ފޮނި ފާރޮށި 1

އިރުއަރާނެކަމަށް ލަފާކޮށް ކަލަންޑަރުތަކުގައި ޖަހާފައިވާ ގަޑި ފަހަނަޅައި ދިޔައިރުވެސް އިރުގެ އަލިކަމެއް ނުފެނުނެވެ. ކަޅު ބޯ ވިލާތަކުގެ ރަސްކަން އުޑުމައްޗަށް ވެރިވެގަތްފައިވީ، ތެތްފިނިކަމުން ޖައްވުގެ އަރާމުކަން ދެގުނަކޮށްދެމުންނެވެ. ހިޔަލެއްނެތި ހާމަވެފައިވީ ކޮންމެ އެއްޗެއްގައި ޝަބްނަމަ ތިކިތަށް ބަބުޅައި، ބިމަށް ދަމާ ބާރު ގެންދާ ކޮޅަށް ދަތުރު ކުރަމުންދިޔަ މަންޒަރުވީ އެކަނިވެރި ހިތްތަކަށް ހިތްގައިމު މަންޒަރަކަށެވެ. ގޭގޭގެ ކުޑަދޮރުތަކުން އަލިކަމެއްގެ ނިޝާން ނުފެންނަނީ އަރާމު ތަންމަތިތަކަށް ބޮނޑިވެ ހުވަފެންތައް ބަލަމުންދިޔަ މީހުން ގިނަކަމުންނެވެ.

ހިމޭންވެފައިވާ ހުޅުމާލޭގެ މަގަކުން، ފައިގައި ހުރި ބާރެއް ލާފައި އެ ޒުވާނާ ދިޔައީ އޭނާގެ މިސްރާބަށް ވާސިލުވުމަށްޓަކައެވެ. ބައިސްކަލުގައި ފިނދުމަސްގަނޑު ރަނގަޅަށް ނުޖެހުނީ ފަޔަށް ލެވުނުހާ ބާރެއް ލަމުންދިޔައިތީއެވެ. ޒުވާން ކަށިން ނެރުން ހިތްވަރުގެ ސަބަބުން ކޮންމެ މަގެއްވެސް އޭނާ ފަސްދީފައި ދިޔައީ ވައިސޫރިއެއް ފަދައިންނެވެ. މަގުތަކުގައި އެ ބައިސްކަލު ފިޔަވައި އެންމެ އުޅަނދެއްގެވެސް ހިލަމެއް ނުވެއެވެ. ހުރަހެއްނެތި ފަން އިސްތަށިގަނޑާއި ގޯނާ ކުރި ފިނި ވައިރޯޅިތަކުގެ ބީހުންތަކަށް އިޖާބަދެމުން ނައިއަލް ދެލޯ މަރާލިއެވެ. މަޑިމަތީ ހަމަޖެހިލާފައި ބުރަކިން އަތްނައްޓާލައި، އުދުހެން ބޭނުންވެގެން އުޅޭ ފަދައަކުން އަތް ފުޅާކޮށްލި ގޮތުން، ފިލްމެއް ކުޅެނީކަމެއް ނުވަތަ އަމިއްލައަށް މަރުވާން އުޅެނީކަމެއް ނޭންގެއެވެ. ހުއްޓުމެއްނެތި ފައިން ޕެޑަލް އަނބުރަމުންދިޔަކަން ނަސީބެކެވެ.

“އާހް ވިންޑް ބޭބީ… ވައި ސޯ ސެކްްސީ.. ކަމް އެންޑް ހަގް މީ..” ފިލްމީ ގޮތަކަށް ނައިއަލް ކިޔައިލީ، ވަޔަށް އަޑުއިވުމުގެ ޤާބިލިއްޔަތު ލިބިގެންވާނެކަން ޤަބޫލުކުރާތީ ކަމެއް ނުވަތަ ހަމަ ފިލްމީ ވާން ކަމެއް ޔަޤީނެއް ނޫނެވެ. “ޗީޑި ދެން. އެ ވެސް މީހުން ކިޔާ އެއްޗިހިތަ؟ ބޭބް، މައި އޭސް” ދެވަނަ ސިކުންތުގައި މުޅިން އެހެން މީހަކަށް ބަދަލުވިހެން ހިނިގަނޑަކާއެކު މޫނަށް ވައްތަރެއް ޖައްސާލާފައި ކިޔައިލިއެވެ. އަދި އަލުން ބުރަކީގައި ހިފަހައްޓާލިއެވެ.

