ނޭދެން ވަކިވާކަށް 40 ވަނަ ބައި

މާޝާގެ ލޮލަށް ކަރުނަ ޖަމާވަމުން ދިޔައިރު ރާހިލްގެ ލޯ ވެސް ވަނީ ފެން ކަޅި ވެފައެވެ. ރާހިލް މާޝާއާއި ދިމާއަށް އެނބުރިލި ނަމަވެސް، މާޝާއަކަށް ރާހިލްގެ ދެލޮލަށް ބަލާލާނެ ހިތްވަރެއް ނުލިބުނެވެ. ރާހިލް މަޑުމަޑުން މާޝާ ގާތް ކޮށްލީ ހިތްވަރު ދިނުމުގެ ގޮތުންނެވެ. އެ އަމަލުން އޭނާ ބުނެދޭން ބޭނުންވަނީ ކޮންމެ ހާލަތެއްގައި ވެސް އޭނާ ވަނީ މާޝާ އާއި އެކުގައި ކަމެވެ.

****

ނާއިލްގެ ނަޒަރު ސީދާވެފައިވާ ދިމާއަށް ޔޫލީ ފަސް އެނބުރި ބަލައިލީ، އެ މޫނުމަތިން ފެނުނު ހިތްހަމަޖެހުމުގެ ކުލަވަރާއި ގުޅިފައިވާ ސަބަބެއް ހޯދުމުގެ ޝައުގުވެރިކަމުގައެވެ. އެ ދިމާއަށް ހިނގާފައި އައި މާން ފެނި އޭނާގެ އަތްފައި ފިނިވެގެން ދިޔައެވެ. ހަށިގަނޑުގައި ކަރަންޓުގެ އޮއެވަރެއް ދަތުރުކޮށްލިއިރު، އެ ސޫރަ ފެނުމުން އެ ހިތަށް ވެރިވީ ބުނެދޭން ނޭނގޭފަދަ ހަމަޖެހުމެކެވެ.

މާން ފެންނަނީ ވަރަށް އާދައިގެ ގޮތަކަށެވެ. އިސްތަށިގަނޑުގައި އެއްވެސް ތަރުތީބެއް ނެތްއިރު، ލާފައި ހުރީ އަތްދިގު ކަޅުކުލައިގެ ގަޔަށް ކުޑަކޮށް ހިފާލައިފައިވާ ޓީޝާޓެކެވެ. ޓީޝާޓުގެ އަތް މުލައްދަނޑިއާ ހަމައަށް މައްޗަށް ނަގާލައިފައި ވުމުން، އެ އަތުގެ މަސްތައް ފުއްޕާލާ، އެ ފިރިހެންވަންތަކަން ފުރިހަމައަށް ހާމަވަމުން ދިޔައެވެ. އަތުގެ ނާރުތައް ފުއްޕާލާފައިވާ ގޮތުން ކޮންމެ އަންހެން ކުއްޖެއްގެ ހިތްވެސް ފަތަހަކޮށްލާނެކަން ގައިމެވެ. އެ އާދައިގެ ‘ލުކް’ ގައި މާން ފެނުމުން ޔޫލީއަށް ސިފަވެގެން ދިޔައީ، މާން އޭނާއަށް ފެނުނު ފުރަތަމަ ދުވަހެވެ. ‘އެމް ބިއުޓީ’ ގެ ކައުންޓަރުގައި މާން އިންއިރު، ކޭޝިއަރެއް ކަމަށް ހީކޮށް ޔޫލީ އޭނާއަށް މުހާތަބުކުރި ގޮތް ހަނދާނަށް އައުމުން ތުންފަތުގައި ކުޅެލީ ލަދުވެތި ހިނިތުންވުމެކެވެ. އެއާއިއެކު އޭނާގެ ކޯތާފަތަށް ޖަންބުކުލަ ވެރިވެގެން ދިޔައެވެ.

މާންގެ ނަޒަރު ޔޫލީއާ ވަކިނުވެއެވެ. ޔޫލީގެ ހެދުންއެޅުމުގެ ވައްޓަފާޅިއަށް އައިސްފައިވާ ބަދަލު އޭނާއަށް ފެނުމުންވެސް އެނގުނެވެ. އެއީ ޔޫލީ އޭނާއަށްޓަކައި ގެނައި ބަދަލެކެވެ. ނަމަވެސް އެ ބަދަލު އައީ މަޖުބޫރަކުން ބާވައެވެ؟ ނާއިލްގެ އެދުމުގެ މަތިން ކަމުގައި ވިޔަސް، އޭނާ މިއަދު އެ އައީ ޔޫލީއާ ކުރިމަތިލާށެވެ.

“ދަރިފުޅާ މާން…” ނާއިލް މާންއަށް ގޮވާލީ، މާން އައިސް ނާއިލްގެ ގޮނޑި ކައިރީގައި މަޑުކޮށްލުމުންނެވެ.

