ލޯތްބަކުންދިން-22

…… ދެތިން މަސްދުވަހު އައްޑޫގައި ކުއްޔަށް ތަނެއް ނަގައިގެން މަޑުކޮށްލުމުން ދެން ދިރިއުޅުން ބައްޓަން ކުރާނެގޮތެއް ހޯދުމަށް ފަސޭހަ ވާނޭކަމުގައި އަހަރެންނަށް ވިސްނުނެވެ. އައްޑޫއިން ވަޒީފާއެއް ހޯދަން ޖެހުނަސް މި މުއްދަތުގެ ތެރޭގައި އެކަންވެސް ކުރެވޭނޭ ނޫންހެއްޔެވެ. ޒިވިއަލްވެސް އާ ހަޔާތެއް ފަށައި ދިރިއުޅުން އާރާސްތު ކުރަން ވިސްނާނީވެސް އަހަރެން ލޯމަތިން ގެއްލުމުންނެވެ. ކިތަންމެ ލޯބިވިއަސް ލޯ ކުރިމަތިން ގެއްލުމުން ހަނދާން ނައްތާލަން ފަސޭހަވާނޭކަމުގައި އަހަރެންނަށް ޤަބޫލު ކުރެވުނެވެ.

އަހަރެން އައްޑޫއަށް ދާން ވިސްނާ ވާހަކަ އެންމެ ފުރަތަމަ ބުނީ ޝިޒާން ކައިރީގައެވެ.އެކަމާއި ހިތްހަމަ ނުޖެހުން ފާޅުކޮށް ދަރިފުޅާ ދުރުކުރަން އުޅޭކަމުގެ ތުހުމަތު ޝިޒާން ކުރިއެވެ.ނަމަވެސް އަހަރެންގެ މި ނިންމުމާއިމެދު އިތުރު ތަފްސީލެއް ޝިޒާންއަށް ދޭންޖެހޭނޭކަމުގައި އަހަރެން ޤަބޫލެއްނުކުރަމެވެ. އެހެނެއްކަމަކު އަހަރަކު މަދުވެގެން ދެފަހަރު ޝިޒާންއަށް ދަރިފުޅު ދައްކަން މާލެ އަންނާނޭކަމުގެ ޔަޤީންކަން ޝިޒާންއަށް ދިނީމެވެ. އަދި ޝިޒާން ބޭނުން އިރަކު ދަރިފުޅާ ގުޅައިގެން ވީޑިއޯ ކޯލް ކުރުމުގެ ފުރުޞަތުވެސް ދޭނޭ ކަމުގެ ޔަޤީންކަންވެސް ދިނީމެވެ.

ޒިލާލްއާއި ޒިވިއަލްއަށް އަހަރެންގެ މި ނިންމުން ހާމަކުރީ ޒިވިއަލްއާއި ޒިލާލް އަދި ޝިފާއާއި އެކު ޒިވާވެސް ގޮވައިގެން ސީ ހައުސްއަށް ހެނދުނު ސައިބޯން ދިޔަ ދުވަހެއްގައެވެ. ކާތަކެތި ތަށްޓަށް އަޅައިގެން އެންމެން އިށީނުމާއިއެކު ވާހަކަ ފެށީ އަހަރެންނެވެ.

” އެބައޮތް ތި މީހުން ކައިރީ ވަރަށް ބޮޑު ވާހަކައެއް ބުނަން..”

“ކޮން ވާހަކައެއް އަނެއްކާ؟ ގުޑް ނިޔުސް އެއްތަ؟” ލާނެތް ފާޑަކަށް ޒިލާލް އަހާލިއެވެ.

” އުނހު.. ޕްރޮބެބްލީ އަ ބޭޑް ނިޔުސް ފޯޔޫ ގައިޒް. މިއުޅެނީ އައްޑޫއަށް ޗޭންޖް ވާންކަމަށް.. އެޓް ލީސްޓް ފޯ ނައު” އަހަރެން އެހެން ބުނުމާއިއެކު ޒިވިއަލް އަނގައަށް ލައިލައި އިން ރޮށިކޮޅު މަޑުޖައްސާލާ އަހަރެންގެ މޫނަށް ބަލާލީ ސުވާލުން ފުރިގެންވާ މޫނަކާއިއެކުއެވެ.

” ވަޓް” ޒިލާލްއާއި ޝިފާއަށް އެހެން ބުނެވުނީ އެއްފަހަރާއެވެ.

” މިހެން އަންސްޓޭބަލް ލައިފްއެއްގަ އަބަދަކު ނޫޅެވޭނެއެއްނު. ޒިވާ އަށް ދިރިއުޅުމެއް ހޯދަދޭން މަސައްކަތް ކުރަން ޖެހޭނީ އަހަރެންނެއްނު” ޒިލާލްމެންނަށް ވިސްނައިދިނުމަކީ އުނދަގޫ ކަމަކަށް ވާނޭކަން އަހަރެންނަށް އެނގެއެވެ.