ކުއްލިއަކަށް ނައިއަލްގެ ދެލޯ ބޮޑުވީ ވާތް ފަރާތަށް އޮތް ގޯޅިން އޭނާގެ ކުރިމައްޗަށް ވާގޮތަށް އައި ބައިސްކަލު ފެނިފައެވެ. އެ ބައިސްކަލުގައި އިން މަންޖެގެ ދެލޯ ވެސް ބޮޑުވިއެވެ. އަންހެންކުއްޖާ ބުރަކި ޖައްސަމުން ނައިއަލް އައި ފަޅިއާއި ދެކޮޅަށް ބައިސްކަލު އަނބުރައިލިއެވެ. ނަމަވެސް ބޮލަށް ތެޔޮއަރައިގެން ހަޅޭއްލެވުމުގެ ބުރަ މަސަތްކަތުން އަވަދިނުވެ އުޅުނު ނައިއަލް، ސިކުނޑީގެ ބޭނުން ކުރަން ނޭނގޭ ހާލު ބައިސްކަލު ޖެއްސީ އެ އަންހެން ކުއްޖާ އައި ފަރާތަކަށެވެ. އެސްފިޔަޖަލާހާ ކުޑަ ސިކުންތުކޮޅަކާއި ބާރުމިނެވެ. ނަތީޖާއަކަށްވެގެން ދިޔައީ ދެ ބައިސްކަލުގެ ކުރީ ދެ ފުރޮޅުގެ ތުމާ ތުން ގުޅި ދެ ބައިސްކަލުގެ ލޯބީގެ ޞަފްހާ ހުޅުވިގެން ދިޔުމެވެ. ދުއްވަން ތިބި ދެމީހުން ބިންމައްޗަށް ވެއްޓި މަަރުވިޔަސް ހެޔޮކަމަށެވެ. ވެއްޓުނުގޮތަށް ތެދުވަން ނޭނގިފައި ތިބި ނައިއަލްއާއި އީމާގެ ތެރެއިން އެންމެ ފުރަތަމަ ބޯ ހިއްލާލީ އީމާއެވެ. ބޮލުގައި އޮތް ހެލްމެޓް ނަގާފައި، ވެ ނިމިފައިވާ ހާދިސާއަށް ރަނގަޅަށް ނަޒަރު ހިންގައިލިއެވެ.

“އެކްސްކިއުޒް މީ… މަރުވީތަ؟” ބިންމަތިން ތެދުވަން މަސައްކަތަށް އިން އީމާ ކޮށްލީ ކިތަންމެ މުހިންމު ސުވާލެއް ނަމަވެސް، ފަރުވާލެއް ނެތްކަމުގެ އަސަރު އޭނާގެ މޫނުމަތިން ދައްކުވައިދިނެވެ. އަރައިގެން އިން ބޫޓުގެ ކޮޅުން ވެއްޓިފައި އޮތް ފިރިހެން ސޮރުގެ އަތްމައްޗައް އަރައި ބާރަށް ފިއްތާލިއެވެ.

“އައްދިއްޔޯއި!” ހޭވެރިކަން ވި ނައިއަލް ފުންމައިގެން ތެދުވެ އިނގިލި ރައްކާތެރިކުރުމަށް ކަހަލަ ގޮތަކަށް އަނެއް އަތް ހުރަސްކޮށްލިއެވެ. އީމާއަށް އެ އެރުނީ އެކްސިޑެންޓްގެ ސަބަބުން ބިންދިފައި އޮތް އިނގިއްޔަށެވެ. “މީހަކު ހިތްހަރުވާނީ ތިހާވަރަށް! ބައިސްކަލުން ޖަހާ ބިމަށް ވައްޓާލާފަ ނަގައިދޭންވެސް ނޫޅެ އަތަށް އަރާ ޗިސްކުރަނީ ވިއްޔަ.” ދެބުމަ ގޮށްޖަހައިގެން އަތުގައި ފިރުމަން އިން ނައިއަލްގެ މޫނުމަތިން، ވަމުންދިޔަ ތަދު ފާހަގަވާ ކުލައަކާއިއެކު ހަޤީޤީ ރުޅިވެރިކަން ފާޅުވިއެވެ.

