ފުހެވިގެން ނުދާނޭ – 01

“ހުރިހާ ކަމެއް ނިމުނީތަ؟ ” ކުރިމަތީގައި ސަފުހަދައިގެންހުރި ހަ ނޯކަރު މީހުންނަށް ބަލާލަމުން ރޫބީ އަހާލިއެވެ. އެ އެންމެންވެސް އަދަބުވެރިކަމާއިއެކު އިސްޖަހާލައިގެން ތިބެ ބޯޖަހާލުމުން އެ އެންމެން ކައިރީގައި ދިޔަސް އެންމެ ރަނގަޅުކަމަށް ރޫބީ އެންގިއެވެ. ދެން އޭނާ މިސްރާބުޖެހީ ސިޑި އާއި ދިމާއަށެވެ.

ގޭތެރޭގެ މާޙައުލަށް ބަލާލި މީހަކަށް އެތަނުގެ ފެންވަރު ފެނިގެން ދާނެކަން ގައިމެވެ. މަތީގައި ބޮޑެތި ޗާންދަލިޔާ ލާފައިވާއިރު ފާރުތަކުގައި ލެވިފައިވަނީ ހުދުކުލައެވެ. ހުރިހާ ފަރުނީޗަރުތައް އަޅިކުލައިން ބޭނުންކޮށްފައިވުމުން ހިތްގައިމެވެ. ކާބަޔާއި ސިޓިންގް ރޫމު ވަކިކުރެވިފައިވަނީ އެތެރެ ފެންނަ ބޮޑު ބިއްލޫރިގަނޑެއްގެ އެހީގައެވެ. މައްޗަށް ދެވޭގޮތަށް ދެފަރާތުން ބޮޑު ސިޑިއެއް ހުއްޓެވެ.

އަރައިގެންހުރި އުސް ފައިވާނުގެ އަޑު މުޅިތަނުގައި ގުގުމާލާފައިވާއިރު ރޫބީ ގޮސް މަޑުކޮށްލީ، ދެވަނަ ފަންގިފިލާގައިވާ ކޮޓަރި ބަރިތެރެއިން ތިންވަނައަށްވީ ކޮޓަރީ ދޮރުމަތީގައެވެ. ދޮރު ހުޅުވާލަމުން ކޮޓަރިތެރެއަށް ނަޒަރެއް ހިންގާލިއިރު، ރޫބީގެ ތުންފަތްމަތީގައި ހިނިތުންވުމެއް ދުވެލިއެވެ.

މޫނުގައި ރުލުގެ އަސަރު ހުރިނަމަވެސް، ބޭނުންކޮށްފައިވާ މޭކަޕުގެ އެހީގައި އެހާބޮޑަކަށް އެކަން ނަގައެއްނުގަނެވެއެވެ. ތުންފަތުގައި ގަދަ ރަތްކުލަ ޖައްސާފައިވާއިރު ދުވަސްވެ ވިދުން ގެއްލިފައިވާ ދެލޯ ވަށައިގެން އަދުނުން ފަވާލާފައިވެއެވެ. ލައިގެންހުރީ ބިސްހުދު ކުލައިގެ ފަލަމަސްގަނޑާއި ހަމައަށް އަރާ ހެދުމާކާއި އެކު ކަޅުކުލައިގެ ޖީންސްއެކެވެ. ސާޅީސް ހަތް އަހަރަށް އަޅާފައިވީ ނަމަވެސް، އެއަށްވުރެ ޒުވާންކަމަށް ދައްކަމުން އައީ ފަރުވާތެރިކަމާއެކު ބަލަހައްޓަމުންދިޔަ އިސްތަށިގަނޑުގެ އެހީގައެވެ.

“މަންމާ. ކޮންއިރަކުތޯ ބޭބެ ދުރުވަނީ؟ ” ފަހަތުން ރޫބީއަށް އޭނާގެ ނަވާރަ އަހަރަށް އަޅާފައިވާ އަންހެން ދަރިފުޅު ރިޔާ ފެނުމާއެކުގައި ރޫބީގެ ހިނުތުންވުން ފުޅާވިއެވެ.

“ބައްޕަ ވަނީ އިލްފް ބަލާ ދުރުވެ. އިރުކޮޅަކުން އަންނާނެ. ދަރިފުޅާ، ކޮޓަރި ކިހިނެއްތަ؟ ” ކޮޓަރީ ދޮރު ބޮޑަށް ހުޅުވާލަމުން ރޫބީ އަހާލިއެވެ. މުޅި ކޮޓަރިވީ ކަޅާއި އަޅި ކުލައިން ފަރުމާ ކުރެވިފައެވެ. ފާރުގައި ކަޅު ކުލަ ލާފައިވާއިރު ކޮޓަރީ މެދުގައި ބަހައްޓާފައިވާ ބޮޑު ކިންގް ސައިޒް އެނދުގައިވެސްވީ ކަޅުކުލައެވެ. ނަމަވެސް އޭގެ މަތީގައި އަޅާފައިވީ ގަދަ އަޅިކުލައިގެ ބްލޭންކެޓެކެވެ. ބިތަކަށް ވާހެން ބޮޑު އަލަމާރިއެއް ހުރިއިރު ކޮޓަރީގައި ވަކިން އިށީންދެވޭނެހެން ދެ ސޯފާ އިންއިރު ކުޑަ ކަޅުކުލައިގެ ބިއްލޫރި މޭޒެއްވެސް އިނެވެ. ލައިޓުގެ ބަދަލުގައި މަތީގައި ބޮޑު ޗާންދަލިޔާއެއް ލާފައި އިނުމުން ބަލައިލިމީހެއް އާޝޯހުވާނެއެވެ.

