ހިތް އެދޭހާ ކަމެއް.. (21 ވަނަބައި)

“އެކްސްކިއުޒް. މިވަގުތު މިކޮޅުގަ އިންޗަރޖްއަށް ހުންނަ ބޭފުޅަކާ ބައްދަލު ކޮށްލެވިދާނެތޯ؟” ޝައިނާ އެދުނެވެ. އެކުއްޖާ ބޯޖަހައިލުމަށްފަހު ޝައިނާ އެދުނު ފަދައިން އެތަނުގެ މެނޭޖަރ ގެނެސްދިނެވެ. ހުދު ކުލައިގެ ގަމީހަކާއި ކަޅު ފަޓުލޫނެއްގައި ކައިރިއަށް އައިސް ހުއްޓިލި ޒުވާނާފެނި ޒީވާ ޝައިނާގެ އަތުގައި ކޮށްޓައިލިއެވެ.

“އައްސަލާމް އަލައިކުމް އަޅުގަނޑަކީ ޖައިލަމް. މިކޮޅުގެ ސްޓޯރ މެނޭޖަރ” ޖައިލަމް ހިނިތުންވުމަކާއެކު ބުނެލިއެވެ. ޝައިނާ ފެނުމާއެކު އޭނާއަށް ކަޅިޖަހައިލަން ނޭނގިފައިހުރިތަން ފެނި ރާހިލްއަށް ލޯ ހަނިކޮށްލެވުނެވެ.

“ހައި.. މިކޮޅުން ބަލާލި ބޫޓެއްގެ ސައިޒް ނެތީމަ… ތިރީސް ދުވަސް ކުރިން އޯޑަރދޭން ކުރަން ޖެހޭ ކަމަށް ވަނީ.. އެކަމަކު އަޅުގަނޑުމެނަށް ބާކީ އޮތީ ނަވާރަ ދުވަސް.. އެހެންވެ ސާމްޕަލް ޝޫ ވިއްކިދާނެތޯ އަހާލަންވެގެން” ޝައިނާވެސް ރީތި ހިނިތުންވުމަކާއެކު ޖަވާބު ދިނެވެ.

“ސޮރީ މޭމް. ތިއީ އަޅުގަނޑުމެންގެ އުސޫލާ ހިލާފުކަމެއް” އަނެއްކާވެސް ކުރިން ލިބުނު ޖަވާބު އިވުމާއެކު ޒީވާގެ މޫނުމައްޗަށް އިރުކޮޅަކަށް ވެރިވި އުޖާލާކަން އޮއްސިގެން ދިޔައެވެ.

“އަޅޭ. އެކަމަކު މި ޝޫޒް ވަރަށް ބޭނުން. ހަމަ ނެތްތަ 19 ދުވަސް ތެރޭ ވާނެ ގޮތެއް؟” ޝައިނާ ދެރަވެފައި އަހައިލިއެވެ.

“އައިމް އަފްރައިޑް ދެޓް ވޯންޓް ބީ ޕޮސިބަލް” ޖައިލަމް އަނެއްކާވެސް އަދަބުވެރި ކަމާއެކު ބުންޏެވެ.

“އަޅެ ޕްލީޒް. އޯކޭ ސީދާ ނަވާރަ ވަނަ ދުވަހަށް ނިންމާލަދިނަސް. އަރ ޔޫ ޝުއަރ އޯޑަރ އެއް ޕްލޭސް ނުކޮށްދެވޭނެކަން. ވީ ވިލް ޕޭ ޓްވައިސް ދަ ޕްރައިޒް” ޝައިނާ އާދޭހުގެ ރާގެއްގައި ބުންޏެވެ. އަދި ލަސްލަހުން އެސްފިޔަ ޖަހައިލަމުން ޖައިލަމްއާ ހަތަރުކަޅި ހަމަކޮށްލިއެވެ. އެވަގުތު ޖައިލަމް ފުންނޭވާއެއް ދޫކޮށްލިތަން ރާހިލްގެ އިތުރުން ރިއާންއަށްވެސް ފެނުނެވެ.

“ކޮބާތޯ ބްރައިޑްއަކީ؟” ޖައިލަމް ކޮށްލީ މައުލޫއާ މުޅިން ނުގުޅޭ ސުވާލެކެވެ.

“އަހަރެން؟ އަހަހަ ނޯ.. އަހަރެންގެ ބެސްޓްފްރެންޑް ޒީ.. ދެން މީނީ ޒީގެ ދޮންބެ އެންޑް ހިޒް ބެސްޓް ފްރެންޑް” ޝައިނާ ހިނިތުންވެލަމުން އެންމެންގެ ތައާރާފެއް ދިނެވެ. އޭރު ރާހިލްގެ މޫނުމަތީގައި އުފަންވަމުންއައި ނުރުހުން ފެނި ރިއާންގެ ކަޅި އެއްފަހަރު ރާހިލްއަށް އަނެއްފަހަރު ޝައިނާއަށް ހުއްޓެމުން ދިޔައެވެ. ޖައިލަމް ހަމަޖެހުމުގެ ނޭވާއެއް ދޫކޮށްލިއެވެ.

