ވާތީ ހިތަކު ލޯބި މަންމަންވެފާ 32

އިމްރާން ދައްކަން ޖެހޭ ވަރަށް ވާހަކަ އެބަ ހުރި. ސުވާލު ކުރާ ކޮޓަރިއަށް ވަދެވެންދެން މަޑުކޮށްލާ” އެޒިކިއެލް ބުނެލިއެވެ. ޔައުލާން ހިނގައިގަތީ ލީރާ ކައިރިއަށެވެ. “ލަޝްކާ ނޫން އެހެން ކުއްޖެއް އިމްރާން ހުންނަކަން އެނގޭތަ؟” ޔައުލާން ކޮށްލި ސުވާލު ބޭރަށް ނިކުންނަން އައި ލަޝްކާއަށް ވެސް އިވުނެވެ. ވަގުތުން އެތަނުގައި ކުޑަވަރެއްގެ ބޮމެއް ގޮވިފަދައެވެ.

(32 ވަނަ ބައި)

“ކި… ކީކޭ…؟” ލީރާގެ އަޑު އައީ ކެނޑި ކެނޑިގެންނެވެ. ފަހަތުގައި ހުރި ލަޝްކާ ވެސް ހުރީ ކުޑަވަރެއްގެ ޝޮކެއްގައެވެ. އޭނަގެ ކޮއްކޮއެއް ނޫނީ ދައްތައެއް ބޭބެއެއް ހުންނަނީ ހެއްޔެވެ؟

“ލީރާއަށް އިނގޭތޯ ބަލައިލީ. އިތުރު ތަފްސީލް ލިބޭނީ އިމްރާންއާއި ވާހަކަ ދައްކާ ނިމުމުން. އިހަށް މަޑުކޮށްލާ” ޔައުލާން ބުނެލިއެވެ. އަދި އެޒިކިއެލްއާއި އެކު އިމްރާން ގޮވައިގެން އެތެރެއަށް ވަނެވެ.

ސުވާލު ކުރާ ކޮޓަރީގައި އިން އިމްރާން އިނީ ލަދުން ބޯ ހަލާކުވާ ވަރުވެފައެވެ. އިމްރާންގެ އިތުރު ކުއްޖަކު ހުންނަކަން އޭނާއަށް ކުރިންވެސް އެނގެޔެވެ. ނަމަވެސް އެއީ އޭނާ އުމުރު ދުވަހަށް ވަންހަނާ ކުރަން ބޭނުންވީ ސިއްރެކެވެ. އެކަން އެ ފަޅާއެރީވެސް އެންމެ ނުބައި ވަގުތުގައެވެ. އެންމެ ނުބައި މީހުންނަށެވެ. ނިތުގައި އަތް ޖައްސާލައިގެން އިން އިރު އޭނާގެ ސިކުނޑި އޭނާއަށް ދައްކަމުން ދިޔައީ އޭނާގެ މާޒީއެވެ.

***އިމްރާންގެ މާޒީ***

އުމުރުން 20 އަހަރުގެ އިމްރާންއަކީ ޒުވާން އަންހެން ކުދިންގެ ހިތްތައް ކަތިލާފަދަ ރީތި ކަމެއް ލިބިފައިވާ ޒުވާނެކެވެ. ފަން، ކަޅު ކަން ގަދަ އިސްތަށިގަނޑެއް ލިބިފައިވާ އިރު ދިގު އެސްފިޔަތަކަކާއި އެކު ސިހުރުވެރި ދެލޮލެއް ލިބިފައިވެއެވެ. ބައިމަތި ފުޅާ ހަށިގަނޑެއް ލިބިފައިވީ އިރު ރަށު ހުރިހާ ކުދިންހެން ތިބީ މަށަށް މަށަށް ކިޔާލަ ކިޔާލައެވެ.  އެކަމުގެ ބޭނުން އިމްރާން ދިޔައީ ހިފަމުންވެސްމެއެވެ. ތަފާތު އެކި މާމެލީގެ ފޮނި ބޮމުން ދިޔައީ އެއްވެސް ފިކުރެއް ހިޔާލެއް ނެތިއެވެ.

