އިންތިޒާރު 32

“ރާއިންގެ އަނގައިން ތިސުވާލުތަކަކަށް ޖަވާބު ނުލިބޭނެ ޒާޔާ މަރުވިޔަސް ޒަޔާން” ފަހަތުން އިވުނުއަޑަށް ރާއިންއަށާއި ޒަޔާންއަށް ބަލާލެވުނީ އެކީގައެވެ. ރާއިންގެ މޫނުމަތީގައިވީ ހައިރާންކަމެވެ. ޒަޔާން އަށް ޖަވާބުނޭނގޭ ސުވާލުތަކެއް އިތުރުވެގެންދިޔައެވެ.

“ދޮންބެ” ވައި އަޑުން ރާއިން ބުނެލިއެވެ. ފަޓުލޫނުގެ ދެޖީބަށް އަތްޖަހާލައިގެން ދޮރުމަތީގައި ޝާން ހުއްޓެވެ. ރާއިންއާއި ދިމާއަށް ބަލަހައްޓައިގެނެވެ.

     ސަނާ ކޮޓަރިއަށްގޮސް ޒަޔާން ދެއްކިވާހަކަތައް ކިޔައިދިނުމުން އެވާހަކަތައް ހިއްސާކުރީ ޝާންއާއެވެ. ޒަޔާންވީ ރާއިންގެ ކޮޓަރީގައިކަން އެނގުމުން އޭނަ އެތަނަށްއައީ އެވާހަކަ ދައްކަންއެއީ އެންމެ އެކަށޭނެ ވަގުތުކަން އެނގޭތީއެވެ. އަދި ރާއިންގެ ދުލުން ޒަޔާންގާތުގައިވެސް ހަގީގަތް ހާމަނުކުރާނެކަން އޭނައަށް އެނގޭތީއެވެ.

“ޒަޔާން އަދި ތިސުވާލުތަކުގެ ޖަވާބު ހޯދަން ތިއުޅެނީ ނުބައި މީހެއްގެ ކައިރިން، ރަނގަޅަށް ތިބުނީ ދޮންބެވެސް ހީނުކުރަން ރާއިންއަކީ އެހާ ހިތްވަރުގަދަ މީހެއްކަމަކަށް… އުހުން ހިތްހިލައޭދޯ ބުނަންޖެހޭނީ” ދޮރުލައްޕާލަމުން ޒަޔާންއާއި ދިމާބަލާލުމަށްފަހު ޝާން ބުނެލިއެވެ. އަދި އެއަށްފަހު ރާއިންއަށް ބަލާލިއެވެ. ރާއިން ހުރީ ހާސްވެފައެވެ. އަނެއްކާ ދޮންބެއަށް ހަގީގަތް އެނގިގެން މިއުޅެނީ ކިހާވަރަކަށްބާއޭ ހިތަށް އެރިއެވެ.

“ރާއިން ދެން ތިކަންތައް ހުއްޓަން ވެއްޖެއްނު… ރާއިން ކިތަންމެ ބޭނުންވިޔަސް ޒާޔާ ޒަޔާންއާއި އިންނަން ނެތީވިއްޔާ ނުކުރާނެ… ތިފޮރުވައިގެން އުޅޭ ހަގީގަތްވެސް ރާއިން ދެން ޒަޔާންއަށް ކިޔާދީ…” ރާއިން ކައިރިއަށް އައިސް ކޮނޑުގައި ހިފާލަމުން ޝާން ވާހަކަ ދެއްކިއެވެ.

“ދޮންބެ ކީކޭތަ ތިކިޔަނީ..” ރާއިން ދެންވެސް މަސައްކަތްކުރީ އެވާހަކަ ކުރިއަށް ނުގެންދިއުމަށެވެ.

“ބުނީމެއްނު، ރާއިންގެ އަނގައިން ހަގީގަތް ހޯދުމަކީ ނުވާނެ ކަމެކޭ..” ޒަޔާންއާއި ދިމާއަށް ބަލައިލަމުން ޝާން ބުނެލިއެވެ.

