ޒެވިއަން 7

“ހެއި. ބިޒީތަ ހަވީރުން؟ ދިމާކޮއްލަންވީނުން؟” އައިޒިންގެ މެސެޖުގައި އިނެވެ. “ޔާ، ޝުއާރް” އަލާޔާ އެޔަށް ރިޕްލައި ކޮއްލިއެވެ. ގަޑިއަކަށް 30 4 ބުނުމުން އަލާޔާ ގަޑި ބަލައިލިއެވެ. އޭރު ގަޑިން 45 2 ކެވެ. އެހެންކަމުން އަލާޔާ އަވަހަށް ހަރަކާތް ކޮއްލީ ތައްޔާރު ވުމަށެވެ.

ފެންވަރަން ވަދެ ތަފާތު އެއްޗެހި ތަކެއް މޫނުގައި އުނގުޅާހެދިއެވެ. އޭތި މީތި އުނގުޅާފައި ފެންވަރައިގެން ނިކުން އިރު އަލާޔާގައިން ދުވާވަހުން ހީވަނީ ހަމަ ފިނިފެން މަލެއް ހެންނެވެ. އަލަމާރި ކައިރީ ހުއްޓި ހުރެ ހުރިހާ ހެދުމެއް ނަގާ ބަލަމުން ދިޔައެވެ. އެންމެ ފަހުން އަލާޔާއަށް ކަމުދިޔައީ ހުދުކުލައިގެ ކަކުލާއި ހަމައަށް އަރާ “ބޮޑީކޮން” ހެދުމެވެ. އަލާޔާގެ ފަން ދިގު އިސްތަށިގަނޑު ވަޔާ ވިހުރެން ދޫކޮއްލާފައި ރަތް ކުލައިގެ ފިނިފެން މަލެއް އިން ފަށެއް ކަރުގައި އަޅާލިއެވެ. އަދި އެފަށައި ގުޅުވާލާފައި ބޮލުގައި ރަތް ފިނިފެންމާ ދައްޗެއް ޖަހާލިއެވެ.

މާބޮޑު މޭކަޕެއް ނުކުރި ނަމަވެސް، މޫނުމަތީގައި ލުއި “ކޮރެއަން” މޭކަޕެއް ކޮއްލިއެވެ. އެންމެ ފަހު ކަމަކަށް ގަޔަށް ސެންޓުކޮޅެއް ބުރުވާލާފައި އަލާޔާ ގަޑިބަލައިލިއެވެ. އޭރު 4 ޖަހަން ހުރީ 5 މިނިޓްއެވެ.

“ބޭރުގަ މިހުރީ” އެވަގުތު އައިޒިންގެ މެސެޖެއް އައެވެ. ފަހު ފަހަރަށް މޫނަށް ބަލާލާފައި އަލާޔާ ނުކުތެވެ. ބޭރުގައި ހުރި އައިޒިން ފެނިފައި އަލާޔާއަށް ހިނިތުންވެވުނެވެ. ރަތް ކުލައިގެ ގަމީހަކާއި އެކު ހުދު ކުލައިގެ ޖީންސްއެއް ލައިގެން ހުރި އިރު ކަރުގައި ރިހި ކުލައިގެ ފަށެއް އޮތެވެ. ރީތިގޮތަކަށް އިސްތަށިގަނޑު ސްޓައިލް ކޮއްލާފައިވީ އިރު ވަރަށްވެސް ރީއްޗެވެ.

ލަސް ހިނގުމެއްގައި ދެކުދިން ހިނގާފައި ދިޔައީ ގެއާއި މާދުރުނޫން ހިސާބުގައި ހުރި އަތިރިއަށެވެ. “ލާޔާ. ދެލޯ މަރާލަދީފާނަންތަ؟” އަތިރިއަށް ދެވުމާއި އެކު އައިޒިން އެއްސެވެ. އަލާޔާ ހިނިތުންވެލާފައި އައިޒިންއަށް އިތުބާރުކޮއް ދެލޯމަރާލިއެވެ. އަލާޔާގެ ދެލޮލުގައި އަތް އަޅައިގެން ހުރި އައިޒިން ތަންކޮޅަކަށް ދިޔައެވެ. “އަދި ލޯނުހުޅުވައްޗޭ އިނގޭ؟” އަލާޔާ ލޮލުން އަތް ނަގަމުން އައިޒިން ބުނެލިއެވެ. އަލާޔާ ބޯޖަހާލިއެވެ. “އޯކޭ ދެން ހުޅުވާ” އައިޒިން ބުނި އަޑުއިވުނެވެ. ލަސް ލަހުން އަލާޔާ ދެލޯ ހުޅުވާލިއެވެ. އެއާއި އެކު އޭނާގެ ދެލޯބޮޑުވެގެން ދިޔައީ ފެނިގެން ދިޔަ މަންޒަރުންނެވެ. އަލާޔާއަށް ހުރެވުނީ ހުދުކުލައިގެ ކާޕެޓެއްގެ މަތީގައެވެ. އެކާޕެޓް މަތީގައި ރަތްކުލައިގެ ފިނިފެންމާ ފިޔަތައް ހުއްޓެވެ. ދެފަރާތުގައިވެސް ރީތިގޮތަކަށް ފިނިފެންމާތަށް އެލުވާފައި ހުރި އިރު ކުރިއަށް ދެވެން އޮތް މަގުގައި ރަތްފިނިފެންމަލުންނާއި ހުދުކުލައިގެ ފެއާރީލައިޓްސް އިން ރީތިކޮއްލާފައިވީ އިރު “ނިއޯން ސައިން ލައިޓްސް” އިން “ވިލް ޔޫ ބީ މައި ގާލްފްރެންޑް” ޖަހާލާފައިވިއެވެ. އެސައިން ކުރިމަތީގައި އައިޒިން ހިނިތުންވެލައިގެން ހުރިއިރު އަތުގައި ފިނިފެންމާ ބޮނޑިއެއްވެސް އޮތެވެ. މަގުގެ ދެފަރާތުގައި ހެވިދިލިފައި ޒެވިއަންއާއި ޔަލާންވެސް ހުއްޓެވެ.

