އަވައްޓެރިޔާ! – 12

އެވަގުތު އަހަރެން ހަނދާންވީ ސަމީރު އަހަރެން ކައިރީގައި ބުނެފައިވާ ވާހަކައެކެވެ. ސަމީރު ބުނެފައިވަނީ އެޖިންނި އަންހެންމީހާ އަހަރެން އުރާލައިގެން ގެއާދުރަށް އަހަރެން ސަލާމަތް ކުރަން ދިޔަވާހަކަ އެވެ. ވީއިރު މަންމައަތަށް އަހަރެން ދިނީ ހަމަ ސަނޫރާ ބާއެވެ. ނޫނީ ސަނޫރާގެ ސިފައިގައި ހުރެގެން އެޖިންނި އަންހެންމީހާ ބާއެވެ. އަހަރެންގެ ކަރުގައި މިއޮށް ފަށުފުލުގެ ދަށުގައި 15 އޮގަސްޓް އެންގްރޭވް ކޮށްފައި ލިޔެފައި އެވަނީ ކޮންއިރަކުބާއެވެ. ސަނޫރާގެއްލުނު ރޭގެ ތާރީހު ހަމައެރޭގައި އޭގައި އެންގްރޭވް ކުރިބާއެވެ. މަންމަ ފޮރުވާފައިވާ އަހަރެންގެ އަތުގައި އޮތް ކެވެލީގެ ސިއްރަކީ ކޮބާބާއެވެ. އެތަކެއް ސުވާލެއް އަހަރެންގެ ހިތުގައި އުފެދުނެވެ.

ސަމީރު ބުނި އެހެން ވާހަކައެއްވެސް އަހަރެންގެ ހަނދާނަށް އެވަގުތު އައެވެ. އޭނާ ބުނެފައި ވަނީ ސަނޫރާ އަސްލު އުޅުނީ އަހަރެން ޝިފާނާއާ ހަވާލުކުރާކަށްވެސް ނޫންކަމުއެވެ. މަންމަ ކިޔާދިން ވާހަކަ ތަކުން އެއީ ތެދެއްކަން އަހަރެންނަށް އެނގުނެވެ.

ނަމަވެސް މިކަންތައް ގަނޑު ފެށުނުތަނާހެން އަހަރެން މާލޭގައި ހުރެ މަންމައަށް ގުޅިރެއެއްގައި މަންމަ ބުނެފައިވަނީ ސަމީރުއަށް އިތުބާރު ނުކުރައްޗޭ އަދި އެޕާޓްމެންޓު 301 އާ ދުރުގަ އުޅޭށޭއެވެ. އެއީ ކީއްވެ ބުނި އެއްޗެއްބާއެވެ. މަންމައަށް ސަމީރު އެނގެނީ ކިހިނެއްބާއެވެ. ތައުފީގުއާ މަންމަ ގުޅައިގެން ވާހަކަ ދައްކާކަން މަންމަ އޮތީބުނެފައެވެ. މަންމައަށް ތައުފީގު އެނގެނީ ކިހިނެއް ބާއެވެ. އެހުރިހާ ކަމެއްގެ ހަގީގަތަކީ ކޮބައިބާއެވެ… ކުއްލިއަކަށް އަހަރެންގެ ސިކުނޑީގައި އެތަކެެއް ސުވާލެއް ފުނިޖެހެންފެށިއެވެ.

“މަންމާ.. އަހަރެން ހިތުގައި އަދިވެސް ޖަވާބު ނުލިބޭ އެތައް ސުވާލެއް އެބަހުރި….” އަހަރެން ފުންނޭވާއެއް ލަމުން ބުނީމެވެ.

“އަހާ.. ދަރިފުޅު އަހަންބޭނުން ހުރިހާ ސުވާލެއް ހަމަ އަހަންވީ…” މަންމަ އެހެން ބުނެ އަހަރެންގެ ބޮލުގައި ފިރުމާލިއެވެ.

“މަންމަ ބުނީމެއްނު ސަމީރުއާ ދުރުން އުޅެން.. އޭނަގެ އެޕާޓްމެންޓާ ދުރުގަ އުޅެން.. އޭނައަށް އިތުބާރު ނުކުރަންވެސް މަންމަ ބުނީމެއްނު.. އެކީއްވެ؟”

އަހަރެން ބޭނުންވީ ސާފުނުވެ ހުރި ބައެއް ސުވާލުތަކަށް މަންމަގެ ފަރާތުން އަދިވެސް އިތުރަށް ޖަވާބު ހޯދާށެވެ.

