ނޭވާ ލާ ހިނދު ހީވޭ ގާތުގާ ވާހެން 31

“ކިހިނެތް ވީ..” ލިއާނާއަށް ވެފައި ހުރިގޮތުން ޒެވިއަލްއަށް ފުންމައިގެން ސޯފާއިން ތެދުވެވުނެވެ. ލިއާނާއަށް އެއްޗެއް ބުނެވުމުގެ ކުރިން ޒެވިއަލްގެ ފޯނު ވައިބްރޭޓް ވާން ފެށި އަޑު އިވިގެން ބަލައިލި އިރު ގުޅަނީ އަރްކާންއެވެ. ފޯނު ނެގި ހިނދު އަރްކާން ދިން ޖަވާބަކުން ހީވީ ފައިދަށުން ހީވީ ބިންގަނޑު ގަބައިގެން ދިޔަހެންނެވެ.
“ވަޓް..މަރުވީ އޭ.. ކާކު”އަރްކާންގެ ޖަވާބު އަޙާފައި ޒެވިއަލްއަށް ފޯނު ތިރިކޮށްލެވުނެވެ. ސަލާމަތުން އޮތް އަތުން އިސްތަށިގަނޑުގެ ތެރެއަށް މަހާލާ ބާރުކޮށްލެވުނެވެ.
***
ފޯނު ބާއްވާފައި ދެމީހުން އަވަސްވެގަތީ އަޒީޒްމެންގެ ގެޔަށް ދެވޭތޯއެވެ. ގެއިން ނުކުމެގެން ކާރަށް އަރައިގެން އެގެޔަށް ދެވުނު އިރު ގޭޓު ކައިރީގައި އަރްކާން ފޯނު ކަންފަތުގައި ޖަހައިގެން ހުއްޓެވެ. ދުރުގައި ކާރު ބޭއްވުމަށްފަހު ދުވެލާފައި ޒެވިއަލް ދިޔައީ އަރްކާން އާއި ދިމާލަށެވެ.
“ކިހިނެތް ތަ ވީ އާންޓް އަށް” މާނޭވާ ލެވެމުން ދިޔަ ހާލު ޒެވިއަލްއަށް އަހާލެވުނެވެ. އޭރު ފަހަތުން ލިއާނާ ވެސް އާދެއެވެ.
“އޮސްޓްރޭލިއާގަ އާންޓް އާއި އަންކަލް ތިބޭ ގެޔަށް ބަޔަކު ވަނީ.. އަންކަލްގެ ފުރާނަ ނެތް ހޮސްޕިޓަލްއަށް ގެންދިޔަ އިރު ވެސް.. އާންޓްގެ ދެތިން ތަނަށް ހަމަލާ ދީފަ ހުއްޓޭ ބުނީ.. މޫނުމަތީގައި މާސްކުއަޅައިގެން ސިފަ ފޮރުވައިގެން ތިބި ބައެކޭ ބުނީ..ދެން އެއަށްވުރެން އިތުރަކަށް ވާހަކަ އެއް ނުދެއްކުނު.. ވަރަށް ބޮޑަށް ސަކަރާތް ވެފަ އާންޓް ހުރީ.. މަންމަ ވެސް ރޮނީ.. އަހަރެމެން އެންމެނަށް ވުރެން އަލާ އެންމެ ސަކަރާތް ވާނީ..އަނެއްހެން ބުނާނަމަ އެންމެ ކުޑައިރުން ފެށިގެން އަލާ ބަލާ ބޮޑުކުރަމުން ދިޔައީ އެމީހުން.. ބައްޕަގެ ރިޒޯޓް އޯޕެނިންގް އަށާއި އަލާގެ ވެޑިންގ ގެ ވާހަކަ ދެކެވި އޮތީމަ އަންނަން ވެގެން ދެމީހުން ވެސް ރެޑީ ވަމުން ދަނިކޮން މިކަމެއް މިވީ” އަރްކާން ކިޔައިދެމުން ދިޔައިރު އޭނާގެ މޫނުމަތީގައި ވެސް މޮޅިވެރިކަމެވެ. އޭނާގެ ދެލޮލުން ވެސް ކަރުނައިގެ އަސަރް ހިސާބަކަށް ފެނެއެވެ.
“އަނެއްކާ..އަނެއްކާ އަހަރެން ހެކް ކުރިކަން އެނގިގެން އަލާއަށް ބްލެކްމެއިލް ކުރަމުން ދިޔަ މީހުން ކުރިކަމެއްބާ.. “ޒެވިއަލްގެ ހިތައް އަރައިގެން ދިޔަ އެއްޗަކުން މެޔަށް ތޫނު ތަދެއް އިޙްސާސްވިއެވެ. ނޫނެކެވެ. އެހެނެއް ނުވާނެއެވެ. ޝަވަން މެން ތިބީ ރާއްޖޭގައެވެ. އޮސްޓްރޭލިއާ އާއި ހިސާބަށް އެހަބަރު ދާން ވެސް ވަގުތު ނަގާނެ ނޫން ހެއްޔެވެ.
“އެކޮޅަށް ދާން ޓިކެޓް ލިބިއްޖެތަ” ޒެވިއަލް އަހައިލިއެވެ. އަރްކާން އާއެކޭ ބުނެ ބޯޖަހާލިއެވެ. ގޭތެރެއިން ނުކުމަތް ނަވާޒް، އަރްކާންއަށް ގޮވާލުމުން އޭނާ ގެއަށް ވަންނަން ހިނގައިގަތެވެ. އަރްކާންގެ ފަހަތުން ޒެވިއަލްއައި ލިއާނާ ވެސް އެތެރެއަށް ވަންނަން ހިނގައިގަތެވެ.
އެމީހުންނަށް ގެއަށް ވަދެވުނު އިރު އަޒީޒްގެ މަންމަ ހަފީޒާއާއި އަންހެން ކޮއްކޮ އަމީނާ ވެސް ތިއްބެވެ. ދިނާޔާގެ ގައިގާ ބައްދާލައިގެން އިނދެ އަލާރާ ރޮމުން ދިޔަ ގޮތް ފެނި ޒެވިއަލްގެ ހިތައް ތޫނު އެއްޗަކުން ހަރަމުން ދިޔަކަހަލަ އިޙްސާސް އެއް ކުރެވެމުންދިޔައެވެ. އަލާރާގެ ގައިގާ ބައްދާލައިގެން ހުރެ އެދެލޮލުން ފައިބަމުންދިޔަ ކަރުނުތައް އަމިއްލަ ދެއަތުން ފުހެލަދޭން ހިތް އެދެމުން ދިޔައީ އިންތިހާއަށެވެ.
“ދަރިފުޅާ ޝާތިރް ކޮއްކޮގެ ހަށިގަނޑު ރާއްޖެ ގެންނަން މަންމައަށް ފެންނަނީ.. ދިނާ އާއި ހައުލާގެ އާއިލާ ވެސް ރާއްޖޭގަ ތިބީ..”ދެލޮލުން ފައިބަމުން ދިޔަ ކަރުނުތައް ފުހެލަމުން ހަފީޒާ ބުނެލިއެވެ. އޭނާގެ އެންމެ ހަގު ދަރިފުޅު އެހާ އަނިޔާވެރި މަރަކުން މި ފަނާވަނިވި ދުނިޔެއާއި ވަކިވުމުން އެހިތައް ވަނީ އިންތިހާއަށް އަސަރުކޮށްފައެވެ.
“މަންމަ އެބުނީ ތެދެއް.. ފްލައިޓެއް ޗާޓަރ ކޮށްގެން މިކޮޅުން އެކޮޅަށް ދާން ވެއްޖެޔާ އެބަ ނަގާ ވަރަށް ވަގުތު..އެކޮޅުން މިކޮޅަށް ފަސޭހަ ވާނެ އަންނަން.. އެންމެ ރަނގަޅުވާނީ ޝާތިރް މިކޮޅަށް ގެނައުން” ހަފީޒާ ހޭހަން ކުރަން އިން އަމީނާ ވެސް ބުނެލިއެވެ.
