ހިތަކުން ނުފިލާނެ 29

 ގެއަށް ދިޔަމަގުމަތިން މާވިއްކާ ފިހާރައެއް ފެނުމުން ފާޒިން ފިހާރައަށް ވަނީ މައިޝާއަށް ދޭނެ ހަދިޔާއެއް ގަތުމަށެވެ. މާބޮނޑިއާއި އެކު ދޭނެ ކާޑެއްވެސް ގަނެލައިގެން ފާޒިން ގޮސް ސައިކަލު ކައިރީގައި މަޑުކޮއްލާފައި ސައިކަލުގެ މަޑިދަށައް ގަތް އެއްޗެހިތައް ލުމަށްފަހު ސައިކަލަށް އަރަން ރެޑީވެލި ގަޑީގައި ބުރިކައްޓައް އެރި ތޫނު ތަދެއްގެ ސަބަބުން ފާޒިންއަށް އެނބުރިލެވުނެވެ. އެވަގުތު ކައިރީގައި ހުރި ޒުވާނާ އޭނަގެ އަތުގައި އޮތް ބޮޑު ކަނޑިން ފާޒިންގެ މޭމައްޗައް ދެވަނަ ހަމަލާ އަރުވާލިއެވެ.

 ތިންވަނަ އެތިފަހަރު ފާޒިންގެ ކަރާ އަމާޒުކޮއް ފޮނުވާލި ނަމަވެސް އަމާޒުވީ ފާޒިންގެ ކަނާތް ފަރާތު ކޮނޑުމައްޗަށެވެ. އެއާއެކު ފާޒިން ބިންމައްޗައް ހޭނެތިގެން ވެއްޓުނެވެ. އެވަގުތު އެމަގަށް ސައިކަލެއް ވަނުމާއެކު ފާޒިންގެ ކައިރީގައި ތިބި ދެޒުވާނުން އެމީހުން އައި ސައިކަލަށް އަރާ ބާރު ސުޕީޑުގައި ދުއްވާލިއެވެ. ސައިކަލުގައި އައި މީހާއަށް މަގުމައްޗައް ވެއްޓިފައި އޮތް ފާޒިން ފެނުމުން ސައިކަލު މަޑުކޮއްލާފައި އަވަސް އަވަހަށް އެންބިއުލާންސްއަށް ގުޅަމުން ފާޒިންގެ ގައިން ފައިބަމުން ދިޔަ ލޭތަށް ހުއްޓުވޭތޯ އުޅުނެވެ. އޭރު މާވިއްކާ ފިހާރައިގެ ތެރޭގައި ހުރި އަންހެންކުއްޖާވެސް އެމަންޒަރު ފެނިގެން ޕޮލިހަށް ގުޅަނީއެވެ.

ކުޑަވަގުތު ކޮޅެއްގެ ތެރޭގައި ސައިރިންއަޅާފައި އައި އެންބިއުލާންސްއަށް ފާޒިން އަރުވައިގެން އައި.ޖީ.އެމް.އެޗަށް ދިއުމަށް ދުއްވާލީ އައި.ޖީ.އެމް.އެޗް އެތަނާ ކައިރިވުމުންނެވެ. އޭރު އެސަރަހައްދުގައި ފުލުހުން ހަރަކާތްތެރިވަމުން ދިޔައިރު ގިނަ އަދަދެއްގެ އާންމުންވެސް ވަނީ އެތަނަށް ޖަމާވެފައެވެ. ފާޒިން ގައިން ފޭބި ލޭތަކުން  އެތަނުގައި ވަނީ ކޯރު ހެދިފައެވެ.

ސިޓިންރޫމްގައި ހުރި ފޯންރިންގުވާން ފެށުމުން އާމިރު ކައިރީގައި ޓީވީބަލަން އިން ވަދީފާ ގޮސް ފޯނުނަގާ ކަންފަތުގައި ޖައްސާލީ އަތުގައި ހުރި ހިކިމޭބިސް ކަދުރުކޮޅު އަނގައަށް ލަމުންނެވެ.