” ސޯ؟ އަހަރުމެންނާއެކު އުޅެން ހިތްހަމަ ނުޖެހެނީތަ؟ ކަމެއް މަދީތަ؟ ނޫނީ ހިތްހަމަ ނުޖެހޭ ކަމެއް ވަނީތަ؟” ޒިލާލް ސުވާލު ފުންޏެއް އޮއްސާލިއެވެ.

“ނޫން. ތީ މިހާރު އަހަރެންގެ އާއިލާ.. އެކަމަކު މާލޭގަ ހުރިހާ ދުވަހަކު ޝިޒާންގެ ކިބައިންވެސް ސަލާމަތެއް ނުވާނެ” އަހަރެންނަށް ޖުމްލަ ފުރިހަމަ ނުކުރެވެނީސް ޒިލާލް ވާހަކަ ދައްކަން ފެށިއެވެ.

” ޝިޒާންއަށް އަންގަފާނަމޭ ގެއަށް ނުވަންނާން.. އަހަރެމެންގެ ހުއްދަނެތި ޝިޒާންއަކަށް އަހަރެމެންގެ ތާކަށް ނުވަދެވޭނެ ދޯ؟ އެހެން ނޫނަސް އައްޑޫއަށް މޫވް ނުކުރިއަސް ތިކަމަށް ސޮލިޔުޝަންއެއް ހޯދިދާނެއެއްނު. އައްޑޫގަ ކިހާ އެކަނިވާނެ އީމް. އެއްވެސް މީހެއްވެސް ނުހުންނާނެ”

” އިނގޭ ވަރަށް ބޮޑު ރިސްކެއްކަން މި ނަގަނީ.. އެކަމަކު ޝިޒާން ކައިރީ ގެއަށް ނުވަންނާންބުނެ ބޮޑު މައްސަލަ ގަނޑެއް ކްރިއޭޓްކޮށްގެން ނޫޅެވޭނެ. މިހާރު ބޭނުންވަނީ ސިކުނޑީގެ ހަމަޖެހުން. އަހަރެންނާ ހެދި ބައެއްގެ ދިރިއުޅުން މަޑު ޖެހިފަ ތިބުން އެއީ އަހަރެން ބޭނުންވާ ގޮތެއް ނޫން..އެއްވެސް މީހަކަށް އަހަރެންގެ ފަރާތުން ދެރައެއް އަދި ހިތާމައެއް ލިބުމަކަށް ނޭދެން” އަހަރެން އެއްލި ގާގަނޑުން ޒިވިއަލް ގައިގައި ޖެހުނުކަން އަހަރެންނަށް އެނގުނީ ޒިވިއަލް އަހަރެންނާ ދިމާއަށް ބަލާލިގޮތުންނެވެ.

“ދޮންބޭ! އީމް އަށް ވިސްނަ ދީބަލަ” ޒިލާލްވެސް ބަލާލީ ޒިވިއަލްއަށެވެ.

“އީމާންގެ ދިރިއުޅުން ބިނާކުރާނީ އީމާން ބޭނުންގޮތަކަށް. އެކަމާއި ދުރު މީހުން ބެހުން އެއީ ރަނގަޅު ގޮތެއް ނޫން” ޒިވިއަލްގެ އަޑުގައިވީ ހިތާމަކަމެއް ނުރުހުންކަމެއް ބުނެދޭކަށް އަހަރެންނަކަށް ނޭނގެއެވެ.

” އެހެންވިއަސް ހެޔޮ.. އީމް އަދި ވިސްނާލާތި” ޒިލާލްއާއި އެއްބައިވެލަމުން ޝިފާވެސް އެއީ ތެދެއްކަމުގައި ބުންޏެވެ.

“އަހަރުމެން އަސްލު ބްރެކްފާސްޓަށް މިއައީވެސް ނިޔުސްއެއް ބްރޭކްކުރަން.. އެކަމަކު މި ލިބުނު ބްރޭކިން ނިޔުސް މާބޮޑެއް ނު ދޯ ޒިލާ” ޝިފާ  ޒިލާއަށް ދޯއެއް އެއްލިއެވެ.

“ތެދެއް.. އަހަރުން މިއައީ މެރީ ކުރަން ވިސްނާ ވާހަކަ ބުނަން. ނެކްސްޓް މަންތުގަ. ރޫމްވެސް ނިމިފަ ހުރީމަ ދެން އިތުރަށް ލަސްކުރަން ބޭނުން ނޫންވީމަ. އެކަމަކު މި ލިބުނު ޚަބަރު ކިހާދެރަ” ޒިލާލްމެން ކައިވެނި ކުރާވާހަކަ އަޑު އިވުމުން އަހަރެންވެސް ނުހަނު އުފާވިއެވެ.

