ހިތް އެދެ ޔާރާ ތިއޭ – 45

“އަހަ ކޮންތާކަށް ދާން ތިއުޅެނީ.. ތިހާ ލޯބިކުދިން ނުވާނެއެއްނުން އެހާ ގޮތްދޫނުކުރާކަށް.. މި ޔަޝާލްއަކާ ހުރެ މަށަށް އައިނާއަށްށާ ކަލެޔަށް ކަމެއް ނުކުރެވިގެން މިއުޅެނީ.. ކަލެމެން ދެމީހުންދެކެ ވަރެއްގެ ލޯތްބެއް އޭނަ އެ ވަނީ ހަހަހަ..” ޒާއިދު ހިނިގަނޑެއް ޖަހައިލަމުން ބުންޏެވެ. “ކަލޭ ކޮންކަމެއް ބޭނުންވަނީ؟ ތިއީތަ ރައްޔިތުންގެ އިތުބާރު ހިފޭ މަގާމްތަކުގައި ހުރެގެން ގަންނަން އެނގޭ ގަނޑަކީ..” އަޑަށް ރުޅިވެރިކަން ވެރިކޮށްލަމުން އަލިޝްކާ އަހައިިލިއެވެ. “ހެހެ ބައެއް ފަހަރު އަތް ހަޑި ވެސް ކޮށްލަންޖެހޭނެ ދޫންޏާ.. އަބަދު ބަސްއަހައިގެން ރޫލްސްތަކަށް ކިހިނެތް ފޮލޯ ކުރާނީ؟ މަޖާ ވެސް ކޮށްލަން ވާނެއެއްނުން..” ޒާއިދު މަލާމާތުގެ ރާގަކަށް އެހެންބުނުމަށްފަހު އަލިޝްކާއާއި ދިމާލަށް ފުންމައިގަތެވެ.

***ޕާޓް 45***

ޒާއިދުއަށް އަލިޝްކާގެ ހަށިގަނޑުގައި އިނގިލިކުރި ޖައްސައިލެވުމުގެ ކުރިން ކުއްލިއަކަށް ބާރު ގަދަ އަތަކުން ޒާއިދުގެ ބޮލުގެ އިސްތަށިގަނޑުގައި ހިފައި ފާރާއި ދިމާލަށް ހޫރުވައިލިއެވެ. ޒާއިދަށް އޭނަގެ ހަށިގަނޑު ސީދާކުރުވުމުގެ ކުރިން އޭނަގެ މޫނަށް އެއްފަހަރާ ގޮށްމުށުގެ ތިން ހަމަލާ އަރައިގެން ދިޔައެވެ. ތުންފަތާއި ނޭފަތް ފެޅި ލޭގަނޑު އޮހޮރިގަތެވެ. އެހެނަސް ޔަޝާލްގެ ހިތް ފުރުނުހެން ހިޔެއް ނުވެއެވެ. ޔަޝާލް ޒާއިދުއަށް އިތުރު ހަމަލާއެއް ދިނުމުގެ ކުރިން ބިރުން ހުރި އަލިޝްކާ ޔަޝާލްގެ އަތުގެ މުލައްދަނޑީގައި ހިފައްޓައިލިއެވެ. އޭރު އަލިޝްކާއަށް ހުރީ ބިރުން ރޮވޭވަރު ވެފައެވެ. ޔަޝާލް އޭނައާއި ދިމާލަށް ބަލައިލުމުން އަލިޝްކާ ހުއްޓާލާށޭ ބުނާ ފަދައަކުން ބޯ ހޫރުވައިލިއެވެ.

ޔަޝާލް ދިޔައީ އައިސްފައި ހުރި ރުޅިން ތުރުތުރުއަޅަމުންނެވެ. އޭނަގެ އަތުގެ އިނގިލިތަކުގެ ހުޅުތަކުން ވަނީ ލޭ ހިލި ރަތް އަރާފައެވެ. އަލިޝްކާ އޭނަގެ ގައިގަ ނުހިފެއްޓިނަމަ ޒާއިދު އޮންނާނެ ހާލެއް އަންދާޒާ ނުކޮށްލެވެއެވެ. “ކަލޭ! މަގޭ ފައިސާ މަތީ ގެންގުޅެގެން ބޮޑު ކުރީމަ ކަލެޔަށް އެނގުނީ އޭގެ ބަދަލު ތިހެންތަ ދޭން އޭ؟؟” ޒާއިދު ކެއްސަމުން ހަޅޭއްލަވައިގަތެވެ. “އަހަރެން މިއޮތް ހުރިހާ ދުވަހު ހަނު ހުރީ ކަލެޔަށް އެއްޗެއް ވިސްނޭނެކަމަށް.. އެކަމަކު އެހެނެއް ނުވިއެއްނުން.. އެހުރި ސީސީޓީވީ ކެމެރާއަށް ހުންނާނޭ ކަލޭ މިތަނުގަ ޖެހި ސަކަރާތް އަރާފަ.. މިއަދު އޭނަ މައްސަލަޖެއްސި ނަމަވެސް ކަލޭ ބެދޭނެ..” ދަތްކުނޑިވިކައިލައިގެން ހުރެ ޔަޝާލް ބުންޏެވެ.

