ސިއްރު ސިއްރުން ހިތޭ މިލްކު ކޮށްލީ ކަލާ… (ހަވަނަ ބައި)

“އެންމެ ރަނގަޅު” ޒެކަން ވިސްނާލާފައި ކުރު ޖަވާބެއްދިނީ ބައްޕަގެ އުންމީދުތަކާ ދޭތެރޭގައި ވިސްނާލާފައެވެ. އޭނައަށް އުފަލެއް ނުލިބުނަސް ބައްޕަ އުފަލުގައި ހުންނަތަން ދެކެން ޒެކަންގެ ފުރާނަވެސް ގުރުބާން ކުރަން ބޭނުންވެއްޖެއެވެ.

އާ ހެނދުނަކަށް ލޯ ހުޅުވާލެވުމާއެކީގައި ޔަލަކްގެ ސިކުނޑިއަށް ފުރަތަމަވެސް ބޮނޑިވެގެންއައީ ޒެކަންގެ ޖުމްލަތަކެވެ. ޒެކަންއަށް ނޭނގުނަސް ޔަލަކް ގެ ހިތައް ކިތަންމެ އަނިޔާއެއް އެބަސްތަކުން ލިބިއްޖެއެވެ. ތެދުވާހިތްނުވެފައި އެތައް އިރަކު އޮތުމަށްފަހު ޔަލަކް އެނދުން ތެދުވެ ފާހާނާއާއި ދިމާއަށް ހިނގައިގަތީ މިއަދު ޒެކަންގެ ގެޔަށް ނުދާން ނިންމައިގެންނެވެ.

އާއިލާގެ ހުރިހާ މެމްބަރުންނާއެކީގައި ހެނދުނުގެ ސަޔަށް އިންސާފުކުރަމުން ދިޔައިރު މިއަދު ޔަލަކް އާދަޔާޚިލާފަށް ހިމޭންކަން އެންމެނަށްވެސް ފާހަގަ ކުރެވުނެވެ. އެހެނަސް ކިޔާލްއަށް އިހުސާސްކުރެވުނު ފަޅުކަން އެހެން އެންމެނަށްވުރެ ބޮޑުވުމުން ކިޔާލް ޔަލަކްކުރެން މަޑުމައިތިރިކަމާއެކީގައި ސުވާލުކޮށްލީ ބައްޕައިނުމުން މާބޮޑަށް ސަކަރާތްޖަހަން ނުކެރިގެންނެވެ. ކިޔާލްގެ ސުވާލާއެކީގައި ޔަލަކް އިސް އުފުލާ ކޮންމެ މީހެއްގެމޫނަށް ވަކިވަކިން ބަލާލުމަށްފަހު ކަމެއްނުވެޔޭ ބުނެ ޖަވާބުދިނީ އެންމެންގެ ކުރިމަތީގައި ބުނަން އެޔަށްވުރެ ރަނގަޅު ޖަވާބެއް ނޯންނާނެތީއެވެ. އެކިވާހަކަތައް ދެކެވިގެން ސައި ނިންމާލުމަށްފަހު ޝަރީފް އެންމެނަށް ގޮވާލާފައި ދަނީއޭބުނެލަމުން ގެއިން ނިކުތީ ސްކޫލަށްދާން ތައްޔާރުވެގެންހުރި އީލަކްވެސް ގޮވައިގެންނެވެ. ޔަލަކް ގޮސް ވެއްޓިގަތީ ސިޓިންރޫމުގެ ސޯފާއަށެވެ.

