ބުނެދޭށޭ ރުހެމޭ 71

އެވަގުތު ބޭރު ތަޅުގައި ހިފާލި އަޑު އިވުމާއިއެކު އަޒްހާން ދޮރާއި ދުރަށްޖެހިލިއެވެ. އެ މޫނުމަތިން ކަނިނުވާ އުއްމީދެއް ފެނުނުއިރު ކުރިއަށްވުރެ ބާރަށް ދޮރުގައި ތަޅައިގަތީ ބޭރުގައި ހުރި މީހެއްގެ ކަންފަތަށްވެސް އުނދަގޫވާވަރަށެވެ. ތޫލި އަޑާއިއެކު ދޮރުހުޅުވިގެންދިޔައެވެ. ހައިލާއަށް ނަޒަރެއްދެމުން އަޒްހާން ކުރިއަށް ފިޔަވަޅެއްއަޅާލިއެވެ. އެއާއިއެކު ފެނުނު މަންޒަރަކުން ހައިލާއަށް ހަޅޭލަވައިގަނެވުނެވެ. ދޮރުގެ ދޭތެރެއިން ވަތް ކޮޅު ހިމަ ވަޅި އަޒްހާންގެ ބަނޑަށް ވަދެގެން ދިޔައީ އޭނަ ބަލަބަލަ ހުއްޓައެވެ. އޭރު އަޒްހާން ހުރީ އަމިއްލަ ދިފާއުގައި ހަރަކާތެއްވެސް ނުގެނެސް ބުުދެއްފަދައިންނެވެ. އޭނަގެ ނަޒަރު ހަމަވެފައިވީ ދޮރުގެ ދޭތެެރެއިން ފެންނަމުންދިޔަ ކަޅުކަންގަދަ ކަޅިއަށެވެ. ލޮލުގެ އެއްފަރާތުން ދުރަށް ފާޅުވަމުންދިޔަ ލޭކުލައިން އޭނައަށް ހިތި ހަޤީގަތެެއް އަންގައިދިނީއެވެ.

“ދޮންބޭ….” ވައި އަޑަކުން އަޒްހާންއަށް ބުނެލެވުނުއިރު އެލޮލުގައި ވިދަމުންދިޔަ ކަރުނަތައް ހުރަހަކާއި ނުލައި ތިރިއަށް ދެމިގަތެވެ. ގަމީހުން ތެމެމުންދިޔަ ތަނުގައި އަތްޖައްސާލެވުނުއިރު ދޮރުގައި ހިފަހައްޓާލެވިފައިވާ އަތްދޫވިއެވެ. ބަނޑާއިދިމާލުން އަތަށް ވާންކޮށްލެވުނުއިރު އިސްއުފުލާ ދޮރުގެ ދޭތެރެއިން ފެންނަމުންދިޔަ ސޫރައަށް ބަލާލިއެވެ. އޭރު ތުންފަތުގައި ދަތްއަޅަމުން ވޭނަށް ކެތްކުރަމުންދާކަމުގެ ކުލަވަރު އެ މޫނުން ފެންނަމުންދިޔައެވެ.

މުއްގަނޑަށް ބާރުވަމުންއައިސް ކުއްލި ޖަހާފައި ބަނޑަށް ޖަހާފައިވާ ވަޅި ދަމައިގަތުމާއިއެކު އަޒްހާންގެ   ކަޅިމައްޗަށް އެރިއެވެ. އަނގައިން ބޭރުވި ވޭނީ އާހްއާއިއެކު ހަށިގަނޑުގެ ބާރު ނެތް މީހެއްފަދައިން ފަހަތަށް ވެއްޓެންދިޔައިރު ދޮރުފަތުގައި ހިފަހައްޓަން އަޒްހާންގެ އަތް ހަރަކާތްކުރިއެވެ. ނަމަވެސް ދޮރުފަތުގައި ހިފާލައިފައިވެސް ދޫވެގެންގޮސް ބާރު އަޑުފަށްގަނޑާއިއެކު އަޒްހާންގެ ހަށިގަނޑު ތަޅުންމަތީ ޖެހުނެވެ. އެ މަންޒަރު ބަލަން ގާވެފައި ހުރެފައިވެސް ހައިލާ އަޑުގެ ކޮޅަށް ހަޅޭލަަވައިގަތެވެ.