“މަންމަމެން އެބުރު މާލެގޮސް ތިބީރު ޒުލްފައްތަ އެކީގަ އެއްދުވަހަކު ސަނޫރާ އުޅުނު ގެއަށް ދިޔައިން. އެއީ މިހާރު ދަރިފުޅު އުޅޭ ގެ. ސަނޫރާ އުޅުނީ ސަމީރު އުޅުނު އެޕާޓްމެންޓާ ޖެހިގެން ހުރި ބައިގަ.. މަންމަމެން ގޮސް ތިއްބާ އެގަޑީގަ ސަމީރު އައި ސަނޫރާ އުޅޭބަޔަށް ކޮންމެވެސް އެއްޗެއް ގަނެގެން ހިފާގެން. ސަމީރު ވަދެފަ ސަނޫރާ އަތަށް އެކޮތަޅު ދިންގަޑީގަ މަންމަމެންނަށް ވަރަށް ބެލި. އެކަމަކު އަނގަޔަކުން ނުބުނޭ. ޒުލްފައްތަ އެހި ސަނޫރާ ކައިރީގަ އެއީ ކާކުހޭ.. ސަނޫރާ ބުނީ އެއީ ރައްޓެއްސެކޭ. 301 ގަ އޭ އޭނަ އުޅެނީ.. ސަނޫރާއަށް ވަރަށް ހެޔޮ މީހެކޯ ސަމީރު އެއީ… ސަމީރުއަށް ވާނީ އަށާރަ ނޫނީ ނަވާރަ ވަރަކަށް އަހަރު އޭރު… ދެން އެދުވަހު އަނބުރާ ގެސްޓުހައުސް އަށް ގޮސްފަ މަންމަ އެހިން ޒުލްފައްތަ ކައިރީގަ ސަމީރު އަކީ ހެއްޔޭ ދަރިފުޅުގެ ބައްޕަ؟… ޒުލްފައްތަ ބުނީ ނޭނގެއޭ.. ސަނޫރާ ނުބުނޭ ދަރިފުޅުގެ ބައްޕައަކީ ކާކުކަމެއް…

ދެން ފަހުން ސަނޫރާ އައިސް މަންމައާ ދަރިފުޅު ހަވާލުކޮށްފަ ގޮސް އެއްދުވަސް ވީރުވެސް ހަބަރެއް ނުވީމަ މަންމައާ ބައްޕަ ދިޔައިން ސަނޫރާ މެންގެ ގެއަށް ދަރިފުޅު ގޮވައިގެން… އެދުވަހު ތައުފީގުއާ ދިމާވީ އެގެއިން.. އޭނަ ބުނީ ސަނޫރާ ދިޔަތަނެއް ނޭނގެޔޯ.. މަންމަ ނަންބަރު ތައުފީގުއަށް ދީފަ އައީ ސަނޫރާ އައިސްފިނަމަ މަންމައަށް ގުޅާށޭ ކިޔާފަ…. އެދުވަހު މަންމަމެން އެގެއިން ނިކުތް އިރު ސަމީރުއާ ދިމާވީ.. އޭނަ އައިސް ދަރިފުޅު އުރާލާފަ ކޮލަށް ދޮނެއް ދީފަ ދިޔައީ.. އެއްވެސް ވާހަކައެއް ވެސް ނުދައްކާ… މަންމަމެން މާލޭގަ ދުވަސް ކޮޅެއް މަޑުވެސް ކުރިން.. އެކަމަކު ސަނޫރާގެ ހަބަރެއް ނުވި… މަންމަމެން ދަރިފުޅު ގޮވައިގެން މިރަށަށް އައީ މަންމަމެން ރަށަށް ނުގޮސް… ރަށު މީހުންގެ ސުވާލުތަކަށް ދޭނެ ޖަވާބެއް ނެތުމުން…. އެފަހަރު މިރަށަށް އައިގޮތަށް މިރަށަށް ދިރިއުޅުން އެއްކޮށް ބަދަލުކުރީ… މަންމަ ދޭތެރެއަކުން ތައުފީގުއަށް ގުޅާގެން ބަލަން ސަނޫރާގެ ހަބަރެއް ވޭތޯ.. އޭނާ ފަހުން ބުނަން ފެށީ ސަނޫރާ ގެއްލިއްޖޭ…”