“ޓޮއް ޓޮއް”

‘މަންޒިލް’ ގޭ ދޮރާށީގައި ޓަކި ދެމުން އިމްރާން ހަމަ ޖެހިލިއެވެ. ތުންފަތުގައި ލުއި ހިނިތުންވުމެއް ވީ އިރު އިންތިޒާރު ކުރެވެމުން ދިޔައީ ރީޝާއަށެވެ. ކުޑަ ހިނދުކޮޅެއް ތެރޭގައި ރީޝާ އައިސް ދޮރު ހުޅުވާލިއެވެ.

“ހަމަ ނާހިސްގެން ލަސްވެފަ ދޯ؟” އެއްމިޔަކަނުން ހީލަމުން އިމްރާން އަހައިލިއެވެ. “އާނ. އިމްރާން ނައީ ވިއްޔާ މިހާރު އަހަރެންގެ ދުވަސް ފުރިހަމަ ވެސް ނުވޭ. ތިއީނުން މިހާރު ހުރިހާވެސް މީހަކީ” އިމްރާންގެ ހަށިގަނޑުގައި ތަތްވެލަމުން ރީޝާ ބުނެލިއެވެ.

“ހޫމްމްމްމް. ތި ބޭނުންވާ ވަރެއް ދައްކާލަން ކޮޓަރިއަށް ހިނގާބަލަ؟” އެއްލޯ މަރާލަމުން އިމްރާން ބުނެލިއެވެ. އިމްރާންގެ އަތުގައި ހިފާލަމުން ރީޝާ ހިނގައިގަތީ އޭނާގެ ކޮޓަރިއާއި ދިމާލަށެވެ.

މެންދުރުގެ ހޫނުގަދަ ވަގުތެވެ. އިމްރާން އިނީ “ފްރެޝް” ކެފޭގައި ކޮފީއެއް ބޯލުމަށެވެ. އޭނާގެ އެންމެ ގާތް އެކުވެރިޔާ ކަމުގައިވާ ރިޔާޒްއާއި އެކުގައެވެ. “އިމްރާން ދެން ތި އުޅުން ދޫކޮށްލަންވީނުން؟ މިހާރު ލީރާއަށް ކައިވެނި ކުރެވޭ ދުވަސްވެސް ކައިރި ވަނީ” ރިޔާޒް މިއަދުވެސް ދިނީ ހަމަ އެ ނަސޭހަތެވެ.

“މިހާރު ނުދަމޭ އެހާ ގިނަ އަންހެން ކުދިން ކައިރިއަކަށް. މިހާރު މިދަނީ ރީޝާ ކައިރިއަށް އެކަނި. އާހްހްހްހް ހަމަ މަރެއް އެއީ” މޭގައި ފިރުމާލަމުން އިމްރާން ބުނެލީ މަސްތީ ރާގެއްގައެވެ.

“އެކަމަކުވާ. ލީރާއަށް އެނގިއްޖިއްޔާ އޯ؟ ވަރަށް ކަޑަ ވާނެ” ރިޔާޒް ބޯހުރުވާލަމުން ބުނެލިއެވެ. ބުންޏަސް އިމްރާން އެ އުޅުން ބަދަލު ނުކުރާނޭކަން އޭނާއަށް ހަމަ ރަނގަޅަށް އެނގެޔެވެ.

“ނޭނގޭނެ. މަ ރީޝާ ކައިރިއަށް ދާކަންވެސް އެނގޭނީ ހަމަ އެކަނި ރިޔާޒްއަށް. އެހެންވެ ކޮބާތަ މައްސަލައަކީ؟” އިމްރާން އެކަމާ އެއްވެސް ވަރަކަށް ހާހެއް ނުވެޔެވެ. “އެކަމަކު… އެ ރީޝާގެ މަންމަ ރީނާއެއީ ޒީލަގަދަ އަންހެނެއް. ރުޅި އައިސިއްޔާ އެހާ ނުލަފާ ވާނެ. ތިއުޅެނީ ބޮނޑިއެއް ބޯން” ރިޔާޒް ދެންވެސް ބެލީ ވިސްނައިދެވޭ ތޯ އެވެ.

