ސިއްރު ސިއްރުން ހިތޭ މިލްކު ކޮށްލީ ކަލާ… (ފުރަތަމަ ބައި)

ކޮފީޝޮޕަށް އަންނަ ކަސްޓަމަރުން މާ ގިނަދުވަހެއްކަމުން މެންދުރުވާން ކައިރިވިއިރު ޔަލަކް ހުރީ ވަރުބަލިވާގޮތްވެފައެވެ. އެހެން ސްޓާފުން އުޅުނަސް ގިނަ މޭޒުތަކަށް ހިނގަނީ އޭނައެވެ. ދެންމެ ވަދެގެން އައި ގްރޫޕަށް ކޮފީ ގެންގޮސްދިނުމަށްފަހު ޔަލަކް އައިސް ކައުންޓަރުދޮށުގައި އިށީނދެލީ ދެފަޔަށް ލުޔެއްދިނުމުގެ ނިޔަތުގައެވެ. އެހެން އިންނަތާ އިރުކޮޅެއްނުވެ ކައިރީގައި އިން އީރާ ޔަލަކްގެ ގައިގާ ސިއްރުން ކޮއްޓާލީ ދޮރުން ވަދެގެން އަންނަ ޒުވާނާ ދެއްކުމަށެވެ. ޔަލަކް އިސް އުފުލާ ޝައުގުވެރިކަމެއް ނެތްގޮތަކަށް ބަލާލުމަށްފަހު ތެދުވެ ހިނގައިގަތީ އެހެންމީހުންނާ ވަކިން ދުރުގައި ހުރި މޭޒެއްގައި އިށީންނަން ދިޔަ އެ ޒުވާނާއާއި ދިމާއަށެވެ.

ކައިރިޔަށް މީހަކުހުއްޓުނުހެން ހީވެގެން އިސްއުފުލާބަލާލަން އުޅެފައި އެއަށްވުރެ އަވަހަށް ޒެކަން އިސްޖަހާލައިފިއެވެ. އެއަށްފަހު އެއްވެސް އަސަރެއް ނެތްގޮތަކަށް ކޮފީއެކޭ ބުނެލީ ޖީބުގައި އޮތް ފޯނުނަގައި އެއަށް ސަމާލުކަން ދެމުންނެވެ. މިތަފާތު މިޒާޖުން ހައިރާންވެފަހުރި ޔަލަކް އެނބުރި އައިސް ބަދިގެފަރާތުގައި އުޅުނު ރިޔާއަށް ގޮވާލުމަށްފަހު ކޮފީ ހަދަން ބުނެލިއެވެ. އެހެނަސް ދެން އަލުން ހިޔާލުބަދަލުވެގެން ބަދިގެއަށްވަނުމަށްފަހު ދެންއެންމެރަނގަޅޭ ބުނެ އަމިއްލަޔަށް ކޮފީ ހަދަން ފެށިއެވެ. އެކޮފީ ތަފާތުކޮށްލަން ބޭނުންވީ ކީއްވެކަން ނޭނގުނަސް ޔަލަކް ކޮފީގައި ރީތި އާޓެއްހަދާލުމަށްފަހު ހަމަޖެހިލަމުން ކޮފީ ހިފައިގެން ނިކުމެ ޒެކަންއިން މޭޒާއި ދިމާއަށް ހިނގައިގަތެވެ.

މޭޒުމަތީގައި ކޮފީތަށި ބެހެއްޓުމުން ޒެކަން މިފަހަރުވެސް ބަލާލަންއުޅެފައި ފޯނުން ވަކިވި ސަމާލުކަން އަލުން ހޯދަން އުޅުނެވެ. ކުރިޔަށްވުރެ ބޮޑަށް ހައިރާންވެހުރެ ޔަލަކް އައިސް އަނެއްކާވެސް ކައުންޓަރުދޮށުގައި އިށީނދެ ވިސްނާލިއެވެ. ދުވަހަކުވެސް ކަސްޓަމަރެއްގެ އަމަލުތައް ނުހުންނަ ގޮތެކެވެ. އޯޑަރ ނަގަން ދިޔަޔަސް އެހެން މީހުން ހީވާނީ ލޮލުން ކާލަފާނެހެންނެވެ. ޒުވާން ގްރޫޕްތައް ވަދެފިއްޔާ އެވަރަށް ގޮވާ ނަން އަހާ ހަދާނެއެވެ. އެހެނަސް މި ޒުވާނާ މުޅިން ތަފާތެވެ. ވިސްނާލެވުނީ އެހެންވެއެވެ.