“އަޒްހާން…” ހައިލާގެ ބާރު ހަޅޭކުގެ އަޑު އެ ގުދަނުގެ ތެރޭ އެކޯވެގެންދިޔައިރު ޒެލްވެސް ސިހިފައި ރޮއެގަތެވެ.

“ޑޭޑީ… ޑެޑީ…” ބިރާއި ސިހުމާއިއެކުވެގެން ޒެލް ބާރުބާރަށް ރޮއެގަތެވެ. އޭރު ލޮލުގައިވީ ޖެހިލުންވުމާއި ބިރެވެ. ލޯމަތިން ފެނުނު އަނިޔާވެރި މަންޒަރުން އެ ކުޑަ ހިތް ސިއްސުވާލައިފައިވެއެވެ.

*** *** *** *** *** ***

“ބައްޕާ… ނޫން… ބައްޕާ…” ނިދީގައި އޮވެ ދެފަރާތަށް ބޯހޫރަމުން ހައިޒަލް ހަޅޭލަމުންދިޔައިރު ދެތުންފަތުގެ ދޭތެރެއިން މަޑު ގިސްލުމެއްގެ އަޑު ބޭރުވަމުންދިޔައެވެ. ތަގުޅިކޮށް ބާރުކޮށްލެވިފައިވާ އެސްފިޔަތަކުން ލާފައި ކޯމައްޗަށް ފައިބަމުންދިޔަ ކަރުނަތައް ކޯތާފަތްމަތިން ލާފައި ކަންފަތުގެ ވޮށީގެ ތެރެއަށް ހިނދެމުންދިޔައެވެ. ނޭވާހޮޅިއަށް އެޅެމުންދިޔަ މީހެއްފަދައިން ނޭވާތައް ފުންވަމުންދިޔައެވެ.

ނިދިމޫނަކާއިއެކު ފާހަނައިން ނިކުމެގެން އައި ޝަލީންގެ ކަންފަތުގައި ޖެހުނު އަޑާއިއެކު ލޮލާއި ނިދި ދުރުވެގެންދާކަށް މިނެޓްކޮޅެއްވެސް ނުނެގިއެވެ. އޭނަގެ ހިތުގައި ހިނގައިގަތް ޝައްކާއިއެކު ހަށިގަނޑަށް ހަރަކާތެއްވެސް ނުގެނެސް ޝަލީންއަށް ބަލާލެވުނީ ހައިޒަލް އޮތް ސޯފާއާއި ދިމާލަށެވެ. ނިދީގައި އޮވެ ހައިޒަލް ވާހަކަދައްކަމުންދިޔަތަން ފެނި ޝަލީންގެ މޫނުން ފެނުނު ހާސްކަމާއިއެކު ހަލުވި ފިޔަވަޅުތަކެއްގައި ގޮސް އެނދާއި ކައިރިވިއެވެ. ރޫމްގެ ބޭރުގައި ގާރޑްކުރަން ނައިނާ ހުންނާނެކަން އިނގޭތީ އޭނަ އަވަސްވެގަތީ ނައިނާއަށް ގުޅާށެވެ.

“ނައި ވަރަށް އަވަހަށް ރޫމްއަށް އާދެބަލަ… ހައިއަށް ކަމެއް އެބަވޭ…” ނައިނާ ފޯނު ނެގުމާއިއެކު ޝަލީން އެޖުމްލައިން އޭނަ ބުނަން ބޭނުންވާވާހަކަ ބުނުމަށްފަހު ފޯނު ކަނޑާލިގޮތަށް އެނދުމައްޗަށް ވާކަހަލަގޮތަށް ފޯނު އެއްލާލިއެވެ. އޭނައަށް ހަަރަކާތްތެރިވެވޭ އެންމެ ބާރުމިނުގައި ޝަލީން ގޮސް ހައިޒަލްއާއި ގާތްވިއެވެ.

