ފުންއަސަރު 15

“ޒޯހަން. ރަނގަޅަށް އަޑުއަހާ. ޒޯހަންއަށް ޖެހޭނީ ހުސްނީގެ ދަރިފުޅު ނިއާއާއި މިކައިވެނި ކުރަން. ނުކުޅެދޭ މަންމަން ކުއްޖަކަށް މިއާއިލާއަކުން ޖާގައެއް ނެތް. އިތުރު ވާހަކަތަކެއް އަޑުއަހާކަށް ބޭނުމެއް ނޫން. މީގެ ފަހުން ޝިޔާރާއާއި ބައްދަލުކުރުން ހުއްޓާލަންވީ. ކުރިއަށް މިއޮތް ހަފްތާގެ ތެރޭގައި ރަންކިޔުމުގެ ހަފްލާ ކުރިއަށް ދާނެ” ފަޓްލޫނުގެ ދެޖީބަށް އަތް ޖަހާލި ނޫރީ ހުރީ ގޮތުގަ މޭފުއްޕާލާފައެވެ. “އެހެންވިއްޔާ ބައްޕަ ވެސް އަޅުގަނޑު ބުނާ އެއްޗެއް އަޑު އައްސަވާ. އަޅުގަނޑުގެ ލޯތްބަކީ ހަމައެކަނި ޝިޔާރާ. ތިބުނާ ނިއާއަށް އަޅުގަނޑުގެ ހަޔާތުން ޖާގަ ލިބުނަސް އަޅުގަނޑުގެ ހިތުން ޖާގައެއް ނުދެވޭނެ. ބައްޕައާއި މަންމައަށްޓަކައި ތިކައިވެނި އަޅުގަނޑު ކުރާނަން. އެކަމަކު އެއީ ކައިވެއްޏެއް ކަމުގައި އަޅުގަނޑު ނުދެކޭނަން. ދުވަހަކު ވެސް އަޅުގަނޑުގެ ހިތުން ޖާގައެއް ނުދޭނަން. ކައިވެންޏަށް ހަފްތާއެއް ވުމުގެ ކުރިން ނިއާ މިނިވަން ކުރާނަން. އޭރުން މަންމައަށް ވެސް ބައްޕައަށް ވެސް ނުބުނެވޭނެ ބައްޕަމެން ބުނި ގޮތަށް އަޅުގަނޑު ކައިވެނި ނުކުރެއެކޭ. އަޅުގަނޑު ހަޔާތުން ދުވަހަކު ވެސް ބާކީ ނުކުރާނެ ފަރާތަކީ ހަމައެކަނި އަޅުގަނޑުގެ ލޯބި. އަޅުގަނޑުގެ އަންބަކަށް ޝިިޔާރާ ހަދާނެ ކަމުގައި އޮންނާނީ އޭނާ ކައިރީގައި ވައުދު ވެފައި. ވީމަ އެވައުދު އަޅުގަނޑު ފުއްދާނަން. ވީ ވައުދެއް ފުއްދުމާއި ، އަނެކާއަށް އިހުތިރާމް ކުރުމާއި ، ދެވަނަ މީހާގެ އަތުގައި ވެސް ވަނީ ހިތެއް ކަމާއި ދޮގު ނުހެދުން އެއީ މަންމައާއި ބައްޕަ އަޅުގަނޑަށް ދަސްކޮށްދިން ރަނގަޅު ސިފަތައް. އެކަންތަކުގެ މަތިން ބައްޕަ މިއަދު ހަނދާންނެތިފައި ހުއްޓަސް އެއީ ދުވަހަކު ވެސް އަޅުގަނޑު ހަނދާންނެތޭނެ ކަންތަކެއް ނޫން. އަދި ތިކައިވެނި ކުރުމާއި ހަމައަށް ވެސް އަދި އޭގެ ފަހުން ވެސް އަޅުގަނޑު ޝިޔާރާއާއި ބައްދަލުކުރާނަން. އަދި އެއްވާހަކަ. ޝިޔާރާ ހުންނަނީ އަޅުގަނޑުގެ ބެލުމުގެ ދަށުގަ. އަޅުގަނޑު ކުއްޔަށް ހިފާފައި ހުންނަ ތަނަކު. ދުވަހަކު ވެސް މަންމައާއި ބައްޕަ ބޮލަށް އުނދަގު ކުރަން މިގެއަށް ޝިޔާރާ ނުގެންނާނަން” ވާހަކަދައްކާ ނިމުމަށްފަހު ޒޯހަން ހިނގައިގަތީ ގޭދޮރުން ބޭރަށް ނިކުންނާށެވެ. ނޫރީ އަޑުހަރުކޮށް ގޮވާލުމުން ވެސް ފަސް އެނބުރި ބެލުމެއް ނެތި ޒޯހަން ގޭޓުން ވެސް ބޭރަށް ނިކުތެވެ. ތަނަށް ވެރިވެފައި ވަނީ މަރު ފަދަ ހިމޭންކަމެކެވެ. ކާއެއްޗެއްގައި އެއްވެސް މީހަކު އަތްނުލައެވެ. ޝަޒަން ވެސް އިނީ ޒޯހަންގެ ހިތްވަރުގަދަކަމަށްޓަކައި އުފާވެފައެވެ. ގަދަބަސް ބުނަން އެނގެނީ ހަމައެކަނި ނޫރީއަށް ނޫންކަން މިއަދު ޒޯހަން އެދިޔައީ ސާބިތުކޮށްދީފައެވެ. ނޫރީވެސް ބާރަށް ހިނގާފައި ގޮސް ކޮޓަރިއަށް ވަނެވެ. ޝަޒަން ކައިރީގައި ޝިފްނީވީ ތަނެއް ބަލާލަން ދިޔުމަށް ސާރާ ބުނުމުން ޝަޒަން ފަހަތުން އިބްރާހީމް ވެސް ނިކުތެވެ. ހާލާވެސް ދިޔައީ ޝަޒަން ފަހަތުންނެވެ. އަރުހަމް ބަހެއް ނުކިޔާ ދިޔައީ ލިފްޓާއި ދިމާލަށެވެ. ރާކީގެ ކޮނޑުމަތީގައި ނިދިފައި އޮތް ލައިލް ނަގާ އާރިކް ކޮނޑުމައްޗަށް ލަމުން ކޮޓަރިއާއި ދިމާލަށް ހިނގައގަތެވެ. ސާރާއަށް ޝަޒަންގެ ފޯންކޯލް ލިބުމާއެކު އަވަސްވެގަތީ އެބަޔަށް ދިއުމަށެވެ. ހުރި ތަނުގައި ގުޑާނުލާ ބުދެއްހެން ހުރި ލަތާ ކައިރިއަށް ޖެހިލީ ޔަޝްމީއާއި ރާކީއެވެ. ދެއަންހެންދަރީންގެ ހަމްދަރުދީން ލަތާއަށް ބާރަށް ރޮއެ ގަނެވުނެވެ. މިވީ ކިހިނެއް ހެއްޔެވެ؟ މިއާއިލާއަށް މިވަރުގެ ކަމަކާއި މިދިމާވީ މައިންބަފައިންގެ ސަބަބުން ހެއްޔެވެ؟ ނުވަތަ ލޯބިވާ ފިރިހެން ދަރިފުޅުގެ ނުބައި ކަމުން ހެއްޔެވެ؟ ނުވަތަ ގެއަށް ގެނެވުނު ނުކުޅެދޭ އަންހެން ކުއްޖެއްގެ ސަބަބުން ހެއްޔެވެ؟ ނޫނެކެވެ. ޒޯހަންއަކީ މައިންބަފައިން ދެކެ ލޯބިވާ ކިޔަމަންތެރި ދަރިއެކެވެ. އެރުޅިވެރިކަމުގައި އެފަދަ ބަހުރުވައަކުން ބައްޕައާއި މުހާތަބްކުރަން ޒޯހަން އަށް މަޖުބޫރުކުރީ އެހިތުގައި އެއަންހެންކުއްޖާއަށް އުފެދިފައިވާ މަތިވެރި ލޯތްބެވެ. އެއީ ޒޯހަންގެ ކުށެއް ނޫނެވެ. ޝިޔާރާއާއި ޒޯހަން ކައިވެނިކުރަން ލަތާއަށް ވެސް ނުރުހެވޭއެވެ. ސަބަބަކީ އެއީ ކުރިން މީހަކާއި އިނދެ އާކަން ކެނޑިފައިވާ މީހަކަށް ވާކަމެވެ. ލޯބިވާ ދަރިފުޅާއިމެދު ކުރެވޭ އުއްމީދުތަކެއްގެ ބޮޑުކަމުންނެވެ. އެހެނެއްކަމަކު ނޫރީއާއި އެއްފެންވަރަށް ވެއްޓި ޝިޔާރާއަށް އަޑުލާކަށް ލަތާ ބޭނުމެއްނޫނެވެ. ނޫރީ ލާތާގެ ލޯތްބަށް އެދި އާދޭސްކުރިއރު ލަތާއަކީ ކިހާ ފެންވަރެއްގެ ކާކުކަން އަދި ހަނދާނެއް ނުނެތެއެވެ.