“ދަރިފުޅާ އެކަމާއި އުޅެލަން ވީނު.. ބައްޕަ އެއިނީ ކަމަކާ ވާހަކަ ވެސް ދެއްކޭ ހާލަތެއްގަ ނޫން..އެއި ކަންނޭގެ އެންމެ ރަނގަޅު ގޮތަކީ ވެސް މިހާރު”އަޒީޒްގެ ހާލަތު ހުރިގޮތުން ދިނާޔާ ބުނެލިއެވެ. އަނެއްކޮޅުން ހައުލާއަކީ އޭނާގެ އެއްބަނޑު އެއްބަފާ ކޮއްކޮއެވެ. ލޯބިވާކޮއްކޮއަށް އެފަދަ ހިތާމަ ވެރި ހާދިސާއެއް ދިމާވުމުން ދެރަވާނެތާއެވެ. މަންމައާއި ބައްޕަ ނިޔާވެފައިވީ އިރު ދިނާޔާގެ އާއިލާއަކަށް ހުރީވެސް ހައުލާ އެކަންޏެވެ.
އަރްކާން ވެސް ބޯޖަހާލާފައި ފޯނު ހިފައިގެން ދުރަށް ޖެހިލިއެވެ.
ކޮންމެ ވެސް މީހަކަށް ގުޅައިގެން އިރުކޮޅަކު ވާހަކަ ދައްކަން ހުރެފައި ފޯނު ބޭއްވުމަށްފަހު އަރްކާން އައިސް ދިނާޔާމެންގެ ކައިރީގައި ހުއްޓިލިއެވެ.
“ވަން އަވާރ ތެރޭގަ އެކޮޅުން ފްލައިޓް ނައްޓާލާނެ…އާންޓްއަށް ވެސް އެހަބަރު ދީފިން.. މިހާރު އެކޮޅުން އެދަނީ އެއާރޕޯޓައް” އަރްކާން ކިއައިދިނެވެ. ދިނާޔާވެސް ބޯޖަހާލަމުން އަލާރާގެ ބޮލުގައި ފިރުމާލިއެވެ. އޭރުވެސް އަލާރާ ދިޔައީ ރޮމުންނެވެ. އަރްކާން ބަލަންހުރެފައި އައިސް އަލާރާގެ މަގަތުގައި އިށީންދެ ދިނާޔާގާތު އަޒީޒްގެ ގާތައް ދާށޭ ބުނެލިއެވެ. ދިނާޔާ ވެސް ބޯޖަހާލާފައި ތެދުވެ އަޒީޒްގެ ގާތައް ދިޔައެވެ.
“އަރްކާން.. ކެން އައި ޓޯކް ޓް ހާރ.. އިޓްސް އާޖެންޓް” އަރްކާންގެ ގާތައް ހުއްޓިފައި ލިއާނާ ބުނެލީ އެހެންމީހަކަށް ނީވޭނެހާ ސިއްރުންނެވެ.
“މިގަޑީގަ ކިހިނެތް”އަރްކާން ބުމަ އަރުވާލާފައި އެއްސެވެ. އެވަގުތު ލިއާނާ ލޯ އަޅާލުމުން ވަށައިގެންވާ މާހައުލަށް ބަލާލުމަށް ފަހު އަރްކާން ބޯޖަހައިލިއެވެ.
“އެކަކަށް ވެސް ނުނިދޭނެ ކަން އެނގޭ..އެންމެން ރޫމްތަކުގައި ރެސްޓް ކޮށްލަން ދާން ފެންނަނީ.. އެކޮޅާއި ރާއްޖެ އިންނާނެ ނަވާރަ ގަޑިއިރުގެ ޑިފަރެންސް.. އަހަރެމެން ޗާޓާރ ކުރި ފްލައިޓްވެސް ނަގާނެ ވަރަށް ވަގުތު..މާދަމާ މެންދުރުފަހު ތިނެއް ޖަހާއިރު ރާއްޖެ އާދެވޭނީ..”އަރްކާން އެންމެން ނަށް އިވޭވަރަށް ބުނެލިއެވެ. ދެން އޭނާ ލިއާނާއާއި ދިމާ ބަލައިލިއެވެ. ކުޑަގޮތަކަށް ލިއާނާ ހީލަމުން އަލާރާގެ އަތުގައި ހިފާލިއެވެ.
“ހިނގާ ސިސް.. ނުނިދުނަސް ރެސްޓްކޮށްލަން.. ޔޫ ނީޑް ޓް ގެޓް ސަމް ރެސްޓް..” އަލާރާގެ ރުއިން ހުއްޓިފައި ހުރި ނަމަވެސް އޭރު ވެސް ތާޒާކަރުނުތަކުން ދެލޯ ވަނީ ފުރިފައެވެ. އެ މަންޒަރު ފެނި ލިއާނާގެ ދެލޯ ވެސް ފެންކަޅިވިއެވެ. ބަހެއް ނުބުނެ އަލާރާ ވެސް ތެދުވެ ލިއާނާގެ ބާރުގައި ކޮޓަރިއަށް ދިޔުމަށް މިސްރާބު ޖެހިއެވެ.
ސޯފާގައި އިސްޖެހިފައި އަރްކާންގެ ބުރަކަށީގައި ޒެވިއަލް ޖަހާލިއެވެ. އަރްކާން އިސްއުފުލާލާފައި ކުޑަކޮން ހީލިއެވެ. “ކޮފީ އެއް ބޯލަން ދާން ވީ އެންނު.. އެބައޮތް ވާހަކައެއް ދައްކަން ވެފަ” ޒެވިއަލް ބުނެލި ހިނދު އަރްކާން ވެސް ބޯޖަހާލިއެވެ. ދެމީހުން އެކުގައި މައްޗަށް އެރިއިރު އީވާ ޓެރެހުގައި ހުއްޓެވެ.
“އާންން..ހަހަހަހްހާ.. ނޭނގޭނެ އެމީހުންނަކަށް އެއްކަމެއް ވެސް..އަމް ޓްރާންސްފަރިން ސަމް ޓް ޔޯހް.. އޯކޭ މަ” ވާހަކަ ދައްކަ ދައްކާ ހުރެފައި އީވާ ފަހަތައް އެނބުރުނު ހިނދު ޒެވިއަލް އާއި އަރްކާން ފެނި ސިހުނެވެ. އަވަސް އަވަހަށް ކަންފަތުގައި ޖަހާފައި އިން ފޯނު ތިރިކޮށްލެވުނު ގޮތް ވެސް ނޭނގުނެވެ.
“ހުރިހާ އެންމެން އެހާ ސަކަރާތް ވެފަ ތިބިއިރު ވެސް އީވް މިތާގަ ތިހުރީ.. އެވެސް މީހަކަށް ގުޅައިގެން ހީހީފަ ވާހަކަ ދައްކަން.. އިނގޭތަ މިގޭގަ ހިތާމަ ވެރި ހާދިސާ އެއް ހިނގައިގެން އުޅޭކަމެއް..އަންކަލް ނިޔާވެގެންނޭ އެއުޅެނީ”އަރްކާން ފެނުނު ވަގުތު އީވާއަށް ވެގެން ދިޔަގޮތުން އަރްކާން ހުރީ ހައިރާން ވެފައިއެވެ. އޭނާއައީ ވެސް އެހާ ސިހޭފަދަ ގޮތަކަށް ވެސް ނޫނެވެ.