” ހަލޯ..! އައި.ޖީ.އެމް އެޗުން މިގުޅާލީ މުހައްމަދު ފާޒިންއަށް ބަޔަކު ތޫނުއެއްޗަކުން ހަމަލާދީގެން ވަރަށް ބޮޑަށް ޒަހަމްވެގެން ހޮސްޕިޓަލަށް ގެނައި ވާހަކަ ބުނެލަންވެގެން… ވީހާވެސް އަވަހަކަށް ހޮސްޕިޓަލަށް އައިސް ދިނުން އެދެން… ” އެކޮޅުން ވާޙަކަ ދެއްކި ކުއްޖާ ވަދިފާ ވާހަކަ ދައްކާނެ އެއްވެސް ފުރުސަތެއްނުދީ ބުނެލިއެވެ.

” މަގޭ ދަރިފުޅަށް ކިހިނެއްވީ…؟ ” ވަދީފާއަށް ބޭއިހްތިޔާރުގައި ރޮއިގަނެވުނެވެ. އާމިރު ދެފަހަރަކަށް ވާދީފާއަށް ގޮވާލުމުންވެސް ވަދީފާގެ ފަރާތުން އެއްވެސް ޖަވާބެއް ނުލިބުނެވެ. އަނގަމަތީގައި އަތްއަޅައިގެން ހުރިގޮތަށް ހުރީއެވެ. އާމިރު އައިސް ވަދީފާގެ އަތުގައި އޮތް ފޯނު އަތުލައިގެން ނަގާ ކަންފަތުގައި ޖައްސާލިއެވެ.

” ވަރަށް އަވަހަށް މިކޮޅަށް އައިސްދީ…! ފޯމްގައި ސޮއިކުރަންޖެހޭނެ އޮޕަރޭޝަން ކުރަންފެށުމުގެ ކުރިން…! އިޓްސް ވެރީ އާޖެންޓް…! ” ހޮސްޕިޓަލުން ވާޙަކަ ދެއްކި އަންހެންކުއްޖާ ބުނެލިއެވެ.

” ކާކަށް ކިހިނެއްވީތަ…؟ ” ވީގޮތެއް ނޭގުމުން އާމިރުވެސް ހުރީ ވަރަށް ބޮޑަށް ހާސްވެފައެވެ. އެހެންވެ އަހާލެވުނީވެސް ތަންކޮޅެއް ބާރަށެވެ.

” މުހައްމަދު ފާޒިންއަށް ބަޔަކު ތޫނު އެއްޗަކުން ހަމަލާ ދިނުމުގެ ސަބަބުން ވަރަށް ބޮޑަށް ޒަހަމްވެގެން އައި.ޖީ.އެމް. އެޗަށް ގެނެސްފައި އެބައޮތް…! ” ދެވަނަ ފަހަރަށް ތަކުރާރު ކުރަންޖެހުމުން ހޮސްޕިޓަލުން ވާޙަކަ ދެއްކި އަންހެންކުއްޖާވެސް ހުރީ ހިތްހަމަ ނުޖެހިފައިކަން އޭނަގެ އަޑުން އިނގެއެވެ. އާމިރު ފޯނު ބާއްވާފައި ކޮޓަރިއާއި ދިމާލަށް ދުއްވައިގަތީ ކާރުގެ ތަޅުދަނޑި ކޮޓަރީގައި ބޭއްވުނު ހަނދާން ވުމުންނެވެ. އެވަގުތު ސިޑިން ފައިބައިގެން އައި މިސްރާއަށް އާމިރު ދުވެފައި ދިޔަ މަންޒަރު ފެނުމުން ސިޑީން ފޭބުނީވެސް ތަންކޮޅެއް ބާރަށެވެ. ސިޓިންގްރޫމް ތެރޭގައި ރޯންހުރި ވަދީފާވެސް މިސްރާއަށް ފެނުނީ އެވަގުތުއެވެ.