އެހުރިހާ ވާހަކައެއް ކިޔާދިނުމަށްފަހު މަންމަ ފުންނޭވާއެއް ލިއެވެ. ނަމަވެސް އަދިވެސް އަހަރެންނަށް ހުރިހާ ކަމެއް ސާފެއް ނުވިއެވެ. ސަމީރު އަހަރެންނަށް ކިޔާދީފައިވާ ވާހަކަތަކުން ސަނޫރާ ގެއްލުނު ހާދިސާގައި ތައުފީގުގެ އަތެއްވާކަން އަހަރެންނަށް އެނގެއެވެ. ނަމަވެސް މަންމައަށް އެއްވެސް އެއްޗެއް އަހަރެން ކިޔައެއް ނުދެމެވެ.

“މަންމައަށް ކިހިނެއް އެނގުނީ އަހަރެން އެގެއަށް ކަން ބަދަލުވީ.. އަހަރެން ނުބުނަމެއްނު މަންމަމެން ކައިރީގަ ކޮން ގެއެއްކަމެއް…”

އަހަރެން އެހީމެވެ.

“ދަރިފުޅު އެއްކަލަ ފޮޓޯގެ ވާހަކަ އަހަން މަންމައަށް ގުޅީމެއްނު… އެދުވަހު މަންމައަށް އެނގުނީ.. އެދުވަހު މަންމަ ހިތަށްއެރި ތަގުދީރު ނިޔާކުރިގޮތް ހާދަ ފުރިހަމައޭ… ދަރިފުޅަށް އެދެވުނީ ހަމަ އެގެއަށޭ.. ފުރަތަމަ މަންމަ ވަރަށް ބިރުގަތް… މަންމަ ގުޅިން ތައުފީގުއަށް… ގުޅާފަ ބުނިން ތައުފީގު ކައިރީގަ ދަރިފުޅަށް ބަަލަން…” މަންމަ ކިޔާދިނެވެ.

“އެހެންވީމަ ފެށުނީއްސުރެ ތައުފީގަށް އެނގޭދޯ އަހަރެންމީ ކާކުކަން… އޭނަކީއްވެބާ އެއްވެސް އެއްޗެއް ނޭނގޭކަމަށް ހަދާގެން ހުރިހާކަމެއް އެ ސިއްރުކުރަނީ…” އަހަރެން ވާހަކަ ދެއްކީ މަންމަގެ އަތުގަ ހިފައިގެން އިނދެއެވެ.

މަންމައަށް އެނގޭ މިންވަރަށް މަންމަ ހުރިހާއެއްޗެއް ކިޔައިދިނެވެ. ނޭނގި ހުރި ހުރިހާ ކަމެއް އިތުރަށް ހޯދަން އަހަރެން ޖެހޭނީ މަސައްކަތްކުރާށެވެ.

“މަންމާ.. އަހަރެން އަތުން މަންމަ ނެގި ކެވެލި ކޮބާ؟..” އަހަރެން އެހީމެވެ.

އަހަރެން އެހެން އެހުމުން އެބަ އަންނަމޭ ކިޔާފައި ގޮސް ކޮޓަރިއަށް ވަނެވެ.

“މިހާރު ދެން ދަރިފުޅަށް ވަރަށް ގިނަ ކަންކަން ސާފު ވެއްޖެއެއްނު… މިކެވެލި މިއޮތީ ހަމަ އެދުވަހު ނަގާފަ ބަންދު ކުރިގޮތަށް ދުވަހަކުވެސް މީތި މަންމަ ނުނަގަން… މި ކެވެލީގެ ހަގީގަތެއް މަންމަ އަކަށް ނޭނގެ.. ސަނޫރާ ގެއްލުނު ހާދިސާގެ ހުރިހާ ހަގީގަތެއް ދަރިފުޅު ހޯދާތި.. އެކަމުގަ ފަހަރެއްގަ މީތީގެ ބޭނުމެއް ޖެހިދާނެ.. މީތި އަވަހަށް ފޮރުވާ…”

