ވާތީ ހިތަކު ލޯބި މަންމަންވެފާ 19

ދެލޮލުން ކަރުނަ ފުހެލަމުން ލަޝްކާ ހަމަ ޖެހިލިއެވެ. މިއަދު ރޯކަށް އޭނާ ބޭނުމެއް ނޫނެވެ. އޭނާ ބޭނުން ވަނީ މިއީ އޭނާ ނުރޮއެ ހޭދަ ކުރާ ފުރަތަމަ އުފަންދުހަށް ވާށެވެ. ނަމަވެސް ކޮޓަރިން ނިކުތުމާއި އެކު ފެނުން މަންޒަރުން އަނެއްކާވެސް ލަޝްކާގެ ދެލޯ ކަރުނުން ފުރި ބާރުވިއެވެ.

(22 ވަނަ ބައި)

ސިޓިންގ ރޫމްގެ ބިންމަތި ވަނީ ރަން ކުލަޔާއި މުށި ކުލައިގެ ހަންތަކުން ފުރާލާފައެވެ. ސޯފާ ކައިރީ އިން ކުޑަ މޭޒު މަތީގައި ކޭކެއް އިން އިރު ފާރު ކައިރީގައި ރަން ކުލައިގެ “ބަބްލް ލެޓާރ ބެެލޫން” އިން ނަންބަރު 18 ޖަހާފައި އިނެވެ. ރަތް ކުލައިގެ ފިނިފެންމާ ތަކެއް ހުރި ބޮޑު މާ ބޮނޑިއެއް ހިފައިގެން އިން ދާއިޔަލް ލަޝްކާ ފެނުމުން ކޮޅަށް ތެދުވިއެވެ.

“ހެޕީ ބާތްޑޭ” ލަސް ހިނގުމުގައި ގޮސް ލަޝްކާ ކުރިމަތީގައި ހުއްޓެމުން ދާއިޔަލް ބުނެލިއެވެ. އޭރު ހުއްޓުމެއް ނެތި ލަޝްކާގެ ދެލޮލުން ކަރުނަ އަންނަމުން ދިޔައެވެ. ނަމަވެސް އެއީ އުފާވެރި ކަމުގެ ކަރުނައެވެ. “އަޅޭ ކީއްވެތަ ތި ރޮނީ؟ ދެން ނުރޮއެބަ” ލަޝްކާގެ ކޯތާފަތުގައި ހުރި ކަރުނަތައް ފުހެލަ ދެމުން ދާއިޔަލް ބުނެލިއެވެ.

“މި… މިއީ ލަޝްއަށް ތަ؟…” ލަޝްކާ އަހައިލިއެވެ. “ޔެސް… މިއީ ލަޝްއަށް. ދާއިއަށް އިނގޭ މިއީ ލަޝްއަށް އާ ކަމެއްކަން. އެކަމަކު… ދެން މިކަހަލަ ކަންކަން މިއީ ލަޝްގެ ހަޔާތަށް އާންމު ކަމަކަށް ވާނެ. ލަޝްގެ ހަޔާތުގެ ކޮންމެ ދުވަހަކީވެސް މިއަދުން ފެށިގެ ހާއްސަ ދުވަހެއް” ލަޝްކާއަތަށް މާ ބޮނޑި ދިއްކޮށްލަމުން ދާއިޔަލް ބުނެލިއެވެ.

ލަޝްކާ މާ ބޮނޑީގައި ހިފިއެވެ. އަދި ކަރުނަ ވީ ދެލޮލުން ދާއިޔަލްއާއި ދިމާލަށް ބަލައިލިއެވެ. “ހަ… ހަމަ… ހަމަ އެހާ… އެހާ ލޯބިވޭތަ…؟” ލަޝްކާއަށް އަހާލެވުނީ އަޅައަޅައިގަންނަމުންނެވެ. “ޔެސް… ވަރަށް ވަރަށް ލޯބިވޭ. ތިއީ ދާއިގެ ފުރާނަ. ދާއިގެ ދިރިހުރުން. ލަޝްއަށްޓަކާ މުޅި ދުނިޔެވެސް ދޭން ބޭނުން. ދާއި ލަޝްދެކެ ވަރަށް ލޯބިވޭ” މިފަހަރު ދާއިޔަލްގެ ލޮލުގައިވެސް ކަރުނަތައް ބަބުޅައިގަތެވެ. އެދެލޮލުން ލަޝްކާއަށްޓަކައިވީ ލޯބި ވަރަށް ސާފުކޮށް ފެންނަމުން ދިޔައެވެ.