” ދައްތާ ކިހިނެއްވީ…؟ ” މިސްރާގެ އަޑުގައިވެސް ވަނީ ހާސްކަމެވެ. ވަދީފާއަކަށް އެއްވެސް ޖަވާބެއް ނުދެވުނުއިރު ރުއިމުގެ އަޑު ބާރުވުން ނޫން ކަމެއް ނުވިއެވެ.

” މިސްރާ…! ދޮންތަ ކައިރީގަ ބުނޭ ބައްޕަ ބުންޏޭ ޓެކްސީއަކަށް އަރައިގެން އަވަހަށް އައި.ޖީ.އެމް އެޗަށް އަންނާށޭ… ދޮންތަބޭ ގައިގައި ވަޅިއަޅައިގެން ހޮސްޕިޓަލަށް ގެންގޮސްފިއޭ…! މުނީރާ އަވަހަށް އާދޭ… ” އާމިރު އެންބުނެފައި ގެއިން ނިކުންނާން ދުވައްވައިގަތެވެ. ވަދީފާވެސް އާމިރުގެ ފަހަތުން ދުވެފައި ކަހަލަގޮތަކަށް ނިކުމެގެން ދިޔައެވެ. ނަސީބު ރަނގަޅުކަމުން އާމިރުގެ ކާރުވެސް އޮތީ ބޭރުގައި ޕާކު ކޮއްފައިކަމުން އަވަސް އަވަހަށް ކާރަށް އަރައިގެން އާމިރު ދުއްވައިލަން ބެލިއިރު އަދި ވަދީފާއަށް ކާރަކަށް ނޭރެއެވެ. ވަދީފާއަށް ކާރަށް އެރުނެއް ލަސްކަމުންވެސް އާމިރު އިނީ ރުޅި ގަދަވެފައެވެ.

” ދޮންތާ..! ދޮންތަބޭގެ ގައިގައި ވަޅިއަޅައިގެން ހޮސްޕިޓަލަށް ގެންގޮސްފި…! އާމިރުބޭ ބުނި އަވަހަށް ޓެކްސީއެއްގައި ހޮސްޕިޓަލަށް އަންނާށޭ…! ” މުނީރާ ކައިރީ އެނދުގައި އިށީންދެލައިގެންއިން މައިޝާއަށް ބޭއިހްތިޔާރުގައި ކޮޅަށް ތެދުވުނުއިރު އެދެލޮލަށް ކަރުނަ ޖަމާވެގެން އޮހިގަންނަން ތައްޔާރުވަނީއެވެ. އޭރު މިސްރާއަށްވެސް ހުރީ ރޮވިފައެވެ. އެނދުގައި އޮތް މުނީރާގެ ލޯ އެވަގުތު ހަރަކާތް ކޮއްލި ނަމަވެސް ހާސްވެފައި ތިބި މައިޝާއާއި މިސްރާއަކަށް އެކަމެއް ނޭގެއެވެ. މައިޝާއަށް ހީވީ އޭނަގެ ހިތުގައި އުފެދިފައިވާ ފާރުގަނޑުގައި ލޮނުމިރުން އެޅުނުހެނެވެ. މައިޝާގެ ލޮލުން ފައިބައިގަތް ކަރުނަތައް ފެނުމުން މިސްރާއަށް ދުވެފައި ކަހަލަ ގޮތަކަށް އައިސް މައިޝާގެ އަތުގައި ހިފަހައްޓާލެވުނު އިރު މިސްރާއަށްވެސް ރޮވިއްޖެއެވެ. އެމަންޒަރު ބަލަން އެނދުގައި އޮތް މުނީރާ މަޑުމަޑުން ތެދުވެ އިށިންދެލިއެވެ. އެނދުގައި އިށީންދެލި މުނީރާ ފެނިފައި މައިޝާއަށް ވާންވީ އުފާކަމެއް ނުވަތަ ދެރަކަމެއް ނޭގުނެވެ.