“ވާއު. ބޭބެއަށް ކަމުދާނެކަން ޔަޤީނެއްނު. ” ދެލޯ ބޮޑުކޮށްލާފައި ކޮޓަރިތެރެއަށް ނަޒަރު ހިންގާލަމުން ރިޔާ ބުންޏެވެ. އިސްކޮޅުން ދިގުވެފައި ހިމަތޮޅި ހަށިގަނޑެއްގެ ވެރިއެކެވެ. ޤުދުރަތުން ލިބިފައިވާ ދޮން ހަށިގަނޑާއި އެ މުށި ކުލައިގެ ދެލޮލުގައި ވިދުވަރެއްވިއެވެ. ކޮނޑާ ހިސާބަށް ކޮށާލެވިފައިވާ ބުޅި އިސްތަށިގަނޑު ދޫކޮށްލާފައިވާއިރު ބަލައިލި މީހަކަށް އެ މޫނުމަތިން މަޢުޞޫމުކަން ފެންނާނެއެވެ.

“ޕާފެކްޓް! ހިނގާ ތިރިއަށް. މިހާރު އަންނާނެ. ” ކޮޓަރީ ދޮރުލައްޕާލަމުން ދެމައިން ހިނގައިގަތީ ތިރިއަށެވެ.

***

‘ޑާކްޖެމް’ ގެއަށް ވަދެގެން އައި ކަޅުކުލައިގެ ކާރު ގޭގެ މައި ދޮރުމައްޗަށް މަޑުކޮށްލުމާއި އެކު މެދު އުމުރެއްގެ ފިރިހެނެއް ނުކުތެވެ. ލައިގެންހުރި ކަޅުކުލައިގެ ސޫޓާއި ބޮލުގައިވާ ހުދު އިސްތަށިތަށް ޖެލް ލައި ފަހަތަށް ގެނެސް ތަތްކޮއްލާފައިވާއިރު ބަލައި ކޮންމެ މީހަކަށް އެއީ ކޮން ފެންވަރެއްގެ މީހެއްކަން އެނގޭނެކަން ގައިމެވެ. އެ މޫނުމަތީގައިވީ މީހުން ޖެހިލުންވާފަދަ ގޮތެކެވެ. ޝަޙުސިއްޔަތު ވަރުގަދަވެފައި މޫނުމައްޗަށް ގެނެސްފައި ހުރި ސީރިއެސްކަމުން މީހުންގެ ހިތްތައް ގުޑުވާލާނެކަން ގައިމެވެ.

ކުއްލިއަކަށް ކާރުގެ ފަހަތު ދޮރު ހުޅުވާލާފައި ނިކުތް ޒުވާނާ، ބަންލާފައި ދޮރުޖަހާލިއިރު ކާރުވެސް ގުޑިގެން ދިޔައެވެ. އޭރު ރޫބީ އާއި ރިޔާވެސް އެދެމީހުން ކައިރީގައި އައިސް ހުއްޓިލިއިރު ހުރީ ފާޑަކަށް ޖެހިލުންވެފައެވެ.

“އިލްފް، މައިޑް ޔުއަރ މެނާރސް! ” ހަރުކަށި ރާގަކަށް އިލްފްއަށް ބަލާލަމުން އަހްވަމް، އިލްފްގެ ބައްޕަ ބުނިއިރު އެ މޫނުމަތީގައިވީ މީހުން ޖެހިލުންވާފަދަ ކުލަވަރެކެވެ.

“އަހަރެން ކައިވެންޏެއް ނުކުރާނަން. ” އަޑަށް ހަމަހިމޭންކަން ވެރިކުރުވަމުން އިލްފް ބުނިއިރު އެ މޫނުމަތިން ފެނުނީ ރުޅިވެރިކަމެވެ. ކަޅުކަންގަދަ ބުމަ ގޮއްޖަހާލައިގެން ހުރިއިރު ކަތުރުކަށިގަނޑަށް ވާންވެގެން ދިޔަ ގޮތުން ފިރިހެންވަންތަކަން އިތުރުކޮށްދިނެވެ. އެ ނޫކުލައިގެ ދެލޮލުން ފެނުނު އަލިފާން ރުޅިގަނޑުން އަހްވަމްވެސް އެންމެ ފަހުން އެހެން ދިމާލަކަށް ނަޒަރު ބަދަލުކޮށްލި އެވެ. އެ ދެލޮލުން ފެނުނީ ނުރައްކާތެރި ވިދުވަރެކެވެ. ދެއަތް މުއްކަވާލައިގެން ހުރިގޮތުން ރުޅިގަނޑު ކޮންޓްރޯލްކުރަން މަސައްކަތް ކުރަމުންދިޔަކަން އެނގެ އެވެ. ދިގު އިސްކޮޅަކާއި ބައިމަތިފުޅާ ހަށިގަނޑެކެވެ. ކުރުކޮށް ކޮށާލެވިފައިވާ އިސްތަށިގަނޑު ވައިގެ ސަމާސާގައި ބައިވެރިވަމުންދިޔަ އެވެ. ދިގު އެސްފިޔަތަކުގެ ނިވަލުގައި ދެލޮލުގައިވީ ރުޅިވެރިކަން ވަންހަނާކުރެވޭތޯ އިލްފް ދިޔައީ މަސައްކަތްކުރަމުންނެވެ. ތަރުތީބުކަމާއިއެކު ފަޅާފައިވާ ތުނި ތުނބުޅިން އިތުރު ފުރިހަމަކަމެއް ގެނެސްދެއެވެ. ހުރިހާ ރީތިކަމެއް ހުސްކޮށްލައިގެން ހުރި ޒުވާނެކެވެ.

ވެރިވެފައިވާ ހަމަހިމޭންކަން ފޫއަޅުވާލާފައި އެކަކަށްވެސް އެއްޗެއް ބުނާކަށް ނުކެރުނެވެ. އިލްފްގެ ދެލޮލުގައިވީ ނުރައްކާތެރި ވިދުވަރުފެނިފައި ޚުދު އަހްވަމްއަށް ވެސް އެއްޗެއް ބުނާކަށް ނުކެރުނެވެ. މަންމަ އާއި ރިޔާއަށް ބަލާލުމެއްވެސް ނެތި ހަލުވިކަމާއިއެކު އިލްފް ގެއަށް ވަދެގެން ދިޔައެވެ.

