ގޮތް ހުސްވެފައި ހުރީމޭ… 3

“ހާޖަރު ލީން” ކާރޑްގައިވާ ނަމަށް ބަލައިލުމަށްފަހު ނިއްކުރިޔަށް ރޫ އަރުވާލަމުން އިނާން ކުޑަކޮށް ވިސްނާލިއެވެ.

“ލައީ..! މިތާ މަޑުކޮއްލައްޗެ. މި އަންނަނީ ދެންމެ ދިޔަ މީހާއަށް މި ކާރޑް ހަވާލު ކޮށްފަ.” އިނާންގެ ހަރަކާތްތައް އަވަސް ކޮއްލަމުން ބުނެލިއެވެ.

“ކިހިނެއް އިނގެނީ ތީ އެ މީހާގެ ކާރޑެއްކަން.؟” އިނާން ދާން ފެށުމުން ލައިޝާ ބުނެލިއެވެ.

އިރުކޮޅެއް ތެރޭގައި އިނާން އައެވެ. އޭރު ލައިޝާ އިނީ އިނާންގެ އިންތިޒާރުގައެވެ. އިނާން އައުމާއި އެކު ކާން ބޭނުންވާ ތަކެތީގެ އޯޑަރު ނަގަން ދެމީހުން މަޝްވަރާ ކޮށްލިއެވެ. މެނޫ ހިފައިގެން ވެއިޓަރު ދިއުމާއި އެކު ލައިޝާ ވާހަކަ ދައްކަން ފެށިއެވެ.

“އިނާން..! ރަނގަޅު މީހަކަށްތަ ކާރޑް ތި ދިނީ؟ ވަރަށް ރަނގަޅަށް ބަލާފަ ދޯ ކާރޑެއް ވީމަ ދޭންވާނީ..” ހައިރާން ވެފައި ލައިޝާ ބުނެލިއެވެ.

“ކަނބުލޯ!.. އިނގިގެން ކުރި ކަމެކޭ އެއީ. ވަރަށް ކުރިން އޭނަގެ ވެޑިންގއަށް އަހަރެން ދިޔައިމޭ.. ދެން ފެނިފަ ހުރި މީހެއް ވީމަ ހަނދާން ކޮއްލީ… އަސްލު އެ ކާރޑްގަ އިން ނަން ފެނުނީމަ ބޮޑަށް ހިތަށްއެރީ…” އިނާން ވާހަކަ އޮޅުވާލަމުން ބުންޏެވެ.

އިނާން އެހެން ބުނުމާއި އެކު ލައިޝާ ބޯ ޖަހައިލިއެވެ. އިނާންގެ ވާހަކަތަކަށް އަބަދު ވެސް ލައިޝާ އިތުބާރު ކުރެއެވެ.

“ލައި…! ވާހަކައެއް ބުނަންތަ؟ އަހަރެން ބޭނުންވޭ މި ލައިފްގަ ވަރަށް ކުޑަ ކަމެއް ލައި ރަނގަޅު ކޮށްލަން. ރުޅި ނާންނަންޏާ އެކަމު ބުނާނީ.. އިނގޭ މީކީ މިވާހަކަ ދައްކަން އެންމެ ރަނގަޅު ތަނެއް ނޫން ކަން ވެސް” ލައިޝާ އަތުގެ ކުޑަވާ އިނގިލީގައި ހިފާލަމުން އިނާން ބުނެލިއެވެ.

“ބުނެބަލަ.. މި އެންމެން ތެރޭގަ ކިހިނެއް އަހަރެން އެހާ ފަސޭހައިން އިނާން ދެކެ ރުޅި އަންނާނީ؟” ލައިޝާ ބުނެލިއެވެ.

