ސިއްރު ސިއްރުން ހިތޭ މިލްކު ކޮށްލީ ކަލާ… (ހަތްވަނަ ބައި)

“ބައްޕަ ދަރިފުޅުގެ ކައިވެންޏަށް ރަނގަޅުކުއްޖަކު ހޯދައިފިން.” މެންދުރުގެ ކެއުމުގެ ތެރެއިން ނާސިރު ޒެކަންއާއި ވާހަކަދެއްކިއެވެ. އެހެނަސް ޒެކަންގެ މާބޮޑު ސަމާލުކަމެއް އެކަމަކަށް ނުލިބުނެވެ. “ކައިވެނީގެ ކުރިން ދަރިފުޅު ޖެހޭނެ އެއްނު އެ ކުއްޖާއާއި ބައްދަލުކޮށްލާ ވާހަކަދައްކާ ހަދާލަން.” އަނެއްކާވެސް ނާސިރު އިއްވައިލިއެވެ. “ނޫން ބައްޕާ. ކޮންމެހެން ބައްދަލު ނުކުރިޔަސް ބައްޕަގެ ހޮވުން އަޅުގަނޑަށްޓަކައި ފުރިހަމަވާނެކަން އަޅުގަނޑަށް އިނގޭ.” ޒެކަން އެހެންބުނެލީ އަންހެނުންނަށް ނަފްރަތުން ފުރިފައިވި އެހިތުގައި ފަރުދާ އަޅާލަމުން މަޑުމައިތިރިކަމާއެކީގައެވެ. “އެންމެ ރަނގަޅު. އެކަމަކު ކައިވެނީގެ ވާހަކަ ދައްކަން ޝަރީފް އެބައޮތް އަންނަ ހުކުރުދުވަހު އެގެޔަށް މެންދުރުކެއުމަށް ދައުވަތުދީފައި. ދަރިފުޅު ކޮންމެހެންވެސް ދާން ވާނެ. ކައިވެނީގެ ކަންތައްތައް ނިންމޭނީވެސް ދެކުދިން ތިބެގެންނު” ނާސިރު އެހެންބުނެލިއިރު އެ މޫނުމަތި އުޖާލާވިވަރު ޒެކަން ނުލާހިކު ކައިރިން ދުއްޓެވެ. އެ މަންޒަރުފެނި ޒެކަންއަށް ބޯ ޖަހައިލެވުނީ ބޭއިޚްތިޔާރުގައެވެ.

އާދުވަހަކަށް ލޯ ހުޅުވާލެވެނު ޔަލަކްއަށް މިއަދު ކުރީ ތަފާތު އިހުސާސްތަކެކެވެ. ވާން މިއުޅެނީ ދުވަހަކުވެސް މިހާ ފަސޭހައިން ވާނެކަމަށް ޔަލަކް ހީކޮށްގެން ހުރި ކަމެއް ނޫނެވެ. ޒެކަން އޭނާ ގަބޫލުކުރާނެހެއްޔެވެ؟ ނޫނެކެވެ. ޒެކަން މިހާރުވެސް ހުރީ ޔަލަކްއާއި މެދު ހިތްހަމަނުޖެހިފައެވެ. ޒެކަންގެ ކުރިމައްޗަށްއެރުމަކީ ދެން ޔަލަކްއަށް ފަސޭހަކަމަކަށްވެސް ނުވާނެއެވެ. ޖެހިލުންވުމާ ބިރުވެރިކަމާއެކުވެގެން އެދެމެދަށް ލަދުވެތިކަމުގެ ފަރުދާވެސް ވަންނާނެ ކަންޔަގީނެވެ. އެހެނަސް އެންމެ ބިރުގެންފައިވަނީ ޒެކަންގެ ނުރުހުމުގެ ބަސްތަކުންނެވެ. ތަފާތު ހިޔާލުތަކުން ސިކުނޑި ފުރަމުން ދިޔަ ޔަލަކް ކުއްލިޔަކަށް ފޯނުގެ ސްކްރީނަށް ބަލާލާފައި އެނދުންތެދުވީ ޒެކަންގެ ގެޔަށްދާންޖެހޭނެކަން ހަނދާންވުމުންނެވެ. ޔަލަކްގެ އަތްވެސް ހިސާބަކަށް ރަނގަޅުވެފައި ހުރުމުން އަވަހަށް ތައްޔާރުވެލައިގެން ނިކުތީ ކިޔާލް އަތުޖެހޭތޯއެވެ. ނަސީބަކުން ކިޔާލް ގޭގައި އުޅޭތީ އޭނައަށް ގޮވާލާފައި އެގެޔަށް ގެންގޮސްދޭން އެދުމުން މިއަދު ކިޔާލް އެއްލޯ މަރާލާފައި ލާނެއްގޮތަކަށް ހީގެންފައިބަލާލީ ޔަލަކްއާއި ދިމާކޮށްލާފަދަ ގޮތަކަށެވެ. “އެހެމް އެހެމް، އަވަހަށް ހިނގާ” ޔަލަކްއާއި ދިމާކޮށްލަމުން ކައިރިޔަށް އައިސް ކިޔާލް ހުއްޓުމުން ޔަލަކް ކުޑަކުއްޖެއްފަދައިން ކިޔާލްއާއި ދިމާއަށް ވައްތަރުޖައްސާލާފައި ޝެހެނާޒްއަށް ގޮވާލާފައި ދަނީއޭ ބުނެލަމުން ދެމީހުން އެއްކޮށް ގެއިންނިކުމެއްޖެއެވެ.