ޝާންއަށް ހަގީގަތް އެނގުނީ ރާއިންއާއި ޔާނާ ދެއްކިވާހަކަ އަޑުއިވުމުންކަމުގައި ބުނުމުން ރާއިން ހައިރާންވިއެވެ. މިހުރިހާދުވަސްވީއިރު އެއްވެސް އެއްޗެއް ނޭނގޭކަމަށް ހަދާލައިގެން އޭނަ ހުރީ ރާއިންއަށްޓަކައިކަން އެނގުމުން ދެރަވިއެވެ. ޒަޔާންއަށް ޝާން ހުރިހާ ހަގީގަތެއް ކިޔައިދިނެވެ. ޒާޔާއާއި ދުރަށްދާން މަސައްކަތްކުރީ އެހަގީގަތް ސަލްމާއަށް ފޮރުވުމަށްކަންވެސް ކިޔައިދިނެވެ. ޒާޔާއާއި މެދު ސަލްމާއަށް ގަބޫލުކުރެވިފައިވާ ކުންހީވެސް ކިޔައިދިނެވެ. އަދި ރާއިންއާއި ޔާނާގެ ގުޅުމުގެ ވާހަކައަކީވެސް އެންމެންގެ ލޮލުގައި އެޅުވިފައިވާ އަނދުނެއްކަންވެސް ހާމަކުރިއެވެ. ރާއިންއަކީ ސަލްމާގެ ދަރިއެއްނޫންކަމާއި އެކަން ސަލްމާއަށް ނޭނގޭކަން ބުނުމުން ޒަޔާންވެސް ދެރަވިއެވެ. އެހާބޮޑުގުރުބާނީއެއް ރާއިން އެވަނީ އޭނަ މަންމަދެކެ ވާލޯބީގެ ހައްގުގައެވެ. އަމިއްލަ އުފާތައް އެގުރުބާން ކޮށްލަނީ އެހެންމީހެއްގެ މޫނުމަތިން ހިނިތުންވުން ދެކުމަށެވެ. ދަރިއަކަށް ގުރުބާންވެވޭނީ އެހާވަރަކަށް ކަންނޭނގެއެވެ.

“ދޮންބެއަށް ހުރިހާ ހަގީގަތެއްވެސް އެނގޭ، ވަރަށް ގިނަދުވަސްވެއްޖެ، ދޮންބެއަށް އެނގޭ ރާއިން ހަގީގަތް ފާޅު ނުކުރަން ތިހުރީ ކީއްވެގެންކަން، ދޮންބެއަށް އެނގޭ ޒާ ދެކެ ރާއިން ވަރަށްލޯބިވާކަން، އެލޯބި ފޮރުވުމަށް ކުރާ މަސައްކަތްވެސް އެންމެ ގާތުން ދުށީ ދޮންބެ، ޒަޔާން އަށް ހަގީގަތް އެނގުމުން ތަފާތުވާނެ އެއްވެސް ކަމެއް ނޯންނާނެ، އޭނަވެސް ޒާޔާދެކެވާ ލޯތްބަކުން ސަބަބު އެގެން އެބޭނުންވަނީ…. ޒާޔާއާއި ރާއިންގެ ލައިފްއިން ދުރުކޮށްގެން މީހަކަށްދެވޭނެ އެންމެ ބޮޑު ގުރުބާނީ ރާއިން ތިވަނީ، އެކަން ޒަޔާންއާއި ހިއްސާކުރުމަކުން އަދި ގޯހެއްނެތް،” ޝާން ދެއްކި ވާހަކައިން ޝާންއަށް ހަގީގަތް އެނގޭކަން ރާއިންއަށް ޔަގީންވިއެވެ. ކައިރީގައި ހުރި ސޯފާގައި އިށިއިނީ އެހަގީގަތް ޒަޔާންއަށް ފާޅުކުރާނެ ހިތްވަރު ނެތިގެނެއްނޫނެވެ. ނަމަވެސް އެހެންމީހެއްގެ ދުލުން އެވާހަކަތައް އަޑުއިވުމުން ވީދެރައެއްގެ ބޮޑުކަމުންނެވެ.