“ލަޝް ވެސް…” ކަރުނައިގެ ތެރެއިން ހިނިތުންވެލަމުން ލަޝްކާ ބުނެލި ޖުމްލައާއި އެކު ދާއިޔަލްގެ ދެލޯ ބޮޑު ވިއެވެ. “އަދި… އަދި އެއްފަހަރު” ޝަހާދަތް އިނގިލި ދައްކާލަމުން ދާއިޔަލް ބުނެލިއެވެ. “ލަޝް ވަރަށް ލޯބިވޭ ދާއިދެކެ” ހިނިތުންވެލަމުން ލަޝްކާ ބުނެލިއެވެ. ވީ އުފަލާއި އެކު ދާއިޔަލްއަށް ހަމަ ރަނގަޅަށް ރޮވުނެވެ. ލަޝްކާގެ އިސްބޮލުގައި ހިފާ އޭނާގެ ނިތަށް ވަރަށް ލޯބިން ބޮސް ދިނެވެ.

“ދެން ހިނގާ ދޯ ކޭކު ފަޅަން؟” ލަޝްކާގެ އަތުގައި ހިފާލަމުން ދާއިޔަލް ބުނެލިއެވެ. ހިނިތުންވެލަމުން ލަޝްކާ ވެސް އޭނާގެ އަތަށް ބާރު ކޮށްލިއެވެ. ލޯބިވެރިންގެ ލިސްޓަށް އަލަށް މި ވައިން ދެލޯބިވެރިން ގޮސް ސޯފާގައި އިށީނެވެ. ލަޝްކާ ކޭކު ފެޅުމުން ދާއިޔަލް އެ ކޭކު ކޮޅު ނަގާ އޭނާއަށް ލަވައިދިނެވެ. ލަޝްކާ ވެސް ދާއިޔަލްއަށް ކޭކު ކޮޅެއް ލަވައިދިނެވެ.

ލަޝްކާގެ ތިރީ ތުންފަތުގައި އައިސިން ކޮޅެއް ހޭކުމާއި އެކު ދާއިޔަލްގެ ތުންފަތަށް ހިނިތުންވުމެއް ވެރިވިއެވެ. ދެލޯ މަރާލަމުން އޭތި ކޮޅު ދާއިޔަލް ބޯލިއެވެ. ވަގުތުން ގައިން ލަދުން ލަޝްކާ މޫނުގައި އަތް އެޅިއެވެ.

“ހެހެ އަދި ނުވޭ މޫނުގަ އަތް އަޅާކަށް އިނގޭ؟ އަދި އެބަ އިން އެހެން ސަޕްރައިޒްއެއްވެސް” ދާއިޔަލް ތެދުވަމުން ބުނެލިއެވެ. އަދި ލަޝްކާ ކުރިމަތީގައި އެއްކަކޫ މައްޗަށް ތިރިވެލިއެވެ. “ލަޝް… ދާއިއަކަށް ނޭނގެ ކޮން އިރަކު ކިހިނެތް ކަމެއްވެސް ދާއިއަށް ލަޝްދެކެ ލޯބިވެވުނީކީ. ފުރަތަމަ ރަޝާ ކަންކުރާ ގޮތް އެނގުނީމަ ހީކުރީ އެއީ ހަމްދަރުދީ ކަމަށް. އެކަމަކު… ފަހުން އިނގެން ފެށީ އެއީ ލޯބިކަން. ދެން ދާއި ބަލަން ބޭނުންވީ ކީއްވެތޯ ލަޝް އަމިއްލަ ނަފްސަށް އެހާ ނަފްރަތް ކުރަނީ. ލަޝްގެ ހާލަތު އެނގި ދާއިގެ ހިތް ހަލާކުވި.. ބޭނުންވީ އެ އަނިޔާވެރި ކަމުން ލަޝް ސަލާމަތް ކުރަން. މިއަދު އެކަން ވެއްޖެ. ދެން ދާއިގެ މުޅި ދިރިއުޅުން ލަޝްއަށްޓަކާ ރަނގަޅު މީހަކަށް ވާން ބަދަލު ކުރީ. ނަމާދު ކޮށް އަންހެން ކުދިންނާއި އެކު ސަކަރާތް ޖެހުން ހުއްޓާލީ. ލަޝް ނޫން އެހެން އެއްވެސް އަންހެނަކާ މިހާރު ދާއި ވައިވެސް ނޭޅެން. ލަޝް ވެސް ދާއިދެކެ ލޯބިވާކަން ދާއިއަށް މާ ކުރިންވެސް އިނގޭ. މި ސުވާލު ކުރަން ދާއި މި އިންތިޒާރު ކުރީ ލަޝްއަށް 18 އަހަރު ވަންދެން.. ދެން ދާއި ބޭނުންވަނީ މިސުވާލު ކުރަން. ލަޝް. ދާއިއާއި ކައިވެނި ކުރާނަންތަ؟ ވިލް ޔޫ ކޮމްޕްލީޓް ހާފް މައި ޑީން؟” ލޯބިން ފުރިގެންވާ ރާގުގައި ދާއިޔަލް އަހައިލިއެވެ.