ވިސްނުމަށްގެއްލިފައި އިންދާ ކުއްލިޔަކަށް ހަނދާންވެގެން ގަޑި ބަލާލިއިރު 12 ޖަހައިފިއެވެ. ޔަލަކްގެ ޑިއުޓީ މިއަދަށް ނިމުނީއެވެ. މާދަން ޑިއުޓީ އޮތީ މެންދުރުފަހުގައި ކަމަށްވުމުން ހަމަޖެހުމުގެ ނޭވާއެއްލަމުން އަތްދަބަސް ކޮނޑުގައި އަޅުވާލުމަށްފަހު ނިކުންނަށް ދަމުން އެޒުވާނާއަށް ބަލާލެވުނީ ބޭއިޚްތިޔާރުގައެވެ. މަޑުމައިތިރިކަމާއެކުގައި ކޮފީ ބޮމުން ދިޔައީ އަތުގައި އޮތް ފޯނަށް ނަޒަރުހުއްޓާލައިގެން އިނދެއެވެ.

ގެޔަށް ވަދެވުމާއެކު ޔަލަކްއަށް މަންމަގެ އަޑުއިވުނެވެ. އެއުޅެނީ ކޮއްކޮގެ ކަމަކާ ހިތްހަމަނުޖެހިގެންކަން ޔަލަކްއަށް އިނގުނީ ހުޅުވާފައި ހުރި ކޮއްކޮގެ ކޮޓަރީގެ ދޮރުގައި އެއްއަތް ވިދެލައިގެން އަނެއްއަތް އުކުޅުގައި އަޅުވާލައިގެން ހުރި މަންމަ ފެނުމުންނެވެ. ޔަލަކް ގޮސް ކައިރިވެލީ ވެގެންއުޅޭ ގޮތެއް ބަލާލުމަށެވެ. ޔަލަކް ފެނުމާއެކު މަންމަ ޔަލަކްއަށް ލޮލުގެ އިޝާރާތުން ކޮއްކޮ ދައްކާލިއެވެ. ޔަލަކް ބަލާލިއިރު އީލަކް އެނދުގައި ރީތިކޮށް އިށީނދެލައިގެން އިނދެ އުނގުގައި އޮތްބާލީސް މަތީގައި ލެޕްޓޮޕް ބަހައްޓައިގެން ފިލްމުބަލަނީއެވެ. ” މާދަން މިއޮތީ ޓެސްޓު. އަދިވެސް އީލަކް ފޮތެއްހިފައިގެން އިންނަތަނެއް މަންމައަކަށް ނުފެނޭ. އަބަދު އެ ލެޕްޓޮޕެއްހިފައިގެން ފިލްމުބަލަން ނޫނީ ކޮންމެސް އެހެންކަމެއްކުރަން އެޔަށް ގެއްލިފަ އިންނަނީ. މިއަހަރު އޯލެވެލް ހަދާއިރު އެހެން އުޅެގެން ރަނގަޅު ނަތީޖާއެއްލިބޭނެތަ؟ ދަރިފުޅާ ޔަލަކް ކޮއްކޮއަށް ނިކަން ވިސްނަދީބަލަ. މަންމަ ވަރަށް ދެރަވާނެ އީލަކް އެހެންއުޅެގެން އޯލެވެލްގަ ރަނގަޅު ނަތީޖާއެއް ނުލިބުނިއްޔާ” މަޑުމައިތިރި ރާގެއްގައި މަންމަ ޔަލަކްއަށް ބަލާލާފައި އެހެންބުނެލިއިރު އެލޮލުގައިވި އާދޭސް ޔަލަކްގެ ހިތުގެ އެންމެ ފުންމިނަށް އަސަރުކުރުވައިފިއެވެ. ވަރަށް ލޯބިން މަންމަ ގައިގަ ބައްދާލުމަށްފަހު ކޮއްކޮއަށް ވިސްނަދޭނެކަމަށްބުނެ ޔަލަކް އެތެރެއަށްވަނެވެ.

