މަންޒިލްްްް 3

އަހަރެއްހާ ދުވަސް ތެރޭ އެނބުރި ކުޅުމުގެ ތެރެއަށް އާދެވޭނެ ކަމުގެ އުފާވެރި ޚަބަރު ޑޮކްޓަރު ދިނުމުން އިޝަލްއަށް އުފަލުން ގޮސް ރޮވުނެވެ. އެރިކްއަށްވެސް ވީ އެވަރެވެ. ސޯޝަލް މީޑިއާގައި އިޝަލްގެ ސަޕޯޓަރުން އުފާފާޅު ކުރަމުން ދިޔައެވެ. އިޝަލް ކުރިއަށް ވުރެ ވަރުގަދަކޮށް އެނބުރި ކުޅުމުގެ ތެރެއަށް އަންނާނެ ދުވަހަކަށް އިންތިޒާރު ކުރާކަމަށް ސަޕޯޓަރުން ބުނަމުން ދިޔައެވެ.
****
ހަފްތާ ބަންދުގައޖ ޔާޒް އާއި އައިރާވެސް ލަންޑަންއަށް އައެވެ. އެމީހުންނާ އެއްކޮށް އަހާންވެސް އައެވެ. ޔޫސުފްވެސް އަންނަން ބޭނުންވެފައި ހުރިއެއް ކަމަކު މެޗު އޮތުން ނާދެވުނީއެވެ. ޔޫސުފްގެ ބަދަލުގައި ނަވާރް ލައިޝާ ގޮވައިގެން ލަންޑަންއަށް އައެވެ. އަލްޔަސްވެސް އިޝަލް ރަނގަޅުވުމާއެކު އެނބުރި ލިވަޕޫލަށް ދިޔައެވެ.

އަލްޔަސް އަދި ޔޫސުފްވެސް ނެތުމުން ޔާޒް ހުރީ ފޫހިވާ ގޮތްވެފައެވެ. އައިރާވެސް މުޅިންހެން އުޅެނީ ނަވާރް އާއި އަލައިކާ އާއި އެކީގައެވެ. ޔަޒަން އާއި އާޔާވެސް އަކްޔަން އަލާޔާ އަދި ލައިޝާއާ ޖެހުމުން އުޅެނީ ކުޅުމުގެ ފޯރީގައެވެ. އެކުދިން ކުޅޭތަން ބަލަން ޔާޒް މަޑުކޮށްލުމުން އަލާޔާ އާއި ޔަޒަން ވެގެން އޭނާ ފޮނުވާލީއެވެ.

އިޝަލްގެ ކޮޓަރިއަށް ދިޔައިރު މިންހާ އާއި ޒާޔާ އަދި އިޝަލް އާއި އަހާން ކޮންމެސް ސަކަރާތެއް ޖަހަން ތިއްބެވެ. އަހާން އާއި އިޝަލް ކޮންމެސް އެއްޗެއް ކިޔުމުން ޒާޔާ އާއި މިންހާ ތުން ތަމައިގެން ތިއްބެވެ. “ހާދަ މަޖަލޭ ދޯ. ނިކަން އަހަރެންވެސް ލައިގެން ތި ކިޔާ ޖޯކެއް ކިޔައިބަ” ހުސްކޮށް ހުރި ގޮނޑިއެއްގައި އިށީންނަމުން ޔާޒް ބުނެލިއެވެ. “މި ކިޔަނީ މިތިބަ ދެމީހުންނަށް އެރިކް ފެނިގެން މޮޔަ ވި ވާހަކަ” މަޖާ ވެފައި އިޝަލް ބުނުމާއެކު ޔާޒްވެސް ޒާޔާ އާއި މިންހާއާ ދިމާކުރަންފެށިއެވެ. “މުޅިން ސަކަރާތެއްނު. އޭ އެރިކްއަށް ގުޅާފަ ބުނެބަ އަންނާށޭ!” “މިއަދު ނާދެވޭނެ މެޗު އެބައޮތް. މެންޗެސްޓާރގަ ވީ” އާސެނަލް އަދި މެންޗެސްޓާރ ޔުނައިޓަޑް ކުޅޭ މެޗަށް ޓީމުވީ މެންޗެސްޓާރއަށް ގޮހެވެ. “އޯ އެއީ ތެދެކޭ ހަނދާންނެތުނީ. ކިހާ އިރަކު އޮތީ؟” ގަޑި ބަލާލަމުން ޔާޒް އަހައިލިއެވެ.