ޒެކަންގެ ގެޔަށްގޮސް މިއަދު ޔަލަކްގެ އަމަލުތައް ހުރީ ތަނަކަށްދާން ލަސްވެފައިހުރި މީހެއްފަދައިންނެވެ. އެހާވެސް އަތްމަތި އަވަހެވެ. ޔަލަކްގެ ހިތުގައި ބިރުވެރިކަމެއް ހިނގަމުން ދިޔައީ މިއަދު އަނެއްކާ ޒެކަންގެ ނުރުހުމުގެ ބަހެއް އަޑުއަހަންޖެހިދާނެތީއެވެ. ޔަލަކް އެއައީވެސް އެދުވަހު ފަހުން ޒެކަން ކޮފީ ބޭނުންވެގެން ގުޅީމައެވެ. އެހެންނޫޏްނަމަ ދެން ޒެކަންއަށް ކޮފީ ހަދައިދޭން އަންނަން ޔަލަކް ހިތުގައިވެސް ނުލީހެވެ. އެހާވެސް ޔަލަކްވަނީ ޖެހިލުންވެފައެވެ.

ކޮފީ ހިފައިގެން ވަރަށް ހިތްވަރުކޮށްފައި ޒެކަންގެ ކޮޓަރިޔަށްވަދެ ސައިޑްޓޭބަލް މަތީގައި ބަހައްޓާފައި ޔަލަކް އެކޮޓަރިން ނިކުތްއިރުވެސް ޒެކަންގެ ހަބަރެއް ނުވިއެވެ. ޔަލަކްގެ ހަރަކާތްތައްވެސް އަވަހީއެވެ. ހިތާހިތުން ޝުކުރުކޮށްލާފައި ޔަލަކް އަވަސްވެގަތީ ގެޔަށްދިޔުމަށެވެ. ޔަލަކްގެ ޑިއުޓީވެސް މެންދުރުފަހުގައި އޮތުމާއެކީގައެވެ.

ފެންވަރައިގެން ފާހާނާއިން ނިކުތް ޒެކަންއަށް ސައިޑްޓޭބަލްމަތީގައި ބަހައްޓާފައި ހުރި ކޮފީ ފެނުމާއެކު އެތުންފަތައްވެރިވެގެންދިޔައީ ފުން ހިނިތުންވުމެވެ. ޒެކަން އެހުންނަނީ މިއަދުވެސް ކޮފީ ނުލިބޭނޭ ހިތައި ހިތާހިތުން ރުޅިގަދަވެފައެވެ. އެހެނަސް އެއީ ކުށްހީއެއްކަން އިނގުމުން ހިތައްވެސް ފިނިވެލައިފިއެވެ.

ރޭގަނޑުގެ ކެއުމުގައި ޝަރީފްދެއްކީ އަންނަ ހުކުރު ދުވަހު މެންދުރު ނާސިރުއާއި ޒެކަންއަށް ކެއުމަށްދައުވަތުދިން ވާހަކައެވެ. ކައިވެނީގެ ބައެއް މަޝްވަރާތައް ކުރުމަށާއި އިތުރަށް ގުޅުންބަދަހި ކޮށްލުމަށެވެ. “ނާސިރުގެ އަންހެނުން ނިޔާވި ފަހުން ނާސިރު އެހެން ކައިވެންޏެއް ނުކުރޭތަ؟” ޝެހެނާޒް އަހައިލީ މިއަދާ ހަމަޔަށްވެސް ޝަރީފްގެ ފަރާތުން ނާސިރު އެހެންމީހަކާ އިންކަމުގެ ހަބަރުލިބިފައި ނުވާތީ ޔަގީންކޮށްލުމުގެ ނިޔަތުގައެވެ. ޝަރީފް އާއެކޭ ބުނެ ބޯ ޖަހާލުމުން އެންމެ ހައިރާންވީ ޔަލަކް އެވެ. ޒެކަންގެ މަންމައެއް ނެތަކަންވެސް ޔަލަކްއަށް ނޭނގެއެވެ. ޝަރީފް ޒެކަންގެ އާއިލާއާއި ބެހޭ ގޮތުން ދެއްކި ހުރިހާ ވާހަކައެއް ޔަލަކް ކަނުލައި އަޑުއެހިއެވެ.