ޒާއިދު ނުލަފާ ހިނިގަނޑެއް ޖަހައިލިއެވެ. “މަ މީ ސާރޖެންޓެކޭ މިހުރި ގަމާރާ.. އެ ސީސީޓީވީ ކެމެރާއިން ފެންނާނެ ކަލޭ މަށަށް އަނިޔާ ކުރަނިކޮށް.. އެ ދައްކާފިއްޔާ ކަލޭގެ މިއޮތް ނޫހާއެކު ކަލޭ ކުޑަ ގޮޅިއަށް ވައްދާނެ.. ޑިޔުޓީގަ ހުންނަ ޕޮލިހެއްގެ ގަޔަށް އެރުމަކީ ކުށެކޭ ދަރިޔާ..” ޒާއިދު އަނގަމަތި އަތުގެ ނުފުށުން ފޮހެލަމުން މަލާމާތުގެ ރާގަކަށް ބުންޏެވެ. އެ ދެލޮލުގައި ވިދަމުން ދިޔައީ ނުރައްކާތެރިކަމުގެ ކުލަވަރެވެ.

“ލީވް އިޓް ޔަޝާލް ޕްލީޒް.. އަހަރެންނެއް މައްސަލައެއް ނުޖައްސާނަން.. މިއީ ނުވާކަމަކަށް ހަދައިގެން އަހަރެން ހުންނާނަން..” އަލިޝްކާ ލޮލުން ވެއްޓެން ތައްޔާރުވެފައި ހުރި ކަރުނަ ތިކިތައް ފޮހެލަމުން ބުންޏެވެ. “ނޫން.. މި ކަހަލަ ނުލަފާ ޖައްބާރުން މެރީމަ ރަނގަޅުވާނީ.. ކުޑަ ގޮޅިއަށް ލިޔަސް މި މީހުން މަތައެއްނުވާނެ..” ދަތްކުނޑިވިކާލާފައި ވެއްޓިފައި އޮތް ޒާއިދުގެ ބަނޑުގައި ކޮޅުފައިން ޔަޝާލް ޖެހިއެވެ. “އޭރުން އެމީހުންނާ އެއްފެންވަރަކަށް އެ ވެއްޓެނީ ޔަޝާލްއޭ.. އޭރުން ޖަލު ގޮޅީގަ އޮންނަން ޖެހޭނީ ޔަޝާލްއޭ..” ޔަޝާލްގެ ކޮނޑުގައި ހިފައި ތަޅުވައިލަމުން އަލިޝްކާ ހަޅޭއްލަވައިގަތެވެ.

އޭރު އަލިޝްކާއަށް ދިޔައީ ރޮވެމުންނެވެ. އަލިޝްކާގެ ކަރުނަތައް ޔަޝާލްގެ ރުޅި ހިންދައިލިއެވެ. މަޑުމަޑުން އަތް ހިއްލައިލުމަށްފަހު އަލިޝްކާގެ ކޯތާފަތަށް ވެއްޓެމުން ދިޔަ ކަރުނަތައް ފޮހެލަދިނެވެ. “ސޮރީ ޕްލީޒް ހުއްޓާލާ.. ދެން ނުޖަހާނަން..” ބަސްނާހާ ކުޑަކުއްޖަކު މަންމަ އެއްޗެހިކީމަ މާފަށް އެދޭ އުސޫލުން ޔަޝާލް މާފަށް އެދުނެވެ. އަލިޝްކާގެ ކަރުނަތަކުން އޭނަގެ ހިތުގައި ވަޅިން ޅިޔަ އަޅާ ފަދަ އިހްސާސެއް ޔަޝާލްއަށް ދިޔައީ ކުރެވެމުންނެވެ. “މަ ކަލެޔަށް ކަމެއް ނުކޮށް މިހުރީ ތިއީ މަގޭ ކޮއްކޮގެ ދަރިޔަކަށްވީމަ.. އެކަމަކު އެކަން މިހާރު މަ ހަނދާން ނައްތާލާފިން.. ދެން ކަލެޔަށް ފެންނާނީ މަގޭ ހުރި ނުލަފާކަން..” ބަރު އަޑަކުން އެހެން ބުނުމަށްފަހު ބަނޑުގައި އަތުން ހިފައްޓައިލައިގެން ކޮރުޖަހަމުން ފަދަ ގޮތަކަށް ޒާއިދު އެތަނުން ނިކުތެވެ.