ޔުނައިޓަޑް އަދި އާސެނަލް ކުޅޭ މެޗު އޮތީ ލަންޑަން ގަޑިން ހަވީރު ފަހެއް ޖަހާއިރުއެވެ. މެޗު ބަލަން ކާއެއްޗިިހި ހިފައިގެން އެންމެން ސިޓިން ރޫމަށް ދިޔައެވެ. ނަވާރް އާއި އައިރާ މެޗު ނުބަލައި ކުދިން ގޮވައިގެން ބޭރަށް ހިނގާލަން ދިޔައެވެ. އިޝަލް އަހާން އަދި ޔާޒް ސޯފާގައި ތިބެފައި އަލައިކާ އާއި ޒާޔާ އަދި މިންހާ ތިބީ ބިންމަތީ އިށީންދެލައިގެންނެވެ. މެޗު ބަލާހިތުން މެޗު ބަލަން ތިބީ ހަމައެކަނި އިޝަލް އާއި އަހާންގެ އިތުރަށް އަލައިކާއެވެ. ލިވަޕޫލްގައި އުޅުނުއިރު އެންފިލްޑްގައި އޮންނަ ކޮންމެ މެޗަކަށް ކުދިން ގޮވައިގެން އަލައިކާ ދެއެވެ. ލަންޑަންއަށް އައިސް އުޅޭއިރު އާސެނަލް ކުޅޭ މެޗުތައް ބަލަންވެސް ދަނޑަށް ދެއެވެ.

އާސެނަލް އާއި މެންޗެސްޓާރ ޔުނައިޓެޑްގެ މެޗަށް އަކްމަލް ފުރިހަމައަށް އޭނާގެ ޓީމު ތައްޔާރު ކުރިއެވެ. މި ވަގުތު ލީގުގެ އެއްވަނައިގައި ލިވަޕޫލް އޮތްއިރު ދެވަނައިގައި އޮތީ އާސެނަލްއެވެ. ތިންވަނަައިގައި އޮތީ މެންެސްޓާރ ޔުނައިޓެޑްއެވެ. ޕޮއިންޓްގެ ގޮތުން ދެޓީމު އެއްވަރެވެ. އާސެނަލް ކުރީގައި އޮތީ ގޯލުގެ ތަފާތުންނެވެ. ލީގު ހޯދުމަށް ކުރާ މަސައްކަތުގައި މިއަދު ޔުނައިޓެޑް އަތުން މޮޅުވުން ވަރަށް މުހިންމެވެ. އޭރުން ތިން ޕޮއިންޓްގެ ލީޑު އާސެނަލްއަށް ލިބި ލިވަޕޫލް އާއި އޮތް ފަރަގު ޕޮއިންޓަކަށް ކުޑަވާނެއެވެ.

މިއަދުގެ މެޗުގެ ފުރަތަމަ އެގާރާގައި އަކްމަލް އެރިކް ހިމެނީ ޓްރެއިނިންގައި ރަނގަޅު ވުމުންނެވެ. އާސެނަލް ބަލިވި މެޗަށްފަހު ޓްރެއިނިންގް ގައި އޭނާވަނީ ވަރަށް ބުރަކޮށް މަސައްކަތް ކޮށްފައެވެ. އެ މެޗަށް ފަހު އޮތް މެޗުގައި ބެންޗުގައި އިންނަމަވެސް މި މެޗަށް އެރިކްގެ ބޭނުން މުހިންމުކަން އަކްމަލްއަށް އެނގެއެވެ. ޔުނައިޓެޑްގެ އެންމެ ކުރިއަށް ކުޅޭ ކުޅުންތެރިޔާ މޭސަން ލޮކްވުޑް ހުއްޓުވަން އެންމެ އެކަށޭނެ ކުޅުންތެރިޔަކީ އެރިކްެއެވެ. އެފްއޭކަޕްގައި މެންޗެސްޓްއާ އެއްކޮށް ކުޅުނު މެޗުގައި މޭސަން ހުއްޓުވުމުގެ އެންމެ މުހިންމެ ދައުރެއް އަދާކުރީ އެރިކްއެވެ.