“އަޅެ ގޮތެއް ހަދާލެވޭތޯ ބަލާލާނީ ދޯ. އެކޮޅަށްގޮސް ވާހަކަ ދައްކާލަންވީނު” ޖައިލަމް ދުރުގައިހުރި ސޯފާސެޓެއް ދައްކައިލަމުން ބުންޏެވެ.

ޖައިލަމްގެ ވާހަކައިގެ ރާގު ބަދަލުވެގެންދިޔަ ގޮތްފެނި ރާހިލްއާ ރިއާން އަންތަރީސްވި ނަމަވެސް ޒީވާގެ ފަރާތުން އެކަމެއް ނުފެނެއެވެ. ޝައިނާ އެންމެ ރަނގަޅޭބުނެ ޒީވާއަށް އެއްލޯ މަރައިލުމަށްފަހު ޖައިލަމްގެ ފަހަތުން ހިނގައިގަތެވެ. އޭރު ރާހިލްގެ މޫނުމަތިން ނުރުހުމުގެ އަސަރު ފާޅުވާން ހުއްޓެވެ. ހީވީ ދެންމެ ދެންމެ ތެދުވެ ޖައިލަމްގެ ގަޔަށް ބޮލަށް އަރައިގެންފާނެ ހެނެވެ. ކައިރީގައި އިން ރިއާން އެވަރު ދެނެގަނެ ރާހިލްގެ ކޮނޑުގައި ހިފަހައްޓައިލީ ރާހިލް މޮޔަކަމެއް ކޮށްފާނެކަމުގެ ބިރުގައެވެ. އެހަރަކާތާއެކު ރާހިލް މައިތިރިވި ނަމަވެސް ދުރުގައި ތިބި ޝައިނާއާ ޖައިލަމްފެނި އޭނާއަށް ދަތްކުނޑި ވިކައިލެވުނެވެ. އެމީހުނަށް ތިބެވުނު ދިމާލުގެ ގޮތުން ޝައިނާގެ މޫނު ނުފެނުނު ކަމުގައިވިޔަސް ޝައިނާ ދައްކާ ބައެއް ވާހަކަތަކަށް ޖައިލަމް ހޭތަންފެނި ރާހިލްގެ ލޭކެކެމުންދިޔަ އެވެ.

ޝައިނާގާތު މަޑު ކުރުމަށް އިޝާރާތް ކުރުމަށްފަހު ޖައިލަމް ކައުންޓަރު ކައިރިއަށް ދިޔަތަން ރާހިލްއަށް ފެނި އެދިމާލަށް ދާން އުޅެވުނެވެ. ނަމަވެސް އެއަށްވުރެން ކުރިން މިފަހަރުވެސް ރިއާން ރާހިލްގެ ގައިގައި ހިފެހެއްޓިއެވެ.

“ރިއަލީ ރިއާން.. ޝީ އިޒް ޔޫސިންގް ހަރ ޕްރިޓީ ޕްރިވިލަޖް ޓު ގެޓް ވަޓެވަރ ޝީ ވޯންޓްސް. ހުންނަ ގޮތްކުޑަކަން ބަލާބަލަ..” ރާހިލްގެ ރުޅިގަނޑު ފަޅައިގެންދާން ކައިރިވިއެވެ.

“ދޮންބޭ! ދެން ކީކޭތަ ތިކިޔަނީ؟ ޝައި އަކީ ތި ހީކުރާކަހަލަ ވިޔާނުދާ މީހެއްނޫން.. ޕްރިޓީ ޕްރިވިލަޖް ޔޫސް ކުރެވެނީ ރީތި އަންހެނަކު ނުފެނިފަ ތިބޭ ދޮންބެމެން ކަހަލަ މޮޔަ ފިރިހެނުން ގިނަވީމައެއްނު.” ޒީވާ އޭނާގެ އެކުވެރިޔާ ދިފާއުކުރިއެވެ. އެ ވާހަކަ ރާހިލްއަށްވެސް ގަބޫލުކުރެވުނެވެ. އެބުނާފަދަ ވިޔާނުދާ ވާހަކަތައް ނުދެއްކިނަމަވެސް ޝައިނާގެ ރީތިކަމުގެ ޖާދޫގައިޖެހި ޖާނާއި މާލުން ކިތަންމެ އިމެއް ފަހަނަ އަޅައިދާނެ ފިރިހެނުން ދުނިޔޭގައި ގިނަވާނެކަން ރާހިލްއަށް އެނގެއެވެ. ނަމަވެސް އޭނާ ހިތް ނުތަނަވަސް ވަމުންދިޔައީ ޖައިލަމްގެ ހިތުގައި ޝައިނާއާ ދޭތެރޭ އޮންނާނީ ކޮން ނިޔަތެއްކަން އޭނާއަށް އެނގޭތީއެވެ. ޝައިނާ ހެއްލިދާނެފަދަ އުކުޅެއް ޖައިލަމްގެ ކުޅުމުގައި ގެންގުޅެފާނެތީއެވެ.