“އޯއެމްޖީ އައްޗީ… ތި ބޭފުޅާ ތިޔަ ހީފުޅުކުރެއްވީ ނުބައިކޮށް އިނގޭތޯ. މަ ވާތްފަރާތަށް ބައިސްކަލު ޖެއްސީމަ ތި ބޭފުޅާޔަށް ކަނާތްފަރާތަށް ޖައްސަން ނޭނގުނީ ނޫންތޯ.” ޖެއްސުމަށް އަދަބުވެރިކަން އިޚްތިޔާރުކުރި އީމާ ނޭފަތް ބޮޑުކޮށްލަމުން އަނގަ ޗޭ ކޮށްލިއެވެ. ނައިއަލްގެ އިނގިލި ބިދިފައި އޮތްކަން ފާހަގަވީ މާ ފަހުންނެވެ.

“ހެވޭ… އެހާ ކުޑައިރުކޮޅެއް ތެރޭގަ ރަނގަޅަށް އެއްޗެއް ވިސްނޭތަ. ކަލޭ ތަންކޮޅެއް ބަލައިގެން އައިނަމަ މިހެނެއް ނުވީހެންނު. ނޫނީ ތަންކޮޅެއް އަވަހަށް ބަރުގޮނު އަޅާލިނަމައެންނު. އިއްޔެ އަލަށް ގަތް ޓީޝާޓޭ ތި ޚަރާބުކޮށްލީ.” ނައިއަލް ލައިގެން އިން ހުދު ޓީޝާޓު ވަނީ ޗަކައިން ތަތްތެޅިފައެވެ. އިނގިލި ބިނދުނު ކަމަށްވުރެ އޭނާއަށް މުހިއްމުވީ ޓީޝާޓެވެ. އޭނާ ދިޔައީ މައްސަލައަކަށްފަހު މައްސަލައެއް ނެރެމުންނެވެ. އިނގިލިން އަރަމުންދިޔަ ތޫނު ތަދު ހަނދާން ނައްތައިލަން މަސައްކަތް ކުރަމުން އީމާއަށް އޭނާ އަވަސް ނަޒަރެއް ދިނެވެ. ކުރު އިސްތަށިގަނޑެއްގެ ވެރިއެކެވެ. ލައިގެން ހުރި ޖާރޒީއާއި ސޯޓުގައި ފުދޭވަރަކަށް ‘ތިކް’ ވައްތަރު ޖަހައެވެ.

“ޗީޑި. ސޯ ފެޓީ. އެހެންވެ ދޯ ބައިސްކަލު ކޮންޓްރޯލުން ނެއްޓުނީ.” ހިތަށް އެރި އެއްޗަކުން ނައިއަލް ގާތަށް ހިނިއައެވެ. ކޮޅަށް ތެދުވެ ބައިސްކަލު ނެގުމުގެ މަސައްކަތް ކުރަމުން ދިޔަ އީމާ ބިންމަތީގައި ފާޑަކަށް ހެވިފައި އިން ނައިއަލްއަށް ބަލައިލާފައި ލޯ އަޅާލިއެވެ.

“ކޯއްޗެއް ތި ބަލަނީ؟ ރީތި ޓީޝާރޓު ޚަރާބު ވީކަން ނަސީބެއްނު. ތިހާ ހަޑި މީހުން ލާންޖެހޭނީ ހަޑި އެއްޗިއްސޭ.” އެއްމިޔަކުން ހީލާފައި އީމާ ބުންޏެވެ.

“ކަލޭ މާ ރީތީތަ؟ ގަޔަށްވުރެ ބޯ މާ ކުޑަ.” ނައިއަލް ހޭންފެށިއެވެ. އީމާ ކަޅި އަނބުރާލިއެވެ.