ކެމެރާ ޒޫމްކޮށް އެރިކްއަށް އެޅުމާއެކު ޒާޔާ އާއި މިންހާ އެކަކު އަނެކަކު އަތުގައި ވިކައިގަތެވެ. އަތް ތަޅުވަމުން އަޅޭ އެރިކްއޭ ކިޔައި ދެމީހުން ތޫލި އަޑުން ހަޅޭއްލެވިއެވެ. “ސަޅި ވީޑިއޯއެއް މި އޮތީ އެރިކްއަށް ދައްކަން” އިޝަލް ފޯނުން މިންހާ އާއި ޒާޔާ އުޅުނު ގޮތް ވީޑިއޯ ކުރިއެވެ. “އިޝަލް. ނުވާނެ އެހެން ހަދައިގެން” އިޝަލްގެ ނަމުގެ ހުރިހާ އަކުރުތަކަށް ދަމާލަމުން މިންހާ ހަރުކަށި ކަމާއެކު ބުނެލިއެވެ. “މިންހާ. އެހެން ހަދާނަން” މިންހާ ބުނި ރާގުގައި ތޫލި އަޑަކުން އިޝަލް ބުނެލިއެވެ. މިންހާ ރުޅި އައިސްގެން އިޝަލް ގައިގައި ޖަހަން އަތް ނެގިއެވެ. “އޭ އަނެއްކާވެސް އަހަރެން ކޮމާއަކަށް ފޮނުވާލަންތަ ތިއުޅެނީ؟” މިންހާ ކިބައިން ސަލާމްތަވާން ދެ އަތް ހުރަސްކޮށްލައިގެން އިޝަލް ސަމާސާކޮށްލިއެވެ. ވަގުތުން މިންހާ މޫނު ނަތީ ކުލަވަރު ބަދަލުވެގެން ދިޔައެވެ. އިޝަލް ކޯމާގެ ވާހަކަ ބުނުމުން ބިރުގަތެވެ. “އޭ ކަޒް ކޮންއިރަކު ތިހާ ސީރިއަސްވާން ފެށީ؟ މަޖަލަކަށް ބުނި އެއްޗެކޭ” މިންހާއަށް ވީގޮތް ފެނި އިޝަލް އަވަހަށް ބުނެލިއެވެ. އިޝަލްއަށް ލޯ އަޅައިލައިފައި މިންހާ އިތުރު އެއްޗެކޭ ނުބުނެއެވެ. އޭނާގެ ނަޒަރު ޓީވީ ސްކްރީނަށް ހުއްޓާލިއެވެ. މިންހާ އޭނާއާ މެދު ވިސްނާ ވަރު އިޙްސާސް ވުމުން އިިޝަލް އަށް ހިނިތުންވެވުނެވެ.

އެއް ފަހަރު އިޝަލްއަށް ބަލައިލައިފައި އަނެއް ފަހަރު މިންހާއަށް އަލައިކާ ބަލައިލިއެވެ. ހިތަށް އެރި އެއްޗަކުން އަލައިކާގެ ތުންފަތް މައްޗަށް ފުޅާ ހިނިތުންވުމެއް ވެރިވިއެވެ. ެ

މެޗުގެ ފުރަތަމަ ދިހަ މިނެޓު ފެނުނީ ވަރަށް އާދައިގެ ގޮތަކަށެވެ. މެދުތެރޭ ބޯޅަ ހިފަހައްޓައިގެން ކުޅުނުއިރު އެއްވެސް ޓީމަކުން ނުރައްކާތެރި ހަމަލާއެއް ނުއުފައްދައެވެ. ސަތާރަވަނަ މިނެޓުގައި އާސެނަލްއިން ނުރައްކާތެރި ހަމަލާއެއް އުއްފެދިއެވެ. މެދު ތެރެއަށް ކުޅޭ ކުޅުންތެރިއަކު ޕެނަލްޓީ އޭރިއާ ރޮނގު މަތިން ފޮނުވާލި ބާރު ހަމަލާ ކީޕަރު ަައަތު ޖެހިފައި ދަނޑީގައި ޖެހިފައި ގޮސް ބޭރަށް ދިޔައެވެ. މެޗުގެ ފުރަތަމަ ކޯނަރު އާސެނަލްއަށް ލިބުނެވެ. އާސެނަލްގެ ކީޕަރު ފިޔަވާ ހުރިހާ ކުޅުންތެރިން ކުރިއަށް އެރިއެވެ. ތިން ކުޅުންތެރިއަކު ޕެނަލްޓީ އޭރިއާ ބޭރުގައި މަޑުކޮށްލައިގެން ތިބިއިރު ދެންތިބި ހުރިހާ ކުޅުންތެރިން ތިބީ ޕެނަލްޓީ އޭރިއާ އެތެރޭގައެވެ. އާސެނަލްގެ އެލެކްސެންޑަރ ނަގައިދިން ކޯނަރު އައީ ސީދާ އެރިކްގެ ބޮލާ ދިމާއަށެވެ. ކައިރީ ހުރި ޔުނައިޓެޑް ކުޅުންތެރިޔާ މަތިން ފުންމައިއަރައި ބޮލުން ޖެހި ބޯޅަ ގޮސް ވަނީ ގޯލު ތެރެއަށެވެ.