     “ސޮރީ، އެއްވެސް ވަރަކަށް ހީނުކުރަން މިހާބޮޑު ސިއްރެއް މިކަމުގެ ތެރޭގައި ފޮރުވިފައިވާނެކަމަކަށް.. ހީނުކުރަން ރާއިން ޒާދެކެ ތިހާލޯބިވާއިރުވެސް ތިވަރު ބޮޑުގުރުބާނީއެއް ވަނީކަމެއް” ސޯފާގައި ރާއިންގާތުގައި އިށިއިންނަމުން ޒަޔާން ބުނެލިއެވެ. ހަގީގަތް އެނގުމުން އޭނަވެސް އެހުރީ ބުނާނީވަކި ކީކޭކަމެއް ނޭނގިފައެވެ. މިއޮޅުންގަނޑު ރަނގަޅުކުރަން ކުރާނެކަމެއް އޭނަގެ ސިކުނޑިއަކަށްވެސް ނައެވެ. މިހުރިހާދުވަހު ޝާންވެސް އެކަން ސިއްރުކޮށްގެން އެހުރީ ކަންތައް ކުރާނެގޮތެއް އޭނައަށްވެސް ނޭނގުމުންނެވެ. އަދި ރާއިންބޭނުންވާގޮތަށް ކަންތައްކުރަން ފުރުސަތުވެސް ދޭންވެގެންނެވެ.

     “އެމް ސޮރީ، އެނގޭ ޒަޔާންއަށް ޒާވަރަށް ކަމުދާކަން، ޒަޔާން ޒާޔާއާއި މެރީ ކޮއްބަ، ޒަޔާންތީ އަހަރެންނަށް ޒާއަށް ހޯދަދެވޭނެ އެންމެ ޕަރފެކްޓް މީހާ، އަހަންނަށް އެނގޭ ޒަޔާން އޭނަ އުފަލުގައި ގެންގުޅޭނެކަން… ޕްލީޒް، އަހަންނަކަށް ދުވަހަކުވެސް ޒާއާއި އެއްކޮށް ލައިފްއެއް ނުފެށޭނެ” ގަދަކަމުން އިނދެ ރާއިން ބުނީ ހަގީގަތުގައިވެސް އޭނަ ބޭނުންވާގޮތެވެ.

     “ރާއިން އަދިވެސް ނުވިސްނެނީތަ، ޒާ ދުވަހަކުވެސް އެހެންމީހަކު އެކްސެޕްޓެއް ނުކުރާނެ، އަހަރެން ކިތަންމެ ވަރަށް މަސައްކަތް ކުރިޔަސް ޒާ އުފަލަކު ނުހުންނާނެ، މޭން ޝީއިޒް ސްޓިލް ވެއިޓިންގ ފޯރޔޫ، އަހަންނަށް އެނގޭ ރާއިންއަށް ނެތްކަން ޒާއާގުޅެވޭކަށް، އެކަމަކު އޭނަގެ ހިތުގަ ތިނޫންމީހަކަށް ދޭނެ ކުޑަޖާގައެއްވެސް ނެތް” ޒަޔާން ބުނެލިއެވެ.

     ޝާންވެސް ގޮނޑީގައި އިނދެގެން ވިސްނަމުންދިޔައީ ދެންކަންތައް ކުރާނެގޮތަކާ ދޭތެރޭގައެވެ. ޒަޔާންއާއި ޒާޔާގެ ކައިވެނި ނުކުރެވޭގޮތްވުމުން ރާއިން ދެންކަންތައް ކުރާނީ ކިހިނެތްބާއޭ އޭނަ ހިތަށް އަރަމުން ދިޔައެވެ. ކޮންމެވެސް ދުވަހަކުން މިކުޅިގަނޑަށް ނިމުމެއްވެސް ގެންނަން އެބަޖެހެއެވެ.