އީވާގެ ހުދުވެފައިވާ މޫނު ފެނުމުން ޒެވިއަލް އެއްމިޔަކަނުން ހިނިތުންވެލިއެވެ. “މާ އިނޮސެންޓް ވެގެން އުޅުނަސް އީވަގެ ފަތިފުށް ވެސް ހާމަވެއްޖެ..އަމިއްލަ އާއިލާއަށް ކެހިވެރިވަމުން ދިޔައިރު ސަބަބެއް ވެސް އޮންނަން ވާނެއެންނު..” ޒެވިއަލް ހިތައް އަރާ ފައިބަމުން ދިޔައެވެ. މީގެ ކުރިން އޭނާ ދެކެމުން އައީ، އީވާއަކީ އަމިއްލަ ކޮއްކޮ އެއްފަދަ ކުއްޖެއްގެ ގޮތުގައެވެ. ނަމަވެސް ހިނދުކޮޅެއްގެ ތެރޭގައި ހުރިހާ ކަމެއް ބަދަލް ވެއްޖެއެވެ. އީވާގެ ކުލަ އޭނާއަށް ހާމަވީ މީގެ އިރުކޮޅެއް ކުރިން ގޭގައި ހުއްޓާ ފެނުނު އެ ފޮޓޯ ތަކުންނެވެ. އަނެއްކާ ޓެރެހަށް އަރާ އަރާ ހުއްޓާ ފޯނުން އޭނާ ދައްކަމުން ދިޔަ ވާހަކަ ވެސް އިވުނެވެ. އެމީހުން ފެނުމުން އޭނާއަށް ވެގެން ދިޔަ ގޮތުން ހީވީ ވައްކަމެއް ކުރަނިކޮން ފަޅާއަރައިގެން އުޅުނު ހެންނެވެ.
އަރްކާން ކޮފީ ހިފައިގެން އައިސް ޒެވިއަލް އަތައް އެއްތަށިދެމުން އެތަނުން ސޯފާއެއްގައި ޖައްސާލިއެވެ. ކޮފީ ތަށި ތުމުގައި ޖަހައިގެން އިނދެ ބޮމުން ދިޔައިރު އޭނާގެ މޫނުމަތީގައިވީ މޮޅިވެރިކަމެވެ. އެހެން އިން އިރު ކުޑައިރު ޝާތިރް އާއި އެކު އުޅުނު އުފާވެރި ދުވަސްތައް ފިލްމެއްގެ މަންޒަރުތަކެއް ފަދައިން ރޯލްވަމުން ދިޔައެވެ. އުފަން ދަރިއަކު ނެތުމުން އަޒީޒްގެ ދަރިންނާއި އަމީނާގެ ދަރިފުޅު ދެކެ ޝާތިރް އިންތިހާއަށް ލޯބިވާނެއެވެ. އާއިލާގައި ހުރި ހަމައެކަނި ފިރިހެން ކުއްޖާއަށް ވުމުން ވަކިން ހާއްސަ ގޮތެއް އޭނާއާއި މެދު އަބަދުވެސް ބަހައްޓާނެއެވެ. ލޮލުގެ ހިމަކޮޅުން ވެއްޓެން ދިޔަ ކަރުނަތިކި އަތުގެ ނުފުށުން ފުހެލި އިރު މޫނަށް ފަނޑު ރަތްކަމެއް ވެރިވެއްޖެއެވެ.
“ކޮބާތަ ބުނަން އުޅުނު ވާހަކަ” އަރްކާން އެހެން އިނދެފައި އަހާލިއެވެ.
އަރްކާން އިން ހާލުން ޒެވިއަލް ވިސްނާލިއެވެ. މިހާރު އެވާހަކަ ދައްކައިފިނަ އޭނާއަށް ވާނެގޮތެއް ވެސް ނޭނގެއެވެ. ހަމަގައިމް ވެސް އަރްކާން އެއިނީ އެ ވާހަކަ ކިއައިދިނުމުން ދެން ކަންތައް ކުރަން ވީ ގޮތަކާއި ދޭތެރޭގައި ވިސްނޭވަރަށް ވުރެން ބަލިކަށި ހާލަތެއްގައެވެ.
“މާދަމާ ދޯ ދެން..ދޭ ކޮފީ ބޯލައިގެން ކުޑަކޮން އަރާމް ކޮށްލަން.. އަހަރެމެން ވެސް މިރޭ މިގޭގަ މަޑުކޮށްލާނަން..” ޒެވިއަލް ބުނެލުމާއި އެކުއަރްކާން ބޯ ޖަހާލިއެވެ.
***
“ސިސް.. މަށައް އެނގޭ ތި އިނީ ވާހަކަ ދެއްކޭ ކަހަލަ ހާލަތެއްގަ ނޫން ކަން.. އެކަމަކުވެސް ޕްލީޒް މިއަށް ޖަވާބު ދީބަ.. ހިނގާ އެންމެން އެއްކޮން މިކަމާ އުޅޭން..އައި ފީލް ސަމްތިންގ އިޒް ރޯންގް…ސޯ ދޮގު ނުހަދާ ބުނެބަލަ އެމީހުން ގުޅިތަ” ލިއާނާ އަހައިލިއެވެ.
ރުއިން ހުއްޓުމަކަށް އައި ނަމަވެސް ދެލޮލުގައި އަދިވެސް ކަރުނައިގެ ސައިލާބުތައް ބޮނޑި ވެފައިވެއެވެ. އޮސްޓްރޭލިއާގައި ޝާތިރްއާއި ހައުލާއާއި އެކު އުޅުނު ދުވަސްތައް ހަނދާންވާ ކޮންމެ ހިނދަކު ބަލިކަށިވެގެން ދަނީ އިންތިހާއަށެވެ. އަނގައިން ނުބުނެ އިނދެ އަލާރާ ދައްކާލީ އޭނާގެ ފޯނެވެ. ލިއާނާއަށް ހަދަން ވީ ގޮތެއް ނޭނގިފައި ހުއްޓާ މެސެޖް ބަޔަށް ދާށޭ ބުނެލިއެވެ.
ލިއާނާ ހައިރާންވެފައި ހުރެ ފޯނުގައި ހިފިއެވެ. އަލާރާ ބުނެލިގޮތައް މެސެޖް ބަޔަށް ދިޔަ ހިނދު އޭނާ ދެލޯ ބޮޑުވިއެވެ. “ކަލޭ ހީކުރީ ބަޔަކު ލައްވާ ހެކްކޮށްގެން ފޮޓޯތައް ޑިލީޓް ކޮށްލީމަ ދެން އަހަރުމެންނަށް ކުރެވޭނެ ކަމެއް ނޯންނާނެކަމަށް ތަ..ތި ފޮރުވައިގެން އުޅޭ ސިއްރު ވެސް އަހަންނަށް މިހާރު އެނގިއްޖެ.. ކަލޭގެ ދެލޮލަށް ފެނޭ.. އެހެންނު.. ދެން މިހާރު ނުގުޅިއަސް އޯކޭނު…ހަހަހަ… ފުރަތަމަ ދުވަހުން ސުރެން ބުނަމުން އައީ މީހަކަށް އެނގިއްޖެނަމަ ވާނެ ގޮތް މާ ދެރަ ވާނެ އޭ.. ސާތިރް ވެސް އެދިޔައީ މަރުވެގެން .. ދެން އަޒީޒްއާއި ދިނާޔާގެ ނިމުން ކަންނޭގެ އަންނާނީ..އޭގެ ކުރިން ދެން ވެސް މައިތިރި ވެގެން ހުރެބަލަ… ދެން ވެސް މަ އަންގާ ގޮތަކަށް އަމަލް ކުރަން ތައްޔާރުވޭ…ޝަވަން އާއި ކަލޭގެ ކައިވެނި ކަލޭ ވީ އަވަސްކުރަން.. ބައްޕާފުޅުގެ ކައިރީގަ ބުނެގެން ކުރިއަށް އޮތް ދެ ހަފްތާގެ ތެރޭގައި ކުރެވޭ ގޮތައް ހަދާ.. އެހެން ނޫނީ މާ ވޯސް ވާނެ” އެމީހަކު ކޮށްފައިވާ ދިގު މެސެޖް ކިއާ ނިމުނު އިރު ލިއާނާގެ ގައިން ހީބިހި ނަގައިގެން ދިޔައެވެ. އެންމެފަހުން ކުށެއް ފުރާނައެއް އެމީހަކު އެ ދުއްވާލީ ވެސް ހެކް ކުރުމުން ހެއްޔެވެ. ފަސްޖެހުނު ނަމަވެސް ކުރިއަށް ވުރެން ބޮޑަށް ބަދަލް ހިފުމުގެ އޮއިވަރު އޭނާގެ ހިތުގައި ވަކި ހިއްޕާލިއެވެ.