އާސެނަލް ޓީމަށް އެރިކް ޖަހައިދިން ފުރަތަމަ ލަނޑަށް އެ ލަނޑުވެގެން ދިޔައެވެ. ޕްރިމިއާރ ލީގުގެ ގަދަ ބާރެއް ކަމަށްވާ ޔުނައިޓެޑް ކޮޅަށް އޭނާގެ ފުރަތަމަ ލަނޑު ޖަހައިދެވުމުން ބަޔާން ކުރަން ދަތި އިޙްސާސެއް އެރިކްއަށް ކުރެވިގެން ދިޔައެވެ. އޭނާ ދުވެފައި ގޮސް ޓީމުގެ އެހެން ކުޅުންތެރިންނާއެކު އުފާ ފާޅުކުރިއެވެ. އޭނާގެ އެ ލަނޑު އެކިވެރިޔާ އިޝަލްއަށް ޚާއްސަ ކުރިއެވެ.

އަލައިކާ އާއި އިޝަލްގެ އަޑު ސިޓިންރޫމް ތެރޭ ގުގުމައިގެން ދިޔައެވެ. އޭނާގެ ޓީމުން ލަނޑު ޖެހުމުން ޚާއްސަކޮށް އެރިކް ލަނޑު ޖެހުމުން އިޝަލް ދަނޑުގައި ހުރެވުނު ނަމައޭ ހިތަށް އެރިއެވެ. އެކުވެރިންނާ އެކު ދަނޑުގައި ހުރެ އުފާފާޅު ނުކުރެވޭތީ ފަޅުކަމެއް އިޝަލްއަށް އިޙްސާސްވިއެވެ.

ފުރަތަމަ ހާފު ނިމުނީ އާސެނަލް ކުރީގައި އޮވެގެންނެވެ. އާސެނަލް މުޅި ޓީމުގެ ފަރާތުންވެސް މޮޅު ކުޅުމެއް ފެނިގެން ދިޔައެވެ. އޭނާގެ ކުޅުންތެރިންގެ ކުޅުމާ މެދު އަކްމަލް ހުރީ ވަރަށް ބޮޑަށް ހިތްހަމަ ޖެހިފައެވެ.