“އެހެންތަ؟ ކޮންގްރާ ދެ ކުދިން…ވަރަށް އުފާވެއްޖެ.. ތި ކައިވެނީގެ ވަލީމާގަ ބައިވެރި ނުވެ އަހަރެން ނުދާނެ އެއްނު” އަހަރެން އެ ދެމީހުންނަށް މަރުހަބާކީމެވެ. އަހަރެންނަށް އައްޑޫއަށް ދެވޭނީ ހުންނާނެ ތަނެއްވެސް ހޯދައިގެންނެވެ. އަނެއްކޮޅުން ޒިލާލްމެންގެ ކައިވެނީގެ ފަހުން ދިޔުމުން އެމީހުންވެސް ކުޑަކޮށް ހަމަޖެހޭނޭކަމުގައި ޤަބޫލު ކުރެވުނެވެ. އަހަރެމެން ދެއްކި އެއްވެސް ވާހަކައެއްގައި ބައިވެރިނުވެ މަޑުމަޑުން ޒިވިއަލް ކަމުންގެންދިޔައެވެ. އެހިތަށް އަރައި ފައިބަމުންދިޔަ އިހްސާސްތަކުގެ ކުޑަވެސް މިންވަރެއް އަހަރެމެން އެއްވެސް މީހަކަށް ނޭނގެއެވެ.

އެރޭ ދަންވަރު އަހަރެން ޒިވީއަށް އަށް ގާތުންދޭން އިންއިރު ސިޓިން ރޫމްގައި މީހަކު އުޅޭހެން ހީވިއެވެ. ނަމަވެސް އެކަމާއި މާބޮޑު ސަމާލުކަމެއް ނުދީ އިންދައި ފޯނަށް އައީ މެސެޖެކެވެ.

“އާޔޫ އެވޭކް؟ ކޭން ވީ ޓޯކް” އަހަރެން އެމެސެޖަށް ރިޕްލައިކޮށްލީ މިނެޓެއް ދިނުމަށެވެ. އަދި ޒިވާ ނަގާ ވައިލެއްވުމަށްފަހު ލައިގެންހުރި ސޯޓުބާލާ ހަރުވާޅެއް ލައިގެން ދޮރުހުޅުވާލާ ބޭރު ބަލާލީމެވެ. ޒިވިއަލް ސޯފާގައި ފޯނާ ކުޅެން އިނެވެ.

” ކޭން ވީ ޓޯކް އިންދަ ރޫމް ޕްލީޒް” އަހަރެން ފެނުމާއިއެކު ޒިވިއަލް އަހަރެންގެ ކޮޓަރިއާއި ދިމާއަށް ހިނގައިގަތެވެ. އަހަރެމެން އެކަހިކޮށް ތިއްބައި ޒިލާލްއަށް ފެނިދާނެތީ ކަންނޭނގެއެވެ. ނޫނީ ސިޓިން ރޫމްގައި ދައްކާ ވާހަކަ ކޮޓަރިއަށް އަޑު އިވިދާނެތީ ކަންނޭނގެއެވެ. އަހަރެން ދޮރު ހުޅުވާލާ ޒިވިއަލް ވަނުމަށް ތަން ދެއްކީމެވެ. ޒިވިއަލް ގޮސް އަހަރެން ކޮނޑުގައި ހިފާ އެނދުމަތީބޭން ދުމަށްފަހު އަހަރެން ކައިރީ އިށީނެވެ.

“ކީއްވެ ކުއްލިއަކަށް އައްޑޫއަށް ދާން ތި ނިންމީ؟ އެއްކަލަ އިންސިޑެންޓާއި ހެދިތަ؟”

“ނޫން.. އެކަން ހަނދާން ނައްތާލައިފީމޭ ބުނީމެއްނު. އެކަން އެހެންވީ އަހަރެންގެވެސް ކުށުންނޭ! އެހެން ނޫނަސް ދެޓްސް ނޮޓް އަ ބިގް ޑީލް. މާ ބޮޑުކަމެއް ވީކީވެސް ނޫނެއްނު” އަހަރެން އިސްޖަހައިގެން އިނދެ ވާހަކަދެއްކީމެވެ. ޒިވިއަލްއާއި ހަތަރުކަޅިހަމަކުރަން އުނދަގޫވީމައެވެ.

“ދެން ކީއްވެ؟ އަހަރެން ރެންޓު ނުނަގާތީތަ؟ އިފް ޔޫ ވޯންޓް ރެންޓްވެސް ނަގާފާނަމޭ! އީމް އަހަރެމެންގެއަށް ބަދަލު ވާން ބޭނުންނުވަންޏާ މިތަނުގެ މުއްދަތުވެސް އިތުރުކޮށްފާނަން!” އަހަރެންނާއިއެކު އެކަނިވާ ވަގުތުތަކުގައި ޒިވިއަލް އަހަރެންނަށް އީމް ގެ ނަމުން މުޚާތަބުކުރާއިރު އުފާވެރިކަމެއް ހިތަށް ވެރިވެއެވެ.