“ބައްޕާ…” ނާއިލްގެ އަތުގައި ހިފާލަމުން މާން ޖަވާބުދިނީ ނުހަނު އަދަބުވެރިކަމާއިއެކުގައެވެ.

“ބައްޕަ ގެއަށް ދަނީ އެނގޭ،” ނާއިލް މާންއަށް ތޫނު ނަޒަރެއް ދިނުމަށްފަހު ބުނެލިއެވެ. އަދި އަވަސްއަވަހަށް ޖޯދިޝްއަށް އިޝާރާތްކޮށްލިއެވެ.

“އޯކޭ، ބައްޕަ ގެއަށް ދާން ބޭނުމިއްޔާ ލެޓްސް ގޯ،” ޔޫލީ، ނާއިލްއާއި ގާތްވެލާ ގޮނޑީގައި ހިފަހައްޓާލަމުން ބުނެލިއެވެ.

“ޔޫ އާ ގޮއިންގް ވިތް މީ…” މާން، ޔޫލީގެ އަތުގައި މަޑުމަޑުން ހިފާލަމުން އޭނާގެ ލޮލަށް ނަޒަރު ހުއްޓާލައިފައި ބުނެލީ ސިއްރެއް ބުނެލާހާ މަޑުންނެވެ.

އެ ބީހުމުގެ ސަބަބުން ޔޫލީގެ މުޅި ހަށިގަނޑުގައި ކުދިކުދި އޮއެވަރުގެ ރާޅުބާންޏެއް އުފެދިގެން ދިޔައީ ފަދައެވެ. އޭނާގެ ދުލުން އެއްޗެއް ނުބުނެވުނު ނަމަވެސް، ނާއިލްގެ ގޮނޑިއާއި ދުރަށް އޭނާ ޖެހިލީ އެ ބަހަށް އިޖާބަދެމުންނެވެ.

ޖޯދިޝްއާއި ނަރުސްކުއްޖާ، ނާއިލް ގޮވައިގެން ދާން ހިނގައިގަތުމުން އަނެއްކާވެސް މާން، ޔޫލީގެ އަތުގައި ހިފެހެއްޓިއެވެ. ބަހެއް ނުބުނެ އެ އަތުގައި ހިފާލައިގެން އޭނާ، ނާއިލްމެން ލޮލުކޮޅަށް އޮބާލަންދެންވެސް ހުއްޓެވެ. ޔޫލީގެ ހިތުގައި އެތައް ސުވާލުތަކެއް އުފެދެމުން ދިޔައެވެ. ނަމަވެސް އޭގެއިން އެންމެ ސުވާލެއް ކޮށްލުމަށްވެސް އޭނާގެ ދޫ ހަރަކާތެއް ނުކުރިއެވެ.

“ޔޫލީ އަހަރެންނާއިއެކު މިރޭ ޑިނާއަކަށް ދާނަން؟” ޔޫލީއާ އިތުރަށް ގާތްވެލަމުން މާން ސުވާލުކޮށްލިއެވެ.

ޔޫލީ މަޑުމަޑުން ބޯޖަހާލިއެވެ. ނަމަވެސް ދެވަނަ ސިކުންތުގައި އޭނާގެ ދެލޯ ބޮޑުކޮށްލެވުނީ، މާންއާއިއެކު ޑިނާއަކަށް ދިއުމަށް އޭނާ ބޭނުންވާވަރަށް ތައްޔާރުނުވެވި ހުރުމުންނެވެ.

“އެކަމަކު އައި ނީޑް ޓު ގެޓް ރެޑީ… ލެޓްސް ގޯ ހޯމް،” އަވަސްއަވަހަށް ކުޑަކުއްޖެއް ފަދައިން ޔޫލީ ބުނެލިއެވެ.

އެ މައުސޫމު އަދާއިން މާންގެ ތުންފަތަށް ހިނިތުންވުމެއް ގެނުވިއެވެ. “ވީ އާ ގޮއިންގް ސަމްވެއާ… އެކަމަކު ގެއަކަށް ނޫން އިނގޭ،” ޔޫލީއަށް އައުމަށް އިޝާރާތްކޮށްލަމުން، ހިނގައިގަންނަމުން މާން ބުނެލިއެވެ.

އިމާރާތުގެ ޕާކިން ބޭސްމަންޓަށް ކާރު ޕާކުކޮށްލުމަށްފަހު، މާންއާއި ޔޫލީ ކާރުން ފޭބިއެވެ.

“ދިސް އިސް ވެއާ މާހިން ލިވްސް ދޯ؟” ޔޫލީ ވިސްނުމެއްގައި ހުރެ އަހާލިއެވެ.

“ހުމްމްމް…” ވަރަށް ކުރު ޖަވާބަކުން މާން ފުއްދާލިއެވެ.

