އަނިޔާ.. 03 ވަނަ ބައި..

ސައިކަލަށް އަރާ ސްޓާކް ކޮއްލީމެވެ. އަހަރެން ދިޔައީ އަމީނީމަގުން ކުޑަކުދިންގެ ޕާކްއާއި ދިމާލަށެވެ. ކޮޓަރިއަށް ދިއުމުގެ ކުރިން ސިކުނޑި ހަމަޖައްސާލުމަށެވެ. ނަމަވެސް އަހަރެން ދުއްވަމުން ދިޔަ ސައިކަލްގެ ބުރެކި އަހަރެންނަށް ކުއްލިއަކަށް ޖައްސާލެވުނެވެ. މަގުހުރަސް ކުރަމުންދިޔަ ކުއްޖާ ފެނުމުންނެވެ. އަންހެން ކުއްޖެކެވެ. އެއީ މިދުނިޔޭގައި ހުރި އަހަރެންނަށް އެންމެ ރީތި އަންހެން ކުއްޖާއެވެ. އޭނަގެ އަތުގައި ހިފައްހާޓައިގެން ކުޑަ ކުއްޖަކު ހުއްޓެވެ.

އޭނަ އަހަރެންނާއި ދިމާލަށް ބަލާލުމާއި އެކު އެމޫނު މަތިން ފެނިގެންދިޔައީ ހިތްހަމަނުޖެހުމެވެ. އަހަރެންގެ ގަޔަށް ހީވީ މީހަކު ކަރަންޓު ޖެއްސިހެންނެވެ. މުޅިމީހާ ތުރުތުރު އަޅަންފެށިއެވެ. އެއީ މަލިކާއެވެ. އެންއިރެއްގައި އަހަރެންގެ ލޯބިވެރިއެކެވެ. އަހަރެންނާއި ކައިވެނި ކުރަން ހަމަޖެހިފަ ހުރި ކުއްޖާއެވެ. “މަލް އަހަރެން ދެކެ ކިހާ ވަރަކަށް ލޯބި ވަންތަ” އަހަރެންނާއި މަލީކާ ތިބީ އަހަރެންގެ ގޭގައެވެ. އަހަރެންގެ ކޮޓަރީގައެވެ. “ކިހިނެއްވީ. މިއަދު ހާދަ ފާޑަކަށް އުޅޭ ދުވަހެއް. މިހާރު ތިސުވާލުވެސް ތިކުރީ ކިތައްވަނަ ފަހަރަށް” މަލިކާ އަހަރެންގެ މޭމަތީގައި ބޯއަޅާލަމުން ބުނެލިއެވެ. މަލީކާއަށް ފާހަގަ ކުރެވުނީ ރަނގަޅަށެވެ. “އަހަރެން އަބަދުވެސް މަލް ދެކެ ލޯބިވާނަން. ކޮންމެ ގޮތަކަށް ކަންތަށް ވިޔަސް” މަލިކާ ގައިގައި ބައްދާލަމުން އަހަރެން ބުނީމެވެ. އެއީ އަހަރެންގެ އަތުތެރޭގައި މަލިކާ އޮތް އެންމެ ފަހު ދުވަހެވެ. އޭގެ އަނެއްދުވަހަކީ އަހަރެންގެ ދިރިއުޅުމުގެ އެންމެ ބޮޑު ހަގުރާމައިގެ ތެރެއަށް ފުއްމާލަން ޖެހުނު ދުވަހެވެ. ޖެހުނު މައްސަލައެއްގައި އަހަރެންގެ ވަޒީފާ ގެއްލުނެވެ. އަހަރެން ޕޮލިހުގެ ބެލުމުގެ ދަށުގައި ހަފްތާއެއް ވަންދެން ބެހެއްޓުނެވެ. އެބަންދުން ސަލާމަތް ވެގެން އައިއިރުގައި އަހަރެންގެ ލޯބިވާ މަލިކާ އަހަރެންނަށް ގެއްލިއްޖެއެވެ.