ރާހިލް ބަލަބަލައި އިންދާ އަނެއްކާވެސް ޖައިލަމް އައިސް ޝައިނާގެ ގާތުގައި އިށީނެވެ. އޭރު އޭނާގެ އަތުގައި އޭ5 ސައިޒުގެ ގަނޑުކޮޅެއް އޮތެވެ. ޝައިނާ ގާތު އިށީނދެ އެގަނޑުގެ ކޮންމެވެސް ހިސާބެއްގައި ސޮއިކޮށްލުމަށްފަހު އޭނާ އޭތި ޝައިނާގެ އަތަށް ދިއްކޮށްލިއެވެ. ދެމީހުން އެކުގައި ސޯފާއިން ތެދުވި ވަގުތު ޝައިނާ ކޮނޑުގައިވާ އަތްދަބަހުގެ ތެރެއަށް އެ ގަނޑުކޮޅު ވައްޓައިލަމުން ޖައިލަމާ ސަލާން ކޮށްލިއެވެ. އަދި އެއަށްފަހު ރާހިލްމެންތިބި ދިމާލަށް އަންނަން ފެށިއެވެ.

“ލިބުނުތަ؟” ޒީވާ ކެތްމަދުވެފައި އަހައިލިއެވެ.

“ޝައްކީތަ؟” ޝައިނާ ދަބަހުންނެގި ރަސީދު ނަގައި ޒީވާމެނަށް ދައްކައިލިއެވެ. އޭގައިވަނީ ކައިވެނީގެ ތިރީސްދުވަސް ކުރީގެ ތާރީހެއް ޖަހައި އޯޑަރު ނެގިކަމަށް ލިޔެފައެވެ. ޝައިނާގެ ކުޅަދާނަ ކަމާމެދު ބަސްހުއްޓިފައިހުރެ ރިއާންއަށް ރާހިލްއާ ދިމާލަށް ބަލައިލެވުނެވެ. ރާހިލް އިތުރަށް ޝައިނާގެ ކުރިމަތީގައި މަޑުކުރުމެއްނެތި ދުރު ފިޔަވަޅުތަކެއްގައި އެތަނުން ނުކުންނަން ހިނގައިގަތެވެ. އޭނާގެ ފަހަތުން ދެންތިބި ތިންމީހުންވެސް ނުކުތެވެ.

ކާރުގައި އިން އިރުވެސް ރާހިލްގެ ރުޅި އެންމެ ތަންފުކެއްވެސް މަޑުވިހެން ހީނުވެއެވެ. ބުމަ ގޮށްޖަހާލައިގެން އިނދެ އަތުގައި އޮތް ފޯނު އަނބުރައިލަ އަނބުރައިލަ އިންއިރު ނަޒަރު އަމާޒުވެފައިވަނީ ކާރުގެ ބިއްލޫރިގަނޑުން ބޭރަށެވެ. އޭނާގެ ކަތުރުކަށިގަނޑަށް ވާންވެފައިވާއިރު ހިންދިރުވާލާ ކޮންމެ ފަހަރަކު އެ ކޮލުގެ ކަށިގަނޑަށް އެނގުންވެލާ ގޮތްފެނި ފަހަތުގައި އިން ޝައިނާއަށްވެސް ކޮންމެވެސް ވަރަކަށް ރާހިލް ހިތްހަމަ ނުޖެހިފައިވާކަން އެނގުނެވެ.

“މި ފިހާރައަށް މަޑުކޮށްލަދެވިދާނެތަ؟ މަންމަމެން މާދަން ފުރާތީ ގަންނަން ބުނި އެތިކޮޅެއް ހުރީމަ” ޒީވާ އެދުނެވެ. ރިއާން އެ ފިހާރަ ކައިރިން މަގުގެ އެއްފަރާތަށް ކާރު މަޑުކޮށްލުމާއެކު ޒީވާ ކާރުން ފޭބިއެވެ. އެއާއެކު އޭނާ އެއްފަހަރު ރާހިލްއަށް އަނެއްފަހަރު ލޯގަނޑުން ފެންނަމުންދިޔަ ޝައިނާއަށް ބަލައިލުމަށްފަހު ފުންނޭވާއެއް ދޫކޮށްލިއެވެ.

“ގެޓް އައުޓް ރިއާން!” ރާހިލް ހަރުކަށިކަމާއެކު ބުންޏެވެ. އޭނާ ހުރީ ޝައިނާއާ އެކަހެރިކޮށް ވާހަކަދައްކަން ބޭނުންވެފައެވެ.

“ނޯ ރިއާން! މަޑުކުރޭ!” ޝައިނާ ހަމަ ރާހިލް ބުނި ރާގުގައި ބުނެލިއެވެ. ރިއާންއަކަށް ހަދާނެ ގޮތެއް ނޭނގުނެވެ.