ހައިޒަލްގެ އަތުގައި ހިފާލިއިރު އެ ހަށިގަނޑު ފިނިވަމުންދިޔަގޮތުން ޝަލީންގެ މޫނުމަތިން ހާސްކަންފެނިލިއެވެ. ނިދީގައި ހައިޒަލްއަށް ކުރިމަތިވާ އުނދަގޫތަކަކީ އާންމުކަމަކަށްވިޔަސް މިފަހަރު ހާލަތު ތަފާތުކަން ޝަލީން ވަގުތުން ނަގައިގަތެވެ. ހައިޒަލްގެ ނަމުން އެތަށްފަހަރުގޮވާ ގައިގައި ހިފައި ތެޅުވިއިރުވެސް ހައިޒަލްގެ ފަރާތުން ބަދަލެއްނުފެނުމުން ޝަލީންގެ ހާސްކަން އިތުރުވިއެވެ.

“ހައި…” ޝަލީން ތަދުނުވާނެހެން ހައިޒަލްގެ ކޯތާފަތުގައި ޖަހާލިއެވެ. އެވަގުތު ރޫމްގެ ދޮރުހުޅުވާލައިފައި ނައިނާ ވަނުމާއިއެކު ޝަލީން ނައިނާއަށް ތަންދެމުން ދުރަށް ޖެހިލިއެވެ. ކައިރިއަށް އަޅާލި ފިޔަވަޅާއިއެކު ނައިނާ ހައިޒަލްގެ ދެކޮނޑުގައި ހިފިގޮތަށް ތަޅުވައިގަތެވެ. ދެތިން ފަހަރަކު އެގޮތަށް ތަކުރާރުކުރިތަނާ ނޭވާހާސްވެގެން މީހާ ތެޅިގަންނަ ފަދައިން ހައިޒަލް ތެޅިގަނެފައި މަޑުމަޑުން ދެލޯހުޅުވާލިއެވެ. އިރުކޮޅެއްވަންދެން ވާނުވާނޭނގޭމހެއްފަދައިން ވަށައިގެން ނަޒަރު ހިންގަން އޮވެފައި ހައިޒަލް ތެދުވެ ނައިނާގެ ތުނި ހަށިގަނޑުގައި ހިފައިގަތެވެ. ނައިނާގެ ބަނޑާއި ހަމާލުގައި މޫނު ޖައްސާލިގޮތަށް މަޑުމަޑުން ހަށިގަނޑު ތިރިވަމުންގޮސް އެއުނގުތެރޭ މޫނު ފޮރުވާލިއެވެ. އޭރު ނައިނާގެ އުނަގަނޑުގައި ވަށާލެވިފައިވާ ދެއަތަށް ބާރުވަމުންއައިރު ހައިޒަލް ރޮނީކަން ދެނެގަންނާކަށް ނައިނާއަކަށް އުނދަގުލެއްނުވިއެވެ. މަޑުމަޑުން ނައިނާގެ ގަމީސްކޮޅު ތެމެންފެށިއިރު ހައިޒަލް ދެތިން ފަހަރަކު ނޭފަތްދަމާލި އަޑުއިވުނެވެ.

އެމަންޒަރުދެކެން ހުރެފައި ޝަލީން ދުރަށް ޖެހެމުން ފަސްދިނެވެ. އޭރު އަދި މަޔާންވެސް ރޫމްގެ ދޮރުހުޅުވާލަމުން އެތެރެއަށް ވަނީއެވެ. ދަންވަރުގެ އެވަގުތުވެސް އޭނަ ހުރީ ނުހަނު ރަސްމީކޮށެވެ. މަޔާންގެ މޫނުމަތީން ފާޅުވަމުންދިޔަ ހާސްކަމުގެ ކުލަތަކާއިއެކު ޝަލީންއަކީ ހުރިމީހެއްކަމަށްވެސް ހަދާނުލާ ސޯފާއާއި ދިމާލަށް ފިޔަވަޅުތައް ނަގަންފެށިއެވެ. އެއާއިއެކު ޝަލީން މަޔާންއާއި ގާތަށް ޖެހިލައި އެއަތުގައި ހިފަހައްޓަމުން މަޔާންގެ ފިޔަވަޅުތަކަށް ހުރަސްއެޅިއެވެ. ދެޒުވާނުންގެ ނަޒަރު ހަމަވިވަގުތުކޮޅު ޝަލީން ދެފަރާތަކަށް ބޯހޫރާލިގޮތުން ޝަލީން ބުނަން އުޅުނު އެއްޗެއް މަޔާންއަށް ނަގައިގަނެވުނުފަދައެވެ. ފަހަތަށް ފިޔަވަޅެއް އަޅާލިގޮތަށް މަޔާން ރޫމްއިން ބޭރަށް ނިކުތެވެ.