     “ދެން ރާއިން ކިހިނެތް ކަންތައް ކުރާނީ” ވިސްނަން އިނުމަށްފަހު އެންމެފަހުން ޝާން އަހާލިއެވެ.

“ކުރިންވެސް ޕްލޭން ކޮށްފަ އޮތްގޮތަށް… ޔާނާއާއި ބްރޭކްއަޕް ވިވާހަކަ މަމްގާތުގައި ބުނާނީ، ދެން މަމް ބޭނުން ކުއްޖަކާ ކައިވެނި ކުރާނީ، ޒާވެސް އަބަދަކު އަހަރެންގެ އިންތިޒާރުގައި ނުހުންނާނެކަން އެނގޭ، އަހަރެން އެދެނީ އަދިވެސް ޒަޔާން ޒާ ރުއްސަން މަސައްކަތްކުރުން، އަހަރެން ބޭނުމެއްނޫން މިއިން އެއްވެސް ކަމެއް އިތުރު އެއްވެސް މީހަކަށް އެނގޭކަށް” އިރުކޮޅަކު ވިސްނަން އިނުމަށްފަހު ރާއިން ޖަވާބުދިނެވެ. ހީވީ އޭނަގެ ފަހުބަސް އިއްވާލިހެނެވެ. ރާއިންގެ ޖަވާބުން ޒަޔާން ހައިރާންވިއެވެ. ރާއިން އެހުރީ އަދިވެސް އެގޮތުގައެވެ. ނަމަވެސް އެއީ އަދިރަނގަޅުގޮތް ނޫންކަން އޭނައަށް ވިސްނެއެވެ. ހަމަގައިމުވެސް އޭނަ އެގޮތަށް އެކަންތައް ވިއަކަ ނުދޭނެއެވެ. މިކަންތައް ކޮންމެވެސް އެއްކޮޅެއްގައި ޖައްސަން އެބަޖެހެއެވެ.

     “އަހަރެން އަދި އެއްވެސް މީހެއްގެ ގާތުގައި ނުބުނަން ޒާއާ ބްރޭކްއަޕްވިވާހަކައެއް، އެއީ ޒާވެސް އަދި ބޭނުންވާގޮތް…ސޯ އަދި ދުވަސްކޮޅަކަށް މިކަން ސިއްރުކޮއްފައިބާއްވަން އަހަރެންބޭނުން” ދައްކާނެ އިތުރުވާހަކައެއް ނެތުމުން ޒަޔާންވެސް އޭނަ ބޭނުންވާގޮތް ހާމަކޮށްލިއެވެ.

ޝާން ކޮޓަރިއަށް ވަނުމުން އެނދުގައި ފިކުރުބޮޑުވެފައި އިން ސަނާ އޭނައަށް ގޮވާލިއެވެ. ސަނާގާތަށް އައިސް އެނދުގައި އިށިއިނުމަށްފަހު އޭނަގެ ދެއަތުގައި ޝާން ހިފާލިއެވެ. “މިއަންނަނީއޭ ބުނިމީހާ ތިއައީ ބައިގަޑިއިރުވީފަހުން، ކިހިނެތްތަވެގެން މިއުޅެނީ، ޝާންއަށްވެސް މިކަންތައް އެނގެއޭ އަހަރެންގެ ހިތްބުނޭ، އަހަރެންގާތުގައި ނުބުނެވޭވަރުގެ ވާހަކައެއްތަ، ރާއިން ކޮންއިރަކުތަ ޒާޔާއާ ރައްޓެހިވީ، ދެން އެހެން ހެދީމަ ކޮންމެ މީހަކުވެސް ދެރަވާނެދޯ، އަދި ޒަޔާންއާއި ދެމީހުން ގުޅުވަންވެސް އެންމެ ކުރީގައި އަތުކުރި އޮޅާލައިގެން ހުރީ ރާއިން، ޒާ ދެރަކުރަން ނޫނީ ދެން ކޮންކަމެއްތަ އެއީ، އޭނައަށް ހަމަރަނގަޅަށް އެނގޭނެދޯ ޒާ އޭނަދެކެކަން ލޯބިވަނީ ” ސަނާ ޝަކުވާކޮށްލިއެވެ. ޝާންއަށް މަޖުބޫރުވީ އެންމެފަހުން އެހަގީގަތް ސަނާއަށްވެސް ކިޔައިދިނުމަށެވެ. ސަނާ ޒާޔާއާއި ދޭތެރޭ ހަމްދަރުދީވިއެވެ. އަދި ރާއިންއާއި މެދުގައިވެސްމެއެވެ. އެދެމީހުން އެކަކު އަނެކަކުދެކެ އެހާލޯބިވާއިރުވެސް ތަޤުދީރު އެލޯތްބާއި ދޭތެރޭ މިކުރަނީ ކޮންކަހަލަ ސަމާސާއެއްބާއެވެ. ޒާޔާ ދެރަވާނެވަރު އޭނައަށް އިހުސާސްވެސް ނުކުރެވެއެވެ.