“ހިތުން ވަރަށް މޮޅު ކަމެއް ދޯ ތި ކުރެވުނީ.. އަހަރެން މާ ގަޔާވާ ކަމެއްނޫން ތިކުރީ” ރާހިލް ހިތްހަމަނުޖެހިފައި ބުންޏެވެ.

“ރާހިލް ރުހޭތޯ ނުރުހޭތޯ ބަލާފަ އަހަރެން ކުރިކަމެއް ނޫނޭ އެއީ” ޝައިނާ ރައްދުދިނެވެ.

“ސަޅި! އަހަރެން ނުރުއްސިޔަކަސް ތަނަކުން ފެންނަހާ ފިރިހެނަކު ރުއްސޭތޯ ބަލާތި” ރާހިލްގެ ޖުމްލައާއެކު ޝައިނާ އިރުކޮޅަކަށް ހުއްޓުން އެރިއިރު ރިއާންއަަށް ދެލޯ ބޮޑުކޮށްލެވުނެވެ. ރާހިލް އެހާ މައްޗަށް އެކަންތައް ގެންދާނެ ކަމަކަށް އޭނާ ހިއެއް ނުކުރެއެވެ.

“އެކަކަށް ނޭނގުނަސް ރާހިލްއަށް އެނގޭނެކަމަށް އަހަރެން ހީކުރީ އަހަރެންނަކީ އެކަހަލަ މީހެއް ނޫންކަން. އެހެން ދިމާވާ މީހަކަށް އެންމެ ކުޑަމިނުން އަހަރެންގެ ފޯނު ނަންބަރ ކީއްކުރަން ސޯޝަލް މީޑިއާ އެކައުންޓެއްގެ ނަންވެސް ދީފަ ނޯންނާނެ.” ޝައިނާގެ އަޑުގައި ހިތްދަތިކަން އެކުލެވިފައިވިހެން ރާހިލްއަށް ހީވިއެވެ. “އަހަރެން ހީކުރީ ރާހިލް މުޅިން ބަދަލުވެއްޖެކަމަށް.. މިހާރު އެނގިއްޖެ އެރޭ އަހަރެންނާ ދިމާލަށް ކީ އެއްޗެހި އެއީ ރާހިލްއަށް ހެދުނު މިސްޓޭކެއް ނޫންކަން. ޕީޕަލް ޑޯންޓް މޭކް މިސްޓޭކްސް ޓްވައިސް. މިއަދު އަހަރެން އެގޮތަށް ކަންތައްކުރީ ތި ދެމީހުނަށް ފިލާވަޅެއް ދޭން..” އެހިސާބަށް ވާހަކަ ގެންދިޔުމަށްފަހު ޝައިނާ ސީޓުގެ ކުރިއަށް ޖެހިލާ ރިއާން އިން ޑްރައިވަރ ސީޓުގައި އަތް އަޅުވައިލިއެވެ.

“ޒީ އަކީ ސިންޑްރެލާއަށް ނުވެދާނެ.. ބަޓް އަހަރެންނަށް އަހަރެންގެ ބެސްޓް ފްރެންޑަކީ ވަރަށް އަގުހުރި ކުއްޖެއް.. އެންޑް ހޯޕްފުލީ ޝީ ވިލް މެރީ ސަމްވަން ދެޓް ވިލް ޓްރީޓް ހަރ ލައިކް އަ ޕްރިންސަސް” ޝައިނާ ރިއާންއަށް ދިމާލަށް ވަށްބަހެއް ފޮނުވައިލުމަށްފަހު ސީޓާ ދުރަށްޖެހިލި އެވެ. “ކޮންމެހެން އަހަރެމެންނަށް މަޑުނުކުރިޔަސް އެންމެ ރަނގަޅު. އަހަރެންނާއި ޒީއާ ދާނީ ހިނގާފަ” އޭނާ ކާރުން ފޭބުމުގެ ކުރިން ބުނެލިއެވެ.

“އަދިވެސް އަހަރެންތަ މި ގޯސްވީ؟” ޝައިނާ ފޭބުމާއެކު ރިއާންގާތު ރާހިލް އެއްސެވެ. ރިއާން އެ ސުވާލަށް ޖަވާބުދިނުމެއްނެތި ފުންނޭވާއެއް ދޫކޮށްލުމަށްފަހު ކާރު ދުއްވައިލިއެވެ.