“ކިހިނެތްވެފަތަ ތިހުރީ އަވަހަށް ދޭބަލަ ޅިޔަނު ކައިރިއަށް” ޔަލާން ބުނެލިއެވެ. އެއާއި އެކު އަލާޔާ ލަދުން މޫނުގައި އަތް އަޅާލިއެވެ. އިނގިލިތަކާއި ކުޅެމުން އަލާޔާ ހިނގައިގަތެވެ. އެއާއި އެކު ދެފަރާތުގައި ތިބި ޒެވިއަންއާއި ޔަލާން އަތުގައި އިން ބާސްކެޓްއިން ފިނިފެންމާ ފިޔަތައް ބުރުވަންފެށިއެވެ.

ލަސް ހިނގުމުގައި ހިނގާލާފައި ގޮސް އަލާޔާ އައިޒިން ގާތުގައި ހުއްޓުނެވެ. އައިޒިން ވަރަށް ލޯބިން އަލާޔާގެ އަތުގައި ހިފާލިއެވެ.

“ލާޔާ، އަސްލު އަހަރެންނަކަށް ނޭނގެ ކޮންއިރަކު، ކިހިނެތް ކަމެއް ލާޔާ ދެކެ ލޯބިވެވުނީކީ. އިނގޭހާވެސް އެއްޗަކީ މިއަދު އަހަރެން ލާޔާދެކެ ލޯބިވާކަން. ދެން އައި ޑޯންޓް ނޯ އިނގޭ މާ ރޮމޭންޓިކް ވާކަށް ހެހެ. އެކަމަކުވެސް ބުނެލަންބޭނުން. ލާޔާދެކެ އަހަރެން ވަރަށް ލޯބިވޭ. ވަރަށް ބޮޑަށް ލޯބިވޭ. އިންޝާ ﷲ ދުވަހަކުވެސް ލާޔާއަކަށް ދެރައެއް ނުދޭނަން. އަހަރެންގެ ހަޔާތުގެ ބައިވެރިޔާއަށް ވެދީފާނަންތަ؟” އައިޒިން ބުންޏެވެ. އަލާޔާ ހިނިތުންވެލާފައި “ޔޭސް” އޭބުނެލިއެވެ.

ޒެވިއަން ހުރީ ހުރިހާ މަންޒަރެއް ރެކޯޑު ކުރަންށެވެ. ދެބޭބެގެ ހިތުގައިވެސް އަލާޔާއަށް ޓަކައިވީ އުފާވެރިކަމެވެ. “އޯއެމްޖީ ޅިޔަނޫ. ހާދަ ރޮމްއޭ ދޯ؟ މަ މާދަމާ އިރު އަރާއިރު ވިލްބީ ގޭ ކަންނޭނގެ” ތިރީ ތުންފަތުގައި ދަތް އަޅަމުން ޔަލާން ބުންޏެވެ. “ކަލޭ ކޮންއިރަކުތަ ސްޓްރެއިޓްއީ އަޅެ؟” ޒެވިއަން އަނގަކުނި ކޮއްލާފައި ބުންޏެވެ.

“ވެލްކަމް ޓު މައި ވިއާޑް ފެމިލީ” ޒެވިއަންއާއި ޔަލާންގެ ވާހަކަ އަހަން ހެވިފައި ހުރި އައިޒިން ގާތުގައި އަލާޔާ ބުނެލިއެވެ. އައިޒިން ހިނިތުންވެލިއެވެ. 4 މީހުން ސަކަރާތުގައި އުޅިފައި އެނބުރި ގެއަށް ދިޔައީ އިރުއޮއްސެން ގާއިތް ވުމުންނެވެ.