*** *** *** *** *** ***

ދަންވަރުގެ އެވަގުތު ފަޒާއޮތީ ނުހަނު ފިނިކޮށެވެ. ތަރިތައްވެސް ފޫހިކަމެއް ނެތި ބައިބަޔަށް ބެހިލައިގެން އުޑުގައި ފިޔަޖަހާލަޖަހާލަ ތިއްބެވެ. ވިއްސާރައިގެ އަސަރެއްނެތަސް ކަޅުވިލާގަނޑެއް ހިޔަންޏެއްފަދައިން އުޑަށް ނިވާއަޅާފައިއޮތެވެ. ހަނދުވެސް ވިލާކޮޅުގެ ތެރެއަށް ވަންނަމުން ފެނިގެއްލެމުންދިޔައެވެ.

ހައިޒަލްއަށް ފެނުނު ހުވަފެނުގެ ވާހަކައާއި ގުޅުވައިގެން މަޔާން ވާހަކަދައްކަމުންދިޔައިރު ހައިޒަލްގެ ހަށިގަނޑަށް ބާރުގަނޑެއް އަރަމުންދިޔައެވެ. ރެއިލިންގައި ވިއްދާލެވިފައިވާ ދެއަތަށް ބާރުވެ ކަތުރުކަށިގަނޑަށް ވާންވީއެވެ. ދަތްތައް ކޭރުވުނެވެ. ނޭވާތަކުގެ އަޑުބާރުވަމުން އެެތެރެހަށީގައި އުފެދެމުންދާ ހައިޖާނުގެ ނުރައްކާތެރިކަން އަންގައިދެމުންދާފަދައެވެ.

“ދެން އިތުރަކަށް ކެތެއްްނުވާނެ… މިދެއަތުން އެނުބައި މީހުން މަރާލައިގެން ނޫނީ ދެން ހަމަޖެހުމެއްނުލިބޭނެ… އެމީހުން އަަހަރެންގެ ބައްޕަ މަރާލީ އެ މަންޒަރު ފެނުނު މީހެއްގެ ހިތުން ފިލައިގެންނުދާނެހާ އަނިޔާވެރިކޮށް… ބައްޕަގެ ކުށަކީ ކޮބާ؟” ހައިޒަލްގެ ލޮލަށް އޭނަގެ ބާރަކާއިނުލާ ކަރުނަތައް އެއްވަމުންދިޔައިރު އެ ކަރުނަތަކަށް ނިމުމެއް ގެންނަން ބޭނުންވެފައިހުރެ ދެތިން ފަހަރަކު ނޭފަތް އެތެރެއަށް ދަމާލިއެވެ. ލޮލުގައި އިނގިލި ޖައްސާލިއެވެ.

