ފިޔަފަތް 29 ( ފަހު ބައި )

* “ޒައިލީން ބޭނުންވާގޮތަށް އެންމެފަހުންވީ.. އައުލްކީން ބަލިވެއްޖެ. އަހަރެންގެ ނިމުންވެސް އައިސްފި ޒައިދާންއާއި އަލްޔާވެސް އޯކޭ.. ހެއިލަންވެސް ސަލާމަތް ކޮއްދެވިއްޖެ.. ޒައިލީންއަށް އަމިއްލަ ހަޔާތް ލިބިއްޖެ.. ޖިންނިއަކާއި ނުލާ އަމިއްލަ ދުވަސްތައް ވޭތުކޮއްލުމުގެ ނަސީބު އަލުން ލިބެނީ.. އަނބުރާ ނޯމަލްވަނީ.. އިތުރަށް އައުލްކީންއެއް ނާންނާނެ.. އަހަރެންނާއި ކުރިމަތިލާފައި ދެން ރޯކަށް ނުޖެހޭނެ.. ކަންބޮޑުވާވަރު ކަމެއް ދުވަހަކު ނުވާނެ.. އަބަދުވެސް އުޅެވޭނީ އުފަލުގައި.. ދެރަވުމެއް ހިތާމަކުރުމަށް އަބަދަށް އަލްވަދާއު ކިޔާލަން ތައްޔާރުވޭ… އަނބުރާ ކަންތައް ރަނގަޅުވެއްޖެ.. ހެއިލަންއާއެކީ ދެން ދުވަސްތައް އަލުން ހޭދަކޮށްލުމުގެ ފުރުސަތު ލިބެނީ… އިތުރަށް އަހަރެންނެއް އެމީއެއް ލިއަމްއެއް ބާރީއެއްވެސް ނުފެންނާނެ.. ޔުއަރ ގެޓިންގ ޔުއަރ ނޯރމަލް ލައިފް ބެކް ލައިކް ޓޫ އިޔަރސް އެގޯ ޒައިލީން..” ޒައިލީން ބޭނުންވެފަ ހުރިގޮތަށް ކަންތައްތައް ވީކަމަށް ހީކޮށް ހަށިގަނޑުގައި ހުރި ފަހު ހަކަތަކޮޅު ބޭނުންކޮށްލައިގެން ރަވިކާން ބުނެލިއެވެ. އަޑު ނުކުތީވެސް ވައިއަޑަކުންނެވެ. ޒައިލީންއަށް އެ އަޑު އިވުނީ ވެސް ކިރިޔަ ކިރިޔާއެވެ.

ރަވިކާންއާއި ޖެހިގެން އިން ޒައިލީންއަށް ބާރަށް ރޮއިގަނެވުނެވެ. ހީވަނީ މީހަކު އޭނާގެ ހިތް ކުދިކުދި ކުރަމުން ގެންދިޔަ ހެންނެވެ. ޒައިލީން ރަވިކާންގެ ވަރަ އެކީއެކަށް ނޮޅާލާހިތްވިއެވެ. “ދުނިޔޭގެ އެންމެ މޮޔަ މީހާ.. ތިޔަ ސިކުނޑީގެ ވިސްނުން ވަނީ އެކޮޅުކޮޅުން.. ފެންނަހާ މަންޒަރަކުން ނެގީ ނުބައި މާނައެއް.. އިޓްސް ނޮޓް ހެއިލަން.. އިޓްސް ޔޫ.!..” ރޮވިފައި ޒައިލީން ބުނެލިއެވެ.

“ރަވިކާން މަރު ވެއްޖިއްޔާ ދުވަހަކުވެސް އަމިއްލަ ނަފުސަކަށް މާފެއް ނުކުރެވޭނެ.. ރަވިކާން ފުރާނަ އަތްމައްޗަށް ލައިގެން ޒައި ރައްކާތެރިކުރިއިރު އެކަން ދުވަހަކުވެސް އަނބުރާ ރައްދެއް ނުކުރެވޭނެ.. އަނެއް ދުނިޔޭގައި ވީހުރިހާކަމެއް މިދުނިޔެއަށް އާދެވުމުން ހީވީ ހުވަފެނެއް ފެނުނުހެން.. އެކަމަކު ރަވިކާން އަމިއްލައަށް އަންގައިދިނީ އެއީ ހަގީގަތްކަން.. އަދިވެސް އޮޅުން އަރާނަމަ ބުނެލަން.. ނޮޓް ހެއިލަން… އިޓްސް ޔޫ… ރަވިކާން.. ދެން މަރުނުވާތި.!!” ރޮމުން ރޮމުން ޒައިލީން ހިތުތެރޭގައިވާ ހުރިހާ ހަގީގަތެއް ބޭރުކުރަމުން ގެންދިޔައެވެ. *

މަންޒަރު ސާފު ވުމުން އަލްޔާއަށް އަނގަމަތީގައި އަތް އަޅާފައި އަލްޔާއަށް ޒައިލީންމެންގެ ގާތަށް ދުއްވައިގަނެވުނީ ކިހިނެތްކަމެއްވެސް ނޭނގުނެވެ. ޒައިދާން ވަގުތުން ކޮނޑުގައި އޮތް ދަބަހުގެ ތެރެއިން ފޯނު ނެގިއެވެ. އެވަގުތު ހާސްވެފައި ހުރެގެންވެސް އެމްބިއުލާންސްއަށް ގުޅަން ޒައިދާން ހަނދާނެއް ނުނެތެއެވެ. “ކިހިނެތްވީ…؟؟” އަލްޔާއަށް ޒައިލީން އާއި ހިސާބަށް ދެވުމުން އަހާލެވުނެވެ. ބިންމަތީގައި ވެއްޓިފައި އޮތް ރަވިކާން ފެނިފައި އަލްޔާއަށް ދެފިޔަވަޅު ފަހަތަށް އަޅާލެވުނެވެ.

“ރަވި… ރަވިކާން…” ބެދިފައިވާ ޒައިލީންގެ އަޑު ބޭރުވީ ކިރިޔަކިރިޔާއެވެ. އަލްޔާ ހާސްވެފައި ހުރެ ދެ ފަރާތް ހޯދާލިއެވެ. “އައުލްކީން ކޮބާ..؟” އަލްޔާއަށް އެހުނެވެ. ޒައިލީން ލޮލުން ހުއްޓުމެއް ނެތި ފައިބަމުން ދިޔަ ކަރުނަތައް ފުހެވޭތޯ ބަލަމުން ގެންދިޔައެވެ. ޒައިލީން މަޑުމަޑުން ރަވިކާންގެ ގާތަށް ޖެހިލިއެވެ. ރަވިކާންގެ އަތުގައި ހިފާ ބާރުކޮށްލިއެވެ. އޭރު ރޮއިރޮއި ޒައިލީންގެ ދެލޯ ވަނީ ރަތްވެފައެވެ. “ޕްލީޒް.. ޕްލީޒް ވޭކްއަޕް.. ޕްލީޒް..” ރަވިކާންގެ އަތުގައި ހިފައިގެން އިނދެ ޒައިލީން އެހެން ކިޔަމުން ގެންދިޔަ ވަރަކަށް ހިތަށް ވަމުން ދިޔަ ތަދު ދިޔައީ ދެގުނައަށް މައްޗަށް ޖެހެމުންނެވެ.

“ނޫން..” ޒައިލީންއަށް ކުރިއަށްވުރެވެސް ބާރަށް ބުނެވުނެވެ. ރަވިކާންގެ ޓީޝާޓްގައި ޒައިލީންގެ އަތް ޖެހުނީއެވެ. އެ ޓީޝާޓު ތެތްކަމުން ޒައިލީންއަށް ރަނގަޅަށް ބަލާލެވުނެވެ. މުޅި އަތުގައި ހޭކުނީ ހުސް ލެއެވެ. ޒައިލީންއަށް ރަވިކާންގެ ޓީޝާޓް އެއްފަރާތް ކޮށްލެވުނެވެ. ކިތަންމެ ލަދުގަތަސް މިފަހަރު ލަދު ގަންނާކަށް ޒައިލީންއަށް ފުރުސަތެއް ނުލިބުނެވެ. ޒައިލީންއަށް ލޯމަރާ ފިއްތާލެވުނީ ބޭއިޚްތިޔާރުގައެވެ. ރަވިކާންގެ މޭމަތިން ފެށިގެން ފޫޅާއި ހަމައަށް ދެމިލާފައިވާ ޒަޚަމް ފެނުމުންނެވެ. ލޭ އަންނަމުން ދިޔައީ އެހެނެއް ބަލާފައެއް ނޫނެވެ. ޒައިލީން ބޮލަށް އެނބުރުން އަރާގޮތްވިއެވެ. މިއީ ހުވަފެނަކަށްވާނެ ނަމައޭ ޒައިލީންއަށް ދުއާކުރެވުނީ ކިހާ ވަރަކަށް ކަމެއް ނޭނގެއެވެ.

“ބީ ހެޕީ ޒައިލީން…” ރަވިކާން ގަދަކަމުން ބުނެލި ޖުމްލައަކީ އެއީއެވެ. ފެންކަޅިވެފައިވާ ރީނދޫކުލައިގެ އެ ދެލޯ މެރުނުއިރު ކަރުނަތިއްކެއް ނީރާލައިގެން ފޭބިއެވެ. ޒައިލީންއަށް ހީވީ މުޅި ދުނިޔެ ހުއްޓުނު ހެންނެވެ. ޝޮކެއް ޖެހިފައި ލޯ މަރާލައިގެން އޮތް ރަވިކާން އާއި ދިމާލަށް ބަލަހައްޓައިގެން ޒައިލީން އިންއިރު އެމްބިއުލާންސްގެ ސައިރެންގެ އަޑުވެސް ނީވޭ ކަހަލައެވެ. އަލްޔާގެ ލޮލުންވެސް އޭރު ކަރުނަތައް އޮހިގަނެފިއެވެ. ލޮލުގައި އޮތް އައިނު ނަގައިގެން އަލްޔާ ކަރުނަތައް ފޮހެން ފެށިއެވެ.

ގާތުގައި އިން ހެއިލަން އިނީ ގަބުވެފައެވެ. ކުރާނެ ނުކުރާނެކަމެއް ނޭނގިފައެވެ. އެއްވެސް ހަރަކާތެއް ނެތް ރަވިކާން އާއި ދިމާލަށް ބަލަހައްޓައިގެން އިންއިރު ހެއިލަންގެ ދެލޮލުންވެސް ކަރުނަ ވިދައެވެ. “ނޫން…….” ޒައިލީންގެ ދުލުން ބޭރުވިއެވެ. ވައިއަޑަކުންނެވެ. ދެވަނަ ސިކުންތުކޮޅުގައި ޒައިލީންއަށް ރަވިކާންގެ ގައިގައި ހިފާ ތަޅުވައިގަނެވުނެވެ. “ފޭކްދޯ ތި ޖައްސަނީ ޒައި ދެރަކުރަން..؟ ތެދުވޭ.. އެކްޓް ކުރާ ގަޑި ނިމިއްޖެ..!” ޒައިލީން ރޮމުން ބުނަމުން ދިޔަ ޖުމްލަތަކުން ބަލަން ހުރި އަލްޔާގެ ހިތްވެސް ކުދިކުދިވާވަރުވިއެވެ.

“ޒައި…” އަލްޔާ ކުޑަކަކޫ ޖަހާލިއެވެ. “އަލްމެން އެންމެން ރާވައިގެންދޯ ތިއުޅެނީ..؟ އޯކޭ މިހާރު އެނގިއްޖެޔޭ.. ދެން އިތުރަށް އެކްޓުކުރަން ނޯވެ ތެދުވޭ…!!!” ޒައިލީން އަލްޔާ އާއި ދިމާލަށް ބަލާލާފައި ބުނެލިއެވެ. އެ އަޑު ތުރުތުރުލައެވެ. އަލްޔާއަށް ކަރުނުން ފުރިގެންވީ ދެލޮލުން ޒައިލީންގެ މޫނަށް ބަލާލެވުނީއެވެ. ނޫނެކޭ ބުނަން ބޭނުންވިޔަސް އަލްޔާގެ ދޫ ހަރާކަތެއް ނުކުރިއެވެ. ޒައިލީން ހިތް ފަޅައިގެން ދާހާލުގައި ރަވިކާންގެ މޫނާއި ދިމާލަށް ގުދުވިއެވެ. “ވައި ޔޫ އިޑިއަޓް..؟ އައި……….” ޒައިލީންއަށް ޖުމްލަ ކުރިއަށް ގެންދާނެގޮތެއް ނޭނގުނެވެ. “ޒައި… އެއްފަރާތްވޭ އެމްބިއުލެންސް އިޒް ހިއަރ..” އަލްޔާ ޒައިލީންގެ ކޮނޑުގައި ހިފާއްޓާލީ ސްޓްރެޗަރ ހިފައިގެން އައި ހަތަރުވަރަކަށް މީހުން ފެނިފައެވެ. “ނޫން… ޒައި ނުދާނަން.. ޕްލީޒް އަލް… ރަވިކާން.. ރަވިކާން…” ޒައިލީން ނުދާން ގަދަ ހެދިއެވެ. އަލްޔާގެ އަތް ފޮޅުވާލިއެވެ. ހެއިލަން އޭރުވެސް ޝޮކެއް ޖެހިފައި އިނެވެ. ޒައިދާން ގޮސް ޒައިލީންގެ އަތުގައި ހިފިގޮތަށް ކޮޅަށްނަގާ ޒައިލީންގެ ގައިގައި ބާރަށް ބައްދާލިއެވެ. “ޒައި..” ހިތްވަރު ލައިދޭން ބުނާނެ އެއްޗެއް ޒައިދާންގެ ދުލުކުރިއަކަށް ނައެވެ. “ދޮން.. ދޮންބޭ..” ޒައިލީން ޒައިދާންގެ ކޮނޑުގައި ބޯ އަޅާލިއެވެ. އޭރު ޒައިލީން ގިސްލަމުން ދިޔަވަރުން ހީވަނީ ރޫޅިދާނެހެންނެވެ. ހިތުގައި ޖެހިޖެހިފައި ރޮމުން ގެންދިޔަ ޒައިލީންގެ ގައިގައި ބައްދާލައިގެން ހުރި ޒައިދާންގެ ދެލޮލުން ވެސް ކަރުނަ ހިލުނެވެ.

