އިންސާފު ލިބޭނެބާ – 37

“މަރިޔަމް ދާލިޔާ ދާއިން އަހަރެންނަށް ދާލިޔާ ފެނުނީ އަހަރެންގެ އެންމެ ގާތް އެކުވެރިޔާގެ ގެއަށް ގޮސް އެޅެނިކޮށް.. އަހަރެންނަށް ފުރަތަމަ ދާޔާއާ މެދު ކަންތައް ކުރެވުނީ ރަނގަޅަކަށްނޫން.. ތިއީ އަހަރެންގެ ހިތަށް އެންމެ ފުރަތަމަ ތަފާތު އިހްސާސެއް ދަސްކޮށްދިން ކުއްޖަކީ.. އަހަރެންގެ ހިތުގެ ތެޅުން އަވަސްކޮށް އަދި އަހަރެންގެ ހިތަށް ފަރުވާކޮށްދިނީވެސް ހަމަ ތި ލޯބި ކުއްޖާ.. އެކަމާ އަހަރެން އެންމެ ފުރަތަމަ ވަރަށް ހާސްވި.. އަހަރެން ހީކުރީ ދާޔާވެގެން ދާނީ އަހަރެންގެ ވީކްނެސްއަށް ކަމަށް.. އެކަމަކު ނޫން.. ދާޔާ ތީ ވަރަށް ސްޓްރޯންގް ކުއްޖެއް.. އަހަރެންނަށްވެސް ސްޓްރޯންގްވާން ދަސްކޮށްދިނީ ހަމަ ތި ދާޔާ.. ތިއީ އަހަރެންގެ އެކަނިވެރި ހަޔާތައް އެޅުނު އަލިކޮޅެއް.. ތިއީ އަހަރެންގެ ހިތުގެ ފަރުވާއަކީ.. އަބަދުވެސް އަހަރެންގެ ހިތަށް ފަރުވާ ކޮށްދޭން ހުންނާނަންތަ؟ އަހަރެންގެ ހަޔާތަށް އަބަދަށް އައިސްދޭނަންތަ؟ އަހަރެންނަށް ތި ލޯބި ކުއްޖާގެ ހިތް ލޯބިން ފުރައިދޭން އަހަރެންގެ އަތުގައި ހިފާންނަތަ؟ އަހަރެންނާ ކައިވެނި ކުރާނަންތަ؟” ދާލިޔާގެ ދެލޮލަށް ނަޒަރު ހުއްޓައިލައިގެން ހުރެ އުކައިލް އަހައިލިއެވެ. ދާލިޔާގެ ދެލޮލަށް ޖަމާވަމުން ދިޔަ ކަރުނަތައް އުކައިލްއަށް ފެންނަމުން ދިޔައެވެ. އުކައިލް ހުރީ ދާލިޔާއަށް އޭނަގެ އަތް ދިއްކޮށްލައިގެންނެވެ.