ޒާއިދުގެ ބަސްތަކުން އަލިޝްކާގެ ހިތުގައި ބިރުވެރިކަން އުފެދިގެން ދިޔައެވެ. އެހެންނަމަވެސް ޔަޝާލްއަށް އެ ބަސްތަކުން ލިބުނީ ފޫހިކަމެވެ. އެއީ ފެށުނީސްސުރެ އެފަދަ މީހުންގެ އަނިޔާތަކަށް ހޭނިފަ ހުރީމަ ކަމަށް ވެސް ވެދާނެއެވެ. “ލިކާ ހާސްނުވޭ.. އަހަރެން ދިރިހުރި ހިނދެއްގައި ލިކާއަށް އޭނަ އަނިޔާއެއް ދޭކަށް ލާހިކެއް ނޫން..” ޔަޝާލް ވައުދުވިއެވެ. ޔަޝާލްގެ ބަސްތަކުން އަލިޝްކާގެ ބަނޑުގައި ކޮކާ އުދުހޭ ފަދަ އިހްސާސެއް ކުރެވުނެވެ. “އަހަރެން ހާސްވަނީ ޔަޝާލްއާ މެދުގަ އޭ.. ޕްލީޒް މޮޔަ ކަމެއް ނުކުރާތި..” އަލިޝްކާ އާދޭހުގެ ރާގަކަށް ބުންޏެވެ. “މޮޔަ ކަމެއް؟ ހުމްމްމް.. ލައިކް މިކަހަލަ؟” ޔަޝާލް ކުއްލިއަކަށް އަލިޝްކާ ދޮރާލައި ފިއްތައިލިއެވެ. އަލިޝްކާގެ ދެއަތް ޔަޝާލްގެ މޭމަތީގައި ތަތްވެގެން ދިޔައެވެ.

ޔަޝާލްގެ ތުންފަތުގެ އިހްސާސް އަލިޝްކާގެ ކޯތާފަތަށް ކުރެވުމުން، އަލިޝްކާގެ މުޅި މޫނު ރަތްވެގެން ދިޔައެވެ. އޭނަ ހުރީ ޔަޝާލްގެ ކުއްލި ހަރަކާތުން ނޭވާ ހުއްޓިފައެވެ. އަލިޝްކާއާއި ދުރުވެލުމަށްފަހު އަލިޝްކާގެ މޫނަށް އެޅިފައިވި އޭނަގެ ރާޅުބާނި އިސްތަށިކޮޅު ޔަޝާލް އަތުން އެއްފަރާތްކޮށްދިނެވެ. އޭރުވެސް ޔަޝާލް ހުރީ އަލިޝްކާއާއި ނޭވާ އިހްސާސްވާހާ ގާތުގައެވެ. ޔަޝާލްގެ ހޫނު ނޭވާތަށް އަލިޝްކާގެ މޫނަށް އެޅެމުން ދިޔައެވެ. “އަހަރެން ވަރަށް މޮޔަ ކަންތައް ކުރާ ހިތްވޭ..” އަލިޝްކާގެ ކަންފަތްދޮށުގައި އެހެން ބުނެލުމަށްފަހު ކަންފަތުގައި ތުންފަތް ޖައްސައިލިއެވެ. ހީލިކަރައިގެން އަލިޝްކާ ތެޅިގަތެވެ. އަވަސް އަވަހަށް ދޮރު ހުޅުވައިލުމަށްފަހު އެތަނުން ނިކުތެވެ. އަލިޝްކާގެ ހަރަކާތުން ޔަޝާލްގެ ތުންފަތްމަތީގައި ލާނެތް ހިނިތުންވުމެއް ދަތުރުކޮށްލިއެވެ.

ރޭގަނޑުގެ ވަގުތަށް މަރުހަބާ ކިޔުމުގެ ގޮތުން ދުނިޔެއާ އިރު އަލްވަދާއު ކިޔެވެ. ގަދަ ދަނބުކުލައެއް އުނޑުގައި ޖައްސާލެވިފައިވީއިރު އެ ކުލަ ތިރިޔަށް ފޭދެމުން ދިޔަ ވަރަކަށް ރަތްކުލައަށް ފޭދި އޮރެންޖް ކުލަޔަށް ވަނީ ފޭދިފައެވެ. އެކި ވައްތަރުގެ ދޫނިތައް އެ ސޮރުމެންގެ އާއިލާތައް ގާތަށް ދިޔުމަށްޓަކައި އުދުހި ގަސްގަހުގެ ގޮފިތަކުތެރެއަށް ވަދެ ފިލަމުން ދިޔައެވެ. ޖެހެމުން ދިޔަ މަޑު ވައި ރޯޅިތައް ގަސްގަހުގައި ބީހެމުން ދިޔައިރު، ގަސްތައް ދިޔައީ މަޑުމަޑުން ނަށަމުންނެވެ. މަންޒަރު ބަލާ މީހަކަށް ކިތަންމެހައި ވެސް ހިތްގައިމު މަންޒަރެކެވެ. ގޮނޑުދޮށުގެ ދޮންވެލިގަނޑަށް ފައި ކޮށްޕައިލައިގެންއިން ޒުވާން ފިރެހެންކުއްޖާ ދިޔައީ އެމަންޒަރުން ހިތްހަމަޖެހުން ހޯދަމުންނެވެ.