” ތިއްތާ އަހަރެން އެވަރަކުން އެހާ ގިނައިން ފޮތްނުކިޔަކަސް އަހަރެން ކޮންމެ ފަހަރަކުވެސް ރަނގަޅަށް ފާސްވެއެއްނު.” އީލަކް އެހެންބުނެލިރާގުން ޔަލަކް ހިނިވެސްއައެވެ. އެހެނަސް އެއީ ތެދެކެވެ. ޔަލަކް ކިޔެވިއިރު ނުނިދާއިނދެ ފޮތްކިޔައި މަސައްކަތްކޮށްގެން ލިބުނު ނަތީޖާ ކޮއްކޮ އެއްގޮތަކަށްވެސް ފޮތްނުކިޔާ ކްލާހުގައި ކިޔައިދޭ ފިލާވަޅު އަޑުއަހައިގެން އެބަހޯދައެވެ. ވިސްނުންތޫނު ހިތްއަލިކުއްޖެއްކަމުގެ ފުރިހަމަ ހެއްކެކެވެ.

” ކޮއްކޯ އެހެންވިޔަސް މިއީ ފަހުއަހަރު. ކޮއްކޮގެ އޯލެވެލް އަހަރު. ކޮއްކޮ ޖެހޭނެއެއްނު މިހާރު ތި ގެންނަ ނަތީޖާއަށްވުރެވެސް މާ ރަނގަޅު ނަތީޖާއެއް ހޯދަން. މަންމަ އެ ބިރުގަންނަނީ އެހެންވެ. ކޮއްކޮގެ ނަތީޖާ އެންމެ ފުރިހަމަވާން މަންމަވެސް އަދި ބައްޕަވެސް މުޅި ފެމެލީ ވެސް ބޭނުންވާނީ. ތިއްތަޔަށް ޔަގީން ކޮއްކޮ ޖެހޭނީ ކުޑަކުޑަ މަސައްކަތެއްކަން ކޮށްލަން. ކޮއްކޮގެ ތިހުރި ވިސްނުންތޫނުކަމާ ހިތައަލިކަމުގެ ބޭނުން އެންމެ ފުރިހަމަގޮތުގަ ބޭނުންކުރަންވާނެ. މިއަހަރު ކޮއްކޮ ހަދަންތިއުޅެނީ އެންމެ މުހިންމު އިމްތިހާނު. އެހެންވީމަ ކޮއްކޮވެސް އެންމެންގެ ބަސްއަހައިގެން އެގޮތައް މަސައްކަތްކޮށްބަލަ. ތިއްތަގެ ބެސްޓް ކޮއްކޮ ތިއްތަގެ ބަސް އަހާނަމެއްނު ދޯ” ޔަލަކް ވަރަށް ލޯތްބާއެކު އީލަކްގެ ބޮލުގައި ފިރުމައިލިއެވެ. “ތީ އެންމެ ބެސްޓް ތިއްތަ” ޔަލަކް ތެދުވެ ކޮޓަރިން ނިކުންނަން ހިނގައިގަތުމުން އީލަކް ބުނެލިއެވެ. އެނބުރި އީލަކް އަށް ބަލާލުމަށްފަހު ހުރިހާދަތްތައް ފެންނަވަރަށް ހިނިތުންވެލަމުން ޔަލަކް ނިކުމެ އޭނާގެ ކޮޓަރިއަށް ހިނގައިގަތެވެ.