މަންމައައިސް އަހަރެންގެ އަތަށް ބަންދުކޮށްފައިވާ ކުޑަ ފޮއްޓެއް ދިނެވެ. ނަމަވެސް އެވަގުތު އެފޮށި ހުޅުވައިގެން އެކެވި ބަލާކަށް އަހަރެން ބޭނުމެއް ނުވިއެވެ. ވަރަށް ހަމަޖެހިގެން އެފޮށި ހުޅުވުމަށް އަހަރެން އޭތި އަހަރެންގެ ދަބަހަށްލާ ރައްކާ ކުރީމެވެ. ހުރިހާ ކަމެއް ގެ ހަގީގަތް ހޯދެން ދެކަށް ތައުފީގުއަށް އިތުރަށް ނުގުޅުމަށް އަހަރެން މަންމަ ކައިރީގައި އެދުނީމެވެ.

………………………..

އާއިލާ އާއެކުގައި ރަށުގައި ހަފްތާއެއް ވަރު ހޭދަކޮށްލުމަށްފަހު އަހަރެން އެނބުރި މާލެއައީމެވެ.

އެދުވަހު އަހަރެންނަށް މާލެ އާދެވުން އިރު އިރުއޮއްސެން ކައިރި ވެފައި ހުރުމުން އަވަހަށް ޓެކްސީއެއްގައި ގެއަށް ދިޔައީމެވެ. ދިޔަގޮތަށް ގޮސް ދަބަސްތައް ހިފައިގެން އަހަރެންގެ އެޕާޓްމެންޓަށް ވަދެ ސޯފާގައި އިށީނދެ ހަމަޖެހިލީމެވެ.

އޭރު ބަނޑުހައި ވެފައި ހުރިވަރުން ނޫޑްލް ކޮޅެއް ކައްކައިގެން ކެއުމަށްފަހު ގޮސް، މަންމައާ ދޮންތަ ދީފައިހުރި ހަދިޔާތަކާ އެއްޗެހި ނަގައި، ފޮށީގައި ހުރި ހެދުންތަކާ އެހެނިހެން ސާމާނުތައް ނަގައި ހަމައަކަކަށް އަޅުވާލެވުނުއިރު ގަޑިން ނުވައެއް ޖަހަނީއެވެ.

އަހަރެން ފެންވަރައި ހަމަޖެހިލައިގެން ގޮސް ސަމީރުގެ އެޕާޓްމެންޓުގައި ޓަކިޖެހީމެވެ. ދެތިންފަހަރަކު ޖަހާލިތަނުން ސަމީރު ދޮރުހުޅުވިއެވެ.

“ނޫރާ… ކޮންތާކަށް ގޮސްފަ ތިއައީ… އަހަރެން މިހުރީ ވަރަށް ބިރުން ނޫރާ ނުފެންނާތީ…” އަހަރެން ފެނުމާއެކު ސަމީރު ބުންޏެވެ.

“އޯކޭތަ އެތެރެއަށް ވަނަސް… އެބަހުރި ވަރަށް ވާހަކަ ދައްކަން…”

އަހަރެނެ އެހެން އެހުމުން ސަމީރު އާނއެކޭ ބުނެ ހީލިއެވެ. އަހަރެން އެތެރެއަށް ވަދެ މޭޒުކައިރީގައި ހުރި ގޮނޑިއެއްގައި އިށީނީމެވެ.

ސަމީރު އައިސް މޭޒުގެ އަނެއްފަރާތުގައި އަހަރެން ކުރިމައްޗަށް ވާހެން ހުރި ގޮނޑީގައި އިށީނެވެ.

އަހަރެން ރަށަށް ދިޔަ ވާހަކައާ މަންމަ ކިޔައިދިން ހުރިހާ ވާހައެއް ވަރަށް ތަފްސީލުކޮށް ސަމީރުއަށް ކިޔައިދިނީމެވެ. އަހަރެންނަށް އެނގޭ އެއްޗެހި އިތުރަށް ސަމީރުއަށް ފޮރުވާކަށް އަހަރެން ބޭނުމެއްނެތެވެ. އަހަރެން ހުރިހާ ވާހަކައެއް ކިޔައިދީ ނިމެންދެން ސަމީރު ވަރަށް ކަނުލާ އަޑުއަހަން އިނެވެ.