***37 ވަނަ ޕާޓް***

އުކައިލްގެ ވާހަކަކޮޅު އިވި ދާލިޔާގެ ދެލޯ ފެންކަޅިވިއެވެ. އޭނައަށް ހުރެވުނީ އަނގަމަތީގައި އަތް އަޅައިގެންނެވެ. މަޑުމަޑުން ނޭފަތް ދަމާލަމުން އުކައިލްގެ އަތުގެ ތެރެއަށް ދާލިޔާގެ ކަފަކޮޅެއްހައި މަޑު އަތްތިލަލިއެވެ. އަދި މަޑުމަޑުން ބޯޖަހައިލިއެވެ. “އަޑެއް ނީވޭ.. ލިޔާގެ އަޑު ކޮބާތަ؟” ދާރިއަން ހިނިއައިސްފައި ހުރެ ކޮއްކޮއާ ދިމާކޮށްލިއެވެ. “ޔެސް” ހިންޏަކަށް އަޑުއިވޭހާ މަޑުން ދާލިޔާ ބުންޏެވެ. އެއާއެކު ދާލިޔާގެ މަޑު ހަށިގަނޑު ގެނެސް އުކައިލް އޭނަގެ އަތުގެ ތެރެއަށްލައި ފޮރުވައިލިއެވެ. ހެމުން ރޮމުން ކަހަލަ ގޮތަކަށް އުކައިލްގެ މޭގައި ދާލިޔާ އޭނަގެ އަތުން ތަޅައިގަތެވެ. “ދެން އެހެން ދުވަހަކުވެސް ނަހަދާތި.. އަހަރެން ހާދަ ބިރެއް ގަތޭ..” ދާލިޔާ ނޭފަތް ދަމައިލަމުން ބުންޏެވެ. ދާލިޔާގެ ކަރުނުން ފުރިފައިވި ދެލޯ އޭނަގެ އަތުން ފޮހެލަމުން އުކައިލް ލުއިގޮތަކަށް ހީލިއެވެ. އަދި ދާލިޔާގެ ނިތުގައި ބޮސްދިނެވެ. “ނޯ ޕްރޮމިސެސް ހެހެހެ.. އައި ލަވް ޔޫ ބޭބީ..” ދާލިޔާއާ ދުރުވެލުމުގެ ކުރިން ވައި އަޑުން އުކައިލް ބުނެލިއެވެ.

ދާލިޔާގެ ކޯތާފަތަށް ފިނިފެންމާ ކުލައަރައިގެން ދިޔައެވެ. އެންމެން ދިމާކުރާ އަޑު އިވެން ފެށުމުން ދާލިޔާ ރަކިވެފައި ހުރެ އުކައިލްއާ ދުރުވެލިއެވެ. ގާތް ތިމާގެ މީހުންނަށްށާއި އެކުވެރިންނަށް ކެއުމެއް ދިނުމަށްފަހު އިރުއޮއްސެންވާއިރަށް އެ އެންމެން ފޮނުވައިލިއެވެ. އުކައިލްއާއި ދާލިޔާގެ އާއިލާ މީހުން ކައިވެނީގެ މަޝްވަރާކުރަން ތިބި އިރު މާވިން އާއި ހޫރީންގެ އިތުރުން ދާރިއަން އާއި މިޔާވެސް ހުރީ އަޑުއަހަންނެވެ. “ދަރިފުޅު ބޭނުން ވަނީ ކޮންކަހަލަ ތީމްއަކަށް ޕާޓީ ބާއްވަން؟” އުކައިލްގެ ބޮޑުދައިތަ ކަމަށްވާ މާރިޔާ އަހައިލިއެވެ. “ދާޔާ ބޭނުންވާ ހުރިހާ ގޮތަކަށް އަޅުގަނޑު އެއްބަސް..” އުކައިލް ދީވާނަވެފައި ހުރި މީހެއް ފަދައިން ދާލިޔާއާ ދިމާލަށް ބަލައިލަމުން ބުންޏެވެ. ދާލިޔާގެ މޫނަށް ރަތް ކުލަ ފާއްދައިލިއެވެ. “ނޫނޭ އެގޮތް ރަނގަޅެއް ނުވާނެއެއްނުން.. ލެލްވެސް ބޭނުންވާ ގޮތަށް ކަންކަން ކުރާނީ..” ދާލިޔާ ރަކިވެ ހުރެ ބުންޏެވެ.