އަހަރެން ސިހިގެން ދިޔައީ ފަހަތުން އިވެމުންދިޔަ ބަރުގަނޑުތަކުންނެވެ. ފަހަތަށް ބަލާލިއިރުގައި ކަމަކު ދާކަންނެތެވެ. މުޅި މަގު އޮތީ އަހަރެންނާއި ހެދި ބުލޮކް ވެފައެވެ. އަހަރެންނަށް އިދެވުނީ އޭރު ސައިކަލްގެ ބްރެކި ޖެއްސިގޮތަށް އެތަނުގައެވެ. އަވަހަށް ސޮރީއޭ ބުނެލަމުން އަހަރެން ސައިކަލު ދުއްވާލީމެވެ. އަހަރެންނާއި މަލިކާގެ ވާހަކަ އެއީ މީގެ ތިން އަހަރު ކުރީގެ ކަމެކެވެ. މަލިކާ މިހާރު އަހަރެންނަށް ނަފްރަތު ކުރެއެވެ. އަހަރެން ހުންނަ ގޮތުންނެވެ. އަހަރެން ކުރާ ކަންތަކުންނެވެ. އެކަމަކު އަދިވެސް އަހަރެން މަލިކާދެކެ ވަރަށް ލޯބިވެއެވެ. އަބަދުވެސް ވާނެމެވެ. ނަމަވެސް އެދުވަހު އަހަރެން އެގޮތަށް ކަންތަށް ކުރަންޖެހުނީއެވެ. އެންމެންގެ ހައްގުގައެވެ. މަލިކާ ފެނުމުން އަހަރެންގެ ބޮލަށް ބަރުވެފައިވާ ވަރަށް ވުރެއް ބޮޑަށް އެތައްގުނައެއް ބަރުވިކަހަލައެވެ. އަހަރެން ބޭނުންވީ ވީހާވެސް އަވަހަށް ކޮޓަރިއަށް ދާށެވެ. ނަމަވެސް އެތަނަށް ދިޔަޔަސް އަހަރެންގެ ބޮލަކަށް އަރާމެއް ނެތްކަން އަހަރެންނަށް އެގެއެވެ.

އަހަރެން ގޮސް ކޮޓަރީގެ ދޮރުހުޅުވާލީމެވެ. އޭރުވެސް މާޒިން އަދި ނާފިލް ކޮޓަރިތެރޭގައި ދެމިފައި ތިއްބެވެ. އަހަރެން ހަމަޖެހުމުގެ ނޭވާއެއް ލެވުނެވެ. އަވަހަށް ގޮސް އަހަރެން އެނދަށް ވެއްޓިގަތީމެވެ. ހަމަޖެހުމުގެ ދެތިން ނޭވާލުމަށްފަހު ލޯމަރާލީމެވެ. އަހަރެންގެ ދިރިއުޅުމާއި ދޭތެރޭގައި ވިސްނާލުމަށް އަހަރެންނަށް ވަގުތު ކޮޅެއް ލިބުނީއެވެ. ނަމަވެސް އެވަގުތުވެސް އަހަރެންނަށް ވިސްނެންފެށީ ހުޝާމްއާއި ދޭތެރޭގައެވެ. “ޝާމްމެން ތިކުރާ ކަމަކުން އެއްވެސް ފައިދާއެއް ނެތް. އެމީހުން ޖެހޭނީ ހަމަ މަރަން. އެމީހުން މެރި މީހުންގޮތަށް. އެއަށްވުރެއްވެސް އަނިޔާވެރިކޮށް މަރަށް ޖެހޭނީ” އަހަރެންނާއި ހުޝާމް ތިބީ ކޮފީއެއް ބޯށެވެ. އެއީ އަހަރެންނާއި ހުޝާމް ދެބަސްވާ ކަންތަކެވެ. ހުޝާމް ގަބޫލު ކުރާގޮތުގައި މިހިގާ އަނިޔާވެރި މާރާމާރި ހުއްޓުވޭނީ އެމީހުންވެސް އެގޮތަށް މަރައިގެންނެވެ. ނަމަވެސް އެއީ އަހަރެން ވިސްނާގޮތެއް ނޫނެވެ. އަހަރެންގެ ވަޒީފާގެވެސް ގޮތުންނެވެ. “އެއްކަހަލަ ހުޝާމް މީހަކު މެރިއޭ ކިޔާފަ އެކަންތަކެއް ނުހުއްޓުވޭނެ. އެމީހުންނަށް ޖެހޭނީ ވަރުގަދަ އަދަބުދޭން” އަހަރެން ކޮފީ ތަށިން ކޯވަރެއް ބޯލަމުން ހުޝާމްއަށް ޖަވާބު ދިނީމެވެ. “ބަލަ އަހަރެންވެސް މިބުނަނީ ތި ވާހަކައޭ. ވަރުގަދަ އަދަބު ދޭން ޖެހޭނެއޭ. އެކަމަކު އެމީހުން ތަނެއްގައި ބަންދުކޮށްގެނެއް ނޫން. އަދި ކީއް އެމީހުން ބޭނުންކުރާ ވަޅި އާއި ކަތިވަޅިން އެމީހުންނަށް އަދަބު ދޭން ޖެހޭނީ” ހުޝާމް ފޯރިއާއި އެކު ބުނެލިއެވެ. “ހެޔޮނުވާނެ އަނެއްކާ ތިގޮތަށް ވާހަކަ ދައްކާފަ އެކަހަލަ ކަމެއް ހުޝާމް ނުކުރައްޗޭ” އެއީ އަބަދުވެސް އަހަރެން އެމައުލޫއަށް ވާހަކަ ދައްކަމުން މައުލޫ ނިންމާލަމުން ބުނާ ވާހަކައެވެ. އަބަދުވެސް އަހަރެން އެހެންބުނުމާއި އެކު ހުޝާމްގެ ޖަވާބަކަށްވާނީ ހިނިތުންވުމެވެ. އޭރުގައި އަހަރެންނަށް އޭގެ މާނަ ނޭގުނީއެވެ. ނަމަވެސް މިހާރު އޭގެ މާނައެގުނު އިރުގައި މާބޮޑަށް ލަސްވީއެވެ. ހުޝާމް ބޭނުންވި ގޮތަށް ކަންތަށް ކުރީއެވެ. އެކަމަކު އަހަރެން ބޭނުންވަނީ ހުޝާމް އެކަން ކުރި ސަބަބު ހޯދާށެވެ. އަހަރެންގެ ކަންފަތަށް ކުއްލިއަކަށް އިވެންފެށީ މިއަދު ޓީވީއިން ކީ ހަބަރެވެ. ” މުހައްމަދު ހަމީދު މަރާލިކަމަށް އަހްމަދު ހުޝާމް އެއްބަސްވެއްޖެއެވެ. އަދި މީގެ އިތުރަށް އަހްމަދު ޝާފިއު، އިބްރާހިމް ނަވާރު، މުހައްމަދު ފައިޒަންވެސް މަރާލީ މުހައްމަދު ހުޝާމްކަމަށްވަނީ އެއްބަސްވެފައެވެ”. އަހަރެންނަށް ތެޅިގަނެފައި ހޭލެވުނެވެ. މީހާ ވަނީ ދާހިއްލާ ފޯވެފައެވެ. އޭރު މާޒިން އިނީ އަހަރެންނާއި ދިމާލަށް ބަލާށެވެ. “ކިހިނެއްވީ” އޭނަ ބަލަން އިންގޮތުން އަހަރެން އަހާލީމެވެ. “ކަމެއްނުވޭ” މާޒިން ބުނެލިއެވެ. އަހަރެން އަނެއްކާވެސް އެނދުގައި ހަމަޖެހިލީމެވެ.