“ޝަރީފް އީލަކްއާއި ޔަލަކް ބުރުގާ އަޅަން ބޭނުންވެގެން އެއުޅެނީ.” އެންމެ ފަހުން ޔަލަކް އިންތިޒާރު ކުރަމުން އައި ޖުމްލަ މަންމަގެ ފަރާތުން އިވުމުން ހިތްހަމަ ޖެހިލާފައި ބައްޕަގެ މޫނަށްބަލައިލެވުނީ އީލަކްއާއި ޔަލަކްއާއި ދެކުދިންނަށް އެއްކޮށެވެ. “ބައްޕަގެ އެއްވެސް މައްސަލައެއް ނެތް. ބައްޕަ ވަރަށް އުފާވެއްޖެ ބައްޕަގެ ދެކުދިންނަށްޓަކައި” ޝަރީފް ޖަވާބުދިނީ ދެކުދިންނަށްވެސް ހިނިތުންވުމެއް ރައްދުކޮށްލާފައެވެ. ޔަލަކްއާއި އީލަކް ނިންމީ ހުކުރުވިލޭރޭ ބުރުގާ އެޅުމަށެވެ. ކިޔާލްވެސް އޭނާގެ ލޯބިވާ ކޮއްކޮމެނަށް ބަލާލާފައި ހިނިތުންވެލީ ކޮއްކޮމެންގެ ނިންމުމާމެދު އުފާކުރަމުންނެވެ.

ދުވަސްތައް ފާއިތުވަމުން އައި އިރު ޒެކަންއަށް ތަފާތު ކަމެއް ފާހަގަވަމުން އައެވެ. މިހާރު އެންމެ ދުވަހަކުވެސް ކޮފީ ހަދައިގެން ކޮޓަރިއަށް ގެންނަ ތަނެއް ޒެކަން ނުދެކެއެވެ. ހީވަނީ ޒެކަން ނެތް ގަޑިތައް ބަލާފައި ކޮފީ ގެންނަ ހެންނެވެ. ނޫނީ ޒެކަންއަށް ފެނިދާނެތީ ފިލައިގެން އުޅޭހެންނެވެ. އެކަމާހެދި ޒެކަންގެ ހިތުގައި ނޭނގޭ ރިހުމެއް އުފެދިއްޖެއެވެ. އަންހެން ކުއްޖަކަށްޓަކައި އަމިއްލަ ނަފްސު ކުއްވެރިކުރެވުނު ފުރަތަމަ ފަހަރެވެ. އެދުވަހު ބުނެވުނު ޖުމްލަތަކާމެދު ކަންބޮޑުވެވުނީ މިހުރިހާ ކަމެއްގެ އަސްލަކީ އެއީކަމުގައި ހިތް ބުނުމުންނެވެ.

ހުކުރުދުވަހު އިރު އެރުމާއެކު ޝެހެނާޒްއާއި އެކީގައި ބަދިގޭގައި އުޅެފައި ޔަލަކް އައިސް ފެންވަރައި ޒެކަންގެ ގެޔަށް ދިއުމަށް ތައްޔާރުވަމުންދިޔައިރު މިއަދު އާދަޔާ ޚިލާފަށް ތަފާތު ދުވަހެއް ހެން ޔަލަކްއަށް ހީވަމުން ދިޔައީ ބުރުގާ އެޅުމުން ކުރެވެމުން ދިޔަ އާ އިހުސާސްތަކުގެ ސަބަބުންނެވެ. އެޔާއެކުގައި މިއަދަކީ ޒެކަންއާއި އޭނާގެ ބައްޕަ އެގެޔަށް އަންނަން ހަމަޖެހިފައި އޮތް ދުވަހެވެ. ޒެކަންއާއި ބައްދަލުވުމުން ދެން ވާނީ ކިހިނެއްކަން ނޭނގޭތީވެސް ހިތުގައި އެތައް ސުވާލުތަކެއް ފުނިޖެހިފައިވިއެވެ.

ކިޔާލްއާއި އެކުގައި ޒެކަންގެ ގެޔަށްގޮސް ސިޓިންރޫމަށް ވަން ޔަލަކް ސިހުނީ ސޯފާގައި ނާސިރު އިންތަން ފެނިގެންނެވެ. މީހެއްގެ ހިލަންވެގެން ނާސިރު ވެސް ބަލައިލިއިރު ޔަލަކް ހުއްޓާފެނުމުން މިއަދު ޔަގީން ކޮށްލަން އިރުކޮޅަކު ބަލަން އިންނަން ޖެހުނީ ޔަލަކް ބުރުގާ އަޅާފައި ހުރުމުންނެވެ. “ދަރިފުޅު ބުރުގާ އެޅީތަ؟” އުފަން ބައްޕައެއްހާ ލޯބިން ދަރިފުޅޭ ކިޔާފައި ނާސިރު އެހެން އަހައިލުމުން ޔަލަކްވެސް ރައްދު ޖަވާބުގައި ލައްބައޭ ބުނެ އިއްވާލީ ހިނިތުންވެލަމުންނެވެ. އެޔަށްފަހު ނާސިރު އިޝާރާތްކޮށްލީ ކުރިމަތީގައި ހުރި ސޯފާއަށެވެ.