ދެން އެ ދެމެދަށް ވެރިވީ ހަމަހިމޭންކަމެވެ. އެ ނުތަނަވަސްކަމުގައި ދެމީހުންވެސް ދިޔައީ އެކަކު އަނެކަކަށް ސިއްރު ނަޒަރަކުން ބަލަމުންނެވެ. ޕެންޓްހައުސްގެ ދޮރު މާންގެ ފިންގަރޕްރިންޓުން ހުޅުވާލުމަށްފަހު، ދެމީހުން އެތެރެއަށް ވަދެލިއެވެ. ޕެންޓްހައުސްގެ އެތެރެއަށް ވެރިވެފައިވަނީ މަޑުމައިތިރި، އަނދިރި އަލިކަމެކެވެ. ދޮރު ލައްޕާލުމަށްފަހު، މާން ފާރުގައިވާ ސުވިޗަށް އަތްދިއްކޮށްލާ ލައިޓްތައް ދިއްލާލިއެވެ. އެއާއެކު މުޅި ތަން އަލިވެ، އެތަނުގެ ފުރިހަމަކަމާއި ޒީނަތްތެރިކަން ހާމަވެގެން ދިޔައެވެ.

ޔޫލީގެ ނަޒަރު ސީދާވީ ފުރަތަމަ ދުވަހުވެސް އޭނާގެ ޝައުގުވެރިކަން އަތުލި މަސް ޓޭންކަށެވެ. މަޑުމަޑުން ހިނގާލާފައި ގޮސް މަސް ޓޭންކުގެ ކައިރީ އޭނާ މަޑުކޮށްލީ، އެ ފުރިހަމަ މަންޒަރުން އޭނާގެ ހިތަށް ބުނެދޭން ނޭނގޭފަދަ ހަމަޖެހުމެއް ގެނެސްދެމުންދާތީއެވެ.

“އިޓްސް ރިއަލީ މައިންޑް ރިލެކްސިން ދޯ؟” މާން، ޔޫލީއާ ގާތްވެލަމުން މަޑުމައިތިރިކަމާއިއެކު އަހާލިއެވެ.

“ހުމްމް… ޖަސްޓު ލައިކް އަ ސްޓޯރީ،” މަސް ޓޭންކުގައި ފީނަމުންދިޔަ މަސްތަކަށް ބަލަހައްޓައިގެން ހުރެ ޔޫލީ ބުނެލިއެވެ. ވާހަކަފޮތެއްގެ ސަފުހާތަކުން އޭނާގެ ހިތަށް ލިބޭ ފަދަ އަމާންކަމެއް އެ މަންޒަރުން ލިބެމުން ދިޔައެވެ.

އެ ޖަވާބުން މާންގެ މަޑު ހުނުމުގެ އަޑު އިވިގެން ދިޔައެވެ. “ބަޓް މީ މިސްޓޭކްއެއް ނޫން … ތީ އަހަރެން ހަމަ ވަރަށް ގަޔާވެގެން ގެންގުޅޭ އެއްޗެއް.. ސޯ މިސްޓޭކް އަކަށް ނުވާނެތާ..” މާންގެ ރައްދު އައީ ސަމާސާ ކުލަވަރަކާއިއެކުގައެވެ.

“އެއީ އެއް ނޫނޭ… އަހަރެން ހަމަ އެކަނި ކިޔާ ވާހަކައަކީ،” ޔޫލީ ލަދުރަކި ގޮތަކަށް ބުނެލިއެވެ. “މީ މާންގެ މަސް ޓޭންކެއް ދޯ؟ އެންޑް ދަ ޑިޒައިން އޮފް ދިސް ޕްލޭސް އިސް އޯލްސޯ ޔުއަރސް ދޯ؟” ހިތުގައި އެ ދުވަހުވެސް އުފެދުނު ސުވާލު އޭނާ މާންއާ ކޮށްލިއެވެ.

“ޑިޒައިން އެންޑް ދަ ޕްލޭސް ޓޫ…” މާން ބުނެލީ ޔޫލީއަށް ބަލަހައްޓައިގެން ހުރެއެވެ. އެ މޫނަށް އަރާ ކުލަވަރުތައް ދެކިލަން އޭނާ ބޭނުންވެފައިވާ ފަދައެވެ.

“އަސްލުވެސްތަ؟ އައި ކޭމް ހިޔަރ އޯވަރނައިޓް އަކަށް ޝިފްއާއި އެކު… އެހެންވެ އެނގުނީ މާހިންގެ ޕްލޭސް ކަން މީ.. އައި ޑިޑް ނޮޓް ނޯ އިޓް ވޯސް ޔުއަރސް.” ޔޫލީގެ މޫނުމަތިން ފެނިގެން ދިޔައީ ހައިރާންކަމާއި ޝައުގުވެރިކަމެވެ. އެ މޫނު މަތިން އެއްވެސް ވަރަކަށް ކުށްވެރިކަމުގެ އަސަރެއް ނުފެނުނެވެ.

“މިތަނަށް އައީ ޝިފްނާއާއި އެއްކޮށްތަ؟” އެތެރެއަށް ވަންނަމުން މާން ވާހަކަދައްކަމުން ދިޔައެވެ.