“އަޅެ ރިޔާޒް ބޭނުމެއް ނޫންތަ މުނާ ނޫން އެހެން ކުއްޖެއް ކައިރިއަށް ދާހިތެއް؟” އިމްރާން ބެލީ ރިޔާޒްގެ ބޮލަށް އެރެވޭތޯއެވެ. “އުހޫންންން. މަ ނޫޅެން. އަހަރެން މުނާދެކެ ވަރަށް ލޯބިވޭ. އަހަރެން މުނާ ނޫން އެހެން އެއްވެސް މީހަކު ބޭނުމެއް ނޫން” ރިޔާޒްގެ ޖަވާބާއި އެކު އިމްރާން ގާތަށް އައީ ނުލަފާ ހިންޏެކެވެ.

ރޭގަނޑުގެ ވަގުތެވެ. އިމްރާން އިނީ ލީރާއާއި ބައްދަލު ކުރަން އޭނާ ދިރިއުޅެމުން ދިޔަ ގޭގައެވެ. ލީރާގެ ބޮލުގައި ފިރުމާލަ ފިރުމާލަ އިން އިމްރާންގެ ހިޔާލުގައި އޭރުވެސް ވީ އޭނާގެ ‘އެދުންތައް’ ފުއްދަން މަސައްކަތް ކުރުމަށެވެ. ލީރާގެ ދަތްދޮޅީގައި ހިފާ މޫނާއި ކައިރިކޮށްލީ އެހެންވެގެންނެވެ.

“ނޫން. ލީރާ ބޭނުމެއްނޫން ކައިވެނިން ބޭރުން މިކަހަލަ ކަންކަން ކުރާކަށް…” ލީރާ އިމްރާން ދުރުކޮށްލިއެވެ. “ސާބަހޭ ލީރާ. މިހާރު އަހަރެމެން މިތިބީ ހިތުބާ ކޮށްގެން. އަންނަ ހަފްތާގަ ރަން ކިޔޭނެ. ދެން ހަމަ އެކަނި ބޮހެއް ދިނުމަކުން ކޮބާތަ މައްސަލައަކީ؟” އިމްރާން ބޭނުންވީ ލީރާއާއި ކައިރިވާށެވެ.

“ތިހެންނޭ ފަށާނީ. ދެނޭ އެހެން ކަން ކަން ކުރާނީ. ލީރާ ބޭނުމެއް ނޫން. ލީރާ ބޭނުންވަނީ އިމްރާންގެ އަންބަކަށް ވެ ހުރެ އެހުރިހާ ކަމެއް ކުރަން” ލީރާ ބުނެލިއެވެ. އެއްޗެކޭ ބުނަން އަނގަ ހުޅުވާލި އިމްރާންގެ އަނގަ ލެއްޕުނީ ފޯނު ރިންގުވާން ފެށުމުންނެވެ. ގުޅަމުން ދިޔައީ ރީޝާއެވެ. “މަޑުކޮށްލައްޗެ.. އެބަ އަންނަން” ފޯނު ހިފައިގެން އިމްރާން ނިކުތީ ގެއިން ބޭރަށެވެ.

“އިމްރާން… މަށާ ކައިވެނި ކުރަންވީނުން…؟” އިމްރާން ފޯނު ނެގުމާއި އެކު ރީޝާ ރޮއެގަތެވެ. “އޭނ؟ ކީކޭ ތިކިޔަނީ؟” އިމްރާން ހައިރާންވިއެވެ. “އަހަރެން… އަހަރެން ބަނޑުބޮޑު… މިދަރިފުޅު އަހަރެމެން އެކީގަ ބޮޑު ކުރަން… ހެޔޮނުވާނެ…” ރީޝާ ބުނެލީ އާދޭހުގެ ރާގަކަށެވެ.

“ބަނޑުބޮޑޭ؟ ތި ދަރި ބޭނުމޭ؟ ކަލޭ މޮޔަވީތަ؟؟” ދަތްކުނޑިވިކާލަމުން އިމްރާން އަހައިލިއެވެ.

(ނުނިމޭ)

ތިރީސްތިންވަނަބައިގެ ތެރެއިން:

“އަހަރެން ދުނިޔެއަކަށް ފަލީހަތް ވާކަށް ނެތިން…” އަތް ފޮޅާލަމުން އިމްރާން ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.