ޒައިލީން ޒައިދާން ދުރުކޮށްލި ގޮތަށް އަނެއްކާވެސް ރަވިކާންގެ ގާތަށް ގުދުވިއެވެ. ރަވިކާން އަނެއްކާ ވެސް ވަރުދެރަ ގޮތަކަށް ލޯ ހުޅުވާލުމުން ޒައިލީންގެ އުންމީދުގެ ހުޅުކޮޅު ބޮޑުވިހެން ހީވިއެވެ. ވަގުތުން ޒައިލީން ރަވިކާން އާއި ދިމާލަށް ގުދުވެލީ ރަވިކާން އެއްޗެކޭ ބުނަން އުޅުނުހެން ހީވުމުންނެވެ. “ހޯލްޑް އޮން ރަވިކާން.. އެމްބިއުލެންސް އެބަ އާދޭ..” އޭރުވެސް ޒައިލީންގެ ލޮލުން އަންނަމުން ދިޔަ ކަރުނަ ތައް ރަވިކާންގެ ކޮލުގައި ބޮސްދީފައި ފައިބަމުން ދިޔައެވެ. “ލަވް ޔޫ ސޯ މަޗް..” ރަވިކާން ވައިއަޑުން ޒައިލީންގެ ކަންފަތް ދޮށުގައި ބުނެލީ އެ ހަތަރު ލަފްޒު އެކަންޏެވެ. ޒައިލީންއަށް ވީގޮތް ބުނެދޭކަށް ވެސް ނޭނގުނެވެ.

އޭރު ދުރުގައި ހިސްޓްރީ ޓީޗަރާއި ކެމިސްޓްރީ ޓީޗަރު ގަބުވެފައި ހުއްޓެވެ. ސްޓްރެޗަރއަށް ރަވިކާން ލާން އައި މީހުންވެސް ބިރުން ފަހަތަށް ޖެހުނެވެ. ގުޑިވެސް ނުލާ އޮތް ރަވިކާންގެ ދެ ވަރަ ފެނިފައެވެ. “ރަވިކާން މަރުވަންދެން ހުންނަންތަ ތި އުޅެނީ..!؟!؟” ޒައިލީންއަށް ރުޅި އިސްކުރެވުނެވެ. ހިތްދަތި ވެފައިވާވަރުންނެވެ. ހިތްވަރު ގަދަކޮށްފައި އެތަނުން އެކަކު ރަވިކާން ސްޓްރެޗަރ އަށް ލާންވެގެން ރަވިކާންގެ ގައިގައި އަތް ޖައްސާލިއެވެ. އަނެއްކާވެސް ހުދު އަލިގަނޑެއް އެރިއެވެ. ޒައިލީންއަށް ލޯ މަތީގައި އަތް އެޅުނެވެ. އޭރުވެސް ހުއްޓުމެއް ނެތި ލޮލުން ކަރުނަ އަންނަމުން ދިޔައެވެ. ލޮލުން ކަރުނަ ހުސްވާނަމަ ޒައިލީންގެ ލޮލުން މިހާރު ކަރުނަ ހުސްވާނެތާ ކިތަންމެ އިރެކެވެ. “ރަވިކާން…؟” ޒައިދާންގެ އަޑަށް ޒައިލީންއަށް ލޯ މަތިން އަތް ނެގުނެވެ. އޭރު ރަވިކާން ފެންނާކަށް ނެތެވެ.

********************

ޒައިލީންއަށް އެ ޚިޔާލުތަކުން ބޭރުވެވުނީ ފޯނު ވައިބްރޭޓް ވުމުންނެވެ. ޒައިނާގެ މެސެޖެކެވެ. އިހަކަށް އެ މެސެޖް ނުބަލާ ޒައިލީން އަނެއްކާވެސް ބެލީ އެ ހަނދާންތަކުގެ ތެރެއަށް ފީނާލެވޭތޯއެވެ. “ޒައި..” ހެއިލަންގެ އަޑަށް ޒައިލީންއަށް ވާތް ފަރާތަށް ބަލާލެވުނެވެ. އޭރު ޖިންސުގެ ޖީބަށް އަތް ޖަހާލައިގެން ހެއިލަން ލުއި ހިނިތުންވުމެއް ހަދިޔާ ކޮށްލައިގެން ހުއްޓެވެ. ޒައިލީންގެ ލޮލަށް ގިނަވެފައިވާ ކަރުނަތައް ފެނިފައި ހެއިލަންގެ ހިނިތުންވުން ފަނޑުވިއެވެ. “ޒައި…” ހެއިލަން ގޮނޑިއެއް ދަމާލާފައި ޒައިލީންގެ ގާތުގައި އިށީނދެލިއެވެ. “އަދިވެސް އެދުވަހުގެ މަތިން ހަނދާންވަނީދޯ..؟” ކްލާސްތެރެ އަޑުގަދަކަމުން ހެއިލަން ވާހަކަ ދެއްކީ ފުދޭވަރަކަށް ބާރަށެވެ. ޒައިލީން މަޑުމަޑުން ބޯ ޖަހާލިއެވެ. “ޒައި.. ލިސެން..” ހެއިލަން އެހެން ބުނެލުމާއި އެކީގައި ޒައިލީންގެ ލޮލުން ކަރުނަތައް އޮހޮރިގަތެވެ.

********************

“ރަވިކާން ކޮބާ..؟؟” ޒައިލީންއަށް ވަށައިގެން ހޯދާލެވުނީ މޮޔަވެފައިވާ މީހެއް ފަދައިންނެވެ. އަލްޔާ ވެސް ހާސްވެފައި ހުރެ ވަށައިގެން ހޯދަނީއެވެ. އޭރު ސްޓްރެޗަރ ގެނައި މީހުންތައްވެސް ހައިރާންވެ އަންތަރީސްވެފައި ހުއްޓެވެ “ރަވިކާން….. ކޮބާ….؟” ޒައިލީންއަށް ވަށައިގެންވާ މަންޒަރުތައް އަނދިރި ވާންފެށިހެން ހީވިއެވެ. ދެން ވީނުވީއެއް ޒައިލީންއަކަށް ނޭނގުނެވެ.

ޒައިލީން ވެއްޓެންދާހެން ހީވެގެން އަލްޔާއަށް ބަލާލެވުނެވެ. ”ޒައި..!!” އަލްޔާ އާއި ޒައިދާންއަށް އެއް އަޑަކުން ޒައިލީންއަށް ގޮވާލެވުނެވެ. ވެއްޓެން ދިޔަ ޒައިލީން ހިފޭއްޓޭތޯ ޒައިދާން މަސައްކަތް ކުރި ނަމަވެސް އެކަން ކާމިޔާބެއް ނުވިއެވެ. ކަނޑާލި ރުކެއް ފަދައިން ޒައިލީން ގޮސް ބިމުގައި ޖެހުނެވެ. “ޒައި..!” ގަބުވެފައި އިން ހެއިލަންއަށް ދިރުމެއް ލިބުނު ފަދައެވެ. ހެއިލަން ގޮސް ޒައިލީންގެ ގާތުގައި ހުއްޓުނެވެ. ވަގުތުން ޒައިލީން އެމްބިއުލާންސްއަށް ލައިގެން ހޮސްޕިޓަލަށް ގެންދެވުނެވެ.

ދެން ޒައިލީންއަށް ލޯ ހުޅުވާލެވުނުއިރު ފެނުނީ ހުދު ކުލައިގެ ސީލިންގއެވެ. އޮވެވުނީ ހޮސްޕިޓަލުގައި ކަން ޒައިލީންއަށް އެނގުނީ ޒައިދާން ކުރަކި އަޑަކުން އެހެން ބުނެލުމުންނެވެ. ޒައިލީން އުނދަގޫ ގޮތަކަށް ތެދުވެ އިށީނެވެ. “ޒައި.. އިހަކަށް އޮވެލާ.. ރެސްޓް ގިނައިން ބޭނުންވާނެ..” އަލްޔާ ވިސްނައި ދެވޭތޯ މަސައްކަތް ކުރިއެވެ. “ޒައި ހޮސްޕިޓަލަށް ގެނައީ ކީއްވެގެން..؟” ޒައިލީން އެއްސެވެ. “އެގަޑީ ޒައި އަނބުރައިގަތީ.. ޔޫ ޕާސްޑް އައުޓް… އެކަމަކު ދޮންބެ ހިފޭއްޓުމުގެ ކުރިން ޒައި ވެއްޓިއްޖެ… އެންޑް ބޮލުން ތަންކޮޅެއް ފަޅައިގެން ގޮސްފައި އިނީ… އިޓް ނީޑެޑް ސްޓިޗެސް.. މިހާރު ސްޓިޗް ކޮށްފި.. އޭ އިނގޭތަ ދޮންބެ ޝޮކްވެފައި ހުރިވަރު..؟؟ ޒައި ތިއީ ކުރިން ދުވަހަކުވެސް އަނބުރައިގަތް ކުއްޖެއް ނޫން.. އެހެންވީމައި ހަދަންވީ ގޮތްވެސް ނޭނގިފައި ދޮންބެއަށް ހުރެވުނީ.. ނަސީބަކުން ހެއިލް އަވަހަށް ތެދުވެ ޒައިއަށް ހެލްޕްވީ.. އެއަށްފަހު ހޮސްޕިޓަލަށް ގެނައީ..” ކުޑަކޮށް ނަމަވެސް ހިނިތުންވެލައިގެން ހުރެ ޒައިދާން ވީނުވީ އޮޅުންފިލުވައިދިނެވެ.

“ޒައި ބަނޑުހައިވެފަދޯ..؟ އަލް ދެންމެ މިއައީ ކާއެއްޗެހި ހިފައިގެން.. ސޭންޑްވިޗް.. ވަރަށް މީރު މި ސޭންޑްވިޗް… ޒައި ވެސް ރަހަބަލާލަބަލަ…” އަލްޔާ ގެނައި ކޮތަޅު ހުޅުވާފައި ބުނެލިއެވެ. ޒައިލީން ރަވިކާންއާއި ބެހޭގޮތުން ސުވާލެއް ނުކުރޭތޯ ދުއާ ކުރަމުންނެވެ. ޒައިލީން ބަސްއަހާ ކުއްޖެއް ފަދައިން އަލްޔާ ލަވައިދިން ސޭންޑްވިޗްކޮޅު ކާލިއެވެ. “ރަވިކާން ކޮބާ..؟” ޒައިލީން ދެން އަހާލީ ޒައިދާން އާއި އަލްޔާ ނާހާނެ ކަމަށް ނިންމައިގެން ހުރި ސުވާލެވެ. އަލްޔާ ހިތާމަވެރި ގޮތަކަށް ހީނލިއެވެ. އެ ކުޑަ ހިނިތުންވުމުގެ ފަހަތުގައި އަލްޔާ ފޮރުވައިގެން ހުރި ހިތްދަތިކަން ކިތަންމެހާވެސް ބޮޑެވެ.

ޒައިދާން އިސްތަށިގަނޑުގައި އަތުން ފުނާ އަޅާލަމުން ދުރު ބަލާލިއެވެ. އެ ސުވާލަށް ޖަވާބު ދޭނެވަރަށް ވުރެ ފިނޑިކަން ޒައިދާންއަށް އަމިއްލައަށް ގަބޫލު ކުރެވުމުންނެވެ. ޒައިލީން ހިނިތުންވެލުމުން އަލްޔާއަށް ޒައިލީންގެ މޫނާއި ދިމާލަށް ބަލާލެވުނެވެ. “ނޭނގެދޯ..؟” ޒައިލީންގެ އަޑު ތުރުތުރުލާންފެށިއެވެ. ”ޒައި.. ދޮންބެ…….” ޒައިދާން އެއްޗެކޭ ބުނުމުގެ ކުރިން ޒައިލީން އިސްޖަހާލިއެވެ. ޒައިދާންއަށް އިހުސާސް ކުރެވެމުން ގެންދިޔައީ ބޭކާރު ކަމެވެ. އަމިއްލަ ކޮއްކޮގެ ކުނޑިކުނޑިވެފައިވާ ހިތަށްޓަކައި އޭނާއަށް ކޮށްދެވޭނެ ކަމެއް ނެތުމުންނެވެ.