ދެވަނަށް ހާފު ފަށައިގެން ޔުނައިޓެޑް އިން ގިނަ ހަމަލާތަކެއް އުފެއްދިއެވެ. ނަމަވެސް އާސެނަލްގެ ޑިފެންސް ފޫ އަޅުވައިފައި ލަނޑެއް ކާމިޔާބު ކުރުން ވެގެން ދިޔައީ ޔުނައިޓެޑްއަށް އުނދަގޫ ކަމަކަށެވެ. ޚާއްސަކޮށް އެރިކްގެ މޮޅު ކުޅުމާއެކު ޔުނައިޓެޑްގެ ލޮކްވުޑްއަށް އޭނާގެ އެންމެ މޮޅު ކުޅުން ދެއްކޭ ގޮތް ވަނީ ނުވެފައެވެ. މެޗުގެ ހަތްދިހަހަ ވަނަ މިނެޓުގައި އާސެނަލް އިން ވަނީ އިތުރު ލަނޑެއް ޖަހައި މެޗުގެ ފަރަގު ފުޅާކޮށްފައެވެ. ސަޕޯޓަރުންގެ އަޑު ހުއްޓުމެއް ނެތި އިވެމުން ދިޔައެވެ. ކޮމެންޓޭޓަރުންގެ ތަޢުރީފުވެސް އާސެނަލް ޓީމަށާއި އެރިކްއަށް ލިބެމުން ދިޔައެވެ.
މެޗުގެ އަށްޑިހަ ފަސްވަނަ މިނެޓުގަައި ލިބުނު ޕެނަލްޓީއަކުން ޔުނައިޓެޑް ލަނޑެއްް ކާމިޔާބު ކުރިއެވެ. ޕެންލްޓީ އޭރިއާ އެތެރެއިން އާސެނަލް ކުޅުންތެރިއެއް އަތުގައި ބޯޅަ ޖެހުނީއެވެ. ލޮކްވުޑް ކާމިޔާބު ކޮށްދިން ޕެނަލްޓީއާ އެކު ޔުނައިޓެޑްގެ އުއްމީދު އާވެގެން ދިޔައެވެ. މެޗުގެ ފަހު ފަސް މިނެޓުގައި ޔުނައިޓެޑުން ގިނަ ނުރައްކާތެރި ހަމަލާތަކެއް އުފެއްދިއެވެ. ނަތީޖާއެއްގެ ގޮތުން ގިނަ ހިލޭ ޖެހުންތަކާ ކޯނަރުތައް އެމީހުންނަށް ލިބެމުން ދިޔައެވެ. އާސެނަލް ކުޅުންތެރިން ވަރުބަލިވެ ގޯސް ހެދެން ފެށިއެވެ. މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ފަސްމިނެޓުގެ ތެރެއިން ހަތަރު ވަނަ މިނެޓުގަަައި ޔުނައިޓެޑްގެ މޭސަން ކީޕަރު ކަޓުވާފައި ގޯލަށް ބޯޅަ ފޮނުވާލިއެވެ. ގޯލު ރޮނގު މަތީ ބޯޅަ އޮއްވައި އެރިކް ފައިން ޖަހައި ބޯޅަ ކުޅުމުގެ ތެރެއަށް ފޮނުވާލިއެވެ. އެ ބޯޅަ ލިބުނީ އާސެނަލްގެ އެހެން ކުޅުންތެރިއަކަށެވެ. ޔުނައިޓެޑް ކުޅުންތެރިންނަށް ލިބުމުގެ ކުރިން އެ ކުޅުންތެރިޔާ އަރިމަތިން ބޯޅަ ބޭރުކޮށްލިއެވެ. އެ ވަގުތުކޮޅު ވެގެން ދިޔައީ ދެޓީމުގެ ކުޅުންތެރިން ނޭވައި ހިފަހައްޓައިގެން ތިބެން ޖެހުނު ވަގުތުކޮޅަކަށެވެ. ބޯޅަ ބޭރުވުމާއެކު އާސެނަލް ކުޅުންތެރިން ގޮސް އެރިކްއާއެކު އުފާފާޅު ކުރިއެވެ.

ރެފްރީ ކަށިގަނޑު ފުމުމާއެކު އާސެނަލް ކުޅުންތެރިން އުފާފާޅު ކުރިއެވެ. ކުޅުންތެރިންނާއި ސަޕޯޓަރުންގެ މޫނު މަތިން ފެންނަމުން ދިޔަ ކުލަވަރުން އެއީ ކިހާ މުހިންމު މޮޅެއްކަން އެނގެއެވެ. އާސެނަލް ކުޅުންތެރިންނާއި ޚިލާފަށް ޔުނައިޓެޑް ކުޅުންތެރިންގެ މޫނު މަތިން ފެންނަމުން ދިޔައީ މާޔޫސީ ކަމެވެ. އަމިއްލަ ދަނޑުގައި އެމީހުން އެންމެ ފަހުން ކުޅުނު ދިހަ މެޗުން ވަނީ މޮޅުވައެވެ. އާސެނަލްއިން އެމީހުން ބަލި ކުރުމުން މޮޅުވުމުގެ ސްޓްރީކް ނިމިގެން ދިޔައެވެ.

