ލޯބިން ބުނާތީ 50

ގިނަވެފައިވާ ހިޔާލުތަކާ ހުރެ ބޮލަށް ބަރުވެފައި އޮތް ލިއާއަށް ބޯ ހިއްލާލެވުނީ ފޯނު ވައިބްރޭޓް ވާތީއެވެ. އޭރު ގުޅަމުންދިޔައީ ޝަރީފެވެ. ލިއާ ތެދުވެ ފާރުގައި ލެނގިލައިގެން އިށީންނަމުން ކޯލަށް ޖަވާބުދިނެވެ.

“ބައްޕަ މިރޭ ދާނަން ތިކޮޅަށް…ކުރީބައިގަ މި ބުނެލީ ކުރިންވެސް ލިއާ ހުރީ ރުޅިއައިސްފަ ވިއްޔާ ބައްޕަ ނުބުނެ ދިޔައިރު ކާއެއްޗެއް ނުހެދި ހުރީމަ…” ޝަރީފް ސަމާސާ ރާގަކަށް ވާހަކަ ދެއްކިއެވެ. އެހެން ވަގުތެއް ނަމަ ލިއާއަށް މަޖާވީހެވެ. ނަމަވެސް ކުރަން ޖެހިފައިވާ ފިކުރުތަކާހުރެ ލިއާގެ މިޒާޖަށް ބަދަލު އައިސްފައިވެއެވެ.

“ބައްޕައަށް ތަންކޮޅެއް ގިނައިރު އަޅުގަނޑު ކައިރި މަޑުކޮށްލެވޭނެތަ…؟ ވަރަށް މުހިއްމު ވާހަކައެއް ދައްކާލަން ޖެހޭ…” ލިއާ ބުނެލިއެވެ. ޝަރީފް އެންމެ ރަނގަޅޭ ބުނުމުން ލިއާ ފޯނު ކަނޑާލީ ރަށަށް އާދެވުމުން ގުޅާށޭ ބުނެފައެވެ. އޭނާ ދެން ގުޅީ ރިހާނަށެވެ. އިވެމުން ދިޔަ ކޮންމެ ރިންގަކާއެކު މެޔަށް ބާރުވާ ކަހަލަ އިހުސާސެއް ކުރެވުނެވެ. ނަމަވެސް ލިއާ އޭނަ އެ ނިންމި ނިންމުމައިގެން ކުރިޔަށް ދާން އަމިއްލަ ނަފްސަށް ބާރުއެޅިއެވެ.

“ރިހާން ހަމަ އަސްލުވެސް އަހަންނާ މެރީ ކުރާނަންތަ…؟” ފޯނަށް ރިހާން ޖަވާބު ދިނުމާއެކު އެންމެ ސިކުންތެއްވެސް ބޭކާރުކޮށްލުމެއް ނެތި ލިއާ ސުވާލު ކުރިއެވެ. އޭރު ލިއާގެ އަތްތިލަވަނީ މުއްކަވާލެވިފައެވެ.

“ކިހިނެއްވީ…؟ ލިއާއަކަށް ޔަގީންކަމެއް ނެތް ދޯ…؟” ރިހާންގެ އަޑުން ހިތްހަމަނުޖެހުން ފާޅުވިއެވެ.

“ދެން ކުރި ސުވާލަށް ޖަވާބު ދީބަލަ…!” ލިއާ އަށް ބުނެވުނެވެ.

“މެރީ ކުރަން ބޭނުންވާތީނު އަހަރެން އަމިއްލައަށް އިސްވެ ފުރަތަމަ އެވާހަކަ ދެއްކީވެސް…؟ އަހަންނަށް ހީވަނީ ލިއާހެން ފަހުވަގުތު ދޯކާ ދޭނީ…” ރިހާން ވާހަކަ ދެއްކީ ފޫހި ރާގަކަށެވެ. އެންމެފަހުން ހޮސްޕިޓަލުގައި ހިނގައިދިޔަ ކަންތަކަށްފަހު އަދިވެސް އޭނާ ހަމަޖެހިނުލެވެއެވެ.

“އޯކޭ ދެން…އަހަރެން މިރޭ ގުޅާލާނަން…” ލިއާ ފޯނު ކަނޑާލިއެވެ. ރިހާން ވާހަކަ ދެއްކި ގޮތުން އޭނާވެސް މިވަގުތު ވާހަކަ ދައްކާހިތް ނުވީއެވެ. ހަތަރެސްފައި ދަމާލައިގެން އޮތް އިރު ނަޒަރު ސީދާވެފައިވަނީ މަތީގައި އެނބުރެމުންދިޔަ ފަންކާއަށެވެ. އެހެން އޮތްއިރު ސިކުނޑިއަށް ގިނަވެފައިވާ ހިޔާލުތަކުތެރެއިން ކައިލްގެ ހިޔާލުތަކަށް ޖާގަ ނުދިނުމަށް ލިއާ މަސައްކަތްކުރިއެވެ. އެހެނަސް އެކަން ނާކާމިޔާބުވިކަން އެނގުނީ ލޮލުގެ ހިމަކޮޅުން ފައިބެގެން ދިޔަ ކަރުނައިގެ ރޮނގުންނެވެ.

ޝަރީފް އަންނަ ވަގުތު ޖެހެންވާއިރަށް ލިއާ ބަދިގެއަށް ވަނެވެ. މޫނު ދޮވެލައިގެން ހުރިއިރު ތާޒާކަން ފާޅުވަމުންދިޔައެވެ. ޝަރީފާ ގާތު ބައްޕަ އަންނަ ވާހަކަ ބުނެފައި ލިއާ ކާން ހެދުމައިގެން އުޅުނެވެ. ޝަރީފާ ގާތު ލިއާ އެދުނީ ވަރަށް ބޮޑު ވާހަކައެއް ދައްކަންވެގެން ޝަރީފާއެކު ބަދިގޭގައި މަޑުކޮށްލަދިނުމަށެވެ.

ޝަރީފް އައީ ގަޑިއެއްހާއިރު ފަހުންނެވެ. ލިއާ ހިމޭންކަމާއެކު އިންތިޒާރު ކުރަމުންދިޔައީ ޝަރީފް ކައި ނިމެންދެންނެވެ ޝަރީފް އެކި ވާހަކަ ދައްކަމުން ކައި ނިމުމާއެކު ލިއާ ޝަރީފާއަށް ގޮވާލިއެވެ. ޝަރީފާ އައިސް ބަދިގެއަށް ވަންނަން ވާއިރަށް ލިއާ ބައްޕަ ކެއި ތަށިތައް ނަގައިފިއެވެ.

ގޮނޑީގައި އިށީނދެލިއިރު ލިއާގެ ހިތް ނުތަނަވަސްވެފައި ވެއެވެ. އެއީ ދައްކަން އުޅޭ ވާހަކައިގެ ގޮތުން ކަންނޭނގެއެވެ. ލިއާ ވާހަކަ ދައްކަން ފަށަންވީއިރަށް ޝަމްނާއާއި ޝައުރާ ބަދިގެއަށް ބޯ ދިއްކޮށްލައިފިއެވެ.

“މަ ބުނި އެއްޗެއް ކަލޭމެންނަށް އަޑު އިވުންތަ…؟ ކިހާ ދެރަކަމެއް ދެން…؟ ހަމަ މިހާރު މިތަނުން ދާން އުޅޭ…! މީހަކު ދައްކާހާ ވާހަކައެއް ބަލަން ޖެހޭތަ…؟” ޝަރީފާ އަޑުލައިގަތުމާއެކު ވިދާލި ވިދުވަރެއް ފަދައިން އެ ދެމީހުން އެތަނުން ގެއްލިއްޖެއެވެ. ޝަރީފް ގާތަށް ހިނި އައި ނަމަވެސް ޕިސް ޖަހާލަމުން ދެފަރާތަށް ބޯ ހޫރާލިއެވެ. ޝަރީފާގެ އެ އާދައިގެ ސަބަބުން ޝަރީފް ހަނދާންވީ އެމީހުންގެ މަންމަ މަތިންނެވެ. މަންމަވެސް ޝަރީފާއެކޭ އެއްފަދައިން މިގޮތަށް އަޑުލާގޮތް ސިފަވިއެވެ. ޝަރީފާއަށް އެ މިޒާޖު ވާރުތަވީ އެމީހުންގެ މަންމަ ޝަމްސުއްނިސާ ފަރާތުންނެވެ. އެވަގުތު ޝަރީފަށް ފާހަގަވީ ހިމޭންވެފައި އިން ލިއާއެވެ. ވުމާއެކު އޭނާގެ ސަމާލުކަން ދަރިފުޅަށް ހުއްޓާލިއެވެ.

“ހޫން…ކޮން ވާހަކައެއްތަ ދައްކަން އުޅުނީ…؟” ޝަރީފް ވާހަކަ ދެއްކުމާއެކު ޝަރީފާގެ ސަމާލުކަންވެސް ލިއާއަށް ހުއްޓުނެވެ.

ލިއާ ދެއަތް ދެއަތާ މޮޑެމުން ފުން ނޭވާއެއް ލާފައި ވާހަކަ ދައްކަން ފެށިއެވެ. ބައްޕައާއި ބޮޑުދައިތަ ހިމޭނުން ތިބި ގޮތުން ލިއާގެ ވާހަކަތަކަށް ސަމާލުވެފައި އިންކަން ހާމަވެއެވެ. ލިއާ ހާމަކުރީ އޭލެވެލް ނިމުމާއެކު ކައިވެނި ކުރަން ބޭނުންވާކަމެވެ. އިތުރަށް ކިޔަވާނަމަ އެކަން ކުރިޔަށް ގެންދަން ބޭނުންވަނީ ކައިވެންޏަށްފަހުކަން ލިއާ ބުނެލިއެވެ. ޝަރީފާއާއި ޝަރީފް ތިބީ ހައިރާންވެފައެވެ. ލިއާ ފަދަ ހަރުދަނާ ކުއްޖަކު އެފަދަ ވިސްނުމެއް ގެންގުޅޭތީއެވެ.

“ކައިވެންޏެއް ކޮށްގެން ލިއާއަށް އުޅެވޭނެ ކަމުގެ ޔަގީންކަން އެބައޮތްތަ…؟” އިރުކޮޅަކު ހިމޭނުން އިނދެފައި ޝަރީފް އެހިއެވެ. އެވަގުތު ލިއާއަށް ވުރެ ކުރިން ޝަރީފާ ވާހަކަދެއްކިއެވެ.

“ލިއާއަށް ނޫޅެވެންވީ ސަބަބެއް ނެތް…ލިއާއަށް ގޭތެރެއެއްގެ ހުރިހާ ޒިންމާއެއް ނަގަންކެރޭނެ ކަމުގެ ޔަގީންކަން އަހަންނަށް އެބައޮތް…އެކަމަކު ހިތަށް އަރަނީ މިހާ އަވަހަށް ކައިވެނި ކުރަން ތިއުޅެނީ ކީއްވެބާއޭ…؟ އަނެއްކާ އިންނަން އުޅޭ ކުއްޖާ މަޖުބޫރު ކުރަނީތަ…؟” ޝަރީފާގެ މޫނުމަތީގައި ވަނީ ސުވާލުގެ ކުލަވަރެވެ. ލިއާ އަވަސްއަވަހަށް ވާހަކަ ދެއްކިއެވެ. ދެމީހުންވެސް އަވަހަށް ކައިވެނި ކުރަން ބޭނުންވާތީ އިތުރަށް މަޑުކުރުމުގެ ބޭނުމެއް ނެތީއޭ ބުންޏެވެ.

އޭރު ލިއާގެ އެތެރެ ހަށީގައިވި ހިތް ރޮއެ، ހަޅޭއްލަވަމުން ދިޔައެވެ. ކައިލްއާއި ދުރުގައި ހުރުމަށް ލިއާ ނަގަން ގަސްތުކުރި ފިޔަވަޅުގެ ސަބަބުން ހަޔާތަށް ކޮށްފާނެ އަސަރަކާމެދު ވިސްނާލުމަށް ހިތް އަމުރުކުރާ ކަހަލައެވެ. ނަމަވެސް ހިތުތެރޭގައިވި ހައިޖާންގަނޑުގެ އަސަރު ލިއާގެ މޫނުމަތިން ފާޅުވިޔަކަ ނުދިނެވެ.

ޝަރީފް މަޑުން އިނދެފައި ބުނީ ލިއާއަށް އެގޮތް ރަނގަޅު ކަމުގައިވާނަމަ އެކަމައިގެން ކުރިޔަށް ދިއުމަށެވެ. ލިއާ އިސްޖަހާލިއިރު ނަފްސަށް އުނދަގޫކަމެއް އިހުސާސްވިއެވެ. ލިއާއަށް އިހުސާސްވަނީ ޝަރީފްގެ މާބޮޑު އަޅާލުމެއް ނެތްފަދައަކުންނެވެ. ލޯބިވާ ބަފައެއް ފަދައިން ލިއާއަށް ބައެއް ކަންތައް ޝަރީފް މަނާކުރާނެ ނަމައޭ ކިތައްމެފަހަރަކު ހިތަށް އަރައެވެ. އެހެނަސް ޝަރީފްގެ ފަރާތުން މިއަދާ ހަމަޔަށްވެސް ލިއާގެ ނިންމުންތަކަށް މާ ބޮޑު އަޅާލުމެއް ދޭކަމެއް ފާހަގައެއް ނުވެއެވެ. އެންމެ ކުޑަމިނުން ލިއާ އެހާ އަވަހަށް ކައިވެނި ކުރަން އުޅޭތީ އެކަމާ ބެހޭ ގޮތުން ޝަރީފާގެ ބަދަލުގައި ޝަރީފް ސުވާލުކޮށްލި ނަމަވެސް ލިއާ ހިތްހަމަ ޖެހޭނެއެވެ. އޭރު ޝަރީފާ އިނީ ހިމޭނުންނެވެ. ޝަރީފް ގަބޫލުވުމުން ދެން އޭގައި ވަކި އޭނާއަށް ކިޔޭނެ އެއްޗެއް އެބައޮތްހެއްޔެވެ؟

