެ ކަތި ނަޒަރުތައް އަހަންނަށް އަމާޒުވެފައިވާކަމުގެ އިޙްސާސް ކުރެވެން ފެށިއެވެ. މިކަމުން އަހަންނަށް އުނދަގޫވިއެވެ. ވުމާއި އެކު އިސްދަށަށް ޖަހާލައިގެން އަހަރެން އިނީ ވަރަށް ޖެހިލުންވެފައެވެ. އެގޮތަށް ކުޑައިރުކޮޅަކު އިނުމަށްފަހު ކުޑަދޮރުން ބޭރު ބަލާލެވުނެވެ. އެއީ މުޅިން އެހެން މަގެކެވެ. ފަހަރެއްގައި ފެންގަނޑު ބޮޑު ވުމުން ކާރުގެ މިސްރާބު ބަދަލު ކޮށްލީކަމަށް އަހަރެންގެ ހިތަށް ވިސްނައިދެމުން ގެންދިޔައީމެވެ. އަހަރެން އަތު ކުރީގައި އޮތް ގަޑީގެ މޫނު މަތި އަހަންނާއި ދިމާއަށް އަބުރާލަމުން ބުރުޤާގެކޮޅުުން ގަޑީގެ މޫނުމަތި ފުހެލީމެވެ. އެއަށްފަހު ގަޑިބަލާލީމެވެ. ހަގަޑި ބައިވަނީއެވެ. އަހަރެން ގެއިން ނުކުތްތާ ފަނަރަ މިނެޓްވީއެވެ. މިހާރު ގައިމު ހިނގާފައި ދިޔަނަމަވެސް އަހަންނަށް ކޮލެޖަށް ދެވޭހާއިރު ވެއްޖެއެވެ.

އެވަގުތު ކާރުގެ ދުވެލި އިހުނަށްވުރެ ބާރުކޮށްލި ކަމުގެ އިހުސާސް ކުރެވިގެންދިޔައެވެ. އެއާއެކު އަހަރެން ކޮލެޖަށް ގެންދާ “ޗޮއިސް” ފެންފުޅި ސީޓުމަތިން ވެއްޓި އަހަރެންވެސް އެއްލައިގެންދިޔައެވެ. އެވަގުތު އަހަރެންގެ އަތުން ކުރިމަތީގައި ހުރި ސީޓުގައި ނުހިފޭއްޓުނު ނަމަ އަހަރެންގެ ބޯ އޭގައި ޖެހުނީސްކަން ޔަޤީނެވެ.

“އަހަންނަކަށް ލަހެއްނުވޭ ބައްޔާ! ތަންކޮޅެއް މަޑުން ދުއްވިޔަސް އޯކޭ ވާނެ.” ކުޑަކޮށް ހިތްހަަމަނުޖެހި ހުރެ މޫނަށް ވައްތަރެއްޖައްސާލަމަުން އަހަރެން ބުނީމެވެ.

ޑްރައިވަރަކަށް އަހަރެން ބުނިއެއްޗެއް އަޑު އިވުނުހެނެއް ހިއެއްނުވެއެވެ.

“ކުޑަކޮށް މަޑުން ދުއްވިދާނެތަ ބައްޔާ!!!” ކާރުދުއްވަމުން ދާލެއް ބާރުކަމުން ބިރުން އިނދެތަންކޮޅެއް އަޑަށް ބާރުލާފައި އަނެއްކާވެސް އަހަންނަށް ބުނެވުނެވެ.

ކުއްލިއަކަށް ކާރުގެ އިންޖީނު ނިވި ކާރު ހުއްޓުނެވެ.

“ޗުސް ޗުސް އެއްކަލަ ކަންތައް ޖެހިފަ މިއޮތީ މިކާރުގަނޑަށް…….. ހމމމފފ… މިއަދު ވެސް ރަޒާސާހަބް ގާތު ބުނިން މީތި ހަދާދޭށޭ”

ޗޮކެއްކަނޑާލުމަށްފަހު ކާރުގެ ވެރި މީހާއާދިމާޔަށް ކުދިކިޔަމަުން ޑްރައިވަރ ޓޯޗެއް ހިފައިގެން ނުކުތެވެ. ޓޯޗް އޮން ކޮށްލުމަށްފަހު ބޮނެޓުކައިރި އަށް ދިއުމަށްފަހު އޭގެ މަތި އެއްއަތުން ނެގިއެވެ. އަދި އެއަށް އަލިކޮއްލަމުން އެތެރެއަށް ބަލާލުމަށް ފަހު އަތުން އޭގެ އެތެރޭގެ ބައިތަކާއި ކުޅެންފެށިއެވެ. އެއްއަތުގައި ޓޯޗު ބާއްވައިގެން އެމަސައްކަތް ކުރުމަކީ އޭނާ އަށް ވަރަށް އުނދަގޫ ކަމެއްކަން އޭނާގެ ހަރަކާތްތަކުން ހާމަވިއެވެ.

