ހައްގަކަށް ތީ މަގޭ ވުން ނިކަން ބޭނުމޭ….

ކޮލުގައި ކާތާލި މަޑު ފިޔާތޮށި ކުލައިން އަތޫޝާގެ މޫނަށް އިތުރު ފުރިހަމަ ކަމެއް ގެނެސްދެއެވެ. “އަޅޭ… ޝާޝާ.. ޔޫ ލުކް ސޯ ޕްރިޓީ… ހަމަ ހީވަނީ އަރަބި ކުއްޖެއްހެން” ކައިވެނީގެ ހެދުމުގައި ޒީނަތް ތެރިވަމުން ދިޔަ އަތޫޝާ ފެނި ސަނާއަށް ބުނެވުނެވެ. “ބިރުގަނޭތަ” ސަނާ އަތޫޝާގެ ފަހަތުގައި ހުއްޓެއްމުން ލޯގަނޑުން އަތޫޝާގެ ސޫރަ ބަލާލިއެވެ. “ހިހިހ.. ބިރުގަނޭ…. އެކަމް.. ” އަތޫޝާ ބުނަން ބޭނުންވި ކިތައްމެ އެއްޗެއްސެއް ހިތުގައި ވިއެވެ. ” އައި ނޯ.. ޝާޝާގެ މަންމަމެން އުފާވާނެ.. އެހެން ނޫނަސް މިރޭ އަހަރެންގެ ފަހަރިއަށް ވާނެ.. އަޅޭ.. އައި އެމް ސޯ އެކްސައިޓެޑް.. ” އަތޫޝާގެ ކޮނޑުގައި ހިފާލަމުން ސަނާ ބުނީ ހީލަމުންނެވެ. “ދެން ހިނގާ… މިހާރު އެއޮތް އަށެއް ޖަހަނީ” ސަނާ އަތޫޝާ ލައިގެން އިން ބޮޑު ވެޑިން ޑްރެސް ރަނގަޅުކޮއްލަމުން ބުންޏެވެ.

އުޑުމަތިން ފެންނަމުން ދިޔައީ ސާފު ތަރިތަކެވެ. ހަނދުގެ އަލިކަމެއް ނެތް ކަމަކު އުނޑުމަތި ފަޅު ފިލުވާލާފައި ވަނީ ދިއްލާފައިވާ ކުދި ކުދި ތަރިތަކުންނެވެ. ދިއްލާފައިވާ ތަރިތަކަށް ވުރެއް މިރޭ އާދީގެ ފެންނަނީ ވަރަށް ވެސް ފުރިހަމަކޮށެވެ. ދެބުރިއަށް އިމާރާތް ކޮއްފައިވާ ގޭގެ ބޮޑުބައެއް ވަނީ ފެންޑާއަށް ހުސްކޮއްފައެވެ. ފެންޑާ ވަށައިގެން ކުދި ގަސްތަށް ހައްދާފައިވާއިރު ވެލިގަނޑު ފޮރުވާލައިފައިވަނީ ފެހި ކާޕެޓަކުންނެވެ. ގޭ މައިދޮރާށި ކައިރީގައި ބޮޑު ދިގު މޭޒެއް ބަހައްޓާފައި ވާއިރު އޭގެ މެދަށް ރަތް ފިނިފެންމަލުން ޖަރީކޮއްފައިވާ ތިންބުރީގެ ކޭކެއް އިނެވެ. އަދި ކައިރީގައިވާ އެކި ވައްތަރުގެ ފޮނި ކާތަކެތިން އިތުރަށް އެ މޭޒުމަތި ފުރިހަމަކޮއްދެއެވެ. އެކި ދިމާ ދިމާގައި އެކި ކުލަ ދިއްލާފައިވާއިރު މޭޒުތަށް އަތުރާފައިވަނީ ކައިރި ކައިރިންނެވެ. އަތުރާފައިވާ މޭޒަށް ފުރިހަމަ ކަމެއް ގެނެސްދެނީ އޭގެ ވަށައި އަޅާފައިވާ ރިހި ފޮތިގަނޑުންނެވެ. އަދި އޭގެ މަތީގައި ބަހައްޓާފައިވާ ރަތް އުއްބައްތިންނެވެ. ކޮންމެ މޭޒެއްގެ މެދަށް ރަތް ފިނިފެންމާ ބޮޑިއެއް ލާފައިވާއިރު ކޮންމެ މީހެއްގެ ދުލުން ބޭރުވަމުން ދިޔައީ ތައުރީފުގެ ބަސްތަކެވެ.