” ޔެސް ޝިފް އައީ އަހަރެން ގޮވައިގެން ދެން މާހިން އުޅޭ ތަނޭ ބުނި.. ޕޫލްވެސް ވަރަށް ސަޅި .. ސޭޑް ތެޓް އައި އެމް އެފްރައިޑް ކޮސް އައި ޑޯންޓް ނޯ ހައު ޓު ސްވިމް.. އެކަމަކާއިވެސް އެ ދެ މީހުން ދިމާކުރި………” އެ ދުވަހުގެ ހަނދާންތައް އާކުރަމުން، މާންގެ ފަހަތުން ހިނގަމުން ޔޫލީ ކިޔައިދިނެވެ.

އެ ވާހަކަތަކުން މާންގެ ހިތަށް ބުނެދޭން ނޭނގޭ ހަމަޖެހުމެއް ގެނެސްދިނެވެ. އޭނާއަށް ކުރެވުނީ ކުށްހީއެއްތާއެވެ. ޔޫލީ އެ ދުވަހު އެ ގެއަށް އައީ ޝިފްނާއާއި އެކުގައިތާއެވެ.

“ދިސް އިސް މައި ރޫމް” ކޮޓަރީގެ ދޮރު ހުޅުވާލަމުން މާން ބުނެލިއެވެ. ފެހި ކުލައިން ޒީނަތްތެރި ކޮށްފައިވާ ކޮޓަރި ފެނުމުން ޔޫލީގެ ތުންފަތް މައްޗަށް ހިނިތުންވުމެއްވެރިވިއެވެ.

“އިޓްސް ގްރީން”

“އޮފްކޯސް… އެއީ މައި ފެވް އެއްނު” މާން ހިނިތުންވެފައި ޖަވާބުދިނެވެ. “ދިސް އިސް ފޮ ޔޫ.. ޑިނަރ އަށް ދާން ރެޑީ ވެލަން ވީނު… ޔޫލީ ބޭނުންކުރާ ވައްތަރު ރީތިވާ ސާމާނުވެސް ހުންނާނެ.” މާން އެނދުމަތީ އޮތް ގިފްޓް ބޮކްސް އަށް އިޝާރާތްކޮށްލަމުން ބުނެލިއެވެ. އަދި ޑްރެސިންގް އޭރިޔާއަށް އިޝާރާތްކޮށްލަމުން ރީތިވާ ސާމާނު ވެސް ދައްކާލިއެވެ.

ޔޫލީއަށް ލިބުނީ ބަޔާންކުރަން ދަތި ހައިރާން ކަމެކެވެ. އެ ވަރަށް މާން އޭނާއާއި ދޭތެރޭ ވިސްނާތާއެވެ.

މާން، ޔޫލީގެ އަތުގައި މަޑުމަޑުން ހިފާލައި، އޭނާއާ ގާތަށް ދަމާލިއެވެ. “ޔޫ ހޭވް އެގްޒެކްޓްލީ ވަން އަވަރ ޓެން މިނެޓްސް ޓު ގެޓް ރެޑީ،” އަތުކުރީ ގަޑިއަށް ބަލާލަމުން މާން ސިއްރުސިއްރުން ބުނެލިއެވެ. އަދި ދެއަތުން ޔޫލީގެ އުނަގަނޑުގައި ހިފާލައި، އޭނާގެ ހަށިގަނޑާއި ގާތްކޮށްލަމުން، އެ ނިއްކުރީގައި އޯގާތެރިކަމާއިއެކު ބޮސްދިނެވެ.

ޔޫލީގެ ހިތުގައި އެތައް ޝަކުވާތަކެއް ފޮރުވިފައިވީ ނަމަވެސް، އެ މަޑުމައިތިރި ބީހުމުން އޭނާގެ މުޅި ނަފްސަށް ހަމަޖެހުމެއް ގެނެސްދިނެވެ. މަޑުމަޑުން ލޯ މަރާލެވުނީ އެ ފުން އިހުސާސަށް އަމިއްލައަށް އިޖާބަދެމުންނެވެ. ދިގު، ވަރުބަލި ދަތުރަކަށްފަހު އަމާންކަމުގެ އައްސޭރިއަކަށް ވާސިލްވެވުނު ފަދަ އިހުސާސެއް އެ ހިތަށް ކުރެވިގެން ދިޔައެވެ. ސިކުނޑީގެ ހުރިހާ ނުތަނަވަސްކަމެއް ހިނދުކޮޅަކަށް ހުއްޓި، މުޅި ނަފުސު އެ ބީހުމުގެ ތެރެއަށް ގެނބިގެން ދިޔައެވެ. މާންގެ ކޮންމެ ބީހުމަކުން އޭނާގެ ވިސްނުމާއި އިހުސާސްތައް ގުޑުވާލައެވެ. އެއީ ކޮންފަދަ ފުން، އަސަރުގަދަ ލޯތްބެއް ހެއްޔެވެ؟