“ފުރަތަމަ ދަރިފުޅުމެން ކައިވެނި ކުރަން އުޅޭއިރު ރަންކިޔަން ޑޭޓެއް ކަނޑައަޅަންވީނުން؟” ޒީވާ ދެކުދިންނަށް ބަލައިލަމުން ބުންޏެވެ. އުކައިލްއާ ދިމާލަށް ދާލިޔާ ބަލައިލީ އުކައިލް ތާރީހެއް ކަނޑައަޅާށޭ ބުނާފަދައިންނެވެ. “މްމްމް.. ކިހިނެތް ވާނީ ރަން ކިޔަން މި އަންނަ ހުކުރުގަ؟ ދާޔާ ދެން ކައިވެނީގެ ޑޭޓެއް ކަނޑައަޅާ..” އުކައިލް އޭނަގެ ހިޔާލު ފާލުކޮށްލަމުން ބުންޏެވެ. ދާލިޔާ ބޯޖަހައިލަމުން ވިސްނާލިއެވެ. “އެ ވީކްގައެއް ނުކުރެވޭނެއެއްނުން.. އަހަރެމެންގެ ކޮންމެސް ސެރަމަނީއެއްވެސް ސްޓޭޝަންގަ އޮންނާނީ މި އަންނަ ވީކްގެ ބުރާސްފަތި ދުވަހު.. ހަމަޖެހިގެން ކުރަންޏާ އޭގެ އަނެއް ވީކް ހުކުރަށް ހަދަމާ؟” ދާލިޔާ އޭނަގެ ހިޔާލު ފާޅުކޮށްލިއެވެ. އެންމެންވެސް އެކަމާ ގަބޫލުވުމުގެ ގޮތުން ބޯޖަހައިލިއެވެ.

ކައިވެނީގެ ވާހަކައިގައި އެހެން މީހުން ތިއްބައި މާވިން އެތަނުން ދުރަށް ދާން ހިނގައިގަތެވެ. އެއާއެކު ހޫރީންވެސް މާވިންގެ ފަހަތުން ދާން ހިނގައިގަތެވެ. މާވިން ހިނގަމުން ހިނގަމުން ގޮސް ހުއްޓުނީ މޫދު ކައިރީގައެވެ. އޭނަ ފައިވާންބާލަމުން ގޮނޑުދޮށުގެ ހިމުން ވެލިގަނޑުގައި އިށީނެވެ. ހޫރީންވެސް އެތާ މާވިންގެ ކައިރިގައި އިށީންދުނެވެ. ހޫރީން މޫނު އުފުލައިލާ އުޑުމައްޗަށް ނަޒަރު ހިންގައިލިއެވެ.

ރޭގަނޑުގެ ރާނީ ކަމަށްވާ ހަނދު އުޑުމަތީގައި ނެތް ކަމަކު އުޑުމަތި ވަނީ ހަނދުގެ ކުދި ކުދި ބައިވެރިން ކަމުގައިވާ ކުދި ކުދި ޖަވާހިރުތަކެއް ފަދަ ތަރިތަކުން އުޑުމަތި ފުރައިލާފައެވެ. ތަރިތައް އުޑުގައި ފިޔަޖަހާ މަންޒަރު އެއީ ބަލަބަލާ ފޫހި ނުވާ ފަދަ މަންޒަރެކެވެ. އެންމެ ވިލާ ރޮއްޖެއްވެސް ނެތް އުޑުމަތި އޮތީ އެއްކޮށް ކަޅުކުލައިގައެވެ. އެކި ދިމާތަކުގައި ހަރަކާތް ކުރަމުން ދިޔަ އަލި ގަދަ ކުދިކުދި ތަރިތަކުގެ ސަބަބުން އުޑުމަތި ވަނީ ފަޑު އައްޔަކުން ދިއްލާލާފައެވެ. ހޫރީން އުޑު މައްޗަށް ބަލަން ހުރިއިރު މާވިން ހުރީ އެސްފިޔަ ޖަހައިނުލާ ހޫރީންގެ މޫނަށް ބަލާށެވެ.

