އަބަދުވޭ ހިތުގާ މަގޭ 1

(1 ވަނަ ބައި)

މާލޭގެ ކާރޫބާރޫ މަގުތަކުގައި އެއްވެސް ހުއްޓުމެއް ނެތި އުޅަނދުތައް ދުއްވަމުން ދިޔައެވެ. މެންދުރުގެ ހޫނު ގަދަ ވަގުތުގައިވެސް މެއެވެ. ކޮންމެ މީހަކު ވެސް ހިނގަމުން ދިޔައީ އެމީހެއްގެ މަންޒިލާއި ދިމާލަށެވެ. އެއްބަޔަކު ލޯމަތީގައި އައިނެއް އަޅާލެވިފައިވީ އިރު، އަނެއް ބަޔަކު ލޯމަތީގައި އަތް އަޅާ އަވިން ދެލޯ ރައްކާތެރި ކުރަމުން ދިޔައެވެ.

“ތެރަޕީ ސެންޓާރ” ކްލިނިކްގައި އިން ނިކާލް އިނީ އިސްޖަހާލައިގެންނެވެ. ނިކާލް ކުރިމަތީގައި އިން ޖުވެއިންގެ ނަޒަރު ހުއްޓިފައިވަނީ ނިކާލާއި ދިމާލަށެވެ. ހީވާ ގޮތުން ނަމަ ނިކާލްގެ ޖަވާބަކަށް އިނތިޒާރު ކުރަނީއެވެ.

“ކީކޭ ބުނާނީ؟ މަންމަގެ ދަރިފުޅު ފަރުވާއެއް ނެތް ބައްޔަކުން މަރަށް ތައްޔާރު ވަނީއޭ ތަ؟” ނިކާލް އަހާލިއެވެ. ސިއްރު ކުރަން މަސައްކަތް ކުރި ނަމަވެސް އެއަޑުގައިވީ ވޭން ޖުވެއިނަކަށް ސިއްރެއް ނުވިއެވެ.

“ދެން މިއަދަށް ސެޝަން ނިންމާލަން ވީނުން ދޯ؟” ޖުވެއިންގެ ޖަވާބެއް ނުލިބެނީސް ނިކާލް ބުނެލިއެވެ.

އުމުރުން 23 އަހަރުގެ ނިކާލަކީ ހދ ކުޅުދޫފުއްޓަށް ނިސްބަތްވާ ޒުވާނެކެވެ. ކަޅު ކުލައިގެ ސްވެޓާރް އަކާއި އެކު ކަޅު ކުލައިގެ ޖީންސްއެއް ލައިގެން ހުރި ނިކާލް ވަރަށް ސްމާޓް ކަމަށް ދައްކައެވެ. ކުޑަކުޑަ ދެލޮލެއް ލިބިފައިވީ އިރު، ތުންފަތް ކައިރީ އިން ކަޅު ތިލައިން ވަކިން ފުރިހަމަހެން ހީވެޔެވެ. ދެލޮލުގައި “ރޫޑް” ގޮތެއް ހުރި ނަމަވެސް ނިކާލްގެ މޫނުމަތީގައިވީ މައުސޫމްކަމެވެ.

ކްލިނިކުން ނިކުމެވުމުން ނިކާލް ދޫކޮށްލީ ފިނި ނޭވާއެކެވެ. މިހާރު ނިކާލް ކައުންސެލިންގ ނަގާތާ 3 މަސް ވެއްޖެއެވެ. ނަމަވެސް ޖުވެއިން ގާތުގައި ނިކާލް ދެއްކީކީ މުޅިން ތެދު ވާހަކަ ތަކެއް ނޫނެވެ. ޖުވެއިންއަށް އެނގިފައި ވާގޮތުންނަމަ ނިކާލަކީ ކެންސަރު ބަލީގެ ފަހު ސްޓޭޖް ތަހައްމަލް ކުރަމުން ދާ ފަރާތެކެވެ.

