ހިތަކުން ނުފިލާނެ 12

” ދަރިފުޅާ…! ބައްޕަ ބުނި ސާލީވެސް ނުގަބޫލުގަ ބައްޕަ ބޭނުމެއް ނޫނޯ ދަރިފުޅުމެންގެ ކައިވެނި ކުރުވާކަށް…! އެކަމަކު ސާލީ ކައިވެނި ކުރަންބޭނުންނަމަ ޖެހޭނީ ކައިވެނި ކުރާށޯ…! ” ވަދީފާވެސް އައިސް ފާޒިންގެ ކައިރީ އެނދުގައި އިށީނެވެ. ފާޒިން އޭނަގެ ފޯނު ބަލާލިއިރު މައިޝާ ފަސް ފަހަރަށް ގުޅާފައި އޮތެވެ. އެހެންވެ ފާޒިން މައިޝާއަށް ގުޅާލިއެވެ.

” ހަލޯ..! ކިހިނެއްވީ…؟  ” މައިޝާ ފޯނުނެގުމާއެކު ފާޒިން ބުނެލިއެވެ.

” ކަމެއްނުވޭ… ފާޒިންގެ ހަބަރެއްނުވާތީ ހަމަ ގުޅާލީ…! ” މައިޝާ ބުނެލިއެވެ.

” ކޮބާ މަންމަމެން…! ” ފާޒިން އަހައިލިއެވެ.

” މަންމަމެން ގޮސްފި ގެއަށް…! އަހަރެން އެކަނި މިހާރު މީނީ…! ” މައިޝާ ބޭނުންވީ ފާޒިން އެތަނަށް ގެންނާށެވެ.

” އަހަރެން ޖައްސާލާނަން އިރުކޮޅަކުން…! ” ފާޒިން ފޯނު ކަނޑާލަމުން ބުނެލިއެވެ. އޭރު ވަދީފާ ފާޒިންއާއި ދިމާލަށް ބަލަހައްޓައިގެން އިނެވެ. ފާޒިން ވެގެން އުޅޭގޮތް ވަދީފާއަށް ކިޔައިދިނެވެ. ފާޒިން ފެންވަރައިލައިގެން ދިޔައީ ހޮސްޕިޓަލަށެވެ. ހޮސްޕިޓަލަށް ދިޔަތާ މާގިނައިރެއް ނުވަނީސް މުނީރާ ހޮސްޕިޓަލަށް އައެވެ. އެހެންވެ މައިޝާ ގެންގޮސް ގެއަށްލާފައި ފާޒިންވެސް ދިޔައީ ނިދާށެވެ.

އަނެއްދުވަހު މައިޝާ އޮފީހަށް ނުނިކުންނާތީ ފާޒިން މައިޝާއަށް ގުޅާލިއެވެ. ނަމަވެސް މައިޝާ ފޯނެއް ނުނަގައެވެ. އެހެންވެ އޮފީހުގައި އިނދެފައި މެންދުރުވުމުން ފާޒިން ހޮސްޕިޓަލަށް ދިޔައިރު މައިޝާ ހާދީ ކައިރީގައި އިނެވެ. ފާޒިން ފެނުމާއެކު މައިޝާއަށް ކޮޅަށް ތެދުވުނެވެ.

” ކީއްވެ ފޯނުނުނެގީ….! ” ފާޒިންގޮސް މައިޝާގެ ކައިރީގައި މަޑުކޮއްލިއެވެ. މައިޝާ އޭނަގެ ޖީބުން ފޯނުނަގާ ބަލާލިއިރު ދެފަހަރަށް ގުޅާފައި އޮތެވެ. ނަމަވެސް ފޯން ސައިލެންޓަށް ލާފައި އޮތުމުން ނޭގުނީއެވެ.

” ރޭގަ ނުދަންނަ ނަމްބަރަކުން ގުޅާތީ ސައިލެންޓައްލާފަ އޮތީމަ ނޭގުނީ….! ” މައިޝާ މަޑުމަޑުން ބުނެލިއެވެ. އިއްޔަގެ ކުރެވުނު ކަންތަކާ މައިޝާ ހުރީ ވަރަށް ބޮޑަށް ލަދުގެންފައެވެ. ފަހަރެއްގައި ފާޒިންގެ ހިތަށް އަރާފާނެ އެއްޗެއް ނޭގޭތީ ބިރުގަންނަނީއެވެ. މައިޝާކައިރީގައި ފަހުން އަންނާނެ ކަމަށް ބުނެފައި ފާޒިން ނިކުމެގެން ގެއަށް ދިޔައީ އެތާގައި ހުރުމަށްވުރެ މުހިންމު ކަމެއްގެ މަތިން ހަދާންވުމުންނެވެ. ފާޒިންގޮސް ގެއަށް ވަންއިރު އެންމެން ގޭތެރޭގައި ތިއްބެވެ. ގިނަ ދުވަސްވާންދެން ރާންޖޭން ބޭރުގައި އުޅުމަށްފަހު ފަޒީލްއާއި ސިފާއާއި މާލްވެސް އައިސް ތިއްބެވެ.