މަންމާ…! މިސްރާއާއި މައިޝާއަށް އެއްފަހަރާ އައިސް މުނީރާގެ ގައިގައި ބައްދައި ގަންނަމުން ރޮއިގަނެވުނީ އެއްފަހަރާއެވެ. މުނީރާވެސް އޭނަގެ ލޯބިވާ ދެކުދިން ގައިގައި ބައްދައިލަމުން ކައިރީގައި ހުރި ޑަބަލް އެދެއްގައި ނިދާފައި އޮތް މިޝާއަށް ބަލާލިއިރު މުނީރާއަށްވެސް ރޮވިއްޖެއެވެ.

” ދަރިފުޅާ އަވަހަށް ހޮސްޕިޓަލަށް ދާން ތައްޔާރުވޭ…! ފާޒިން އޮތީ ކޮންހާލެއްގައިކަންވެސް ނޭގެއެއްނު..! ” ލޮލުން ފޭބި ކަރުނަތަށް އަތުގެ ނުފުށުން ފުހެލަމުން މުނީރާ ބުނެލިއެވެ. މައިޝާއާއި މިސްރާ ހޮސްޕިޓަލަށް ދާން ނިކުތުމުން މުނީރާ ގޮސް އެނދުގައި އިށީންދެ ނިދާފައި އޮތް މިޝާގެ ބޮލުގައި ފިރުމާލަމުން މިޝާގެ ނިތްކުރިއަށް ބޮސްދިނެވެ.

” އާމިރު.. މާބާރަށް ތިދަނީ ކަމެއް ގޯސްވީތަ…؟ ” ހޮސްޕިޓަލުގެ ތެރެއަށް ދުވެފައި ކަހަލަ ގޮތަކަށް ވަދެގެން ދިޔަ އާމިރު ފެނުމުން ޑރ.ޖަމީލް މާއިރުއަށް ގޮވައިލިއެވެ. އޭރު ޑރ.ޖަމީލު ޑިއުޓީ ނިންމާފައި ގެއަށް ދާން ނިކުންނަނީއެވެ.

” ފާޒިންގެ ގައިގައި ވަޅި އަޅައިގެން ދެންމެ ގެނެސްފި…! ” އާމިރުގެ އަޑުގައިވީ ހާސްކަމެވެ. އޭރުވެސް ވަދީފާގެ ލޮލުން ކަރުނަ ފައިބަމުންދެއެވެ. ޑިއުޓީ ނިންމާލާފައި ގެއަށް ދާން ނިކުތް ކަމުގައިވީ ނަމަވެސް އަނބުރާލާފައި އެމަޖެންސީ ރޫމާދިމާލަށް އާމިރުއާއެކު ޑރ. ޖަމީލްވެސް ހިނގައިގަތެވެ. އާމިރުއާއި ވަދީފާވެސް ޖަމީލުގެ ފަހަތުންގޮސް އެމަޖެންސީ ރޫމްކައިރީގައި މަޑުކޮއްލިއެވެ. ޖަމީލު ދިޔަގޮތަށްގޮސް އެމަރޖެންސީ ރޫމް ތެރެއަށް ވަދެގެން ދިޔައީއެވެ. ކުޑައިރުކޮޅެއްގެ ތެރޭގައި ނަރުސް ކުއްޖަކު އައިސް އާމިރުގެ އަތަށް ފޯމު ދިނުމުން އާމިރު ވަގުތުން ފޯމުގައި ސޮއިކޮއްލި އިރު އެދެއަތްވެސް ތުރު ތުރުއަޅަމުން ދިޔައެވެ.

” އަހަރެންނަށް އެތެރެއަށް ވަދެލެވިދާނެތަ…؟ ” އާމިރު ނަރުސްކުއްޖާ ކައިރީގައި އަހައިލިއެވެ. ނަރުސްކުއްޖާ އާނއެކޭ ބުނުމުން އާމިރު އެމަޖެންސީރޫމާއި ދިމާލަށް ހިނގައިގަތެވެ.