“ކޮބާ އަހަރެން އޭރުވެސް ބުނިން އަހްވަމް ކައިރީ އަހަރެން ކައިވެނީގެ ވާހަކަ އިލްފް ކައިރީ ދައްކާނަމޭ. އޭނަ ރާއްޖޭ ފަސްގަނޑުގަ ފައިވެސް އެ އެޅީ ނުވަ އަހަރުފަހުން. އަނެއްކާ އަނބުރާ ރާއްޖެއިން ބޭރަށް ދާން ޚިޔާލުކޮށްފިއްޔާ؟ ” ހިތްހަމަ ނުޖެހުނުވަރުން ރިޔާ އެތަނުގައި ހުރިނަމަވެސް، ރޫބީއަށް ބުނެވުނެވެ. މަންމަ އާއި ބައްޕައަށް ބަލާލަމުން ރިޔާ އަވަހަށް އެތަނުން ހިނގައިގަތީ އަވަސް ފިޔަވަޅުތަކެއްގައެވެ.

“އަހަންނެއް ނުބުނަން. ނޭނގެ ކިހިނެއްކަމެއް އޭނައަށް އެނގުނީކީ. ” ރޫބީއަށް ބަލާލަމުން އަހްވަމް ބުންޏެވެ.

“އައިހަމް! ޔަޤީން އޭނަކަން ބުނާނީ..” ރުޅިގަނޑު ކޮންޓްރޯލްކުރަން މަސައްކަތް ކުރަމުން ރޫބީ ބުންޏެވެ.

“ރޫބީ. ދޭ ގޮސް އޭނާއަށް ވިސްނާދީ. ގޮސް އާދޭސް ކުރިއަސް ހެޔޮ އޭނަ އެއްބަސް ވަންދެން. އެނގެއެއްނު މީ މުހިންމު ކަމެއްކަން. އަހަރެމެން މިކަން ކުރަންޖެހޭނެ. ކޮންމެ ގޮތެއް ހަދާފަވެސް އިލްފްގެ ކައިވެނިކުރަން ޖެހޭނީ ޒީކް އާ ” މަޑުމައިތިރިކަމާއި އެކު ރޫބީއަށް ވިސްނައިދޭފަދަ ރާގަކަށް އަހްވަމް ބުންޏެވެ. ރޫބީ ހަމައެކަނި ބޯޖަހާލީއެވެ.

“ޒީކް އަންނަނީ ކޮންއިރަކު؟ ” އަހްވަމްއަށް ބަލާލަމުން ރޫބީ އެއްސެވެ.

“އިރުކޮޅަކުން. އޭގެ ކުރިން އިލްފްއަށް ވިސްނާދެވޭތޯ މަސައްކަތްކުރޭ. ” ރޫބީއަށް ބަލާލަމުން އަހްވަމް ބުންޏެވެ. ރޫބީ ބޯޖަހާލިއެވެ.

***

“ވަދޭ..” ކޮޓަރީ ދޮރުގައި ޓަކިޖަހާލި އަޑު އިވުމުން އިލްފް ބުނީ ރުޅިގަނޑު ކޮންޓްރޯލްކުރަން މަސައްކަތް ކުރަމުންނެވެ. ނަމަވެސް، ކަޅުކަންގަދަ ބުމަގޮށްޖަހާލައިގެން ހުރިއިރު އޭނާގެ ނޫކުލައިގެ ދެލޮލުން އަލިފާންކަނި ބުރަމުންދާހެން ހީވިއެވެ. ރުޅިގަދަ ކަމުގެ އިންތިހާއެވެ.

“ދަރިފުޅާ އިލްފް. މި ކައިވެނިކުރަން އެއްބަސްވެބަލަ. އިތުރު އެހެން ގޮތެއް ނެތް. ” ކިންގް ސައިޒް އެނދުކައިރީގައި ހުއްޓިހުރި އިލްފް އާއި ދިމާލަށް މިސްރާބުޖަހަމުން ވިސްނުންތެރިކަމާއިއެކު ރޫބީ ބުންޏެވެ.

“ފުރަތަމަ މަމް. އަޅުގަނޑަކަށް އަޅުގަނޑުގެ ކައިވެނި އޮންނަ ކަމެއްވެސް ނޭނގޭ. ދެވަނަ ކަމަކަށް އަޅުގަނޑަށް އަޅުގަނޑާއި ކައިވެނިކުރާ ކުއްޖާގެ ނަންވެސް ނޭނގޭ. ތިންވަނަ ކަމަކަށް ކީއްވެ އިތުރު އެހެން ގޮތެއް ނެތީ؟ ” ދެބުމަގޮއްޖަހާލާފައި ރޫބީ އާ ދިމާލަށް ބަލާލަމުން އިލްފް ބުންނިއިރު އެ އަޑުގައިވީ ގޮތްދޫނުކުރުމެވެ.

“އެއީ، އެ-މީހުން މަރުވުމުގެކުރިންވީ ވަޢުދެއް. ” ހުއްޓަމުން ކަހަލަ ގޮތަކަށް ރޫބީ ބުނީ އިލްފް އާއި ހަތަރުކަޅި ހަމަކޮއްގެންނެވެ. ހީވީ އެ ނޫކުލައިގެ ދެލޮލުން ތަފާތު އަސަރެއް ފެނޭތޯ އުޅޭހެންނެވެ. ނަމަވެސް، އެދެލޮލުން އެއްވެސް އަސަރެއް ނުފެނުނެވެ.

“ތިބުނީ އެމީ..” އިލްފްއަށް އެހިސާބަށް ބުނެވުނުތަނާ ރޫބީ ބޯޖަހާލިއެވެ. އިލްފްއަށް ދެއަށް މުއްކަވާލެވުނުއިރު ކަތުރުކަށިގަނޑަށް ވާންވެގެން ދިޔައެވެ. ދެލޮލުން ތަފާތު އަސަރެއް ފެނިލި ނަމަވެސް، ނިކަން އަވަހަށް އިޙުސާސްތައް ވަންހަނާކޮށްލިއެވެ.

“ކޮން ނަމެއް އެ އަންހެންކުއްޖާއަށް ކިޔަނީ؟ ” އިލްފްގެ އަޑުގައިވީ ފިނިކަމެވެ.