ފިހާރައަށޭ ބުނެފައި ޝަރީފް ނިކުމެގެން ދިޔަފަހުން ޝަރީފާވެސް ފާހަނައަކަށޭ ކިޔާފައި ބަދިގެއިން ނިކުމެއްޖެއެވެ. އިރުކޮޅެއްފަހުން ލިއާ ނިކުމެ ކޮޓަރިއަށް ދާން ހިނގައިގަތްއިރުވެސް ފެންނަނީ ހިމޭންކަމުގައި ވާތަނެވެ. ބައްޕައާއި ބޮޑުދައިތަގެ ރުހުން ލިބުމުންވެސް ހިތަށް ލިބެންޖެހޭ ހިތްހަމަޖެހުން އެންމެ ފުރިހަމައަށް ނުލިބިގެން މިއުޅެނީ ކީއްވެހެއްޔެވެ؟ ލިއާއަށް އަދިވެސް ޔަގީންވާ ގޮތުގައި އޭނާ ރިހާންދެކެ ވަރަށް ލޯބިވެއެވެ. އުމުރަށް ރިހާންގެ މީހަކަށް ވުމަކީ ކުރީއްސުރެވެސް ލިއާ ދެކެމުން އައި ހުވަފެނެކެވެ. އޭނާ އުފާ ނުވެޔޭ ބުނެފިނަމަ ވާނީ ދޮގަކަށެވެ. އެހެންވިޔަސް ހިތުގައި ބަޔާންކުރަން ނޭނގޭ ހުސްކަމެއް ވާކަމުގެ އިހުސާސް ކުރެވެއެވެ.

ކޮޓަރިއަށް ގޮސް ފެންވަރާލުމުން ލޮޑުކަން އިތުރުވިކަހަލައެވެ. ކުރަން ޖެހިފައިވާ ފިކުރުތަކާހުރެ ލިއާގެ މުޅި ހަށިގަނޑަށް ވަރުބަލިކަން ވެރިވެފައިވެއެވެ. ނިދާ ހެދުން ލައިގެން އެނދުގައި އިށީންނަމުން ރިހާނަށް މެސެޖެއް ކޮށްލާފައި ބިޒީ ނޫންނަމަ ގުޅާލުމަށް ލިއާ އެދުނެވެ. މިނެޓެއް ނުވަނީސް ރިހާން ގުޅައިފިއެވެ.

“އަހަރެން މިގުޅީ ބައްޕަމެންނާ ވާހަކަ ދައްކާފައި…ބައްޕަ ގަބޫލު އޭލެވެލް ނިންމާފަ މެރީ ކުރަން…” ކުދި ކުދި ވާހަކަތައް ދެއްކުމަށްފަހު އެންމެފަހުން ލިއާ ބުނެލިއެވެ. އެކޮޅުން ރިހާން ސީރިއަސްހޭ އަހާލި ގޮތުން ގަބޫލުކުރަން ދަތިވެފައި ވާކަން ހާމަވިއެވެ. ލިއާ އަނެއްކާވެސް އޭނާ ދެއްކި ވާހަކަތައް ރިހާނަށް ޔަގީންކޮށްދިނެވެ. އެވަގުތު ރިހާންގެ ރާގުވެސް ބަދަލުވެގެން ދިޔަކަހަލައެވެ. އެ އަޑުގައިވީ ޖޯޝެވެ.

“އަހަރެން އުއްމީދުކުރަން މިހާ ހިސާބަށް ކަންތައް ގޮސްފައިވަނިކޮށް ރިހާން އަހަރެން ލަދުގަންނަވަރު ކަމެއް ނުކުރާނެ ކަމަށް…” ލިއާ ވާހަކަ ދައްކަމުން އިނގިލީގައި ދައިގަތެވެ. ހިތަށް މިހާ އުނދަގޫވާންވީ ސަބަބެއް ލިއާއަކަށް ނުވިސްނެއެވެ.