“ނޫން ޒިވިއަލް! މިހާރުވެސް ޓޫ މަޗް އަސްލު! އިތުރަށް އިހްސާންތެރި ނުވޭ! ޒިވިއަލް ވެސް އަހަރެންނަށް ހެޔޮ އެދެންޔާ އަހަރެންގެ މި ނިންމުން ބަލަގަނޭ! މިއީ އަހަރެންގެ ހިތާ ސިކުނޑިއަށް ލުޔެއް ހޯދުމަށާއި ކުޑަ ކުޑަ ޒިވާއަށްޓަކައި ނަގާ ފިޔަވަޅެއް!” އަހަރެން ދެންވެސް އިނީ އިސްޖަހައިގެންނެވެ.

“ދެޓް ޑަޒަންޓް އެކްސްޕްލެއިން އެނީތިން އީމް!” ޒިވިއަލްގެ އަޑުގައިވީ ހިތާމަކަން ފުރަތަމަ ފަހަރަށް އަހަރެންނަށް އިހްސާސްކުރެވުނެވެ.

” ޓްރުތް މޭ ހާޓް” ބައެއް ފަހަރު ތެދަކީ ވަރަށް ވޭންހުރިއެއްޗެއްކަން ޒިވިއަލްއަށް ހަނދާންކޮށްދިނީމެވެ!

” އަހަރެން އީމް ދެކެ ލޯބިވެޔޭ ބުނީމަ ދޯ އަސްލު؟ އަހަރެން ކައިރީ މަޑު ކުރަން އެއްބަސްވޭ! ދުވަހަކުވެސް އީމް ދެކެ ލޯބިވެއެކޭ ނުބުނާން” ޒިވިއަލްގެ އެ އާދޭސްތައް އަޑު އަހަން އަހަރެންނަށް ކެތްކުރެވެނީ ކިރިއަ ކިރިއާއެވެ. އެކަމަކު އަހަރެން މި ނިންމުން ނިންމީ ޒިވިއަލްއަށްވެސް ހެޔޮ އެދޭތީއެވެ.

“ޒިވިއަލް! މައްސަލަ ގަނޑެއްގެތެރެއަށް ނުވަދެ ޝިޒާން ކައިރިން ސަލާމަތްވާން އަހަރެންނަށް ފެނުނީ މިގޮތް. ޝިޒާން އަހަރެންނާ ދިމާއަށް އެބަ ބުނޭ އަދިވެސް ބޭނުމޭ! އެހެންވީމަ އޭނައާއި އެއް ފަސްގަނޑެއްގަ ހުރެގެން އަހަރެންނަށް އެކަމުން ސަލާމަތެއް ނުވާނެ! އެއްގޮތް ނެތީއާ އަނެއްގޮތް ހޯދާނެ! ޝިޒާން އެއީ ވަރަށް ބޯހަރު މީހެއް. ނުވިތާކަށް ތީ އަހަރެން ވަރަށް އިހްތިރާމް ކުރާ މީހެއް! އަހަރެން ވަރަށް ދެރަވޭ އަހަރެންނަށްޓަކައި ތިހެން ހުންނާތީ! ޒިވިއަލްއާއި އަހަރެންނާ ދުވަހަކުވެސް ގުޅެވޭނެހެން ހިއެއްނުވޭ! ދައްތައާއި ބޭބެ އެހާ ހެޔޮ އިރު އެމީހުންނަށް ދެރައެއްދޭން އަހަރެންނަކަށް ނުކެރޭނެ! އެ މީހުން ހިތްހަމަ ނުޖެހޭ ކުޑަނަމަވެސް ކަމެއް ކުރުމަކީ އަހަރެން ކުރާނޭކަމެއް ނޫން! ދެން ޒިވާ! އަހަރެން ޒިވާ ބަލައި ބޮޑުކުރަން ބޭނުމީ ދިރިއުޅުން ދަސްކޮށްދީގެން! މިތާ ތިމީހުން ކައިރީ އުމުރު ހޭދައެއް ނުކުރެވޭނެ! ޒިވާ ބޮޑުވަމުން އަންނައިރު ތި މީހުންނާ މާ ބޮޑަށް އެޓޭޗް ވެއްޖެއްޔާ ތި މީހުންނާ އަހަރެން ދުރަށް ދާން ޖެހޭ ދުވަހަކުން އެ ކުއްޖާގެ ހިތް ފުނޑު ފުނޑުވާނެ! މި ހުރިހާކަމަކަށް ވިސްނާފަ އަހަރެން މި ނިންމުން ނިންމީ!” އަހަރެން ވާހަކަ ދައްކަމުން ދިޔައީ ޒިވިއަލްގެ އަތުގައި ހިފަހައްޓައިގެން އިނދެއެވެ.