“ވާއު އެރިކްގެ މޮޅު ސޭވެއް. އެރިކް މިއަދު ވަރަށް މޮޅު. މޭން އޮފް ދި މެޗް ޑިޒާރވްއީ އެރިކްއަށް” އެރިކްގެ މޮޅު ކުޅުމަށް އަލައިކާ ތަޢުރީފު ކުރިއެވެ. އަހާން އާއި އިޝަލްވެސް އެކަމަށް އެއްބަސްވިއެވެ. މެޗު ނިމުމާއެކު އިޝަލް އާއި އަލައިކާ އުފާފާޅު ކުރިއެވެ. އާސެނަލް ޓީމުގެ އޮފިޝަލް އިންސްޓް އެކައުންޓް އާއީ ހުރިހާ ކުޅުންތެރިން ޓެގްކޮށްފައި މަރުހަބާގެ ޕޯސްޓެއް އިޝަލް ކުރިއެވެ. އަދި އެރިކް ގޯލް ޖަހައިފައި އުފާފާޅު ކުރިވަގުތު ނަގައިފައި އިން ފޮޮޓޮއެއް ޕޯސްޓްކޮށްފައި ކެޕްޝަންގައި އެރިކްއަށް ތަޢުރީފުކުރިއެވެ.

މެޗުގެ މޮޅު ކުޅުންތެރިޔާގެ މަގާމު ލިބުނީ އެރިކްއަށެވެ. އެރިކްގެ ތުންފަތް މަތީގައިވި ހިނިތުންވުން ފިލައި ނުދެއެވެ. އިންޓަވިއު ދިން އިރުވެސް އޭނާއަށް ހެވެމުން ދިޔައެވެ. އޭނާގެ ކެރިއަރުގައި އެންމެ އުފާވި އެއް ދުވަހަށް އެ ދުވަސް ވެގެން ދާނެއެވެ.

ހޮޓެލަށް ގޮސްފައި އެރިކް އޭނާގެ މަންމައަށް ގުޅައިލިއެވެ. ދަރިފުޅުގެ ކާމިޔާބީގެ ސަބަބުން އެ މަންމަ ހުރީ އުފާވެފައެވެ. އޭނާ ފަޚުރުވެރިވާނެ ފަދަ ދަރިއަކަށް ދަރިފުޅު ވާނެ ކަމަކީ އެއް އިރެއްގައިވެސް ކާރާ ޝައްކު ކުރި ކަމެއް ނޫނެވެ. ދަރިފުޅާއި މެދު އަބަދުވެސް ޔަޤީންކަން ކާރާއަށް އޮވެއެވެ.