“ޒީކް، ޒީން އާ ރާކިންގެ ދަރިފުޅު.” އިލްފްގެ އަތުގައި ހިފަހައްޓާލަމުން މަޑުމައިތިރިކަމާއިއެކު ރޫބީ ބުންޏެވެ. އެވަގުތު އިލްފްގެ ދެލޮލުން ވޭނެއް ފެނިލިއިރު އެ ދެލޮލުގައިވީ ތަފާތު އަސަރެކެވެ. ނަގައިގަންނަން އުނދަގޫ އަސަރެކެވެ.

“ކޮބާ އެމީހުން؟ ” ދުރުބަލާލަމުން އިލްފް އެއްސެވެ.

“އެމީހުން ނި-” ރޫބީ ބުނަން އުޅުނު ނަމަވެސް، އޭނާގެ ޖުމުލަ މެދުކެނޑިގެން ދިޔައީ ރިޔާ ދޮރުހުޅުވާލުމުންނެވެ.

“މަންމާ. ޒީކް ދައްތަ އަތުވެއްޖެ. ” ހިނިތުންވެލަމުން ރިޔާ ބުންޏެވެ.

“މަންމަ އެބަ ދަން އިލްފް ގޮވައިގެން. ދަރިފުޅު ދޭ ތިރިއަށް. ” ހިނިތުންވެލަމުން ރޫބީ ބުނެލުމާއެކުހެން ބޯޖަހާލާފައި ރިޔާ ދޮރުލައްޕާލިއެވެ.

“އަޅުގަނޑު ކައިވެނި ކުރާނަން. ” ދެއަށް މުއްކަވާލަމުން އިލްފް ބުންޏެވެ.

“މަންމަ ވަރަށް އުފާވެއްޖެ. ” އިލްފް ގައިގައި ބައްދާލަމުން ރޫބީ ބުނިއިރު އޭނާގެ ތުންފަތްމަތީގައިވީ ފުޅާ ހިނިތުންވުމެކެވެ.

“ހިނގާ ތިރިއަށް. އެންޑް ބިހޭވް ” އިންޒާރުގެ ނަޒަރަކުން އިލްފްއަށް ބަލާލަމުން ރޫބީ ބުނެލިއެވެ. އިލްފް ކޮނޑުއަރުވާލަމުން ކޮޓަރިން ނުކުންނަން މިސްރާބުޖެހިއެވެ.

***

“ޒީކް؟ ” ފަހަތުން ރޫބީގެ އަޑުއިވުމުން ޒީކް ފަސް އެނބުރި ފަހަތް ބަލާލިއެވެ. ކުޑަކޮށް ހުއްޓުންއެރި ނަމަވެސް، ގަދަކަމުންކަހަލަ ގޮތަކަށް ހިނިތުންވެލަމުން އިސްޖަހާލިއެވެ. ރޫބީ ކައިރީގައި ހުރި ޒުވާނާ އާއި ދިމާލަށް ބަލާލަން ބޭނުން ނުވީ ކީއްވެކަމެއް ޚުދު ޒީކްއަށް ވެސް ނޭނގުނެވެ.

“ދަރިފުޅު ހާލު ކިހިނެއްތަ؟ ” ޒީކްގެ އަތުގައި ހިފަހައްޓާލަމުން ގެނެސް ސޯފާގައި އިށީންނަމުން ރޫބީ އަހާލީ ހިނިތުންވަމުންނެވެ.

“ރަނގަޅު. ދައްތަ ކިހިނެއްތޯ؟ ” ވައި އަޑަކުން ޒީކް އަހާލިއިރު ރޫބީއަށް ޒީކް ބުނި ޖުމުލަ އަޑުއިވުނީ ކިރިޔާއެވެ.

“ހަމަ ރަނގަޅު. އިލްފް، މީ ޒީކް. ޒީކް އެއީ އިލްފް. ” އިލްފް އާއި ޒީކްއަށް އިށާރާތް ކުރަމުން ރޫބީ ބުންޏެވެ. އިލްފް ޒީކް އާ ދިމާލަށް ބަލާލާފައި ފޯނަށް ނަޒަރުހުއްޓާލިއިރު، ޒީކް އިސްޖަހާލައިގެން އަތުގެ އިންގިލިތަކާއި ކުޅެލަކުޅެލާ އިނެވެ.

ރިޔާ އިލްފްގެ އަތުގައި މަޑުމަޑުން ޖަހާލުމުން އިސްއުފުލާލާފައި ރިޔާގެ ނަޒަރު ހުއްޓިފައިވާ ދިމާލަށް ބަލާލަމުން ފޯނު ނިއްވާލިއެވެ. ސޯފާގައި އިށީންނަމުން އަހްވަމް ވަކިވަކިން އެންމެންނަށް ބަލާލަމުން ހިނިތުންވެލިއެވެ. އެހެން އެންމެން ރައްދުގައި ހިނިތުންވެލި ނަމަވެސް، އިލްފްގެ މުނުމަތީގައިވީ ހުސްކަމެވެ.

“މިހާރު އަހަރެން ގަބޫލުކުރަނީ އިލްފް އާ ޒީކް ދެމީހުން ތަޢާރަފް ވެއްޖެކަމަށް. މާދަން ރޭ ކައިވެނިކުރެވިގެން ދާނެ. ” މޫނުމައްޗަށް ސީރިޔެސް ނަޒަރެއް ވެރިކުރުވަމުން އިލްފްގެ މޫނަށް ނަޒަރު ހުއްޓާލައިގެން ހުރެ އަހްވަމް ބުންނެވެ.