ނަމަވެސް ނިކާލްގެ ދިރިއުޅުން އެފުއްމިފުށަށް ޖަހާލީ “ނިއުމޯތޮރެކްސް” ނަމަކަށް ކިޔާ ބައްޔެކެވެ. އެއީ ޕްލިއުރަލް ސްޕޭސްއަށް ވައި ލީކުވެ، ފުއްޕާމޭ “ކުޑަ” ވުމަށް މެދުވެރިވާ ބައްޔެކެވެ. ފަރުވާ ކޮއްފި ނަމަ ރަނގަޅުވެވޭނެ ބައްޔެކެވެ. ނަމަވެސް ރަނގަޅު ވުމުގެ ޙިޔާލެއް ނިކާލް ނުގެންގުޅެޔެވެ. ދިރިއުޅުމުގެ މަގްސަދެއް އޭނާއަށް ނުފެންނާތީއެވެ.

ޖީބުގައި އޮތް އިންހޭލާރް ނަގާ ނިކާލް އެއަށް ދަމާލިއެވެ. އެއީ ހައްލެއް ނޫން ކަންވެސް ނިކާލަށް އެނގެޔެވެ. އެހެނަސް ނިކާލް ބޭނުން ކުރާ ހަމަ އެކަނި ބޭހަކީ އަދި ފަރުވާ އަކީވެސް އެއީއެވެ. ހިނދުކޮޅަކަށް ނަމަވެސް ނޭވާ ލުމަށް ލުއި ތަކެއް ވާތީއެވެ.

ފުންނޭވާއެއް ދޫކޮށްލާފައި ނިކާލް ހަމަ ޖެހިލިއެވެ. ޓެކްސީއަކަށް އަރައިގެން ދެން ނިކާލް ދިޔައީ ވެލާނާ އިންޓާރްނޭޝަނަލް އެއާޕޯޓާއި ދިމާލަށެވެ. ޓެކްސީއަށް ރުފިޔާ ދައްކާފައި ފޭބި އިރު ނިކާލްގެ އިންތިޒާރުގައި ނިކާލްގެ އެންމެ ގާތް އެކުވެރިޔާ ކަމުގައިވާ ރައިޒެލް ހުއްޓެވެ.

“ބުރޯ ތިޔަ ފިޔަވަޅުތައް އަވަސް ކޮއްބަލަ ހެޔޮނުވާނެ. މިހާރު ވެސް އޮޔޮއްގެން ޗެކިންވާ ގަޑި ނިމެނީ. ކޮންތާކު އުޅިފައި ތިއައީ؟” ރައިޒެލް ދަބަސްތައް ކިހިލަ ޖަހައިގެން ހުރެ ވާހަކަ ދެއްކިއެވެ.

“މިއައީ ކޮލެޖް މޭޓަކާއި ދިމާކޮއްލާފަ” ނިކާލް ބުނެލިއެވެ. ނިކާލްގެ ބަލި މަޑު ކަމަކީ މުޅި ދުނިޔެއަށް ވަންހަނާ ވެފައިވާ ކަމެކެވެ. “ހޫން. ދެން ހިނގާ އަވަހަށް”

ކަންދިމާ ކުރި ގޮތުން ރައިޒެލްއާއި ނިކާލް އިންނަން ޖެހުނީ ދުރުގައެވެ. ބޯޓުން ފައިބާފައި ދިމާ ކުރަން ބުނެފައި ނިކާލް ދިޔައީ އޭނާގެ ސީޓު ހޯދުމަށެވެ. ނިކާލް އިން ސީޓާއި ހަމައަށް ވާސިލް ވެވުނު އިރު އަންހެން ކުއްޖަކު އެގޮނޑީގައި އިނެވެ.