***********

ރޭ ދެބައިވެ މީސްތަކުން ތަންމަތިތަކަށް ޖަމާވިއިރުވެސް ރާހިލްގެ ލޮލުގައި ނިދީގެ ކަންފުޅެއް ނެތެވެ. ޝައިނާއާމެދު ބަސްމަގު ބެހެއްޓުނު ގޮތާމެދު ވިސްނެމުން ދިޔައެވެ. ބުނެވުނީ ކީކޭކަން ރޭކައިލިއިރު މިވަނީ މާބޮޑަށްވެސް ލަސްވެފައެވެ. އޭނާގެ ހުށަހެޅުމަށް ޝައިނާ އިންކާރުކުރި ދުވަހަށްފަހު އެ ދެމެދުގައި ލެވިފައިވާ ފާރު މިއަދު އެ ބުނެވުނު ބަސްތަކުގެ ސަބަބުން އިތުރަށް ބޯ ވެގެންދާނެކަން ރާހިލްއަށް ޔަގީންވިއެވެ. އޭނާ އެކަމަކަށް ތައްޔާރެއް ނޫނެވެ. މިހާރުވެސް އެދެމެދުގައިވާ ދުރުކަން އޭނާއަށް ބަރުދާސްތު ކުރެވެނީ ހަމަ ކިރިޔާއެވެ. އޭނާގެ ސިކުނޑި ޝައިނާގެ ހިޔާލުތަކުން ހުސްވާ އެންމެ ސިކުންތެއްވެސް ދުވާލެއްގެ ސައުވީސް ގަޑިއިރުގެ ތެރޭގައި ވޭތު ނުވެއެވެ. އޭނާގެ ނަފްސަށް ކިރިޔާވެސް ހަމަޖެހުމެއް ލިބޭ ވަގުތަކީ ޝައިނާއާއެކު ހުރެވޭ ވަގުތުތަކެވެ. އެއީ ދާއިމީ ހަމަޖެހުމަކަށްވާން އޭނާ ބޭނުމެވެ. ކޮންމެ ފަދަ ހާލަތެއްގައި ވިޔަސް ޝައިނާ ހާސިލްކުރަން އޭނާ ބޭނުންވެއެވެ. ނަމަވެސް މިއަދު އޭނާގެ ދުލުން ބޭރުވި ބަސްތަކުގެ ސަބަބުން އޭނާ އެކަމަށްޓަކައި ކޮށަމުން އައި ރާސްތާގެ ފެށުނު ހިސާބަށް އަލުން އާދެވިއްޖެކަން ވިސްނުނެވެ. ދެން އޮތްގޮތަކީ ރާސްތާ ނުގެއްލެންދެން އަނެއްކާވެސް މަގު ކޮށަން ފެށުމެވެ.

ރާހިލް ވިސްނަމުން ދިޔައީ އެކަން ކުރާނެ ގޮތަކާ ދޭތެރޭގައެވެ. ޝައިނާގެ މަޢާފު ހޯދޭނެ ގޮތަކާ ދޭތެރޭގައެވެ. އެވިސްނުމުގައި އެރޭގެ އެތައް ގަޑިއިރެއް ޓެރަހުގައި ހޭދަ ކުރުމަށްފަހު ރާހިލް ތިރިއަށް ފޭބީ އޭނާ ބޯންހުރި ކޮފީތަށި ހުސްވިކަން އެނގުމުންނެވެ. ތަށި ހިފައިގެން ބަދިގެއަށް ވަތްއިރު އެތަނުގައި އިޝްވާ އުޅުނުތަން ފެނި ރާހިލްއަށް ހައިރާންކަމެއް ލިބުނެވެ.

“ވޯ ވޯ.. އަނެއްކާ މިރޭ ފަތިހު އިރު އަރާނީ ކޮން ކޮޅަކުންބާ މިގޭ ޕްރިންސަސް ބަދިގެއަށްވަދެ މި އުޅެނީ؟ ނަމަނަމަ އުނދުން ރޯ ނުކުރައްޗޭ.. ބަދިގެ ރޯވިއްޔާ މަންމަ ހީކުރާނީ އަހަރެން ކަމަށް” ރާހިލް އިޝްވާއާ ދިމާކޮށްލިއެވެ. އޭނާގެ އެންމެ ހާއްސަ ސިފައަކީ އެއީއެވެ. އަމިއްލަ ހަޔާތުގައި ހަތަރު އުދަރެސް ފެނުޖެހޭ ހިސާބަށް ދާއިރުވެސް އެކަން އެހެން މީހަކަށް އެންގުމެއް ނޯންނާނެއެވެ.

“ދެން ދޮންބޭ.. ވަރަށް ފޫހިވޭ.. ސިއްސައިގެނޭ ދިޔައީ!!އަދިވެސް ނުނިދާ ތި އުޅެނީއޯ؟ ފަތިހު ދުވަން ނުދަނީތަ؟” އިޝްވާ އަހައިލިއެވެ.

“ހްމްމް. މިރޭ ނުދާންކަމަށް” ރާހިލްގެ ޖަވާބު އިވި އިޝްވާއަށް ހައިރާންކަމެއް ލިބުނެވެ. ރާހިލްގެ ހަށީގަ ފުރާނަ ހުރިހާ ހިނދަކު ފަތިހުގެ ދުވުމަކީ އޭނާއާ ވަކިކުރެވޭނެ އާދައެއް ނޫންކަން އިޝްވާއަށް އެނގެއެވެ.

“ދޮންބެ ބަލީތަ؟” އިޝްވާ ރާހިލްއާމެދު ކަންބޮޑުވިއެވެ.