“އެކަމަކު ނޫރާ…. އެރޭ ނޫރާ ގޮވާގެން ގެއިން ނިކުތީ އެޖިންނި އަންހެންމީހާ… ސަނޫރާއެއް ނޫން.. އެރެއަށް ފަހު، އެވަގުތަށް ފަހު ސަނޫރާއެއް ދުވަހަކުވެސް އަހަރެން ނުދެކެން…”.

ސަމީރު ވަރަށް ޔަގީން ކަމާއެކު ބުންޏެވެ.

“އަހަރެންވެސް ތިހެން ހިތަށް އެރިއޭ… ސަމީރު ކުރިން އެހެން ބުނެފަ އޮތީމަ…”

އަހަރެން ބުނީމެވެ.

“ސަމީރު… އަހަރެން މިހާރު އެންމެ އެނގެން ބޭނުންވަނީ އަހަރެންގެ ބައްޕަ އަކީ ކާކުކަން. ސަމީރުއަށް އެނގޭތަ އެއީ ކާކުކަން؟…” އަހަރެން އެހެން އެހުމުން ސަމީރު އިރުކޮޅަކު ވިސްނަން އިނެވެ.

“ނޭނގެ…” ސަމީރު ވިސްނަން އެިނދެފައި ދިނީ ކުރު ޖަވާބެކެވެ.

“ސަމީރުއާ ސަނޫރާ އާ ދިމާވީ ކިހިނެއްތަ؟… ތި ދެމީހުން އެހާ ގާތް ރައްޓެހިންނަށް ވީ ކިހިނެއްކަން ކިޔާދީބަލަ..”

އަހަރެން އެހުރިހާ ކަމެއް އެނގެން ބޭނުންވީ މިކަންތައްގަނޑުގެ ހަގީގަތް ހޯދޭނީ ހުރިހާ ކަމެއް ފެށުނު ހިސާބުން ވީގޮތް އެނގިގެން ކަމަށް ވާތީއެވެ.

ސަމީރު އިރުކޮޅަކު އަނގައިން ނުބުނެ އިނދެފައި މާނޭވާއެއް ލުމަށްފަހު ވާހަކަ ފެށިއެވެ.

“ސަނޫރާ މިގެއަށް ބަދަލުވީރު އޭނަ ބަނޑުބޮޑު.. ހީވަނީ 2 މަސްހެން ވީ އޭރު ބަނޑަށް… ސަނޫރާ މަސައްކަތްކުރީ މިތާ ކައިރި އޮފީހެއްގަ.. ގެއަށް ކުލި ދައްކާ ހުރިހާ ކަމެއް ވެސް ކުރީ އޭނަ އެކަނި މާއެކަނި… އޭނަ އުޅުނީ ހަމަ ތިންވަނަ ފްލޯގަ…. އަހަރެން އުޅުނީ ހަމަ މި ފްލޯގަ.. އެޕާޓްމެންޓް 301 ގަ. އަހަރެން ހުރީ ރަށުން ކިޔަވާ ނިމިގެން އައިސް މާލޭގަ ކިޔަވަން.. ކިޔަވަމުން އަހަރެން ވަޒީފާއަށް ވެސް ދިޔައީ.. އޭރު އަހަރެންނަށް ވާނީ އަށާރައަހަރު.. ރަށުން މަންމަމެން ރުފިޔާ ފޮނުވާތީ އާ، އަހަރެންނަށް ރަނގަޅު މުސާރައެއްވެސް ލިބޭތީ ވަރަށް ހަމަޖެހިގެން އެކަނި އުޅުނީ… އެހެން އުޅެނިކޮށް ސަނޫރާ އަބަދު ފެންނަން ފެށީ.. ދެން ވާހަކަ ދައްކާ ރައްޓެހިކަން އުފެދުނީ… ސަނޫރާ އަހަރެންނަށް ވުރެ ބޮޑުވާނެ ތިނެއް ނޫނީ ހަތަރު އަހަރު… ވީ ބިކޭމް ބެސްޓް ފްރެންޑްސް….”