” އީމް އަހަރެންދެކެ ކުޑަކޮށްވެސް ލޯބި ވޭތަ؟” ޒިވިއަލްގެ އެ ސުވާލުން އަހަރެން ހުއްޓުންއެރިއެވެ. “ލޯބި” އެއީ ކޯންޗެއްކަން އަހަރެންނަށްވެސް މިހާރު އޮޅިއްޖެއެވެ.ލޯބިވާކަމެއް ނޭނގެއެވެ. ނަމަވެސް… ޒިވިއަލް ތިޔަ ދެމުންދާ ލޯބިން އަހަރެންނަށް ރައްކާތެރިކަން އިހްސާސްކުރެވެއެވެ. ރުންކުރުކޮށް އަމުރުކޮށްލާއިރު އުފާވެއެވެ.ޒިވާ ގޮވައިން އުޅޭގޮތް ފެނުމުން ހިތަށް ފިނިކަން ލިބެއެވެ. މަދުން ވިޔަސް މިހެން އެކަނި ހޭދަވާ ވަގުތުކޮޅުތައް ހިތުގެ ތެރޭގައި ބިންވަޅު ނެގެއެވެ. ދެ މީހުންގެ ދެމެދުގައި ހިނގާ ކުދި ކުދި ” އިޝާރާތް” ތަކާއި ގަޔާވެވެއެވެ.އައްޑޫއަށް ދިޔުމުން ޒިވިއަލް ނުފެންނާނެތީ އިންތިހާ ދެރަވެއެވެ….. އެކަމަކު މީގެން އެއްވެސް ވާހަކައެއް ޒިވިއަލް ކައިރީ ބުނާނީ ކިހިނެއް ހެއްޔެވެ…އެހާ އަމިއްލަ އެދުން ބޮޑު މީހަކަށް އަހަރެންވާން ވާނޭ ހެއްޔެވެ. ޝިޒާން އާއި ކައިވެނިކުރުމުން އެ އާއިލާއަށް ކުރިމަތިވި މަލާމާތާއި ހަމަ ޒިވިއަލްގެ އާއިލާއިންވެސް ކުރިމަތިލާން ޖެހޭނޭ ނޫންހެއްޔެވެ. ދުވަހެއްގެ ކޮޅުންވެސް އަހަރެންގެ ބައްޕައަކީ ކާކުކަން ފަޅާއަރާ ހިސާބަކަށް ގޮސްފިނަމަ، މުޅި އާއިލާތެރެއަށް ނަގޫ ރޯޅިއެއް ފައިބާ އެތައް ދިރިއުޅުމެއް، އެތައް ގުޅުމެއް ސުންނާފަތި ވުމުގެ ފުރުޞަތުވެސް އެބައޮތެވެ. ދެން އޮތީ ޒިވިއަލް އާއި ދުރަށްދާން ޖެހުމުން އަހަރެންގެ ހިތުގައި އަޅާވޭނުގެ ވާހަކައެވެ.އެކަމުންވެސް ދުވަސްކޮޅަކުން އަރައިގަނެވޭނޭކަމުގައި އުންމީދު ކުރެވުނެވެ. އަހަރެން ގެ ހަޔާތުގައި ފުރަތަމަ ލޯތްބަކީ ޝިޒާންއެވެ. އަހަރެންގެ ޖިސްމުން އުފާ ލިބިގަތުމުގެ ފުރުޞަތު ލިބުނު ހަމައެކަނި ފިރިހެނަކީވެސް އެއީއެވެ. އެކަމަކު މިހާރު ޝިޒާންއަށްޓަކައި އަހަރެންގެ ހިތުގައި އެއްވެސް އިހްސާސެއް ނުވެއެވެ. އެހެންވީމާ ޒިވިއަލް މަތިން ހަނދާން ނައްތާލުން އަދި މާފަސޭހަ ވާނެތާއެވެ.އަހަރެންގެ ސިކުނޑީގެ މައްޗަށް ހިތުގެ އަޑު ގަދަކުރުވަމުން ދިޔައެވެ.

” އަދި ވަރިކުރި ފަހުން އަހަރެއް ނުވޭ! އެ ހިތިރަހަ އަރުބުޑުން ފިލައިގެން ނުދޭ! ކިހިނެއް އެހެން …….” އަހަރެންގެ ހިތުގެ އަޑުގެ މައްޗަށް ސިކުނޑި އިސްކުރީމެވެ. ނަމަވެސް އެ އަޑު ކަނޑުވާލަން ޖެހުނު އުނދަގޫކަމާއިއެކު ލޮލުން ކަރުނަ އޮހޮރެން ފެށިއެވެ.