” ތިއްތީ…! ” މާލް ފާޒިން ފެނުމުން ދުވެފައި އައިސް ފާޒިންގެ ގައިގައި ބައްދައިގަތެވެ. ފާޒިން މާލް ގޮވައިގެން ގޮސް ފަޒީލް ކައިރީ ގޮނޑިސެޓުގައި އިށީނެވެ.

” ދޮންބޭ…! ހާދަ ހިކިއްޖޭ… ކިހިނެއް ތިހަދަނީ…! ފަހަރި ދޮންބެއަކަށް ކާކަށް ނުދެންތަ…؟ ” ފާޒިން ފަޒީލްއާއި ދިމާލަށް ބަލާލަމުން ބުނެލިއެވެ. ސިފާ ފާޒިންއާއި ދިމާލަށް ބަލާލާފައި ހިނިތުންވެލިއެވެ.

” އުޅެންޖެހޭ ބުރަކަމުން ކާކަށް ވަގުތެއް ނުލިބޭ…! އެހެން ނޫނަސް ކައިކައިގެން ފަލަވުމަށްވުރެ މާރަނގަޅެއްނު މިގޮތަށް ހިކިކޮއް ހުރީމަ…! ” ފަޒީލް އޭނަގެ ބޮޑީ ދައްކާލަމުން ބުނެލިއެވެ.

” ތިއްތީ ބަލާ…! ދޮންބެ ފައިއަށް ގެނެސްދިން….! ” އޭނަގެ އަތުގައި އޮތް އެޕަލް އައިޕެޑް ދައްކާލަމުން ފައިހާ ބުނެލިއެވެ. މާގިނައިރު އެތާގައި ވާހަކަ ދައްކަން ނުތިބެ ފަޒީލްމެން ކޮޓަރިއަށް ދިޔައީ އަރާމުކޮއްލާށެވެ. ދަނޑިވަޅު ބަލާފައި ފާޒިން ވާހަކަ ދައްކަންފެށިއެވެ.

” ސާލީ…! އެކޮޅުގަ ވިޔަފާރިއެއް ފަށަންވީނު…! ” ވަދީފާއާއި ދިމާލަށް ބަލާލާފައި ފާޒިން ވާހަކަ ދައްކަންފެށިއެވެ. ވަދީފާއިނީ ފާޒިން ދައްކާވާހަކަޔަށް ވަރަށް ސަމާލްވެގެންނެވެ. ފާޒިން އެހެން ބުނުމުން ޒަރީނާއާއި ސާލީއަށް އެކަކު އަނެކަކުގެ މޫނަށް ބަލައިލެވުނެވެ.

” މިހާރު ކިޔަވާވެސް ނިމިއްޖެއެއްނު…! ތަނަކަށް ވަޒީފާއަކަށް ދިއުމަށްވުރެ ރަނގަޅުވާނެ އަމިއްލަ ވިޔަފާރިއެއް ފެށިއްޔާ…! އަނެއްހެން ކުރަންބޭނުންވާ ވަކި ވައްތަރެއްގެ ވިޔަފާރިއެއް އެބައޮތްތަ…؟ ” ދެންވެސް ވާހަކަދެއްކީ ފާޒިންއެވެ. އެވަގުތު ސާލީގެ މޫނު އުޖާލާވެގެން ދިޔަކަން ފާޒިންއަށް އެނގުނެވެ. ވަދީފާ އިނީ ބުނާނެ އެއްޗެއްވެސް ނޭގިފައެވެ. ނަމަވެސް ފާޒިން އެއްވެސް ކަމެއް ގޯސްކޮއް ނުކުރާނެކަން ވަދީފާއަށް އެނގެއެވެ. އެވަގުތު ސާލީ ނޫނެކޭ ބުނުމުގެ ގޮތުން ބޯހޫރާލިއެވެ.