“ލައި އެބަ ޖެހޭ މުރާލި ވާން.. އަހަރެން ގެއަށް އަންނަން ވާއިރަށް ކައްކާ، ކާން ހަދާލާ… ދެންވެސް ކޮޓަރި ތެރެ ތަރުތީބުން ބާއްވާލާ.. އަސްލު އަހަރެން ވަރަށް ބޭނުން ލައި ހީވަގި ވާން.” އިނާން ބުނެލީ ވަރަށް އުންމީދާއި އެކުގައެވެ.

“އިނާން.. އަސްލު އަހަރެން ހަމަ މަސައްކަތް ކުރާހިތް ނުވަނީއޭ… ދެން ބުނެބަލަ… އެހެން ވިއްޔާ، އިނާން އަހަރެން ދެކެ ފޫހިވަނީ ދޯ؟” މޯޅި ވެފައިވާ މަލެއްހެން އިނދެ ލައިޝާ އަނެއްކާ ވެސް އަހައިލިއެވެ.

“ދެން އަހަރެން އެހެން ބުނެފިންތަ؟. އެކަމު އަހަރެން ވެސް އިތުރަށް ލޯބި ވާނެ ތާއޭ.. މީރުކޮށް ކައްކާފަ ކާންދީ… ރީތި ތަނެއްގަ އަހަރެން ގެންގުޅެންޏާ.. އުނ؟” އިނާން އަނެއްކާވެސް ބުނެލިއެވެ.

“އެހެންވީމަ، މިހާރު ފުލްކޮށް ލޯބި ނުވަނީތަ؟” އަނެއްކާވެސް ލައިޝާ ޝަކުވާ ކޮށްލިއެވެ.

“ހެހެ… ދެން ހިނގާ ކާން.. އެ ގެނައީ ކާއެއްޗެހި. މިރޭ ނިދާ އިރު ދެން ހުރި ވާހަކަތައް ދައްކާނީ… ނޫނީ އަނެއްކާ ލައިގެ މޫޑް އޮފް ވެދާނެ.” ގޮނޑީގައި ރަނގަޅަށް ހަމަ ޖެހިލަމުން އިނާން ބުނެލިއެވެ.

ހެނދުނުގެ ވަގުތެވެ. އޮފީހުގައި އަވަދި ނެތި އުޅެމުން ދިޔަ ކޮންމެ މުއައްޒިފެއް ވެސް އެމީހެއްގެ މަސައްކަތުގައި އުޅުނެވެ. އިނާން އާއި އަހަރެންގެ އިތުރުން އެހެން މީހުނެވެ.

އަހަރެންގެ މަސައްކަތަކީ މިއަދު ބުރަ މަސައްކަތެކެވެ. އަމިއްލަ މަސައްކަތުގެ އިތުރުން ލަމްހާގެ މަސައްކަތްތައް ކުރަން ޖެހުނީމައެވެ. ފޫހިކަމެއް ވަރުބަލި ކަމެއް ނެތި އަހަރެން އުޅެމުން ދިޔައީ މަސައްކަތުގައި އަވަދި ނެތިއެވެ.

މެންދުރުގެ ވަގުތެވެ. އޮފީހުގެ ގިނަ ސްޓާފުން ބްރޭކަށް ދިޔަތާ އިރުކޮޅެއް ވެއްޖެއެވެ. ނިންމާ ލާފައިވާ ބައެއް ފައިލްތައް ހިފައިން އަހަރެން ދިޔައީ އިނާންގެ ކެބިނަށެވެ. އޭރު އިނާން ފައިލްތަކެއް ނަގައިން ކޮންމެސް އެއްޗެއް ހޯދަން އިނެވެ.

“އިނާން.. ފައިލްތައް.” އަހަންނަށް ބުނެވުނީ ކުރުކުރު ޖުމްލައެކެވެ.