“ދޮންބެއަށް ފާހަގަވިތަ..؟ ރަވިކާން އަލަށޭ އެވަގުތު ޒައިގެ ނަމުން ޒައިއަށް ގޮވީ.. އެހެންޏާ ހުސް އިންސި ކުއްޖާއޭ ކިޔާފައި ގޮވާނީ…” އިޚްތިޔާރަކާއި ނުލާ ޒައިލީންގެ ލޮލުން ކަރުނަތައް އޮހިގަތެވެ. ނަމަވެސް ތުންފަތުގައި ދުވެލާފައި ވަނީ ހިނިތުންވުމެކެވެ. ޒައިލީން ނިކަން ބޮޑަށް ހިނިތުންވެލައިގެން އިނަސް އެހިތުގެ ހާލު އަލްޔާއަށް އަންދާޒާ ކުރެވުމުން ފެންކަޅިވިއެވެ. “ޒައިއަށް އަލަށް ރަވިކާންގެ ދުލުން ޒައިގެ ނަން ބުނި އަޑުއިވުނީ… އަދި… ހީ ސެއިޑް ހީ ލަވްޑް މީ… އެވެސް… އެވެސް އެންމެ ފަހު ވަގުތުކޮޅު…” ޒައިލީންގެ ހިތުގައިވީހާ އުދާހެއް ބޭރު ކުރެވެމުން ގެންދިޔައެވެ. އަލްޔާއަށްވެސް ކެތްކުރެވުނީ ވަކިވަރަކަށެވެ. ޒައިލީންގެ ހިތާމައިގައި އަލްޔާއަށްވެސް ބައިވެރިވެވުނީ އެއްވެސް ޝަކުވާ އަކާއި ނުލައެވެ. ކެތްކުރެވުނުހާ އެންމެ މައްޗަކަށް ކެތްކޮށްގެން ޒައިދާން އެ ވާހަކަތައް އަޑުއަހަން ހުއްޓެވެ. އެންމެ ލޯބިވާ މީހުންގެ ތެރެއިން ދެ މީހުން ހިތުގައި ޖެހިޖެހިފައި ރޯތަން ބަލަން ޒައިދާންއަށް ކުޅަދާނަ ނުވި ނަމަވެސް ކެތްކުރިއެވެ. މިވަގުތު އޭނާ ރޯންފަށައިފިނަމަ ޒައިލީންއާއި އަލްޔާގެ ހިތްވަރު އިތުރަށް އެލޭނީކަން ވިސްނޭތީއެވެ.

“ޒައި… ރަވިކާން މަރެއް ނުވެޔޭ…” ޒައިލީންގެ ގައިގައި ބައްދާލައިގެން ހުރެ އަލްޔާ ބުނެލި ޖުމްލައިން ޒައިލީންގެ ނޭވާ ހިނދުކޮޅަކަށް ތާށިވިއެވެ. “ވަޓް..؟” ޒައިލީންގެ އަޑު ބޭރުވީވެސް ކިރިޔާއެވެ. ”އާނ ރަވިކާން އަދި މަރެއް ނުވޭ… ރަވިކާން ހުރީ ފްލޯރައިޓް ކްރިސްޓަލްސް ހައުސްގައި…” އަލްޔާ ބުނެލިއެވެ. ޒައިދާން ހައިރާންވެފައި އަލްޔާގެ މޫނަށް ބަލާލިއެވެ. އެއީ އޭނާއަށްވެސް ނޭނގޭ ކަމަކަށް ވުމުންނެވެ. “އަލް.. ބޭރަށް އާދެބަލަ މިނެޓަކަށް..” ޒައިދާން ވަގުތުން އަލްޔާގެ އަތުގައި ހިފާއްޓާފައި އެކޮޓަރިން ބޭރަށް ނެރުނެވެ. ”އަލް.. އަލްއަށް ކިހިނެތް..؟ ޒައި ހިތްހަމަޖައްސަން ބުނި ވާހަކައެއްތަ އަނެއްކާ..؟” ބޭރަށް ނުކުމެވުނުހާ އަވަހަކަށް ޒައިދާން އަލްޔާ އާއި ސުވާލު ކުރަން ފެއްޓިއެވެ. “ނޫނޭ ހަމަ އަސްލޭ.. ބަލާބަލަ ރޯޒްދައްތަ މިއޮތީ އަލްގެ ފޯނަށް މެސެޖް ކޮށްފައި… އިނގޭތަ އެގަޑީ އަސްލު ވީގޮތް..؟؟ އެގަޑީ ސާޔަލް އައިސްފައި ރަވިކާން ގެންދިޔައީ.. ރަވިކާން ހޮސްޕިޓަލަށް ގެންގޮސްފިއްޔާ ސަލާމަތް ނުކުރެވިދާނެތީ.. ދެން އިތުރަށް އެނގޭނީ ޒައި ދޫކޮށްލީމައި ގެއަށް ދިޔައީމަ.. ރޯޒް ދައްތަ ފަހުން ނެތް އަލް ކުރި މެސެޖަށް ރިޕްލައި ކޮށްފައެއް..” އަލްޔާ ޖީބުން ފޯނުނަގާ ޒައިދާންއަށް އޭނަ އަށް ރޯޒްލިޔާ ކޮށްފައިވާ މެސެޖް ދައްކާލިއެވެ. ޒައިދާންގެ މޫނުމަތީގައިވާ ކުލަވަރު އަލިވިއެވެ. “ސޯ ރަވިކާން މަރެއް ނުވޭ ދޯ އަދި..؟” ޒައިދާން އަނެއްކާވެސް ޔަގީން ކުރުމުގެ ގޮތުން އެއްސެވެ. “އާނ އަދިއެއް ނޫން އިރާދަކުރެއްވިއްޔާ.. އެކަމަކު ރޯޒްދައްތަ ބުނެފައި އޮތީ ވަރަށް ވަރަށް ހާލު ދެރައޭ… ސަލާމަތް ވާނެކަމުގެ އެހާބޮޑު ޗާންސެއްވެސް ނެތޭ… އެހެންވެ އަލް ދެރަވަނީ.. ހަމަ ހިތަށް އަރަނީ އެހާވަރަށް އަހަރެމެން އުންމީދު ކޮށްގެން ހުއްޓާ ރަވިކާން އަހަރެމެންނާއި ވަކިވެގެން ހިނގައިދާނެއޭ…” އަލްޔާ އިސްޖަހާލިއެވެ.

“އިންޝާ ﷲ އިޓްސް ގޮއިންގ ޓު ބީ ފައިން…. އަލް އިހަކަށް ޒައިގެ ގާތު މަޑުކޮށްލަބަލަ.. އަހަރެން އެބަ އަންނަން މަޣުރިބް ނަމާދު ކޮށްގެން.. އަވަހަށް ދޭ ޒައިގެ ގާތަށް.. މިހާރު އަހަރެމެން އެއްޗެކޭ ނުބުނެ ވަކިން ވާހަކަ ދައްކަން ބޭރަށް ނުކުތީމައި ޒައި ވަރަށް ރުޅިއައިސްފައި ހުންނާނީ..” ފާޑަކަށް ހީނލަމުން ޒައިދާން ބުނެލިއެވެ. “އޯކޭ ނަމާދު ކޮށްގެން އަވަހަށް އަންނާތި.. ހެއިލް ބުނީ ހެއިލްވެސް އެބަ އަންނަމޭ ކާއެއްޗެހި ގަނެގެން..” އަލްޔާ ހިނިތުންވެލިއެވެ. ޒައިދާން އަލްޔާގެ ކޮލުގައި ޖަހާލާފައި ހިނގައިގަތެވެ. އަވަހަށް އަންނާނަންކަމަށް ބުނަމުންނެވެ.

އަލްޔާ އަލުން ޒައިލީންގެ ގާތަށް ވަތްއިރު ޒައިލީން އިނީ ފާރާއި ދިމާލަށް ބަލަހައްޓައިގެން ގެއްލިފައެވެ. އަލްޔާ އެހެން ބުނުމުން ޒައިލީން ވިސްނަނީކަމަށް އަލްޔާއަށް ނިންމުނެވެ. “ޒައި.. ސޭންޑްވިޗް ހުސް ކޮށްލަބަލަ.. އޭރުން އަވަހަށް ހޮސްޕިޓަލުން ދޫކޮށްލާނީ..” އަލްޔާ އުޅުނު ގޮތުން ހީވަނީ ފަސްވަރަކަށް އަހަރުގެ ކުޑަކުއްޖަކާއި ވާހަކަ ދައްކާ ހެންނެވެ. ޒައިލީން ތުންއަނބުރާލިއެވެ. “އަލްގަނޑޫ..! ރަވިކާން ކޮބާތަ..؟ ޕްލީޒް ޒައިގެ ގާތުގައި ބުނެބަލަ.. އެނޫނީ ޒައި ހޮސްޕިޓަލުން ފިލައިގެން ހިނގައިދާނަން..” އަލްޔާ ނުބުނެފާނެތީ ޒައިލީން ޖުމްލަ ނިންމާލީ އިންޒާރަކުންނެވެ. “ރަވިކާން.. ރަވިކާން ވީ ފްލޯރައިޓް ކްރިސްޓަލްސް ހައުސްތެރޭގައި…” އަލްޔާ ކޮތަޅުން ޖޫސް ޕެކެޓެއް ނަގަމުން ބުނެލިއެވެ. “އެގޭގައި..؟ އެ ގަޑީ ރަވިކާންއަށް ކިހިނެތްވީ..؟” ޒައިލީން އަދި ޒައިދާންއަށްވުރެ ސުވާލު ގިނަހެން ހީވެއެވެ. އަލްޔާ ކުޑަކޮށް ހިނިތުންވެލިއެވެ. “އެގަޑީގައި ސާޔަލް އައިސް ރަވިކާން ގެންދިޔައީ..” އަލްޔާ ކުރު ޖަވާބުތަކުން ފުއްދަމުން ގެންދިޔައެވެ. “ރަވިކާން ކިހިނެތް..؟” ސީދާސީދާކޮށް ޒައިލީން ނާހަނީސް އަލްޔާ ނުބުނާނެކަން އެނގޭތީ ޒައިލީން އަހާލިއެވެ. “އެހާ ރަނގަޅެއް ނޫން..” އަލްޔާ ޖޫސް ޕެކެޓް ކަނޑާލާފައި ޒައިލީންއަށް ދިއްކޮށްލިއެވެ. “ނޮޓް ފައިންއޭ..؟؟ އެހެންވިއްޔާ އަވަހަށް ގެއަށް ދާން ހިނގާ..” ޒައިލީން އެނދުން ފައިބަން އުޅުނެވެ. ”މާދަމާ އަލްއަށް ހީވަނީ ޒައި ގެއަށް ދޫކޮށްލާނެހެން.. އެހެންވެ އިހަކަށް ރެސްޓް ކުރޭ..” އަލްޔާ ތަންކޮޅެއް ހަރުކަށި ވެލާފައި ޒައިލީންގެ އަނގަޔަށް ޖޫސް ޕެކެޓްގެ ހޮޅި ކޮއްޕާލިއެވެ.

ޕޭވްމެންޓްގެ އެއްފަރާތަކުން ހިނގަމުން ދިޔަ ހެއިލަން ދިޔައީ ފުދޭވަރަކަށް މަޑުންނެވެ. ދެ ކޮތަޅު ހިފައިގެން ހިނގަމުން ދިޔަ ހެއިލަންގެ ސިކުނޑީގައި ވަނީ އެންމެ ކަމެކެވެ. ފިހާރައިގެ ތެރެއިން ކައިލީ އާއި ދިމާވުމުން ހެއިލަން ކައިލީއަށް ހިތުގެ ހާލަތު އަންގައިދިނުމުން ކައިލީގެ ފަރާތުން ލިބުނު ޖަވާބެވެ. “ކައި.. އައި ލައިކް ޔޫ..” ހެއިލަން އެހެން ބުނެލީ ވަރަށް އާދައިގެ ގޮތަކަށެވެ. އެވަގުތު ލޮލީއެއް އަނގަޔަށް ލައިގެން ހުރި ކައިލީ ކޮށިއެރި ގޮތް ހެއިލަންގެ ހަނދާނުން ނުނެތޭނެއެވެ. “ހެއިލް ސަމާސާތަ ނޫނީ ސީރިއަސްތަ..؟” އެފަދަ މުހިންމު ވަގުތުކޮޅެއްގައިވެސް ކައިލީ ކުރި ސުވާލު ހަނދާން ވުމުން ހެއިލަންގެ ގާތަށް އަނެއްކާވެސް ހިނިއައެވެ.