ރޭގަނޑު ކައިގެން އެންމެން ސިޓިން ރޫމްގައި ލިވަޕޫލް މެޗު ބަލަން ތިއްބެވެ. ލައިޝާ އާއި އަލާޔާ އަދި އަކްޔަން އެކުދިންގެ ބައްޕަމެން ކުޅޭތަން ބަލަން ޝައުޤުވެރި ވެފައި ތިއްބެވެ. މެޗު ނުބަލަން ވެގެން މިންހާ ގޮސް އިނީ މައްޗަށް އަރާ ސިޑި މަތީ އިށީންދެލައިގެން ފޯނާއި ކުޅެންށެވެ. ދޮންބެއަށް އަނިޔާއެއް ވެދާނެތީ ބަލަން މިންހާއަށް ނުކެރުނީއެވެ. މިންހާ އެކަނި އިނުމުން މެޗު ނުބަލައި އިޝަލް އައިސް މިންހާ ގާތު އިށީނެވެ. “ކީއްވެ ނުބަލައި ތި އައީ؟” “ކަޒް އެކަނި އިނީމަ ދެރަވެގެން. އެހެން ނޫނަސް ލިވަޕޫލް މޮޅުވާތަން ބަލާ ހިތެއް ނެތް. ދޮންތިބެއާ ޔޫސުފްބެ ކުޅުނަސް މަށަކަށް ނެތް ލިވަޕޫލަށް ސަޕޯޓް ކުރެވޭކަށް” ލިވަޕޫލް އަކީ އޭނާ ކުޑައިރު އެންމެ ސަޕޯޓު ކުރި ޓީމު ކަމުގައި ވިއަސް އާސެނަލްއަށް ކުޅެން ފެށިފަހުން އެކަން ބަދަލުވެއްޖެއެވެ. “ހިތަށް އަރާ މަންމަމެން އެންމެން ކިހިނެއްބާއޭ ފުޓުބޯޅަ ޕްލޭޔާރސް އާ އިނދެގެން ދަރިންވެސް ފުޓުބޯޅަ ކުޅެން ފޮނުވަނީ. މިންނުއަކަށް ހިއެއް ނުވޭ ފުޓުބޯޅަ ކުޅޭ މީހަކާ މެރީކޮށްގެން މިންނުއަށް އުޅެވޭނެ ހެންނެއް” މިންހާ ހިތުގައިވި ކަންބޮޑުވުން ހާމަކޮށްލިއެވެ. “މުޅިން ސަކަރާތެއްނު. އަދި އަހަރެން މި އުޅެނީ އާރާޝްދޮންބެ ގާތު ބުނަން މިންހާ މަށާ ދެވާށޭ. ދެން މިވީ ގޮތުން ނީންދެވޭ ނެއްނު” މިންހާ ރުޅި އަރުވައިލުމުގެ ނިޔަތުގައި އިޝަލް ބުންޏެވެ. “ތިހާ އިންނަން ބޭނުމިއްޔާ ދެން ކުޅުން ހުއްޓާލާފަ ބައްޕަ ކައިރީ ބުނެގެން އިންނަން ވީނު” އިޝަލް އުންމީދު ކުރި ގޮތާ ޚިލާފަށް ރުޅި އައުމުގެ ބަދަލުގައި މިންހާވެސް އޭނާގެ ސަމާސާގައި ބައިވެރިވިއެވެ. “އަންހެން ކުއްޖަކަށްޓަކައި ފުޓުބޯޅަ ކުޅުން ހުއްޓައެއް ނުލެވޭނެ. ހެެޔޮ ދުވަހަކު އިންނާނެ ކުއްޖެއް ނުލިބުނަސް” “މީނަ ކޮން މޮޔަ އަނގައެއް މި ތަޅަނީ. މިހާރު ތިހެން ބުންޏަސް ލޯބިވެވުނީމަ އެނގޭނީ ތިކަން. ކިހިނެއް އިނގެނީ އިޝަލް ހަމަ މިންހާއާ އިންނަން ކުޅުން ހުއްޓާނުކާނެ ކަމެއް” މެޗުގެ ފުރަތަމަ ހާފު ނިމުމުން އިޝަލް އާއި މިންހާ ކޮބައިތޯ ބަލަން އައި އަލައިކާއަށް ދެމީހުން ދެއްކި ވާހަކަ އަޑުއިވުނެވެ. އިޝަލް މޫނަށް ވައްތަރެއް ޖެއްސުމާއެކު އާލައިކާ ދެންވެސް އިޝަލްއާ ދިމާކުރިއެވެ. އިޝަލް މޫނަށް ޖައްސާ ވައްތަރު މަޖާވެގެން މިންހާއަށް ހެވެމުން ދިޔައެވެ.

މިންހާ ހެމުން ގެންދިޔައިރު އެ މޫނު މަތިން ފެންނަމުން ދިޔައީ މައުސޫމް ކަމެވެ. މިންހާގެ ރީތި ބޮޑު ދެލޮލުގައި ތަފާތު ވިދުމެއް ވިއެވެ. ފުރަތަމަ ފަހަރަށް މިންހާގެ ރީތިކަން އިޝަލް ހިތުގައި ބިންވަޅު ނަގައިގެން ދިޔައެވެ. ކަޅިވެސް ޖަހައި ނުލާ މިންހާ ހޭތަން ބަލަން ހުރެވުނެވެ.

އެނބުރި ލަންޑަންއަށް އައިސް އެރިކް ފުރަތަމަ ވެސް ދިޔައީ އިޝަލް ބުނެގެން އެގެއަށް އިޝަލްއާ ބައްދަލު ކުރާށެވެ. އެ ދުވަހު އިޝަލްގެ ދެބެއިންގެ ދެދަރި ހުރިހާ ކުދިންނާ އެރިކްއާ ބައްދަލުވިއެވެ. މެޗަކުން ނޫން ގޮތަށް ޔޫސުފްއާ ބައްދަލުކޮށްލުމުގެ ފުރުސަތުވެސް ފުރަތަމަ ފަހަރަށް އެރިކްއަށް ލިބުނެވެ. ޔޫސުފްގެ ފަރާތުން އޭނާއަށް ތަޢުރީފުގެ ބަސްތައް ލިބުމުން އެރިކްއަށް އަމިއްލަ ނަފްސާ މެދު ފަޚުރުވެރިވެވުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.