“ނޫން.. ނުނިދިގެން މި އުޅެނީ. އިޝީ ކީއްވެ ނުނިދާ؟” ރާހިލް އޭނާ ގެނައި ޖޯޑު ސިންކަށް ލުމަށްފަހު ބޯކަހަމުން އައިސް އިޝްވާގާތު މޭޒުގައި ލެގިލިއެވެ.

“ޓެސްޓަށް ދަސްކުރަން އިނދެފަ މި އައީ ބްރޭކްއެއް ނަގައިގެން.” އިޝްވާ ތައްޔާރު ކުރަމުންދިޔަ އެވޮކާޑޯ މިލްކްޝޭކް ތަށްޓަށް ރާހިލް ބަލައިލިއެވެ. އޭރު އިޝްވާ އެ ހަދައި ނިމެނީއެވެ. ހަމަ ނިމުމާއެކުހެން ރާހިލް އޭތި އިޝްވާގެ އަތުން ޖަހައިގަންނަމުން ދުވެލައިފައި ބަދިގެއިން ނުކުންނަން ހިނގައިގަތެވެ.

“ދެން ނޯ. ސިސް ކައިރި ބުނާނަން” އިޝްވާގެ ޖުމްލަ އިވުމާއެކު ރާހިލް ހަމަ އެ ދިޔަ ބާރުމިނުގައި އައިސް އިޝްވާގާތު ހުއްޓުނެވެ.

“އިޝީއަށް އަސްލު ނޭނގެނީއޭ ބަލާބަ. އަސްލު މިގޮތަށް ހެދީމަ މާ މީރުވާނެ ބަލަ–” ރާހިލް މޮޅު ވާހަކައެއް ހަދައިލަމުން އެ މިލްކްޝޭކް ތަށްޓަށް އެވޮކާޑޯގެ އެތިއެތިކޮޅު ކޮށައިފައި އަޅަން ފެށިއެވެ.

“ސިސްއޭ ބުނީމަ ހާދަ ވަރެކޭ ދޯ މި ވަނީ” އިޝްވާއަށް ރައްދު ދިނުމެއްނެތި ރާހިލް އެ ތަށި ގިރައިލުމަށްފަހު އަލުން އިޝްވާއަށް ދިއްކޮށްލަމުން އިޝްވާގެ ކޮނޑުގައި ޖަހައިލިއެވެ.

އިޝްވާހުރީ އަންތަރީސް ވެފައެވެ. ރާހިލް ހުރީ އެހާވެސް ބޮޑަށް ޝައިނާ ރުއްސަން ބޭނުންވެފައިބާއޭ އޭނާގެ ހިތަށް އެރިއެވެ. މީގެކުރިން ރާހިލް ވާހަކަ ދައްކައި އުޅޭ ކުއްޖެއްގެ ނަމެއް ބުނެގެން ރާހިލްގެ ހިތަށް ކެހެރުވަކެކޭވެސް ހީނުވާއިރު ޝައިނާގެ ނަން ބޭނުންކޮށްގެން ރާހިލްގެ ކޮންމެ ކަމެއް ހުއްޓުވޭނެ ހިސާބަށް ރާހިލްގެ ކަންތައް ދިޔައީހެއްޔެވެ.

“ވާއު.. އަސްލުވެސް ދޮންބެ ހަމަ ސިސްދެކެ އެހާ ލައިކްވޭތަ؟” އިޝްވާ އެ ތަށީގައި ހިފަމުން ރާހިލްއަށް ބުނެލިއެވެ.

“ޔާ އައި ގެސް..” ރާހިލް ހިތިގޮތަކަށް ހިނިތުންވެލަމުން ބުންޏެވެ.

“ޓޫ ބޭޑް. އިޝީ މިހާރު ބުނެފިން ދޮންބެ ރިޖެކްޓް ކުރަން. ރުޅި އަންނާނަންތަ؟” އިޝްވާ ދިމާކުރުމުގެ ރާގެއްގައި އަހައިލިއެވެ. ރާހިލް އަލަށް އެހާވާރަކުން އަންހެން ކުއްޖަކާހެދި އުޅޭތަން ފެނުން ވެގެންދިޔައީ އިޝްވާއަށް މަޖާ ކަމަކަށެވެ.

“ޔާ. ތޭންކްސް.. ޝީ އޮލްރެޑީ ރިޖެކްޓެޑް މީ” އެހެންބުނި ހިސާބުން ރާހިލްގެ މޫނުގައިވި ހިނިތުންވުން އޮއްސިގެން ދިޔަތަން ފެނި އިޝްވާއަށް ވެފައިހުރި މަޖަލަކިއްޔާ ފިލައިގެން ދިޔައެވެ. އެ މޫނުމަތީގައިވާ ހިތާމައާއި ވަރުބަލިކަން އިޝްވާއަށް ފުރަތަމަ ފަހަރަށް ފާހަގަވިއެވެ. ރާހިލްގެ މޫނަށް އެ ކުލަތަކަކީ ކިހާ ބީރައްޓެހި ކުލަތަކެއްކަން އެނގި އިޝްވާއަށް ރާހިލްގެ ހިތުގައި ޝައިނާއާމެދުވާ އިހުސާސްތަކުގެ ފުންމިން ހާމަވެގެންދިޔައެވެ.