އެ ގާތްކަމުން މާންއަށް ކުރި އަސަރުވެސް ކުޑައެއް ނޫނެވެ. އެ ހިތުގެ ވިންދު އަވަސްވެ، ޔޫލީގެ އެ ހޫނުކަމަށް އިންތިހާއަށް އެދެވޭ ގޮތްވިއެވެ. ނަމަވެސް، އޭނާ އަމިއްލަ އިހުސާސްތައް ކޮންޓްރޯލްކުރިއެވެ. ޔޫލީއަކީ އޭނާގެ އަނބިމީހާ ކަމުގައިވިޔަސް، ވަގުތީ ޖަޒުބާތެއްގައި ޖެހި، އަވަސްއަރުވާލައިގެން ކަމެއް ކުރާކަށް އޭނާ ބޭނުމެއް ނުވިއެވެ. އޭނާ ބޭނުންވަނީ ޔޫލީގެ ހިތް މުޅިން މިނިވަންކަމާއިއެކު ދެނެގަންނާށެވެ. އޭނާ އެ އަންހެންކުއްޖާ ދެކެ ވާ ސާފު، ތާހިރު ލޯބީގެ ތެދުވެރި ރައްދެކެވެ. ނަމަވެސް، ޔޫލީ އެހެން އެއްވެސް ފިރިހެނަކާއިއެކު ފެނުމުން، ނުވަތަ އެކަމާ މެދު ހިތަށް އެރިޔަސް، އޭނާގެ ކެތްތެރިކަން ކޮޅުންލައި، ހަސަދަވެރިކަމުގެ އަލިފާން ރޯވެގެންދެއެވެ. ޔޫލީގެ މައްޗަށް އޮތް އޭނާގެ އަމިއްލަ ހައްގު އަންގައިދޭން ހިތް އެދި ގޮވާލައެވެ. އޭގެ ކޮންމެ ވަގުތަކު އަމިއްލަ ނަފުސު ދެކެ އޭނާ ބިރުގަނެއެވެ. ޖަޒުބާތުގައި ޖެހި އަނިޔާވެރިއަކަށް ވެވިދާނެތީއެވެ. ނަފުސުގެ މަގު އޮޅިދާނެތީއެވެ. އަވަސްއަވަހަށް ޔޫލީއާ ދުރަށް ޖެހިލުމަށްފަހު، ފަސްއެނބުރި ބަލާލުމެއްނެތި މާން ކޮޓަރިން ނުކުމެގެން ދިޔައެވެ.

މާންއަށް ކުއްލިއަކަށް އެ އައި ބަދަލު ޔޫލީއަށް ސިއްރެއް ނުވިއެވެ. އެ ފިނި ބަދަލުން އޭނާގެ ހިތުގައި ތޫނު ރިހުމެއް އުފެދިގެން ދިޔައެވެ. އޭގެ ސަބަބެއް އޭނާއަކަށް ނޭނގުނެވެ. މާންއަށް އަމިއްލަ ކުށްވެރިކަން އިހުސާސްވަނީ ބާއެވެ؟ އޭނާގެ ހިތުގައި އަދިވެސް ޒޯޔާގެ ނަން ވާތީ ހެއްޔެވެ؟ އެހެންކަމަށް ވާނަމަ ޔޫލީއަށް އެދޭ ސަމާލުކަމުގެ ފަހަތުގައި ވަނީ ކޮން ކަމެއް ހެއްޔެވެ؟

