ރަހުމެތް ނެތް ހިތް [2]

މާޒީގެ ތެރެއިން އަހަންނަށް ހޭވެރިކަން ވީ ގެޔާއި ޖެހިގެން ހުންނަ މިސްކިތުން އަސުރު ނަމާދުގެ ބަންގީގެ އަޑަށެވެ. އަހަރެން  އަވަސްވެގަތީ އަސްރުނަމާދު ޖަމާއަތުގައި ކުރުމަށް މިސްކިތަށް ދިއުމަށެވެ. ނަމަވެސް އަހަރެންގެ ފިޔަވަޅުތަށް ހުއްޓުނީ ދޮރުކުރިމަތީގައި ހުރި ފޮށިގަނޑަކާއި ހުދު ސިޓީ އުރަ ފެނިފައެވެ. މޫނުމަތިން ދާތިކިތައް ވިދަންފެށީ މީހަކަށް ފެނިއްޖެނަމަ ވާނެ ގޮތް ހިތަށް އަރާފައެވެ. އަހަރެން އަވަސްވެގަތީ މީހަކަށް ފެނުމުގެ ކުރިން އަވަހަށް އެއެއްޗެހި އެތެރެއަށް ވެއްދުމަށެވެ. …………………………………………………………………………………………………………….

ރާޝިން އަށް ނޭނގުނު ކަމަކީ އޭނާ އެހާ ސިއްރުން އެއެއްޗެހި ނެގިކަމުގައިވީ ނަމަވެސް އެކަންތައް ފެނުނު މީހަކު ހުރި ކަމެވެ. އެވަގުތުވީ ރާޝިންގެ އެންމެ ގާތް އެކުވެރިޔާ އަދި އެރަށު ޕޮލިސް ސްޓޭޝަން ގައި މަސައްކަތް ކުރަމުން އަންނަ ފިޒާން، ރާޝިންގެ ގޭ ކައިރިއަށް ސައިކަލުގައި އައިސް ހުއްޓުނު ވަގުތެވެ. ރާޝިންގެ މޫނުމަތިން ފެންނަމުންދިޔަ ހާސް ކަމާއި ކަންބޮޑުވުން  އޭނާ އަށް އަންގައިދިނީ ކޮންމެވެސް ކަމެއް ގޯސް ކޮށް ހިނގައިފި ކަމެވެ.

……………………………………………………………………………………….

ސިޓީ އުރަ ކެނޑުމަށް ފަހު އަހަރެން ކިޔަން ފެށީމެވެ. ” އަހަރެން ރާޝިންގެ އަންހެނުންނާއި ދަރިން މިތާ ބައިތިއްބާފަ މިތިބީކީ އަހަރެމެން ވަކި ކުރާނެ ކަމެއް ނެތީމަކާ އެއްނޫން….  ކަލޭ ކުރި ކަމެއްގެ ބަދަލު ހިފަން ވެގެން…. އަދި އަހަރެން މިއީ ކާކު ކަމެއްކަން ނުބުނެވޭދޯ!.. މާދަމާ ރަށުގެ ތުނޑީކޮޅަށް އާދޭ!  ބަރަާބަރު 5 ޖަހާ އިރު.. ހަނދާންކޮށް އެކަނި އަންނާނީ! އުއްމީދުކުރަން ތިފޮށިގަނޑުގަ އޮތް އެތި ކަމުދާނެކަމަށް.. އެންޖޯއި!!!”

އަހަރެން ދެން އަވަސްވެގަތީ އެ ފޮށިގަނޑު ކެނޑުމަށެވެ.. އަހަރެން އޭގައި އޮތް އެއްޗެއް ނެގި ތަނާ ދިޔައީ ސިއްސައިގެންނެވެ. އޭގައި އޮތީ އަހަރެންގެ ދޮށީ އަންހެން ދަރިފުޅު ރަފޫޝާ ގެއްލުމުގެ ކުރިން ލައިގެން ހުރި މަޑު ދޮން ކުލައިގެ ނިދާ ހެދުމެވެ. ލެއިން ތަތްތެޅިފައެވެ.  އަހަންނަށް ހުރެވުނީ ފާޑާ ކަށް ހުއްޓުން އަރާފައެވެ. ” ރަފޫޝާ!!” އަހަންނަށް އަޑުގެ ނެތްތަނަށް ހަޅޭލަވައިގަނެވުނީ އެއްވެސް އިހުތިޔާރަކާނުލައެވެ.