“ހޭއި މިއަދު ކިހިނެއްވެފަ ތި ހުންނަނީ؟” ޔަލަކްއަށް ކޮންމެވެސް ކަމެއްވެއްޖެޔޭ ކިޔާލްގެ ހިތްބުނަން ފެށުމުން ސޯފާގައި އޮތް ޔަލަކްގެ ބޮލުގައި ލޯބިން ފިރުމާލަމުން ކިޔާލްއަހައިލިއެވެ. ކިޔާލް ކިތަންމެ އެކުވެރިކޮށް ލޯބިން އުޅުނަސް އެކަހަލަ ވާހަކައެއް ކިޔާލްކައިރީގައި ބުނަން ނުކެރޭނެތީ ޔަލަކް ހިމޭންކަން އިޚްތިޔާރުކުރިއެވެ. “ދޮންބެ ޑިއުޓީއަށް ނުދާދުވަހެއްތަ؟” ޔަލަކް ބޭނުންވީ ވާހަކައޮޅުވާލާށެވެ. “އެހެންތަ މަންޖެ ގަނޑު؟ ހީކުރީތަ ވާހަކަ އޮޅުވާލެވޭނޭ؟” ކިޔާލް ކުޝަންއެއް ނަގައި ޔަލަކްގެ މޫނުމަތީގައި ޖަހައިފިއެވެ. ޔަލަކް ހީގެންފައި ތެދުވެ ކިޔާލްއަށް އަމާޒުކޮށްފައި އެއްލި ކުޝަން ކިޔާލް ގުދުވެލުމުން ގޮސް ޖެހުނީ ސިޓިންރޫމުދޮރުން ވަން ޒަޔާންގެ މޫނުގައެވެ. “އަޅެފަހެ ތީގެ ދެމީހުން ހުއްޓާލާނީ އެކަކު އަނެކަކުގެ އަތުން މަރުވީމަތަ؟” ސަކަރާތުގައި ބައިވެރިވަމުން ހިނިގަނޑެއްޖަހާލާފައި ޒަޔާންވެސް އެހެން ބުނެލީ ކިޔާލްގެ ކޮނޑުމަތީގައި ބޮނޑިއެއް އަޅާލާފައެވެ.

“މިއަދުވެސް ފެށީދޯ ކިޔާލް. މަންމަ ކިތައް ދުވަހު ބުނާނީ ތިވަރަށް ސަކަރާތް ނުޖަހާށޭ. ކުޑައިރު ތީގެ ދެކުދިންނަށް ސަކަރާތްޖެހުނުވަރު މަދުވެގެންތަ މިހާރުވެސް ތިވަރު ތިކުރަނީ އަޅެ؟ ދަރިފުޅު ޒަޔާންވެސް އެބަހުރިންތަ؟” ކިޔާލްއާއި ޔަލަކްއަށް އަޑުލައިގެންފައި ޝެހެނާޒް ދެން ބަލައިލީ ހިނިއައިސްފައި ހުރި ޒަޔާންއަށެވެ. “މި ޔަލަކް ކުޝަންއިންވެސް އެޖެހީ ޒަޔާންގައިގަ މަންމާ.” ޒަޔާންއަށް އެއްޗެއް ބުނެވުމުގެ ކުރީގައި ކިޔާލް ރާގެއްލާފައި އެހެންބުނެލުމާއެކު ޔަލަކްއަށް ކެތްނުވެގެން ކިޔާލްއާއި ދިމާއަށް ފުންމައިގަތުމާއެކު ނުވިސްނާހުރި ކިޔާލްއަށްވެސް ހަށިގަނޑު ބެލެންސް ނުކުރެވިގެން ދެމީހުން އެއްފަހަރާ ގޮސް ޖެހުނީ ޓައިލްސްތައްމަތީގައެވެ.

