ނޭދެން ވަކިވާކަށް 18 ވަނަ ބައި

މުޅި ކެބިންގެ މާހައުލު ވަނީ ނޭވާ ހާސްވާ ވަރަށް ނުތަނަވަސްވެފައެވެ. ކުއްލިއަކަށް ޔޫލީގެ މޭޒުމަތީގައި އޮތް ފޯނު ބާރަށް ރިންގުވާން ފެށިއެވެ. އެ އަޑުން ދެމީހުންގެ މެދުގައި އުފެދިފައިވާ ހިމޭންކަން މުގުރާލިއެވެ.

“ހަލޯ…….ނޫން ތިހެނެއްނުވާނެ… ބުނޭ ތީ ދޮގެކޭ…..” ޔޫލީ ފޯން ނަގައި ވާހަކަދައްކަން ފެށުމާއިއެކު ބާރު އަޑުން ރޯން ފެށިއެވެ.

އޭނާގެ އަތުން ފޯނު ދޫވެ، ތަޅުންގަނޑުމައްޗަށް ވެއްޓުނު އަޑާއިއެކު، މުޅި ކެބިން ތެރެއަށް ޔޫލީގެ ބާރު ރުއިމުގެ އަޑު ގުގުމާލިއެވެ. އޭނާ މޭޒުމަތީގައި ބޯޖަހާލައިގެން އިނދެ، ނޭވާ ނުލެވިގެން އުޅޭ ފަދައަކުން މުޅި ހަށިގަނޑު ތުރުތުރުލާ ހާލު ގިސްލަމުން ދިޔައެވެ.

މާން ސިހިފައި ގޮނޑިން ތެދުވިއެވެ. ދާދި ދެންމެއަކު އޭނާގެ ހިތުގައި އޮތް ރުޅިވެރިކަމާއި ފޫހިކަން، ޔޫލީގެ އެ ހިތްފަޅައިގެންދާ ފަދަ ވޭނީ އަޑުން ފިލައިދިޔައީ ހެއްޔެވެ. އޭނާގެ ހިތަށް ކުއްލިއަކަށް ނޭނގޭ ބިރުވެރިކަމެއް ވެރިވެގެން ދިޔައެވެ. ޔޫލީގެ ކަންކަމާއި އަޅާލަން ކިތަންމެ ބޭނުން ނުވި ނަމަވެސް، އޭނާގެ ހިތުގައި ޔޫލީއާއި މެދު އުފެދިފައިވާ ފުން އިހުސާސްތައް އެކަމަށް ހުރަސް އަޅައެވެ. ޔޫލީއަށް ނަފްރަތުކުރަން ބޭނުންވި ކަމުގައި ވިޔަސް އެ އަންހެންކުއްޖާގެ ވޭނީ ރުއިމުން އޭނާގެ ހިތް ރޮއްވައެވެ. އެ އަންހެންކުއްޖާއަށް ހިތްދަތިކަމެއް ލިބެން އޭނާގެ ހިތް ނޭދެނީއެވެ.

މާން ބާރު ފިޔަވަޅުތަކެއްގައި އައިސް ޔޫލީގެ ކައިރިއަށް ހުއްޓުނެވެ. އޭނާގެ ހިތުގައި އަދިވެސް ޔޫލީގެ އަމަލުތަކާއި މެދު ރުޅިވެރިކަން ވިއެވެ. އެކަމަކު… މި ވަގުތު އެއަށްވުރެ ބޮޑަށް އޭނާގެ ހިތް އެދުނީ ޔޫލީއަށް އެހީވުމަށެވެ. އޭނާ ޔޫލީގެ ތުރުތުރުލަމުންދިޔަ ކޮނޑުގައި ދެއަތުން ހިފާލިއެވެ.

“ޔޫލީ! ކިހިނެއްވީ؟ ކާކު ގުޅީ؟” މާންގެ އަޑުގައި ދެންމެ ހުރި ހަރުކަށިކަން ކެނޑި، އެ އަޑުން އާދޭހާއި ހާސްކަން ފާޅުވިއެވެ.