“އާނ.. ވަރަށް ސީރިއަސް…” ހެއިލަން އެހެން ބުނެލުމުން ކައިލީ ގަބޫލު ނުކުރެވިގެން ހެއިލަންގެ ލޮލަށް ބަލަހައްޓައިގެން ވަރަށް ގިނައިރު ހުއްޓެވެ. އެ މުށިކުލައިގެ ބޮޑު ދެލޮލުން ހެއިލަން ބިރު ގަންނަވަރަށް ބަލަހައްޓައިގެން ހުރިގޮތް އެއީ ހެއިލަންއަށް ހަނދާން ނައްތާލަން އުނދަގޫވާނެ ވަގުތު ކޮޅެކެވެ. “އައި ލައިކް ޔޫ ޓޫ.. ވަރަށް ވިއާރޑް ދޯ..؟ ކައި ދުވަހަކުވެސް ޑްރީމް ކުރި ކަމެއް ނޫން އެއީ ސްޓޯރ އިން ނުކުތް ވަގުތު ކައިލީ އެންމެ ލައިކްވި މީހާ ކައިއަށް ކޮންފެސް ކުރާނެކަމަށް… ދެޓް ވޯޒް ސޯ ކޫލް..” ކައިލީ ހިނިތުންވެލިއިރު އެދެލޯ ވިދަމުން ގެންދިޔަ ގޮތުން ހެއިލަންއަށް އެ ދެލޮލަށް ގެނބިފައި ހުރެވުނީ ކިހާއިރެއް ވަންދެންކަން ކައިލީ ނުބުނިނަމަ ހެއިލަންއަށް ނޭނގުނީހެވެ. “މާދަމާ ބައްދަލުވާނެކަމަށް އުންމީދު ކުރަން.. ކައިގެ މަންމަ ވަރަށް ރުޅިއަންނާނެ މާލަހުން ގެއަށް ގޮސްފިއްޔާ..” ކައިލީ ލަދުން ބޯ ކަހާލާފައި އެހެން ބުނެލާފައި ދުވެފައި ދިޔަގޮތް މަތިން ހެއިލަން ދުވަހަކުވެސް ހަނދާނުން ފިލައިގެންނެއް ނުދާނެއެވެ. ހެއިލަން ހޮސްޕިޓަލަށް ވަދެ ހިނގައިގަތްއިރު އެ ތުންފަތްމަތީ ކުޑަ ހިނިތުންވުމެއްވިއެވެ.

ސާޔަލް ހުރީ ރަވިކާން އޮތް ކޮޓަރީގެ ތެރޭގައެވެ. ގާތުގައި އެމީލިޔާ އާއި ލިއަމްވެސް އިނެވެ. ސާޔަލް ދެކޮޅުދެކޮޅަށް ހިނގަމުން ދާތީ އެމީލިޔާ އެންމެފަހުން ނުހުރެވިގެން ކޮޅަށް ތެދުވިއެވެ. އަދި ސާޔަލް އާއި އެއްވަރަކަށް ހިނގަން ފެށިއެވެ. “ސާ އަންކަލް… ވިންގް ބޯއިއަށް ކިހިނެތްވީތަ…؟” އެމީލިޔާވެސް ހުރީ ދެރަވެފައިކަން އަޑުން އަންގައިދެއެވެ. ސާޔަލް ހުއްޓިލާފައި ހިނިތުންވެލިއެވެ. އަދި އެމީލިޔާއާއި އެއްވަރަކަށް ގުދުވެލިއެވެ. “ކޮއްކޮ ބަލާ ކާޓޫނުތަކުގައި ސުޕަރހީރޯސް ކީއްތަކުރަނީ..؟” ސާޔަލް ލިއަމް ވެސް ގެނެސްފައި އަހާލިއެވެ. “ބޭޑްކޮށް އުޅޭ ކުދިންނާއި ފައިޓުކުރަނީ..!” ލިއަމްގެ ޖަވާބު ސާޔަލްއަށް ވަގުތުން ލިބުނެވެ. “އެފައިޓު ކުރަނީ ރަނގަޅު ކުދިން ޕްރޮޓެކްޓް ކުރަންވެގެން..” އެމީލިޔާ ވެސް ޖަވާބު ދިނެވެ. ސާޔަލް ފުންނޭވާއެއް ލާފައި ހިނިތުންވެލިއެވެ. “ވިންގް ބޯއި ވެސް އެގޮތަށް ހަމަ ބޭޑް ކުދިންނާއި ފައިޓް ކުރީ ރަނގަޅު ކުދިން ޕްރޮޓެކްޓް ކުރަންވެގެން… އެހެންވެ އެހާ އަނިޔާ ވެފައި އެ އޮތީ…” ސާޔަލް ކިޔައިދިނެވެ. އެމީލިޔާ އާއި ލިއަމްގެ ޅަ ސިކުނޑިއަށް ސާޔަލް ބުނެދޭން ބޭނުންވާ ވާހަކަ ނަގައިގަނެވޭނެ ފަދަ ގޮތަކަށެވެ. “ވަރަށް ބޭޑް ވިލަންއެއްތަ އައީ..؟” އެމީލިޔާ އަނގަ މަތީގައި އަތް އަޅަމުން އަހާލިއެވެ. “ދަ ވޯސްޓް..!” ސާޔަލް މޫނަށް ވައްތަރެއް ޖައްސާލަމުން ބުނެލިއެވެ. ލިއަމް އިތުރަށް ޝައުގުވެރިވިއެވެ. “އެ ބޭޑް ވިލަންއަށް ކިހިނެތްވީ..؟” ލިއަމް އަހާލިއެވެ. “ވިލަން މަރުވީ..” އައުލްކީން ފަނާވެގެން ދިޔަގޮތް ހަނދާނަށ އައުމުން ސާޔަލްއަށް ބުނެވުނެވެ. “ޔޭ ވިކްޓްރީ ގުޑް ކުދިންނަށްދޯ..؟” ކުއްލިއަކަށް ލިއަމްއާއި އެމީލިޔާ ފޯރިގަދަކޮށްލާފައި އަތާއަތް ޖެއްސެވެ. “އާނ…” ސާޔަލް ހިނިތުންވެލިއެވެ.

“ޑެޑީ ކޮބާތަ..؟” އެމީލިޔާ އަހާލައިފިއެވެ. ސާޔަލްގެ ހިނިތުންވުން ފުޅާވިއެވެ. “ޑެޑީވެސް ވަރަށް އަވަހަށް ގެއަށް އަންނާނެ… ހިނގާ އަންކަލް އާއި އެމީ އަދި ލިއަމްވެގެން މިތާ ކެތްތެރިވެގެން މަޑު ކުރަން ދޯ..؟” ސާޔަލް އެމީލިޔާ އާއި ލިއަމްއަށް ބުނެލިއެވެ. ދެކުދިންވެސް ބޯ ޖަހާލާފައި ގޮނޑީގައި އިށީނދެފައި ކުޑަކުދިންގެ ވާހަކަ ފޮތެއް ނަގައިގެން ކިޔަންފެށިއެވެ.

ސާޔަލް އެކޮޓަރީގެ ކުޑަދޮރު ކައިރިއަށް ދިޔައެވެ. އަދި ހިނިތުންވަމުން ގެންދިޔަ ހަނދާއި ދިމާލަށް ބަލާލިއެވެ. “ދައްތާ.. އަހަރެންނަށް ދައްތައަށްޓަކައި ނުކޮށްދެވުނު ކަންތައްތައް ދައްތަގެ ދަރިފުޅަށް ކޮށްދޭނަން… އަހަރެން ދުނިޔޭގައި ހުރިހާ ދުވަހަކު ރަވިކާން ސަލާމަތުން ބެހެއްޓޭތޯ މަސައްކަތް ކުރާނަން…” ސާޔަލް އެނބުރި ރަވިކާން އާއި ދިމާލަށް ބަލާލާފައި ބުނެލިއެވެ. އަދި ޖީބުން ކުޑަ ފޮޓޯ ގަނޑެއް ނަގާފައި ބަލާލިއެވެ. އެވަގުތު ސާޔަލް ކުޑަކޮށް ފެންކަޅިވިއެވެ. އެއީ އޭނަޔާއި ސަލްވިޔާއާއި ޒައިނާ އާއި އާދިޔަންގެ ފޮޓޯގަނޑެކެވެ. ޒައިނާ މެންގެ ރަށުގެ އެ ރީތި ގޮނޑުދޮށުގައި ނަގާފައިވާ އެ ފޮޓޯއަކީ މީގެ އެތައް އަހަރެއް ކުރިން ނަގާފައިވާ ފޮޓޯއެކެވެ. ސަލްވިޔާ އާއި ޒައިނާ އެއް ކުލައިން ހެދުން ލައިގެން އެއްގޮތަކަށް އިސްތަށިގަނޑު ހަދައިގެން ހުރުމުން ދެމީހުން ކުރިއަށްވުރެވެސް ވައްތަރު ހެން ހީވެއެވެ. މަޑު ފިޔާތޮށިކުލައިގެ ފައިތިލައާއި ހަމައަށް އަރާވަރުގެ ހެދުމެއް ލައިގެން ޒައިނާ އާއި ސަލްވިޔާ ހުރިއިރު އެދެމީހުންގެ ތުންފަތްމަތީގައި ކުޅެލާފައިވަނީ އެންމެ ރީތި ހިނިތުންވުމެވެ.

“ސާ އަންކަލް ރޮނީތަ..؟” އެމީލިޔާ އަހާލި އަޑަށް ސާޔަލްއަށް އެނބުރި ބަލާލެވުނެވެ. “ނޫނޭ އެމީ..” ސާޔަލް ކަރުނަތައް ދިރުވާލާފައި ހިނިތުންވެލިއެވެ. އަދި ދެލޯ މަރާލައިގެން އޮތް ރަވިކާންގެ ގާތަށް މިސްރާބު ޖެހިއެވެ. ރަވިކާން ކުޑަކޮށް ހަރަކާތް ކޮށްލިހެން ހީވެގެން ސާޔަލްގެ ފިޔަވަޅުތައް އަވަސް ކޮށްލިއެވެ. ރަވިކާން ހޭއެރީތޯ ބަލާލަން ސާޔަލް ހުރީ ކެތްމަދުވެފައެވެ.

ޒައިދާން ނަމާދުކޮށްލައިގެން ޒައިލީން އޮތް ރޫމަށް ވަތްއިރު ހެއިލަން ވެސް ހުއްޓެވެ. “ހެއިލް އައީތަ ހާދަ އަވަހަކަށް..؟” ޒައިދާން އަހާލިއެވެ. “އާނ ހެއިލަން އައިސްފިއޭ.. އަވަހަށް އަންނާނަމޭ ކިޔާފައި ޒައިދާންއަށެއްނު ނާދެވުނީ…” އަލްޔާ ތުން އަނބުރާލައިފިއެވެ. ”ދެން އަލްގަނޑޫ އެންގްރީގަނޑޫ….! މާ ކިއުޓް ރުޅި އައީމައި.. އަދި ލަސްކޮށްލާފައި އާދެވުނުނަމަ ރަނގަޅުވީސް..” ޒައިދާން ހީނގަތެވެ. އެނދުމަތީ އޮތް ޒައިލީންވެސް ހިނިތުންވެލިއެވެ. “އަލް ހިތަށް އަރާ ޒައި ކިހިނެތްބާއޭ މި ލާނެތް ޒައިދާން އާއި އެކީގައި ސަތާރަ އަހަރު ވަންދެން އުޅުނީ..” އަލްޔާއަށްވެސް ހެވުނެވެ. “ނޭނގޭ ޒައި ދޮންބެ ދެކެ ވަރަށް ލޯބިވޭ..” ކުޑަވެލާފައި ޒައިލީން އެހެން ބުނެލިގޮތުން ޒައިދާން އިތުރަށް ފޮނިވިހެން ހީވިއެވެ. “ކޮބާ ދޮންބެ ދެކެ ލޯބިވާ ކުދިންވެސް އެބަ އުޅެއެއްނު…” ހެއިލަން ޗެޓް ކުރަން އިނދެފައި ވާހަކައިގައި ބައިވެރިވިއެވެ.
“އޯކޭ އޯކޭ… ޒައި ތިވަރަށް ނުބުންޏަސް ޒައި ދޮންބެ ދެކެ ލޯބިވާކަން އެނގެޔޭ..” ޒައިދާން ޒައިލީންގެ ކޮނޑުގައި ޖަހާލިއެވެ. ”ސާބަސް ބަލިކުއްޖާއަށް އަނިޔާ ކުރާކަށް ނުވާނެ..” އަލްޔާ ޝަހާދަތް އިނގިލި ތުންފަތުގައި ޖައްސާލަމުން ބުނެލިއެވެ. “ސާބަހޭ މީ މަގޭ ކޮއްކޮއޭ.. އަލްގެ ކޮއްކޮއެއް ނޫނޭ..! ދޮންބެ ބޭނުންއިރަކު ކޮއްކޮ އާއި ތޮޅޭނީ..” ޒައިދާންވެސް އުމުރަށްވުރެ ކުޑަވެފައި ހުރި ވަގުތެއްހެން ހީވެއެވެ.