އަހަރެންގެ އަޑަށް އިނާން ބަލައިލީ އެއްވެސް ޝައުގު ވެރިކަމެއް ނެތިއެވެ. އެއަށްފަހު މޭޒު ކައިރީގައި އިން ގޮނޑި ދައްކާލުމަށްފަހު އިށީންނާށޭ ބުނެލީ އަތުގެ އިޝާރާތުންނެވެ. އެހެންވެ އަހަރެން ގޮސް އެ ގޮނޑީގައި އިށީނީމެވެ. އިނާން އަހަންނާ ދިމާލަށް ބަލައިވެސް ނުލާ އިނދެ އަހަރެން ހަވާލު ކުރި ފައިލަށް ބަލަމުން ދިޔައެވެ. އަހަރެން ވިސްނާލީމެވެ. އެދުވަހު ކަން ވީގޮތުން އިނާންގެ ދުލުގައި މިއަދު އަހަންނާ ދިމާލަށް ބުނާނެ އެއްވެސް ބަހެއް ނެތީ ކަންނޭނގެއެވެ.

“ކޮބާ ލީންގެ ކޭޝް ކާޑް؟” ފައިލަށް ބަލަހައްޓައިން އިނދެ އިނާން އަހާލީ އަހަރެންގެ އަމިއްލަ ވާހަކައެކެވެ.

“ކޭޝް.. ކޭޝް ކާޑް ހޯދާނީ ކީއްކުރަން؟” ހައިރާން ވެފައި އިނދެ، އެ ސުވާލުގެ ބަދަލުގައި އަހަރެންވެސް ކުރީ ސުވާލެކެވެ.

“އަހާލީ… ދެން އަނެއްހެން ކަމެއް ނުވެ.” މިފަހަރު ވެސް އަހަންނާ ދިމާލަށް ބަލައި ނުލާ، އިނާން ދިނީ ކުރު އެހެނަސް ޝައުގުވެރި ޖަވާބެކެވެ.

“ދެން ހަމަ ކަމެއް ނުވެ ތިހެން އަހާނެތަ؟” ގޮތް ދޫ ނުކުރާން ވެގެން އަނެއްކާ ވެސް އަހަރެން ސުވާލެއް ކުރީމެވެ.

“އަހާލެވިދާނެއްނު.. އަނެއްހެން އަހަންނަށް އެނގޭހާ ވާހަކައެއް ލީންއާ ހިއްސާކުރެވޭނީ ލީންގެ ވާހަކަތައް ލީން ވެސް ކޮންމެސް ވަރަކަށް އަހަންނާ ހިއްސާ ކުރާނަމަތާ؟” އަނެއްކާ ވެސް އަހަރެންގެ ލޮލަށް ބަލައި ވެސް ނުލާ ފައިލް ގައިވާ ގަނޑުތައް އުކަމުން އިނާން ބުނެލިއެވެ.

“އިނާން..! އިނާން މިއަދު ކިހިނެއް ވެފަ ތި އިނީ؟ އަހަންނާ ދިމާލަށް ބަލައި ވެސް ނުލާ ވާހަކަ ތިދައްކަނީ… ނަދުރެއް ބުނީތަ؟” އަހަރެން ތެދުތެދަށް ބުނެލީމެވެ.

“ކަމެއް ނުވެ.. ނަދުރެއް ބުނަންވީ ކީއްކުރަން؟.. ކޮބާ ލަމްހާގެ މަސައްކަތްތައް ފަސޭހަތަ؟” ވާހަކައިގެ މައުޟޫ ބަދަލު ކޮށްލަމުން އިނާން ބުނެލީ މިފަހަރު އަހަންނާ ހަތަރު ކަޅި ހަމަކޮށްފައެވެ.

“އުނދަގުލެއް ނޫން… ދެން ހުރި ބައި މާދަމާ ނިމޭނެ.” އަހަރެން ބުނެލީމެވެ.

“އަސްތާ!.. ހާދަ ކުރިޔަށް ޖައްސާލީ؟.. އެހެންވީމަ ލަމްހާއަށް ވުރެ ވެސް ލީން މާ މޮޅު ތި މަސައްކަތަށް.” އިނާންގެ ރީތި ހިނިތުންވުން އަހަންނަށް ހަދިޔާކޮއްލިއެވެ.