     އެނދުމަތީގައި އޮތް ޒަޔާން ވިސްނަމުންދިޔައީ ޒާޔާއަށް އެހަގީގަތް ކިޔާދިނުމާއި ދޭތެރެއެވެ. ކިޔާދީފިނަމަ ޒާޔާއަށް ވާނެވަރުވެސް އޭނައަށް އެނގެއެވެ. ދުވަހަކު ޒާޔާގެ ހިތް މިލްކު ނުކުރެވޭނެކަން އެނގިހުރެވެސް ރާއިން ބޭނުންވާގޮތަށް އޭނަ ޒާޔާއާއި ކައިވެނި ކުރަންވީބާއޭ އަމިއްލަ ހިތާ ސުވާލުކުރަމުން ދިޔައެވެ. އެންމެ ބުއްދިވެރިވާނީ ކޮންގޮތަކަށް ކަންތައް ކުރީމަހެއްޔެވެ؟ ޒާޔާ އިތުރަށް އަނދިރީގައި ބަހައްޓާކަށް ޒަޔާން ބޭނުމެއް ނުވިއެވެ. އޭނައަށްވެސް ހަގީގަތް އެނގުމުގެ ހައްގު އެބައޮތެވެ. ހިތުގެ އުދާސްތައްފޮރުވާލައިގެން އޭނަ އެހަގީގަތް ހޯދީވެސް ޒާޔާ އުފަލުގައި ބެހެއްޓުމުގެ މަގުސަދުގައެވެ.  ދޮގުހަދައިގެން ވާނެ ފައިދާއެއް އޮންނާނެ ހެއްޔެވެ؟ ރާއިންގެ މާމަ ހެދިދޮގުގެ ސަބަބުން އެކަމުގެ ނުބައި އަސަރު މިކުރީ ރާއިންގެ ދިރިއުޅުމަށެވެ. ޔާސިރުވެސް އެދޮގު ހަގީގަތަކަށް ހަދައިގެން ނޫޅުނުނަމައެވެ. ހަގީގަތް ފޮރުވައިގެން ލިބުނު ފައިދާއެއްވެސް ނެތްތާއެވެ. ރާއިން މިހުރިހާދުވަހު އުޅުނުގޮތް އެނގުމުން ޔާސިރުވެސް ވަކި އުފާވާނެހެއްޔެވެ؟