“ބައްޕަ ގަބޫލެއް ނޫން ދެން މިއަދަށްފަހު ދަރިފުޅު ވަޒީފާއަށްދާކަށް. ކޮފީ ޝޮޕަށްވެސް އަދި މިގެޔަށްވެސް ދެން ވަޒީފާއަދާކުރަން ދަރިފުޅު އަންނާނެކަމެއްނެތް. ބައްޕަ މިވާހަކަ ދަރިފުޅުގެ ބައްޕަ ކައިރީގައިވެސް ދެއްކިން. ބައްޕަ ބޭނުމެއްނުވޭ މި ބައްޕަގެ ހުރި ހަމައެކަނި ފިރިހެން ދަރިފުޅުގެ އަންހެނުންނަށް ދަރިފުޅުވާން އުޅޭއިރު އެއްވެސް ވަޒީފާއަކަށްދާކަށް.” ސޯފާގައި އިށީނދެލި ޔަލަކްއަށް ބަލާލާފައި ނާސިރު ލޯތްބާއެކު އިއްވައިލީ އަމިއްލަ ދަރިއަކާވެސް ވާހަކަ ދައްކާނެހާ ލޯބިންނެވެ. އެކަމަކު ނާސިރުއަށް ނޭނގުނީ ނާސިރު އެވާހަކަ ދެއްކި އުސޫލުން އެހާ ލޯބން ޒެކަން ޔަލަކްއާއި ދޭތެރޭގައި އަމަލުތައް ނުބަހައްޓާނެކަމެވެ. ކުޑަކޮށް ހިތުގައި ރިއްސާލި ނަމަވެސް ޔަލަކް ލައްބައޭބުނެ ޖަވާބުދިނީ ނާސިރުގެ އެދުމެއްގައި ކޮޅުފައިން ޖަހަން ނުކެރިގެންނެވެ. އެވާހަކަ ޔަލަކްގެ ބައްޕަ ދެއްކިނަމަ ފަހަރުގައި ވަޒީފާއިން ކެނޑެން ބޭނުންނުވާ ކަމުގައި ބުނެވުނީހެވެ. އެހެނަސް ޒެކަންގެ ބައްޕައާއި ދެކޮޅަށް އެންމެ އަކުރެއްބުނެލަންވެސް ޔަލަކް ނުކުޅެދިގެންވިއެވެ.

އިރުކޮޅަކު ވާހަކަދައްކާލަން އިނުމަށްފަހު ނާސިރު ދިއުމުން ޔަލަކް ކޮފީ ހަދައިގެން ޒެކަންގެ ކޮޓަރިޔަށް ގެންގޮސް ބަހައްޓާފައި ކޮޓަރިން ނިކުމެ ދޮރުފަތް ލައްޕާލިއިރު ޒެކަން ބެލްކަނީގައި ހުރެފައި ކޮޓަރިތެރެއަށްވަނީއެވެ. ސައިޑްޓޭބަލް މަތީގައި ކޮފީ ހުރުމުން ޒެކަން ކައިރިވެލާފައި ހިނިތުންވެލީ އެ ކޮފީއަށް އެތައް އިންތިޒާރެއްކޮށްފީމޭ ބުނެލާ ފަދައިންނެވެ. ދެން ޒެކަން ކޮޓަރީގެ ދޮރުފަތް ހުޅުވާ އެކުއްޖާ ފެންނަންހުރިތޯ ބަލާލިއިރު ފެންނަން ނެތުމުން މާދަމާއަށް ހިތިތެރޭގައި ކަމެއް ރާވާލަމުން އައިސް ކޮފީތަށިން ކޯވަރެއްބޯލިއެވެ.

ހުކުރަށްދިޔަ މީހުން މެހުމާނުންނާއި އެކީގައި ގެޔަށް އައުމުގެ ކުރިން ޝެހެނާޒްއާއި ޔަލަކް އަދި އީލަކްވެގެން މެންދުރުގެ ކެއުން އެންމެ ފުރިހަމައަށް ތައްޔާރުކޮށްލައިފިއެވެ. އަޅިކުލައިގެ ހެދުމާއެކު ޕްލަމްކުލައިގެ ޝޯލްއަޅާލައިގެން ޔަލަކް ތައްޔާރުވެލައިގެންހުރި އިރު މީހަކު އާޝޯހުވާހާ އެމޫނު ފުރިހަމައެވެ. އެހެނަސް ޔަލަކްގެ ހިތް ތެޅެމުން ދިޔައީ ވަކިވަރެއްބަލާފައެއްނޫނެވެ. ހުކުރުން އަންނަ ގަޑި ކައިރިވާ ވަރަކަށް ޔަލަކްގެ ހާސްވުން އިތުރުވީވަރުން އީލަކްއަށް އެކަން ފާހަގަ ކުރެވިގެން އައިސް ލޯތްބާއެކީގައި ޔަލަކްގެ އަތުގައި ހިފައިލީ ބޮޑުމީހަކު ހުރިހާކަމެއް ރަނގަޅުވާނޭ ބުނާފަދައިންނެވެ. ޔަލަކް ހިނިތުންވެލަމުން ގަޑިއަށް ބަލާލުމާއެކު ގޭގެ ބެލްޖަހާލި އަޑުއިވިގެން ނޭވާވެސް ހިފަހައްޓާލެވުނީއެވެ. ބަދިގޭގައި ތިބެފައި ތިން މީހުންއެކުގައި ސިޓިންރޫމަށްނިކުމެ ޝެހެނާޒް ދޮރު ހުޅުވާލުމާއެކު ފުރަތަމަ އެތެރެއަށްވަނީ ޝަރީފްއާއި ނާސިރުއެވެ. ފަހަތުން ކިޔާލްއާއިއެކު ވަން ޒެކަން ފެނި ޔަލަކްއަށް ހުއްޓުންއަރައިފިއެވެ.