ތަޅަށް ތަޅުދަނޑި ހެޔޮވަރުކޮށްލުމަށްފަހު އަނބުރާލުމުން ހުޅުވުނު ދޮރުން އެތެރެއަށް ވަން ޒޯހަން ފެނި ސޯފާގައި އިން ޝިޔާރާ ކޮޅަށް ތެދުވިއެވެ. ޒޯހަންގެ ރަތްވެފައިވާ ދެލޯ ފެނުމުން ރޮއެފާ ހުރިކަން ޝިޔާރާއަށް އެނގުނެވެ. ޒޯހަން ޝިޔާރާ ކައިރީގައި ހުއްޓި ސޯފާއަށް ވެއްޓިގަތެވެ. ޒޯހަން ކައިރީގައި މަޑުމަޑުން ޝިޔާރާ އިށީނުމާއެކު ޒޯހަން ބޯއަޅާލީ ޝިޔާރާގެެ އުނގުގައެވެ. އެވަގުތު ޒޯހަންގެ ރަތްވެފައިވާ ދެލޮލާއި ހިމޭންކަން ފެނި ޝިޔާރާގެ ހިތުގައި ރިއްސާލިއެވެ. ޒޯހަންގެ ދެލޮލުގެ އަރިމަތިން ވެއްޓެން ދިޔަ ކަރުނަތިކި ޝިާޔާރާގެ މަޑުމަޑުން އަތްތިލައިން ފޮހެލަ ދިނެވެ. އަދި ޒޯހަން ކައިރީގައި ކިހިނެއްވީހޭ އާހާލިއެވެ. ގޭމީހުންގެ ހާލު ރަނގަޅުހޭ ވެސް އަހާލިއެވެ. ޝިޔާރާއާއި އެކީގައި ގިނަ ވަގުތު ތަކެއް ހޭދަކުރަމުންދާތީ އިޝާރާތުން ޝިޔާރާ ދައްކާ ވާހަކަ މިހާރު ކޮންމެސް ވަރަކަށް ޒޯހަންއަށް އެނގޭއެވެ. ގޭމިހުންނާއި ދޭތެރޭ ޝިޔާރާ ވިސްނާކަން އެނގުމުން ޒޯހަން އުފާވިއެވެ. ވަރަށް ހިއްވަރުކުރުމަށްފަހު ޒޯހަން ގޭތެރޭގައިވި ހުރިހާ ކަމެއް ޝިޔާރާއަށް ކިޔާދިނެވެ. ޝިޔާރާގެ ލޮލުން ވެއްޓުނު ކަރުނަތިކި ބާރުމިނުގައި އައިސް ޖެހުނީ ޒޯހަންގެ ތަނަވަސް ނިއްކުރީގައެވެ. ޒޯހަން ތެދުވުމަށްފަހު ޝިޔާރާ ގެނެސް މޭގައި ބޮނޑިކޮށްލިއެވެ. އެމޫނުގައި ބޮސްދިނެވެ. ދެއަތް ތިލައިގާ ބޮސްދިނެވެ. ދުވަހަކު ވެސް ޝިޔާރާ ދުރުކޮށްނުލާނަމޭ ބުނީ ރޮވިފައެވެ. އެހުރިހާ ވާހަކަތަކެއް އަޑު އެހުމަށްފަހު ޝިޔާރާ ދިން ޖަވާބުން ޒޯހަން ހައިރާންވިއެވެ. “އެއީ ޒޯންގެ މަންމަ އާއި ބައްޕަ. އެއްވެސް ދަރިއަކަށް ދެރައެއް ލިބުމަކަށް އެމީހުން ނޭދޭނެ. ޝިޔާގެ މަންމަ ނެތަސް އެވަރު އެނގޭ. ޒޯން ތިކައިވެނި ކުރޭ. އޭރުން އޭގެއިން ޒޯންއަށް ވެސް މޮޅެއް އޮތީ. ފިރިހެން ދަރިއަކަށް މަންމައަށް ވުރެ ބޮަޑަށް އަންހެނަކު އިސްކުރެވޭކަށް ނޯންނާނެ. އެމީހުންނަށް ސާބިތުކޮށްދީ ތީ ބަސްއަހާ ކިޔަމަންތެރި ދަރިއެއްކަން. އިރާދަކުރެއްވިއްޔާ ޒޯން ވާނީ ދެދުނިޔޭގެ ވެސް ބާއްޖަވެރިއަކަށް” ޝިޔާރާ ބުނަމުންދިޔަ ބަސްތައް ޒޯހަންއަށް ނަގައިގަނެވުނީ ވަރަށް ވިސްނިފަހުންނެވެ. ޒޯހަން ނޫރީއަށް ޖަވާބުދިން ގޮތް ޝިޔާރާއަށް ކިޔާދިނުމުން އެގޮތް ރަނގަޅު ކަމުގައި ބުންޏެވެ. އަދި ޒޯހަން ޝިޔާރާ ދޫކޮށްނުލާހާ ހިނދެއްގައި ޝިޔާރާ އަބަދުވެސް ހުންނާނީ ޒޯހަންއާއި އެކުގައި ކަމަށް ބުނީ އަމިއްލަ ކަރުނަތައް ސިއްރު ކުރުމަށްފަހު ޒޯހަންގެ ލޮލުން ފޭބި ކަރުނަތައް ފޮހެލަމުންނެވެ. ޝިޔާރާ އަމިއްލައަށް ޒޯހަންގެ ހަށިގަނޑުގައި ބައްދާލުމުން ހުރިހާ ކަމެއްގެ މަތިން ހަނދާންނެތުނު ކަހަލައެވެ. ޝިޔާރާގެ ކުޑަ ހަށިގަނޑު މެއާލާ ފިއްތާލިއެވެ.