އެ މަންޒަރު އޭނަގެ ބޮލުގައި އުފެދިފައިވި ތޫފާނާއި ނުހަނު ތަފާތެވެ. އެވަގުތު އޭނައަށް ޒުވާން ފުރައިގެ އަންހެންކުއްޖަކާއި ފިރެހެންކުއްޖަކު ފެނުނެވެ. ފިރެހެންކުއްޖާގެ އަތުތެރޭގައި އެ އަންހެންކުއްޖާވީއިރު އެ ދެމީހުންގެ ތުންފަތުގައިވަނީ ލުއި ހިނިތުންވުމެކެވެ. ކުއްލިއަކަށް އޭނަގެ ބޮލަށް ތަދެއް އަރައިގެން ދިޔައެވެ. އަނެއްކާ ވެސް ކުލަނުވާ އެ ހުވަފެންތައް އޭނައަށް ސިފަވަމުން ދިޔައެވެ. ދޮންވެލިގަނޑުން މުށެއް ނަގައި އޭނައަށް އަތް މުށްކަވައިލެވުނެވެ.

ފުންކޮށް ނޭވާލަމުން ދިޔައިރު އޭނަ ދިޔައީ އެ ހުވަފެންތަކުން ދުރަށް ދިޔުމަށްޓަކައި ކުރިމަތިން ފެންނަމުންދިޔަ ގުދުރަތީ ރީތިކަމަށް ގެއްލުމަށް މަސައްކަތް ކުރަމުންނެވެ. “މައި ޑްރީމްސް އާރ ޖަސްޓް ޑްރީމްސް.. އެކަމަކު ކީއްވެ؟؟ ކީއްވެ އެއީ އަސްލުހެން ހީވަނީ.. އާހް..” އޭނައަށް ބުނެވުނެވެ. ތުރުތުރުއަޅަމުން ދިޔަ އަތް ޖީބަށް ކޮށްޕައިލީ ބޭސްފުޅީގައި އަތް ޖެހޭތޯއެވެ. އެހެންނަމަވެސް ނަސީބު ކަން ދިމާކުރި ގޮތުން ޖީބުގައި ބޭސްފުޅިއެއް ނެތެވެ. އެއާއެކު އޭނަގެ ހާސްކަން ދެގުނަވިއެވެ.

ކުއްލިއަކަށް އޭނަ ސިހުނީ އޭނަގެ ކޮނޑުގައި ކޮންމެސް މީހެއް އަތް ބާއްވައިލި އިހްސާސްވުމުންނެވެ. އޭނަ ދެލޯ ކުޑަކޮށްލަމުން އެމީހައާއި ދިމާލަށް ބަލައިލިއެވެ. “ބައްޕާ؟” ހިތްހަމަނުޖެހިފައި އޭނައާއި ދިމާލަށް ބަލަން ހުރި ސާޅީހުގެ އުމުރުތައް ގުނަމުންދާ މީހާއަށް ބަލައިލަމުން އެ ޒުވާނާ މުހާތުބު ކުރިއެވެ. “ބޭސްނުނަގާ އުޅޭތާ ކިތައް ދުވަސް ތި ވަނީ؟” ހިތްހަމަނުޖެހިފައި ހުރެ އެ ޒުވާނާގެ ބައްޕަ ސުވާލުކުރިއެވެ. އެއާއެކު ކުށްވެރިއެއް ފަދައިން އެ ޒުވާނާ އިސްޖަހައިލިއެވެ.

އޭނަގެ ބައްޕަ ފުންނޭވާއެއް ދޫކޮށްލުމަށްފަހު އޭނަގެ އަތަށް ބޭސްފުޅިއެއްލައިދިނެވެ. “ބައްޕަ ދަރިފުޅު ގާތު ބުނަންދޯ ބޭސްތަށް ގަވައިދުން ބޭނުން ކުރާށޭ.. ކީއްވެތަ އަޑު ނީވެނީ؟” އެމީހަ ބުންޏެވެ. “ސޮރީ ބައްޕާ.. ހަނދާން ނެތުނީ..” ބޭސް ގުޅައެއް އަނގަޔަށްލަމުން އެ ޒުވާނާ ބުނެލިއެވެ. “އުޅޭ ނަމާދަށް ދާން.. އެއޮއް މިހާރު ބަންގި ވެސް ގޮވީ..” އެ ޒުވާނާގެ ކޮނޑުގައި ޖަހައިލަމުން އޭނަ ބައްޕަ ބުންޏެވެ. އޭނަ ބޯޖަހައިލުމަށްފަހު އެތަނުން ތެދުވިއެވެ.