ޔޫލީ އިސްއުފުލާލިއެވެ. އޭނާގެ ދެލޮލުން ހޯސްލާފައި ފައިބަމުންދިޔަ ކަރުނަތަކާއި، މޫނުމަތިން ފެންނަން ހުރި ސިހުމާއި ބިރުވެރިކަން ފެނިފައި މާންގެ ހިތް ހުއްޓުނު ފަދަ އިހުސާސެއް ކުރެވުނެވެ. މާން އޭނާއާއި ދިމާލަށް ކީ ރަހުމެއް ނެތް ބަސްތައް ޔޫލީ ހަނދާންވިއެވެ. ‘މިއީ އަހަރެން ދެކެ ފަކުރުގަނެ، ނަފްރަތުކުރާ މީހާ’، ޔޫލީގެ ސިކުނޑި ހަޅޭއްލަވައިގަތެވެ.

ޔޫލީ ބާރަށް މާންގެ އަތް ފޮޅުވާލިއެވެ. “މަގޭ ގައިގާ އަތްނުލާ! ބޭނުމެއް ނޫން… ތި ބޭފުޅާގެ އެއްވެސް އެހީއެއް އަހަރެން ބޭނުމެއް ނޫން.. އަހަރެން ކިތަންމެ ހާލެއްގައި އުޅެން ޖެހުނަސް ތިމީހާގެ އެހީ ބޭނުމެއްނޫން!” ޔޫލީ ގޮތްދޫނުކުރާ އަޑަކުން ރޮމުން ބުންޏެވެ. އޭނާ ގޮނޑިން ތެދުވެ، މާންއާއި ދުރަށް ފިޔަވަޅެއް އެޅިއެވެ. ” ދެންމެ އަހަރެންގެ ސިފަ ފެނިގެން ފޫހިވެ، ފަކުރުގަތް މީހާ މިހާރު އަހަރެންގެ ކަރުނައިގެ އަގު ބަލަން ތިއުޅެނީ ކީއްކުރަން؟”

“ޔޫލީ! ގޮތްދޫކޮށްފައި ވީ ގޮތް އަހަރެން ގާތު ބުނެބަލަ!” މާން އަނެއްކާވެސް ޔޫލީގެ އަތުގެ މުލައްދަނޑީގައި ހިފެހެއްޓިއެވެ. މިފަހަރު މާންގެ އަތުގެ ބާރު ގަދައެވެ. އޭނާގެ ދެލޮލުން ފެންނަނީ ރުޅިވެރިކަމާއިއެކުވެސް ޔޫލީއަށްޓަކައި ހިތް ބިރުގެންފައިވާ އަސަރެވެ. “އަހަރެންގެ ހިތް ބުނަނީ ޔޫލީ ތި ރޮނީ ބޮޑު ކަމެއް ވެގެންނޭ!”

“އަހަރެންގެ… އަހަރެންގެ މަންމަ އާއި ބައްޕަ…” ޔޫލީގެ އަޑު މެދުކެނޑުނެވެ. އޭނާގެ އަރު ބެދި، ނޭވާ ކުރުވިއެވެ. “އެކްސިޑެންޓް… ބޮޑު އެކްސިޑެންޓެއް ވެއްޖެއޯ މެލޭޝިޔާގަ… މަންމަ… މަންމަ ދެން…..”

އެ ޖުމްލައާއިއެކު ޔޫލީގެ ހަށިގަނޑުން ހުރިހާ ބާރެއް ދޫވިއެވެ. އޭނާ ތަޅުންގަނޑުމައްޗަށް ވެއްޓެން ދިޔަ ވަގުތު، މާން ހަލުވިކަމާއެކު ޔޫލީ އޭނާގެ ބާރުގަދަ އަތުގެ ތެރޭ ގައިދުކޮށްލިއެވެ. ޔޫލީގެ ހަށިގަނޑު މާންގެ އަތްމައްޗަށް ދެމުނުއިރު، އޭނާގެ ދެލޯ ވަނީ މެރިފައެވެ. މާންގެ ހިތް ބިރުން ތެޅިގަތެވެ. އޭނާ އަވަސް އަވަހަށް ޔޫލީ އުފުލާލައިގެން ގޮސް ކެބިންގައި ހުރި ސޯފާގައި ބާއްވާލުމަށްފަހު، މޭޒުމަތީގައި ހުރި ފެންފުޅިން އަތަށް ފެންފޮދެއް އަޅައިގެން އޭނާގެ މޫނުގައި ފެން އުނގުޅަން ފެށިއެވެ. އޭރު މާންގެ އަތްވެސް ދިޔައީ ނޭނގޭ ބިރުވެރިކަމެއްގެ ސަބަބުން ތުރުތުރުލަމުންނެވެ.