އެއްކަލަ ލިއާ…ދެން ކޮންމެސް ވަރެއްގެ އިތުބާރެއް ކޮށްބަލަ ދޯ…އިނގޭތަ…؟ އަހަރެން މިރޭ ވަރަށް އުފާވެއްޖެ…އަހަރެންވެސް ފެމިލީއާ ކައިވެނީގެ ވާހަކަ ދައްކާނަން އިނގޭ…ދެން މާ ދުވަހެއް ނެތޭނު…؟ މިހާރުއްސުރެ ރެޑީވާން ފަށާނަން…” ރިހާންގެ އަޑުގައި ހުރި އުފާވެރިކަމުން ލިއާ ހައިރާންވާގޮތް ވެއެވެ. ރިހާން ހަމަ ހަގީގަތުގައިވެސް އޭނާއާއި ކައިވެނި ކުރެވެން އުޅެވޭތީ އެހާ އުފާވޭހެއްޔެވެ؟ އެ ހިޔާލުން ލިއާގެ ހިތަށް ހަމަޖެހުން ލިބުނެވެ.

ތިން ދުވަސް ފަހެވެ. ސްކޫލުގައި ކުޅެވެމުން ދިޔަ މުބާރަތް ނިމި ތަށި އުފުލާލީ އޭއޭއެޗްއީގެ ޓީމުންނެވެ. ޕާޓީ ޕޮޕްސް ގޮއްވާ އަޑުންނާއި ހުނުމާއި ހަޅޭކުގެ އަޑުން މާހައުލު ގުގުމާލާފައި ވެއެވެ. ކައިރާގެ ދެފައި ބިމުގައި ހަރުނުލައެވެ. ކުޅުންތެރިންނަށް އިނާމާއި ޓްރޮފީ ދީ ނިންމާލާފައި ސަޕޯޓަރުންނަށް ދަނޑަށް ވަނުމުގެ ހުއްދަ ލިބުމާއެކު އެންމެ ކުރިން ދުއްވައިގަތް މީހުން ތެރޭ ކައިރާ ހިމެނެއެވެ. ލިއާ ދެފަރާތަށް ބޯ ހޫރާލަމުން ދެއަތް އުރާލައިގެން ހުއްޓެވެ. ކައިރާ ހިތް ފުރޭވަރަށް އިޝާން އާއި ކައިލް ގޮވައިގެން ފޮޓޯ ނަގަނަގާފައި އެންމެފަހުން ހުއްޓާލީ ލިއާ ގާތަށް ކައިލް ގެނެސް އެ ދެމީހުން އެކުގައިވެސް ފޮޓޯ ނަގުވާފައެވެ.

މުބާރާތް ނިމުމާއެކު ދެން އައި ދުވަސްތަކުގައި ހުރިހާ ކުދިންވެސް އަވަދިނެތި އުޅުނީ ފަހު އިމްތިހާނަށް ތައްޔާރުވުމުގައެވެ. ކައިލްވެސް ހިތުގައިވި އިހުސާސްތައް މަތީ ގަނޑުފެން އަޅައިގެން ކިޔެވުމުގެ ކަންތަކުގައި ލިއާ އަށް އެހީތެރިކަން ފޯރުކޮށްދެމުން ދިޔައެވެ. ގްރޫޕް ސްޓަޑީ އޮންނަ ރޭރޭވެސް ކައިލްގެ ކިބައިން ފެންނަނީ ސީރިއަސްކަމެވެ. އެކަމާ ކުދި ކިޔާ މީހަކަށް ހުންނަނީ ކައިރާ އާއި އިޝާނެވެ. ލިއާވެސް އިންނަނީ ހިމޭންވެފައެވެ. ކައިރާއާއި އިޝާންއަށް ވީ ވަރަކުން އެ ދެޒުވާނުންގެ މެދުގައިވާ ނުތަނަވަސްކަން ފިލުވަން މަސައްކަތްކުރެއެވެ. ނަމަވެސް ކައިލް ހުންނަނީ އެ ސީރިއަސްކަން މަތީގައެވެ. ކޮންމެ ގޮތަކަށް ހާލަތު އޮތަސް ހަތަރު ޒުވާނުންގެވެސް އަމާޒަކީ އެންމެ ރަނގަޅު ނަތީޖާ ހޯދުމެވެ.

ނުނިމޭ

ވާހަކައާއި ގުޅޭ އަޕްޑޭޓް ހޯއްދެވުމަށް އަޅުގަނޑުގެ ޕޭޖަށް ޖޮއިންކޮށްލައްވާ https://ig.me/j/afPd3fqxOwP-skeC/

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.