ސީލިންގަށް ބަލަމުން ދިޔައިރު މަޔާންގެ ދެ ލޮލުގައި ވަނީ ހުސްކަމެވެ. “ޔާން ހިތްވަރު ކުރަން ވާނެ.. އަހަރެން މާފަށް އެދެން ޔާންގެ ފަޔަށްވީ ގޮތުން ބަޓް ޓްރައި ޓު އަންޑަސްޓޭންޑް-” ކައިލްގެ ޖުމުލަ ބުރިވެގެން ދިޔައީ މަޔާން ވާހަކަ ދެއްކުމުންނެވެ. “އައި އަންޑަސްޓޭންޑް..” މަޔާން މަޑުމަޑުން ބުނެލިއެވެ. މަޔާންގެ ކޮނޑުގައި ކައިލް އަތް ބާއްވައިލީ މަޔާންއަށް ހިތްވަރު ދިނުމުގެ ގޮތުންނެވެ. “މަޔާންގެ ވުންޑް ހީލްވީމަ މިކޮޅުން ޕްރޮސްތެޓިކް ފަޔެއް ޖެހޭނެ.. އޭރުން ހަމަ ނޯރމަލްކޮށް ހިނގައި އުޅެވޭނެ އެހާ ބޮޑަށް ނުވިސްނައްޗޭ..” ކައިލް ބުންޏެވެ. މަޔާން ފުންނޭވާއެއްލުމަށްފަހު ބޯޖަހައިލިއެވެ. “ސޯ.. މަންމަ ބުނި ކައިލްއާ މައިއާ މެރީ ކުރިއްޔޭ.. ކިހިނެތްވީ ކަމެއް އަނެއްކާ އެއީ؟” ލާނެތް ހިނިތުންވުމަކާއެކު އޭނަގެ ވޭންތައް އެއްފަރާތްކޮށްލަމުން މަޔާން އަހައިލިއެވެ.

“އެއީ ދޯ.. އެއީ ކުޑަކޮށް ފޯސްޑް މެރިއޭޖްއެއް.. ޒާއިދު ކައިރިން މައިރީން ސަލާމަތް ކުރަން..” ބޯކަހައިލަމުން ކައިލް ބުންޏެވެ. ކައިލްގެ ޖަވާބުން މަޔާންގެ ދެލޯ ބޮޑުވިއެވެ. “އަހަރެން ނެތް އިރު ކަންތައްތަކެއް ހިންގައިލާފި ދޯ.. ކިޔާދީބަލަ ދެން..” މަޔާން ބުންޏެވެ. ކައިލް މަޔާންއަށް ހުރިހާ ވާހަކައެއް ކިޔައިދިނެވެ. މަޔާން ދިޔަ ފަހުން ޒާއިދުމެން މައިރީން ރަހީނު ކުރިކަމާއި، ޒާއިދުމެންގެ ކައިރިން ސަލާމަތްކުރަން ކައިލް މައިރީން ރަހީނު ކުރި ވާހަކައެވެ. އަދި މައިރީންގެ ބައްޕަ މައިރީން މީހަކާ ދެވަން އުޅުމުން ކައިލް މައިރީންއާއި ކައިވެނި ކުރަން އެއްބަސްވި ވާހަކަ ވެސްމެއެވެ. އަދި މިހާރު މައިރީންއާއި ކައިލްވެގެން ކިޔާރާގެ ކޭހުގެ މަސައްކަތްކުރަމުންދާ ވާހަކައެވެ. އެއްވެސް ވާހަކައެއް ވައްޓައިނުލައި ކައިލް ކިޔައިދިނެވެ.

މަޔާން ވެސް ކައިލްގެ ވާހަކަތައް ޝައުގުވެރިކަމާއެކު އަޑު އަހަން އިނެވެ. “ޔޫ ޑިޑް ދި ރައިޓް ތިންގް މެރީން ހާރ.. ތެންކްސް އަހަރެންގެ ކޮއްކޮ ރައްކާތެރިކޮށްދިނީތީވެ ކައިލް..” މަޔާން ޝުކުރުވެރި ރާގަކަށް ކައިލްއާއި ދިމާލަށް ބުންޏެވެ. “އަހަރެންނަށް ޝުކުރު އަދާ ނުކުރޭ.. އަހަރެން އަބަދު ސަލާމަތް ކުރާހާ ވަނީ.. ނުރައްކާތެރި ކަންކަމާ ކުރިމަތިލުމަކީ އޭނަ އެންމެ ކުރާ ހިތްވާ ކަންތައް ފަދަ..” ކައިލް ބޯހޫރުވައިލަމުން ހިނިތުންވެފައި ބުންޏެވެ. “މައި ވަރަށް ހައިޕާ އިންޑިޕެންޑެންޓް ވާނެ.. އަހަރެން އެހާ އޯކޭ ނުވިޔަސް މަންމަމެން މައި ކުޑައިރު ގެންގުޅުނީ ކޮއްޓެއްގައި ދޫންޏެއް ގެންގުޅޭހެން.. އެހެންވެ ކަންނޭނގެއެއީ..”  މަޔާން ވިސްނައިލަމުން ބުންޏެވެ. ކައިލް ވެސް މަޔާންގެ ވާހަކައަށް ބޯޖަހައިލިއެވެ.