ފޮށީގެ މަތި މަޑުމަޑުން ނަގާލުމާއިއެކު، ޔޫލީގެ ދެލޯ ހައިރާންކަމާއި އުފާވެރިކަން އެކުލެވޭ އިހުސާސްއަކާއިއެކު ބޮޑުވެގެން ދިޔައެވެ. އެ ފޮށީގެ ތެރޭގައި އޮތީ ޝާހީ ފުރިހަމަކަމެއް އެކުލެވިގެންވީ، ބަލާލަން ނުހަނު ރީތި އަދި އެހާމެ ހިތްގައިމު ޕާކިސްތާން ސްޓައިލުގެ ހެދުމެކެވެ.   އެންމެ ފުރަތަމަވެސް އޭނާގެ ނަޒަރު ހުއްޓުނީ މަޑު ބެއިޖް އަދި އައިވަރީ ކުލައިގެ ކުރުތާއަށެވެ. މުޅި ކުރުތާ ފަރުމާ ކުރެވިފައި ވަނީ ނުހަނު ކަވި، އަތްތެރި އެހާމެ ރީތި ރަންކުލައިގެ އެމްބްރޮއިޑަރީ މަސައްކަތަކުންނެވެ. އެއާއެކު އެކުލެވިގެންވާ ކުދިކުދި އެސްތަކާއި ސީކުއިންސްތައް، ކޮޓަރީގެ މަޑު އަލީގެ ތެރޭގައި ތަރިތަކެއް ފަދައިން ވިދާ ބަބުޅަމުން ދިޔައެވެ. ކުރުތާގެ ތިރީ ބޯޑަރާއި އަތްކުރީގައިވާ ފުޅާ ރަންކުލައިގެ އެމްބްރޮއިޑަރީން އެ ހެދުމުގެ ރީތިކަމާއި، ފުރިހަމަކަން އިތުރަށް ހާމަކޮށްދެއެވެ. އެ ހެދުމަށް މުޅިން ތަފާތު ދިރުމެއް ގެނެސްދެނީ، އެއާއެކު އޮތް ގަދަ މެރޫން އަދި ރެޑް-ވައިން ކުލައިގެ ހަރުވާޅާއި ދުޕައްޓާއިންނެވެ. ހަރުވާޅުގެ ތިރީ ބޯޑަރުގައިވެސް ކުރުތާއާއި ގުޅޭގޮތަށް ރަންކުލައިގެ ފުރިހަމަ އެމްބްރޮއިޑަރީ މަސައްކަތް ހިމެނެއެވެ. އަދި އެއްކުލައެއްގެ ގަދަ މެރޫން ކުލައިގެ ދުޕައްޓާގެ ވަށައިގެންވާ ފުޅާ، ނަލަ އެމްބްރޮއިޑަރީ ބޯޑަރާއި، އޭގައި ވީ ކުދިކުދި ރަންކުލައިގެ ތިކިތަކުން މުޅި ހެދުމަށް ސާބަސް ދޭހާ ފުރިހަމަކަން ދެގުނަ ކޮށްދެއެވެ. ޔޫލީ މަޑުމަޑުން އެ ހެދުމުގައި އަތުން ފިރުމާލިއެވެ. އެ ފޮތީގެ އޮމާންކަމާއި މަޑުކަން އޭނާގެ އިނގިލިތަކަށް އިހުސާސްވެގެން ދިޔައެވެ. ތުންފަތަށް ވެރިވީ ލަދުވެތި ނަމަވެސް މައުސޫމު ހިނިތުންވުމެކެވެ. މާންގެ މިފަދަ އަމަލުތަކުން އަންގައިދެނީ މާންގެ ހިތުގައި އޭނާއަށްޓަކައިވާ ފުން އިހުސާސްތަކާއި، އޭނާއާއިމެދު ބަހައްޓާ ހާއްސަ އޯގާތެރިކަން ނޫން ހެއްޔެވެ؟ އޭނާގެ ހިތުގައިވާ ނުތަނަވަސްކަމާއި ޝައްކުގެ އަނދިރިކަން ފިލައިނުގޮސްގެން އެއުޅެނީ ކީއްވެގެން ހެއްޔެވެ؟

ތައްޔާރުވެގެން ކޮޓަރިން ނުކުމެ، ސިޓިންގރޫމަށް ޔޫލީ މިސްރާބުޖެހިއެވެ. މާން ހުރީ މެރޫން ކުލައިގެ ރީތި ގަމީހެއްގައެވެ. ޔޫލީގެ ފިޔަވަޅުގެ އަޑަށް މާން އެނބުރި ބަލައިލިއެވެ. އެއާއިއެކު، މާންގެ ތޫނު ދެލޯ ޔޫލީގެ މޫނަށް ސީދާވެ، އޭނާގެ ފިޔަވަޅުތައް ހިނދުކޮޅަކަށް ހުއްޓުނެވެ.

“ޔޫ ލުކް… އެބްސޮލިއުޓްލީ ބިއުޓިފުލް،” މާންގެ އަޑުގައިވީ އާދަޔާ ހިލާފު މަޑުމައިތިރިކަމެކެވެ. އޭނާ ޔޫލީއާ ގާތަށް ހިނގައިގަތެވެ.

ޔޫލީ ލަދުރަކި ހިނިތުންވުމަކާއިއެކު އިސްޖަހާލިއެވެ. “ތޭންކްސް…”

“ލެޓްސް ގޯ؟” މާން އޯގާތެރިކަމާއިއެކު އޭނާގެ އަތް ޔޫލީއަށް ދިއްކޮށްލިއެވެ. ޔޫލީވެސް އިތުރު ސުވާލެއް ނުކޮށް، މާންގެ އަތުގައި މަޑުމަޑުން ހިފާލިއެވެ.

ކާރު ގޮސް މަޑުކޮށްލީ މޫދުގެ ހިތްގައިމު ރާޅުތަކުގެ އަޑު އިވޭ، ނުހަނު ޝާހީ އަދި ރޮމޭންޓިކް ރެސްޓޯރެންޓެއްގެ ކުރިމައްޗަށެވެ. އެއީ މާން މިރޭގެ ޑިނާއަށްޓަކައި ބުކްކޮށްފައިވާ ތަނެކެވެ. މޭޒުމަތީގައި ދިއްލާފައިވާ ކެންޑަލްގެ މަޑު އަލީގެ ތެރެއިން، ދެމީހުން އެކުގައި އިށީނދެލުމުން މުޅި މާހައުލަށް ވެރިވެގެން ދިޔައީ އާދަޔާ ހިލާފު އަމާންކަމެކެވެ.