“ހޮސްޕިޓަލަކަށްނު ދާންވީ.” ނައިއަލްގެ މޫނަށް ނުބަލަން މަސަތްކަތް ކުރަމުން އީމާ ބުންޏެވެ. ހިތުގައި ހަޤީޤަތުގައިވެސް ރަޙްމު އުފެދުނީ ކަންނޭންގެއެވެ. ނުވަތަ އޭނާ މަަސަތްކަތް ކުރީ ހަނގުރާމައެއް ނުފަށައި މަޞްލަޙަތު ހިމާޔަށް ކުރަންށެވެ.

“ހައްހައް ބަލި ޤަބޫލުކުރީ ދޯ.” ތެދުވެ، ޕެޑަލް ބިނދިފައި އޮތް އޭނާގެ ބައިސްކަލު ކޮޅަށް ނަގަން ނައިއަލްއަށް ހިސާބަކަށް ދަތިވިއެވެ. މުޅި ކަނާއަތަށް އިނގިލީގެ ތަދު ފެތުރެމުންދިޔައެވެ. ބައިސްކަލު ދަމަމުން ހިނގައިގަތް ނައިއަލްއާއި އެއްފަދައިން އީމާވެސް އެކުގައި އައުމުން ނައިއަލްއަށް ހީލެވުނެވެ. އީމާގެ ބައިސްކަލު ހުރީ ސަލާމަތުންނެވެ. ނަމަވެސް އޭނާ އިޚްތިޔާރުކުރީ ނައިއަލްއާއި އެއް ހަމައެއްގައި ހިނގުމަށެވެ.

“ހާދަ ހެވޭ ދޯ މިހާރު. ދެންމެ ހީވީ ރޮލާ ކާލަފާނެހެން.” ހިތާހިތުން ނައިއަލްއަށް ބުނެވުނެވެ.

ފިނިކަމުގެ ތެރޭ ދެ ޒުވާނުން ހޮސްޕިޓަލާއި ދިމާލަށް މިސްރާބުޖެހީ ހިތްހަމަނުޖެހިފައި ތިބެ ނަމަވެސް މާޙައުލުގެ ނަލަކަމަށް ތަޢުރީފުކުރާ ހާލުގައެވެ. އެއްވެސް މީހެއްގެ ހިލަމެއް ނުވާކަމުން ކުރެވުނީ ތަފާތު އިޙްސާސެކެވެ. އެހެނަސް ހާލަތު ބަދަލުވެގެން ދިޔައީ ކުޑަ ހިނދުކޮޅެއް ތެރޭގައެވެ. ހަލުވިމިނުގައި ދުއްވާފައި އައި ލޮރީގައި އިން ޑްރައިވަރު ހީވާގޮތުން ދިޔައީ ދެކަމުހާޖަތަށް ދާންޖެހިގެން ކެތްނުވެގެންނެވެ. ނައިއަލްއާއި ދިމާލަށް އެ ލޮރީ އައީ ހިފެހެއްޓުމެއް ނެތިއެވެ. ނިކަން ހަމަޖެހިފައި ހުރެ ދިޔަ ނަމަވެސް މަގުމައްޗަށް އީމާ ދިން ސަމާލުކަން ކުޑައެއް ނޫނެވެ. ލިބުނު ކުޑަ ވަގުތުކޮޅުގައި އޭނާއަށް ނައިއަލްގެ އުޅަނބޮށީގައި ހިފައި ދަމައިގަނެވުނެވެ. ނައިއަލްގެ ފައި ބިމުން ކެޓުމުން ގޮސް ޖެހިގަނެވުނީ އީމާ ގައިގައެވެ. ނަތީޖާއެއްގެ ގޮތުން، އޭނާގެ ބަރުމިނަށް އުއްޑުން ވެއްޓުނު އީމާއާއިއެކީ ނައިއަލްވެސް ވެއްޓުނެވެ. ލޮރީ އޭގެ ބާރުމިނުގައި ނައިއަލްމެން ފަހަނަޅައި ދުއްވާފައި ދިޔައިރު އެ ދެ ޒުވާނުން މަގުގެ އެއް ފަޅިއެއްގައި ގުޅައަކަށް ޖެހިފައި ތިއްބެވެ. ވެއްޓުނު ވަގުތު އީމާގެ ބޯ ބިންމަތީގައި ބާރަށް ޖެހިދާނެތީ އެ ދެމެދަށް ނައިއަލްއަށް ހުރަސްކޮށްލެވިފައިވީ އޭނާގެ ޒަަޚަމުވެފައި އޮތް އަތެވެ. އީމާގެ ބޮލާއި ބިމާލައި ބިނދިފައި އޮތް އިނގިލި ފިތުމާއިއެކު އަރައިގަތް ތަދުން ބޭއިޚްތިޔާރުގައި ނައިއަލްއަށް އަތް ދަމައިގަނެވުނެވެ. ބަންލާފައި ދުވާރުމަތީ ބޯ ޖެހުމުން އީމާ ދިޔައީ ބުރާންތި އަރައިގެންނެވެ.