“ޔާން… ވީހާވެސް އަވަހަށް އެމީހުންނަށް ހައްޤު އަދަބުދީ… ޤާތިލުން މިނިވަންކަމާއިއެކު ނޭވާލާ ކޮންމެ ދުވަހަކީ ބައްޕައަށް ވެވޭ ބޭއިންސާފެއް…. މިހާރުން މިހާރަށް އަދަބުދޭން ބޭނުމީ…” ހައިޒަލް މަޔާންއާއި ހަތަރުކަޅި ހަމަކޮށްލަމުން ސާބިތުކަމާއިއެކު ބުނެލިއެވެ. އެއަޑުގައިވީ އަސަރު އެލޮލުގައިވީ ކުލަވަރުން ވެސް އެއީ ޖަޒުބާތުުގައި ޖެހިގެން ހައިޒަލް ނިންމި ނިމުމެއްނޫންކަން ސާބިތުކޮށްދިނެވެ. މިހާތަނަށް އޭނަ ނިންމައިގެން ހުރީ ހުރިހާދިމާލަކުން މަޅިގަނޑު ވާންކުރުމަށްފަހު ކުށްވެރީން މަޅީގައި ޖައްސާށެވެ. ނަމަވެސް މިނިވަންކަމުގައި މިދުނިޔެތެރެއަށް ނޭވާލާން ކުށްވެރިންނަށް އެންމެ ދުވަހެއްވެސް ހައްޤެއްނުވެއެވެ. ޤާތިލުންނަކީ އެއަށްވުރެ ބޮޑެތި މުޖުރިމުންތަކެކެވެ. އެމީހުންގެ ފުރާނަދަމައިގަތަސް އަޒްހާންގެ މަރުގެ ބަދަލެއްނުދެވޭނެއެވެ.

*** *** *** *** *** ***

މަޔާން ފުދޭވަރަކަށް ލަސްވާންދެން އޮފީހުގައި އުޅެފައި އައިސް އެއްޗެހި ބަދަލުކޮށްލުމެއްނެތި ޔަޒްދާންގެ ކޮޓަރިތެރެއަށް ވަދެލިއެވެ. ތަރުތީބުކަމުން ދެވަނައެއްނުވާހާ ކޮޓަރިތެރެ މިވަގުތު އޮތީ ފަޅުކޮށެވެ. ސޯފާގެ އަތްގަނޑުމަތީ އޮތް ކޯޓާއިއެކު ފާހަނައިން އިވެމުންދާ ފެނުގެ އަޑުން ޔަޒްދާން ފާހަނައިގައި އުޅެނީކަން މަޔާން ނަގައިގަތެވެ.

ޔަޒްދާން ނިކުންނާނޭ އިރެއްގެ އިންތިޒާރުގައި ކޮޓަރީގެ ދެކޮޅަށް ހިނގަ ހިނގައި ހުރެފައި މަޔާން ރެކުން ފޮޓޯ ފްރޭމްއެއް ނެގިއެވެ. އެއްއުމުރުގެ ދެފިރިހެންކުދިން ކައިރިއަށް ލައިގެން އަށްއަހަރުގެ ޔަޒްދާން ނުހަނު ބޮޑަށް ހެވިފައިހުރި ފޮޓޯއެކެވެ. ޔަޒްދާންގެ ދެފަރާތުން ތިބި ދެކުދިންގެ ތެރެއިން އެކަކީ އޭނައެވެ. ދެން ހުރީ ޒެލްއެވެ. ބައްޕަ ބުނުއްވާ އޭނަގެ ކުޑައިރުގެ އެކުވެރިޔާއެވެ. އެކަމަކު އެހާގާތް އެކުވެރިއެއްގެ ހަނދާން އޭނަ ނުހުންނަނީ ކީއްވެބާވައެވެ؟ އެހެންނޫނަސް ޒެލް މިހާރު ކޮބައިބާވައެވެ.

“ހޭ ލިޓިލް ބްރޯ… ހުއްދަ ނުހޯދާ ވަދެގެން ހާދަ ވަރަކަށް ހާވާލަނީ…” ޔަޒްދާން ވާހަކަދެއްކިއަޑަށް މަޔާން ފޮޓޯ ފްރޭމް ތިރިކޮށްލަމުން ބަލާލިއެެވެ. ޔަޒްދާން ފާހަނައިން ނިކުމެގެން އައީ ޖީންސްގެ ގޮށްތައް އަޅުވަމުންނެވެ. ކޮނޑުމަތީގައި ތުވާލިއޮތްއިރު ތެތްކޮށް އޮތް އިސްތަށިގަނޑުން ފައިބަމުން ދިޔަ ފެންތިކިތައް ތުވާލި ތެރެއަށް ވަންނަމުންދިޔައެވެ. ކިތަންމެ ސާދާކޮށް ހުއްޓަސް މޮޑެލްއެއްފަދައެވެ. އެ ބައިމަތި ފުޅާ ހަށިގަނޑާއި ސިކްސްޕެކްސް އިސްތިހާރުކޮށްލައިގެން ހުރިއިރު މޮޔަނުވާނޭ އަންހެންކުއްޖަކު ނުވާނެއެވެ. ދެތިންދުވަހުގެ ތުނބުޅިއާއިއެކު ވަކީން ފިރިހެންވަންތައެވެ.