އޭނައަށް ހޫރީންގެ ކޮންމެ ސިފައެއްދެކެ ވަނީ ވޭތުވެ ދިޔަ ދުވަސްތަކުގެ ތެރޭގައި ލޯބިވެވިފައެވެ. އޭނަ އެންމެ ފުރަތަމަ ހޫރީންއާ ދިމާވި ދުވަސްކޮޅު ހޫރީން ދެކެވީ ފޫހި ހަނދާންވިއެވެ. އަދި ހަމައެފަދައިން ހޫރީންގެ ހުނަރުގެ ބޭނުމުގައި ހޫރީންއާ ގާތްވި މަތިން ހަނދާންވިއެވެ. އެހެންނަމަވެސް މި އަންހެންކުއްޖާވަނީ އޭނައަށް ކޮންމެސް ސިހުރެއް ޖައްސާފައެވެ. އޭނައަށް ވަމުން ދިޔައީ ކިހިނެތްކަން ނޭނގޭއިރު މި އަންހެންކުއްޖާވަނީ އޭނަ އެކުއްޖާގެ ދަލުގައި ހައްޔަރުކޮށް ދުވަހަކުވެސް ދުރުނުވެވޭ ވަރަށް މޮޔަކޮށްލާފައެވެ. މާވިންގެ ހަނދާނަށް އައީ މިޔާ ހޯދަން މަސައްކަތް ކުރި ދުވަސްކޮޅުގެ މަތިންނެވެ. ދެން މިޔާ ފެނުމުން ހޫރީން މިޔާއާ މެދު ހޫރީންގެ ހަރަކާތްތައް ބެހެއްޓި ގޮތް ފެނި އޭނަގެ ހިތުގައި ހޫރީންގެ ނަން ފެވިގެން ދިޔައެވެ.

“މާވީއަށް އެނގޭތަ އަހަރެންނަށް ކުރިންވެސް އެނގޭ މާވީ އަހަރެން ކައިރިއަށް އައީ އަހަރެންގެ ބޭނުމެއް ޖެހުނީމަކަން.. އަހަރެން މާވީދެކެ ލައިކްވޭ މާވީ އެޖެންސީއިން ފެނުން ދުވަހުން ފަށައިގެން..” ހޫރީން އުޑަށް ބަލަން ހުރެ ބުނެލިއެވެ. މާވިންގެ ހިތުގެ ތެޅުން ބާރުވެގެން ދިޔައެވެ. މާވިން އިސްޖަހައިލީ އޭނައަށް ކަންތައް ކުރެވުނީ ގޯސްކޮށްކަން އެނގޭތީއެވެ. “އައިމް ސޮރީ..” މަޑުމަޑުން މާވިން ބުންޏެވެ. ހޫރީން ހީލިއެވެ. “ޑޯންޓް ބީ.. އެހެން އެ ވީ މާވީ އަހަރެންނަށް ލިބެން ހުރީ އެހެން ކަންތައްވެގެން ކަމަށްވާތީ ކަމުގައި އަހަރެން ގަބޫލު ކުރަނީ.. އަހަރެންނަށް ދެން އޭރު އުޅެވުނީ މޮޔައެއްހެން ވިއްޔާ..” ބޯކަހައިލަމުން ހޫރީން ބުންޏެވެ. “ކީއްކުރާނީ އަހަރެންގެ ބަސްނާހާ ހިތަށްވެސް ލޯބިވާން އެނގުނީ ތި މޮަޔަ ކުއްޖާދެކެ ވިއްޔާ… އަހަރެންނަށް ޔަގީން އަހަރުމެން ދެމީހުންނަށް ލިބޭ އަންހެން ދަރިފުޅުވެސް ތިހާ އަނގަގަދަ ވާނެކަން.. އެ ކުއްޖާ ހޯދާ ފިރެހެން ސޮރަކަށް މަ ދުޢާކޮށްދޭނަން..” މާވިން ހެމުން ބުންޏެވެ.