“ހުން.. މައްސަލައެއް ނެތް… އެކަމަކު ޒައި އަކީ އަލްގެ ބެސްޓް ފްރެންޑް..” އަލްޔާ ދޫ ނެރެލިއެވެ. “ޒައި ބުނެބަލަ.. ކާކު މުހިންމީ..؟ ބެސްޓްފްރެންޑްތަ ނޫނީ ދޮންބެތަ..؟” ޒައިދާން ހަށަން ބަނދެލާފައި އަހާލިއެވެ. “ވެލް ދެމީހުންވެސް ވަރަށް މުހިންމު.. ދެމީހުން ކުރެ އެކަކުވެސް ނެތިއްޔާ ޒައި ވަރަށް ދެރަ ވާނެ…” ޒައިލީން ހިނިތުންވެލިއެވެ. އަލްޔާ އާއި ޒައިދާންއަށް އެއާއި ވިއްދާ ބުނާނެ އެއްޗެއް ނޭނގުނެވެ. ހެއިލަން ހީނލިއެވެ. “ޒައި ދުވަހަކުވެސް ހިޔެއް ނުކުރަން އިހަކަށް ދުވަހު ދިމާވި ފްރެންޑްސް ކޮޅަކާއި އެކީގައި ފެމެލީއެއް ހެން އުޅެން ޖެހިދާނެކަމަށް.. ޓު ބީ އޮނެސްޓް ޒައި ހިޔެއް ނުކުރަން ޔޫ.އެސް އިން ޒައިގެ ލައިފް މިހާ ބޮޑަށް ބަދަލު ވެދާނެކަމަކަށް… ޔޫ.އެސްއަށް ހައިސްކޫލް ކިޔަވަން އައިސްފައި މިއުޅެވުނީ ބޮޑު އެޑްވެންޗަރއެއް ގައި…” ޒައިލީން ހީނލާފައި ބުނެލިއެވެ. “އާނ ދޮގެއް ނޫން.. އަލްވެސް ހިޔެއް ނުކުރަން މިހެން އުޅެން ޖެހިދާނެކަމަށް..” އަލްޔާވެސް ދެ ކޯތާފަތުގައި އަތް ޖައްސާލާފައި ބުނެލިއެވެ.

“ހޫން ޒައި ހީވަނީ ލިޔުންތެރިއެއްހެން…” ޒައިދާން ހިނިގަނޑެއް ޖަހާލިއެވެ. “ދެން ދޮންބެއަށް މިއިން އެއްވެސް ކަމެއް އެޑްވެންޗަރަސް ނޫނީތަ..؟” ޒައިލީންއަށް އެހުނެވެ. “ނޫނޭ ވަރަށް… ހިޔެއް ނުކުރަން އެހާ ޕްރެޝަސް ބައެއް ލޫސް ވެފައި އެހާ ޕްރެޝަސް ބައެއް ލިބިދާނެކަމަށް…” ޒައިދާން ދޫކޮށްދިޔަ ކަމަށް އިޝާރާތް ކުރީ ހެއިލަންގެ އާއިލާއަށްކަން ޒައިލީންއަށް ވިސްނުނެވެ. އަދި ލިބުނު ކަމަށް ޒައިދާން އިޝާރާތް ކުރީ ރަވިކާން ސާޔަލް މެން މީހުންނަށްކަން ޒައިލީންއަށް އެނގުނެވެ.

“ހްމްމް ދެން އިރާދަކުރެއްވިއްޔާ ލޫސްއެއް ނުވާނެދޯ..؟” ޒައިދާން އަހާލިއެވެ. ޒައިދާން އެ އިޝާރާތް ކުރީ މަރުގެ ތުންފަތްމަތީގައި އޮތް ރަވިކާންއަށްކަން އަލްޔާއަށް ނަގައިގަނެވުނެވެ. ޒައިލީންއަށް އެކަން ފާހަގަ ވުމުގެ ކުރިން އަލްޔާ އެއަށް ޖަވާބެއް ދޭން އަނގަ ހުޅުވާލިއެވެ. “އިންޝާ ﷲ..” ޒައިލީން ހިނިތުންވެފައި ބުނެލިއެވެ. “ޒައި ދެން ތިވަރަށް ނުރޮއިބަލަ..” ޒައިލީންގެ ލޮލަށް ގިނަވެފައިވާ ކަރުނަތައް ފެނުމުން ޒައިދާންއަށް ބުނެވުނެވެ. “ދެން ޒައި ގަސްތުގައެއް ނޫނޭ ރޮނީ.. ރޮވެނީއޭ..” ޒައިލީން ލޯ ފޮހެލަމުން ބުނެލިއެވެ. “ހީވަނީ ވޯޓަރފޯލްއެއްހެން ވިއްޔާ..” ޒައިދާން ޒައިލީންގެ ލޯ ފޮހެލައިދިނެވެ.

ސާޔަލް ގުދުވެ ރަވިކާންއަށް ގޮވާނުލެވެނީސް ދޮރުގައި ޓަކި ޖަހާލި އަޑު އިވުނެވެ. “ކާކު..؟” ސާޔަލް އަހާލިއެވެ. އެކޮޅުން ޖަވާބެއް ނުލިބުމުން ސާޔަލް ގޮސް ދޮރު ހުޅުވާލިއެވެ. ދޮރު މަތީ ހުއްޓިލައިގެން ހުރި މީހާގެ މޫނަށް ބަލާލާފައި ސާޔަލް ހީނލިއެވެ. “ޒައިލީން..؟ ކީއްވެ އެކަނި ތި މިކޮޅަށް އައީ..؟ ދޮންބެ ބުނީ މާދަމާއޭ ހޮސްޕިޓަލުން ދޫކޮށްލަނީ..؟ ހެއިލްމެން ކޮބާތަ..؟؟ އެމީހުން ނާދޭ..؟” ސާޔަލް އެއްސެވެ. ކުރިމަތީގައި ހުރި ”ޒައިލީން”ގެ ގާތުގައެވެ. “ސާޔަލް.. މިހާރު އަހަރެންވެސް ފާހަގަ ކުރަން ނޭނގެނީތަ..؟” ހިނިތުންވެފައި ޒައިނާ އެއްސެވެ. “ސަވާނާ..؟” ސާޔަލްއަށް ދެލޯ ބޮޑުކޮށްލެވުނުގޮތަށް ދެލޯ އުނގުޅާލެވުނެވެ. ކުރިމަތީ އެހުރީ ޒައިނާތޯ ނޫނީ ޒައިލީންތޯ ވަކި ކުރަން ނޭނގިގެންނެވެ.

“އަހަރެންނާއި ޒައި އެހާވެސް ވައްތަރީތަ..؟” ޒައިނާ އެއްސެވެ. “ކޮން އިރަކު މިކޮޅަށް އައީ..؟” ސާޔަލްއަށް ޒައިނާގެ ސުވާލަށް ޖަވާބު ދިނުމުގެ ބޭނުމެއް ނުފެނުނެވެ. “ހަމަ ދެންމެއަކު.. އަފްލާމްވެސް އައިސް އެބައުޅޭ.. އެކަމަކު މިރޭ މިގެއަށް އައީ އަހަރެން އެކަނި..” ޒައިނާ ހިނިތުންވެލިއެވެ. ސާޔަލް ރަވިކާންގެ މަތިންވެސް ހަނދާން ނެތުން ފަދައެވެ. “ކިހިނެތް މިގެއަށް އަންނަން އެނގުނީ..؟” ސާޔަލް އެއްސެވެ. ”ޒައިދާން މިގޭ ދޮރު ކުރިމަތީގައި ފޮޓޯއެއް ނަގާފައި ހުރި އިންސްޓާގައި ޝެއަރކޮށްފައި.. އަދި އޭނާގެ ރާއްޖޭގައި އުޅޭ އެކުވެރިން ޔޫ.އެސްއަށް ދިޔަނަމަ އެގެއަށް އަންނަން ޒައިދާން ލޮކޭޝަން ވެސް ޝެއަރ ކޮށްފައި އޮތް..” ޒައިނާއަށް އެގެއަށް އަންނަން އެހާ ފަސޭހަވި ގޮތް ކިޔައިދިނެވެ. “ކީއްވެގެން ތި އައީ..؟” ސާޔަލް އެއްސެވެ. “މީހަކު އަޖައިބެއް ފަހެ ނުވާނެ..؟ ސާބަސް ސާޔަލް.. އަހަރެންގެ ދެކުދިން ވީ މިކޮޅުގައި.. އަހަރެންގެ އެންމެ ގާތް ދެ އެކުވެރިންވެސް ވީ މިކޮޅުގައި.. އަހަރެން މިކޮޅަށް ނާންނަންވީ ސަބަބެއް ނެތް..” ޒައިނާ ހިނިތުންވެލާފައި ބުނެލިއެވެ.

”ކީއްވެ ކުރިން ނައީ..؟” ސާޔަލް ހީވަނީ ޝަކުވާ ކުރާހެންނެވެ. “އެއީ….” ޒައިނާގެ ހިނިތުންވުން ފަނޑުވިއެވެ. “އަހަރެން ދައްތައާއި ބެހޭގޮތުން ކިޔައިދޭނެ ވާހަކަތައް އަޑުއަހަން ކެތްނުވާނެތީ ދޯ..؟ ސަވާނާ..” ސާޔަލް މަޑުމަޑުން ޒައިނާގެ އަތުގައި ހިފާއްޓާލިއެވެ. ކަރަންޓުގައި ޖެހުނު ފަދައިން ޒައިނާ ވަގުތުން އަތް ދަމައިގަތެވެ. “ހާދަ ހާސްވަނީ..؟ އަހަރެން ނޫޅެމޭ ސަވާނާ ކާލާކަށް..” ސާޔަލް ޒައިނާ ގެންގޮސް ރަވިކާން އޮތް އެނދުގެ ކައިރީގައި ބޭންދިއެވެ. ޒައިނާގެ ލޮލުގައި ރަވިކާން އަޅައިގަތީ ދެނެވެ. “އާދިޔަންއަށް ހާދަ ވަރެއްވެފައި..؟” އަނގަމަތީގައި އަތް އަޅާލަމުން ޒައިނާ އެއްސެވެ.

“ދަރިންނާއި މައިންބަފައިން ވަކި ކުރަން ނޭނގެނީ ހަމައެކަނި އަހަރެންނަށް ނޫންކަން މި އެނގުނީ… ސަވާނާ.. މިއީ އާދިޔަންއެއް ނޫނޭ..” ސާޔަލް ކުޑަކޮށް ހިނިއައިސްފައި ބުނެލިއެވެ. “އެއްކަލަ ފިރިހެން ކުއްޖާތަ..؟ ސަލް އާއި އާދިޔަންގެ ދަރިފުޅުތަ..؟” ދެލޯ ބޮޑުކޮށްލާފައި ޒައިނާ ވައިއަޑުން އެހެން އަހާލިގޮތުން ހީވީ އިތުރު މީހަކަށް އަޑު އިވިދާނެތީ އުޅުނުހެންނެވެ. ”އާނ.. މިއީ ރަވިކާން އަކީ…” ސާޔަލް ރަވިކާންގެ ބޮލުގައި ފިރުމާލަމުން ބުނެލިއެވެ. “އާދިޔަން އާއި ވަރަށް ވައްތަރުދޯ..؟” ޒައިނާ އިނީ ހައިރާން ވެފައެވެ. “އަދިވެސް ޒައިލީންއާއި ސަވާނާ އާއި ވައްތަރު ވަރު ނޭނގިގެން ތިއުޅެނީ..” ސާޔަލްގެ ގާތަށް ހިނިއައެވެ.