ދެއަތް މުއްކަވާލާފައި ދަތްތައް ޖައްސާ ބާރުކޮށްލިއިރު ދެލޯ މަރާލާފައި ހުޅުވާލީ ރުޅިގަނޑު ކޮންޓްރޯލްކުރުމުގެ ނިޔަތުގައެވެ. ކައިވެނިކުރާ ވިސްނުމެއް ނުގެންގުޅުނު ނަމަވެސް، ތަޤުދީރުގައިވާ ލިޔެވިފައިވާ ގޮތެއް އޭނާއަކަށް ނުހުއްޓުވޭނެއެއް ނޫން ހެއްޔެވެ؟

ޒީކް އާއި ދިމާލަށް ނަޒަރުހުއްޓާލަމުން އިލްފް އެ އަންހެންކުއްޖާއަށް ނަޒަރު ހިންގާލިއެވެ. ލައިގެންހުރީ ކަޅުކުލައިގެ ކަކުލާއި ހަމައަށް އަރާ ގަޔަށް ދޫ ހެދުމަކާއި ކަޅުކުލައިގެ ޖިންސެކެވެ. އިސްތަށިގަނޑު ނިވާކުރެވިފައިވީ ކަޅުކުލައިގެ ޝޯލްއެއްގެ އެހީގައެވެ. މޫނުމަތީގައި މޭކަޕުގެ ކުޑަ ނަމަވެސް، އަސަރެއް ނެތްކަމުގައި ވީނަމަވެސް، ގަދަ ފިޔާތޮށިކުލައެއް ވެރިވެފައިވާ ތުނި ތުންފަތެކެވެ. ހިމަ ބަޓަން ނޭފަތާއި ދޮން ވަށް މޫނެކެވެ. ހިތިފަތު ބުމައަކާއި ބޮޑު ދެލޮލެވެ. ކަޅިރަވައިގައި ތޫނުކަމެއް ވާއިރު މައްޗަށް ލެނބިފައިވާ ބޯ އެސްފިތަކެވެ. އިލްފް އާއި ޒީކްގެ ހަތަރުކަޅި ހަމަވެގެން ދިޔައިރު އިލްފްއަށް އެ ކަޅުދެލިކޮޅެއްފަ ކަޅިން ފެނުނީ ހުސްކަމެވެ. އެ ދެލޮލުގައި ވިދުމެއްނުވެއެވެ. ހީވީ ނޭވާލިއެއްކަމަކު އެތެރެއިން މަރުވެފައިވާ ހެންނެވެ. އެކަމަކު އެއީ ކީއްވެ ހެއްޔެވެ؟

އިލްފްގެ ތޫނު ނަޒަރު އޭނާއަށް ހުއްޓިފައިވުމުން އިސް އުފުލާލަމުން ޒީކް އިލްފްއާއި ހަތަރުކަޅި ހަމަކޮށްލިއެވެ. އެ މޫނުމަތީގައި އެއްވެސް އަސަރެއް ކުރެހިފައިނުވާއިރު އެ ދެލޮލުގެ ރީތިކަން ފެނި ޒީކް އާޝޯޚުވިއެވެ. ކަޅުކަންގަދަ ބޯ އެސްފިޔަތަކުގެ ނިވަލުގައިވީ ނޫކުލައިގެ ދެލޮލުން ޒީކްއަށް އެއްވެސް ކަހަލަ އަސަރެއް ނުފެނުނެވެ. ހީވީ ހުރިހާ އަސަރެއް އެ ނޫކުލައިގެ ދެލޮލުގައި ފޮރުވާލެވިފައިވާހެންނެވެ. އެންމެފަހުން އިސްޖަހާލީ އޭނާގެ ދެލޮލުން އިލްފްއަށް އެއްޗެސް އެނގިދާނެތީ، ސިއްރެއް ފޮރުވަންހެން ހީވިއެވެ.

“އެހެންވީމާ ދެމީހުންވެސް ކައިވެންޏަށް އެއްބަސް ދޯ؟ ” ޒީކް އާއި އިލްފްއަށް ބަލާލަމުން ރޫބީ އަހާލިއެވެ. ޒީކް އާއި އިލްފްގެ ހަތަރުކަޅި ހަމަވެގެން ދިޔައިރު ދެމިހުންވެސް ބޯޖަހާލިއެވެ.

***

“އެލީން! ހަމަ މިހާރު އާދޭ އަހަރެން ކުރިމައްޗަށް. ” މުޅި ގޭތެރޭގައި ގުގުމާލައިގެން ދިޔައީ އަމްޖަދުގެ ރުޅިވެރި ހަޅޭކުގެ އަޑެވެ. ކޮޓަރީ ފާހަނައިން ނުކުތް އެލީންގެ ދެލޯ ބޮޑުވެގެންދިޔައިރު، ކޮޓަރިން ނުކުންނަން ދުއްވައިގަނެވުނީ އެންމެ ސިކުންތެއްވެސް ލަސްވެއްޖެނަމަ ދޮންޕައްބަ އޭނާއަށް އަދަބު ދޭނެކަން އެނގޭނެތިއެވެ. ނުކުތުމާއިއެކުހެން ދޮރު ކުރިމަތީގައި ހުއްޓެވުނީ އަމްޖަދުގެ އަތުގައި އޮތް ބެލްޓު ފެނިފައެވެ. ދެލޯ ބޮޑުކޮށްލަމުން އުނދަގޫގޮތަކަށް ހިތްދިރުވާލީ ދެން ވާނީ ކިހިނެއްކަން އޭނާއަށް މާ ރީތިކޮށްވެސް އެނގޭތިއެވެ. ތާޒާ މޫނުމަތީގައި ދާތިކިތައް ވިދަން ފެށިއިރު ހިތް ތެޅެމުންދިޔަލެއް ބާރުކަމުން ބޭރަށް ނިކުމެދާނެހެން ހީވިއެވެ.

ބޮޑު ދެލޮލަކާއި ހިމަތޮޅި ހަށިގަނޑެއްގެ ވެރިއެކެވެ. ދޮން މޫނެކެވެ. ހިމަ ދިގު ނޭފަތަކާއި މަޑު ފިޔާތޮށި ކުލައިގެ ތުންފަތެކެވެ. ލާފައިހުރީ ފިޔާތޮށިކުލައިގެ ފަލަމަސްގަނޑުން ތަންކޮޅެއް މައްޗަށް ހުރި އަތްދިގު ހެދުމަކާއި ކަޅުކުލައިގެ ހަރަވާޅެކެވެ. އިސްތަށިގަނޑު ނިވާކުރެވިފައިވަނީ ކަޅުކުލައިގެ ވަށް ބުރުގަލެއްގެ އެހީގައެވެ. މޫނުމަތީގައި ފަސް އިނގިލީގެ ނިޝާނެއް ހުރިއިރު ތުންފަތް ކައިރީގައި ލޭގެ އަސަރު ހުއްޓެވެ.