މާން، މޭޒުމަތީގައި އޮތް ޔޫލީގެ އަތްތިލައިގައި މަޑުމަޑުން ހިފާލިއެވެ. އެ ދެލޮލުން ފެންނަމުންދިޔައީ އިންތިހާ ދަރަޖައިގެ އޯގާތެރިކަމާއި ފުން ލޯބިވެތިކަމެވެ.

“ޔޫލީ…” މާންގެ އަޑު މަޑުވެފައި އަސަރުގަދައެވެ. “އަހަރެންގެ ހިތުގައިވާ އެއްޗެއް ޔޫލީއަށް ބުނެދޭން މިރޭ ބޭނުން. މި އިހުސާސްތަށް ފޮރުވަން މަސައްކަތް ކުރި ވަރަކަށް އަހަރެންގެ ނަފުސުގެ ހަމަޖެހުން ގެއްލޭ އެބަ… މި ކައިވެންޏަކީ ޔޫލީއަށް މަޖުބޫރީއެއްކަން އަހަރެންނަށް އެނގޭ.. ނަމަވެސް އަހަރެންގެ ދިރިއުޅުމަށް ޔޫލީ އައި ފަހުން އަހަރެންގެ ހިއްސުތަށް ކޮންޓްރޯލުން ނެއްޓެން ފަށައިފި… މިއަދު އަހަރެންގެ މުޅި ދުނިޔެއަކީ، އަދި އަހަރެންގެ ހިތުގެ ހަމަޖެހުމަކީ ޔޫލީ ކަމުގައި ވެއްޖެ. އަހަރެން ޔޫލީ ދެކެ ވަރަށް ވަރަށް ބޮޑަށް ލޯބިވޭ. ޔޫލީ، މި ލޯބީގެ ރައްދު ދޭކަށް ޔޫލީ އަކަށް މަޖުބޫރެއް ނުކުރާނަން ނަމަވެސް އަހަރެންނަށް ޔޫލީ ދޫކޮށްލެވޭކަށް ނެތް.. އެ ހިތްވަރެއް މި ނަފުސަކު ނެތް.. ޔޫލީއަށް އަހަރެން ދެކެ ލޯބިވެވެން ދެން ކެތް ކުރާނަން.. ނަމަވެސް އެހެން ފިރިހެނަކާއި އެކު ވާތަން ދެކޭކަށް ކެތެއް ނުވާނެ.. ”

މާންގެ އެ ލޯބީގެ އިގުރާރުން ޔޫލީގެ ހިތަށް ކުރުވީ ބަޔާންކުރަން ދަތި އަސަރެކެވެ. އޭނާގެ ދެލޯ ކަރުނުން ފުރިގެން އައެވެ. އެއީ އުފާވެރިކަމާއި، މާންގެ ބަސްތަކުން ހިތަށް ލިބުނު ފުން ހަމަޖެހުމެއްގެ ކަރުނައެވެ. މާންގެ އަތުގައި ބާރަށް ހިފާލަމުން، ޔޫލީއަށް އިސްޖަހާލެވުނީ އުފަލުން ގޮސް ހިތް ފުރިގެންނެވެ. ނަމަވެސް އެހެން ފިރިހެނުންގެ ވާހަކަ މާން އެ ދައްކަނީ ކީއްވެ ހެއްޔެވެ؟ އަދިވެސް ރިލްވާންއާއި އެކު ފެނުނު ފެނުން އެ ހިތުގައިވީ ހެއްޔެވެ؟

ދެމީހުން އެކުގައި ހޭދަކުރީ ނުހަނު އުފާވެރި، ހިތްގައިމު އަދި ފުރިހަމަ ވަގުތުކޮޅެކެވެ. ހުރިހާ ނުތަނަވަސްކަމެއް ފިލައި ގޮސް، ދެމީހުންގެ މެދުގައިވާ ގުޅުން އިތުރަށް ބަދަހިވެގެން ދިޔަ ފަދައެވެ. ނަމަވެސް ޔޫލީގެ ހިތުގައިވި ޝަކުވާތަކުގެ ވާހަކަ އޭނާއަށް ދައްކާކަށް ނުކެރުނެވެ. އެ ވަގުތުކޮޅު ނިމުމަކަށް އައިސް ދާނެތީއެވެ.

އެ އުފާވެރި މާހައުލުގެ ހަމަހިމޭންކަން ދުއްވާލީ މާންގެ ފޯނު ރިންގުވާން ފެށުމުންނެވެ. ފޯނަށް ބަލާލުމުން އޭނާގެ މޫނުގެ ކުލަވަރު ފުސް ވެގެން ދިޔައެވެ. އަދި އެ ފޯން ސައިލެންޓް ކޮށްލީ އެ ކޯލަށް އިޖާބަ ދޭން ބޭނުން ނުވީތީއެވެ.