ސޯފާގައި ދެފައި ވަށްކޮށްލައިގެން އަލިޝްކާ އިނީ ޓީވީއަށް ބަލާށެވެ. އޭނަގެ މޫނު މަތިން މީހަކަށް އިންތިޒާރު ކުރަމުންދާކަން ދޭހަވެއެވެ. އިރުއިރުކޮޅަކާ އެހެން އިނދެ އޭނަ ދިޔައީ ގަޑިއަށް ބަލަމުންނެވެ. ގަޑިން އެގާރަ ގަޑި ބައިވި ތަނާހެން ބޮޑު ދޮރު ހުޅުވައިލުމަށްފަހު އެ ގެޔަށް މީހަކުވަނެވެ. އަލިޝްކާ ޓީވީ ނިއްވައިލީ އެއީ ކާކުކަން އޭނައަށް އެނގޭތީއެވެ. ހަށަން ބަނދެގެން އޭނަ ކުރާ ކަންތައް ބަލަން އަލިޝްކާ އިނެވެ. ފައިގެ އިނގިލިތަކުގެ ކުރި ޖައްސައިގެން އޭނަ ހިނގަމުން ދިޔައެވެ. ސިޓިންރޫމްގެ ބޮކި ދިއްލުނު ވަގުތު ސޯފާއި އިށީނދެގެން ބޯ ހާވައިލައިގެން އިން އަލިޝްކާ ކުއްލިއަކަށް ފެނުމުން އޭނަ ދިޔައީ ސިއްސައިގެންނެވެ. އައިދަންއަށް ވީ ގޮތުން އަލިޝްކާ ގާތަށް ހިނިއައެވެ.

“ދޮންތަ މަށަށް ހާޓް އެޓޭކްއެއް ނުދެވިގެންތަ ތި އުޅެނީ..” މޭގައި އަތް އަޅައިގެން ހުރެ ފުން ނޭވާތަކެއްލަމުން އައިދަން ބުންޏެވެ. “އައިދަންއަށް އެނގޭތަ އައިދަން ތިޔަ ހެޔޮ އެދިގެން މަސައްކަތް ކުރާ ޒާއިދު މިއަދު އައިދަންގެ މި ދޮންތަގެ ގަޔަށް އަރަން އުޅުނުކަން؟” އަލިޝްކާ ހާސަރުތަކެއް ދިގުކުރުމެއް ނެތި އޭނަ ވާހަކަ ދައްކަން ތައްޔާރު ކުރި މައުޟޫއަށް އަލިއަޅުވައިލިއެވެ.

އަލިޝްކާގެ ވާހަކައިން އައިދަންގެ މޫނު ހުދުވެގެން ދިޔައީ ސިކުންތުކޮޅެއްގެ ތެރޭގައެވެ. “ދޮންތާ..” އައިދަން މަޑުމަޑުން ގޮވައިލިއެވެ. އޭނަގެ ދެލޮލުން ބުނާފަދައެވެ. ދޮންތާއެވެ. ތިހެން ނުބުނާށެވެ. ތިއީ ދޮގެކޭ ބުނާށެވެ. އެހެންނަމަވެސް ހަގީގަތަކީ ހިތި އެއްޗެކެވެ. “ކޮއްކޮއަށް ހެޔޮ ދޯ އޭނަ ދޮންތަ ނޮޅާ ކާލިޔަސް.. ކޮއްކޮ ވެސް ތި މަސައްކަތް ކުރަނީ އެހެން އަންހެންކުއްޖަކަށް އެ އަނިޔާ ދެވޭތޯއެއްނުން..” އަލިޝްކާ ބުނެލިއެވެ.

އެއީ އައިދަން ޒާއިދުމެނަށް މަސައްކަތް ކުރި ފަހުން އައިދަންއާއި ދިމާލަށް ކޮއްކޯއޭ ކިޔައި ގޮވައިލި ފުރަތަމަ ފަހަރެވެ. އައިދަންގެ ހިތް ފިތެމުން ދާ އިހްސާސްވިއެވެ. ވަގުތުން ބޯ ހޫރުވައިލިއެވެ. “ދޮންތާ ނޫން.. އަހަރެން ދުވަހަކު ވެސް އެކަހަލަ ކަމެއް ނުކުރާނަން.. ޒާއިދު ޔާޝް ހޯދައިދޭނަމޭ ބުނީމައޭ އަހަރެން އޭނައާއެކީ މަސައްކަތް ކުރަނީމި.. އެކަމަކު.. އެކަމަކު ދެން އަހަރެން އޭނައާއެކީ މަސައްކަތެއް ނުކުރާނަން.. އަހަރެންގެ އާއިލާގަ ހަމައެކަނި ހުރި މީހަކީ ތިއީ.. ދޮންތަ އަހަރެންނަށް ގެއްލިއްޖެއްޔާ އަހަރެން.. އަހަރެން ވަރަށް އެކަނިވެރިވާނެ..” އިސްޖަހައިލަމުން ކުރެހިފައިވި އަޑަކުން އައިދަން ބުންޏެވެ.

