އެއީ އެކަނިވެރިއެެކެވެ 1

އާދައިގެ މަތިން ޒާރާ ކޮޓަރިން ބޭރަށް ބޯދިއްކޮށްލިއެވެ. އެންމެން ނިދާފައި ތިބި ގަޑިކަމުން އެކަކުވެސް ނެތްކަން ޔަގީންކޮށްލުމަށްފަހު ޒާރާގެ ކޮޓަރިއާއި ޖެހިގެންއިން ކޮޓަރިއަށް ޒާރާ ވަނެވެ. އެއާއިއެކު ޒާރާގެ ލޮލުން ކަރުނަ އައީ މާޒީގެ ހަނދާންތަކުގެ ސަބަބުންނެވެ. ޒާރާ މަޑުމަޑުން ގޮސް އެތާއިން މޭޒުގެ ވަތްގަނޑު ހުޅުވާލިއެވެ. އެއަށްފަހު އެތޭރަގައި އޮތް ފޮތް ނަގައި ކިޔަންފެށިއެވެ.

…………………………………………………………..

އަހަރެންގެ ނަމަކީ ޒީޝާއެވެ. އަހަރެންނަކީ އުމުރުން 17 އަހަރުގެ އެކަނިވެރި އަންހެން ކުއްޖަކީމެވެ. އަހަރެންގެ އަހަންނަށްވުރެ އެއްއަހަރު ހަގު ކޮއްކޮއެއް ހުރެއެވެ. ނަމަކީ ޒާރާއެވެ. އަހަރެންގެ މައިންބަފައިން އަހަރެން ބަލާބޮޑުކުރީ ލޯތްބާއި އަޅާލުން ދީގެންނެއްނޫނެވެ. އެހެންނަމަވެސް އެމީހުންގެ ފަރާތުން ޒާރާއަށް ލޯތްބާއި އަޅާލުން ލިބޭތީވެ އަހަރެން އުފާކުރަމެވެ. އަހަރެން އަހަރެންގެ މައިންބަފައިންނެކޭ އެއްގޮތަށް ޒާރާދެކެވެސް އިންތިހާއަށް ލޯބިވަމެވެ. އެހެންނަމަވެސް ޒާރާގެ ފަރާތުން އަހަންނަށް ލިބެނީ ވޭނާއި ނަފްރަތެވެ. ހިތްކަތިލާފަދަ ބަސްތަކެވެ. އަހަރެންނަށް ކުރެވުނީ ކޮންކުށެއް ކަމެއް ނޭނގެއެވެ.

އަހަރެންނާއި ޒާރާ ދަނީ އެއްސްކޫލަކަށެވެ. އަހަރަކީ އަހަރެން ގްރޭޑް 10 ގައިހުރި އަހަރެވެ. ޒާރާ ގްރޭޑް 9 ގައިހުރި އަހަރެވެ. އަހަރެންގެ ޅަހިތުގައި ވަނީ މީހަކަށް ލޯބި އުފެދެން ފަށާފައެވެ. އެއީ 10އެސް1 ގައި އުޅޭ ޔޫހާންއެވެ. ޔޫހާންއަކީ ހިތްހެޔޮ މަޑުމައިތިރި ރަނގަޅު ކުއްޖެކެވެ. ކިޔެވުމަށް މޮޅު އެންމެންގެ އިހްތިރާމް ލިބިފައިވާ ކުއްޖެކެވެ. އެއްދުވަހެއްގައި ސްކޫލް ނިމުނު ވަގުތެވެ. އަހަރެން ސިޑިން ފޭބިގަޑީގައި މީހަކު ގޮވާލިއެވެ. ފަހަތަށް އެނބުރި ބަލައިލީރު ޔޫހާންއެވެ.

” މިއޮތީ ޒީޝާއަށް. ” ހިނިތުންވެލަމުން ޔޫހާން ގަނޑުކޮޅެއް ދިއްކޮށްލިއެވެ. ރައްދުގައި ހިނިތުންވެލަމުން އަހަރެންވެސް އޭގައި ހިފީމެވެ. އެއަށްފަހު ގަނޑުކޮޅު ހުޅުވާލައި ކިޔަންފެށީމެވެ.