ޔަލަކް ބާރަށް ހަޅޭއްލަވައިތީ އަތައްތަދުވެގެންދިޔަ ވަރުންނެވެ. ސިކުންތުކޮޅެއްގެ ތެރޭގައި ވެގެންދިޔަކަމެއްކަމުން ޝެހެނާޒްއަށްވެސް ނުހުއްޓުވުނީއެވެ. “އަޅެ އެވަރަށް ތިސަކަރާތް ހުއްޓަލާށޭ ބުނީމަ.” ޝެހެނާޒް ރޮއިގެންފައި ކަހަލަ ގޮތަކަށްއައިސް ޔަލަކް ކައިރީގައި ކުޑަކަކޫ ޖަހާލިއެވެ. ކިޔާލްވެސް އަވަހަށްތެދުވެ ޒަޔާންއާއި މަންމަގެ އެހީގައި ޔަލަކްގެނެސް ސޯފާގައި ބައިންދާފައި މަންމައަށްބުނެލީ އައިސްޕެކްއެއް ގެނެސްދިނުމަށެވެ. ހަގީގަތުގަވެސް ކިޔާލް ވަރަށް ދެރަވެއްޖެއެވެ. އެހެނަސް ކިޔާލްވެސް ނުވިސްނާ ހުއްޓާ ޔަލަކް އައިސް ޖެހިގަތުމުން ވެއްޓުނީއެވެ. ޔަލަކްގެ އަތުގައި ހިފާ ބަލާލަމުން ކިޔާލް ޔަލަކްއަށް ބަލައިލިއިރު އެދެލޮލުން ކަރުނައިގެ އަސަރުފާޅުވާން ހުއްޓެވެ. ކިޔާލް ބަލައިލިއިރު ޔަލަކްގެ ކަނާއަތުގެ ކުޑަހުޅާދިމާއިން ދުޅަވެއަރަނީއެވެ. ޒަޔާންވެސް ކައިރިވެލާފައި ޔަލަކްގެ އަތައް ރަނގަޅަށް ބަލާލިއެވެ. ކިޔާލް މަންމައަށްގޮވަން އިސްއުފުލާލުމާއެކު މަންމަ އައިސް އައިސްޕެކް ކިޔާލްގެ އަތައް ލައިދީފިއެވެ. ޔަލަކްގެ އަތުގައި އައިސްޕެކް ޖައްސާލަމުން ކިޔާލް ޒަޔާންއަށް ބަލާލިގޮތުން ޒަޔާންއަށް ވިސްނިގެން ފޯނުނަގައި އެމްބިއުލާންސްއަށް ގުޅާލިއެވެ.

ޒެކަންއަށް ހޭލެވުމާއެކު ފުރަތަމަވެސް ބަލައިލެވުނީ އެނދުގެ އެއްފަރާތުގައިހުރި ސައިޑްޓޭބަލްއާއި ދިމާއަށެވެ. ޒެކަންގެ މޫނުމަތިން އިންތިހާއަށް ހައިރާންކަން ފެނިގެންދިޔައީ ސައިޑްޓޭބަލްމަތީގައި ކޮފީ ގެނެސްފައި ނެތުމުންނެވެ. މިއަދު މި ހޭލެވުނީ މާއަވަހަށޭ ހިތައި ފޯނުނަގައި ގަޑިބަލާލުމާއެކު ޒެކަންގެ ހިތް ތެޅިލައިފިއެވެ. 8 ޖަހަނީއެވެ. މިއަދު ކޮފީ ނުގެންނަ ދުވަހަކީ ހެއްޔެވެ؟ ސުވާލު އުފެދިފައި އިން ޒެކަންގެ ހަނދާނަށްއައީ އިއްޔެ ކަންތައްވީ ގޮތެވެ. އެއަންހެންކުއްޖާއާއި ދިމާއަށް ކިޔުނު އެއްޗެއްސެވެ. ޒެކަން އެންމެ ފަހުން ބުނެވުނު ޖުމްލަ ހަނދާންވުމާއެކު ބޮލުގައި ހިފަހައްޓަލެވުނެވެ. އެއީ ބުނަން ޖެހޭނެ އެއްޗެއްނޫނެވެ. ރުޅިއައިއްސަހުރިވަރުން އެހެން ބުނެވުނީ ޒެކަންގެ އިޚްތިޔާރުން ބޭރުގައެވެ. ޒެކަންއަށް ހިތާދިމާއިން މޭގައި އަތުން ފިރުމާލެވުނީ ފުރަތަމަ ފަހަރަށް އެ ކޮފީ ނުލިބުމުން އިހުސާސްކުރެވުނު ފަޅުކަމުގެ ސަބަބުންނެވެ. އެ ކޮފީއަށް ޒެކަން ބޭނުންވެފައިވީ ވަރު އިހުސާސް ކުރެވުމުން އެ އަންހެންކުއްޖާއަށް ގުޅަން ނިންމައިގެން އާލިމްއަށް ގުޅާލުމަށްފަހު ފޯނު ކަންފަތުގައި ޖަހާލިއެވެ.