”ސަލް ކޮބާ..؟” ޒައިނާ މަޑުމަޑުން އަހާލައިފިއެވެ. “މަރުވެއްޖެ..” ދުރު ބަލާލާފައި ސާޔަލް ޖަވާބު ދިނެވެ. ޒައިނާ ކުއްލިއަކަށް ސާޔަލްގެ މޫނަށް ބަލާލިއެވެ. ހައިރާންވެހުރެއެވެ. “ސަލް.. މަރުވީއޭ..؟؟” ޒައިނާގެ އަޑު ތުރުތުރު ލައިގަތެވެ. “އާނ.. ވަރަށް ދުވަސް ކުރިން… އަހަރެންނަށް އެކަން އެނގުނީ މަންމަގެ ފަރާތުން.. ސަވާނާއަށްވެސް އެނގެއެއްނު ދައްތަ ބާރީގެ ދަރިފުޅު ވިހޭކަން..؟” ސާޔަލް އެހެން ބުނެލާއިރަށް ޒައިނާ ބޯ ޖަހާލައިފިއެވެ. “ހަމަ އެދުވަހު ދައްތަ މަރުވެއްޖެ..” ސާޔަލްގެ ހިތްވަރު އެލެން ފެށިހެން ހީވިއެވެ. “އެ ދުވަހޭ..؟؟” ޒައިނާއަށް ހުރީ ހަމަރަނގަޅަށްވެސް ޝޮކެއް ޖެހިފައެވެ. “އާނ.. އިނގޭތަ ބާރީ އާއި ދައްތަ ކައިވެނި ކުރީ ކީއްވެގެންކަން..؟” ސާޔަލް އެއްސެވެ. “އޮޅިއްޖެ މިހާރު… ނޭނގޭ..” ޒައިނާ އަނގަމަތީގައި އަތް އަޅައިގެން އިނދެ ބުނެލިއެވެ. “ބާރީއަށް ދައްތަދެކެ ލޯބިވެވުނީ… އެކަމަކު އޭރު ދައްތަ އާއި އާދިޔަންގެ ރަވިކާން ހުރޭ… އެހެންވެ ދައްތަ ގަބޫލުނުވެދާނެތީ ބާރީ ސަވާނާ ބޭނުންކުރީ… ބާރީ ދައްތަގެ ގާތުގައި ބުނެފައި ވަނީ ސަވާނާ މަރާލާނަމޭ ދައްތަ ބާރީ އާއި ކައިވެނި ނުކޮށްފިއްޔާ… ދެން ވީގޮތް ސަވާނާއަށް ވެސް އެނގޭނެ.. އަހަރެމެން ދެމީހުންނަށް އެއްވެސް ކަމެއް ނާންގާ ދައްތަ ބާރީ އާއި ކައިވެނިކުރީ… ސަވާނާއަށްޓަކައި..” ސާޔަލް އޭނާގެ އަސަރުގަދަ އަޑުން ކިޔައިދެމުން ގެންދިޔައިރު ޒައިނާވެސް އިނީ ފެންކަޅިވާގޮތްވެފައެވެ.

”ތިބުނަނީ… ސަލް ބާރީއާއި ކައިވެނި ކުރީ އަހަރެންނަށްޓަކައޭތަ..؟” ޒައިނާއަށް އެހުނެވެ. ސާޔަލް މަޑުމަޑުން ބޯ ޖަހާލިއެވެ. ޒައިނާއަށް އިސްޖެހުނެވެ. ޔޫ.އެސްއަށް އާދެވުނުކަމުގެ މޮޔަ ހިތަށް އެރިއެވެ. މި ހަގީގަތް އެނގުމަށް ވުރެ ނޭނގުންވެސް މާރަނގަޅުކަމަށް ބެލުނެވެ. “ރުއިމަކީ މައްސަލައެއްނޫން ސަވާނާ.. އަހަރެންވެސް ރުއިން…” ޒައިނާ ގަނޑުވެފައި ހުރިގޮތަށް ހުރުމުން ސާޔަލް ބުނެލިއެވެ. “ސަލް…” ޒައިނާގެ ބަޑިފަޅައިގެން ދިޔައީ ދެނެވެ. ހިތުގައި ޖެހިޖެހިފައި ޒައިނާ ރޯއަޑު އަހަން ސާޔަލް އިނީ ވަރަށް ކެތްތެރި ވެގެންނެވެ. ނަމަވެސް ޒައިނާއަށް ހިތްހަމަޖެހެންދެން ރޯލަންދެން ސާޔަލް ބަހެއް ނުބުނެ އިނެވެ.

“އަލް ދޭ ގެއަށް.. އެ ނުވަގަޑި ބައިވަނީ… ޒައި ކައިރީ ދޮންބެ މަޑުކުރާނަން.. ހެއިލްވެސް ދޭ ގެއަށް އިނގޭ…” ޒައިދާން ބުނެލިއެވެ. “އަލް ބޭނުން މަޑުކުރަން..” އަލްޔާ ކުސްތަޅާލިއެވެ. “ނޫން ޒައިގެ ކައިރީ އަހަރެން މަޑުކުރާނީ.. ހެއިލް އަލް ގޮވައިގެން ގެއަށް ދައްޗޭ..” ޒައިދާން އެހެން ބުނެލުމުން ހެއިލަން ހެވިފައި ބޯ ޖަހާލިއެވެ. ހެއިލަން ތެދުވުމުން އަނެއްކާވެސް ނުދާން ގަދަ ހަދަހަދާފައި އަލްޔާ ދާން ހިނގައިގަތެވެ.

ޒައިނާ ސާޔަލް އާއި ވާހަކަދައްކަން އިރުކޮޅަކު މަޑުކޮށްފައި އަފްލާމް ބަލާ އައުމުން ގެއަށް ދާންވެގެން ހިނގައިގަތެވެ. ސާޔަލް ޒައިލީންމެން މިކޮޅަށް އައިފަހުން ކަންތައްތައް ދިމާވެގެން ދިޔަ ގޮތް ޒައިނާއަށް ކިޔައިދިނެވެ. އެ ވާހަކަތައް ކިޔައިދިންއިރު ޒައިނާވެސް ހުރީ ހައިރާންވެފައެވެ. އަދި އިތުރުން އެހާމެ ދެރަވެސް ވެފައެވެ. “އަހަރެން ވަރަށް ވަރަށް ގޯސްދޯ..؟ އެކުވެރިއެއްގެ ގޮތުންވެސް މަންމައެއްގެ ގޮތުންވެސް.. އެކުވެރިޔާ އަހަރެންނަށް އެންމެ ބޭނުންވާނެ ވަގުތުގައި އަހަރެންނެއް ނެތް.. އަހަރެންގެ އަމިއްލަ ދަރިން އަހަރެންގެ އެހީތެރިކަމަށް ބޭނުންވީ ހިނދު އެވަގުތުވެސް އަހަރެންނެއް ނެތް.. އަހަރެން މީ ބޭކާރު މީހެއް..” ޒައިނާ ހިތާމަވެރިގޮތަކަށް ހިނިތުންވެލިއެވެ. “ނޫން ސަވާނާ ތިހެން ނުބުނޭ… އަހަރެމެންނަށް ސަވާނާއަކީ ދުވަހަކުވެސް ބޭކާރު މީހަކަށް ނުވާނެ…” ސާޔަލް ހީނލިއެވެ. “ޝުކުރިއްޔާ ސާޔަލް.. ސާޔަލް ފެނުނީމައި މިހާރު ސަލްގެ މަތިން އަހަރެން ހަނދާންވަނީ…” ޒައިނާ ވެސް ހީނލިއެވެ.

“ސަވާނާ..” ސާޔަލް ގޮވާލުމުން ޒައިނާ ބަލާލިއެވެ. “މާދަމާ ނުވައެއް ޖެހުމުގެ ކުރިން މިކޮޅަށް އަންނާތި… އަހަރެންނަށް ހީވަނީ ޒައިލީން ގެއަށް ދޫކޮށްލާނީ އެހާއިރަށްހެން..” ސާޔަލް ބުނެލިއެވެ. “ނޫން އަހަރެން މިދަނީ ޒައިގެ ކައިރިއަށް ދާން… ވަރަށް ދެރަ ޒައިމެން އަހަރެން ބޭނުންވީއިރު ކައިރީގައި ނުހުރެވުނީމައި… ގަބޫލުކުރަން އެއީ އަހަރެންގެ ފިނޑިކަންވެސް.. ކުރިމަތި ލާން ޖެހިދާނެ ހަގީގަތާއި ހުރެ އަހަރެން ބިރުގަތީ… އެހެންވެ މިކޮޅަށް ނައީވެސް… އެކަމަކު ދެން އަހަރެންނަށް މި އާދެވުނީ ހުރިހާ ކަމެއް ނިމުނު ފަހުން..” ޒައިނާ ނުކުންނަން ހިނގައިގަތެވެ. “ނޫނޭ ސަޕްރައިޒެއް ދީ މާދަން.. އެގޮތް މާ ރަނގަޅުވާނެ..” ސާޔަލް ގޮތް ދޫކުރާކަށް ނޫޅުނެވެ. ސާޔަލްގެ ބޯހަރުކަމުން ޒައިނާ އެންމެފަހުން މާދަމާ ޒައިލީންމެންނަށް ސަޕްރައިޒެއް ދޭން ނިންމިއެވެ.

ފުރަ މެންދަމުގެ ވަގުތެވެ. ޒައިލީންއަށް ހޭލެވުނެވެ. “މިޑްނައިޓް.. މިދެން ހޭލެވެން ކޮންފަދަ ގަޑިއެއްތަ ދޯ..؟” ޒައިލީން އެނދު ކައިރީ ހުރި ކުޑަ މޭޒުމަތިން ފެންފުޅިއެއް ނަގާ ކޯވަރެއް ބޯލީ ކަރުހިއްކާފައި ހުރި ވަރުންނެވެ. އޭރު ޒައިދާން ގޮނޑީގައި އިށީނދެގެން އެނދުގައި ބޯ އަޅާލައިގެން ނިދިފައި އޮތެވެ. ޒައިލީން ފެންފުޅި ބަހައްޓާފައި އަލުން އޮށޯންނަން އުޅެނިކޮށް އޭނާގެ ދަބަސް ފެނުނެވެ. “ޒައިގެ ދަބަސްވެސް މިތާ..؟” ޒައިލީން ކުޑަކޮށް ގުދުވެލާފައި އެ ދަބަސް ނެގިއެވެ. ޒައިލީންއަށް ދަބަހުން ފުރަތަމަވެސް ނެގުނީ ރަވިކާންގެ ވަރައިގެ ފަތެވެ. ކަޅުކުލައިގެ ޝަހާދަތް އިނގިއްޔަށްވުރެވެސް ދިގު އެ ފަތުގައި ޒައިލީންއަށް އެ ފަތުގައި ތުންފަތް ޖައްސާލެވުނުއިރު ދެލޮލުން ކަރުނަ އާދެއެވެ.

އެވަގުތު ހުޅުވާފައި ހުރި ކުޑަދޮރުން ބާރު ވައިރޯޅިއެއް ޖެހުނެވެ. ޒައިލީންގެ ފަން އިސްތަށިގަނޑު ވިހުރިގެން ގޮސް މޫނު ނިވާކޮށްލިއެވެ. ޒައިލީންގެ އަތުން އެ ފަތް ދޫވީ ނުވެސް ވިސްނާ ހުއްޓައެވެ. ”ޝޫޓް…!!! ނޫން..!!!” ޒައިލީންއަށް ހީވީ މާވަހަރެއް ގެއްލުނު ހެންނެވެ. އެ ފަތް ދިޔަ ދިމާ ބަލަން ހުރެފައި ޒައިލީން މަޑުމަޑުން އަތަށް ގުޅާފައި ހުރި އައިވީ ނައްޓާލިއެވެ. ވީތަދު ބޭއްވުމަށް ފަހު ޒައިލީން ލައިގެން ހުރި ހޮސްޕިޓަލް ހެދުން ރީތި ކޮށްލިއެވެ. އަދި ވެލިފުކެއްވެސް ގުޑާނުލާނެހާ މަޑުން ރޫމްއިން ބޭރަށް ނުކުތެވެ. ނިދީގެ ތެރެއަށް ގެނބިފައިވީ ޒައިދާންއަށް މިއިން ކަމެއްގެ ހިލަމެއް ނުވި ކަންވެސް އެއީ ނަސީބެއް ކަންނޭނގެއެވެ.

ޒައިލީން މަޑުމަޑުން ފިލަފިލައިގެން އެލެވޭޓަރ އާއި ހަމައަށް ދިޔައެވެ. އެވަގުތު ހޯލްވޭ ތެރެ ފަޅުކަން ވެސް އެއީ ޒައިލީންގެ ނަސީބުގައި ލެއްވި ރަހުމަތެކެވެ. ވަގުވަގަށް ޒައިލީންއަށް ކާމިޔާބުކަމާއި އެކީ ހޮސްޕިޓަލުން ބޭރަށް ނުކުމެވުނެވެ.