“އެހެންވީމަ އަހަރެމެން ހެކް ކުރީމަ އޭގެ ބަދަލް ދޯ މި ހިފާލީ ފުރާނައަކުން.. ހެޔޮ ވާނެތަ.. ދުލެއް ނުކުރާނަން ދެނެއް.. މިހާރު ދޮންބެ ވެސް އެބަޖެހޭ ރަސްމީކޮން މިކަމަށް ވައްދަން.. އެހެންނު…. ވަޓްޓް..ވެއިޓް..އެ މެސެޖްގަ އެބައިން ސިސް.. ސިސް..އޭންން.. ވަޓް” ވާހަކަ ދައްކަ ދައްކާ ހުރެފައި ކުއްލިއަކަށް އެ މެސެޖްގައި އަލާރާއޭ ކިޔާފައި ބުނެފައި އިން ވާހަކަ އޭނާއަށް ރެއަކާލިއެވެ. ދެލޯ ބޮޑުވެފައި ހުރެފައި އަލާރާގެ މޫނަށް ބަލައިލިއެވެ. އެހިނދު އަލާރާ ސީދާ އޭނާގެ މޫނަށް ބަލަހައްޓާއިގެން ހުރިގޮތުން ކުރިއަށް ވުރެން ދެލޯ ބޮޑުވިއެވެ. ދެލޮލަށް ނުފެންނަ މީހަކު އެފަދަ ގޮތަކަށް ނުބަލާނެކަން އޭނާއަށް އެނގެއެވެ. ” އަ..އަ..އަލާ ..ދަ..ދައްތާ..ވަޓްޓް” ބުނަން އުޅުނު ޖުމްލަ ވެސް ލިއާނާއަށް ބުނެވޭ ގޮތެއް ނުވިއެވެ.
“ޔެސް.. ލިއާ..އަހަންނަށް ފެނޭ..” އެހުރިގޮތައް ހުރި އަލާރާ މީގެ ދެ ހަފްތާ ކުރީގެ ހާދިސާ ކިއައިދޭން ފެށިއެވެ.
….
ރޭގަނޑު ލަހުން ނިދުމުގެ ސަބަބުން، ހެނދުނު ވެގެން އައި އިރު ވަރަށް ލަސްވާންދެން އަލާރާއަށް އެދުވަހު ނިދުނެވެ. ނިދާފައި އޮތްވާ އޭނާއަށް ކުއްލިއަކަށް ހޭލެވުނީ ވަރަށް ބޮޑަށް ބޮލުގައި ރިއްސަން ފެށުމުންނެވެ. އެ ރިހުންގަނޑު ތިރިއަށް ދާ ވަރަކަށް މީހާ ހެއަށް ގޮތްވަމުން ދިޔައެވެ. ވަކިން ބޮޑަށް ދިޔައީ ދެލޮލުގައި ރިއްސަމުންނެވެ. އޭނާ އަށް ރޮވެމުން ދިޔަ އިރު އެހީއަކަށް އެދެން މީހަކަށް ގޮވޭހާ ހިތްވަރެއް ވެސް އޭނާގެ ގަޔަކު ނެތެވެ. ތެދުވަންނަން އުޅުނު ހިނދު ލޮލާއި ނިތް ކުރިއަށް އެރި ތަދުން އޭނާއަށް އަޑުގެ ނެތްތަނަށް ހަޅޭއްލަވައި ގަނެވުނެވެ.
އެހިނދު ބެލްކޮނީގައި ވާ ސޯފާގައި ނިދިފައި އޮތް ރައިހާއަށް ސިއްސައިގެން ގޮސް ހޭލެވުނެވެ. އޭނާ ދުވެފައި އައިސް އެނދުކައިރިއަށް ހުއްޓުނު އިރު އަލާރާއަށް ވަމުން ދިޔަގޮތުން ރޮއިގަނެވުނެވެ. “ދައްތާ ލޮލުން ބްލީޑް ވެސް ވޭ އެބަ..ކިހިނެތް އެ ވީ” ރައިހާ ދުވެލާފައި ގޮސް ސައިޑް ޓޭބަލް މަތީގައި ހުރި ޓިޝޫ ފޮށި ހިފައިގެން ގޮސް އަލާރާގެ ލޮލުގަ ޖައްސަމުން ދިޔައެވެ. ނަމަވެސް އަންނަމުންދިޔަ ލެއަކަށް ވެސް ބަދަލެއް ނާދެއެވެ.
“ދެ..ދޭބަ..ލަ.. މީހަކު އުޅޭ..ތޯ” ވަރަށް އުދަގުލުން އަލާރާއަށް ވާހަކަ ދެއްކުނެވެ. އޭރު ލޮލުން އަންނަމުން ދިޔަ ލޭ ވެސް ހައްތަހާ ގިނަވަމުންނެވެ.
“އެއްވެސް މީހަކު ނޫޅޭ.. އަޒީޒްބެ ވެސް ދިނާ ދައްތަ ވެސް އޮފީހުގަ..އަރްކާންބެ ވެސް.. ކިހިނެތް ހަދާނީ..ލަސްނުކޮށް ހިނގާބަ ހޮސްޕިޓަލްއަށް ދާން…” ރައިޙާ ރޮވެމުން ދިޔައިރު ބިރުގަނެފައި ހުރި ވަރުން ދިޔައީ ތުރުތުރު ވެސް އަޅަމުންނެވެ. ވަރަށް އުނދަގުލުން އަލާރާ އެނދުން ނަގާފައި އަތުލަފިކޮށްގެން ލިފްޓުން ތިރިއަށް ފޭބިއެވެ. ލިވިންގްރޫމުގައި މީހަކު ނެތުމުން ރައިހާ އިތުރަށް ހާސްވާ ގޮތްވިއެވެ. ނަމަވެސް ބަދިގެ ތެރެއިން ކައްކަން އުޅޭ މީހުންގެ ހިލަމެއް ވުމުން ރައިހާ އުޅުނީ އެމީހުންނަށް ގޮވާށޭވެ. ނަމަވަސް އަލާރާ އޭނާހުއްޓުވިއެވެ.
“ނޫ..ނޫން.. ރައި އަހަންނަށް ހީވަނީ ފާޑަކަށް ދެލޮލަށް އަލިވާ ހެން…ވަރަށް ފުސް.. ވަރަށް ބޮޑަށް ބޮލުގަ ރިއްސަނީ.. މުޅި ތަން އެނބުރޭހެން ހީވަނީ.. އެއްވެސް މީހަކަށް އެނގޭ ކަށް ބޭނުމެއް ނުވޭ.. އެންމެން ހާސްވެގެން އުޅޭނީ..” އަލާރާ ބުނެލިއެވެ. އޭނާއަށް ވަމުންދާ ގޮތް ނޭނގުނު ނަމަވެސް ދެލޮލަށް ފުސް އަލިކަމެއް ވަމުން ދިޔަ ގޮތުން ހިތްބިރުގަނެފައި ހުރީ އިންތިހާއަށެވެ. ދެލޮލަށް ނުފެނުނު ނަމަވެސް އިތުރު ވޭނެއް ތަހައްމަލް ކުރަން ނުޖެހި މިހުރިހާ ދުވަހަކު އޭނާއަށް ހުރެވުނެވެ. ނަމަވެސް މިއަދު ކުއްލިއަކަށް އެވީގޮތުން ހިސާބަކަށް ޕެނިކް ވާ ގޮތްވިއެވެ. މުޅި ހަށީގަނޑު ރޫރޫއަޅަމުން ދިޔައިރުވެސް ރައިހާ އަތުން ދޫ ނުކޮށްލާ ހުއްޓެވެ. ކަން ދިމާކުރި ގޮތުން އެވަގުތުވީ ޒެވިއަލް ހޯދަން ކަޔާންވެސް އެގެޔަށް ވަންނަން އައި ވަގުތެވެ. އިސްޖަހައިގެން ފޯނާއި ކުޅެމުން އައުމުން އޭނާއަކަށް އަލާރާއާއި ރައިހާ އެއް ނުފެނެއެވެ.