” ދެން އެހެންވީމަ ފިހާރަ ހުޅުވާނެ ތަނެއް ބުނެބަލަ…! ” ފާޒިން ބުނެލިއެވެ.

” އެރަށު އަހަންމާތްދީ އެންމެ ފަހުންހުޅުވި ފިހާރަ ވިއްކާލަން އުޅޭވާހަކަ ޒާހިރު ބުނި….! ” އެންމެން އެއްފަހަރާ ބަލާލީ ދޮރާ ދިމާލަށެވެ. އޭރު ދޮރުމަތީގައި އާމިރު ހުއްޓިލައިގެން ހުއްޓެވެ. އެވަގުތު އާމިރު އައުމުން ފާޒިންއަށް އިތުރު ހިތްވަރެއް ލިބުނެވެ.

” ސާލީއަށް ކަމުދޭތަ އެފިހާރަ…! ” ފާޒިން އަނެއްކާވެސް ސާލީ ކުރެން އަހައިލިއެވެ. ސާލީ އާނއެކޭ ބުނުމުގެ ގޮތުން ބޯޖަހާލިއެވެ. ސާލީ އޭނަގެ ހުވަފެން ކާމިޔާބުވުމުގެ ކުލަވަރު ފެންނަން ފެށުމުން ހިތް އުފަލުން އުތުރި އަރަންފެށިއެވެ. ފާޒިން ކޮޓަރިއާއި ދިމާލަށް ހިނގައިގަތުމުން އާމިރު ފާޒިން ކުރެން މަޑުކޮއްލުމަށް އެނދުނެވެ.

” ބައްޕަ ބޭނުން ތިދެކުދިންގެ ކައިރީގައިވެސް ވަރަށް ބޮޑު ވާހަކައެއް ދައްކަން….! އެކަކުވެސް ދޮގު ނުހަދާތި…! އޭރުން ފަހުންވާ ގެއްލުން މާބޮޑުވާނެ….! ” އާމިރު ސާލީއާއި ފާޒިންގެ މޫނަށް ބަލައިލަމުން ބުނެލިއެވެ. އޭރު އެދެމީހުންވެސް ތިބީ އިސްޖަހާލައިގެންނެވެ. އާމިރު ދައްކަން އުޅޭ ވާހަކައެއް ނޭގޭތީ ކޮންމެވެސް ވަރެއްގެ ބިރުވެރިކަމެއް ހިތުގައި އުފެދިފައެވެ.

” ތިދެކުދިން ބޭނުންތަ ކައިވެނި ކުރަން…! ބައްޕަގެ މައްސަލައެއް ނެތް ސާލީވެސް އަދި ފާޒިންވެސް ބޭނުން ކުއްޖަކާ އިނަސް…! ބައްޕަމެންގެ ފަރާތުން ހުރިހާ އެހީތެރިކަމެއްވެސް ލިބޭނެ…! ” އާމިރު ވާހަކަ ދެއްކީ ސާލީއަށް ބަލަހައްޓައިގެން އިނދެއެވެ. ދެމީހުންކުރެ އެކަކުވެސް އެއްބަހެއްވެސް ނުބުނެ ތިއްބެވެ.

” ދެކުދިންވެސް ބޭނުންވަނީ ކައިވެނި ކުރަންތަ…؟ ” ދެމީހުންކުރެން އެކަކުވެސް ބަހެއް ނުބުނުމުން އާމިރު ބުނެލިއެވެ.

” އަހަރެންނަށްވެސް ރަނގަޅީ ސާލީ ބޭނުންމީހަކާ ސާލީ އިނުން…! އޭރުން އެންމެނަށްވެސް އުފަލުގައި އުޅެވޭނީ…! ” ފާޒިންވެސް ވާހަކަ ދެއްކީ ވަރަށް ދުރުދުރުންނެވެ. ސާލީގެ ހިތުގައި އޭނަޔަށް އެވިޔަފާރި ނުލިބިދާނެ ކަމުގެ ބިރު އޮތެވެ. ނަމަވެސް އަންނަ ހަފްތާގައި އެފިހާރަ ގަނެދޭނެ ވާހަކައާމިރު ބުނުމުން ސާލީއަށް ހިންހަމަ ޖެހުމުގެ ނޭވާއެއް ލެވުނެވެ.