ފޯނު ކެނޑުމާއިއެކު އަނެއްކާވެސް ފޯން ރިންގުވާން ފެށިއެވެ. ގުޅަނީ ޒޯޔާއެވެ. މާން ފޯނު ނެގުމާއިއެކު، އަނެއްކޮޅުން އިވުނީ ޒޯޔާ ރޮމުން، އެހީއަށް އެދި ގޮވަމުންދިޔަ އަޑެވެ. ހިނދުކޮޅަކަށް މާން ހިމޭންވެލިއެވެ.

“ޔޫލީ… ޒޯޔާ ހުޅުމާލޭގައި އެބައުޅޭ، އޭނާއަށް ކޮންމެވެސް ކަމެއްވެގެން އެއުޅެނީ. އަވަހަށް ހިނގާ” މާން ކަންބޮޑުވުމާއިއެކު ތެދުވަމުން ބުނެލިއެވެ.

ޔޫލީގެ ހިތުގައި ސުވާލުތައް އުފެދުނު ނަމަވެސް، މާންގެ މޫނުމަތިން ފެނުނު ނުތަނަވަސް ކަމާއި އޭނާގެ އަމަލުތަކުގައިވި އަވަސް ކަމުން، އޭނާވެސް މާންއާއިއެކު ދާން ތެދުވިއެވެ.

މާންގެ ކާރު ހުޅުމާލޭގެ އެކަހެރި މަގަކަށް މަޑުކޮށްލިއިރު، މަގުބައްތީގެ މަޑު އަލީގެ ދަށުގައި ޒޯޔާ އިންދާ ފެނުނެވެ. މާން އަވަސްއަވަހަށް ކާރުން ފައިބައިގެން ގޮސް ޒޯޔާގެ ކައިރިއަށް ތިރިވިއެވެ. ޔޫލީވެސް ފަހަތުން ގޮސް ކައިރީގައި މަޑުކޮށްލިއެވެ.

ޒޯޔާ ގިސްލާފައި ރޮނީއެވެ. އޭނާގެ އަތްތިލައާއި މުލައްދަނޑީގައި ތޫނު އެއްޗަކުން ޒަހަމްކޮށްލާފައިވާ ފަދަ ކެފުންތަކެއް ހުރިއިރު، އެތަންތަނުން ލޭ އޮހެރެމުންދިޔައެވެ.

“ޒޯޔާ! ކިހިނެއްވީ؟” މާން ނުހަނު ކަންބޮޑުވުމާއިއެކު ޒޯޔާގެ އަތުގައި ހިފާލަމުން އަހާލިއެވެ.

“މާން… އަހަރެން… އަހަރެން ވަރަށް ބިރުގަނޭ…” ޒޯޔާ ރޮމުން، ކުއްލިއަކަށް މާންއާ އިތުރަށް ގާތްވެލާ، މާންގެ މޭގައި އަތްއަޅާ ބާރަށް ބައްދައިގަތެވެ.

މާން، ޒޯޔާގެ ހާލަތު ފެނިފައި އޭނާ ހަމައަކަށް އަޅުވައި، އެހީތެރިވުމަށްޓަކައި ޒޯޔާގެ ކޮނޑުގައި އަތްޖައްސާލިއެވެ. އެ ހާލަތުގައި ހުރި ޒޯޔާ ދުރަށް ޖައްސާލާކަށް މާން އަކަށް ނުކެރުނެވެ. މާންގެ މޭގައި ބޯއަޅާލައިގެން އޮތް ޒޯޔާ، މާންއަށް ނުފެންނާނެހެން، ފަހަތުގައި ހުރި ޔޫލީއާ ދިމާއަށް ބަލައިލިއެވެ.

ޒޯޔާގެ މޫނުމަތީގައިވި ކުލަވަރު މުޅިން ބަދަލުވެގެން ދިޔަ ތަން ފެނުނެވެ. އޭނާގެ ދެލޮލުން ފެނިގެންދިޔައީ ނުބައި، ނުރައްކާތެރި މަކަރުވެރިކަމެކެވެ.

އެ ނަޒަރާއި ހިނިތުންވުން ފެނި، ޔޫލީގެ މުޅި ހަށިގަނޑު ފިނިވެ، ހިތް ހުއްޓުނު ފަދަ އިހުސާސެއް ކުރުވިއެވެ.

***ނުނިމޭ***

ހުރިހާ ކިޔުންތެރިންގެ ކިބައިން ނިހާޔަތަށް މައާފަށް އެދެން. ވާހަކައިގެ އެޕިސޯޑު ލަސްވަމުން ދަނީ އަޅުގަނޑުގެ ބަލި ހާލަތު މިވަގުތު ހުރި ގޮތުން ނަމަވެސް ވީ ވަރަކުން ތިޔަ ކިޔުންތެރިންނަށް ވާހަކައިގެ ޕާޓުތައް ގެނެސްދެމުން ދާނަން… ޝުކުރިއްޔާ – ދެއްވާ އެއްބާރުލުމާއި ކެތްތެރިކަމާއިއެކު ތިކުރައްވާ އިންތިޒާރަށް … – ވިޝް-