“ކާރުގަ ދާނެ ކަމެއް ނެތް..ޑްރައިވަރު މަންމައަށް ގުޅާފަ ހަބަރު ދޭނެ ވަގުތުން.. އެއޮތް އަން..އަންނަނީ ޔާން.. ގޮ..ގޮވާބަ” އަލާރާ އެދުނެވެ.
“އަހަރެން ބޭނުމެއް އޭނައާއި އަނގައިން ވެސް ބުނާކަށް.. ދައްތައަށް ޓަކައި މިގޮވަނީ..”ހިތާ ދެކޮޅަށް ކަޔާންއަށް އިވޭވަރަށް ރައިހާ ގޮވާލިއެވެ. އޭނާއަށް އަލާރާ ހުރިގޮތް ފެނުމުން ދުވެލާފައި އައެވެ.
“އިހަށް ސުވާލް ނުކޮށް ޑްރައިވާރ އަތުން ކީ ނަގައިގެން އާދޭ.. ބުނޭ ރައިހާ ބުނެގެންނޭ..” ރައިހާ އެދުނުގޮތައް ކަޔާން ކަންތައް ކުރިއެވެ. ދިހަވަރަކަށް މިނެޓް ތެރޭގައި އެމީހުންނަށް ހޮސްޕިޓަލްއަށް އާދެވުނެވެ. ގެންދެވުނު ގޮތައް އަލާރާ އެމަޖެންސީއަށް ވެއްދިއެވެ. ރައިހާއާއި ކަޔާން ބޭރުގައި މަޑުކޮށްލައިގެން ތިއްބެވެ.
“ކިހިނެތް ވީ އަލާއަށް” ކަޔާން އަހައިލުމުން ވާހަކަ ނުދައްކަން ހުރެފައި ރައިހާ ކިއައިދިނެވެ. ކަޔާން ވަގުތުން ދިމާކޮށްލީ ޒެވިއަލްއަށް ގުޅާށެވެ. ނަމަވެސް ރައިހާ އޭނާ ހުއްޓުވިއެވެ.
“ނޫން.. އަލާދައްތަ ބޭނުމެއް ނުވާނެ ކަންނޭގެ އެކަކަށް ވެސް އެނގޭކަށް.. ގޭގަ މީހުން ތިއްބަ މިއައީ އެއިން މީހަކަށް ވެސް ނާންގާ ކަމެއް ވެގެން” ރައިހާގެ ބަހަށް ކަޔާން މަޑުކޮށްލިއެވެ.
އެމަޖެންސީ ބަޔަށް ވެއްދުމަށްފަހު ޑޮކްޓާރު ޖަހާލި އިންޖެކްޝަނެއްގެ ސަބަބުން އަލާރާ އަށް ނިދިފައި ހޭލެވުނީ ނިތްކުރިއަށާއި ދެލޮލަށް ފިނި ވަމުން ދިޔުމުންނެވެ. ދެލޮލަށް ބަރުކަމެއް އިޙްސާސްވާތީ ލޯމަތީގައި އަތް ޖައްސާލި ހިނދު ދެލޮލުގައި ކަފަކޮޅެއް ތައްކޮށްފައިވާކަން އޭނާއަށް އެނގުނެވެ. ކުރިން ބޮލާއި ލޮލުގައިވި ގަދަ ރިހުން މިހާރު އެއްވެސް ވަރަކަށް ނުވެއެވެ. ކައިރީގައި ޑޮކްޓާރުން ހަރަކާތްތެރިވަމުން ދިޔަކަން އެނގެއެވެ.
“ހޭއި ޔޫ އެވޭކް..” އިވުނީ ޑޮކްޓާރ ފާރިޝްގެ އަޑެވެ. އެއީ ރާއްޖެއިން އަލާރާ ކުރިން ބެލި ޑޮކްޓަރ ވެސްމެއެވެ. އަޒީޒްގެ އެކުވެރިއެއް ކަމުން، ޑޮކްޓަރަށް ދައްކަން އަންނަ ފަހަރު ތަކުގައި އޭނާއާއި ނުހަނު ގާތް ގޮތެއް ބަހައްޓައެވެ.
”އަލާ ރަނގަޅު ދޯ މިހާރު.. ރިހުން އެބަހުރިތަ..” ފާރިޝްގެ ސުވާލަށް ޖަވާބު ދިނުމުގެ ގޮތުން އަލާރާ ބޯޖަހައިލިއެވެ.
“ނާސް ދުރުވެބަލަ އެހީ ތެރިން އެތެރެއަށް ވައްދަން” ފާރިޝްގެ އެދުމުގެ މަތިން ނަރުހަކު ގޮސް ދޮރުހުލުވާލުމުން ކަޔާންއާއި ރައިހާ އެތެރެއަށްވަނެވެ.
” އިރުކޮޅެއް ކުރިން އިންޖެކްޝަނެއް ޖަހާލިން.. މިހާރު ބްލީޑިންގް ވެސް ކޮންޓްރޯލް ވެފަ ވަނީ.. އޭގެ އިތުރުން މިކޮޅުން ދެންމެ ހަދާލި ޓެސްޓްތަކުގެ ރިޒަލްޓްތައް ވެސް ވަރަށް ބަރާބަރު.. އިތުރު މައްސަލައެއް ނެތް.. ދެންމެ އަޅުގަނޑުމެން އަޅާލިން ޕްރެޑިނޮޒޯލޯން އެސެޓޭޓް ކިއާ އައި ޑްރޮޕްއެއް.. އެ އެޅީމަ ލޮލަށް އެ ފިނިވަނީ.. ފައިވް މިނެޓްސް ވީމަ އަނެއްކާ ވެސް ޑޮކްޓާރ މިހާރު އެއުޅެނީ އައި ޑްރޮޕްސް އަޅާލަން.. އަޅާލާފަ ލޯމަތީގައިން ކަފަކޮޅުވެސް ނައްޓާލަ ދޭނަން” ޑޮކްޓާރ ފާރިޝްގެ ކައިރީގައި ހުރި ނަރުހަކު ތަފްސިލާއި އެކު ކިއަދިނުމުން އަލާރާ ބޯ ޖަހައިލިއެވެ.
” ލޯ ނުހުޅުވާ ބަލާބަލަ ލޮލަށް އިޙްސާސްވޭތޯ” ޑޮކްޓަރ ލޮލަށް ފެން އެޅުމަށްފަހު ކަފަކޮޅު ނައްޓާލަމުން ބުނެލިއެވެ.