ސޯފާގައި އޮށޯވެލައިގެން އޮތް މާވީގެ ދެލޮލުގައި ކަރުނައިގެ މުތީތައް ބަބުޅަމުން ދިޔައެވެ. ޔަޝްއަލްއާއި އެކު ހޭދަ ކުރެވުނު 6 އަހަރު ދުވަހުގެ ފޮނި ހަނދާންތައް އޭނާ އައުކުރަމުން ދިޔައީ އެދުވަސްތައް ދެން އެނބުރި ނާންނާނެކަން އެނގިހުރެއެވެ.

“މާވީ” ޙިޔާލުތަކުން މާވީއަށް ނުކުމެވުނީ މާވީގެ މަންމަ މިންހާގެ އަޑަށެވެ. އަވަހަށް ކަރުނަ ފުހެލާފައި މާވީ ތެދުވެ އިށީނެވެ “ލައްބަ މަންމާ..” މާވީ ބިރުން ހުރެ ބުނެލިއެވެ. މިންހާ ގޮސް މާވީގެ ކަންކަށި މަތީގައި ހުރިބާރެއްލާފައި ޖެހިއެވެ. “ހުރި ލަދު ހަޔާތްކުޑަކަން. ބަފަޔަކާ ނުލާ ކަލޭ ބަލާ ބޮޑު ކުރީމަ މީތަ ކަލެއަށް ދޭން އެނގުނު ހަދިޔާއަކީ؟” މާވީގެ މޫނު މައްޗަށް ޓެސްޓު ކިޓު ޖަހަމުން މިންހާ ހަޅޭ ލަވައިގަތެވެ.

“ބުނޭ! އެއީ ކާކު ދަރިއެއް؟ އެއިން؟ ބުނާށޭ ކާކު ދަރިއެއްހޭ އެއީ؟” މިންހާގެ އަޑު ދިޔައީ ހިނދަކަށްވުރެ ހިނދެއް ބާރުވަމުންނެވެ. “އެ ޔަޝްއަލްގެ ދޯ؟” މާވީ އިސްޖަހައިގެން އިނުމުން މިންހާ އަހާލިއެވެ. މާވީ ބިރުން އިނދެ ބޯޖަހާލިއެވެ. އެއާއި އެކު އަނެއްކާވެސް މިންހާގެ އަތުގެ ހޫނު ހަމަލާއެއް މާވީއަށް ލިބުނެވެ. “މަ އޭރުވެސް ބުނިންދޯ ތި ޔަޝްއަލް ތިއީ އެކުގައި އުޅޭ ވަރުގެ މީހެއް ނޫނޭ؟ ތާހިރު ވެއްޖެއެއްނުން؟ ރަނގަޅަށްވާއިރު އެކަން އެނގިގެން އެސޮރު ކަލޭ ދޫކޮށްލާނީތި. އެހެންވެ މިއަދު ހަތަރު ދަމު އޮވެގެން ރޮނީތި. އެހެންނުން؟” މިންހާ އެއްސެވެ.

“ސޮރީ..” ކުރެވުނު ފާފައާއި މެދު މާވީ ހިތާމަ ކުރާކަން އޭނާގެ ރާގުންވެސް ދިޔައީ އެނގެމުންނެވެ. ނަމަވެސް މާވީގެ އެވާހަކަތަށް އަހާވަރަށް ވުރެ މިންހާ ހުރީ ރުޅި އަހިސްފައެވެ.

“ނިކުމޭ މިގެއިން. ނިކުންނާށޭ! ތިކަހަލަ ހަޔާތްކުޑަ ދަރިއެއް އަހަރެން ބޭނުމެއްނޫން” މާވީގެ އަތުގައި ހިފާ ނެރެމުން މިންހާ ބުންޏެވެ. “ނޫން މަންމާ ހެޔޮނުވާނެ. އަހަރެން އެކަނިވެރި ނުކޮއްލާ ޕްލީޒް” މާވީގެ އާދޭސްތަށް އަޑު އެހުމެއްނެތި މިންހާ މާވީ ގެއިން ނެރެ ހޫރާލިއެވެ. “ކަލޭ ދެން މިގެއަށް ވަދެގެން ނުވާނެ. މިއަދުން ފެށިގެން އަހަރެންގެ ދަރިއަކު ނުހުންނާނެ” މިންހާ އެހެން ބުނެ ދޮރާށި ލައްޕާ ތަޅުލިއެވެ.

މާވީއަށް އޭނާގެ ބަނޑުގައި ފިރުމާލެވުނެވެ. އޭނާ މިކުއްޖާ ދެން ބަލާނީ ކިހިނެތް ހެއްޔެވެ؟ މާވީއަށް ރޮވުނީ ހިތަށް ތަދުވީ ވަރުންނެވެ. ތެދެކެވެ. މާވީ ކުރީކީ ކޮއްގެން ވާނެ ކަމެއް ނޫނެވެ. އެކަމާ މިއަދު މާވީ ރޮއެ ހިތާމަ ކުރެއެވެ. ނަމަވެސް މިއީ މަންމަގެ ލޯއިތްބާއި އަޅާލުން މާވީއަށް އެންމެ ބޭނުންވާނޭ ދުވަސްކޮޅެއް ނޫންހެއްޔެވެ؟

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.