“އީމް ރޮއްވާލަން ބުނިއެއްޗެއް ނޫން އެއީ! އީމްގެ ގާތްކަން އަހަރެންނަށް ގޯސްކޮށް މާނަ ކުރެވުނީ! ބޭބީ އަށް ޒިވާ ކީމަ އަހަރެން ހީކުރީ އަހަރެންނާވެސް ގުޅުވާފަކަމަށް! ސޮރީ އީމް! އަހަރެން އީމްގެ ނިންމުމަށް އިހްތިރާމް ކުރާނަން! އަހަރެންނާ ދޭތެރޭ ނުވިސްނައްޗޭ! އީމް ބޭނުންވަނީ އަހަރެން ދިރިއުޅުމެއް ފެށުންކަމުގައި ވާނަމަ އެކަންވެސް އަހަރެންކޮށްފާނަން… ތިކަހަލަ އީމްއެއް ލިބޭތޯ އަހަރެން ހޯދާނަން! ލިބޭ އިރަށް އިންނާނަން އެނގޭ! ” ޒިވިއަލް ކިތަންމެ ސިއްރުކުރަން އުޅުނަސް އެއަޑުގައި ވި ރިހުން އަހަރެންނަށް ފޮރުވޭނޭ ހެއްޔެވެ.

” އެހީމެއްނު ކްލޯސް ފްރޭންޑެއް ގެ ގޮތުގަ ހުރެދޭނަންތޯ؟  އެކަމަށް ޖަވާބެއް ދޭންވެސް ބޭނުން! ޒިވިއަލްތީ މިވަގުތު އަހަރެންގެ ގިނަ ސިއްރުތައް އެނގޭ މީހާ! ސޯ ޔެސް! ލެޓްސް ސްޓޭ އޭޒް ފްރެންޑްސް ދޯ!” އަހަރެން ލޯ ފޮހެލަމުން ހީލީ ހިތުގައިވި ވޭންތައް އެއްފަރާތްކުރަމުންނެވެ. އިނގިރޭސި މުހާވަރާއެއްގައި އޮވެއެވެ. ” ޓައިމް ހީލްސް އެވްރީތިން”. އެއީ ތެދަކަށްވާނަމަ އަހަރެން މާލެއިން ދިޔުމުން މަޑުމަޑުން ޒިވިއަލް މަތިން ހަނދާން ނައްތާލެވިދާނެ ކަންނޭނގެއެވެ.

” އެހެންވިއްޔާ އޭޒް އަ ކްލޯސް ފްރެންޑް، ދެ ކަމެއް އެދެން ބޭނުން” އަހަރެންނަށް ޒިވިއަލްއާއި ދިމާއަށް ބަލާލެވުނީ ޒިވިއަލް ކިޔަން އެއުޅެނީ ކިހާވަރެއްގެ ކަމެއްކަން ނޭނގޭތީއެވެ.

“ކިއާބަލަ”

” ފުރަތަމަކަމަކަށް، އެކޮޅުން ގެއެއް ހޯދާ އީމް ދާންވާއިރަށް އެތަން ރެޑީކުރުމުގެ މަސައްކަތް ކުރާނީ އަހަރެން… ޑޯންޓް ވޮރީ.. އީމްއަށް ރެންޓް ދެއްކޭވަރުތަނެއް ނަގާނީ….” ޒިވިއަލްގެ ފުރަތަމަ ހުށަހެޅުމަށް އެންމެ ރަނގަޅު ކަމުގައި އަހަރެން ބުނީ އިތުރަށް އަނެއްކާވެސް ކޯޅެން ބޭނުން ނުވާތީއެވެ.
” ދެވަނަ ކަމަކަށް، ކިރިޔާވެސް ކަމަކަށް ބޭނުންވިޔަ ދެރަވިޔަސް ބޮޑު ކަމެއް ދިމާވިއަސް އަހަރެންނަށް ގުޅާތި! އައިވިލް ބީ ޖަސްޓް އަ ކޯލް އަވޭ! އެންމެ އަވަހަށް ފުރާ ފްލައިޓެއްގަ ދާނަން އީމް ކައިރިއަށް” އަހަރެން އެއްވެސް އެއްޗެއް ނުބުނުމުން އަނެއްކާވެސް ވާހަކަ ދެއްކީ ޒިވިއަލްއެވެ.

“ޒިލާލްވެސް ގޮވައިގެން ޓުދަ ރެސްކިޔު” ޒިވިއަލްއަށް ސަމާސާކުރަން އެނގޭކަންވެސް އަހަރެންނަށް އެރޭ އެނގުނެވެ.

“އޯކޭ އެކަމަކު އަބަދު އައްޑޫއަށް އަންނަން ނަހަދައްޗޭ!” އަހަރެންނަށް އެހެން ބުނެވުނުއިރު ޒިވިއަލް ނުކުންނަން ދޮރުތަޅުގައި ހިފީއެވެ.