އަހަރެންނަށް ދެން ހޭލެވުނީ މީހަކު އަހަރެންނަށް ގޮވާހެން ހީވެގެންނެވެ. އޭރު ނާފިލް އަހަރެންގެ ކައިރީގައި ހުއްޓެވެ. އަހަރެން ތެދުވެ އޭނައާއި ދިމާލަށް ބަލާލީމެވެ. “މާއްޓެ ބުނީ މިރޭ އަހަރުމެން ބައްދަލު ކުރާތަނުން ބައްދަލު ކުރާށޯ. ގްރޫޕް އެންމެންވެސް ދާނެ ބައްދަލުވުމަށް. ގަޑިއަށް އަންނާތި. އެއިޓް ތާޓީ.” އަހަރެން އެއްވެސް އެއްޗެއް ނުބުނެ ކައިރީގައި އޮތް ބާލީހުގައި ބައްދާލީމެވެ. “ކޮބާ މާޒިން” އަހަރެން އަހާލީމެވެ. “އޭނަ ވީ ސްޓަފް ނަގަން ގޮސް. މިރޭ ރަގަނޅު ސްޓަފް އަންނާނެ ކަމަށް މާއްޓެ ބުނީ.” އަހަރެން ރަނގަޅަށް ނާފިލްއާއި ދިމާލަށް ބަލާލީމެވެ. އޭރުވެސް އޭނަ އިނީ ބިޑިއެއް ހިފައިގެންނެވެ. “ހޫމް ދާނަން” އެހެންބުނުމަށްފަހު އަހަރެން ދެލޯމަރާ ބާރު ކޮއްލީމެވެ. މާގިނައިރެއް ނުވެ ނާފިލްވެސް ކޮޓަރިން ބޭރަށް ނިކުތެވެ. އަހަރެންނަށް ހަމަޖެހުމުގެ ނޭވާއެއް ލެވުނީ ދެނެވެ.

ރޭގަނޑުގެ ވަގުތެވެ. އަހަރެން ރެޑީ ވަމުންދިޔައީ ނާފިލް ބުނިތަނަށް ދިއުމަށެވެ. ކުއްލިއަކަށް ދޮރުގައި ޓަކި ޖެހި އަޑު އިވުނެވެ. އެއްމެ ފަހަރަކު ޓަކި ޖެހުމަށްފަހު ދެން އަޑެއް ނީވުނެވެ. އަހަރެން ގޮސް ދޮރުހުޅުވާލީމެވެ. އެއްވެސް މީހަކު ފެންނާކަށް ނެތެވެ. ނަމަވެސް ދޮރުކައިރީގައި ކުޑަ ފޮއްޓެއް ހުއްޓެވެ. އަހަރެން އެފޮށި ހިފައިގެން އެތެރެއަށް ވަނީމެވެ. އަދި މަތިހުޅުވާލީމެވެ. އެއީ އަހަރެން ބުނި ބޭސްތަކެވެ. ފާރިޝް އަހަރެން ބުނި ބޭސްތަށް އަހަރެންނަށް ގެނެސްދިނީއެވެ. އަހަރެންނަށް ހިނިތުންވެލެވުނެވެ. ރެޑީ ވެގެން އަވަހަށް ނާފިލް ބުނި ގަޑިއަށް އެތަނަށް ދިއުމަށް ކޮޓަރިން ނިކުތީމެވެ.