“އައްދޯތް! ކަލޭ ސަލާމަތްކުރަން ހަދައިގެން މަ މިޖެހެނީ ހަށިގަނޑުގެ ނާރުތަކާ މަހާ ކައްޓާ މުގުރައިގެން ފަނި ގިރަން ވިއްޔަ.” ނައިއަލްގެ ގައިދަށުވެފައި އޮތް އީމާ އޭނާ ކޮށްޕާލާފައި ދެފައިމައްޗައް ތެދުވިއެވެ. އެ ސޮރު ސަލާމަތްކުރެވުނު މޮޔަ ހިތަށްއެރިއެވެ. ބުނާނެ އެއްޗެއް ދުލާއި ހިސާބަށް ނުފޯރުމުން ކޮޅަށް ތެދުވެ ބޯ ކެހުން ނޫންކަމެއް ނައިއަލްއަކަށް ނުކުރެވުނެވެ. އިނގިލީގެ ތަދުވެސް ވީ ހައްތަހާ ބޮޑުވިއްޔާއެވެ. ހޮސްޕިޓަލާއި ހަމައަށް ފޯރަންވާއިރަށް ދެވަނަ ފަހަރަށް އެ އިނގިލީގެ ބޭނުން ނުކުރެވޭ ވަރު ނުވެއްޖެއްޔާ ކިތަންމެހާވެސް ރަނގަޅެވެ.

ދެވަނަ ސިކުންތުގައި ނައިއަލްގެ ލޮލުގައި އަޅައިގަތީ ބިމުގައި އޮޅުލައިގަނެގެން ތިިބި ދެ ބައިސްކަލެވެ. އެ މަންޒަރުން ދައްކުވައިދިނީ ނައިއަލްއާއި އީމާއަށް ލިބޭ ކޮންމެ ދެރައަކީ އެ އެއްޗިހީގެ ލޯބީގެ ގުލްޝަނުގައި އިތުރު މާތަކެއް ފޮޅުވަން ލިބޭ ފުރުޞަތެއްކަމެވެ. ބައިސްކަލުތަކާއި ދިމާލަށް ނައިއަލް ބަލަހައްޓައިގެން ހުރި ގޮތުން އީމާއަށްވެސް ބަލައިލަން މަޖުބޫރުވިއެވެ.

“މާ ރީތި އެއްޗެެއް ފެންނަނީތަ؟” ދެލޯ ކުޑަކޮށްލާފައި ވައިއަޑުން އޭނާއަށް ބުނެވުނެވެ. ފުޅާ ހިނިތުންވުމަކާއެކު ލާނެއް ގޮތަކަށް ނައިއަލް ދެބުމަ އެއްފަހަރާ އަރުވަމުން ގެންދިޔައެވެ.

“މަގުމަތީ ޕަބްލިކްގަ އެހެން އުޅޭކަށް ނުވާނެއެއްނު ދެން ބައިސްކަލުތަކަކަސް ދޯ.” އަމިއްލަޔަށް މަޖާވެގަނެގެން ނައިއަލް ބުނެލިއެވެ.

“ހޫން…..ޗީޑި.” ނައިއަލްގެ ސިކުނޑިތެރޭ ދައުރުވި ވިސްނުން ރޭކާލުމުން އީމާއަށް މަޖާވިނަމަވެސް ވައްތަރެއް ޖައްސައިލީ ނައިއަލްއާއި އެއްގަލަށް ނާރަންށެވެ.