     ދުވަސްކޮޅެއްފަހުން ޒަޔާން ފުރައިފިއެވެ. އޭރު ޒާޔާގެ ކިޔެވުންވެސް ފެށިއްޖެއެވެ. އެންމެ ފަހު ސެމިސްޓާރއަށްވުމުން އޭނަގެ ހުރިހާ ސަމާލުކަމެއް ހުއްޓިފައިހުރީ ހަމައެކަނި ކިޔެވުމަށެވެ. ޒަޔާންވެސް ހަގީގަތް ފާޅުނުކޮށް ހިންދައިލައިގެން ހުރީ އެކަމާވިސްނާލާފައެވެ. އެދެމެދުގައި ކުރިން އޮތްގުޅުން ނެތްކަމުގައިވިނަމަވެސް ޒަޔާން އަދިވެސް ޒާޔާގެ ހާލުބަލަމުން ދިޔައެވެ. އަދި ކިޔެވުމަށް ހިތްވަރުވެސް ލައިދެމުން ދިޔައެވެ. ރާއިންގެ ގޭމީހުންނަށް އެދެމީހުންގެ ކައިވެނި ނުކުރެވޭކަން ސިއްރުކޮށްފައި އޮތްކަމުގައިވިނަމަވެސް ޒަޔާން އޭނަގެ މައިންބަފައިންނަށް އެކަން ސިއްރެއް ނުކުރެއެވެ.

     ޒަޔާން ދިރިއުޅުމުގައި ދެވަނަފަހަރަށްވެސް ނާކާމިޔާބުވުމުން ޔަޝްރާ ނުހަނުދެރަވިއެވެ. ނަމަވެސް ދަރިފުޅުގެ ހިތްސާފުވަރުދެކެފައި އުފާވެސް ވިއެވެ. އަދި ޒާޔާގެ ތެދުވެރިކަމަށް ހިތަހިތުން ޝުކުރުވެރިވެސް ވެވުނެވެ. އެހަގީގަތް ފޮރުވައިގެން ހުރެ އެދެމީހުން ކައިވެނި ކުރިކަމުގައިވިނަމަވެސް އޭގެން ޒަޔާންއަށް އެއްވެސް އުފަލެއް ނުލިބޭނެތީއެވެ. ފަހުން ހަގީގަތް އެނގުނުނަމަ ވާނެދެރަ މާބޮޑުވާނެކަންވެސް އޭނައަށް އެނގެއެވެ. އާއިލާ ތެރޭގައި އެވަރުގެ ބޮޑު ސިއްރެއް އޮވެދާނެކަމަށް ހީވެސް ކުރެވިފައެއް ނެތެވެ. އޭނަގެ މަންމަ އެއޮޅުވަލި އޮޅުވަލުމަކީ ސަލްމާއަށް ރަނގަޅަކަށް ކުރި ކަމެއްކަމުގައި ވިނަމަވެސް އެއިން ވީ އެއްވެސް ފައިދާއެއް ނެތެވެ. އޭނަގެ މަންމަކަމުގައި ވިނަމަވެސް އެގޮތަށް ކަންތައް އޮޅުވާލުމަކީ ކޮށްގެން ވަނެކަމެއް ނޫނެވެ. ކިތަންމެ ދެރަވިނަމަވެސް ޒަޔާންއަށް ހިތްވަރުލައިދިނެވެ. އަދި ދެން ކަންތައްކުރާނެ ގޮތަކާއި ދޭތެރޭ ވިސްނާނީ ކަމުގައި ބުނެލިއެވެ. އަދި ޒަޔާން ވިސްނާފައި އޮތްގޮތަށް ޒާޔާއަށް ހަގީގަތް ކިޔާދިނަސް ކިޔާދޭންވާނީ އޭނަގެ ކިޔެވުން ނިމުނީމަކަން އޭނަވެސް ބުންޏެވެ.

     ޒަޔާން ނޫރާއަށް އެހަގީގަތް ކިޔާދޭން އުޅުމުން އެކަމަށް އިންކަރުކުރީ ޔަޝްރާއެވެ. އަދި މާއަވަސްކަމުގައި ބުނެ އިހަށް މަޑުކުރުމަށް ބުންޏެވެ. މަންމަ ބޭނުންވިގޮތަށް ޒަޔާން ކަންތައްކުރިއެވެ. އަދި ސިއްރުނުކޮށް އެކަންތައްވީގޮތް މަންމައަށް ހިއްސާކުރެވުމުން ހިތްހަމަޖެހުން ލިބުނެވެ.

“ނުނިމޭ”