އަހަރެން އިސްޖަހާލީމެވެ. އިނާން އަކީ އަހަރެންގެ ސުޕަވައިޒަރެވެ. އިނާންގެ އެ ހިނިތުން ވުމަކީ މުޅި އޮފީހުގައި ވެސް މަގުބޫލު ހިނިތުން ވުމެކެވެ. ކުއްލިޔަކަށް އަހަރެން އަނެއްކާވެސް ވާހަކަ ދައްކަން ފެށީމެވެ.

“ދެން ބުނެބަލަ..! ކީއްވެތަ ކޭޝް ކާޑް ހޯދަނީ؟” އަނެއްކާވެސް އަހަރެން ސުވާލު ކުރީ ޝައުގުވެރިކަމާ އެކުއެވެ.

“ރޭގަ ކެފޭއެއްގެ މޭޒުމަތިން ފެނުނީމަ..” އިނާން ބުނެލިއެވެ.

“ކެފޭ އެކޭ…؟ އާނ އިނގިއްޖެ… ދެން ކޮބާ ކާޑު؟ ގެނޭ އަހަރެން އަތަށް..” ހާސްކަން ވެރިވެފައިވާ މޫނު ހަމައަކަށް އަޅުވައި ލަމުން އަހަރެން ބުނީމެވެ.

“އަހަރެން އަތަކު ނެތް.. އެތަނަށް އެ ގެންދިޔަ މީހާއާ އަހަރެން އެ ހަވާލު ކުރީ… އެއީ ލީންގެ ފިރިމީހާ.. ވެޑިންގ ޕާޓީއިން ދިމާވި ފަހުން ވަރަށް ދުވަސް ކޮށްފަ ރޭގަ އޭނަ މި ފެނުނީ… ހިއެއް ނުވޭ އޭނައަށް އަހަރެން އިނގޭ ހެން..” އިނާން ކިޔައިދިނެވެ.

“އަހަރެން ދަނީ…” އިނާން ދެއްކި ވާހަކަތައް އަޑުއަހަން އިނދެފައި އަހަރެން ނުކުންނަން ހިނގައިގަތީމެވެ.

“ލީން..!” އަހަރެން ހުއްޓުނީ އިނާން ގޮވާލި އަޑަށެވެ.

“ލީން..! ބްރޭކް ގަޑީގަ ކާން ނުކުންނަންތަ؟… އެއްވެސް ޕްލޭން އެއް ނެތިއްޔާ ހިނގާ ލަންޗް ނަގަން ދާން.” އިނާން އަހަންނަށް ދަޢުވަތު ދިނީ މެންދުރުގެ ކެއުމަށެވެ.

“މިއަދު ނުކާނަން. އޮފީސް ނިންމާފަ ގެއަށް ގޮސްފަ ކާނީ…” ދަރިފުޅު، އިޔާންގެ މަތިން ހަނދާން ވުމުން އަހަރެން ބުނެލީމެވެ.

“ޕިސް.. ތިހިން އުޅޭކަށް ނުވާނެ. ހެނދުނު އަންނަ ގޮތަށް ހަވީރު ވަންދެން ނުކައި ހުރީމަ ކަމަކު ނުދާނެ.. ދާނަން ދޯ؟….. އޯކޭ… އަހަންނަށް ހީވަނީ ލީންގެ ޒާތީ ވާހަކަތައް އަހާފާނެތީ ނުދާންވެގެން ކަންނޭނގެ ތިއުޅެނީ… އެންމެ ރަނގަޅު އަހަރެން ދެން ގޮސްލާނީ އެކަނި…” މަޑުމަޑުން އަހަރެން ކައިރިއަށް ޖެހިލަމުން އިނާން ބުނެލިއެވެ.