ޓްރީޓޮޕް ހޮސްޕިޓަލުގެ އެމެޖެންސީ ރޫމްގައި ނައިއަލްގެ އަތަށް ފަރުވާ ދެވެމުން ދިޔައިރު އޭނާގެ މޫނަށް ޖައްސަމުންދިޔަ ވައްތަރުތަށް ބަލަން އީމާ ހުރީ ފާރުގައި ލެނގިގެންނެވެ. ހުނުން މަތަކުރަން މަސަތްކަތް ކުރި ނަމަވެސް އަނގަމަތީ އަތްއަޅަން ޖެހޭ ފަހަރުތަށް މަދެއްނޫނެވެ. އަތަށް ބަލަން އިން ނައިއަލް އިސްއުފުލާފައި އީމާއަށް ބަލައިލިއެެވެ. އީމާގެ ހިނިގަނޑު ފެނި ފޫހިގޮތަކަށް ތުން އަނބުރައިލީ، ކަލެޔާހެދި ވާ ކަންތަކޭ ބުނަމުންނެވެ. ދާދި ދެންމެއަކު ދިމާވި ފިރިހެން ކުއްޖާގެ ފައިން ފެށިގެން ބޮލަށް އީމާ ނަޒަރުހިންގާލިއެވެ. އެއީ ދޮން މޫނަކާއި، ދަލުގެ ސަބަބުން ނިއްކުރީގައި ތަތްލަވާފައިވާ މުށިކުލައިގެ ފަން އިސްތަށިގަނޑެއްގެ ވެރިއެކެވެ. މޫނުމަތިން ޅަ ވައްތަރެއް ޖެހިނަމަވެސް ހަށިގަނޑުން ފިރިހެންވަންތަކަން ހާމަކޮށްދެެއެވެ.

“ކޮންމެސް ތާކުން ފެނުން…” މާޒީގެ ތެރެއަށް ފީނަން މަސަތްކަތް ކުރަމުން އީމާ އޭނާގެ ދެލޯ މަރައި ތަގުޅިކޮށްލިއެވެ. ނަމަވެސް ސިކުނޑިއަށް އެއްވެސް އެއްޗެއް އަންނަގޮތެއް ނުވިއެވެ.

ކައުންޓަރު ކައިރީ ހުއްޓިލަމުން ނައިއަލް އޭނާގެ ޖީބުން އައިޑީކާޑު ނަގައި ރިސެޕްޝަނިސްޓާއި ހަވާލުކޮށްލިއެވެ. ފަރުވާއަށް އެރި އަގު ދެމީހުންގެ ކަންފަތުގައިވެސް ގުގުމާލީ ހޮނު ގުގުރިއެއް ފަދައިންނެވެ. ދެލޯ ބޮޑުކޮށްލާފައި ދެ ޒުވާނުން ނަޒަރު ބައްދަލުކޮށްލިއިރު އެއީ ފިލްމީކަމުގެ ދެވަނައެއް ނެތް ފައްކާ މިސާލެކެވެ. ވަކިލާރިންނާއި ރިސިޕްޓްކޮޅުތަކުން ފުރިފައިވީ ވޮލެޓް ފޭކޮށްލާފައި ނައިއަލް އީމާއަށް ދައްކައިލުމުން، ދަތްކުނޑިވިކާލާފައި އީމާ އޭނާގެ ޖީބުން ކޭޝްކާޑު ނަގައި ކައުންޓަރުމަތީ ބާއްވާލިއެވެ.

“އަމިއްލަޔަށް ފޭހުނު އިލޮށީގެ ކޮޅު އެ ވަނީ ލޮލުގެ ކޮޅަށް ދޯ އެހެންވީމަ.” ބޯ ޖަހާލާފައި ދުރު ބަލަން މަސަތްކަތް ކުރަމުން ނައިއަލް ބުނެލީ އީމާގެ މޫނުމަތީ ކުލަވަރު ފެނި ބިރުން ހިތް ހުއްޓިދާނެތީއެވެ. ފުސްމޫނު ހަދައިގެން ހުރެ ނަމަވެސް ނައިއަލްގެ އަތަށް އަރައި ޗިސްކުރުމުން ހައްތަހާ ބޮޑުވަރުވިކަން އީމާއަށް ޤަބޫލުކުރެވި މާފަށް އެދުމުގެ ގޮތުން ބޭސްކުރުމުގެ އަގުދެއްކީއެވެ.