ސައިކަލު ދުއްވަމުން ގޮސް އަހަރެން މަޑުކޮއްލީ ބުރުޒުމަގުގައި ހުންނަ ގެއެއް ކައިރިއަށެވެ. އެތަނުގައި ހުރި ގެއެއްގެ ތެރެއަށް އަހަރެންވަނީމެވެ. އޭރު އެތަނުގައި މާޒިން ގޮޑިއެއްގައި އިށީދެލައިގެން އިނެވެ. އަހަރެން ފެނުމާއި އެކު އަހަރެންނަށް އަތުން ހަނާ އަޅާލިއެވެ. އޭރު އެތަނުގައި ގާތްގަޑަކަށް 15 މީހުން ތިބޭނެއެވެ. ނާފިލްވެސް އެތަނުގައި ގޮޑިއެއްގައި އިށީދެގެން އިނެވެ. “ހުރިހާ އެކުވެރިން މިއަދު މިގޮތަށް ގްރޫޕް އެންމެންނާއި މިބައްދަލު ކޮއްލީ މިގްރޫޕް މެންބަރު ޝާމް ތައާރަފް ކޮށްދެންވެގެން” މާޒިން އެންމެންނާއި މުހާތަބް ކުރަމުން ވާހަކަދެއްކިއެވެ. “މިހާރު މާޒިންގެ ހުރިހާ ޓެސްޓަކުން އަހަރެން ފާސްވީތަ. މި ގްރޫޕްގެ މީހަކަށް ތި ހެދީ” އަހަރެންވެސް އެތަނުގައި ހުރި ގޮޑިއެއް ދަމާލަމުން އިށީދެލީމެވެ. މާޒިން އަހަރެންނާއި ދިމާލަށް ބަލާލިއެވެ. “ހޫމް އަހަރެން ކުރި ހުރިހާ ޓެސްޓަކުން ޝާމް ފާސްވެއްޖެ. ދެން އޮތީ ބޮސްއާއި ބައްދަލު ކުރުން. އޭރުން ޝާމް އަހަރުމެން ގޭންގްގެ މެންބަރަކަށް ދާއިމީ ގޮތަށް ވާނެ” މާޒިން ބުނެލިއެވެ. “އޯކޭ ކޮންއިރަކުން ބޮސްއާއި ބައްދަލު ކުރަނީ” އެންމެ ފަހުން އަހަރެން މަޑުކޮށްގެން ހުރި ދުވަސް ޖެހުނީއެވެ. “ބޮސްވީ ރާއްޖެއިން ބޭރުގައި. އަހަރެންގެ މަސައްކަތަކީ ޝާމް ބޮސްއާއި ހަވާލު ކުރުން. ވީމާ ވީހާވެސް އަވަހަށް ބޭރަށް ފުރަން ޖެހޭނެ. މާދަން ނޫން އަނެއް ދުވަހުން ފުރަން ރެޑީވޭ. އަހަރެން ޓިކެޓް ކަންތަށް ހަމަޖައްސާނަން” މާޒިން ބުނެލިއެވެ. އަހަރެންނަށް ބޭއިހްތިޔާރުގައި ހީލެވުނެވެ. އެއީ އަލަށް އަހަރެންނަށް އެގުރޫޕްގެ ގިނަ އަދަދެއްގެ މީހުން ފެނުނު ފުރަތަމަ ފަހަރެވެ. އަހަރެން ކޮންމެ މީހެއްގެ މޫނަށް ވަކި ވަކީން ބަލާލީމެވެ. އެންމެންވެސް އަހަރެންނަށް މަރުހަބާ ކިޔެވެ. އަހަރެން ފަހަރަކު މީހަކާ ސަލާމް ކުރަމުން ދިޔައީމެވެ. ކޮންމެ މީހެއް ކައިރިއަށް ހުއްޓިފައި ސަލާމް ކޮއްލުމަށްފަހު އަހަރެންގެ މޭގައި އަތްޖައްސާލަމެވެ.