ދިގު އިސްކޮޅާއި އެންމެ ގުޅޭ ބައިމަތި ފުޅާ ހަށިގަނޑުގެ ސަބަބުން ކޮލެޖްދައުރުން ފެށިގެންވެސް އަންހެންކުދިންގެ މެދުގައި ޔަޒްދާން ނުހަނު މަޤްބޫލެވެ. ހުރިހާ އަންހެންކުދީން މަށަަށް މަށަށް ކިޔާލަ ކިޔާލަ ތިއްބަސް އެ ހިތާއި ކުޅެލެވުނީ އެންމެ އަންހެންކުއްޖަކަށެވެ. ޝާދީންއާއި އޭނަ ދުރަށް ދިޔައީ އަމިއްލަ ހިތުގެ ދޮރު ތަޅުލުމަށްފަހުއެވެ. އެހެން އަންހެންކުއްޖަަކަށް ދުވަހަކު ހިތުން ޖާގައެއް މިލްކުނުކުރެވޭނޭ ފަދައިންނެވެ. އެއީ އޭނަގެ އެންމެ ގާތް އެކުވެރިޔާ އަދި ކޮއްކޮއަށްވެސް ސިއްރުވެފައިވާ ސޮފްހާތަކެކެވެ.

“ތުއްތު… މިފޮޓޯގައި މިހިރަ ބޯއީ ޒެލް ދަންނަންތަ…” މަޔާން ކޮށްލި ޒުވާނުން ޔަޒްދާންއަށް ހިސާބެއްގެ ހައިރާންކަމެއްލިބުނީ އެހާދުވަސްފަހުން މަޔާންގެ ދުލުން އެނަން ކިޔާލި އަޑުއިވުނެވެ.

“ޒެލް… ޒެލްއަކީ ބައްޕަގެ ތިންވަނަ ދަރިފުޅު… ޔާންގެ ބެސްޓީ… މައި ސެކަންޑް ބްރަދަރ…” ޔަޒްދާންގެ ދުލުން ބޭރުވި ކޮންމެ ޖުމްލައަކުން އަންގައިދިނީ ޒެލްއާއި އެ އާއިލާއާއި އޮތް ގުޅުމެވެ. ޔަޒްދާންއަށް ޒެލް ހާއްސަވަރެވެ.