އިނާންގެ ކެބިންގައި އަހަރެން ނުނިކުމެ ހުއްޓާ އަހަންނަށް ވުރެ ކުރިން އިނާން ނުކުމެގެން ދިޔައީއެވެ. އަހަރެންގެ ޖަވާބެއް ނުލިބުމުން ކަންނޭނގެއެވެ. ހަގީގަތުގައި ކޮންމެ ދުވަހަކު ވެސް އަހަރެން ހުންނަނީ މެންދުރު ވާއިރު ވަރަށް ބަނޑުހައި ވެފައެވެ. އެހެން ނަމަވެސް އިޔާންގެ އެކަނިވެރި ހާލަތު ހަނދާން ވުމުން މީރު އެއްޗިހި ކައިން އަހަރެން ހުންނާނީ ކިހިނެއް ހެއްޔެވެ؟

އިނާން ނިކުމެން ދިއުމާއި އެކު މޭޒުމަތީ ގައިވާ ފައިލްތައް ލައްޕާލުމަށް ފަހު އަހަރެން ގޮސް އަމިއްލަ ކެބިންއަށް ވަނީމެވެ. އޭރު ހުއްޓުމެއް ނެތި އަހަރެންގެ ފޯނު ރިންގް ވަމުން ދިޔައެވެ. ވީ އެންމެ ބާރަށް ހިނގަމުން ގޮސް އަހަރެން ފޯނު ނަގާ ކަންފަތުގައި ޖައްސާލީމެވެ.

“ހަލޯ..! އޯޑަރު ދީފިން ލީންގެ ފޭވަރިޓް ކޮއްތުރޮއްޓަށް.. އިރުކޮޅަކުން އަންނައްޗެ.” އެކޮޅުން ވާހަކަ ދެއްކީ އިނާނެވެ.

“އޯކޭ..” އޯޑަރ ދިން ކަމަށް ބުނުމުން، ދެކޮޅު ނުހަދާންވެގެން އަހަރެން ފޯނު ބޭއްވީމެވެ.

“ސާބަސް… ސާބަސް ލީން..! އިނާންގެ ކެބިންއަށް ވަނަސް ހާދަ އިރެކޭ ވަނީ.. އަހަރުމެންނަށް ނުކެރޭ ސުޕަރވައިޒަރ ރޫމްގަ ތިހާ އިރު މަޑުކުރާކަށް. އަނެއްކާ ކަމެއްތަ؟” ބޮޑު ކަންތައް ގަނޑަކަށް ހަދާލަމުން ނަޖްދާ ބުނެލިއެވެ.

“ލަމްހާގެ މަސައްކަތްތައް ހަވާލުކޮށްލަން ވަނީ.. އަމިއްލަ ކަމެއްގަ އެއް ނޫން.” ނަޖްދާއަށް ރައްދު ދެމުން އަހަރެން ބުނެލީމެވެ.

ނަޖްދާގެ ސަބަބުން އަހަރެންގެ މޫޑް އޮފް ވިއެވެ. އިނާން ގާތަށް ކެފޭއަށް ދިއުމުގެ ކުރިން އަހަރެން މޯބައިލް ފޯނު ނަގާ އިނާންގެ ނަމްބަރަށް މެސެޖެއް ކޮށްލީމެވެ.

އިނާން އިނީ އަހަރެންގެ އިންތިޒާރުގައެވެ. އެވަގުތު އިނާންގެ ކުރިމަތިން މޭޒު މަތީގައި އޮތް ފޯނަށް މެސެޖް ނޮޓިފިކޭޝަންއެއް ލިބުނެވެ. ވަގުތުން އިނާން ފޯނު ބަލައިލިއެވެ.

“ދާހިތެއް ނެތް” ލީންގެ މެސެޖްގައި ވެއެވެ.

ލީންގެ މެސެޖް ކުރެވެ. ވީގޮތް ނޭނގިފައި އިން އިނާން ނިއްކުރިޔަށް ރޫ އަރުވާލަމުން ރިޕްލައި ކޮށްލިއެވެ.