އައިދަންއަށް ވިސްނުނީތީވެ އަލިޝްކާއަށް ހިނިތުންވެވުނެވެ. “ޔާޝް އަދި ފެންނާނެ.. އެކަމަކު ޔާޝްގެ ނަން އެކްސްކިޔުޒްއަކަށް ބޭނުން ނުކުރޭ އިދީ.. ޔާޝް ވެސް އެގޮތެއް ބޭނުމެއް ނުވާނެ..” އައިދަންއަށް ވިސްނައިދޭ ފަދަ ގޮތަކަށް އަލިޝްކާ ބުންޏެވެ. އައިދަން ބޯޖަހައިލިއެވެ. އޭނަގެ އަތްވަނީ މުށްކެވިފައެވެ. “އިދީ.. އަންނަ ރުޅީގަ ޒާއިދުއަށް ކަމެއް ނުކުރާތި.. އޭރުން އިދީ ވެސް ދާނީ ޖަލަށް..” އަލިޝްކާ ބުންޏެވެ. “އަހަރެން ކިހިނެތް ހަދަންވީ.. ދޮންތައަށް އެހެން ހަދާފަ އަހަރެންނަށް ލާހިކެއް ނޫން އޭނަ އުފަލުގަ އެހެން އުޅޭ ތަން ބަލާކަށް..” އައިދަން ދަތްކުނޑި ވިކައިލަމުން ބުންޏެވެ. “ދޮންތަ ބުނާ ކަމެއް އިދީއަށް ކޮށްދެވޭނެތަ؟” އަލިޝްކާ އައިދަންގެ ދެލޮލަށް ބަލައިލަމުން ބުންޏެވެ. އައިދަން ބޯޖަހައިލިއެވެ.

“ދޮންތައަށް އެނގޭ ޒާއިދުމެން މައިރީން ކިޑްނެޕްކުރިކަން.. މައިރީންއަކީ ދޮންތަގެ ފްރެންޑެއްގެ ފްރެންޑެއް.. އަދިވެސް މައިރީންއަށް އަނިޔާ ދެވޭތޯ އުޅޭކަން ދޮންތައަށް އެނގޭ.. އިދީއަށް ހެކި އެއްކުރެވިދާނެތަ އެކަމަށް؟ ޒާއިދުމެން މީގެ ތޭރަ އަހަރު ކުރިން ކުރި ކަންތަކުގެ ހެކި ދޮންތަ ބޭނުމީ..” އަލިޝްކާ ބުންޏެވެ. އައިދަންގެ ދެލޯ ބޮޑުވިއެވެ. އަލިޝްކާ އެކަހަލަ ކަމަކަށް އެދުމުން އައިދަން ހައިރާންވިއެވެ. އޭނައަށް އެކަން ކުރެވިދާނެބާއެވެ؟ އޭނައަށް ޒާއިދުމެނަށް ބޭވަފާތެރިވެވިދާނެ ހެއްޔެވެ؟ އަލިޝްކާ ހުރީ އައިދަންގެ ޖަވާބަކަށް އިންތިޒާރުކޮށްގެންނެވެ. އައިދަން އެކަން ކޮށްދީފި ނަމަ އޭނަގެ މަސައްކަތަށް ވަރަށް ބޮޑަށް ފަސޭހަވެގެން ދާނެއެވެ. އިރުކޮޅަކު ވިސްނައިލުމަށްފަހު އައިދަން ޖަވަބެއް ދިނެވެ. އައިދަންގެ ޖަވާބުން އަލިޝްކާގެ މޫނަށް ގޮތް ނޭނގޭ ކުލަވަރެއް އަރައިގެން ދިޔައެވެ.

ދުވަސްތައް އޭގެ ހަލުވި މިނުގައި ވޭތުވަމުން ދިޔައެވެ. މަޔާންގެ ކޭސް ލަންކާއިން ނިމިގެން ދިޔައީ ކުށްވެރިންނަށް ހައްގު އަދަބު ދެވިގެންނެވެ. އެހެންނަމަވެސް ސިފައިން ހޯދާ ހޯދައި ވެސް އެ ގޭންގުގެ ވެރި ފަރާތް ފެންނަ ކަމަކަށް ނުވިއެވެ. ރާއްޖެ އައުމާއެކު ގޭންގުގައި މަސައްކަތް ކުރި ދިވެހިންނަށް އެމީހުންގެ ހުކުމްތައް އިއްވިގެން ދިޔައެވެ. ކޯޓުގައި ހުރި މަޔާންގެ މޫނުގައި ވަނީ މާޔޫސްކަމެވެ. އެމީހުންނަށް އެމީހުންގެ ހައްގު އަދަބު ދޭން އިއްވުނު ކަމުގައިވިޔަސް އަދަބުދިނުން އެއީ ނުވާ ކަމެކެވެ. އެމީހުންގެ ސަބަބުން މަޔާންގެ ފަޔެއް ގެއްލުނު ކަމުގައިވިޔަސް އެއީ އިންސާނުންނަށް ވީތީވެ އެމީހުންގެ ހައްގުތަކެއް ވެސްވެއެވެ. އަނިޔާ ލިބުނު މީހާއަށްވުރެ އެމީހުންގެ ހައްގުތައް މާ ގިނަހެން ވެސް ހީވެއެވެ.