“ކިޔަން ނޭނގޭއިރު ނުކިޔަބަލަ.” ރުޅިގަނޑު ކޮންޓްރޯލް ކުރަމުން އީމާ ތުންފިއްތާލިއެވެ.

“ފަހުން ހާފް އަނބުރާ ދޭނަން… ދީ ފޯނު ނަންބަރު.” ދުރު ބަލަހައްޓައިގެން ހުރެ ނައިއަލް މަޑުމަޑުން ބުނެލި އެތިން އީމާއަށް އޭނާއާއި ދިމާއަށް ބަލައިލެވުނެވެ. ރުފިޔާކޮޅެއް އަތަށް އެރުމުން ބިލުގެ ދެބައިކުޅަ އެއްބައި އަދަދު ނަމަވެސް އީމާއަށް އަނބުރައި ދައްކަން ނައިއަލް ނިންމީ އެކްސިޑެންޓުވުމުގެ ބޮޑުބައި މައްސަލަ އޮތީ ތިމާއަށްކަން ހިތުގެ ކަނެއްގައި އިޢުތިރާފްވެވިފައި އޮތުމުންނެވެ.

“ހާދަ ޑަމީކޮށް ނަންބަރު ހޯދާލަނީ ތި.” ހެވިފައި ހުރެ އީމާ ކިޔައިލިއެވެ. އީމާ ހިނިތުންވިތަން ފެނިފައި ނައިއަލްގެ ތުންފަތުގައިވެސް ރަކި ހިނިތުންވުމެއް ދުވެލިއެވެ.

އާފުރިލާފައި ހަށިގަނޑު ދަމަމުން، އަރަމުންދިޔަ ތަދުތަކުގެ ވޭނީ އަޑު އަނގައިން ބޭރުކުރަމުން ނައިއަލް ދުރަށް ހިނގައިގަތެވެ. ރިސިޕްޓްކޮޅާއި ކޭޝްކާޑާއިއެކު ނައިއަލްގެ އައިޑީކާޑު ދިއްކޮށްލި ރިސްޕްޝަނިސްޓް ހިނިތުންވެލިއެވެ. މި މުސީބާތުން ފުރިގެންވާ ސޮރު ގެޔަށް ގެންދަންޖެހޭނީވެސް މަށަށްބާއޭ ހިތާހިތުން ގޮވަމުން އީމާ ރިސިޕްޓްކޮޅު ފަހަތުގައި ނައިއަލްއަށް ދޭން އަމިއްލަ ނަންބަރު ލިޔެލި ވަގުތު އަތުގައި އޮތް އައިޑީކާޑަށް އަވަސް ނަޒަރެއް ދެވުނެވެ.

“ނައިއަލް…” އީމާގެ ލޮލުގައި އަޅައިގަތީ ހަމައެކަނި އޭގައި ޖަހާފައި އިން ނަމެވެ. އޭނާގެ ދެލޯ ބޮޑުވިއެވެ. “އޯ މައި ގޯޑް… އެއީ އޭނަ ދޯ… އޯއެމްޖީ.” ދެލޯ ބޮޑުވެ، ނޭވާ ހިފަހައްޓާލައިގެން ހުރެފައި އީމާއަށް ދުއްވައިގަނެވުނީ ނައިއަލްއާއި ދިމާލަށެވެ. އޭނާގެ މޫނުމަތިން ފެނުނީ ރުޅިގަދަކަންކަމެއް، ހިތާމަވެރިކަންކަމެއް، ނުވަތަ އުފާވެރިކަންކަމެއް ސާފެއް ނުވިއެވެ. ދުވެފައި ދިޔަ ބާރުމިނުގައި އީމާ ގޮސް ފުންމައިގެން އެރީ ނައިއަލްގެ ބުރަކަށްޓަށެވެ.

(ނުނިމޭ)