މެންދުރުފަހު ހިނގާދިޔަ ހާދިސާއަށްފަހު އެއްވެސް މީހަކު ކޮންމެހެން ނިކުންނަން ޖެހިގެން ނުނީ ކޮޓަރިން ބޭރަށް ނުނިކުމެއެވެ. ނޫރީވެސް ނަމާދަށް ވެސް އަރަނީ ކޮޓަރިއަށެވެ. ލަތާ ކައިރީގަވެސް މުހިއްމު ކަމެއްގައި ނޫނީ ކަމަކު ނުކިޔައެވެ. ޒޯހަންގެ އަމަލުތަކާއި ބަސްމަގު ހުރި ގޮތުން ނޫރީގެ މޫޑްވަނީ މުޅިން ހަރާބުވެފައެވެ. އެނދުގައި އޮށޯވެގެން ނިއްކުރިއަށް އަތް އެއްލައިގެން އެއްފައި މައްޗަށް އަނެއް ފައި އަރުވައިގެން ތަޅުވާލަ ތަޅުވާލަ އޮތް ނޫރީ އޮތީ ވިސްނުމެއްގައެވެ. ކޮޓަރީގައި ވަކިން ހުރި ބޮޑު ގޮނޑީގައި ލަތާއިނީ ގުރުއާން ކިޔަވާށެވެ. އޭރު ގަޑިން އެގާރަ ޖެހިކަމުގެ ސިގްނަލްތައް ދެމުން ދިޔައެވެ. ކޮޓަރީގައި ޓަކި ޖަހާލި އަޑު އިވުމުން ލަތާ ގޮސް ދޮރު ހުޅުވާލިއެވެ. ކުރިމަތީގައި ހުރި ޒޯހަން ފެނުމުން ލަތާ ހައިރާންވިއެވެ. ލަތާއަށް ބަލާވެސްނުލާ ޒޯހަން އެތެރެއަށް ވަނުމަށްފަހު އެނދުގައި އޮތް ނޫރީގެ ފައި ކައިރީގައި އިށީނުމުން ނޫރީ ކުޑަކޮށް ތެދުވެލިއެވެ. “ބައްޕާ އަޅުގަނޑަށް ވާހަކަދެއްކުނީ ރަނގަޅަކަށް ނޫން. މާފްކުރައްވާ. މަންމައާއި ބައްޕަ އެދިލައްވާ ގޮތަށް މިކައިވެންޏާ އަޅުގަނޑު ރުހި ގަބޫލު. މިއަންނަ ހަފްތާގަ ރަންކިޔުމުގެ ކަންތައް ކުރިއަށް ގެންދަންވީ. އެކަމަކު ކައިވެނި ތަންކޮޅެއް ލަހުން ކުރެވިދާނެ. އެއީ މަންމަ އާއި ބައްޕަ ރުހޭނަމަ. އަޅުގަނޑު ނިއާ ދަސްކުރަން ވެސް ބޭނުން. އަޅުގަނަޑަށް ވަގުތު ދެވިދާނެތަ؟” ނޫރީ އިނީ އެއީ ޒޯހަން ކަމުގައި ގަބޫލުނުކުރެވިފައެވެ. ކޮޅަށް ތެދުވެ ޒޯހަންގެ ގައިގާ ބައްދާލީ މާފްކޮށްފީމޭ ބުނަމުންނެވެ. ޒޯހަން ވެސް ބައްޕަ ގައިގަ ބައްދާލިއެވެ. ކިތަންމެ ނުރުހިފައި ވާހަކަދެއްކިއަސް އެއީ ޒޯހަންގެ ބައްޕައެވެ. ދުލުން ބުންޏަށް އެގުޅުމަކީ ދުވަހަކުވެސް ނުކެނޑޭނެ ގުޅުމެކެވެ. މައިންބަފައިންނަށް އިހުތިރާމް ކުރުމަކީ ދަރިންގެ މައްޗަށް ވާޖިބެކެވެ. “ބައްޕަ ވަރަށް އުފާ ކޮށްފިން. ދަރިފުޅު ބޭނުން ވަގުތަކުން ބޭނުން ދުވަހަކު މި ކައިވެނި ކުރަންވީ. ޓޭކް ޔޯ ޓައިމް.” ހީލުމަށްފަހު ބައްޕައަށް ޝުކުރުއަދާކޮށްފަ ޒޯހަން ލަތާ ކުރިމަތިން ހުރަސް ކޮށްފައި ދިޔައީ އިސް އުފުލާ ބަލާވެސް ނުލައެވެ. އެދަރިފުޅު ހިތް ނުރުހޭ ކަމެއް ގަދަކަމުން ކުރުވަން ލަތާ ބޭނުމެއްނުވޭއެވެ. އެހެނަސް ޒޯހަންގެ ނިންމުމަކީ އެއީ ކަމުގައި ވާނަމަ ލަތާ ވެސް ރުހި ގަބޫލެވެ.