“ޒެލްއޭ ބުނީމަ ކޮންމެވެސް ހަނދާންތަކެއް ސިކުނޑީގައި ކޮއްޓާލާ… ޒެލްއާއިއެކު ކުޅެއުޅޭ ހަނދާންވޭ… އެކަމަކު ޒެލް ހުންނަގޮތް… ޒެލް ހާއްސަވާންޖެހޭ ސަބަބެއްނޭނގެ… ކުރީރޭ ބައްޕަ ޕާސްޓްގެ ހަނދާންތައް ކިޔައިދެއްވުމާއި ހަމައަށް… ހިތަށް އަރާ ޒެލްއަކީ އަސްލު ބައްޕައާއި ކިހިނެތް ރިލޭޓްވާ ކުއްޖެއްބާވައޭ… ޒެލް ކޮބައިބާވައޭ މިހާރު… ވިލް ހީ ސްޓިލް ލުކް ދަ ސޭމް….” މަޔާން ވާހަކަދައްކަމުން ސޯފާގައި ދެމިލިގޮތަށް ހުދުކުލައިގެ ސީލިންގްއަށް ކަޅި ހުއްޓާލިއެވެ. އޭނަގެ ސިކުނޑިއަށް އުނދަގޫކުރާ ޕަޒުލްގެ އެތިކޮޅުތައް ގުޅުވާލެވުނުފަހުން ޒެލް ހޯދުމުގެ ޝައުގުވެރިކަން ހިތުގައި ހިނގައިގަނެފައިވެއެވެ. އޭނައަށް ނޭނގުނަސް ޒެލްގެ ހުރިހާ ހަނދާންތަކެއް މިހާތަނަށްވެސް އޭނައާއިއެކުގައިވިއެވެ. ރެކް ފުރާލައިފައި ހަދިޔާތަކާއި ކާޑުތަކަކީ ޒެލްގެ ހަނދާންތަކެވެ. އެ ކާރޑުތަކުގައިވާ ކޮންމެ ލަފްޒަކުން އެތަށް ހަނދާނެއް ގެނެސްދީފިއެވެ. “ޑޭޑީމެންހެން ބެސްޓީސްގޮތަށް އުޅެން…” އެފަދަ ޖުމްލަތަކުން މަޔާންގެ ހިތުގައި ސުވާލުއުފައްދާފައިވެއެވެ. ޒެލްގެ ބައްޕައާއި އޭނަގެ ބައްޕައާއި އޮތީ ކޮންގުޅުމެއް ހެއްޔެވެ؟ އޭނައަށް އިނގިފައިވާގޮތުން ބައްޕަގެ އެންމެގާތް އެކުވެރިޔަކީ އަޒްހާނެވެ.

“ނޮޓް ޕޮސިބަލްދޯ… ޔާންވެސް ފޮޓޯގައި ހުރިގޮތަކަށް ނޫންދޯ މިހާރު ތިހުރީކީ… ޒެލް ދުނިޔޭގައި ހުރިނަމަ ޔާންއާއި އެއްވަރެއްވާނީ…” ޔަޒްދާން ވާހަކަދެއްކީ ލޯގަނޑު ކައިރީ އިސްތަށިގަނޑުގައި ކްރީމްލާން ހުރެގެންނެވެ. އެ ޖުމްލައިން މަޔާންއަށް އައި ބަދަލު ޔަޒްދާންއަށް ނުހަނު ރީތިކޮށް ފެނުނެވެ.

“ތިބުނީ ކީކޭތަ؟” އެންމެ ފަހު ޖުމްލައިގެ މާނަ ފަހުމްނުވެގެން މަޔާން ސުވާލުކުރިއެވެ.

“ނޭނގެ… ކޮންމެވެސް ސަބަބަކާއިހެދި އަހަރެންގެ ހިތް ބުނޭ ޒެލް ދުނިޔެއަކު ނެތޭ… ޒެލްގެ މަންމައާއި ބައްޕަ ނިޔާވީ އިމާރާތެއްގައި އަލިފާން ރޯވެގެން… އޭގެ ފަހުން ޒެލްނުވެސް ދެކެން… ބައްޕަ ޒެލް ރާއްޖެއިން ބޭރަށް ދިޔައީއޭ ބުންޏަސް ޤަބޫލެއްނުކުރެވޭ… ދެރަވެދާނެތީ ބައްޕަ ތެދަށް ނުބުނުއްވީކަމަށްވާނީ… އެހެންނޫންނަމަ މިހާދުވަސްވީއިރު ހަބަރެއްވީހެއްނު…” ޔަޒްދާން މޫނުމަތީން ދެރަވިކަމުގެ ކުލަވަރު ފެނުނެވެ. ހައިލާއާއި އަޒްހާންއަކީ ޔަޒްދާން ނުހަނު ބޮޑަށް ހަނދާންހުންނަ ދެފަރާތެވެ. ދުވަސްތައް މާޒީއާއި އެކުވަމުންގޮސް އޭނަގެ ހިތުގައި މިހާރު ހަމައެކަނިވަނީ އެދެނަމާއި އެކީގައި ހޭދަވި އުފާވެރި ދުވަސްތަކުގެ ހަނދާންތަކެވެ. ހައިލާއާއި އަޒްހާންގެ މޫނު ނުފެނި ގިނަދުވަސްވަމުންގޮސް އެ ސޫރަ މުޅިންހެން ހިތުން ފުހެވިގެން ހިނގައްޖެއެވެ. އެންމެފަހުންވެސް އޭނައަށް މިގޭތެރެއިން އެދެޒުވާނުންގެ ފޮޓޯއެއް ފެނުނީ އޭނަ ކިޔަވަން ފުރުމުގެ ކުރިންނެވެ. އަހަރުތަކަކަށްފަހު އޭނަ އެނބުރިއައިރު ކޮންމެވެސް ސަަބަބަކާއިހެދި ގޭތެރެއިން އެ ފޮޓޯތައް ފެނުން ހުއްޓިއްޖެއެވެ. އޭރުގެ ފޮޓޯ ލޯގަނޑުތައް މިހާރު ބެހެއްޓިފައިހުންނަނީ މިޙުރާންގެ ސްޓަޑީއާއި ނިދާކޮޓަރީގައެވެ. އެއީ ޔަޒްދާންއާއި މަޔާންވެސް އާންމުކޮށް ވަދެއުޅޭ ދެބައެއްނޫނެވެ.