” އަހަރެންވެސް ބޭނުމެއް ނޫން ފާޒިން ބޭނުންނޫނިއްޔަކާ ކައިވެނި ކުރާކަށް…! ” ސާލީއަށް ސީދާ ބޭނުން ނުވާވާހަކަ ބުނާކަށް ނުކެރުނެވެ. ވަރަށް ގިނައިރު ވާހަކަ ދެއްކުމަށްފަހު ދެމީހުންވެސް އެއްބަސްވީ އެމީހަކު ބޭނުންމީހަކާ އިނުމަށެވެ. އެގޮތަށް ދެކުދިންވެސް އެއްބަސް ވުމުން އާމިރުއަށް ހިންހަމަ ޖެހުމުގެ ނޭވާއެއް ލެވުނެވެ. ފާޒިން ކޮޓަރިއަށްވަދެ ފުރެސްވެލައިގެން ފުރަތަމަވެސް ދިޔައީ ހޮސްޕިޓަލަށެވެ. މައިޝާއާއި ބައްދަލްކޮއްލާފައި އޮފީހަށް ދިއުމަށްޓަކައެވެ. ނަމަވެސް މުނީރާ ހޮސްޕިޓަލްގައި އިނުމުން ކަމެއް ބޭނުންވެއްޖެނަމަ ގުޅާލުމަށް ބުނެފައި ފާޒިން އޮފީހަށް ދިޔައެވެ. އޭރު ސިރާޖު އެންމެންގެ ޕާސްޕޯޓާއި ޓިކެޓް ނަގައިގެން ގެނެސްފައި ހުއްޓެވެ. އެރޭ ރާއްޖެ ގަޑިން އަށެއް ޖަހާއިރަށް ފުރަންހަމަޖެހިފައި އޮތުމުން ހައެއް ޖަހާއިރު ތައްޔާރުވުމަށް މައިޝާއަށް ގުޅާފައި ފާޒިން ބުނެލިއެވެ. ހައެއްޖެހި އިރަށް ފާޒިން މައިޝާމެންގެއަށް ދިޔައެވެ. އޭރު މުނީރާމެން ތައްޔާރުވެގެން ގޭތެރޭގައި ތިއްބެވެ. އަދުނާނުވެސް ފެރީޓާމިނަލަށް ދަނީ ކަމަށް ބުނެފައި ޓެކްސީއަކަށް އަރައިގެން ނައްޓާލިއެވެ.

” މީއޮތީ ޓިކެޓާއި ޕާސްޕޯޓު…! ” އަތުގައި އޮތް ސިޓީއުރަ ދިއްކޮއްލަމުން ފާޒިން ބުނެލިއެވެ. މުނީރާ އެސިޓީއުރުން ޓިކެޓާއި ޕާސްޕޯޓު ނަގާ އަތްދަބަހަށް ލުމަށްފަހު ކޮޓަރީގައި ހުރި އޭނަގެ ފޮށިހިފައިގެން ބޭރަށް ނިކުތެވެ. މުނީރާމެން ޓެކްސީއަކަށް އަރައިގެން ފެރީޓާމިނަލަށް ނައްޓައިލުމުން ފާޒިންވެސް އޭނަގެ ސައިކަލުގައި ފެރީޓާރމިނަލަށް ދިއުމަށްޓަކައި ނައްޓައިލިއެވެ.

ހުޅުލެއަށް ގޮސްފައި ފާޒިން އޭނަގެ ވޮލެޓުން ސުޓޭޓް ބޭންކު އޮފް އިންޑިއާގެ ކޭޝް ކާޑެއް މައިޝާގެ އަތަށް ދިނެވެ. އަދި ޕިން ނަމްބަރ ކިޔައި ދިނުމަށްފަހު މަންމަގެ އަތަށް ދިނުމަށް އެދުނެވެ. އެވަގުތު މައިޝާއަށް ބަލާލެވުނީ ފާޒިންގެ ދެލޮލަށެވެ. ފާޒިންވެސް އޭރު ހުރީ މައިޝާގެ ލޮލަށް ބަލަހައްޓައިގެން ކަމުން ދެމީހުންގެ ހަތަރުކަޅި ހަމަވިއެވެ. ފާޒިންއަށް މައިޝާގެ ލޮލުން ފާޒިންއަށްޓަކައިވާ ލޯބިފެނުނެވެ. އެވަގުތު މައިޝާއަށް މުނީރާ ގޮވާލުމުން ދެމީހުންނަށް ސިއްސައިގެން ގޮސްފައި ބަލާލެވުނެވެ. އޭރު މުނީރާ ފާޒިންމެންނާއި ދިމާލަށް އާދެއެވެ.