“އެކްސްކިޔުޒް ޔޫ؟” ނިކާލް އެއްބުމަ ހިތްލާލަމުން އަހާލިއެވެ. އެވަގުތު އެކުއްޖާ ނިކާލާއި ދިމާލަށް ބަލައިލިއެވެ. ކަޅު ކުލައިގެ ދޫއަބާޔާއަކާއި އެކު ކަޅު ކުލައިގެ ޙިމާރެއް އަޅާލެވިފައި އިން އެކުއްޖާގެ ދޮން މޫނު ވަރަށް ލޯތްބެވެ. ފިޔާތޮށި ކުލައިގެ ކުޑަ ތުންފަތަކާއި އެކު ގުދުރަތީ ގޮތުން ދިގު އެސްފިޔަ ތަކެއް ލިބިފައި ވެއެވެ. މޫނު މަތީގައި އެއްވެސް މޭކަޕެއް ނެތެވެ. އަތަށް އަންގި ލައްވާފައިވީ އިރު އިސްޓާކީނަށްވެސް ވަނީ އަރާފައެވެ. މިޒަމާނު ކުދިންނާއި މުޅިން ޙިލާފު ހެދުން އެޅުމެކެވެ.

އެއަށްވުރެ ބޮޑަށް ނިކާލް އަޅައިގަތީ އެކުއްޖާގެ ލޮލެވެ. “ހޭޒެލް” ކުލައިގެ އެ ދެލޮލެވެ. ނިކާލަށް އެކަހަލަ ލޮލެއްގެ ވެރިއަކާއި މިދިމާވީ އަލަށެވެ. ސިފައާއި އެއްވަރަށް އެކުއްޖާ ވެސް ތަފާތެވެ.

“ކިހިނެތް ވީ؟” އެކުއްޖާގެ ދެލޮލަށް ގެއްލިފައި ހުރި ނިކާލް ސިހުނީ އެޖާދޫވީ އަޑު އިވިފައެވެ. “ތިއީ އަހަރެންގެ ސީޓް” އަތުގައި އޮތް ސީޓު ނަންބަރު ދައްކާލަމުން ނިކާލް ބުނެލިއެވެ. “އަހަރެން މިތާ ބައިންދަދީބަ ޕްލީޒް. މަތިންދާ ބޯޓަށް އަރަން ވަރަށް ބިރުގަނޭ. އެހެންވެ ބޭރު ފެންނަތާނގަ އިންނަން ވެގެން” އެކުއްޖާ މައުސޫމް ގޮތަކަށް ބުނެލިއެވެ.

ނިކާލް ހީލިއެވެ. “ވަރަށް ކުރާ ހިތްވާ ކަމެއްދޯ ފިރިހެން ކުދިން ސެޑިއުސް ކުރުމަކީ؟ ހަހަ. މަށެއް ނުހެއްލޭނެ ތިއަކަށް. އަދި އިނދެގެން ޕަޕީ އައިޒް ޖައްސައޭ އެބަ. ލޯޑް ޕްލީޒް. ދެން އެހެން ނޫނަސް ބިރުގަންނަ މީހަކު ކީއްކުރަން ތަ ބޭރު ފެންނަ ސީޓުގަ އިންނަން ވީ؟ އޭރަށް ހައްތަހާ ބިރު ދޯ ގަންނާނީ؟” ނިކާލް ކަޅި އަނބުރާލިއެވެ.

އެކުއްޖާ ދަތްކުނޑި ވިކާލިއެވެ. އަދި އެކުއްޖާއަށް ހަމަ ޖެހިފައިވީ ގޮނޑިއާއި ދިމާލަށް ހިނގައިގަތެވެ. ނިކާލް ހީލީ ކަމެއް ކާމިޔާބު ވުމުން ހީލާ ބީދައިންނެވެ. ނިކާލް މަޑުމަޑުން ގޮނޑީގައި އިށީނެވެ.

(ނުނިމޭ)

ދެވަނަބައިގެ ތެރެއިން:

“އިނގޭ. އެކަމަކު އެއީ ހަމަ މަންމަ. އިހުތިރާމް ކުރަން ވާނުން؟ ފޮށިތަށް ގެއަށް ލާފަ މަންމައަށް ހަދިޔާ ކޮޅު ދީފަ ފައިބާނަން. މަޑު ކޮއްލައްޗޭ މިތާގަ. އަންނާނަން ވަރަށް އަވަހަށް” ރައިޒެލްގެ ސުވާލަށް ނިކާލް ޖަވާބު ދިނީ ގޭދޮރު މައްޗަށް އަރާފައެވެ. ރައިޒެލް ފުންނޭވާއެއް ދޫކޮށްލާފައި ބޯޖަހާލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.