މީޓިން ނިމުމާއި އެކު ފެށުނީ ޕާޓީގަޑިއެވެ. އެތަނުގައި ތިބި ދެތިން މީހަކު ބޮޑު ފޮށިގަނޑެއް ހިފައިގެން އެތެރެއަށް ވަނެވެ. އެފޮށިގަނޑުން އެމީހުން ނެގީ ބޮޑު ތިން ވައިން ފުޅިއެވެ. އަދި އެހެން ދެކުއްޖަކު ހުދު ކުލައިގެ ޕެކެޓް ތަކެއް ގެންނައެވެ. އަހަރެން ކުޑަކޮށް ދުރަށް ޖެހިލީމެވެ. އެވަގުތު އެތަނުން ކުއްޖަކު އަހަރެން އަތަށް ވައިން ތައްޓެއް ދިއްކޮށްލިއެވެ. އަހަރެން ހިނިތުން ވެލަމުން އޭގައި ހިފީމެވެ. އެވަގުތު އަޑުގަދަކޮށް ލަވަޖަހަންފެށިއެވެ. ލަވަޖަހަށް ފެށުމާއި އެކު ކުދިން ނަޝަން ފެށިއެވެ. އަހަރެން ގާތަށް ހިނިވެސް އައެވެ. މިހާރު އެތަނުގައި ހަމައިގައި ހުރި އެކަކުވެސް ނެތެވެ. އެއްބަޔަކު ވައިން ބޮމުން ދިޔައިރު އަނެއްބަޔަކު ދިޔައީ ހުދު ކުލައިގެ ހުރި ޕެކެޓް (ހަކުރު) ބޭނުން ކުރަމުންނެވެ. އަހަރެން ހަމަހުރި ތަނުގައި ހުރީއެވެ.

އަހަރެން އެތަނުން ނިކުތީ މެންދަމުން އަލިވެ ތިނެއް ޖެހިފަހުންނެވެ. އޭރު އެތަނުގައި ތިބި ހުރިހާ އެންމެ އެތަނަށް ދެމިފައި ތިއްބެވެ. ސައިކަލަށް އަރާ ސްޓާޓް ކޮއްލުމުގެ ކުރިން އަހަރެން ފޯނުން މެސެއްޖެއް ފާރިޝްއަށް ފޮނުވާލީމެވެ. އަދި އާޓީފިޝަލް ބީޗްއާއި ދިމާލަށް މިސްރާބް ޖެހީމެވެ. ސައިކަލް ބީޗް ކައިރިއަށް މަޑުކޮއްލުމަށްފަހު އަހަރެން ހިގައިގަތީ ދުރުގައި ޖަހާފައި ހުރި ގޮޑިތަކާއި ދިމާލަށެވެ. އަހަރެން އެތަނުގައި ހުއްޓުމާއި އެކު ފޯނު ރިންގުވާން ފެށިއެވެ. އަހަރެން ފޯނު ބަލާލުމަށްފަހު ނަގައިފީމެވެ. “އަންނޯން” އަރާފަ އިނަސް އެކޮޅުން ވާހަކަ ދެއްކީ ފާރިޝްއެވެ. “އަހަރެން ރާއްޖެއިން ބޭރަށް ދާން ޖެހިއްޖެ” އަހަރެން ބުނީމެވެ. އެވަގުތު ތަންކޮޅެއް ދުރުގައި ހުރި ބެއްޗެއްގައި ފާރިޝް އިށީދެލިތަން އަހަރެންނަށް ފެނުނެވެ. “ބޭނުމަކީ” ފާރިޝް އަހާލިއެވެ. “ބޮސްއާއި ބައްދަލު ކުރަން. މާދަން ނޫން އަނެއް ދުވަހުން. ފުރާގޮތަށް. ގްރޫޕް މީހުންމަށަށް ހަރަދު ކުރަނީ. މާދަން ބައްދަލު ނުވާނެތީ މިގަޑި ބައްދަލު ކޮއްލަން މި އެދުނީ. އަށް. މިއޮތީ މިއަދު ފެނުނު މީހުންގެ ފޮޓޯ. އެގްރޫޕްގައި އަދި މަށަށް ފެނުނު މީހުންގެ ފޮޓޯ. މީގެ އިތުރުންވެސް މީހުން އުޅެދާނެ” އަހަރެން އެހެން ބުނެލަމުން މޭމަތީގައި ގޮށެއްގެ ސިފައިގައި އިން ކުޑަ ކެމެރާ ނަގާ އަހަރެން އިން ގޮޑިމަތީގައި ބާއްވާލީމެވެ.