“އީމް އަންނާށޭ ބުނަދެން ނުދާނަން” ފަސް އެނބުރި އެހެން ބުނެލިއިރު ޒިވިއަލްގެ މޫނުމަތި ވަނީ މިލާ މޯޅިވެފައެވެ. އެ ދޮލުލުން ފާޅުވަނީ ހިތާމައެވެ. އަހަރެން އަނެއް ފަރާތަށް އެނބުރުނީ ޒިވިއަލްގެ ހާލަތަށް ހަމްދަރުދީވެ އަހަރެންގެ ނިންމުން ބަދަލު ކުރެވިދާނެތީއެވެ. އަހަރެން މި ޤުރުބާނީ ވާން ނިންމީ ހުރިހާ އެންމެންނާއި ދޭތެރޭވެސް ވިސްނާފައެވެ.

އަހަރެން އައްޑޫއަށް ފުރާކަން އެންގުމުން އެކަމާ ޚަދީޖައްތަވެސް ހުރިހާ އިންތިހާ ދެރަވެފައެވެ. ޒިވާ ދެކެ ޚަދީޖައްތަވަނީ މާމަ ދަރިއަކު ދެކެވާ ލޯތްބެވެ.

” ދަރިފުޅު އައްޑޫއަށް ދާންވާނީ ޒިލާލްމެން ކައިވެނި ނިމުނީމަ. ސަމީރުބެއާއި ދައްތައާވެސް ދެ ދުވަހަކަށް އައްޑުއަށް ގޮސްލަން ވިސްނައިގެން މިތިބީ. އޭރުން ޒިވާ ގޮވައިގެން ދާން ވެސް ފަސޭހަ ވާނެއެއްނު.” ޚަދީޖައްތަ އެ ބުނީވެސް ތެދެކެވެ. ޒިވާ ގޮވައިން ފޮށިތަންމަތި ހިފައިގެން އެއާޕޯޓުގައި އުޅުންވާނީ ދަތިކަމަކަށެވެ. ދައްތަމެންނާއިއެކު ދެވިއްޖެނަމަ ދާންވެސް ފަސޭހަވާނެއެވެ.

އަހަރެން އައްޑޫއަށް ދާން ނިންމި ނިންމުމުން އެންމެންގެ ހިތްތަކަށް ލިބުނު ހިތްދަތިކަން މަޑުމަޑުން ފިލަން ފެށީ ޒިލާލްގެ ކައިވެނީގެ ކަންކަން ފެށިގެން ދިޔުމުންނެވެ.ޝިފާއަކީ ދެމަފިރިއެއްގެ ހުރި ތިންދަރިންގެ ތެރެއިން އެންމެ ހަގު އަދި ހަމައެކަނި ހުރި އަންހެން ކުއްޖާއެވެ. އެއާއިލާއަކީ މާ ބޮޑު އާއިލާއެއް ނޫނެވެ. އަދި ކިއެއްތަ ޝިފާއަކީ އުތުރުގެ ރަށަކަށް ނިސްބަތްވާ މާލޭގައި ކުއްޔަށް ދިރިއުޅޭ ކުއްޖެކެވެ. ޝިފާގެ އެއްބޭބެއަކީ ލޯޔަރެކެވެ.އަނެއް ބޭބެއަކީ ޔުނިވަރސިޓީއެއްގެ ލެކްޗަރަރއެކެވެ. އެއާއިލާއަކީ މާ ބޮޑު އާއިލާއަކަށްވެސް ނުވުމާއިއެކު ކައިވެނީގެ ކަންކަން ހަމަޖައްސަމުން ދިޔައީ ދެ އާއިލާއެކީގައެވެ. މި ހުރިހާ ކަމެއްގެ ތެރޭގައި އެމީހުންނާއި އެއްވަރަށް އަހަރެން ބައިވެރިކުރަމުން ދިޔައެވެ. ކައިވެނި ޕާޓީއަށް ހުރިހާ އެންމެން އެއްކުލައަކުން ހެދުން ފެހި އިރު ކުޑަކުޑަ ޒިވާއަށް ވެސް ހުދުކުލައިގެ ޝިފާގެ ވެޑިން ޑްރެސް އާއި އެއްކަހަލަ ހެދުމެއް ފެހިއެވެ. މި ދުވަސްވަރު ޒިލާލްގެ ދުރުތާ ތިމާގެ ވަރަށް ގިނަ މީހުންނާއިވެސް ބައްދަލު ވިއެވެ.