“އައި.. އައިމް ސޮރީ ދޮންބޭ.. ދޮންބެ ސިސްގެ ކަންތަކާ ސީރިއަސްތަ؟” އިޝްވާ އަހައިލިއެވެ. ރާހިލް ބޯޖަހައިލިއެވެ.

“އަހަރެންނާ އަންހެނުންނާ ދޭތެރޭ އޮންނަ ހިސްޓްރީ އަކީ މާ ސްމާރޓް ހިސްޓްރީއަކަށް ނުވެދާނެ. މެއިބީ މާބޮޑު ވިސްނުމަކާނުލާ ކިތަންމެ ކަމެއް ކުރެވިފަ ހުރެދާނެ. އެކަމަކު މިފަހަރު އަހަރެން ވަރަށް ވިސްނިން. އަހަރެންނަކީ އެހާބޮޑު ގަމާރެއްނޫން.. ޝައިނާއަކީ މިގޭގެ ކޮންމެ މީހަކަށް.. ޒީއަށް.. އިޝްކޮއަށް.. އަދި މަންމައަށްވެސް އެހާ ހާއްސަ ކުއްޖެއްކަން އެނގިހުރެ އެ ގުޅުންތައް ހީނަރުވާކަމެއް ކުރާހާ އަހަރެން ފަރުވާކުޑައެއް ނޫން.. ޝައިނާއާ ދޭތެރޭ އަހަރެންނަށް ކުރެވުނު.. ކުރެވެނީ ކޮންމެ އިހުސާސަކަށްވިޔަސް މިއީ ވަރަށް ސާފު ތެދު އިހުސާސެއް” ރާހިލް އިޝްވާއަށް ކިޔައިދިނެވެ. އިޝްވާއަށް އެވަރު އެނގުމުގެ ހައްގު އޮންނާނެކަން އޭނާ ގަބޫލުކުރިއެވެ.

އިސްޖަހައިލައިގެންހުރި އިޝްވާގެ ދުލަކަށް ރައްދުގައި ބުނާނެ އެންމެ އެއްޗެއްވެސް ނައެވެ. އެވަގުތު ހިމޭންކަން ފިޔަވައި އިިތުރު ގޮތަކަށް ރާހިލްއަށް ހިތްވަރުދޭކަށް އޭނާއަކަށް ނޭނގުނެވެ. އޭނާއަށް އިސް އުފުލައިލެވުނީ ރާހިލްގެ މަޑު ހުނުމުގެ އަޑު ކަންފަތުގައި ޖެހުމުންނެވެ.

“ދިސް ސަކްސް އިޝީ.. ދިސް ސަކްސް ބިގް ޓައިމް.. އަހަރެންގެ ނަސޭހަތެއް އަހަންޏާ އިޝްކޮ ދުވަހަކުވެސް މީހެއްދެކެ މިވަރަށް ލޯބި ނުވާތި. އަބަދުވެސް ތިހެން އުފަލުގަ ހުރޭ.. ލޯތްބަކީ ބޮޑު ސްކޭމެއް އިޝީ… މެޖިކް އިން ދި އެއަރ.. މިއުޒިކް އިން ދި އިއަރސް.. އިޓްސް އޯލް ފޯލްސް އެޑްވަޓައިޒްމެންޓް… އެއިން އެއްވެސް ކަމަކީ މިކަމާ އެއްވެސް ގުޅުމެއް އޮތްކަމެއްނޫން… މިއަށްވުރެން ރަނގަޅުވާނެ ކަރަށް މަހާލައިފަ އޮންނަ ދަންމަޅިއެއްގެ ގޮތުގަ ލޯބި ސިފަކުރިޔަސް.. ދުރަށްދާ ކޮންމެ ފަހަރަކު ވާންވެ ނޭވާ ރޫޅިދާކަހަލަ.. އެހާވެސް ބޮޑަށް މިތަނުގަ ވޭންއަޅާ!!” ރާހިލް މުށްކަވައިލި އަތުގެ ބޮޑުވައި އިނގިލިން ދެފަހަރަކު މޭގައި ޖަހައިލަމުން އިޝްވާއަށް ބަލައިލިއެވެ. އެހިނދު ރާހިލްގެ ފަރާތުން އިވުނު ހުނުމަކީ އޭގައި އުފާވެރިކަމުގެ ޒައްރެއްގެ މިންވަރުވެސް އެކުލެވިފައިނުވާ ހުނުމެއްކަން އިޝްވާއަށް އެނގުނެވެ. އިޝްވާ މަޑުމަޑުން ރާހިލްގެ އަތުގައި ހިފައިލިއެވެ.