ރަވިކާންއަށް ލޯ ހުޅުވާލެވުނެވެ. މަންޒަރު ފެންނަލެއް ފުސްކަމުން ރަވިކާންއަށް ދެ ފަހަރަކު ލޯ އުނގުޅާލެވުނެވެ. އޭރު ކޮޓަރީގައި ސާޔަލް ހުއްޓެވެ. ގޮނޑީގައި ލެނގިލައިގެން ސާޔަލްއަށް އޮވެވުނީ ނިދާފައެވެ. ރަވިކާން ވަށައިގެން ހޯދާލިއެވެ. ގައިމުވެސް މި އޮވެވުނީ ކުރިން އޮތް ތަނުގައި ނޫންކަން ރަވިކާންއަށްވެސް އެނގުނެވެ. އުނދަގޫ ގޮތަކަށް ރަވިކާން އެނދުގައި ލެނގިލިއިރަށް ބަނޑަށް ވާންވެ ތަދެއް އެރިއެވެ. ރަވިކާންއަށް މަޑު އާހެއް ބޭރު ކޮށްލެވުނީ ބޭއިޚްތިޔާރުގައެވެ. ރަވިކާން މޫނަށް ގޮތެއް ހަދައިގެން ހުރެ ފަރުވާކުޑަ ބެލުމަކުން އަމިއްލަ ހަށިގަނޑާއި ދިމާލަށް ބަލާލިއެވެ. މެއާއި ހިސާބުން ފެށިގެން ފޫޅާއި ހަމައަށް ފަހާފައިވާ ބޮޑު ޒަޚަމް ފެނިފައި ރަވިކާންގެ ތުންފަތްމައްޗަށް ހިނިތުންވުމެއް ވެރިވިއެވެ. އެންމެ ފަހުން އައުލްކީން ނާކާމިޔާބު ވެއްޖެއެވެ. އޭނާއަށް އައުލްކީން ބަލިކޮށް ޒައިލީން ރައްކާތެރި ކޮށްދެވިއްޖެއެވެ. އަދި އޭނާއަށް އަނިޔާވެފައި ހުރި ނަމަވެސް އަދި ދުނިޔޭގައި އެބަހުއްޓެވެ. “އިންސިކުއްޖާ..” ރަވިކާންއަށް ފަހަތަށް އެނބުރެލެވުނެވެ. އަދި އިސްޖަހާލާފައި ޒާތަކަށް ހީނލެވުނެވެ. “އުހުން… އެއީ ޒައިލީން..” ރަވިކާން އެހެން ބުނެލިގޮތަށް އެ ކޮޓަރީގެ ކުޑަދޮރު ހުޅުވިގޮތަށް ބޭރަށް ފުންމާލިއެވެ. ހަމަ އެސިކުންތުކޮޅު ވަރަ ފަތުރާލާ އަޑަށްވުރެ ބާރަށް އުދުއްސައިގަތެވެ. ހަށިގަނޑުގައި އަޅަމުން ދިޔަ ވޭނަށް ސަމާލުކަން ދޭވަރަށްވުރެ ރަވިކާން ހުރީ ޒައިލީން ދުށުމަށް ކެތްމަދުވެފައެވެ.

ޒައިލީން ދުވަމުން ބޭރަށް ނުކުތެވެ. އޭރު ހޮސްޕިޓަލްގެ ބޭރުގައި ހުރި މަސްފެންގަނޑުގެ ތެރެއަށް އެ ފަތް ވެއްޓިފައި އޮތެވެ. “ނަސީބެއްނު…” ޒައިލީން ވަގުތުން ފެންގަނޑުގެ ތެރެއިން އެފަތް ނެގުނެވެ. ޒައިލީންއަށް އަމިއްލަ ހިޔަނި ފެންގަނޑުގެ ތެރެއިން ފެނުމުން ސަކަރާތް ޖަހާ ހިތްވިއެވެ. އަތުން އެކި އިޝާރާތް ކޮށްކޮށްފައި ޒައިލީންއަށް ސަކަރާތްޖެހުން ހުއްޓާލެވުނީ ފެންގަނޑުގެ ތެރެއިން ފެނުނު މަންޒަރުންނެވެ. “އިންސިކުއްޖާ ވީ މިދިމާގައި..” ރަވިކާން އޭނާގެ އުކުޅުތައް ބޭނުންކޮށްގެން ޒައިލީން ވީ ހިސާބު ހޯދިއެވެ. “އަހަރެން މީ ޒައިދާންގެ ކެޓްބްރޯ ވިއްޔާ..” ރަވިކާން އަމިއްލައަށް ފޮނިވެލާފައި ކުރިއަށްވުރެ ވެސް ބާރަށް އުދުހިގަތީ ފެންގަނޑުގެ ކައިރީގައި ކުޑަކުއްޖެއް ހެން ސަކަރާތްޖަހަން ހުރި ޒައިލީން ފެނުމުންނެވެ.

ފެންގަނޑުން ނުސާފުކޮށް ނަމަވެސް މަތިން އެއްޗެއް ފެނުމާއި އެކީގައި ޒައިލީންއަށް ސިއްސައިގެން ގޮސްފައި މައްޗަށް ބަލާލެވުނެވެ. ވައިކަފާފައި އައިގޮތަށް އައިސް ރަވިކާން ޒައިލީންގެ ގައިގައި ބާރަށް ބައްދާލިއެވެ. އެ ކުޑަ ސިކުންތުކޮޅުވެސް ލިބުނު ޝޮކެއްގެ ބޮޑުކަމުން ޒައިލީންއަށް ރަވިކާން ދުރަށް ކޮއްޕާލެވުނެވެ. “މާތްކަލާކޯ އަހަރެން ދެކެ ހާދަ ރުޅިއެއް އައިސްފައި ތީނީ..؟” ރަވިކާން ކުރިއަށްވުރެ ވެސް ބާރަށް ޒައިލީންގެ ގައިގައި ހިފާއްޓާލަމުން އެއްސެވެ. “ރަވިކާން..” ޒައިލީން ރަވިކާންގެ ކަންފަތުގައި ހިފާ ދަމައިގަތެވެ. “އަސްލުވެސް އައީތަ..؟” މޫނުމަތިން ރަނގަޅަށް ފާޅު ކުރަން ނޭނގުނު ކަމުގައިވިޔަސް ޒައިލީންގެ ހިތް އުފަލުން ނަށާވަރު އެނގޭނީ އެންމެ ފަރާތަކަށެވެ. “އާނ އަހަރެން އައީ…” ރަވިކާން ހުރިހާ ދަތެއް ފެންނަވަރަށް ހީނލަމުން ބުނެލިއެވެ. ޒައިލީން ރަވިކާންގެ ދެކޮލުގައި ހިފާ ދަމާލިއެވެ. “ޔޫ އިޑިއަޓް އައި ވޯޒް ސޯ ވޮރީޑް..!! މިހާރު ވިސްނާލީމައި އެވަގުތުކޮޅު ހީވަނީ މޫވީއެއްހެން… ރަވިކާންވެސް ދޯ… ބަލަ ޒައިގެ ހިތް ނުހުއްޓުނީ ކިރިޔާއޭ..!!!” ޒައިލީން ރަވިކާންގެ ދެކޮލުގައި ހިފި ގޮތަށް ދޫނުކޮށްހުރެ ބުނެލިއެވެ.

ރަވިކާންވެސް ޒައިލީންގެ ދެކޯތާފަތުގައި ހިފިއެވެ. “އަހަރެން އެކަން ކޮށްދިނީ ޒައި ރައްކާތެރި ކޮށްދޭށޭ އެކަން ހަނދާންކޮށްބަލަ…” ރަވިކާން ބުނެލިއެވެ. “ރަވިކާންއަށް އެނގޭތަ ރަވިކާން އޭރު އަލަށްކަން ޒައިގެ ނަމުން ގޮވީ..؟” ޒައިލީން އެއްސެވެ. “އާނ އެނގޭ.. އަހަރެން ހީކުރީ ހަމަ އަސްލަށްވެސް އަހަރެން މަރުވަނީކަމަށް.. އެކަމަކު އިރާދަކުރެއްވިއްޔާ އަހަރެންގެ ހަޔާތުގައި އަދި ތަންކޮޅެއް އެބައޮތް ދޯ..؟” ރަވިކާން ބުނެލިއެވެ. “ޒައި ހުރީ މޮޔަވާވަރުވެފައި…” ޒައިލީން ބުނެލިއެވެ. ”އަހަރެން ކުރިން ވެސް ބުނިން ކަންނޭނގެ އަހަރެން ވަރަށް މޮޅުވާނެޔޭ މީހުންގެ ހިތްތައް ހުއްޓުވަން…” ރަވިކާން އެހެން ބުނެލުމުން ޒައިލީން ރަވިކާންގެ ދެކޮލަށް ބާރުކޮށްލިއެވެ. “ދެން ތަދުވޭ…” ރަވިކާން ބުނެލިއެވެ. “ރަވިކާން ޒައިގެ ހިތް ހުއްޓުވީ.. ޒައި ހަމައެކަނި ރަވިކާންގެ ކޮލަށް ތަދުކުރީ.. ކާކަށް ބޮޑަށް އަސަރު ކުރާނީ..؟؟” ޒައިލީން މޮޅު ސުވާލެއް ކޮއްލިއެވެ. “މަށަށް ބޮޑަށް ތަދުވާނީދޯ… ތި ކުޑަކުޑަ ބާރުގަދަ ދެއަތުން މަގޭ ދެކޯ ޗަސްކުރާތީ..” ރަވިކާން ހިނިގަނޑެއް ޖަހާލާފައި ބުނެލިއެވެ. “ކޯޗެއް ލައިގެންތަ ތީނީ..؟” ރަވިކާން ޒައިލީން ލައިގެން ހުރި ހޮސްޕިޓަލް ހެދުމަށް އިޝާތް ކޮށްފައި އެއްސެވެ. “އެއްޗެއް ނޫން.. ހިނގާ ދާން..” ޒައިލީން އަނބުރާ ހޮސްޕިޓަލާއި ދިމާލަށް މިސްރާބު ޖެއްސެވެ.

“ކޮންތާކަށް..؟” ރަވިކާން ފަހަތުން އައެވެ. “ހޮސްޕިޓަލުގައި އޮވެފައޭ ޒައި މިއައީ..؟” ޝަހާދަތް އިނގިލި ތުންފަތުގައި ޖައްސާލަމުން ޒައިލީން ބުނެލިއެވެ.

“ކީއްވެގެން ނުކުތީ..؟” އެތެރެއަށް ވަންނަމުން ރަވިކާން އެއްސެވެ. “މި އަތުން ދޫވީމައި…” ޒައިލީން އަތުގައި އޮތް ފަތް ދައްކާލުމުން ރަވިކާންގެ ހިނިގަނޑު ފަޅައިގެން ދިޔައެވެ. “ތި ފަތްތަ އަހަރެންތަ މުހިންމީ..؟” ރަވިކާން ހަތަރުކަޅު ހަމަކޮށްލާފައި އެހެން އެހުމުން ޒައިލީން ކުޑަކޮށް ރަކިވާގޮތްވިއެވެ. “މި ފަތް..” ޒައިލީން ހީނލާފައި ދުއްވައިގަތެވެ. “އިންސިކުއްޖާވެސް..” ރަވިކާން އަނެއްކާވެސް އެ ނަމުން ކިޔަން ފެށިއެވެ.

“ދޮންބެ ހާސްވާނެ ޒައި ނެތިއްޔާ.. މާދަމާ ޒައި ގެއަށް ދޫކޮށްލާނެ…” ޒައިލީން ބުނެލިއެވެ. “އެހެންދޯ އަހަރެންވެސް މިއައީ ފިލައިގެން..” ރަވިކާން ލުއި ހުނުމަކާއި އެކީގައި ބުނެލިއެވެ. ދެމީހުންނަށް ރޫމަށް ވަދެވުނުއިރުވެސް ޒައިދާން އޮތީ ނިދާފައެވެ. ޒައިލީން އެނދަށް އަރާ އޮށޯތުމުން ރަވިކާން ގޮނޑިއެއް ގެނެސް ކައިރިކޮށްލާފައި ޒައިލީންގެ ގައިގައި ވަރަ އޮޅާލިގޮތަށް އެނދުގައި ބޯ އަޅާލިއެވެ. އޭރުވެސް ބަނޑަށް ވަމުން ދިޔަ ތަދު ކުޑައެއް ނޫނެވެ. ނަމަވެސް ޒައިލީންއަށްޓަކައި ރަވިކާން ހީނލައިގެން އޮތެވެ. ނިދެމުން ދިޔައިރުވެސް ޒައިލީން ރަވިކާންގެ އިސްތަށިގަނޑާއި ނޫނީ ވަރައާއި ކުޅެވެމުން ދިޔައެވެ.

“ސާބަސް..!! މިއީދޯ ރަވިކާން އިއްޔެރޭ ފިލައިގެން އައި ތަނަކީ..؟” އަލްޔާގެ އަޑަށް ނިދިފައި އޮތް ޒައިލީންއަށް ލޯ ހުޅުވާލެވުނެވެ. “އާނ.. މިއީ އަހަރެން އައި ތަނަކީ..” ރަވިކާން ބުނެލިއެވެ. “ރަނގަޅު ނުވަނީސް ކީއްވެ މިތަނަށް އައީ..؟” އަލްޔާ އަހާލިއެވެ. “ޒައިދާންގެ މަތިން ހަނދާންވާވަރުންނޭ…” ޖެއްސުމަށް ރަވިކާން ބުނެލިއެވެ. “ދެން އަސްލު ޒައިގެ މަތިން މިސްވާތީ ދޯ އައީ..؟؟” އަލްޔާ ހެވިފައި ހުރެ އަހާލިއެވެ. “ދެން އަލްއަށް އެނގޭއިރު ކީއްވެގެންތަ ތި އަހަނީ..؟” ރަވިކާން އަނގަޔަށް ވައްތަރެއް ޖައްސާލިއެވެ. “ވެލްކަމް ބެކް ރަވިކާންގަނޑު..!” އަލްޔާ ރަވިކާންއާއި އަތާ އަތް ޖަހާލިއެވެ. ޒައިލީން ހެވިފައި އެ މަންޒަރު ބަލަން އޮތެވެ. އިރުކޮޅެއް ފަހުން ހެއިލަންވެސް އެތަނަށް އައިއިރުވެސް ޒައިދާން އޮތީ ނިދާފައެވެ. “މި ސްލީޕީ ހެޑްއަށް ގޮވަންވީ..!” އަލްޔާ ޒައިދާންގެ ކަންފަތުގައި ހިފާ އަނބުރާލިއެވެ.
ދިހައެއް ޖަހާކަށް ހާއިރު ޒައިލީން ގެއަށް ދޫކޮށްލިއެވެ. އެންމެން އެކީގައި ގެއަށް އައިއިރު ލިބެން އުޅޭ ޚަބަރުގެ އުފާވެރިކަމެއް ނޭނގެއެވެ.