ވިލިނގިލީގައި ހުންނަ ޒިވިއަލްމެންގެ އަސްލު ގެއަށް އަހަރެން އަލަށް ދިޔައީ ޝިފާ ކައިވެނީގެ ރަންކީ ދުވަހުއެވެ.  ގޭތެރޭގައި ކުލަ ބޮކި ދިއްލާ ޒީނަތް ތެރިކުރުމުގެ ބަދަލުގައި ގޭތެރެއިން ފެނިގެން ދިޔައީ ސާދާކަމެވެ.ކިތަންމެ ފުދުންތެރިނަމަވެސް ދެއްކުންތެރިކަމެއް ނެތެވެ. ދެ ފަންގިފިލާއަށް ހަދާފައިވާ އެ ބޮޑު ގޭގެ ދެ ވަނަ ފަންގިފިލާ ޢިމާރާތްކޮށްފައިވަނީ 4 ކޮޓަރިންވެސް  ޓެރަސް އަށް ނުކުމެވޭހެންނެވެ. އަދި ތިރީ ބައިގައި  2 ކޮޓަރި ހުރި އިރު ތަނަވަސް ބޮޑު ސިޓިން ރޫމަކާއި ބަދިގެއެއް ހަދާފައި ހުއްޓެވެ. ޢިމާރާތްކޮށްފައިވާ ބައިގެ އިތުރުންވެސް ގޭގެ ޖާގަބޮޑުކަމުން އެއީ އެންމެ ގޯއްޗެއް ނޫންކަން އެނގެއެވެ. ހީވާގޮތުން އެއީ ޖެހިޖެހިގެން އޮތް ދެ ގޯތި އެއްކޮށްލާފައެވެ. މައި ޢިމާރާތުން ބޭރުގައި، ގޯތިތެރޭގައި އެކި ކަހަލަ ގަސްތައް ހައްދާފައި ހުއްޓެވެ. އަނބާއި ޖަނބުރޯލެވެ.އަތަޔާއި ފޭރެވެ. މި ނޫނަސް އެތައްވައްތަރެއްގެ މާ އަޅާ ގަސްތަކެވެ. ގަސްގަހުގައި އެލުވާލާފައި ހުރި އުނދޯލިތަކާއި، ބަހައްޓާފައިހުރި ޖޯލިފަތިތަކުން އެތަނަށް އިތުރު ފުރިހަމަ ކަމެއް ގެނެސްދެއެވެ. އެގޭތެރެއަށް ވަދެވުމަށްފަހު މި އުޅެވެނީ މާލޭ ސަރަހައްދުގައިކަން ހަނދާނުން ފިލައިގެން ދެއެވެ. އެހާވެސް ހިތްގައިމެވެ.

” ބޭބެ ކީއްވެ މާލޭން ބިމެއް ނުހޯދީ؟ ނުލާހިކު ފަސޭހަ ވާނެ އެއްނު އޭރުން” އަހަރެން އެ ސުވާލު ޚަދީޖައްތައާއި ކޮށްލީ ޒިވާ ނެޕީ ބަދަލުކޮށްދޭން ދައްތަ އިންގަޑީގައި ކައިރީގައި އިނދެއެވެ.

“ސަމީރުއަކީ ވަރަށް އާދައިގެ އުޅުމަށް ލޯބި ކުރާމީހެއް! މާލޭގަ ދުއްވާ އެއްޗެހީގެ އަޑު އެހާގަދަ އަނެއްކާ އެއްވެސް ހިތް ފަސޭހަ ކަމެއް ނުވޭ! އެހެންވެ މާލެ ބަދަލުވާން ނުވިސްނީ..”

ޒިލާލްއާއި ޝިފާގެ ރަންކިޔުމުގެ ހަފްލާ ކުރިއަށް ގެންދިޔައީ ހަމައެކަނި އެއްބަނޑު ކުދިންނާއި ދެ ހެކިވެރިންނާއިއެކުގައެވެ. ރަންކިޔުމުގެ ހަފްލާ ނިމުމުން ރޭގަނޑުގެ ކެއުމެއް ތައްޔާރުކޮށްފައި ހުއްޓެވެ. އަހަރެން އެގެއަށް ދިޔައީ އެރޭ މަޑުކުރާގޮތަށެވެ. ހުރިހާ އެންމެންގެވެސް އެދުމުގެ މަތީންނެވެ. ރަންކިޔުމުގެ ކަންކަން ނިމޭއިރު ލަސްވާނެތީ، އެގަޑީ ޒިވާ ގޮވައިން ކަނޑު ދަތުރެއްކޮށްފައި ދިޔުމަށް ޚަދީޖައްތަވެސް ސަމީރުބެވެސް ދެކޮޅުވީމައެވެ. މާ ބޮޑަށް އަހަރެން އެކަމާއި ނުހިފައި އެއްބަސްވީ، އަހަރެން ފުރުމުގެ ދުވަސްވެސް ކައިރިވަމުން އަންނާތީ އެ މީހުންވެސް ހިތްހަމަ ޖައްސައިދިނުމުގެ ބޭނުމުގައެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.