ފާރިޝްގެ ކަފަކޮޅު ނައްޓާލި ވަގުތު އަލާރާގެ ދެލޮލަށް އާދަޔާއި ހިލާފް ލުއިކަމެއް އިހްސާސް ވިއެވެ. އޭނާގެ ހިތް އަވަސްވެގެން ދިޔައެވެ. މަޑުމަޑު ހަރަކާތަކާއި ލޯ ނުހުޅުވާލާ ލޮލައި ދިމާލުގައި އަތް ހަރަކާތް ކޮށްލިއެވެ. ވަގުތުން އިނގިލިތަކުގެ ހިޔަނި ލޮލަށް އެޅިގެންދިޔައެވެ. ޑޮކްޓާރ ފާޜިޝްގެ އިރުޝާދާއި އެއްގޮތައް އަލާރާގެ ލޯ ލަސްލަހުން ހުޅުވާލިއެވެ. ލަސްލަހުން މަންޒަރުތައް ސިފަވަމުން ދިޔައެވެ.
“އަލްހަމްދްލިﷲ” އަލާރާގެ ދެލޮލުން ކަރުނަތައް ހޯސްލާފައި ފައިބަމުންދިޔައެވެ. އެތައް ދުވަހެއް ފަހުން ލޮލަށް ފެންނަން ފެށިއިރު އޭނާ އެންމެ ދެކެން ބޭނުންވީ ޒެވިއަލްއެވެ. އެ ސޫރަ ދެކޭ ހިތުން އޭނާ ހުންނަތާ ހާދަ ދުވަހެއް ވެއްޖެއެވެ. ޖަޒުބާތީ ވަމުން ދިޔަ އިރު ދެލޮލުން ފައިބަމުން ދިޔަ ކަރުނުތައް ވެސް ހުއްޓުވާލާކަށް އޭނާ ހަނދާނެއް ނެތެވެ.
“އަލާ.. ކެން..ޔޫ ސީ.. ދިސް.. ފާރިޝްބެގެ އަތް ފެނޭތަ”އަލާރާ އަށް ވެގެން ދިޔަގޮތުން ފާރިޝްގެ ދެލޯ ބޮޑުވިއެވެ. އޭނާއަށް ހީވި ހީވުން ޔަގީން ކުރުމަށްޓަކައި އަތުގެ އިނގިލިތައް ދައްކާލާފައި އެހިއެވެ.
” ފާރިސްބެ ކައިރީގަ ތެދަށް ބުނެފިއްޔާ ބައްޕަގެ ކައިރީގަ ވަގުތުން ބުނާނެ..މަންމަމެންނަށް އެހެން އުޅެނިކޮން ބުނެވޭނީ ކަންނޭގެ މީހެއްގެ ކައިރިގަ..ސޯފިއާއާއި ޝަވަންގެ ހަގީގަތްވެސް ދެނެގަންނަން އިތުރަށް ފަސޭހަވާނެ މިހެން ދުވަސްކޮޅަކު އަދި އެކްޓް ކޮށްލަނިކޮން..އިހަށް މަޑުކޮށްލާނީ..” އަލާރާގެ ހިތައް އަރަމުންދިޔައެވެ.
“ނޫން އައި ކާންޓް ސީ އެނީތިންގް..ލޮލަށް ބަރުވެފަ ހުންނަނީ.. އިންޖެކްޝަންސް އާއި އައި ޑްރޮޕް އެޅީމަ ނިދި އަންނަނީ.. އަމް ފީލް އޯކޭ މިހާރު.. މަންމަމެން ގެޔަށް ދާން ވާއިރަށް ބޭނުން ގެޔަށް ދާން ޑިސްޗާޖް ކޮށްލަ ދެވިދާނެތަ..”އަލާރާ އެދުނެވެ. ދޮގު ހަދަން ޖެހުމުން ހިތައް އުނދަގުވެސް ވިއެވެ.
އަލާރާގެ ޖަވާބު އިވި ފާރިޝްގެ މޫނު މިލާ މޯޅިވިއެވެ. އަލާރާގެ ދެލޮލުން ފޭބި ކަރުނުތަކުގެ ސަބަބުން އޭނާ ހީކުރީ އަލާރާ ފެންނަން ފެށީ ކަމަށެވެ. އަލާރާގެ ހެދި ޓެސްޓުތަކުގެ ނަތީޖާވެސް ރަނގަޅު ވުމާއިއެކު ފާރިޝް ބޯޖަހަލިއެވެ.
“ބައްޕްގެ ކައިރިގަ ނުބުނައްޗޭ ހޮސްޕިޓަލްއަށް މިއަދު އައި ވާހަކަ.. އެމީހުން ހާސްކުރެވިއްޖެ ލައްކަ ދުވަހު.. މިއަދު ބްލީޑްވި ވާހަކަ ބުނީމަ ހާސްވާނެ ކަން ޔަގީން.. އަހަރެން މިހާރު ހަމަ ވަރަށް ރަނގަޅު” އަލާރާ އެދުނެވެ. ކަމެއް ގޯސްވާ ނަމަ ލަސްނުކޮށް އަންނަން އެދިފައި ފާރިޝްވެސް ހީލަމުން އަލާރާގެ އެދުމާއި ރުހުނެވެ.
ހޮސްޕިޓަލްގެ ގޯތި ތެރެއިން ނުކުމައިން އިރު އަލާރާގެ މޫނަށް ރައިހާއާއި ކަޔާން ބަލަމުން ދިޔައީ ފާޑަކަށެވެ. އަލާރާ ނުހޭން މަސައްކަތް ކުރި ނަމަވެސް ހެވުނެވެ. ދެމީހުން ވަގުތުން ހުއްޓުނެވެ.
“ދައްތައަށް ހަމަ ނުފެނޭތަ..” ރައިހާއަށް ނުހުރެވިގެން އަހާލައިފިއެވެ. އޭރު އެމީހުންނަށް ކާރާއި ހިސަބަށް ވެސް ދެވިއްޖެއެވެ. ރައިޙާގެ އަތުން އަތް ނައްޓުވާލާފައި އަލާރާ ކާރަށް އެރީ އަމިއްލައަށެވެ. އޭނާ ކާރަށް އަރާފައި ބަލައިލި އިރު ކަޔަންއާއި ރައިހާ އަނގަނަގައިގެން ތިއްބެވެ. ނުހޭން ކުރަމުންދިޔަ މަސައްކަތްވެސް ވީ ބޭކާރެވެ. ދެލޯ ބޮޑުވެފައި ތިބިގޮތުން އަލާރާއަށް ހެވުނެވެ.
“ފެނޭތަ.. ހަމަ އަސްލަށް ވެސް ފެނޭދޯ..” ކަޔާން އަދި ވެސް އިނީ ހައިރާންވެފައެވެ.
“ފާރިޝްބެއަށް އޮޅުވާލެވުނަސް މަށައް އެނގޭ ޔާންއަށް އޮޅުވާ ނުލެވޭނެކަން.. މަށާއި ދިމާ ބަލަން ހުރީ އަދި ޖާސޫސްކުރާ ފާޑަށް ވިއްޔަ .. ދޮގު ހެދިޔަސް އެނގޭނެ ކަން އެނގޭ..އެކަމަކު ދެމީހުން ކުރެ އެކަކުވެސް މި ވާހަކަ އެހެން މީހަކަށް ނާންގައްޗޭ” އަލާރާ އެދުނެވެ. ދެމީހުން އިތުރު ސުވާލެއް ކޮށްފާނެތީ އޭނާގެ ބޭނުން ހާމަކުރިއެވެ. ކަޔާން ވަގުތުން ބޯޖަހާލިއިރު ޝަވަން އާއި ސޯފިއާގެ ފަތިފުށް އެންމެންނަށް ހާމަކޮށްދޭން އެހީވާނެކަމުގެ ޔަގީންކަން ދިނެވެ. ރައިހާ ވާނުވާގައި އިނުމުން ގެއަށް ދިޔަ މަގުމަތީގައި ޝަވަންގެ ވާހަކަ ކިއައިދިނެވެ.
……
އަލާރާގެ ވާހަކަ ނިމުނު ހިނދު ލިއާނާއަށް އެނދު މައްޗަށް ޖެހިގަނެވުނެވެ. އެންމެންނަށް އެހީވުމުގައި އޭނާ އުޅެމުން ދިޔައިރު ހުރިހާ އެންމެން ވެސް ކަންކަން މިދަނީ އޭނާއަށް ސިއްރުކުރަމުންނެވެ.