ހުސް ކަޅުއެއްޗެހީގައި ޒެކަންހުރިއިރު މީހަކު ބަލާފޫހިނުވާނެހައި ފުރިހަމައެވެ. ދުނިޔެމަތީގައި އެވަރުގެ ފުރިހަމަ އިންސާނެއްހުންނާނެބާއޭ ހިތައް އަރާފައި ޔަލަކް ހުއްޓައި ހަމަހޭވެރިކަންވީ ނާސިރުއައިސް ސަލާމްކޮށްލުމުންނެވެ. ޔަލަކް ލުއި ހީލުމެއް ރައްދުކޮށްލުމާއެކު ނާސިރު ދެން ބަލައިލީ ކައިރީގައި ހުރި ޒެކަންއާއި ދިމާއަށެވެ. “ދަރިފުޅާ މީ ޔަލަކް.” ނާސިރު އެހެންބުނެލުމުން އެއްވެސް އަސަރެއްނެތަގޮތަކަށް ހީލާފައި ޒެކަން ސަލާމަށް އަތްދިއްކޮށްލީ އެންމެންގެ ނަޒަރު އޭނައަށް ހުއްޓިފައި ހުރުމުންނެވެ. ޒެކަން ޔަލަކްއަށް ބަލާލާފައި އިސްޖަހައިލިނަމަވެސް އެވިދުންގަދަ ދެލޯ ޒެކަންއަށް ފާހަގަވެއްޖެއެވެ. އެހެނަސް ދެވަނަ ސިކުންތުގައި އެހިތުގައި ރުޅިވެރިކަން ހިނގައިލީ އެ ދެލޮލުގެ ފުރަގަހުގައިވެސް މަކަރުވެރިކަމުގެ އިތުރަށް އެއްވެސް އެއްޗެއް ނުވާނެކަން އިނގިގެންނެވެ.

އެކިވާހަކަތަކުގައި ކެއުން ކުރިޔަށްދިޔައިރު ޔަލަކް އިނީ ޒެކަންގެ ކުރިމަތީގައި އިންނަން ޖެހުމުން އުނދަގޫވެފައެވެ. އަނެއްކޮޅުން ޒެކަންގެ ހާލަކީ ތޯއެވެ. މިތަނުން އަވަހަށް ދުރަށްނުދެވިފައި އިދެވުނީ އެއްވެސް މީހަކަށް، ދައްކަމުންދިޔަ އެއްވެސް ވާހަކައަކަށް ސަމާލުކަމެއް ނުދެވިފައެވެ.

ނާސިރުއާއި ޝަރީފްގެ އިތުރުން ދެންތިބި މީހުން އެތައް ވާހަކައެއް ދައްކަމުން ދިޔައިރުވެސް ހިމޭންވެފައިތިބީ ޔަލަކްއާއި ޒެކަންއެވެ. ކިޔާލްއާއި އީލަކްވެސް ދޭތެރެއަކުން ކޮންމެސް ވާހަކައެއްގައި ބައިވެރިވެލައެވެ. ވާހަކައިގެ ތެރެއިން ހުރިހާކުދިންނަށް އާ ވާހަކައެއްވެސް ނާސިރު ހިއްސާ ކޮށްލިއެވެ. ނާސިރުގެ އަންހެނަންނާއި ދަރިފުޅު ނިޔާވުމަށްފަހު ނާސިރުގެ ދިރުއުޅުން ބޮއްސުންލައިގެންދާންފެށުމުން ނާސިރުގެ އެންމެ ކައިރީގައިހުރެ ހިތްވަރުދީ އެންމެ ގާތުން އެހީތެރިވި ރަހުމަތްތެރިއަކީ ޝަރީފްކަމުގައި ކިޔައިދިނުމުން ޝެހެނާޒް ފިޔަވައި ހުރިހާ ކުދިންވެސް ތިބީ ހައިރާން ކަމެއްގައެވެ. ކުޑަމިނުން ބައްޕަގެ ވިޔަފާރިކޮޅަށްޖަހައިދިނުމަށް ޝަރީފްއެތައް އެހީއެއްވިއިރުވެސް ޒެކަންއަށްވެސް އެކަމެއް ނޭނގެއެވެ. ބައްޕަ ކިޔައިދީފައިވެސް ނެތީއެވެ. މިހާހިސާބުން ޒެކަންއާއި ޔަލަކްއަށްވެސް ޝަރީފްއާއި ނާސިރުގެ ގުޅުމަކީ ކިހާވަރެއްގެ އެއްޗެއްކަން ވިސްނާލެވިއްޖެއެވެ.