ސަމީރު އެހިސާބަށް ބުނިއިރު އޭނާގެ ދެލޯ ފެންކަޅިވިއެވެ. މާޒީގެ ހަނދާންތައް އާވުމުން ވަރަށް ބޮޑަށް ސަމީރު ހިތުގައި ޖެހުނީކަން އަހަރެންނަށް އެނގުނެވެ.

އަހަރެން ގޮސް އެތާ ކައިރީގައި ހުރި ފްރިޖުން ފެންފުޅިއެއް ގެނެސް ސަމީރު އަތަށް ދިނީމެވެ.

“ޓޭކް ޔުއަރ ޓައިމް…. ހަމަ ޖެހިގެން ކިޔާދީ…” އަހަރެން އެެހެން ބުނުމުން ސަމީރު ފެންބޮއި ހަމަޖެހިލިއެވެ.

އަނެއްކާވެސް އިރުކޮޅަ ވާހަކަ ނުދައްކައި އިނުމަށްފަހު ސަމީރު ފެށިއެވެ.

“އަހަރެން އެކަނި އުޅޭތީ އަބަދުވެސް އަހަރެން ކައި އުޅުނީ ހޮޓަލުން… އެކަމަކު ސަނޫރާ އާ ފްރެންޑްޝިޕް އުފެދުން ފަހުން އޭނާ އަބަދުވެސް ކައްކާނީ އަހަރެންނާ ލައިގެން.. އަހަރެންވެސް ސަނޫރާއަށް އެކިއެކި ކަންކަމުގަ ވަރަށް އެހީވިން… ސަނޫރާ ކައިރީގަ އަހަރެން އެހިން ބަނޑުގަ އޮތީ ކާކު ކުއްޖެއްތޯ… ފިރިމީހާ ކޮބާތޯ… ސަނޫރާބުނީ އޭނަ އެންމެ ލޯބިވީ މީހާ ގެ ދަރިއެކޯ ބަނޑުގައޮތީ… އަހަރެން ކައިރިއަކު އެމީހާގެ ނަމެއް ނުބުނި…

ސަނޫރާ ބަނޑުބޮޑުވީމަ އެމީހާ ބުނީޔޯ ދަރިފުޅު ވައްޓާލަން. އޭރުންނޯ ކައިވެނި ކުރާނީ.. ސަނޫރާ އެކަމަށް އެއްބަސް ނުވީމަ ބުންޔޯ މަރާލާނަމޭ.. ދެން ސަނޫރާގެ މައިން ބަފައިންނަށް އެހުރިހާ ވާހަކައެއް ކިޔާދިނުމުން އެމީހުން ބުނިކަމަށް ވަނީ ނަހަލާލަށް ބަލިވެ އިނުމުން ސަނޫރާއަކީ އެދުވަހުން ފެށިގެން އެމީހުންގެ ދަރިއެއް ނޫންކަމަށް… އެހެންވެ އާއިލާ އެންމެންނާ ގުޅުން ކަނޑާލުމަށްފަހުއޯ ސަނޫރާ މިގެއަށް ބަދަލުވީ… ސަނޫރާ ބުނީ މިގެއަށް ބަދަލުވެ އޭނަގެ ފޯނު ނަންބަރުވެސް ބަދަލުކުރީޔޯ… އެންމެންނާ ގުޅުން ކަނޑާލުމަށް ފަހު އެކަނި އުޅެން އޭނަ ބޭނުންވީ.. ސަނޫރާ ބަނޑުގައޮތް ދަރިފުޅު، މިބުނީ ނޫރާގެ ހައްގުގަ އޭނަ ވަރަށް ސެކްރިފައިސް ކުރި…”

ސަމީރުގެ ވާހަކަ އެހިސާބަށްދިޔައިރު އަހަރެންނަށް ރޮވެންފެށިއެވެ…. ސަމީރުގެ ވާހަކައިން އަހަރެންގެ މަންމަ އަހަރެން މިދުނިޔެއަށް ގެންނަށް ކުރި ހިތްވަރު އެނގުނެވެ. ވީ ގުރުބާނީތައް ސާފުވިއެވެ.. ނަމަވެސް މިއަދު އެމަންމަ އަހަރެން ކައިރީގައި ނެތުމުން އަހަރެންގެ ހިތް ހީވީ ފަޅައިގެން ދާން އުޅުނުހެންނެވެ.