ހޫރީން ލަދުން ހުރެ މާވިންގެ ގައިގައި ޖަހައިލިއެވެ. “އައްދޭ ހޫރު ޕަރީއަށް ލަދުގަންނަންވެސް އެނގޭތަ؟” ލާނެތް ގޮތަކަށް މާވިން އަހައިލިއެވެ. “ދެން އަހަރެންވިއްޔާ ލަދު ގަނެގެންވެސް ނުވަނީތަ؟ އެހެން ނޫނަސް ދަރިއަކު ހޯދޭނީ ކައިވެނިކޮށްގެންނުން.. މި އޮތީ އަހަރެންގެ އަތް.. ލިޔާގެ އިންކަހަލަ އަނގޮއްޓިއެއްވެސް ނެތް ވިއްޔާ..” ހޫރީން ކޯ ފުއްޕައިލަމުން އޭނަގެ އަތުގެ ކަށި އިނގިލި ދައްކައިލަމުން ބުންޏެވެ. މާވިންގެ ގާތަށް އައީ ނުލަފާ ހިންޏެކެވެ. “އެހާ އަވަހަށް ޝަކުވާ ކުރަން ފެށީ އެ އޮތް.. އޭރުވެސް މި މަންޖެ މަގޭ ފަހަތުން މިތަނަށް އައީ މިހެންވެ ކަން އެނގެޔޭ.. ދެން ހޫރު ޕަރީ ތިހާ ބޭނުމިއްޔާ އިނގިލީގަ އެއްޗެއް އަޅުވަފާނަމޭ..” ލާނެތް ގޮތަކަށް ހެވިފައި އިނދެ މާވިން އެއްކަކޫ މައްޗަށް ތިރިވެލިއެވެ. އެއާއެކު ހޫރީން ދެލޯ ބޮޑުވެފައި ހުރެ ތެދުވެލިއެވެ. “ލޯމަރައިލަބަ ދޫނީ” މާވިން އެއްމިޔަކަނުން ހީލަމުން ބުންޏެވެ. ހޫރީން ވަގުތުން ލޯމަރައިލިއެވެ. މާވިން އޭނަގެ ސައިކަލުގެ ތަޅުދަނޑިއަށް ލާފައިން ބޮޅު ނަގައި ހޫރީންގެ ކަށި އިނގިލީގައި އަޅުވައިލިއެވެ. “އަހަރެންނާ ކައިވެނި ކުރާނަންތަ؟ އަހަރެންގެ ލޯބި ލޯބި ހޫރު ޕަރީ؟” މާވިން ހީލަމުން އަހައިލިއެވެ. އޭރުވެސް އޭނަގެ މޫނުމަތީގައި ކުޅެލާފައި ވަނީ ލާނެތް ހިނިތުންވުމެކެވެ.

ހޫރީން އާއެކޭ ބުނުމަށް ލޯހުޅުވައިލި ވަގުތު އޭނަގެ ކަށި އިނގިލީގައިއިން ބޮޅު ފެނި އޭނަގެ މޫނު ރަތްވެގެން ދިޔައެވެ. ހޫރީންއަށްވީ ގޮތުން މާވިންގެ ހިނިގަނޑު ފަޅައިގެން ދިޔައެވެ. “ވަރަށް ފޫހިވޭ.. ނޫޅެން މާވިންގަނޑާ މެރީ ކުރާކަށް..” ރުޅި އައިސްފައި ހުރެ ހޫރީން ދާން ހިނގައިގަތެވެ. އޭނައަށް ހުރީ އައި ރުޅިން ރޮވޭ ގޮތްވާން ކައިރިވެފައެވެ. މާވިންގެ ހިތަށް ހޫރީންގެ ކަރުނުން ކޮންމެސް ވަރަކަށް އަސަރު ކުރިއެވެ. މާވިން އަވަސް އަވަހަށް ހޫރީން ފަހަތުން ގޮސް އޭނަގެ އަތުގައި ހިފެއްޓިއެވެ. މާވިންގެ އަތް ހޫރީންގެ އަތުން ނައްޓާލުމަށްޓަކައި ހޫރީން އޭނަގެ އަތް ފޮޅުވައިލިއެވެ. އެހެންވެސް ނުނެއްޓުމުން ކޮންމެސް ގޮތެއް ހަދާ އޭނަގެ ހަށިގަނޑު ބޭނުންކޮށްގެން މާވިންގެ ހަށިގަނޑުގައި ލޮކްއެއް އެޅުވިއެވެ. އެއާއެކު ދެމީހުންވެސް ވެލިގަނޑު މައްޗަށް ވެއްޓުނެވެ. “ވަޓް ދަ-” މާވިން ބުނަން އުޅުނު ޖުމުލަ ކަނޑައިލުމަށްފަހު ހޫރީން ވަހަކަ ދައްކަން ފެށިއެވެ.