ހަމަޖެހޭ ދިރިއުޅުމެއް އުޅެމުން އަންނަ ޔަލަކް ގެ އާއިލާގައި ތިބެނީ މަންމަ ޝެހެނާޒްއާއި ބައްޕަ ޝަރީފްގެ އިތުރުން ތިން ކުދިންނެވެ. އެންމެ ދޮއްޓަށް ހުންނަ ކިޔާލް އާއި ދެން ޔަލަކް ގެ ހަގަށްހުންނަ އީލަކް އެވެ. ކިޔާލް އަކީ އައިޖީއެމްއެޗްގައި މަސައްކަތްކުރަމުންދާ ހުނަރުވެރި ޑޮކްޓަރެކެވެ. ޔަލަކް އޯލެވެލް ނިންމުމަށްފަހު ވަރަށް ހިތްވަރުން އޭލެވެލްނިންމިކަމުގަވިޔަސް ވަކި ދާއިރާއަކުން ނުކިޔަވައެވެ. ޔަލަކް އެފަދަ މަގާމުތަކަށް ޝައުގުވެރިކަން ނުހުންނަނީއެވެ. އީލަކް އެއަންނަނީ އޯލެވެލްއާއި ކުރިމަތިލަމުންނެވެ. ލިބިފައިވާ ތިންކުދިންދެކެ އިންތިހާޔަށް ޝެހެނާޒްއާއި ޝަރީފް ލޯބިވެއެވެ. އެއްވެސް ކުއްޖެއްގެ އެދުމަކާ ދެކޮޅު ހަދާ އެކުދިންގެ ހިތުގައި ދުވަހަކުވެސް ޖައްސާފައެއް ނުވެއެވެ. ރަނެއް މަލެއް ފަދައިން ތިންކުދިން ބަލާ ބޮޑުކުރީ އެއްވެސް ތަފާތުކުރުމެއްނެތި އިންތިހާޔަށް ލޯބިދީގެންނެވެ. އެހެނަސް އެކުދިންގެ މުސްތަގުބަލަށްޓަކައި ބުރަކޮށް މަސައްކަތްކުރަމުންނެވެ. އެކުދިންވެސްވީ ރަނގަޅު ތަރުބިއްޔަތެއްލިބިގެންތިބި އަޚްލާގު ރަނގަޅު ބަސްއަހާ ކުދިބަޔަކަށެވެ. ބައެއްފަހަރު ކުޑަކުޑަކޮށް އީލަކްއަށް ކަންކަން ހަނދާންކޮށްދޭން ޖެހުނަސް އެއީވެސް އެހެން ކުދިން ފަދައިން ރަނގަޅު އަޚްލާގެއް ލިބިފައިހުރި ކުއްޖެކެވެ.

ކޮޓަރިއަށްވަދެ ފެންވަރާލައިގެން ނަމާދުކޮށްލުމަށްފަހު ޔަލަކް ނުކުތީ ބަނޑުހައިވެފަހުރުމުން އެއްޗެއްކާލަން ހިތައް އަރުވައިގެންނެވެ. ބަދިގެޔަށް ވަންއިރު މެންދުރުގެ ކެއުން ސުފުރާ މައްޗަށް ނެގުމުގައި މަންމަ އަވަދިނެތި އުޅެއެވެ. ޔަލަކްވެސް މަންމައާއި ބައިވެރިވެގެން މޭޒުމަތި ތައްޔާރުކޮށްލައިފިއެވެ. ބަނޑުހައިވެފައި ހުއްޓަސް ކެއުމުގެ ބަދަލުގައި އެކެއްޖަހަން މަދުވަގުތުކޮޅަކަށްވެފައި ހުރުމުން ޔަލަކް ސިޓިންރޫމަށް ނިކުމެ ޓީވީ ހުޅުވާލަމުން ސޯފާގައި ހަށިގަނޑު ދަމާލީ ދޮންބެއަށް އިންތިޒާރުކުރަމުންނެވެ. ބައްޕަ އޮފީހުން އަންނާނީ 2 ޖަހާއިރުކަމަށްވުމުން މަންމަ ކޮންމެ ދުވަހަކުވެސް މެންދުރުކަނީ ބައްޕައާއެކީގައެވެ.

ޔަލަކް ޓީވީއަށް ނަޒަރު ހުއްޓާލައިގެން އެހެންއޮއްވައި ސިހުނީ ސިޓިންރޫމުގެ ދޮރުހުޅުވާލުމުންނެވެ. އެދިމާއަށް ބަލާލިއިރު ދޮންބެ ވަންނަނީއެވެ. އަވަހަށްނޫންކަމަށް ހަދާލުމަށްފަހު ކިޔާލް ބަލާލުމުގެ ކުރީގައި ދެލޯ މަރާލަމުން ސޯފާގައި ހަމަޖެހިލިއެވެ. ނަމަވެސް އެތެރެއެތެރެއިން ޔަލަކް ހެމުން ދިޔައީ ދޮންބެ ހަދާލާނެ ގޮތެއް ނޭނގޭތީއެވެ.