ޒެކަންއަށް އެތައް ފަހަރަކު އާލިމްދިން ނަމްބަރަށް ގުޅިއްޖެއެވެ. އެހެނަސް ޖަވާބެއް ނުދެއެވެ. ޒެކަން މާޔޫސްވާން އުޅެފައި އެޔަށްވުރެ އަވަހަށް އެ އިހުސާސްގެ މައްޗަށް ރުޅިވެރިކަން ކުރި ހޯދައިގެން ހިތާހިތުން އެ ކުއްޖާއަށް އެއްޗެހިގޮވަން ފެށުނެވެ. އެވަރު އެއްޗެކޭ ބުނެވިގެން ކަންތައް ބޮޑުކުރަންވެގެން ހަމަ ގަސްތުގައި ނައީއެވެ. ނުވިތާކަށް ފޯނުވެސް ނުނަގަނީ ޒެކަންއަށް އެހެން ބުނެވުނީތީ ގޮތްދެއްކެން ވެގެންނެވެ. ރުޅިއައިސްގެން ހުރެފައިވެސް ޒެކަން އޮފީހަށްދާން ތައްޔާރުވާންފެށިއެވެ.

ހޮސްޕިޓަލުން ގެޔަށްއާދެވުމާއެކު ޔަލަކް މަޑުމަޑުން ހިނގާލާފައިގޮސް ކޮޓަރިޔަށްވަދެ އެނދުގައި ހަށިގަނޑުދަމާލީ އަތަށް އޭރުވި ތަދެއްގެ ސަބަބުން ބޮލަށް އެނބުރުން އަރާފައި ހުރީމައެވެ. ޝެހެނާޒްއާއި ކިޔާލް އަދި ޒަޔާންވެސް ޔަލަކްއާއި އެކީގައި އެކޮޓަރިޔަށްވަދެ ޔަލަކްގެ ކައިރީގައި އިށީނދެފައި ކިޔާލް ވަރަށް މަޑުމަޑުން ބެންޑޭޖްކޮށްފައިވާ ޔަލަކްގެ އަތް، ކައިރީގައި އޮތް ބާލީސްމަތީގައި ބާއްވާލީ ކިރިޔާ ހަރަކާތެއްވެސް އެއަތައް ނާންނަހައި ބަލައިގެންނެވެ. ޔަލަކް ކިޔާލްގެ މޫނަށް ބަލާލާފައި ހިނިތުންވެލުމަށްފަހު ލޯމަރައިލީ ދޮންބެ އެހުރީ އަމިއްލަ ނަފްސު ކުއްވެރިކޮށްލައިގެންކަން އިނގޭތީ އެހިޔާލު ދުރުކޮށްދެވޭތޯއެވެ.

“ދެންވެސް ދަރިފުޅުމެން ތިވަރަށް ސަކަރާތް ޖެހުން ހުއްޓާލަންވެއްޖެއެއްނު. ނަސީބެއްނު ޔަލަކްގެ އަތަށް ބޮޑުއަނިޔާއެއްލިބިފައި ނެތްކަން. އެހެންނޫންނަމަ ބައްޕަ ރުޅިވެސް އައީސް ކަންނޭނގެ. މިހާރު ތިޔައީ ކުޑަ ދެކުދިންނެއްނޫނެއްނު. ޔަލަކް ދަރިފުޅު ދެންނުވާނެ އެހާ ސަކަރާތް ބޮޑުކޮށްގެން. ކިޔާލްވެސް އެވަރަށް ޔަލަކް ރުޅިއަރުވައިގެން ނުވާނެ.” ޝެހެނާޒް އެހެންބުނެލީ ޔަލަކްގެ ބޮލުގައި ފިރުމާލަމުން ކިޔާލްއަށް ބަލާލާފައެވެ. ކަށިގަނޑަށް ގެއްލުމެއް ވެފައި ނެތަސް ވެޓުނުއިރު އަތްވިދުމުން އެވަރަށް ދުޅަވީއެވެ. ހޮސްޕިޓަލަށްދިޔައީ އެކްސްރޭނަގައި ކަށިގަނޑަށް ގެއްލުމެއްވެފައިހުރިތޯ ބެލުމަށެވެ. ދެކުދިންނަށް އެތައް ނަސޭހަތެއް ދިނުމަށްފަހު ޝެހެނާޒް  ކޮޓަރިން ނިކުންނަން ހިނގައިގަތީ މެންދުރަށް ކެއްކުމާއިގެން އުޅުމަށެވެ.