“ދަރިފުޅުމެން ތިހެން ތިބެގެން ކިހިނެއް ކައިވެނީގެ ކަންތައް ނިންމާނީ؟ ތާރީހެއް ކަނޑައަޅަންވީނު ޒެކަން؟” ނާސިރު އެންމެފަހުން އެހެން ބުނެލީ އެދެކުދިންގެ ފަރާތުން އެއްވެސް ބައިވެރިވުމެއް ނުފެނުނީމައެވެ. “ބައްޕަމެނަށް ރަނގަޅު ތާރީހެއް ނިންމީމަ އަޅުގަނޑަށް އެންމެ ރަނގަޅުވާނެ.” ޒެކަން އެހެންބުނެލިއިރު އެންމެންގެ ލޯތައް ޒެކަންއަށް ހުއްޓިފައިހުރުމުން އެކަމާ ޒެކަން ހިތްހަމަނުޖެހުނުވަރުން އެހެން ބުނެލިއިރު އަޑުގައިވެސް ހިސާބަކަށް ހިތްހަމަނުޖެހުން ވެރިވެގެންދިޔައެވެ.

“ދަރިފުޅު ޔަލަކްއަށް އެގޮތް ކަމުދޭތަ؟” ޝަރީފްވެސް ޔަލަކްގެ ހިޔާލަކަށް އެދިގެން އަހައިލިއެވެ. ލަދުންވިރިވިރިއިން ހާލު ލައްބައޭ ބުނެލަމުން ޔަލަކްއިސްޖަހައިލީއެވެ. މިތަންފެނި ކިޔާލްއަށް މަޑުންއިންނަން އުނދަގޫވެގެން ކައިރީގައި އިން ޔަލަކްގެ ފައިގައި ކޮއްޓާލައިފިއެވެ. ނުވިސްނާއިން ޔަލަކް ސިހިގެންދިޔަވަރުން ކުރިމަތީގައި ހުރި ފެންތަށީގައި އަތުންޖެހިފައި ނުވެއްޓި ސަލާމަތްވީ ކިރިޔާއެވެ. އެންމެން ޔަލަކްގެ މޫނަށްބަލަންފެށުމުން ޔަލަކްއަށް ކުރެވުނުކަމަކީ ކިޔާލްއަށް ލޯއަޅާލެވުނީއެވެ. އޭރުވެސް ޒެކަންއިނީ އިސްޖަހައިގެން ހިމޭނުންނެވެ.

އެތައް އިރަކު ވާހަކަދެއްކުމަށްފަހު އަންނަ ޖުލައިމަހުގެ 17 ވަނަދުވަހުގައި ކައިވެނި ކުރެވޭގޮތައް ނިންމުނެވެ. ޔަލަކްއާއި ޒެކަންވެސް އެއްބަސްވުމުގެ ގޮތުން ބަހެއްބުނެލާފައި ހުރިހާ ކަމެއް ބައްޕަމެންގެ އަތްމައްޗަށް ދޫކޮށްލައިގެން ހިމޭނުންތިބީއެވެ. ކައިވެނީގެ ތައްޔާރީތައް އަންނަ ހަފްތާއިން ފެށިގެން ކުރިޔަށްގެންދިޔުމަށް ނިންމާފައި ނާސިރުއާއި ޒެކަން ގެޔަށްދިޔުމަށް ނިކުތީ އިތުރަށްވެސް ސިޓިންރޫމުގައި ތިބެ އެތައް ވާހަކައެއްދައްކާފައެވެ.

ޒެކަންމެން ދިއުމާއެކު ކިޔާލްގެ ލާނެތް ބަސްތަކާއި ޔަލަކް ކުރިމަތިލާން ޖެހިއްޖެއެވެ. ރުޅިމޫނު ހަދާފައި ޔަލަކް ކިޔާލްއަށް އެއްޗެހި ގޮވަމުން ގޮސް ކޮޓަރިއަށްވަނީ މާސަކަރާތްބޮޑުކޮށްގެން ޝެހެނާޒް ހަޅޭއްލަވާނެކަން އިނގޭތީއެވެ. އީލަކްވެސް ދޮންތައާއި ދޮންބެ އުޅޭގޮތުން ހީހީފައި ޝެހެނާޒްއާއި އެކީގައި ވަނީ ބަދިގެޔަށެވެ. ޔަލަކް އެއްޗެހި ބަދަލުކޮށްލައިގެން ބަދިގެޔަށްވަން އިރު ކިޔާލް ގެއިންނިކުންނަންދަމުން ޒަޔާންގެ ގެޔަށްދަނީ ކަމުގައި އިއްވައިލީ ޝޭހެނާޒްއަށް ގޮވާލާފައެވެ.