ޔަލަކްއަށް ހަޅޭއްލަވައިގަނެވުނީ ކިޔާލް ކުޝަންއެއް ނަގައި ޔަލަކް ގެ މޫނުމަތީގައި ޖެހުމުންނެވެ. ތެދުވެ ކިޔާލްއަށް ހަމަލާއެއްދޭން އުޅެގެން ކާމިޔާބުނުވީ ކިޔާލް އެއްލޯ މަރާލާފައި ބާރަށްގޮސް ކޮޓަރިއަށްވަދެ ދޮރުޖެހުމުންނެވެ. ޔަލަކް އެހާ ބާރަށްދިޔުމުން ހަށިގަނޑު ކޮންޓަރޯލް ނުވެގެން ގޮސް ދޮރުފަތުގައި ޖެހިގަނެވިފައި ފަހަތައްވެއްޓުނީއެވެ. އެއަޑަށް ކިޔާލް ކުޑަކޮށް ދޮރުހުޅުވާލަމުން ޔަލަކް އަށްބަލާލަމުން ހީގެންފައި އަނެއްކާވެސް ދޮރުޖަހައިފިއެވެ. ޔަލަކް ކުޑަކުއްޖެއް ފަދައިން ބިމުގައި ދެފައި ތަޅާލިއެވެ.

“އަހަރެންގެ ޔަލަކް އާއި ކިޔާލް ދުވަހަކުވެސް ބޮޑެއްނުވާނެ. މިއަދުވެސް ފެށީ އެއްނު. މަންމަ އަބަދު ބުނަމެއްނު އެވަރަށް ސަކަރާތްނުޖަހާށޭ.” މަންމަ އައިސް ކުދިކިޔައިގަތެވެ. ޔަލަކް ތެދުވެ މަންމަ ގައިގަ ކުޑަކޮށް ބައްދާލީމެވެ. ” މިއަދުވެސް ދޮންބެ ފުރަތަމަ އަޅުގަނޑު ގައިގަ ކުޝަންއިން ޖެހީ. އެކަމަކު ކޮންމެ ދުވަހަކު ލަނޑު ލިބެނީ އަޅުގަނޑަށް.” ތުން އޫކޮށްލަމުން ޔަލަކް އެހެންބުނެލިއިރު ހީވަނީ ހަމަ ރަނގަޅަށްވެސް ކުޑަކުއްޖެއްހެންނެވެ. ޝެހެނާޒް ހިނި އައިއްސަހުރެ ދެން ވެސް އަވަހަށް ކާން އަންނާށޭ ބުނެ ކާގެޔަށްވަންނަން ދިޔުމުން ޔަލަކްވެސް މަންމަ ފަހަތުން ހިނގައިގަތެވެ.

ޔަލަކް އާއި ކިޔާލް ގެ އަބަދުގެވެސް ހާލަކީ އެއީއެވެ. އެދެކުދިންގެ އުމުރުގައިވެސް 3 އަހަރުގެ ތަފާތުހުރެއެވެ. އީލަކް އާއި އެހާސަކަރާތްނުޖެހިޔަސް ޔަލަކްއާއި ޖެއްސުންކުރަން ކިޔާލް މަރުދޭނެއެވެ. ޔަލަކް އާއި ބަލާފައި އީލަކް މާ މަޑުމައިތިރިވިޔަސް ކިޔާލް އީލަކްދެކެވެސް އިންތިހާއަށް ލޯބިވެއެވެ. ނަމަވެސް ހިތްހަމަޖެހެނީ ޔަލަކް ރުޅިއަރުވާލެވުމުންނެވެ.

ތިންކުދިން އެކީގައި މެންދުރުގެ ކެއުން ނިންމާލުމަށްފަހު ސިޓިންރޫމުގައި ވަގުތުކޮޅެއް ހޭދަކޮށްލުމަށްފަހު ކޮންމެ ކުއްޖަކުވެސް އެކުއްޖެއްގެ ކޮޓަރިޔަށް ވަނީ އަރާމުކޮށްލާށެވެ. ޔަލަކް އެނދުގައި އޮށޯވެލަމުން ފުން ނޭވާއެއް ދޫކޮށްލީ އެވަގުތުކޮޅު ނައިސްގެން ހުރި މީހަކު ފަދައިންނެވެ. އެހެނަސް ބަރުކަން ވެރިވި ދެލޮލުން ފެނުނީ ތަފާތު ތަސްވީރެކެވެ.

-ނުނިމޭ-

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.