” އަހަރެންވެސް ވަންނާނަން…! ” ވަދީފާވެސް އާމިރުގެ ފަހަތުން ހިނގައިގަންނަމުން ބުނެލިއެވެ.

” ކޮންމެވެސް އެކަކަށް ވަދެވޭނީ…! ” ނަރުސްކުއްޖާ އެހެންބުނުމުން އާމިރު ވަދިފާއާއި ދިމަލަށް ބަލައިލަމުން އެމަޖެންސީރޫމްގެ ތެރެއަށް ވަނެވެ. އޭރު ޑޮކްޓަރުން ފާޒިންގެ ބުރަކަށިން އިރައިގެންގޮސްފައިވާ ތަން ފަހަނީއެވެ. ކޮނޑުމަތިންވެސް ވަރަށް ބޮޑަށް ކަފައިގެންގޮސްފައި ހުއްޓެވެ. ފާޒިން އޮތްގޮތުން މޭމަތިން ކަފައިގެން ގޮސްފައި ހުރި ތަނެއް އާމިރުއަކަށް ނުފެނެއެވެ. ބުރަކަށިން ކަފައިގެން ގޮސްފައި ހުރިތަން ފެނުމުން އެހުރިހާ އިރުވެސް ހިތްވަރުކޮއްގެން ހުރި އާމިރުގެ ލޮލުން ކަރުނަ ފައިބައިގަތީ އެއްވެސް ހިފެހެއްޓުމެއް ނެތިއެވެ. އޮކްސިޖަން ގުޅާފައި އޮތްއިރު ފާޒިން އޮތް އެނދުވެސް ވަނީ ލެއިން ތަތް ތެޅިފައެވެ. ޑރ.ޖަމީލަށް އާމިރު ފެނުމުން ބޭރަށް ނިކުތުމަށް އިށާރަތްކޮއްލުމުން އާމިރު ބޭރަށް ނިކުތްއިރު މީހާ ހުރީ ހަރުއަރާފައެވެ.

” އާމިރޫ… ކޮބާ މަގޭ ދަރިފުޅު…؟ ރަނގަޅުތަ…؟ ކިހިނެއްވެފައޮތީ..؟  ” އެމަޖެންސީ ރޫމުން ބޭރަށް ނިކުތް އާމިރު ފެނުމުން ވަދީފާ އައިސް އާމިރުގެ އަތުގައި ހިފައި ތަޅުވައިގަންނަމުން ބުނެލިއެވެ. އެވަގުތު އާމިރުގެ ފޯން ރިންގުވާންފެށުމުން  ފޯނުނަގާ ބަލައިލިއިރު ގުޅަނީ މައިޝާކަމުން ފޯނު ކަންފަތުގައި ޖައްސާލިއެވެ.

” ބައްޕަމެން މިތިބީ އެމަޖެންސީ ރޫމްކައިރީގައި…! ” އާމިރުގެ އަޑުގައި އެކުލެވިގެންވީ އަސަރުން ފާޒިންއަށް ވަރަށް ބޮޑު ވަރު ވެއްޖެކަން މައިޝާއަށް އެނގުނެވެ. އާމިރުވެސް ފޯނުކަނޑާލާފައި ކައިރީގައި ހުރި ގޮނޑީގައި އިށީނީ ކޮޅަށް ހުންނާނެ ވަރުނެތިގެންކަންނޭގެއެވެ.

” އާމިރު…! ފާޒިންއަށް ވަރަށް ބޮޑުވަރުވެފައިތަ އޮތީ..؟  ” ވަދީފާއައިސް އާމިރުގެ އަތުގައި ހިފާ ތަޅުވައިގަންނަމުން އަނެއްކާވެސް ބުނެލިއެވެ. އާމިރު ހަމަ އެކަނި ބޯޖަހާލީއެވެ. ލޯބިވާ ދަރިފުޅަށް ވެފައޮތްވަރު އޭނަގެ ދުލުން ބަޔާންކޮއްދޭނެހާ ހިތްވަރެއް އާމިރުގެ ގަޔަކު ނެތެވެ.