“އޯކޭ.. ނާންނަންޏާ ދެން އޮފީހަށް ގެންދަނީ ޕެކް ކޮށްގެން.” އިނާންގެ މެސެޖް ކިޔާލުމާއި އެކު އަހަރެން ވަކިން ލަދުގަތެވެ.

“ނޫން.. އެބަ ދަން.” ލީންގެ މެސެޖް ކިޔާފައި އިނާން އަމިއްލައަށް ހީލިއެވެ.

އޮފީހުން ނުކުމެގެން އަހަރެން ދިޔައީ ކުރިމަތީގައި ހުރި ކެފޭއަށެވެ. އޭރު އިނާން އަހަރެންގެ އިންތިޒާރުގައި އިނެވެ. އެވަގުތަކީ ކެފޭގައި ތަންކޮޅެއް މީހުން ގިނަ ވަގުތެއް ކަމުން އަހަރެން ޖެހުނީ ކޮންމެސް ވަރަކަށް އިނާން ކޮބައިތޯ ހޯދާލާށެވެ. އަހަރެން ފެނުމާއި އެކު އިނާން އަތް ހިއްލާލިއެވެ. އާދައިގެ މިނެއްގައި ހިނގާފައި ގޮސް އިނާންގެ ކުރިމަތިން އިން ގޮނޑީގައި އަހަރެން އިށީނީމެވެ.

“ހަލޯ.. އޭތް މަށަށް މި ހީވީ ހަމަ ރަނގަޅަށް. އެއީ ހަމަ ލީން..  ގޮސް ވަނީ ވެސް ކެފޭއަށް. އިރުކޮޅެއް ކުރިން އިނާން ވެސް އެތަނަށް ވައިން ތަން އަހަރެން ދެކުނީމޭ..” ފޯނުގައި ހުރެ ނަޖްދާ ބުނެލިއެވެ.

“އަހަރުމެން މިހާ ފެޝަން ވީމަ ކަންނޭނގެ އިނާންއަށް ކަމު ނުދަނީ.. ލީން ގޮތަށް އާދައިގެ މީހަކަށް ވެގެން އުޅުނީމަ މާ ކާމިޔާބެއްނު. އަހަރެން ހިއެއް ނުކުރަން އިނާން މީ އެކަހަލަ މީހެއް ކަމަކަށް. ގައިމު މެރީވެސް ކޮށްގެން ވިއްޔަ އެ އުޅެނީ.” އަނެއްކާވެސް ނަޖްދާ ފޯނުގައި ހުރެ ބުނެލިއެވެ.

“އަންނާނަމޭ ބުނެފަ ކީއްވެ ފަހުން ނާންނާނަމޭ ބުނީ؟” އިނާން އަހަންނާ ސުވާލު ކުރިއެވެ.

“ހަމަ ފޫހިވީ” އަހަރެން ދިނީ ކުރު ޖަވާބެކެވެ.

“ހަމަ ފޫހިވީ؟… ހަމަ ކަމެއް ނުވެ ފޫހިވީ؟” އަނެއްކާވެސް އިނާން އަހައިލީމެވެ.

“އިނާން…! އަހަރެން ނުކާނަމޭ ބުނީމަ ވެސް ހަމަ ކީއްކުރަންތަ ތިހެން ހެދީ؟. އިނާން ތީ އަހަރެން ނަމަ….” އަހަންނަށް ބުނެވުނީ އެހިސާބަށެވެ.

“އަނހަ…! އަހަރެން މީ ލީން ނަމަ، ލީން ތީ އަހަރެން ނަމަ….. ތި ހުސް ނުވާނެ ކަންތަކެއްްނު…” އަހަރެންގެ ވާހަކަ ހުއްޓުވާ ލަމުން އިނާން ބުނެލިއެވެ.