ހަމައެދުވަހު ޔަލަކްގެ ވަޒީފާއާއި ބެހޭގޮތުން ޒެކަން ބައްޕަ ދެއްކި ވާހަކަ މަންމަމެންނާ ހިއްސާކޮށްލާފައި އާލިމްއަށް ގުޅައި ވަޒީފާއިން ވަކިވާން ބޭނުންކަމުގައި އަންގައިލިއެވެ. އެހެނަސް އެހިތުގައި ކުޑަރިހުމެއް އުފެދުނީ އެހުރިހާ ދުވަހު ވަޒީފާއަދާކުރަމުންއައި ތަނުން ވަކިވާން ޖެހުމުންނެވެ. އެހެނަސް ހިތުގައި އަތްއަޅާލާފައި އެކަމާ ކުރިމަތިލީއެވެ.

އެރޭގެ ކެއުމަށްފަހު ޔަލަކްއާއި އީލަކްއާއި ދެކުދިންވެގެން ތަށިތައް ނެގުމުގައި އުޅެނިކޮށް ކިޔާލްއައިސް ޖެއްސުންކުރަން ހަދައިގެން އެއްއަތުން ފޯނުގައި ހިފަހައްޓާލައިގެންހުރެ އަނެއްއަތްމަތީގައި ތަށިތައް އަތުރާލައިގެން ސިންކުކައިރީގައި ތަށިތައް ދޮންނަންހުރި އީލަކްއާއި ކައިރިވެލި ޔަލަކްގެ އަތުގައި އޮތް ފޯނު ސިންކުގެ ތެރެއަށްދޫވެގެންދިޔައީ ކިޔާލްހެދި ގޮތަކުން ޔަލަކްގެ އަތުން ތަށިތައްދޫވަން އުޅުމުން އެސަލާމަތްކުރަންއުޅެން ހަދައިގެންނެވެ. ފެނުގެ ތެރެއަށް ދޫވެގެންދިޔަ ފޯނު ފެނުމާއެކު ތަށިތައް ސިންކުގެ ތެރެއަށް ލާފައި ޔަލަކް ރުޅިއައިސްގެން ކިޔާލްގެ ފަހަތުން ދުއްވައިގަތުމުން ފެންތަކުގެ ތެރެއިން ފޯނު ނެގީވެސް އީލަކްއެވެ.

ޔަލަކް ރުޅިއައިސްގެން އެހާ ބާރަށް ދުއްވައިގަތުމުން މިފަހަރު ސަލާމަތްނުވާނޭ ހިތައި ކިޔާލްގޮސް ވަނީ ކޮޓަރިޔަށެވެ. ޔަލަކް ރުޅިއައިސްގެން ކިޔާލްކޮޓަރީގެ ދޮރުފަތުގައި ބާރަށް ތަޅަންފެށުމުން އެއަޑަށް ކޮޓަރީގައި އުޅެފައި ޝަރީފްއާއި ޝެހެނާޒްވެސް ނިކުމެއްޖެއެވެ. އޭރު ޔަލަކް ރުޅިއައިއްސަ ހުރިއިރުވެސް އެދެލޮލުން ކަރުނައިގެ އަސަރު ފެންނަން ހުރުމުން ޔަލަކްއަށް އަސަރުކޮށްފައިވާވަރު ކިތަންމެ ރަނގަޅަކަށްވެސް ބަލާލި މީހަކަށް އިނގޭނެއެވެ. “މަންމާ ދޮންބެ އަޅުގަނޑުގެ ފޯނު ސިންކުގެ ތެރެއަށް ވައްޓާލީ.” ޔަލަކް ރޮވިފައި ކަހަލަ ގޮތަކަށް އެހެންބުނެލީ ޝެހެނާޒްއާއި ޝަރީފް ވީ ކީއްތޯ އަހަން ފެށުމުން ތުން އޫކޮށްލާފައެވެ.

“ދޮންތަގެ ފޯނު ނުވާނެ ކަންނޭނގެ ރަނގަޅެއް” ޝެހެނާޒްއާއި ޝަރީފްއަށް އެއްޗެއް ނުބުނެވި އުޅެނިކޮށް އެތަނަށް އައިސް ހުއްޓުނު އީލަކް ދޮވެވިފައި އޮތް ޔަލަކްގެ ފޯނު ދައްކާލަމުން އެހެން ބުނެލައިފިއެވެ. އީލަކްއަތުން ފޯނު ނަގާފައި ޝަރީފް ޔަލަކްގެ ފޯނަށް ބަލާލަމުން ބޯހޫރައިލީ ކުޑަޔަށް ހުރި ކުއްޖާއަށްވުރެ ބޮޑަށްތިބި އޭނާގެ ދެކުދިންގެ ޅަކަން ހިތައް އަރާފައެވެ. ޝެހެނާޒްވެސް ފަތިވަރުތަކެއް ކިޔާލާފައި ކިޔާލްއަށް ގޮވާލުމުން ނުހުޅުވާ ހުންނަން ނުކެރިގެން ކިޔާލް ކޮޓަރީގެ ދޮރު ހުޅުވާލައިފިއެވެ.