“އެމީހުން އެހެންވީމަ ޝާމްއަށް އިތުބާރު ކުރާވަރު ބޮޑުތާ ދޯ” ފާރިޝް ބުނެލިއެވެ. “ބޮސް އާއި ބައްދަލުވުމުން އަހަރެން ކުރިއަށް ގެންދާނީ އަހަރެންގެ އަމިއްލަ ޕްލޭންއެއް. އެކޮޅަށް ދިޔަޔަސް އަހަރެންނަށް ފާރިޝްއަށް ވަގުތުން ގުޅޭގޮތަށް ހުންނާތި. މަގޭ ހިތްބުނޭ މިފަހަރު މަގޭ ދުވަސް ދާނެއޭ” އަހަރެން ބުނެލީމެވެ. އެހެންބުނުމާއި އެކު ފާރިޝް އަހަރެންނާއި ދިމާލަށް ބަލާލިއެވެ. “ހޭ އާ ޔޫ އޯކޭ” ފާރިޝް އަހާލިއެވެ. “މިއަދު މަލިކާ ފެނުނު” އަހަރެން ބުނީމެވެ. އެހެންބުނުމާއި އެކު ފާރިޝްއަށް އަހަރެންނަށް ވެފައި އިންގޮތް އެގުނެވެ. “ޝާމް ޔޫ ކާންޓް ބްލޭމް ޔުއާ ސެލްފް” ފާރިޝް ބުނެލިއެވެ. “ޕްލީޒް ޔޫ ހޭވްޓް ޓޭކް ކެއަރ އޮފް މައި ސިސްޓަރ އެންޑް މަމް. އެން މަލް ޓޫ” އަހަރެންގެ ލޮލުން ކަރުނަ ހިލުނެވެ. “ޝާމްއަށް އެއްވެސް ކަމެއް ނުވާނެ” ފާރިޝް ބެލީ ރަހްމަތްތެރިއެއްގެ ހައިސިއްޔަތުން އަހަރެންނަށް ވިސްނާދެވޭތޯއެވެ. “މަގޭ ހިތްމަށަކަށް ދޮގެއް ނަހަދާނެ ފާރިޝް. މިފަހަރު މަގޭ ހިތްބުނަނީ މަށަށް ކޮންމެވެސް ކަމެއް ވާނެއޭ. ޕްލީޒް ބުނޭ މަށަށް އެކަންތަށް ކޮންދޭނަން ދޯ.” އަހަރެން އެދުނީމެވެ. ފާރިޝް އެންމެފަހުން އާއެކޭ ބުންޏެވެ. އަދި އޭނަ ލައްވާ ޕްރޮމިސްވެސް އަހަރެން ކުރުވީމެވެ. އަހަރެން ނެއްދުވަހެއްގައި އެމީހުން ބެލުމަށެވެ. އަހަރެން ފޯނު ކަނޑާލުމަށްފަހު އެތަނުން ތެދުވެގެން ހިގައިގަތީމެވެ. އެވަގުތު ފާރިޝް އަހަރެން އިން ގޮޑިއާއި ދިމާލަށް އަންނަތަން ފެނުނެވެ. އަހަރެން ވަކި ހިސާބަށް ގޮސްފައި އެބުރި ބަލާލިއިރު ފާރިޝް ހުރީ އެގޮޑި ކައިރީގައި އަހަރެންނާއި ދިމާލަށް ބަލަހައްޓައިގެންވެ.

ނުނިމޭ…

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.