އެހެންކަމުން ޓޯޗު ނިއްވާލުމަށްފަހު ކާރު ކައިރިއަށް އައިސް އަހަރެން ގާތުން އެހީއަކަށް އެދުނެވެ. “ބެހެން.. މިޓޯޗުން އިންޖީނަށް އަލިކޮށްދޭން އާދެބަލަ”

އަހަރެން ، އިތުރުގޮތެއް ނެތުމުން ޖެހިލުންވެހުރެ ، ކާރުން ފޭބީމެވެ. އަހަންނަށް ނުކުމެވުނީ ގަސްތައްގިނަ ބޮޑު ޖަންގައްޔެކެވެ. އޭރުވެސް ކަނިޖަހަމުން ދިޔައެވެ. ވައިވެސް އާދައިގެ ވަރަށް ވުރެ ގަދަޔަށް ޖެހެމުންދިޔައެވެ. ވަރުގަދަ ހިމޭން ކަމެކެވެ. ފަނިފަކުސާތަކުގެ މިއުޒިކީ އަޑާއި ވައިން ގޯނާލިބެމުންދާ ގަސްތަކުގެ އަޑު ފިޔަވާ އެހެން އަޑެއް އެހަމަހިމޭންކަމާއި ދެކޮޅެއްނަހަދައެވެ. ލޮލަށް އިނގިލިކޮއްޕާލިއަސްނޭނގޭނެ ހާ ކަނު އަނދިރިކަމެވެ. އިންސާނެއްގެ ހިލަމެއް ކީއްކުރަން އެއްވެސް ގެއެއް ދޮރެއްވެސް ފެންނާކަށް ނެތެވެ.

އަހަރެން އަތަށް ޑްރައިވަރ ޓޯޗު ދިނެވެ. ވަގުތުން އަހަރެން ޓޯޗު ޖައްސާލީމެވެ. ޓޯޗުގެ އަލިން ކަނުއަނދިރިކަން ފޫދުއްވާލިއެވެ.  “އަންނާނަން ޑިކީގައި އޮތް ރެންޗު ސެޓްހިފައިގެން” މިހެންބުނެފައި ކާރުގެ ޑިކީއާއި ދިމާއަށް ޑްރައިވަރު ހިނގައިގަތެވެ. އަހަރެން ހުރީ އެނާމާން މާހައުލުގެ އެކި ތަންތަނަށް ޓޯޗުން އަލިކުރަމުން އަވަސްކަޅިތަކެއް އުކައުކައެވެ. ޖަންގަލީ އެއަނދިރިކަމުގެ ތެރެއިން ބިރުވެރި ސޫރަތައް ސިފަވާހެން އަހަންނަށް ހީވާންފެށިއެވެ. ނަމަވެސް ހިތްވަރު ކޮށްލާފައި ކާރުގެ ބޮނެޓާއި ދިމާލަށް ހިނގައި ގަތީމެވެ. ބޮނެޓުގެ ކުރިމައްޗަށް އަރާ ޓޯޗުން އެތެރެއަށް އަލިކޮށްލި ވަގުތު ޑްރައިވަރު ޑިކީ ހުޅުވާލި އަޑުއިވުމުން އަހަރެން ސިހިގެންދިޔައެވެ. ބިރުގެންފައި ހުރި ވަރުންނެވެ. އެއާއެކު އަހަރެންގެ އަތުގައި އޮތް ޓޯޗް ބޮނެޓުތެރެއަށް ވެއްޓިގެން ދިޔައެވެ. ބޮނެޓު ތެރެއިން ޓޯޗުނެގުމަށް ގުދުވަމުން ބުރުގާގެ މޭމައްޗަށް ވާ ބައި އެއްއަތުން ހިފާލީ ދަބަރާއި ގިރިހުން ބުރުގާ ހަޑިވެދާނެތީއެވެ. އަދި ވައަތް ބޯނެޓު ތެރެއަށް ދިއްކޮށްލަމުން ގުދުވެލީމެވެ.

ކުއްލިއަކަށް އަހަރެންނާއި ވަރަށް ކައިރީން މީހެއްގެ ނޭވާގެ އަޑު އަހަންނަށް އިވުނެވެ………

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.