ކޮޓަރިއަށް ވަނުމަށްފަހު ޖީބުގައި އޮތް ފޯނު ނަގާ ޑަން ޖަހާލުމަށްފަހު ޒޯހަން މެސެޖް ސެންޑްކޮށްލީ ޝިޔާރާއަށެވެ. އެގޮތަށް ޒޯހަން ކަންތައް އެކުރީ ޝިޔާރާ ވިސްނަދިނީމައެވެ. ކައިވެންޏާއި ބެހޭ ގޮތުން ދެމީހުން ވިސްނުމަށްފަހު ނިންމީ ޒޯހަން ނިއާއާއި ކައިވެނިކުރާ ގޮތަށެވެ. މަންމައާއި ބައްޕަގެ އިއްޒަތާއި އަބުރަށްޓަކައެވެ. ނަމަވެސް ޒޯހަން ވެސް ޝަރުތެއް ކަނޑައެޅިއެވެ. ޒޯހަންގެ ފުތަމަ އަންބެއްގެ މަގާމު ލިބޭނީ ހަމައެކަނި ޝިޔާރާއަށެވެ. ޒޯހަންގެ އަލަތު ދަރިފުޅު ވެސް މިދުނިޔެއަށް އުފަން ކުރުވަން ބޭނުންވަނީ ޝިޔާރާގެ ބަނޑުންނެވެ. ނިއާ އާއި ކައިވެނިކުރަން އެހާ ދުވަސް ޒޯހަން ބޭނުންވީ މިސަބަށްޓަކައެވެ.

ސިޓިންގްރޫމް ސޯފާއަށް ދެފައި ނަގައިގެން ރޯންއިން ޝިފްނީ ކައިރީގައި ސާރާއާއި އިބްރާހީމް ތިއްބެވެ. ޒޯހަން ހިތުގައި ޝިފްނީއާއި ދޭތެރެ ކުޑަކޮށްވެސް ލޯބި ނުވާކަން އެނގުނު ހިސާބުން ފެށިގެން އެކުޑަ ހިތް ވަނީ ކުދިކުދި ވެފައެވެ. “މަންމާ ޝިނީ ވަރަށް ހަޑިތަ؟. ކީއްވެ ޒޯން ޝިނީދެކެ ލައިކް ނުވަނީ. އެމަންމަން ނޯކަރުމީހާއަށް ވުރެ ވެސް ޝިނީ ހަޑިތަ؟ ބުނެބަލަ މަންމާ” ސާރާގެ އަތުގައި ހިފާ ތަޅުވަމުން ޝިފްނީ ވާހަކަދެއްކީ ކުޑަކުއްޖެއް ގޮތަށެވެ. “މިދުނިޔެއިން މަންމަގެ ލޮލަށް ފެންނާނެ އެންމެ ފުރިހަމަ އަންހެނަކީ މަންމަގެ ޝިނީ. ޒޯހަން ލޯބި ނުވިޔަސް މަންމަގެ ޕްރިންސަސް ދެކެ ލޯބިވާނެ ޕްރިންސެއް އަދި އަންނާނެ. ބަލާ އަންނަ ވަގުތު އަދި ނުޖެހެނީ. ދަރިފުޅާ. ކޮންމެ ކަމަކަށް ވެސް ވަގުތެއް ކަނޑައެޅިފައިވޭ. މަންމަ ފަދައިން ދަރިފުޅު ވެސް ކަންތަކުގައި ކެތްތެރިވާން ދަސްކޮށްބަލަ. ދެން އަނެއްކަމަކީ ދަރިފުޅު ފަދައިން އަނެއް އިންސާނާއަކީ ވެސް ހާލިގްވަންތަ މާތްﷲ އުފައްދަވާފައިވާ މަހްލޫގެއް. ހުރިހާ ހިއްސުތަކެއް ހަމައަށް ދަރިފުޅަށް ދެއްވާފައި ވިޔަސް ޝިޔާރާއަށް އުނިކަމެއް އެހުރީ އެއީ އެކަލާނގެ މިންވަރުފުޅު ހުރި ގޮތްވީމަ. އެއްވެސް މީހަކީ ފުރިހަމަ މީހެއްނޫން. އެހެންވީމަ ދެންމެ ތިބުނި ކަހަލަ އެއްޗެއް ދެން ނުބުނައްޗެ މަންމަގެ ދަރިފުޅާ. ތީމަންމަ އެންމެ ލޯބިވާ ދަރިފުޅު.” ސާރާ ވާހަކަދައްކާ ނިމުމުން ޝިފްނީ ސާރާ ގައިގާ ބައްދާލިއެވެ. ކައިރީގައި އިން އިބްރާހީމް ވެސް ޝިފްނީގެ ބޮލުގައި ފިރުމާލިއެވެ.