ސޯފާގެ ކައިރީގައި ކަކޫ ޖަހާލައިގެން އިނދެ، މާން ޔޫލީގެ މައުސޫމް މޫނަށް ބަލަހައްޓައިގެން އިނެވެ. އޭނާގެ ހިތަށް ކުއްލިއަކަށް ވެރިވެގެން ދިޔައީ ކުށްވެރިކަމުގެ ފުން އިހުސާސްތަކެވެ. ‘އަހަރެން އޭނާއާއި ދިމާލަށް ކީ ކޮން ފަދަ ހުތުރު، ހަރުކަށި ބަސްތަކެއް ހެއްޔެވެ؟’ މާން އަމިއްލަ ނަފްސާއި ސުވާލު ކޮށްލިއެވެ. ރިލްވާނާއިއެކު ޔޫލީ ފެނުމުން އަދި އޮފީހުގައި ދެކެވުނު ވާހަކަތައް އަޑު އިވުމުން، އޭނާގެ ހިތުގައި އުފެދުނު ރުޅިއާއި ހަސަދަވެރިކަމުގެ ސަބަބުން، ޔޫލީގެ ހިތް ކުދިކުދިވާނެ ފަދަ ތުހުމަތުތައް ކުރެވުނު އިރު، ޔޫލީގެ މުޅި ދުނިޔެ، މިފަދަ ބޮޑު ތޫފާނެއްގެ ތެރެއަށް ގަރަގުވެގެން ދާނެ ކަމަށް އޭނާގެ ހިތަށްވެސް އަރާނީ ކިހިނެއް ހެއްޔެވެ؟

މާންގެ ހިޔާލްތައް ދަތުރުކޮށްލީ ނާއިލްއަށެވެ. ނާއިލްއަކީ އޭނާގެ ހަޔާތުގައި ބައްޕަ ނެތް ދުވަހު ބައްޕައެއް ފަދައިން އިރުޝާދުދީ، އޭނާއަށް އަޅާލާ މީހެކެވެ. ނާއިލްގެ ހުރި ހަމައެކަނި އުއްމީދަކީ ޔޫލީއެވެ. މާން ޔޫލީގެ އަތްތިލައިގައި މަޑުމަޑުން ހިފާލިއެވެ. އޭނާގެ ހިތުގައި ޔޫލީއަށްޓަކައިވާ ފުން ލޯބި، އެ ކުށްވެރިކަމުގެ ތެރެއިން ދިރިގެން އައެވެ. ‘ޔޫލީ… އަހަރެންދެކެ ކިތަންމެ ނަފްރަތް ކުރިޔަސް، މި ހިތާމައިގައި އަހަރެން ޔޫލީ އެކަނިވެރިވިޔަކަނުދޭނަން. ‘ މާން ހިތާހިތުން ބުނެލިއެވެ.

އެ ވަގުތު، ޔޫލީގެ ބޯ މަޑުމަޑުން ހަރަކާތްކޮށްލިއެވެ. އޭނާގެ ދިގު އެސްފިޔަތައް ތުރުތުރުލާން ފެށިއެވެ. ޔޫލީ މަޑުމަޑުން ދެލޯ ހުޅުވާލިއިރު، މުޅި ތަން ފެންނަމުންދިޔައީ ފުސްކޮށެވެ. އޭނާގެ ކުރިމަތީގައި ކަންބޮޑުވެފައި އިން މާންގެ ސޫރަ ސާފުވާން ގިނަ އިރެއް ނުނެގިއެވެ. ޔޫލީގެ ހަނދާނަށް ކުއްލިއަކަށް އައީ ފޯނުން އިވުނު ބިރުވެރި ހަބަރެވެ. “މަންމާ! ބައްޕާ!” ޔޫލީ ސިހިފައި ހަޅޭއްލަވައިގަންނަމުން ސޯފާއިން ތެދުވަން އުޅުނެވެ. ނަމަވެސް އޭނާ އަނެއްކާވެސް ވެއްޓެން ދިއުމުން، މާން އަވަހަށް ޔޫލީގެ ކޮނޑުގައި ހިފަހައްޓާލިއެވެ.