އެހެން ނުވާންވި ސަބަބެއް ނެތެވެ. މިރޭމީ އާދީ ކޮންސްޓަރަކްޝަންގެ ހުރިހަމަ އެކަނި ފިރިހެން ދަރީގެ ކައިވެނި ހަފްލާއެވެ. އެންމެ އެއްފަހަރާ ފަހަތް ބަލާލީ އަންހެން ކުދިންގެ ހަޅޭކުގެ އަޑަށެވެ. އާޝިޔާ އާއި އާދިލް ވެސް އެދިމާ ބަލާލީ ސިޑިން ފައިބައިގެން އަންނަ އަތޫޝާ ފެނުމުންނެވެ. އަތޫޝާގެ ކައިރީގައި ސަނާ އިން އިރު އިރު އިރުކޮޅާ އަތޫޝާގެ ހެދުމުގެ ފަސްބައި ރީތިކޮއްލައެވެ.

“އާޝިޔާ.. ހަމަ ރާނީއެއް ދޯ ތިލިބުނީ… އެކަމުވާ ބުނަންތަ.. ހަމަ ރީތިކަމުން ފުރިގެންވާ ކުއްޖެއް އެއީ” އާޝިޔާގެ އެންމެގާތް ރަހުމަތްތެރިޔާ ޒުލޭހާ އިއްވަމުން ދިޔައީ މަލާމާތުގެ ބަސްކަން އާޝިޔާއަށް އެނގެއެވެ. އެހެން ނަމަވެސް މާހައުލުގެ ގޮތުން ހިނިތުންވެލީ ގަދަކަމުންނެވެ. ” އެއްވެސް ރީޗެއް ނޫން… ޔަތީމަކާ މަގޭ ފިރިހެން ދަރި އިނުމީވެސް އަހަރެން ގަބޫލު ކަމެއް ނޫން” ޒުލޭހާ ދިޔުމުން އާޝިޔާއަށް ރުޅިގަނޑު ކޮންޓްރޯލް ނުކުރެވުނެވެ. “ސާބަސް އާޝިޔާ… ޔަތީމަކަސް ފަގީރަކަސް ދަރިންގެ އުފާ ވާންޖެހޭނީ އަހަރެމެންގެ އުފަލަށް…” އާދިލްގެ މޫނުމަތިން ހިތްހަމަ ނުޖެހުން ފާޅުވާން ހުރުމުން އާޝީޔާ އެއްޗެއް ނުބުނެއެވެ. އެހެން ނަމަވެސް ހިތުގައި އަތޫޝާ އާމެދުވީ ރުޅިވެރިކަން ވީ ހައްތަހާ ގަދައެވެ.

“ހޭ… ކޮބާތަ ގްރޫމް… ނުވެސް ފެނޭ” އަތޫޝާގެ އަތުގައި ހިފަމުން ޝަމްހާ އަހާލިއެވެ. “ނޭނގެ… މަމްދޫހު ލަސްވެއްޖެދޯ… ކޮންޓްރެކްޓެއްގަ ސޮއި ކުރަން ރިސޯޓަށް ދިޔައީ.. މިހާރު އުޅޭކަންނޭގެ އަންނަން” އަތޫޝާގެ މޫނުމަތިން ފެންނަމުންދަނީ ހާސްކަމާ ބިރުވެރިކަމެވެ. “އަޅޭ.. މަމްދޫހު.. ކޮބާތަ.. މިހާރު ބިރުގަންނަން ފަށައިފި… އަނެއްކާ.. ނޫން.. އަންނާނެ… ޔަގީން… ” އަތޫޝާގެ ހިތް ދިޔައީ ނެގި ނެގިފައި ޖެހެމުންނެވެ. ވިސްނަން ބޭނުންނުވާ ކަންތައްތަކާ ވިސްނެނީއެވެ.

ނުނިމޭ…

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.