ދުވަސްތައް މާޒީގެ ސަފްހާތަކާއި އެކުވަމުން ދެއެވެ. ޒޯހަން އެދުނު ފަދައިން ރަންކިއުމަށްފަހު ކައިވެނިވަނީ ލަސްކޮށްފައެވެ. ނިއާ ކައިވެނީގެ ރަނަށް ދިހަ ހާސް ރުފިޔާ ކިޔުމުން ހައިރާންކަމެއް ނުލިބޭ މީހެއް ނެތެވެ. ޒޯހަން ވީ ފޫއްސެވެ. ޝިޔާރާ އެއްކޮށް މިނިވަންވެ ކައިވެނި ކުރެވޭ ދުވަސް ޖެހޭތީ އެތުންފަތްް މަތީގައި ހިނިތުންވުން ނުފިލާ ހުއްޓެވެ. ޝިޔާރާ ރަނަށްކީ އަދަދުން ވެސް ޒޯހަން ޝިޔާރާދެކެ ވަނީ ހަގީގީ ލޯބިކަން ޒޯހަންއަށް އިހުސާސް ކުރެވުނެވެ. ޝިޔާރާއާއި ޒޯހަން އިންނަން އުޅޭކަން އެނގެނީ ޝަޒަން އަދި ހާލާއަށެވެ. ބޭނުންވަނީ ކައިވެނީގެ ފަހުން ހަފްތާއެއްހާ ދުވަހު މަޑުކުރުމަށްފަހު ނިއާ އާއި ކައިވެނި ކުރުމަށްފަހު  ޝިޔާރާއަކީ ޒޯހަންގެ ދޮށީއަނބި ކަމުގައި ގޭމީހުން ކައިރިގައި ބުނުމަށެވެ. ޝިޔާރާއާއި ކައިވެނިވެވޭ ދުވަހުގެ ޕްރޮގްރާމްތައް ޝަޒަންއާއި އެކު ވެގެން ޒޯހަން ނިންމާލިއެވެ. އެއްހަފްތާއަށް މެލޭޝިޔާއަށް ދިޔުމަކީ ޒޯހަންގެ ހުވަފެނެކެވެ. ޝިޔާރާއަށް ރަނގަޅު ބޭސްފަރުވާއެއް ލިބިއްޖެނަމަ އަޑު ލިބޭނެ ކަމުގައި ހުދު ޝިޔާރާ ވެސް ވަނީ ޒޯހަން ކައިރީގައި ބުނެފައެވެ. އެނބުރި އައުމަށްފަހު ނިއާ އާއި ކައިވެނިކުރަން ވެސް ޒޯހަން ވަނީ ފޫހިކަމާއެކު ނިންމާފައެވެ.

“ޕްރިންސަސް އެކްސައިޓް ނުވޭތަ؟ މާދަމާރޭ ނޫން އަނެއް ރޭ މީ ހާއްސަ ރެއެއް. އެރޭ ޝިޔާ ވާނި މިއަތުގެ ތެރޭގަ. ވަރަށް ލޯބި ދޭނަން. ދުވަހަކުވެސް ހިތްރޮށްވާނުލާނަން” ޒޯހަންއާއި ޝިޔާރާ ވާހަކަދައްކަން ތިބީ ސިޓިންގްރޫމު ބޮޑު ސޯފާގައެވެ. ސޯފާގައި ޒޯހަން އޮށޯވެގެން އޮތް އިރު އަތްދަނޑި މަތީގައި ޝިޔާރާވެސް އޮތެވެ. ދެމީހުންގެ އަތްތިލަ ގުޅިލާ މެހިފައިވާ އިރު ޒޯހަންގެ ދެލޯ އަމާޒުވެފައިވަނީ ޝިޔާރާގެ ދޮން މޫނަށެވެ. ލަދުން ޝިޔާރާ މޯޅިވާގޮތް ޒޯހަންއަށް ވަރަށް ކަމުދެއެވެ. ޒޯހަންގެ ލޯމަތީގައި ޝިޔާރާ އަތް އަޅާލުމާއެކު ޒޯހަން ކައިރިއަށް ހިނިއައެވެ. އެކަކު އަނެކަކުގެ ލޮލުގެތެރެއަށް ގެއްލިފައި ތިބި ދެމީހުނަށް ގައިގޯޅިވެވުނު އިރު ވެސް ނޭނގުނެވެ. ޝިޔާރާ ލައިގެން އޮތް ފެހިކުލައިގެ ޓީޝާޓް ތެރެއިން ތުނި ބަނޑުގައި އެއްވެސް ހުރަހެއް ނެތި ޒޯހަންގެ އަތް ޖެހުމުން ޝިޔާރާއަށް ދެލޯ މަރާލެވުނެވެ. ޝިޔާރާގެ ތުންފަތާއި ޒޯހަންގެ ތުންފަތް ކައިރިވެގެން ދިިޔަ ވަގުތު ދެލޯ ހުޅުވާލެވުނުކަން އެއީ ޝައިތާނާ ފައްސާލަން ޝިޔާރާއަށް ލިބުނު ބާރެއްކަމުގައި ވިއެވެ. އަވަސް އަވަހަށް ޝިޔާރާގެ ބަނޑުމަތިން މައްޗަށް ދަތުރު ކުރަމުން ދިޔަ ޒޯހަން