“އަހަރެން ހަމަ ރަނގަޅަށް ވެސް ކާން ބޭނުން ނުވާތީ ބުނެލީ.. އެހެން ނޫނަސް އަބަދު މިހެން ކާން އަންނަންޏާ، އޮފީސް ކުދިން ބުނާނީ ކީކޭތަ؟ މީ އެހާ ރީތި ގޮތެއް ނޫނެއްނު.” ހިތްހަމަ ނުޖެހޭ ކަން އަންގަމުން އަހަރެން ބުނެލީމެވެ.

“އަބަދު އެބަ އަންނަންތަ؟ ވަރަށް ފަހުން ދޯ މިހެން އަންނަން ފެށީ.. އަހަންނަށް އޯކޭ އޮފީސް ކުދިން ކޮންމެ އެއްޗެއް ކިޔަސް..” އިނާން ބުނެލީ އެއްވެސް ހާސްކަމެއް ނެތިއެވެ.

“އިނާނަށް އެއްވެސް އެއްޗެއް އަޑު ނީވޭތީ އޯކޭ ވެދާނެ.. އެކަމު އަހަންނަށް އޯކޭ އެއް ނޫން ކޮންމެ ކޮންމެ އެއްޗެއް ކިޔަންޏާ.” ކައި ނިންމާލަމުން އަހަރެން ބުނެލީމެވެ.

“މިހާރު ތިހެން ބުނީމަ ހީވަނީ އޮފީސް މީހަކު އެއްޗެކޭ ކީހެން… ލީން.. ތިކަހަލަ ކަންކަމާ އެހާ ބޮޑަށް ނުވިސްނަބަލަ.” އަނެއްކާވެސް އިނާން ބުނެލިއެވެ.

“އިނާން.. ދެން ދުވަހަކު ވެސް އަހަރެން ކައިރި ނުބުނައްޗެ ކާން އަންނަން. އަހަރެން ދަނީ.” ކޮނޑުގައި ދަބަސް އަޅުވާލަމުން އަހަރެން ތެދުވީމެވެ.

“މިއަދު ލީން ޕޭ ކޮށްފަ ދާންވީނު.” އިނާންގެ އަޑަށް އަހަރެން ހުއްޓުން އެރިއެވެ.

އަނެއްކާވެސް ވަގުތުން އަހަރެން އިށީނީމެވެ. ހަދަންވީ ގޮތެއް ބުނާނެ އެއްޗެއް އަހަންނަކަށް ނޭނގުނެވެ. އަހަރެންގެ މޫނުމަތިން ފާޅުވީ ހިތާމައިގެ އަސަރެވެ. ގޮތް ހުސްވެފައިވާ މީހެއް ފަދައެވެ.

“ކިހިނެއްވީ ލީން..؟ ޕޭ ކުރެވެން ނެތީތަ؟” އިނާން ދެލޯ ހަނިކޮށްލަމުން އަހަންނާ ސުވާލު ކުރިއެވެ.

އާނއެކޭ ބުނުމުގެ ގޮތުން އަހަރެން ބޯ ޖަހާލީ ވަރަށް ލަދުން އިނދެއެވެ. އެވަގުތު އިނާން އަށް ފޯނެއް އައެވެ. މޭޒު މަތީގައި ބާއްވާފައިވާ ފޯނުގެ ޑިސްޕްލޭއަށް އަރާފައިވަނީ “ވައިފް” އެވެ.

ނުނިމެ..

ސަލާމް… އަޅުގަނޑުގެ ސިއްޙީ ހާލަތު ހުރިގޮތުން މިއަދު ވާހަކައިގެ މި ޕާރޓް އަޕްލޯޑު ކޮށްލުން ލަސްވީތީ ނިހާޔަތަށް މަޢާފަށް އެދެން. އެހެން ނަމަވެސް މިޕާރޓް ވެސް ކިއުންތެރިންނަށް ކަމުދިޔަ ކަމުގައި އުންމީދު ކުރަން.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.