“ހަމަ މިހާރު އާދޭ މިތަނަށް! ” ރުޅިވެރިކަމުން ފުރިގެންވި ނަޒަރަކުން އެލީންއަށް ބަލާލަމުން އަމްޖަދު ހަޅޭއްލަވައިގަތެވެ. އޭރު އޭނާގެ މަންމަ މާހިޔާ ސޯފާގައި އިށީންދެގެން އިން އިރު، އަމްޖަދުގެ އަންހެން ދަރިފުޅު ނައުރީ އިނީ ކާބަދިގޭގައި އިށީންދެގެން ކާންށެވެ.

ދޮންބައްޕަ އިތުރަށް ރުޅިއަރުވަން ބޭނުން ނުވުމުން އަވަސް ހިނގުމެއްގައިގޮސް އެލީން އަމްޖަދު ކައިރީގައި ހުއްޓިލިއިރު ހުރީ ބިރުން ތުރުތުރު އަޅައެވެ. ކުއްލިއަކަށް އަމްޖަދު އެލީންގެ ކޮލުގައި ހިފާ ބާރުކޮށްލަމުން މޫނުމައްޗަށް އެތިފަހަރެއް ވީއްލާލިއެވެ. ވޭނުން ފުރިގެންވި އާހެއް ދެތުންފަތް ފުއަޅުވާލާފައި ނިކުތް އިރު ބެލެންސް ކަޓައިގެން އެލީން ބިންމައްޗަށް ވެއްޓުނެވެ. އެވަގުތު އޭނާ ނުވަމަހާއި ނުވަދުހަވު ބަނޑުއަޅާ ވިހެއި މައިމީހާގެ ހުނުމުގެ އަޑު މުޅިތަނުގައި ގުގުމާލައިގެން ދިޔައެވެ. އާދޭހުން ފުރިގެންވީ ގޮތަކަށް ނައުރީއަށް ބަލާލި ނަމަވެސް، އޭނާ އިނީ ނުލަފާ ހިނިތުންވުމެއް ވެރިކުރުވައިގެން ނެވެ.

ކުއްލިއަކަށް އަތުގައި އޮތް ބެލްޓުން އަމްޖަދު އެލީން ގައިގައި ޖެހުނި ތަނެއްގައި ޖަހަމުން ދިޔައިރު މުޅި ގޭތެރޭގައި ގުގުމާލާފައިވީ އެލީންގެ ވޭނުން ފުރިގެންވި އަޑެވެ. ނަމަވެސް، އެކަމަށް އަޅައިލުމެއްނެތި އަމްޖަދު އޭނާ ގައިހުރި ބާރެއް ލާފައި ބެލްޓުން އެލީންގެ ގައިގައި ޖަހަމުން ދިޔައެވެ. ހިނދުކޮޅެއްފަހުން އަޑު މަޑުވަމުން ގޮސް އެއްކޮށް އެލީންގެ އަޑު ހިނދިގެން ދިޔައިރު ހުސްވުމެއްނެތް ކަރުނަތައް ދެލޮލުން ފައިބަމުންދިޔައިރު މަޑުމަޑުން އެ ނިކަމެތި އަންހެންކުއްޖާގެ ދެލޯ މެރިގެން ދިޔައެވެ. ނަމަވެސް އަމްޖަދު ހުއްޓައިނުލައި އެލީން ގައިގައި، ބެލްޓުގެ އެހީގައި ޖަހަމުންދިޔައެވެ. އެ ހިތުގައި ރަޙުމްގެ ކަންފުޅެއްވެސް ނެތީ ހެއްޔެވެ؟

***

“އޭ ސީރިއެސްކޮށް މާދަން މެރީ ކުރަނީތަ؟ ” ދެލޯ ބޮޑުކޮށްލާފައި އިލްފްއަށް ބަލާލަމުން ރަޔާން އަހާލިއެވެ. ރަޔާންއަށް ބަލާލަމުން ބޯޖަހާލާފައި އިލްފް ދެކޮނޑު އަރުވާލީ ފަރުވާކުޑަ ގޮތަކަށެވެ.

ކަޅުކަންގަދަ އިސްތަށިގަނޑަކާއި ދިގު އިސްކޮޅެކެވެ. ލައިގެން ހުރީ އައިސް ބްލޫ ކުލައިގެ ޖިންސް އަކާއި ކަޅު ކުލައިގެ ޓީޝާޓެކެވެ. ކަޅުކުލައިގެ ކަޅީގައި ވަނީ ލާނެތްކަމުގެ ވިދުވަރެކެވެ. އެއްމިޔަކުން ހީނލައިގެން ހުރި ގޮތުން ބަލައިލި މީހަކަށް ފެންނާނީ ލާނެތްކަމުގެ އިންތިހާއެވެ. އެއީ ރަޔާން އެވެ. ރުޅި އަކީ ކޮބައިކަމެއް، ރުޅި އަންނާނީ ކިހިނެއްކަމެއްވެސް އޭނާއަކަށް ނޭނގެއެވެ.

ކުއްލިއަކަށް އިލްފްގެ ކޮޓަރީ ދޮރުހުޅުވިގެން ދިޔައިރު ކޮޓަރިއަށް ވަތް ޒުވާނާގެ މޫނުމަތިން ހިނިތުންވުމެއް ފެންނަން ހުއްޓެވެ. ދިގު އިސްކޮޅަކާއި ބައިމަތިފުޅާ ހަށިގަނޑެކެވެ. ކަޅުކަންގަދަ ކަޅިއެކެވެ.