އަތް ތިލައިގާ ޝިޔާރާ ޓީޝާޓް މަތިން ހިފެހެއްޓިއެވެ. ޒޯހަންއަށް ވެސް ހޭވެރިކަމެއްވީ އެވަގުތުއެވެ. ދެވަނަ ސިކުންތުގައި ސޯފާގައި ތެދުވެ އިށީނެވެ. ޝިޔާރާ ވެސް ތެދުވެ ދެއަތުން ބޮލުގައި އަތް އަޅުވާލައިގެން އިން ޒޯހަންގެ ކޮނޑުގައި ބޯއަޅާލިއެވެ. “އަމް ސޮރީ ޕްރިންސަސް. ނޭނގެވީ ގޮތެއް. މިހުރިހާ ދުވަހުވެސް ކޮންޓްރޯލްކޮށްފަ މިއަދު….. އެހެނޭ ވާނީ އެހާ ކައިރީގައި އޮތީމަ” ޝިޔާރާގެ ނޭފަތުގައި މަޑުމަޑުން ހިފާލަމުން ޒޯހަން ބުނެލިއެވެ. ޝިޔާރާ ހީލުމުން ޒޯހަން އެނިތުގައި ބޮސްދިނެވެ. މިރޭ ކުރެވެން އުޅެވުނުު ކަންތަކުން ޒޯހަން ސަލާމަތް އެވީ ކިރިޔާއެވެ. ކައިވެންޏަށް ފަހު ނޫނީ ޝިޔާރާގެ އަންހެންވަންތަ އެއްވެސް ގުނަވަނެއްގައި ބީހުމަކީ މާކުރިން ވެސް ނުކުރަން ޒޯހަން ހިތުއަޅައިގެން ހުރި ކަމެކެވެ. ޝިޔާރާ ކޮޓަރިއަށް ވައްދާ އެނދުގައި ބޭއްވުމަށްފަހު ކުއިލްޓް އަޅާދިނުމަށްފަހު ލައިޓް ފަނޑުކޮށްލިއެވެ. އަދި އެނބުރި ދަމުން ދިޔައީ އަދި އެއްފަހަރު އެ އަތްތިލައިގާ ބޮސްދީފައެވެ.

މަޑުހިނގުމެއްގައި ފިޔަވަޅު އަޅަމުން އައި ޒޯހަން ކޮޓަރިއަށް ވަނުމުގެ ކުރިން ސިޓިންގްރޫމް އަލިވެގެން ދިޔައެވެ. ޒޯހަން ފަހަތަށް ބަލާލީ މީހާ ހަމައަކަށް އަޅުވާލަމުންނެވެ. ކުރިމަތީގައި ހުރި ލަތާ ހީލެވޭތޯ މަސައްކަތްކުރިއެވެ. ޒޯހަން އާއި ޝިޔާރާ ގުޅުމެއް އޮންނަ ކަން އެނގުނު ފަހުން ލަތާ އާއި ޒޯހަން އާމެދު އޮތް ގުޅުން ވަނީ ކޮންމެސް ވަރަކަށް ހީނަރުވެފައެވެ. ޒޯހަން ވެސް މަންމައާއި އެހާ ވާހަކަދައްކާ ނުހަދަނީ މިހާތަނަށް އަދި އެކަމާއި ބެހޭ ގޮތުން ލަތާ އެއްވެސް ވާހަކައެއް ދައްކާފައި ނުވާތީއެވެ. މިގުޅުމާއި ލަތާ ރުހޭ ކަން ވެސް ނުވަތަ ނޫންކަން ވެސް ޒޯހަން އަށް ނޭނގެއެވެ. ލަތާ ކުރިއަށް ގޮސް މަޑުކޮށްލީ ޒޯހަންއާއި އެއްހަމައެއްގައެވެ. “މަންމަ ވާހަކައެއް ދައްކަންވެގެން. ވަގުތު އެބޮތްތަ؟” ޒޯހަން ދެރަވީ ލަތާ ޒޯހަން އެހާ ދުރުކޮށްލީމައެވެ. “މަންމަ އަޅުގަނޑާއި ވާހަކަދައްކަން ވަގުތު އޮތްތޯ ބަލާކަށް ނުޖެހޭނެ. އަޅުގަނޑަށް ހީވަނީ ތިވަގުތު ހޯދަން ޖެހޭނީ އަޅުގަނޑުކަން ނޭނގެ. ކޮންތާކު ވާހަކަދައްކާނީ. ކޮޓަރީގަތަ؟ މަންމަ ބޭނުމިއްޔާ މިތަނުގަ ވެސް އޯކޭވާނެ” ޒޯހަން އެހެން ބުނުމުން ލަތާ ކޮޓަރިއަށް ވަނީ ޒޯހަންގެ އަތުގައި ހިފާލައިގެން ހުރެއެވެ. އެނދުގައި ދެމައިން އިށީނުމަށްފަހު ސައިޑްކަބަޑްމަތީ ހުރި ގަޑިއަށް ލަތާ ބަލާލިއެވެ. އެގާރަގަޑި ސާޅިސް ފަހެއްވީއެވެ. “މަންމަ އެންމެ ފުރަތަމަ ބޭނުުމީ މިވަގުތު ދަރިފުޅު ތިއައީ ކޮނތާކުންތޯ އަހާލަން” ލަތާއަށް ކުރި ސުވާލުގެ ޖަވާބު އެނގޭ ކަހަލައެވެ. ޒޯހަންއަށް ބަލަން އިނީ ތަފާތު ނަޒަރަކުންނެވެ. “އަޅުގަނޑު މިއައީ ޝިޔާ ކައިރިން. މިގެއިން އަޅުގަނޑަށް މިހާރު ހިތްހަމަޖެހުމެއް ނުވޭ. ޝިޔާ ކައިރިއަށް ދަނީ އެއީ މިދުނިޔޭން އަޅުގަނޑު އެންމެ ލޯބިވާ އިންސާނާއަށް ވީމަ. އެލޯތްބާއި ނުލާ އަޅުގަނޑަށް ނޫޅެވޭނެ. އަޅުގަނޑު ދިރިހުރުމަށްޓަކައި ލާ ނޭވަޔަކީ އެއީ. އެކަމަކު މަންމަ އެއްގޮތަކަށް ވެސް ކަންބޮޑުވާނެކަމެއް ނެތް. އަޅުގަނޑު މަންމައާއި ބައްޕަ އެދޭ ގޮތަށް ކަންތައް ކުރާނަން. ކުރިން ބައްޕައާއި ދިމާލަށް ކައިވެނި ކުރުމަށްފަހު ނިއާ ވަރިކުރާނަމޭ ބުންޏަސް މިހާރު އަޅުގަނޑުގެ ހިޔާލު ބަދަލުވެއްޖެ. އަޅުގަނޑުގެ ހިޔާލު ބަދަލުކުރަން މަޖުބޫރު ކުރުވީ ޝިޔާރާ. ހިނދުކޮޅަކަށް މައިންބަފައިންނަކީ ކިހާ ވަރެއްގެ ކޮންބައެއްކަން އަޅުގަނޑު ހަނދާންނެތުނު. އެހެންވެ ބައްޕައާއި އެގޮތަށް ވާހަކަދެއްކުނީ. އަޅުގަނޑަށް ވިސްނަދީ ހިޔާލު ބަދަލުކޮށްލީ ޝިޔާރާ. އަޅާލާނެ ޔާރެއް ނެތް ނިކަމެއްޗަކަށް ވިޔަސް އަޅުގަނޑުގެ ޝިޔާރާއަކީ  ވިސްނުންތޫނު އަހްލާގް ރަނގަޅު ކުއްޖެއް” ޒޯހަންގެ ވާހަކަތައް އަޑުއަހަން އިން ލަތާ ދެރަވިއެވެ. ދުވަހަކު ވެސް ޒޯހަން އެހާ ދެރަވެފައި ވާހަކަދައްކާފައެއް ނުވޭއެވެ. ކައިވެންޏާއި ބެހޭ ގޮތުން ދެވަނަ ވިސްނުމަކަށްދާން ނޫރީ ކައިރީގައި ބުނަންވީހެއްޔެވެ؟ ދަރިފުޅުގެ ހިތްހަލާކު ކޮށްގެން މައިންބަފައިންނަށް ލިބޭނީ ކޮން ހިތްހަމަޖެހުމެއް ހެއްޔެވެ؟ “މަންމާ… އަޅުގަނޑު އަދި ވަރަށް މުހިއްމު އެއްވާހަކަ ބުނަންތަ؟ މާދަމާ ނޫން އަނެއް ދުވަހު އަޅުގަނޑު ޝިޔާރާއާއި ކައިވެނި ކުރަން.  ޒޯހަން ބުނި އެއްޗަކުން ލަތާ ދެލޯ ބޮޑުވިއެވެ. އެކަން ޒޯހަން އަށް ވެސް އެނގުނެވެ. ކަމަކަށް ނުހެދީއެވެ. ކައިވެންޏަށްފަހު ވެސް މިގެއަށް އަޅުގަނޑު ޝިޔާރާ ނުގެންނާނަން. އަޅުގަނޑުގެ އަލަތު އަނބިމީހާއަށް ހަދަން ބޭނުންވަނީ އަޅުގަނޑު ލޯބިވާ މީހާ. ދެވަނަ ކައިވެނި މިކުރަނީވެސް އަޅުގަނޑުގެ ފުރަތަމަ އަނބީގެ ހުއްދަ ލިބިގެން” ޒޯހަން ބުނި އެއްޗަކުން ލަތާއަށް ސިހުމެއް ނައެވެ. ސަބަބަކީ އެގޮތަށް އެކަން ވާނޭކަން ކުރިން ވެސް ލަތާއަށް އެނގޭ ކަހަލައެވެ. “ކައިވެންޏަށް ފަހު އަޅުގަނޑު ޝިޔާރާ ގޮވައިގެން ފުރާނަން. އެއީ ވާހަކަދެއްކޭތޯ ކުޑަ ބޭސްފަރުވާއެއް ކުރަން” ހުރިހާ ވާހަކައެއް ތެދަށް ޒޯހަން ކިޔާ ދެމުންދާތީ ލަތާ އިނީ ހިތްހަމަޖެހިފައެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.