ޔަލަކް ރުޅިއައިސް ރަތްވިޔަސް ބައްޕަ ހުރުމުން މާ ކަންތައްބޮޑުކުރާކަށް ނުކެރުނެވެ. “އަޅުގަނޑު ގަސްތުގައެއްނޫނޭ” ކިޔާލް އެހެންބުނެލާފައި ޔަލަކްއަށް ބަލާލިއިރު ޔަލަކް ހުރިގޮތުން ކިޔާލް ޖެހުނީ ހިނިގަނޑު މަތަކޮށްލާށެވެ. އެހެނަސް ޔަލަކް ކައިރިން މާފަށް އެދިފައި މާދަމާ ރޭގައި ދޮންބެ އާއި އެކީގައި ފޯނެއް ގަންނަން ދާނީއޭ ބުނުމުން ދެން ޔަލަކްވެސް ކުޑަކޮށް ހަމަޖެހިލައިފިއެވެ.

އަނެއްދުވަހު ހެނދުނު ކޮފީ ގެނެއްސަ ނެތުމުން ޒެކަންގެ ހިތައް ނުތަނަވަސްކަން ވެރިވިއެވެ. އަނެއްކާވެސް ބަލިވީބާއޭހިތައި އާލިމް ދިން ނަންބަރަށްގުޅާލުމުން ޖަވާބުލިބުނީ ފޯނު ނިއްވާލާފައިވާ ކަމަށެވެ. ގަބޫލުކުރަން ބޭނުންނުވެގެން ޒެކަން އެތައް ފަހަރަކު ޑައިލްކުރިއެވެ. އެހެނަސް ލިބުނީ އެއް ޖަވާބެކެވެ. މާޔޫސްވާ ކަމުގެ އިހުސާސެއްކުރެވިގެން ޒެކަން ނިންމީ އަދި އިންތިޒާރުކޮށްލުމަށެވެ. ފަހަރުގައި ކަމެއްދިމާވީ ކަމަށްވެދާނެއެވެ.

މިގޮތުގައި މެންދުރު ފަސްވެގެން ދިޔައިރު ޒެކަންގެ ކެތްތެރިކަން ކޮޅުން ލައިފިއެވެ. އޭގެ ފަހުންވެސް ކިތަންމެ ފަހަރަކު އެ ނަންބަރަށް ގުޅުމުންވެސް އެއްވެސް ކަހަލަ އުންމީދެއް ނުފެނުނެވެ. ޒެކަން މާޔޫސްވީ މާފަށްއެދެން ބޭނުންވެފައިހުއްޓާ މިހެން ދިމާވުމުންނެވެ. ޒެކަން އެހުރީ ކިޔުނު އެއްޗެއްސާދޭތެރޭގައި ވިސްނާލައި އަމިއްލަ ނަފްސު ކުއްވެރިކޮށްލައިގެންނެވެ. އަންހެނެއްގެ ކިބައިން މާފަށްއެދެންބޭނުންވެދާނެ ކަމަށް ހުދު ޒެކަންވެސް ގަބޫލެއްނުކުރެއެވެ. އެހެނަސް އެ ކުއްޖާގެ މުހިންމުކަން މިއަދު ޒެކަންއަށް އިހުސާސްކުރެވެމުންދަނީއެވެ. އެކުއްޖާ ނައުމުގެ ފަޅުކަން ޒެކަންގެ މުޅި ދުވަހުގެ ހިތަހަމަޖެހުން ނަގާލައިފިއެވެ.

އެންމެ ފަހުން ޒެކަން އަނެއްކާވެސް އާލިމްއަށް ގުޅާލީ ކޮފީޝޮޕުގައި އުޅޭނޭ ހީކޮށްގެންނެވެ. އާލިމްގެ ނަންބަރަށް ގުޅާލާފައި ފޯނު ކަންފަތުގައި ޖަހާލަމުން ޒެކަންއަށް ދެކޮޅަށް ހިނގަންފެށުނީ ހިތްއަވަސްވެފައިވާތީއެވެ. “ހަލޯ” އެކޮޅުން އާލިމްގެ އަޑުއިވުމާއެކު ޒެކަން ސުވާލުކޮށްލީ އޭނައަށް ކޮފީ ގެނެސްދޭ ކުއްޖާ ޑިއުޓީގައި ހުރިތޯއެވެ. ” ވަރަށް ބޮޑަށް ސޮރީ ޒެކަން. އަހަރެން ޒެކަންއަށް ގުޅަން އުޅެނިކޮށް ތި ގުޅީވެސް. އޭނަ ވަޒީފާއިން ކެނޑުނީ މިއަދު. ކައިވެނިކުރަން އުޅޭތީ.” ކަންފަތްދޮށުގައި ބޮމެއްގޮއްވާލިޔަސް ނުލިބޭނެހާ ސިހުން އާލިމްގެ ބަސްތަކާއެކު ޒެކަންއަށް ލިބިގެންދިޔައީ ފައިދަށުގައި އޮތްބިންގަނޑުވެސް ހެލިގެންދިޔަފަދަ އިހުސާސަކާ އެކީގައެވެ.

-ނުނިމޭ-