“އާދެ އޮފިސާރ މަޔާން އަހްމަދު ރަހީނުކޮށް، އަނިޔާކޮށް، އަދި މަރައިލަން މަސައްކަތްކުރުމުގެ ކުށުގެ ދައުވާއާއެކު ހުސެން ދަހުލާން އުމުރު ދުވަހަށް ޖަލަށްލުމަށް ހުކުމް ކުރަން..” ގާޒީގެ އިއްވުމުން ވެސް މަޔާންގެ ހިތަށް ހަމަޖެހުމެއް ނުލިބުނެވެ. އޭނައަށް އިންސާފު ލިބިއްޖެއެވެ. އެހެންނަމަވެސް އޭނަ އުމުރަށް ނުކުޅެދޭ މީހަކަށްވީއެވެ. އޭނަގެ ގާތުގައިވީ އެންމެންގެ ބޮލުގައި އެޅިފައިވި ބުރައަކަށް އޭނަވިއްޔޭ މަޔާންގެ ހިތަށް އެރިއެވެ. ލާރާ މަޔާންގެ ގޮޑި ދުއްވަމުން ދިޔައިރު އެއްވެސް ވާހަކައެއް ނުދައްކައެވެ. އެހެންނަމަވެސް މާޔަލް ދިޔައީ ހުއްޓައިނުލާ އަނގަ ތަޅަމުންނެވެ.

ގޭތެރެއަށް ވަންނަން ނެގި ފުރަތަމަ ފިޔަވަޅާއެކު ލާރާގެ މޫނުމަތި ބަނަވެގެން ދިޔައީ ކުރިމަތިން ފެނުނު މަންޒަރުންނެވެ. “އޭނަ މިގޭގަ ކީއްކުރަނީ..؟” ދަތްކުނޑިވިކައިލަމުން ރުޅިގަނޑު ހިންދަން މަސައްކަތްކުރަމުން ލާރާ އެއްސެވެ. “އޭނަގެ އާއިލާއެއް އަހަރެމެންނަކަށް ނޭނގެ.. އެހެންވެ އޭނަގެ އާއިލާ ހޯދެންދެން އޭނަ މި ގޭގަ ހުންނާނީ..” ޝިޔާމާގެ ގާތުގައި އިން ލަޔާޝާއަށް ބަލައިލަމުން މަޔާން ބުންޏެވެ. ލާރާ ފަހަތުގައި ހުރުމުން މަޔާންއަކަށް ލާރާގެ މޫނަށް އަރައި ފައިބަމުން ދިޔަ ކުލަވަރެއް ނުފެނުނެވެ. ކުއްލިއަކަށް ލާރާ މަޔާންގެ ގޮޑި ކުރިޔަށް ކޮށްޕައިލިއެވެ. އެފަދައިން ކުރިއަށް ކޮށްޕައިލުމުން މަޔާން އަނގަ މައްޗަށް ވާ ގޮތަށް މުށިތައް މައްޗަށް ވެއްޓުނެވެ. އެއަޑަށް ސޯފާގައި ތިބި ޝިޔާމާއާއި ލަޔާޝާ ބަލައިލިއެވެ.

މުށިތަށް މައްޗަށް ވެއްޓިފައި އޮތް މަޔާން ފެނުމުން ޝިޔާމާގެ މޭގަނޑު އަނގަޔަށް ނައީ ކިރިޔާއެވެ. ދަރިފުޅާއޭ ކިޔާފައި ޝިޔާމާ މަޔާންއާއި ދިމާލަށް ދުއްވައިގަތެވެ. އޭރު ލަޔާޝާ ވެސް ޝިޔާމާއާއިއެކު އައިސް “ޔާންބޭ” އޭ ކިޔައި ގޮވައިލިއެވެ. ލާރާ ދަތްކުނޑިވިކާލާފައި ލަޔާޝާގެ މޫނުމަތީގައި ޖެހިއެވެ. ލާރާގެ އަމަލުން ޝިޔާމާގެ ދެލޯ ބޮޑުވެގެން ދިޔައެވެ. “ހުހް މިހާރު ޔާންބެ އޭ ކިޔާފަ ގޮވާއިރު ދެ މީހުން އެއްއެނދެއްގައި ނިދާ އެހެން ކަންތައް ކުރިއިރު ނޭނގެ ބޭބެއެއް އެހެން އެއްޗެއް.. ކިހިނެތް އުޅޭނަމޭ ހިތާތަ ތިއުޅެނީ ލަދުކުޑަ އަންހެނާ.. މަޔާން ތިހާލުގަ ވެސް މީނަ ގެޔަށް ވެއްދީ ދެ މީހުން މި ގޭގަ ތިބެގެން އަނެއް ކުޅިވަރެއް ފަށަން ދޯ..” ލާރާ ހަރުކަށި ރާގަކަށް ރުޅިއައިސް ރަތްވެފައި ހުރެ ބުންޏެވެ. ލާރާގެ ވާހަކައިން އެތާގައި ބޮމެއް ގޮވިފަދައެވެ. ޝިޔާމާ ލާރާގެ ގައިގައި ޖަހަން އަތް އުފުލައިލިއެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.