ޒަޔާންވެސް އިރުކޮޅަކު އިނދެލާފައި ގެޔަށްދިޔުމަށް ކޮޓަރިން ނިކުންނަން ހިނގައިގަތީ ޔަލަކްއާއި ކައިރިވެލުމަށްފަހު ދަނީއޭ ބުނެލާފައެވެ. ޒަޔާން ނުކުތުމުން ކިޔާލް ބަލައިލީ ފުން ނިންޖަކަށް ގެނބިގެންދިޔަ ޔަލަކްއަށެވެ. “ސޯ ސޮރީ ދޮންބެގެ ޕްރިންސެސް. ދޮންބެއަށް މާފުކުރައްޗޭ ޔަލް” ކުޑަކުއްޖަކާ ވާހަކަ ދައްކާއުސޫލުން ކިޔާލް އެހެންކިޔާލާފައި ކޮޓަރިން ނިކުތީ އަދިވެސް އެއްފަހަރު ޔަލަކްގެ އަތަށް ރަނގަޅަށް ބަލާލާފައެވެ.

ޔަލަކްއަށް ލޯހުޅުވާލެވުނުއިރު އަދިވެސް ކުޑަކޮށް އަތައް ތަދުވެފައިހުރުމުން ބެންޑޭޖްކޮށްފައިވާ ކަނާއަތުގައި ވައަތުން ފިރުމާލަމުން ދެން ހޯދައިލީ ފޯނު އަތުޖެހޭތޯއެވެ. އެނދުމަތީގައި އޮތް ފޯނުއަތުޖެހުމުން ޔަލަކް ގަޑިން ވީއިރެއް ބަލައިލުމަށް ފޯނު އޮން ކޮށްލުމުން ފުރަތަމަވެސް ލޮލުގައި އަޅައިގަތީ ނުދަންނަ ނަންބަރަކުން އައިސްފައިވާ 7 މިސްކޯލެވެ. އެހެންޏާ ޔަލަކްގެ ފޯނަކީ ދުވާލު ހަތަރުދަމު އެއްލާލާފައި އޮތަސް އެޔަށް ގުޅާލާނެ މީހަކު ނުވާ ފޯނެކެވެ. އެހެނަސް މިއަދު އެވަރަށް ގުޅާފައި އެއޮތީ އަދި ނުވެސް ދަންނަ ނަންބަރަކުން އަދި އެހާ ހެނދުނު ގަޑިއެއްގައެވެ. ދެފިކުރެއްގައި އޮވެ ޔަލަކް އެ ނަންބަރަށް ޑައިލްކޮށްލާފައި ކަނފަތުގައި ޖަހައިލިއިރު ހިތުގައިއޮތީ ކާކުކަން ނޭނގޭތީ ކުރެވޭ ސުވާލެވެ.

އެކޮޅުން ހަލޯއޭ ބުނެލިއަޑު އިވުމާއެކު ޔަލަކް ގަނޑުވެއްޖެއެވެ. އެއީ ޒެކަންގެ އަޑުކަން ޔަގީން ކުރަން އެލަފްޒު އެކަނިވެސް ޔަލަކްއަށް ފުދިއްޖެއެވެ. ދެވަނަފަހަރަށް އެކޮޅުން ހަލޯއޭބުނެލުމުން ޔަލަކް ޖަވާބުދިނީ ވަރަށްވެސް މަޑުމައިތިރިކަމާއެކީގައެވެ.