…………………………………………………………………………………………….

އަނދިރި ކޮޓަރިއެކެވެ. އިންސާނުން ތަކެއްގެ ނޭވާ ލާ އަޑާއި ކުކުރާ އަޑުނޫން އެހެން އަޑެއް ނީވެއެވެ. ” ދޫކުރޭ!! އަހަރެމެން ދޫކުރާށޭ! އަޑެއްނީވޭތަ…؟. ކޮންތާކަށް އަހަރެމެން ލާފަ މިތިބީ!!” އެ އިވުނީ ރާޝިންގެ އަންހެނުން ސަފޫރާގެ ހަޅޭކުގެ އަޑެވެ.” މަންމާ ކޮއްކޮ ބިލުގަނޭ!” ދެން އިވެންފެށީ ސަފޫރާ އާއި ރާޝިންގެ ތުއްތު ތުއްތު ދަރިފުޅު ރަފްޝާ ގެ މައުސުމު އަޑެވެ. ” އޭ!! ވާހަކަ ނުދައްކާ….މައިތިރި ވޭ! ” ބަރު އަޑެކެވެ. އަނދިރިކަމުން ހަމައެކަނި ލަފާކޮށްލެވޭކަމެވެ. ދެލޮލަށް އިނގިލި ކޮއްޕާލިއަސް ނެނގޭނެ އެވެ. ” އަހަރެމެން މިތިބި ކޮންތާކު؟ ބުނޭ؟ ކޮބާ އަހަރެންގެ ރާޝިން؟ ކޮބާ އަހަރެން ގެ ދެ ދަރިން…. ކަލޭމެން ކޮން ކަމެއް ބޭނުން ވަނީ؟” ސަފޫރާ ވަރަށް ހިތްވަރު ކޮށްލާފައި ސުވާލު ކުރަން ފެށިއެވެ. ” ބުނެފީމެއްނު މައިތިރި ވާށޭ!.. ހަޅޭނުލަވާ ތިތާ މައިތިރި ވެގެން އިނދޭ ނޫނީ ކަލޭގެ މި ދެ މައުސޫމު ދަރިން ކަލޭ ލޯ ކުރިމަތީގައި މަރާލާނީ!” ހަމަ އެ ބަރު އަޑެވެ. ” ނޫން… ނޫން… އަހަރެންގެ ދެދަރިންނަށް އެއްވެސް ކަމެއް ނުކުރާތި …އަހަރެން މަޑުން ހުންނާނަން…” ސަފޫރާ ހަތިޔާރު ބެހެއްޓިކަހަލައެވެ.  ކުއްލިއަކަށް މުޅި ކޮޓަރި ދިއްލިއްޖެއެވެ.. ސަފޫރާ އާއި އޭނާގެ ދެދަރިން ވަށައިގެން ތަންތަން ހޯދަން ފެށިއެވެ..

އެއީ ޓިނު ކަހަލަ އެއްޗަކުން ހަދާފައިވާ ކޮޓަރި އެކެވެ. މެދު ގައި ހަތަރެސްކަން މޭޒެއް ހުރިއިރު  އެ މޭޒުވަށައިގެން 4 ގޮނޑި ހުއްޓެވެ. ސަފޫރާގެ ކުރިމަތީ ގައި 7 އަހަރުގެ ރަފޫޝާ އިން އިރު ކަނާތް ފަޅީގައި 2 އަހަރުގެ ރަފްޝާ އެވެ. ސަފޫރާގެ ވާތް ފަޅީގައި ބޯ ދިގު ކޮށް ހުރި ފިރިހެނެއް އިނެވެ. ކަޅުކުލައިގެ އަތް ކުރު ޓީޝާޓް އަކާއި ކަޅުކުލައިގެ ޖީންސެއްގައި އެ ގޮތް ނޭނގޭ މީހާ ހުރިއިރު ކަރާއި އަތް ވަނީ އެކި ސައިޒުގެ ފަށްތަކުން ވަނި ފުރާލާފައެވެ. އޭނާ އިނީ ކުޑަ ކުޑަ ވަޅިއެއް މޭޒަށް ހަރާލަ ހަރާލަ އެވެ.. ސަފޫރާ އާއި އޭނާގެ ދެދަރިން ހުރީ ދެއަތް ފުރަގަހަށް ލާފައި  ގޮނޑި އާއެއްކޮން އައްސާފައެވެ. ކުއްލިއަކަށް ދޮރުހުޅުވާލާފައި ވަނީ………

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.