“ރައި އުޅުން ވަރަށް ލިއާއަށް ކިއައިދޭން..އަހަރެން ހުއްޓުވީ…އަހަރެން ބޭނުންވީ އަހަންނަށް، ޒެވް ޕްރޮޕޯސް ކުރީމަ ލިއާ ކައިރީގަ ބުނަން.. ހީކުރީ ޒެވްވެސް މަށާއި މެދު ތަފާތު ގޮތަކަށް ދެކޭކަމަށް.. އެހެންވެ އެ އުއްމީދުގަ ހުރެވުނީ..ޒެވް ނުކޮށްގެން އެންމެފަހުން އަހަރެން ޒެވްއަށް ޕްރޮޕޯސް ކުރަން އުޅުނީ ދެން..އެކަމަކު އެރޭ ވީ ގޮތް ކިއައިދިނީމެންނު.. އެހެންވެ މިހުރެވެނީ އެކަމާއި ބޯ ގޮވާފަ.. ދެން އަނެއްކާ ކައިވެނީގެ ކަންތައް…ދެން ތި މީހުން މިގެއިން ދާން އުޅުނީމަ ވެސް ވަރަށް ދެރަވި.. ނޭނގޭ ކީއްވެކަމެއް ވެސް..އެރޭގެ ފަހުން ޒެވް މަށާ ވަރަށް ދުރުވެއްޖެ ..ނުވެސް އާދޭ އަދި ފެންނަ ހިސާބަށް ވެސް… ސޮރީ ލިއާ.. މި ރީޒަން ތަކުގެ ސަބަބުން މިހުރެވުނީ” އަލާރާ ކިއައިދިނެވެ. ލިއާނާގެ ކައިރިއަށް އައިސް އެތައް ފަހަރަކު މާފަށް އެދުނު އިރު ވެސް ލިއާނާ އިސްޖެހިފައިއިނެވެ.
“އިޓްސް އޯކޭ..އެކަމަކު އަހަންނަށް ވަރަށް ރަނގަޅު ދެން ސިއްރު ނުކޮށްފިއްޔާ.. ދޮންބެ ހެދިހެން… ރައި ވެސް ވަރަށް ގިނަކަންކަން ސިއްރު ކުރޭ އެބަ މިހާރު..އެހެން އެންމެން ހެދީމަ އަހަންނަށް ފީލްވަނީ އެއްވެސް ވެލިއު އެއް ހުރި މީހެއް ނޫނޭ އަހަންނަކީ..ޑޯންޓް.. ޑޫ ދިސް..އި.. އިނގޭ” ވާހަކަ ދައްކަމުން ގޮސް ލިއާނާގެ އަޑުބެދޭގޮތްވިއެވެ. މޫނުމަތީގައި އަތް އެޅުނީ ވެފައިވީ ދެރައެއްގެ ސަބަބުންނެވެ.
“އަމް ސޮރީ..ދެން ދުވަހަކުވެސް ލިއާ އަކަށް ކަމެއް ނުފޮރުވާނަން… އެހެންމީހަކު އަދި ކަމެއް ފޮރުވިޔަސް އަހަރެން އަބަދުވެސް ދެކެނީ ލިއާ އަކީ އެންމެ ގާތް އެކަކުގެ ގޮތުގަ.. އަސްލު ބުނަންތަ އީވްއަށް ވުރެން ލިއާ މާ ކްލޯޒް ވާނެ މިހާރު… އަންކަލް ނިޔާވީމަ އެންމެ ދެރަވާނެ އެކަކު ޔަގީނުންވެސް އަހަރެން މީ..އެކަމަކު އެންމެ ފަހަރަކުވެސް ކޮމްފޯޓް ކޮށްލަދޭން ވެސް އޭނައަށް ނާދެވުން.. އަހަރެން ކައިރިއަށް ނައިތާ ބައްޕަ އެހާ ސަކަރާތްވެފަ އިންދަ ބައްޕަ ކައިރިއަށް ވެސް ނުގޮސްލާ.. ހައު ކުޑް ޝީ ޑޫ ދިޒް ޓް އަސް” ލިއާނާގެ ގައިގާ ބައްދާލައިގެން އިން އިރު އަނެއްކާވެސް އަލާރާއަށް ރޮވިއްޖެއެވެ.
”ސިސް އަޅާނުލާ..އީވް ނަޔަސް އަހަރެން މިހުރީ އޭ.. އަހަންނަށް ވެގެން ވަންޏާ ދޮންބެ އާއި ސިސް މިހާރު ގުޅުވިތާ ކިތަންމެ ދުވަހެއް.. އެނގޭ ދެރަވާނެވަރު..އެކަމަކު އިފް ޔޫ ވޮން ފައިޓް ވިޓްދެމް ޔޫ ޝޫޑް ބީ ބްރޭވް.. ޝާތިރްބޭބެގެ މޫނު ފެނުނީމަ ކިތަންމެއް ހިތް ހިތްވަރުކުރިއަސް ދެރަވާނެ ކަން އެނގޭ ..އެކަމަކު ޕްލީޒް..އަމް ބެގިންގް ޔޫ އެމީހުންނަށް ތި ތިކަމަށް ޝައްކު ކުރެވޭނެ ޖާގައެއް ނުދޭތި..” އަލާރާގެ ބޮލުގައި ފިރުމަމުން ލިއާނާ ބުނެލިއެވެ.
“ލިއާ އަށް އެނގޭތަ..މީގަ އެހެން ބައެއްގެ އަތެއް ވެސް އެބަ އުޅޭ .. ކުރިން އިންޒާރުދޭން ގުޅާ ނަމްބަރަކުން ނޫން މި އިނީ މެސެޖް ކޮށްފަ އެއް.. މިއީ ތަފާތު ނަމްބާރ އެއް..” އަލާރާ ކުއްލިއަކަށް ހަނދާން ވެގެން ބުނެލިއެވެ. ލިއާނާ އަދި ދައްކާލަބަލާށޭ ބުނުމުން އަލާރާ ދައްކާލިއެވެ. ތެދެކެވެ. ދެ ނަމްބަރު ތަފާތެވެ.
“އެ މެސެޖްގަ އެހެން ހުއްޓަސް އެމީހުންނަށް އެހާ ޔަގީންވާނަމަ މިހެން މެސެޖެއް ފޮނުވާލައިގެން އަދި ނުނިންމާނެކަން މަށައް އޭރު ވެސް ޝައްކުވި..މި ނަމްބަރުގެ ލޮކޭޝަން އިހަށް ބަލަން ވީ.. ތި ބުނިހެން އެހެން މީހެއްގެ ކަމަކާ މި ވައްތަރީ” ލިއާނާ އަވަސްވީ އެ ނަމްބަރު އޭނާގެ ފޯނުގައި ނޯޓުކޮށްލުމަށެވެ.
“ސިސް އަށް އެނގޭތަ.. ހެކް ކޮށްލި ގަޑީގަ އެ ނަމްބަރުގެ ލޮކޭޝަންއަކަށް އިނީ ޝަވަންގެ ގޭގެ އެޑްރެސް” ލިއާނާ ބުނެލިއެވެ. އަލާރާ ފާޑަކަށް ސިހުނެވެ. ޝަވަން އާއި އޭނާ އޭނާގެ ސިއްރު ލޯބިވެރިޔާގެ ވާހަކަ ޒެވިއަލް ކިއައިދިން ދުވަހުން ސުރެން ކޮންމެ ވެސް ވަރަކަށް ޝައްކުވެފައި އޮތަސް ޔަގީން މިވީ އަދިކިރިއާއެވެ. ޝަވަން އެހިފަނީ ކޮންކަމެއްގެ ބަދަލް ބާއޭ ހީވިއެވެ.