“އައުލްކީން މަރުވެއްޖެޔޭ..؟” އަލްޔާ އަހާލިއެވެ. “އާނ… އަހަރެން އޭނައަށް ހަމަލާ ދިނިން އޭނާ އަހަރެންނަށް ހަމަލާ ދިނުމުގެ ކުރިން..” ރަވިކާން ބުނެލިއެވެ. އޭރު ފްލޯރައިޓް ކްރިސްޓަލްސް ހައުސް އާއި ހަމައަށް އާދެވިއްޖެއެވެ. ބޭރުގައި އާދިޔަން އާއި ރޯޒްލިޔާ ލިއަމް އާއި އެމީލިޔާ ގޮވައިގެން ހުއްޓެވެ. އާދިޔަންވެސް ސަލާމަތުން ހުރިތަން ފެނިފައި ޒައިލީންއަށް މަޑުމަޑުން އަލްހަމްދުލިއްﷲ އޭ ބުނެލެވުނެވެ. “ވިންގް ބޯއި..!” “ވީ ނޯ ޔޫ ބީޓް އަ ވިލަން..!” އެމީލިޔާ އާއި ރަވިކާން ދިގޮތަށް ގޮސް ރަވިކާންގެ ގައިގައި ބައްދައިގަތެވެ. އާދިޔަން ހިނިތުންވެލާފައި ބޯޖަހާލިއެވެ. އަދި މަޑުމަޑުން ބާރީ މަރުވެއްޖެޔޭ ބުނެލިއެވެ. އެޖުމްލައިން ހިނިތުން ނުވާން ހުރި ރަވިކާންއަށްވެސް ހީނލެވުނެވެ.

“ޒައި… ދޮންބޭ..!” ފަހަތުން އިވުނު އަޑެއްގެ ސަބަބުން ޒައިލީންއަށް ފަހަތަށް ބަލާލެވުނީ ބޭއިޚްތިޔާރުގައެވެ. އޭރު ޒައިނާ އާއި އަފްލާމް ފަހަތުގައި ހުރިތަން ފެނިފައި ޒައިލީންއަށް އަނެއްކާ ވެސް ރޮވުނެވެ. “މަންމާ… އިނގޭތަ މި ޒައި މިހާރު ވަރަށް ގަދަޔަށް ރޯނެ..” ޒައިދާންވެސް ފެންކަޅި ވެފައިހުރެ ޒައިނާގެ ގައިގައި ބައްދާލިއެވެ. “ދޮންބެ މާރީއްޗެއް ނޫން ތިހެން ކިޔާކަށް.. ދޮންބެ ވެސް މިހާރު ތި ރޮނީ..” ޒައިލީން ޒައިނާ އާއި އަފްލާމްގެ ގައިގައި ބައްދާލައިގެން ހުރެ ބުނެލިއެވެ.

********************

“ޒައިލީން..” ކްލާހަށް ވަތް ރަވިކާން ގޮވާލި އަޑަށް ޒައިލީން އާއި ހެއިލަން ވެސް ބަލާލިއެވެ. “އައްދެ ޒައި ކީއްވެގެން އެ ރޮނީ..؟” ފަހަތުން ވަތް ޒައިދާން އެއްސެވެ. އަލްޔާ އައިސްފައި ދެކޮނޑު މައްޗަށް އަރުވާލިއެވެ. “ސެޕްޓެމްބަރ ނަވާވީސް…” ޒައިލީން ފޯނުން ތާރީޚު ދައްކާލަމުން ބުނެލިއެވެ. “އޯހްހް އެ ދުވަސް މަތިން ހަނދާންވެގެންތަ އަނެއްކާ ތި ރޮނީ..؟ މޮޔަ..!” ރަވިކާން ގޮސް ޒައިލީންގެ ލޮލުން ކަރުނަތައް ފޮހެލައިދިނެވެ.

“އޭތް މިއަދު ހިސްޓްރީ ޓެސްޓަށް ފިލާވަޅު ދަސްކުރީ ކާކު..؟ އަލް ދަސްކުރިން..” އަލްޔާ އެއްސެވެ. “ޒައިވެސް..” ޒައިލީން ހިސްޓްރީ ފޮތް ދަބަހަށް ލަމުން ބުނެލިއެވެ. “ހެއިލް ދަސްކުރިން..” ހެއިލަން ވެސް ބުނެލިއެވެ. “މިއަދު ހިސްޓްރީ ޓެސްޓެއް އޮވޭތަ..؟؟” އެއްއަޑަކުން ކަހަލަ ގޮތަކަށް ޒައިދާން އާއި ރަވިކާން އެހެން އެހިގޮތުން އެކަނިވެސް އެދެމީހުން ފިލާވަޅު ދަސް ނުކުރާކަން ހާމަވެގެންދިޔައެވެ. އަލްޔާ ހޭންފެށިއެވެ. “ގުޑްލަކް… މިއަދުގެ ޓެސްޓް ވަރަށް އުނދަގޫވާނެޔޭ ސާރ ބުނި..” ޒައިދާން އިތުރަށް ބިރުގަންނަވާލަންވެގެން އަލްޔާ ބުނެލިއެވެ. “ދޮގު ނުހަދާ..؟ އަޅޭ އިއްޔެ ރޭ އެ ފިލްމުގަނޑު ބަލަން މިހިރަ ކެޓްބްރޯ އާއި އެކީގައި މަ އޮތީ…” ޒައިދާން ބޮލުގެ އިސްތަށިގަނޑަށް ދަމާލަމުން ބުނެލިއެވެ.

“ދޮންބެވެސްދޯ ސާބަހޭ..!” ޒައިލީން ހީނގަތެވެ. “އެހެންނޫނަސް އިޓްސް ގޮއިންގ ޓު ބީ ސަމަރ ސޫން.. ރާއްޖެއަށް ދާންވާނެ.. މާމަމެންނާއި މަންމަމެންގެ ކައިރިއަށް ނުދެވޭތާ ވަރަށް ދުވަސްވެއްޖެ..” ޒައިދާން ބުނެލިއެވެ. “އާނ..އަލްވެސް ގޮވައިގެން ދައްޗޭ..” އަލްޔާ އެދުނެވެ. “އޭ ހެއިލްއަށް މިފަހަރު ދެވޭނެހެންނެއް ހިޔެއްނުވޭ.. ކައިލީ އާއި ކައިލީގެ ކޮއްކޮ އާއި އެކީގައި ހެއިލް މި އުޅެނީ މި ސަމަރ ގައި ކައިލީމެންގެ މާމަގެ ގެއަށް ދާންވެގެން.. ވަރަށް މަޖާވާނެ..” ހެއިލަން އޭނާއަށް ނުދެވޭނެކަން އަންގާލިއެވެ. “ހޭވް ފަން ހެއިލް..” ޒައިދާން ކުރީބައިގައި ބުނެލިއެވެ. “އާނ ޒައިދާންމެންވެސް ހޭވް ފަން…” ހެއިލަން ބުނެލިއެވެ.
“ޒައި ވަޓް އިޒް ޔުއަރ ވިޝް..؟؟” ޒައިދާން ކުއްލިއަކަށް އަހާލިއެވެ. “ތިދެން ކުއްލިއަކަށް ކުރަން ކޮން ސުވާލެއް..؟” އަލްޔާ ހީނގަނެފައި ބޯހޫރާލިއެވެ. “އެކްޗުއަލީ އައި ޑޫ ހޭވް އަ ވިޝް…” ޒައިލީން ބުނެލިއެވެ. “ހަމައެކަނި ދޮންބެމެންނަށް އަޑުއިވޭވަރަށް ބުނެބަލަ..” ޒައިދާން ކަންފަތް އެދިމާ އަށް ދިއްކޮއްލަމުން ބުނެލިއެވެ. “އައި ވިޝް ފޯރ އަ ހެޕީ އެވްރީޑޭ..” ޒައިލީން ވައިއަޑުން އެހެން ބުނެލިގޮތަށް ރަވިކާންގެ މޫނަށް ބަލާލިއެވެ. އެ ތުންފަތްމަތީގައިވާ ހިނިތުންވުމުން ޒައިލީންގެ ހިތަށް ހަމަޖެހުން ގެނެސްދިނެވެ. ރަވިކާން ހުރިހާ ދަތްކޮޅެއް ފެންނަވަރަށް ހީނލިއެވެ.

“ގުޑް އާފްޓަރނޫން..” ހިސްޓްރީ ޓީޗަރުގެ އަޑަށް ޒައިދާން އާއި ރަވިކާންގެ ބޮލަށް ފަރުބަދަފަޅިއެއް ވެއްޓުނު ކަހަލައެވެ. ވައިސޫރިއެއްހާ ހަލުވިކޮށް ދެމީހުންވެސް ގޮނޑިއަށް ގޮސް އިށީނދެ ހިސްޓްރީ ފޮތް ނަގާ ނޯޓްތަކާއި ޓެކްސްޓް ފޮތުގައިވާ މައުލޫމާތުތައް ކިޔަންފެށިއެވެ. ޒައިލީންވެސް އަނެއްކާ ކުޑަކޮށް ފޮތް ކިޔާލަން ވެގެން ހިސްޓްރީ ފޮތް ނެގިއެވެ.

ޒައިދާން އާއި ދިމާކޮށްފައި ހޭންއިން އަލްޔާގެ މޫނަށް ޒައިލީން ބަލާލިއެވެ. ދެން ޒައިލީން ބަލާލީ ހައްޕުކިޔައިގެން ފޮތަށް ބަލަން އިން ޒައިދާން އާއި ދިމާލަށެވެ. ދެބުމަ ގޮށްޖަހާލައިގެން އިން ރަވިކާން ފޮތް ކިޔަން އިންއިރު ފޮތަށް ބާރު ކޮށްލިކޮށްލީނުން ފޮތް އިރައިގެން ދިޔަ މަންޒަރު ފެނިފައި ޒައިލީންގެ ގާތަށް ހިނިއައެވެ. އޭރު ހެއިލަން ހަމަޖެހިލާފައި ފޮތް ކިޔަން އިނެވެ. ވަކިވަކިން އެ ހަތަރު މީހުންގެ މޫނަށް ބަލާލާފައި ޒައިލީން ހިނިތުންވެލިއެވެ.

“ޔެސް…. އައި ވިޝް ފޯރ އަ ހެޕީ އެވްރީޑޭ…. އިންޝާ ﷲ…..”

= ނިމުނީ =

-ވާހަކަ ފެށުނީއްސުރެ ނިމެންދެން ޔޫންއަށް ސަޕޯޓް ދެއްވަމުން ގެންދިޔަ ހުރިހާ ރީޑަރސްއަށްވެސް ވަރަށް ބޮޑަށް ޝުކުރިއްޔާ ޔޫންގެ ފަރާތުން.. މި ތެންކިއު އަކީ ވަރަށް އާދައިގެ ތެންކިއުއެއް އެކަމްވެސް ޔޫންގެ ހިތުގެ އެންމެ ފުންމިނުން ރީޑަރސް ޔޫންއަށް ދެއްވި ލޯތްބާއި ސަޕޯޓަށް ޔޫން ވަރަށް ވަރަށް ބޮޑަށް ޝުކުރުވެރިވަން.. ރީޑަރސް އާއި ނުލާ ޔޫންއަށް މި ހިސާބަކަަށް ނާދެވުނީސް.. ވަރަށް ބޮޑަށް ޝުކުރިއްޔާ އަދިވެސް އެއްފަހަރު.. ކުރިމަގުގައިވެސް ޔޫންއަށް މެދުނުކެނޑި ތިދެއްވަމުން ގެންދަވާ ސަޕޯޓް ދެއްވަމުން ގެންދަވާނެ ކަމަށް އުންމީދު ކުރަން.. އަދި ޔޫންއަށް ލިޔެވޭ ކުށްތައް ފާހަގަ ކޮށްދެމުން ގެންދަވާނެކަމަށްވެސް އުންމީދު ކުރަން.. ތެންކިއު އޯލް ވެރީ މަޗް.. ސީ ޔޫ އޯލް އެގެއިން ސޫން.. ވިލް މިސް ޔޫ އޯލް.. ލަވް ޔޫ އޯލް ވަރަށް ބޮޑަށް-