ިހިތް ކަލާޔަށް އެދޭތީ…2

ކުރިމަތީގައި ހުރި މީހާ ފެނުމާއިއެކީ އޭނާގެ ބަޑި ފަޅައިގެން ދިޔަފަދައެވެ.

އޭރު ރަފީގާ ވެސް ހުރީ ފެންކަޅިވެފައެވެ. ޒުވާން ދަރިފުޅު ތަހައްމަލް

ކުރަމުންދާ ހިތާމައިގައި ބައިވެރިވަމުން ދިޔަޔަސް މިއަދު އެ ދަރިފުޅަށް

ޓަކައި ކަމެއްކޮށްދިނުމަށް ހުދު އޭނާވެސްވަނީ ނުކުޅެދިފައެވެ.

ގެއްލެމުން ދިޔަ ހިޔާލުތަކުން އޭނައަށް ނިކުމެވުނީ ކުއްލިއަކަށް

ޒާއިޝް އޭނާގެ މެދުހަށީގައި އޮޅުލައިގަތުމުންނެވެ. އެނދުމަތީގައި

ތުއްތު ޒުކާ މައުސޫމްކަމާއި އެކު ނިދާލާފައި އޮތްގޮތުން އެކުއްޖާގެ

ހަޔާތައް ވެރިވެގަތް ކަޅު ވިލާގަނޑުގެ ހިލަމެއްވެސް ނުވާފަދައެވެ.

އަރުތެރެ ބެދެމުންދިޔަ ނަމަވެސް ހިއްވަރުކޮށްފައި ރަފީގާ ޒާއިޝްގެ

ބޮލުގައި ފިރުމާލިއެވެ. “ޒާއިޝް…ކޮންމެ ކަމެއްވެސް އެންމެ ރަނގަޅަކަށް

މަންމައަށް އިނގޭ ދަރިފުޅު ދެރަވާނެވަރު ނަމަވެސް މިއީ ހިތްވަރު އެލުވާލަންވި

ވަގުތެއްނޫން މިކަމުގައި ދަރިފުޅުގެ ކުށެއްނެތް ޒުމްރާގެ މަރަކީ ދަރިފުޅުގެ

އިހުމާލުންވީ ކަމެއް ނޫން މިވަގުތު ދަރިފުުޅު އެންމެ އިސްކަމެއް ދޭން ޖެހޭނެ

ފަރާތަކީ ޒުކާ… މިއަދަށްފަހު ޒުކާގެ މަންމައެއްގެ ޒިންމާ އާއި ބައްޕައެއްގެ

ޒިންމާވެސް އަދާކުރަންޖެހޭނެ ފަރާތަކީ ދަރިފުޅު” ޒާއިޝް މަޑުމަޑުން ބޯޖަހާލީ

މަންމަ އާއި އެއްބަސްވުމުގެ ގޮތުންނެވެ. ދެއަތުން  މޫނު ފުހެލުމަށްފަހު

އެނދުގައި އޮށޯވެލީ ކުޑަނަމަވެސް ހަމަޖެހުމެއް ލިބޭތޯއެވެ. ރަފީގާވެސް

ކުޑައިރުކޮޅަކު އެތާ ހުރުމަށްފަހު ކޮޓަރިން ބޭރަށް ދިޔައީ ޒާއިޝްއަށް

އެކަނިވެލާނެ ފުރުސަތެއް ދެމުންނެވެ.

********************************************

ފަތިހުގެ ހިތްގައިމު ވަގުތެވެ. ރަށުތެރޭގައި މަދުމަދުން ނަމަވެސް މީހުން

ހޭލަމޭލަވެ އުޅޭތަން ފެނެއެވެ. ކާޅާއި ކޮވެލީގެ އަޑުން މުޅި ފަޒާ އޮތީ

ފަޅުފިލުވާފައެވެ. އަރަމުން އައި އިރުގެ ރަން ދޯދިތައް އަތިރިމަތީގައި

އިން އަންހެންކުއްޖާގެ މޫނަށް އެޅުމާއި އެކު އޭނާ ދެލޯ ހަނިކޮށް

ލާފިއެވެ. އޭނާގެ ދޮން މޫނަށް އިރުގެ އަލިއެޅިފައިވުމުން މާރިތިކަމަށް

ދައްކައެވެ. ލޯކައިރީ ރަތްވެފައި ހުރިއިރު ނޭފަތުގައިވެސް ހުރީ

މަޑުރަތްކުލައެކެވެ. ތުންފަތުގައި މަޑުތުރުތުރު ލުމެއް އުފެދުމުން

ދިޔުމާއެކު އަވަސް އަވަހަށް ތުންފަތުގައި ދަތްއަޅާ ބާރުކޮށް

ލައިފިއެވެ. އޭނާގެ ކޯތާފަތުގައިވެސް ކަރުނައިގެ ނިޝާން

ފެންނަން ހުރިއިރު އެސްފިޔަތަކުގައި ވެސް ތެތްކަމެއް

ވިއެވެ. “އިވީ” ފަހަތުން އަންހެން ކުއްޖެއްގެ އަޑު އިވުމާއި

އެކު އިވްރާ އޭނާ ލިޔަމުން ގެންދިޔަ ފޮތް އަވަހަށް

ލައްޕާލިއެވެ. ހީވާގޮތުން އެއީ އޭނާގެ ޑައިރީއެވެ. ކޯތާފަތް

ފުހެލަމުން އޭނާ ފުންކޮށް ދެތިން ނޭވާލިއެވެ. “ނަވް.. އަހަރެން

ދިޔަޔަސް މަންމަމެންގެ ހާލު ބަލައްޗޭ” އިވްރާ ފެންކަޅިވެފައި

ވި ދެލޮލުން ނަވާއަށް ބަލައިލުމަށްފަހު ބުނެލިއެވެ. ލޮލުގައިހުރި ކަރުނަ

ތައް ހިންދާލަމުން ނަވާ ކަރުކެހިލިއެވެ. އެއަށް ފަހުން ހިނިތުންވުމެއް

ތުންފަތައް ވެރިކުރުމަށްފަހު ބޯޖަހާލީ އެކަމާ އެއްބަސްވުމުގެ ގޮތުންނެވެ.

“ފުރަންދާ ގަޑި ޖެހެނީ ހިނގާ ދަމާ” ނަވާ އައި ކޮޅަށް ހިނގައި ގަންނަމުން

ބުނެލިއެވެ. އިވްރާވެސް ނަވާގެ ފަހަތުން ހިނގައިގަތެވެ. އެހެނަސް ކުރިޔާ ހިލާފަށް

އެދެމެދުގައި ވަނީ ހިމޭންކަމެވެ. ވާނިވެސް އެހެން ނޫންހެއްޔެވެ. 20 އަހަރު ދުވަސް

ވަންދެން އެކުގައި އުޅުނު ރަހްމަަތްތެރިޔާ އާއި ވަކިވާން ޖެހުމުން ދެމީހުންގެ ހިތަށް

ވެސްވަނީ ބުނެދޭން ނޭންގޭ ކަހަލަ ނުތަނަވަސްކަމެއް ވެރި ވެފައެވެ.

(ނުނިމޭ)