“އައި ވުޑް ބީ ހެޕީ ޓު” ވާ އަތް ދިއްކޮށްލަމުން ލަޝްކާ ބުނެލިއެވެ. ދާއިޔަލް އުފާވެލާފައި ލަޝްކާގެ ވާ އަތުގައި އޭނާ ގައިން ރިހި އަނގޮއްޓި އަޅުވާލަދިނެވެ. “ވަރަށް ލޯބިވޭ” ދާއިޔަލްގެ ހަށިގަނޑުގައި ބައްދާލަމުން ބުނެލިއެވެ. “ދާއި މާ ލޯބިވޭ” ލަޝްކާގެ ބޮލު މެދުގައި ބޮސްދެމުން ދާއިޔަލް ބުނެލިއެވެ.

ނިދިފައި އޮތް އެޒިކިއެލްއަށް ހޭލެވުނީ ފޯނު ރިންގުވާން ފެށި އަޑަށެވެ. ރަނގަޅަށް ދެލޯ ނުވެސް ހުޅުވެނީސް އެޒިކިއެލް ފޯނު ނެގިއެވެ. ކާކުތޯ ވެސް ބަލާ ނުލައެވެ. ނަމަވެސް އެފަރާތުން ލިބުނު ޙަބަރާއި އެކު އެޒިކިއެލް ކޮޅަށް ޖެހުނެވެ. “ވަޓް؟؟؟”

“ޔެސްސް. ލީރާ ހޭ އަރައިފި. ތި ހޭލައިގެން އާދެބަލަ ދޯ ދެން” އެލާރާ އަވަސް އަވަހަށް ބުނެލިއެވެ. މިދަނީ ކަމަށް ބުނެ އެޒިކިއެލް އަވަސް އަވަހަށް ތައްޔާރު ވެލިއެވެ.

***ކުޑަ އިރުކޮޅެއް ކުރިން***

އައިސީޔޫގައި އޮތް ލީރާ ކައިރީގައިވީ މެޝިން ތަކުގެ އަޑުން މުޅި ކޮޓަރިވަނީ އެއްއަޑު ކޮށްލާފައެވެ. އެއްވެސް ހަރަކާތެއް ނެތިފައި އޮތް ލީރާގެ އަތުގެ އިނގިލި ތަޅުވާލިއެވެ. ދެލޯ މެރިފައި އޮތް އިރު އޭނާގެ ހިތި މާޒީ ފިލްމެއްގެ ސިފައިގައި އޭނާއަށް ފެންނަމުން ދިޔައެވެ. ދެލޯ މެރިފައިވީ ނަމަވެސް ލޮލުގެ ކަނަކުން ކަރުނަ އަންނަމުން ދިޔައެވެ.

***13 އަހަރު ކުރިން***

(ނުނިމޭ)

ތޭވިސްވަނަބައިގެ ތެރެއިން:

“އިމްރާން… އަހަރެން ބަނޑުބޮޑު” އުފަލުން ދެލޮލުން ކަރުނަ އަންނަ ހާލުގައި ލީރާ ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.