“ކައިޝް. ކޮބާ ޑޭން؟ ” ކައިޝްއަށް ބަލާލަމުން ކުޑަކޮށް ހިނިތުންވެލަމުން ރަޔާން އަހާލިއެވެ. އެވަގުތު ކައިޝްގެ ފަހަތުން ދާނިޔަލް ކޮޓަރިއަށް ވަދެގެން އައެވެ. އިސްކޮޅުން ދިގު ބައިމަތި ފުޅާ ހަށިގަނޑެކެވެ. ކަޅުކަންގަދަ އިސްތަށިގަނޑު ކުރުކޮށް ކޮށާލެވިފައި ވިޔަސް ފަންވެފައި ކަޅުކަން ގަދައެވެ. މަޑު މުށިކުލައިގެ ކަޅީގައިވަނީ ތޫނުފިލިކަމެވެ. އެސްފިޔަތަށް ތިރިކޮށްލިގޮތުން ހީވީ ބޮޑު ސިއްރެއް ފޮރުވަން މަސައްކަތްކުރަމުން ދިޔަހެންނެވެ. ލައިގެން ހުރީ ކަޅުކުލައިގެ ހޫޑީ އަކާއި މުށިކުލައިގެ ޖިންސެކެވެ.

ރަޔާން އާއި ކައިޝްގެ އިތުރުން ދާނިޔަލް އަކީ އިލްފްގެ އެއްއަތްކަހަލަ ގާތް ރަހުމަތްތެރިންނެވެ. ރަޔާން އަކީ ލާނެތްކަމުގެ ހައްދެއް ނެތްއިރު ކައިޝް އަކީ މަޑުމައިތިރި ޒުވާނެކެވެ. ދާނިޔަލް އަކީ ބަސްމަދު ވިސްނުންތޫނު ޒުވާނެކެވެ.

މި މީހުންނާއި ޚިލާފަށް އިލްފް އަކީ ރުޅިގަދަކަމުގެ އިންތިހާއެވެ. އެހެން މީހެއް އޭނާއާއި ދޭތެރޭގައި ވިސްނާގޮތެއް ބެލުމަކީ އޭނާއަށް މުހިންމުކަމެއް ނޫނެވެ. އޭނާގެ މޫނުމަތިން ރުޅިވެރިކަން ފިޔަވާ އެހެން އަސަރެއް ފެނުމަކީ އަވާމެންދުރެކެވެ.

“ކޮބާތަ ވާންއުޅޭ އަނބިމީހާ؟ އަހަރެމެންނަށް ދައްކާވެސް ނުލަންތަ؟ ” އިލްފްގެ ކޮނޑުގައި އަތުން ޖަހާލަމުން ރަޔާން އެއްސެވެ. ރުޅިވެރި ނަޒަރަކުން ރަޔާންއަށް ބަލާލާފައި އިލްފް އޭނާގެ ކަޅުކަންގަދަ އިސްތަށިގަނޑުގައި އަތުން ފުނާއަޅާލިއެވެ.

“ވަޓް؟ ” ޙައިރާންވެފައިހުރެ އިލްފްއަށް ބަލާލަމުން ކައިޝްއަށް ބުނެވުނެވެ. ޙައިރާން ނުވާންވީ ސަބަބެއްވެސް ނެތެވެ. ދާނިޔަލްވެސް އެއްބުމަ ހިއްލާލަމުން ސުވާލުގެ ނަޒަރަކުން އިލްފްއަށް ބަލާލިއެވެ. އެ އެންމެންނަށް ނަޒަރެއް ދެމުން ދެކޮނޑު އަރުވާލާފައި އިލްފް އެއްބަސްވުމާއިއެކު ކައިޝް އަނގަ ހުޅުވުނުއިރު ދާނިޔަލްގެ ތުންފަތްމަތީގައި ކުޑަ ހިނިތުންވުމެއް ދުވެލިއެވެ. ރަޔާން އިނީ ލާނެތް ހިނިތުންވުމެއް ވެރިކުރުވައިގެންނެވެ.

“އަހަރުމެންނަށް ޓްރީޓްއެއް ދޭންވާނެ އެނގެ ތިހެންވިއްޔާ. ” އިލްފްގެ ކޮނޑުގައިޖަހާލަމުން ކައިޝް ބުންޏެވެ. އިލްފް ހަމައެކަނި ދެކޮނޑުއަރުވާލީއެވެ.

“އޭ ޒެފް ނާދޭ……”

“އިލްފް ކައިވެނިކުރަން އުޅޭ ކުއްޖާ އާ ބައްދަލުކޮއްދޭން ހިނގާބަލަ؟ މިގޭގައެންނު އޭނަ އުޅެނީ. ” ރަޔާންގެ ޖުމުލަ މެދުކަނޑާލަމުން ތަންކޮޅެއް ބާރަށް ދާނިޔަލް ބުންޏެވެ. ހީވީ އިލްފްގެ މޫޑު ހަރާބުވެދާނެތީވެ އަވަހަށް ވާހަކަ ބަދަލުކޮށްލަން މަސައްކަތްކުރިހެންނެވެ. އިލްފް ހުންނަ ތަނެއްގައި އެ ނަން ގަނެފިނަމަ ވާނެގޮތް އެންމެ ރަނގަޅަށް އެނގޭނީ ދާނިޔަލް އަށެވެ.

“އާން، ހިނގާ. ” މުއްކެވިފައިވާ ދެއަތް ޖީބަށް ޖަހާލަމުން އިލްފް ހިނގައިގަތީ ކޮޓަރިން ނުކުންނާންށެވެ. ނަމަވެސް، ރަޔާން އާއި ކައިޝްއަށް އިލްފްގެ މޫޑަށް އައި ބަދަލު ފާހަގައެއް ނުވިއެވެ.

“އަހަރެމެން ތިރީގަ މަޑުކުރާނަން. އިލްފް އާދޭ އޭނަ ގޮވައިގެން. ” މިފަހަރުވެސް ދާނިޔަލް އެހެން ބުނުމުން އިލްފް ބޯޖަހާލިއެވެ. ހީވީ އޭނާވެސް މަސައްކަތްކުރަމުން ދިޔައީ ދެންމެ ނަން ގަތް މީހާގެ މައުޟޫއިން އަރައިގަނެވޭތޯހެންނެވެ.