“ނޫރާ… ނުރޮއި ހުއްޓާލާ… އަދި މިކިޔާދެވުނީ އެއްބައި..” ސަމީރު އައިސް އަހަރެން ގެއަތަށް ޓިޝޫއެއް ދިއްކޮށްލަމުން އަހަރެންގެ ބޮލުގައި ފިރުމާލިއެވެ. އެވަގުތު އަހަރެންނަށް އިހުސާސްވީ ސަމީރުއަކީ އަހަރެން ދެކެ ވަރަށްލޯބިވާ ބޭބެއެއް ފަދައިންނެވެ.

އަހަރެން ޓިޝޫއިން ކަރުނަ ފޮހެލުމަށްފަހު އަނެއްކާވެސް ވާހަކަ ކުރިއަށް ގެންދިއުމަށް އެދުނީމެވެ.

“ސަނޫރާގެ އެންމެ ގާތްމީހަކަށް ހުންނާނީ ޒުލްފައްތަ އެކަނި…މާގިނަ ރައްޓެހިންނެއް ނުތިބޭ އޭނަގެ… ދެން މިގެއަށް އައިފަހުން އަހަރެން ހުންނާނީ.. ސަނޫރާއަކީ އަހަރެން ކަހަލަ ބަސްމަދު މީހެެއް… ސަނޫރާ ވިހައިގެން ނޫރާއަށް ތިންއަހަރު ވަންދެންވެސް ހުރިހާ ކަމެއް ކޮށްހެދީ ހަމަ އެކަނިމާއެކަނި ކަހަލަ ގޮތަކަށް… ނޫރާއަށް 3 މަސްވީތަނާ އަނެއްކާ އޮފީހަށް ދާންފެށީ މިތާކައިރީގައި ހުންނަ ގެއެއްގަ އުޅުނު ދައްތައެއް ކައިރިއަށް ނޫރާ ލާފަ.. އެދައްތައަށް ޕޭކޮށްގެން ބޭބީސިޓް ކުރަން… އެހެން އުޅެމުން ގިސް ނޫރާއަށް 3 އަހަރު ވަނިކޮށް ސަނޫރާ ކުއްލިއަކަށް އަހަރެންނާ ވަރަށް ދުރުވާން ފެށި… އެދުވަސްކޮޅު ސަނޫރާ އަބަދުވެސް ފެންނައިރު ހީވާނީ ކަމަކާ ވަރަށް ސްޓެރެސް ވެފަ ހުންނަހެން… ދެތިންރެއަކު އަހަރެންނަށް އިވުން އެ އެޕާޓްމެންޓް ތެރެއިން ފިރިހެނެއް ވާހަކަ ދެއްކި އަޑުވެސް.. އަހަރެން އެހީމަ ސަނޫރާ ބުނީ އިތުރަށް ސުވާލު ނުކުރާށޯ… ދެން އަހަރެން ފަހުން އެކަމާ ބެހޭގޮތުން އެއްވެސް ސުވާލެއް ނުކުރަން… އެއްދުވަހަކު ޝިފާނާއާ ޒުލްފައްތައާ މީހުން ސަނޫރާކައިރިއަށް އައިސް ތިއްބައި އަހަރެންނަށް އެ އެޕާޓްމެންޓަށް ވަނިން… އެއީ ވަރަށް ދުވަހަށްފަހު ސަނޫރާ އަހަރެން ކައިރީގަ ކަމަކު ކީދުވަހެއް… އޭނަބުނެގެން ނޫރާއަށް ކާންދޭ ނެސްޓަމް ގަނެގެން އަހަރެން ދިޔައީ… ހަމަ އެހަފްތާ ތެރޭގަ ސަނޫރާ ގެއްލުނީ…”

ސަމީރު އެހިސާބަށް ބުނެ ފުންނޭވާއެއް ލިޔެވެ.

ސަނޫރާގެ ހަޔާތަށް ކުއްލިއަކަށް އެހާބޮޑު ލޮޅުމެއް އެއައީ ކީއްވެބާއެވެ. ސަނޫރާގެ އެޕާޓްމެންޓުގެ ތެރެއިން ސަމީރުއަށް އިވުނީ ކޮން ފިރިހެނެއްގެ އަޑުބާއެވެ…

-ނުނިމޭ-