” މަންމާ މިއޮތީ ކޭޝް ކާޑް…! ” މުނީރާ އަރާ ހަމަވުމުން މައިޝާ ބުނެލިއެވެ. މުނީރާ ކާޑްނަގާ އަތްދަބަސް ތެރެއަށް ލުމަށްފަހު މައިޝާ ކިޔައިދިން ނަންބަރ ނޯޓްކޮއްލިއެވެ. މުނީރާމެން ފުރުވާފައި މައިޝާމެންއަށް މާލެ އާދެވުނު އިރު ދިހައެއް ޖަހަނީއެވެ. މައިޝާމެން ކާރަކަށް އަރައިގެން ގެއަށް ދިއުމުން ފާޒިން ދިޔައީ ސިރާޖާއެކު ކޮފީއަކަށެވެ.

މުނީރާމެން ގޮސް އިންޑިއާއަށް ފޭބިއިރު އެމީހުން ބަލާގޮސް މީހަކު ހުއްޓެވެ. ކޮންމެ އިރެއްގައިވެސް ޑޮކްޓަރަށް ގެންގޮސްދިނުމާއި ގެނެސްދިނުމުގެ އިތުރުން އެހެންތަނަކަށް ދާންޖެހުނަސް އޭނަ އަބަދުވެސް އަރިހުގައި ހުރެއެވެ. ފަސްދުވަސް ފަހުން ހާދީގެ އޮފަރޭޝަން ކުރަން ހަމަ ޖެހުނެވެ. ކޮންމެ ދުވަހުވެސް މައިޝާ ގެއަށް ގެންގޮސްދެނީ ފާޒިންއެވެ. ބައެއްރޭރޭގައި ފާޒިން މައިޝާއާއެކު މައިޝާމެންގޭގައި ވަރަށް ގިނަ އިރުވަންދެން ވާހަކަ ދައްކަން ތިބެއެވެ.

” ތޮލާލް…! ކޮންއިރަކުން މާލެ އަންނަނީ…! ” މިސްރާ ފޯނު ނަގާފައި ބުނެލިއެވެ. މިސްރާ ވާހަކަ ދައްކަންއިނީ ގޭގެ ކޮޓަރީ ތެރޭގައެވެ. ކުޑަ އިރުކޮޅެއްގެ ތެރޭގައި މައިޝާ އައިސް ކޮޓަރިއަށް ވަނެވެ. މައިޝާ ފެނުމުން ފަހުން ގުޅާނެ ކަމަށް ބުނެފައި މިސްރާ ފޯނު ކަނޑާލިއެވެ.

” ކީއްވެ ފޯނު ތިކަނޑާލީ….! ދޮންތަ ހުއްޓާ މިހާރު ވާހަކަވެސް ނުދެއްކޭ ވަރުގެ މީހުންނަށް ގުޅަންފެށީތަ…! ” މައިޝާ މިސްރާއާއި ދިމާކުރުމުގެ ގޮތުން ބުނެލިއެވެ.

” އަހަރެންވެސް ދޮންތަގެ ލޯބިވެރިޔާ ގޮވައިގެން އައިސް އިނަކަސް ނުބުނަމެއްނު އެކައްޗަކޭވެސް…! ” މިސްރާވެސް މައިޝާއަށް ރައްދުދިނުމުގެ ބޭނުމުގައި ބުނެލިއެވެ. އެވަގުތު މައިޝާ ތުންފަތުގައި ޝަހާދަތް އިނގިލި ޖައްސާލާފައި ސްސްސްސް އެކޭ ބުނެލިއެވެ.

” ކޮން ސްސްސްސްސްސް އެއް ކިޔާކަށް….! ލޯބިވާލެއް ބޮޑުކަމުން ބުނަންނުކެރިފަ…! އަހަރެން ބުނެފާނަން ފާޒިންބެ ކައިރީގައި ދޮންތަ ވަރަށް ލޯބިވެޔޭ ފާޒިންބެދެކެ….! ” މިސްރާ ހީކުރީ މައިޝާގެ ކޮޅުބަލިވުމުން މައިޝާ ހަދާލި ގޮތެއްކަމަށެވެ. އެހެންވެ ވާހަކަވެސް ދެއްކީ ކުރިއަށްވުރެ ބާރަށެވެ.

” ފާޒިން އެބައިން ބޭރުގައި…! ” މައިޝާ އައިގޮތަށް އައިސް މިސްރާގެ އަނގަމަތީގައި އަތް އަޅަމުން ބުނެލީ ވައި އަޑުންނެވެ.