“ސިސްއަށް ގަބޫލް ވެސް ނުކުރެވިދާނެ.. ޔޫ ކޭން އާސްކް ދޮންބެ ކައިރީގަ ވެސް.. ދޮންބެ އަށް އެނގޭނެ އެއަށްވުރެން ބޮޑަށް.. ލެޕް އަށް ބަލަން އިން އިރު ދޮންބެ ވަރަށް ބޮޑަށް ޝޮކް ޖެހިފަ އިނީ..އެކަމަކު އަހަރެން ދިޔައީމަ ލެޕް ލައްޕާލި.. ދެން ފަހުން ނުދާން ހުއްޓަ ދިނާ ދައްތަ ގުޅީމަ މި ހާދިސާ އެނގިގެން މިއައީ” ލިއާނަ ކިއައިދިނެވެ.
“އަންކަލް ވަޅުލެވުނީމަ އިތުރު ކަމަކާއި ދެން އުޅޭވޭނީވެސް” އަލާރާ އޭރު ވިސްނަމުން ދިޔައީ އެކަންތަކާއި ބެހޭ ގޮތުން ޒެވިއަލްއާއި ވާހަކަ ދައްކާނެ ގޮތަކާއިމެދުގައެވެ.
***
ހަވީރް ހަތަރެއް ޖަހަން ވާއިރަށް ސާތިރްގެ ހަށިގަނޑު ރާއްޖެ ގެނެވުނެވެ. ކަރާއި މޭ އަދި ބަޑު ހިމެނޭހެން ބެންޑޭޖްކޮށްފައިވި އިރު ލޭގެ އަސަރް ފެންނަން ހުއްޓެވެ. އޭނާ ގެނައި ފްލައިޓްއިން އޮސްޓްރޭލިއާގެ ދެތިން ފުލުހަކުވެސް އައެވެ. އެމީހުންނާއި އެކު، އެމްބިއުލޭންސްގައި ފުރަތަމަ ވެސް ޝާތިރް ގެންދެވުނީ ހޮސްޕިޓަލަށެވެ. އެއީ އޮސްޓްރޭލިއާގެ ފުލުހުންގެ ފަރާތުން އައި ޓީމާއި ރާއްޖޭގެ ފަރާތުން އެ މައްސަލަ އަށް ކަނޑައެޅުނު ޓީމް ގުޅިގެން އެ މަރު ތަހްގީގް ކުރުމަށް ކުރިއަށްގެންދާ “ކްރޮސް ބޯޑާރ އިންވެސްޓިގޭޝަން”އަށެވެ.
ޝާތިރްގެ ހަށިގަނޑު އާއިލާއާއި ހަވާލް ކުރެވުނީ އެރޭގެ ނުވައެއް ޖަހަން ގާތްވެފައިވަނިކޮށެވެ. އަޒީޒްއާއި ހައުލާގެ ބޭނުންވީ މާ ގިނައިރު ނުބާއްވާ ޝާތިރް ވަޅުލުމަށެވެ. ހިނަވާ ކަފުންކޮށްގެން އޭނާގެ މޫނު ދެއްކުމަށް ނެރެވުނު ހިނދު އާއިލާއާއި ރަހްމަތްތެރިން އިން ސަހަރާ ތެރެ ފުރިގެން ދިޔައެވެ. މުޅި ތަނުގައި ތެރޭގައި ހިފާލާފައިވީ ރުއިމުގެ އަޑުތަކުންނެވެ. ހައުލާ ހިފަހައްޓަލަންވީ ދަތިކަމަކަށެވެ. ދިނާޔާ އާއި އާއިލާގެ އިތުރު ދެ އަންހެނުންނަށް ހައުލާ ހިފަހައްޓަލެވުނީ ކިރިއާއެވެ. އަޒީޒްގެ ކައިރީގައި އަރްކާން ހުރި އިރު ބައްޕަގެ ރުއިމުގެ އަޑު އިވި އަރްކާންގެ ހިތައް ވެސް އިންތިހާއަށް އަސަރުކުރިއެވެ. ލިއާނާގެ ގައިގާ ބައްދާލައިގެން އަލާރާ ހުރިއިރު ރޮވެމުންދިޔައެވެ. ކައިރީގައި ރައިހާ ވެސް ހުއްޓެވެ. ސޯފިއާއާއި ޝަވަން ވެސް އަލާރާގެ ހިދުމަތުގައި އަތުކުރި އޮޅާލާފައި މިއަދު ހުރިވަރުން ފެންނަ މީހަކަށް މަންޒަރު އޮޅޭހާވެއެވެ. އެހެން ހުރެފައި ފޯނެއް އައިސްގެން ޝަވަން ބޭރަށް ނުކުމަތެވެ.
ޒެވިއަލްގެ ލޮލުގައި އަޅައިގަތީ އެންމެނާއި ދުރުގައި ވަކިން ހުރި އީވާ އަށެވެ. އެންމެން ރޮމުން ދިޔައިރު އެއްވެސް މީހަކާއި ގާތްވާން ނޫޅެ އޭނާހުރީ ދުރުގައެވެ. ކޮންކަހަލަ އަންހެން ކުއްޖެއްބާއޭ ޒެވިއަލްގެ ހިތައް އަރަމުން ދިޔައެވެ. ބޭބެއަކު ނިއާވެގެން އުޅޭ އިރުވެސް އެހާ ހަމަޖެހިލާފައި ހުރުމުން އޭނާ ހައިރާންވިއެވެ.
އެހެން ހުއްޓާ ފެނުނީ ފަހަތައް ފަހަތައް ޖެހުމުން ގޮސް އީވާ އެތަނުން ނުކުމަތް ތަނެވެ. މީހަކަށް ފެނިދާނެތީ ބަލަމުން ދިޔަ ގޮތުން ހީވީ ވައްކަމެއް ކުރަން އުޅުނުހެންނެވެ. ބޮނދަމުން ގޮސް ސަހަރާގެ ގޭޓުން ނުކުމަތެވެ. އޭނައަށް ނުފެންނާނެހެން އޭނާގެ ފަހަތުން ޒެވިއަލް ވެސް ދިޔައެވެ. އީވާ ގޮސް އެރީ މަގު އަނެއް ފަރާތުގައި ޕާކުކޮށްފައިވާ ކާރަކަށެވެ. ޒެވިއަލް ރަނގަޅަށް އެ ކާރުގެ ނަމްބަރު ބަލާލިއެވެ.
“ޝަވަންގެ ކާރު” ޒެވިއަލްއަށް އެއްމިޔަނުން ހީލެވުނެވެ. އެންމެ ފަހުން ޝަވަންގެ ކާރަށް ވެސް އީވާއަރަން ފެށީތާއެވެ. “އެންމެން މިތާގަ ތިބި ދަނޑިވަޅު ބަލާފަ ދޯ މި ނައްޓާލީ.. ނޮޓް ބޭޑް އީވާ މުހައްމަދު އަޒީޒް” ޒެވިއަލް ފޯނު ނަގާ ދެތިން ފޮޓޯ އެއް ނަގާލިއެވެ. އެއް ފޮޓޯ އީވާ ކާރަށް އަރަނިކޮން ހުރި އިރު އަނެއް ފޮޓޯ އެއީ ކާރުގެ ނަމްބަރު ބޯޑެވެ. އަރްކާންއާއި ހިސާބަކަށް ދެވެން ހުރީ ކޮންމެވެސް ވަރަކަށް މައުލޫމާތު އެއްކޮށްގެންނެވެ. އީވާގެ ފަހަތުން ދާން ހިނގައިގަންނަން އުޅެފައި ވެސް ޝާތިރް ވަޅުލަން ގެންދަން އުޅެން ފެށުމުން އޭނާ އަލުން އެތެރެއަށްވަނެވެ.
***
(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.