“ތިކަހަލަ ބޮލެއް ނެތް މީހުންނަށް ޕްރޮޕޯސްވެސް ކުރަން ޖެހޭނި އަހަރެމެން އަނހެންވެރިން ކަންނޭނގެ.. އެހެނެއްނުން ވާނީ އަހަރެން އެއޮތް ވަރަށް ހިންޓު ދިންއިރުވެސް މާވިންއަކަށް ނޭނގެ ސްޕެޝަލް ގޮތެއްގައި އަހަރެންނަށް ޕްރޮޕޯސް ކުރާކަށް.. މި ދެކަންފަތުން ރަނގަޅަށް އަޑުއަހާ!! މާވިންއަށް ނުކުރެވުނު ކަންތައް އަހަރެން މި އުޅެނީ ކުރަން..” މާވިންގެ ކަންފަތާ އަނގަ ކައިރިކޮށްގެން ހުރެ ހޫރީން ވާހަކަ ދެއްކިއެވެ. މާވިންގެ ދެލޯ ހުރީ ބޮޑުވެފައެވެ. އޭނައަށް މިހާރުވެސް ހޫރިންގެ އަތު ތެރެއިން ނިކުމެވުނީހެވެ. އެހެންނަމަވެސް ހޫރީން ވާހަކަ ދައްކަން ފެށުމުން ހޫރީންގެ އަޑު އަހަން އޭނަ މަޑުމަޑުން އޮތީއެވެ.

“އަހަރެން މާވިންދެކެ ލޯބިވޭ! ވަރަށް ވަރަށް ބޮޑަށް ލޯބިވޭ.. އަހަރެންނަކަށް ނޭނގެ އަހަރެންގެ މޮޔަ ހިތް ތިކަހަލަ ގަމާރު މީހެއްގެ ދެކެ ލޯބިވާން ޖޭހުނު ސަބަބެއް.. އަހަރެން މާވިންދެކެ ލޯބިވީ އަހަރެންނަށް މާވިން އެޖެންސީއިން ފެނުނު ފުރަތަމަ ދުވަހު.. އަހަރެންނަށް އެނގުން ތީ އަހަރެން ބޭނުންވާ ކަހަލަ ފިރެހެނެއްކަން އެޖެންސީގައި ހުރި ހުރިހާ އަންހެންކުދިންނަށް މާވިން އިގްނޯރ ކުރާތީ.. ފުރަތަމަ އަހަރެން ހީކުރި ރީތި ސިފައެއް ލިބުނީމަ ފޮނިބޮޑުވެގެން އުޅެނިއްޔޭ.. ދެން އަހަރެންނަށް އެނގުނީ މާވިން މިއޮތް ހުރިހާ ދުވަހު މަސައްކަތް ކުރީ މާވިންގެ ކޮއްކޮ ހޯދަންކަން.. އެހާ އާއިލާއަށް އިސްކަންދޭ މީހަކަށް މާވިންވުމުން އަހަރެންގެ ހިތުގައި މާވިންއަށްޓަކައިވި ލޯބި ފުންވެފައި ވަރުގަދަވި.. ދެން މާވިން އަންހެންކުދިންނަށް އިގްނޯރ ކުރާ ތަންކޮޅު.. މިޒަމާނު ކޮންމެ ފިރެހެނެއްގެ ސޯޝަލް މީޑިއާ ބަލައިލިޔަސް ހީވާނީ އަންހެނުން ސަފު ހަދާފައި ހުންނަހެން… އެކަމަކު މާވިން އެހެނެއްނޫން.. އެހެންވެ އަހަރެންނަށް އެނގުނު ތި ގަމާރު ރީތި އަދި އޯގާތެރި ފިރެހެނާއަކީ އަހަރެންގެ ފިރިމީހާއަށް ހަދަން ބޭނުންވާ ހުރިހާ ސިފައަކާއި އުޅުންހުރި އެންމެ އެކަށީގެންވާ މީހާކަން…. އަޑު އިވިއްޖެތަ؟؟” މާވިންގެ ކަންފަތުގައި ހިފައިލަމުން އެންމެ ފަހު ޖުމުލަ ހޫރީން ބުނެލިއެވެ.

( ނުނިމޭ )

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.