“އަޅޭ.. ދޮންބޭ.. އައިމް ސޯ ސޮރީ.. އިޝީ އަދި ސިސްއާ ވާހަކަދައްކާ-”

“ނޫން އިޝީ! އެއްވެސް ވާހަކައެއް ދައްކާނެ ކަމެއްނެތް. ޝައިނާ ބޭނުން ނުވާގޮތަށް އެއްވެސް ކަމެއް ކުރަން އިޝީ ބާރުއަޅައިގެން ނުވާނެ.. މި.. މިކަމުގަ ޝައިނާގެ ކުށެއް ނެތް.. ކުށްކުރީ އަހަރެން.. އަހަރެންގެ މޮޔަކަމުން ކުއްޖެއްދެކެ ލޯބިވީ.. އަދި އެވެސް މި މުޅި ދުނިޔޭގަވެސް ހުރި އެންމެ ގޮތްދޫނުކުރާ ބޯހަރު އަދި ހިތްހަރު ކުއްޖާ. މަގޭ ސަންތި ސްނޯ ކުއީންއަށް ދޫ ނުކުރާނެ! ފޯ ރިއަލް ޑޯންޓް ޔޫ ފީލް ކޯލްޑް ވެން ޝީޒް ނިއަރ؟ އިޓްސް އޯލް އައިސް” ރާހިލްގެ ވާހަކަ ނިންމަމުން މިފަހަރު ޖަހައިލި ހިނިގަނޑުގައި އިޝްވާވެސް ބައިވެރިވިއެވެ.

“އެކަމަކު ތިކަމުގަ ދޮންބެގެ ކުށެއް ނެތެއްނު.. ވީ ޑޯންޓް ޗޫޒް ޓު ފޯލް ފޯރ ސަމްވަން” އިޝްވާ ބުނެލިއެވެ.

“ބަޓް ވީ ޗޫޒް ދަ ސިޗުއޭޝަންސް އިޝީ.. ފުރަތަމަ ދުވަހުން ފަށައިގެންވެސް ދުރުގަ އުޅެވުން ނަމަ މިހެން ނުވީސް” ރާހިލް އޭނާގާތު ރިއާންބުނި ބަސްތައް ތަކުރާރު ކޮށްލިއެވެ. ފާއިތުވެދިޔަ މަދު ދުވަސްތަކުގައި އޭނާ ދިޔައީ ހުއްޓުމެއްނެތި އެ ބަސްތައް އަމިއްލަ މީހާއަށް ވިސްނައިދެމުންނެެވެ.

“ނޫން ދޮންބޭ.. ރަނގަޅަށް ވިސްނާލީމަ އެނގޭނެ ސިޗުއޭޝަނަކީވެސް އެއްވެސް ބާރެއް ފޯރުވޭނެ އެއްޗެއް ނޫންކަން… ތިހެން ބުނަންޏާ ސިސްއާ މެދު ކްރިއޭޓްވި ސިޗުއޭޝަނަށްވުރެން މާ އިންޓިމޭޓް ކިތައް ސިޗުއޭޝަން ދޮންބެ ކިތައް މީހުނާއެކު ކްރިއޭޓްކުރިން؟ ތިކަހަލަ އިހުސާސެއް އުފެދުނުތަ؟ ނޫނެއްނު؟ ހަގީގަތަކީ ހިތުގެ ލަގަން ދޫވާ ހިސާބުން އިންސާނާއަށް ކުރެވޭނެ އެއްވެސް ކަމެއް ނޯންނާނެ..” އިޝްވާގެ ވާހަކައިގައިވާ ތެދުކަން ރާހިލްއަށްވެސް ގަބޫލުކުރެވުނެވެ. އޭނާއަށް މީހަކު ލޯބިވަންޏާ ލޯބިވެވޭނެ ކިތަންމެ ހާލަތެއް ކިތަންމެ ކަމެއް އެހެން ކިތަންމެ ކުއްޖަކާއެކު ހިނގައިފައިވާއިރުވެސް އޭނާގެ ހިތުގައި މި އިހުސާސްތަކެއް އުފެދިފައެއް ނުވެއެވެ.

“އޯކޭ އޯކޭ. އިޝްކޮވެސް މިހާރު ހާދަ މޮޅު ވެއްޖޭ ދޯ.. ތި މޮޅުކަން މިފަހަރުގެ ޓެސްޓުން ނިކަން ދައްކަންވާނެ.. ދެން މާ މޮޅެތި ވާހަކަ ނުދައްކާ ދޭ ފޮތްކިޔަން” ރާހިލް އިޝްވާ އަވަހަށް ފޮނުވައިލިއެވެ.

އިޝްވާ ދިޔުމާއެކު އޭނާ އަނެއްކާވެސް ފުން ހިޔާލެއްގެ ތެރެއަށް ގެއްލުނެވެ. މި ދިމާވި ކަންތަކުގައި އޭނާގެ ކުށެއް ނެތްކަން އިޝްވާ ބުނެދިން ހިސާބުން ހިތްވަރު އައުވިކަހަލައެވެ. ލިބުނު މޮޅު ހިޔާލާއެކު އޭނާ ހިނިތުންވެލިއެވެ.

************

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.