ތިން ވަނަ ފަންގިފިލާއަށް އެރިއިރު އިލްފްގެ ދެލޮލުން ފެންނަމުންދިޔައީ ރުޅިވެރިކަމެވެ. ހަލުވި ފިޔަވަޅުތަކެއް ނަގަމުން ތިންވަނަ ފަންގިފިލާގައިވާ ކޮޓަރިބަރި ތެރެއިން ދެވަނައަށްވީ ކޮޓަރީގެ ދޮރުގައި ޓަކިޖަހާލިއެވެ. އިރުކޮޅެއްފަހުން ކޮޓަރީ ދޮރު ހުޅުވާލިއިރު ޒީކް އާއި އިލްފްގެ ހަތަރުކަޅި ހަމަވި ނަމަވެސް، ޒީކް އިސްޖަހާލިއެވެ.

“ތިރިއަށް އާދޭ. ” އިރުކޮޅަކު ޒީކްއަށް ނަޒަރުހުއްޓާލައިގެންހުރެ އިލްފް ރުޅިވެރިކަން ހިނދާލަން މަސައްކަތް ކުރަމުން ބުންޏެވެ. ސުވާލުގެ ނަޒަރަކުން އިލްފްއަށް ބަލާލާފައި ކޮޓަރީ ދޮރުލައްޕާލަމުން ޒީކް ނުކުތެވެ.

“ތި އެއްޗެހި ލައިގެން ދަނީ؟ ” އެއްބުމަ ހިއްލާލަމުން ޒީކްއަށް ބަލާލާފައި އިލްފް އަހާލިއެވެ.

ޒީކް އޭނާ ލައިގެން ހުރި ހެދުމަށް ނަޒަރު ހިނގާލިއެވެ. ކަޅުކުލައިގެ ކަކުލާއި ހަމައަށް އަރާ ހެދުމަކާއި ކަޅުކުލައިގެ ޖިންސްއެކެވެ. އަޅައިގެން ހުރީ ތިނެސްކަން ބުރުގަލެކެވެ.

“ކީއްކުރަން ތިރިއަށް މި ދަނީ؟ ” އިލްފް އާއި ހަތަރުކަޅި ހަމަކޮށްލަމުން ޒީކް އަހާލިއެވެ.

“އަހަރެންގެ ރައްޓެހިންނާ ބައްދަލުކުރަން. ” ޒީކްއަށް އިރުކޮޅަކު ބަލަން ހުރުމަށްފަހު އިލްފް ބުންޏެވެ.

“އެހެންވިއްޔާ އަޅުގަނޑު ތިރިއަށް މިދަނީ ހަމަ އެކަނި އެމީހުންނާ ބައްދަލުކުރަން. ނޮޓް ޓު އިމްޕްރެސް ދެމް. ” އަސަރެއްނެތް ގޮތަކަށް އިލްފްއަށް ބަލާލަމުން ޒީކް ބުންޏެވެ. އިލްފް ކުޑަކޮށް ޙައިރާންވި ނަމަވެސް، އެއްމިޔަކުން ހީނލަމުން ތިރިއަށް ދާން ހިނގައިގަތެވެ. އިލްފްގެ ފަހަތުން ތިރިއަށްދާން ހިނގައިގަތް ޒީކް ފަރުވާކުޑަގޮތަކަށް ދެކޮނޑު އަރުވާލިއެވެ

***

މަޑުމަޑުން އެސްފިޔަތައް ޖަހާލަމުން ދެލޯ ހުޅުވާލި އިރު ފުރަތަމަ އެލީންއަށް ހުރިހާ ތަނެއް ފެނުނީ ފުސްކޮށެވެ. ދެ ތިން ފަހަރު ލަސްލަހުން އެސްފިޔަތަށް ޖަހާލުމާއެކުގައި އިރުކޮޅެއްފަހުން ތަންތަން ސާފުކޮށް ފެންނަން ފެށުމާއި އެކު އޮވެވުނީ ގޭތެރޭ ބިންމައްޗަށް ވެއްޓުނު ތަނުގައިކަން އެނގުނެވެ. މީގެކުރިން ހިނގި ކަންތައްތައް ހަނދާނަށް އައުމާއިއެކު ދެލޮލުން ހިފެހެއްޓުމެއްނެތި ކަރުނަތަށް ފައިބާންފެށިއިރު ދެތުންފަތް ފުއަޅުވާލާފައި ހިމޭން ގިސްލުމެއްގެ އަޑު ބޭރުވަމުން ދިޔައެވެ.

ތުރުތުރު އަޅަމުންދިޔަ އަތް ހިއްލާލަމުން ކައިރީގައި އިން ސޯފާގެ އެހީގައި ކޮޅަށް ތެދުވެވޭތޯ މަސައްކަތް ކުރަމުން ކޮޅަށް ތެދުވެވުމާއެކު ކުއްލިއަކަށް އުނަގަނޑަށް އެރި ތަދަކާއިއެކު ބެލެންސްކަޓައިގެން އަނެއްކާ ވެއްޓިއްޖެއެވެ. ދެތުންފަތް ފުއަޅުވާލާފައި އާހެއްގެ އަޑު ބޭރުވި ނަމަވެސް، ދެތުންފަތް ފިއްތާލަމުން ގަދަކަމުން ކަހަލަ ގޮތަކަށް ކޮޅަށް ތެދުވަމުން އެއްޗެހީގައި ހިފަހައްޓަމުން ކޮޓަރިއަށް ވަދެވުމާއިއެކު ނަގަމުންދިޔަ ތަދުގެ ސަބަބުން ދޮރުކައިރިއަށް ތިރިވެވުނެވެ. ނިމުމެއްނެތް ކަރުނަތަށް އޭގެ މަޤާމުދޫކޮށް ފައިބައިގަތްއިރު މި މަންޒަރު ފެންނަ މީހެއްގެ ހިތް، ރަޙުމާއި ހަމްދަރުދީއިން ފުރޭނެކަން ގައިމެވެ.

• – ނުނިމޭ –

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.