“އަހަންނަށް ކޮފީ ހަދައިދޭން އައިސްދެވިދާނެތަ؟” ޒެކަންގެ އެ ޖެހިލުންކުޑަ ސުވާލުންވެސް ޔަލަކް ސިހިއްޖެއެވެ. އަނެއްކޮޅުން އިއްޔެ އެހުރިހާ އެއްޗެއްކިޔާލާފައި މިއަދު ގުޅާލާފައި އެބުނީ ކޮފީ ހަދަން އައިސްދިނުމަށެވެ. އަޖައިބެއް ކަހަލަ އިންސާނެއް ނޫންހެއްޔެވެ؟

“އަޅުގަނޑު ބަލިވެ މިއުޅެނީ. ވެއްޓިގެން އަތައް ތަދުވެގެން.” ޒެކަންގެ އެދުމަށް ދެކޮޅުނުހެދުމަށް ހިތް އެދި ގޮވަމުން ދިޔައިރުވެސް ޔަލަކް ތެދު ހާމަކޮށްލަމުން ތަފްސީލުކޮށް އޭނަގެ ހާލު އިއްވައިލީ ޒެކަންދެކެ ޖެހިލުންވެފައި ހުރުމުންނެވެ. އެވަރުންވެސް އެހެންބުނާއިރަށް ޒެކަން އެއްޗެއް ނުބުނެ ފޯނުކަނޑައިލުމުން ޔަލަކްގެ ހިތައް ތުނޑުތޫނު ކައްޓެއް ހެރުނުފަދަ އިހުސާސެއް ކުރެވިގެންދިޔައެވެ.

އެދުވަހު މެންދުރުކެއުމުގައި ބައްޕަބައިވެރިވެ ދެއްކި ވާހަކަޔަކުން ޔަލަކްގެ މުޅިދުނިޔެ ސިއްސުވާލިއެވެ. އެހެނަސް ހުރިހާ ކަމެއް ތަފްސީލުކޮށް ކިޔައިދިނުމުން ޔަލަކް އުދުއްސައިގަންނަން ބޭނުންވިއެވެ. އެހެނަސް އެހިތައް ކޮންމެސް ސިފައެއްގައި ބިރުވެރިކަންވެސް ވަދެއްޖެއެވެ.

“ބައްޕަ ދަރިފުޅުގެ ކައިވެންޏަށް ރަނގަޅުކުއްޖަކު ހޯދައިފިން.” މެންދުރުގެ ކެއުމުގެ ތެރެއިން ނާސިރު ޒެކަންއާއި ވާހަކަދެއްކިއެވެ. އެހެނަސް ޒެކަންގެ މާބޮޑު ސަމާލުކަމެއް އެކަމަކަށް ނުލިބުނެވެ. “ކައިވެނީގެ ކުރިން ދަރިފުޅު ޖެހޭނެ އެއްނު އެ ކުއްޖާއާއި ބައްދަލުކޮށްލާ ވާހަކަދައްކާ ހަދާލަން.” އަނެއްކާވެސް ނާސިރު އިއްވައިލިއެވެ. “ނޫން ބައްޕާ. ކޮންމެހެން ބައްދަލު ނުކުރިޔަސް ބައްޕަގެ ހޮވުން އަޅުގަނޑަށްޓަކައި ފުރިހަމަވާނެކަން އަޅުގަނޑަށް އިނގޭ.” ޒެކަން އެހެންބުނެލީ އަންހެނުންނަށް ނަފްރަތުން ފުރިފައިވި އެހިތުގައި ފަރުދާ އަޅާލަމުން މަޑުމައިތިރިކަމާއެކީގައެވެ. “އެންމެ ރަނގަޅު. އެކަމަކު ކައިވެނީގެ ވާހަކަ ދައްކަން ޝަރީފް އެބައޮތް އަންނަ ހުކުރުދުވަހު އެގެޔަށް މެންދުރުކެއުމަށް ދައުވަތުދީފައި. ދަރިފުޅު ކޮންމެހެންވެސް ދާން ވާނެ. ކައިވެނީގެ ކަންތައްތައް ނިންމޭނީވެސް ދެކުދިން ތިބެގެންނު” ނާސިރު އެހެންބުނެލިއިރު އެ މޫނުމަތި އުޖާލާވިވަރު ނުލާހިކު ކައިރިން ފެނުމުން ޒެކަންއަށް ބޯ ޖަހައިލެވުނީ ބޭއިޚްތިޔާރުގައެވެ.

-ނުނިމޭ-