މަޔާން އިތުރު ސުވާލެއްކުރުމުގެ ކުރިން ޔަޒްދާންގެ ފޯނު ރިންގްވާންފެށުމުން އޭނަ ފޯނު ހިފައިގެން ކޮޓަރިން ނިކުތެވެ. އެއާއިއެކު އިރުކޮޅެއްވާންދެން ބޯދަށަށް އަތްލައްވާލައިގެން މަޔާންއަށް ވިސްނަން އޮވެވުނެވެ. މާގިނައިރު އެގޮތުގައި ނޯވެވުނީ އޭނަގެ ފޯނަށް އައިޒާން ގުޅަން ފެށުމުންނެވެ. އޭނަ ފޯނު ނެގިގޮތަށް ބެލްކަންޏަށް ނިކުތެވެ. މިދުވަސްކޮޅަކީ އޭނައަށް ހިންދެމިނުލެވޭހާ ބުރަ ދުވަސްކޮޅަކަށް ވާނޭކަން މަޔާންއަށް އިނގެއެވެ.

އައިޒާން ދައްކަމުންދިޔަ ވާހަކަ ކަނުލާ އަޑުއަހަމުންދިޔައިރު މަޔާންގެ މޫނުގެ ކުލަ ބަދަލުވިއެވެ. އިރުކޮޅެއްވާންދެން ބަހެއްނުބުނެ ހުރެފައި ފޯނު ކަނޑާލިގޮތަށް އޭނަ ދެއަތުން ބޮލުގައި ހިފަހައްޓާލިއެވެ. ހައިޒަލްގެ ކޮންމެ ބަހެއް ސީދާވެގެން އައިސް ހަޤީޤަތަކަށްވެއްޖެއެވެ.

*** *** *** *** *** ***

ރޭގަނޑުގެ ހަމަހިމޭންކަމުގެ ތެރެއިން ފަނިފަކުސާގެ އަޑުނޫން އަޑެއްނީވެއެވެ. މަގުތައްވެސްވަނީ އާދަޔާހިލާފަށް ހިމޭންވެފައެވެ. ދުއްވާއެއްޗެއްގެ އަޑުވެސް ނީވި މުޅި މާލެވެސް ނިދާފައިވާފަދައެވެ. ދަންވަރަށް ވެހިގަތް ވާރޭ އެ ހިމޭންކަން ނަގާލާ މާހައުލުގައި މަޑުނާނާއެއް އަޅުވަން ފެށިއެވެ. ތުނިތުނިކޮށް ވެހެންފެށި ވާރޭ ބޯކުރަމުންގޮސް ތަންތަން ނުސާފުވާވަރުވީ ވާރޭވެހެންފެށިތާ ދާދި ކުޑަހިނދުކޮޅެއްގެ ތެރޭގައެވެ. އޭރު ބާރު ވައިރޯޅިތައް ފަޒާގައި ބޫން އަޑު ލައްވާލައިފައިވެއެވެ.

ވާރޭ އެންމެ ބޯކޮށްލިވަގުތު އަލަށް ހަދަން ފަށައިފައިވާ އިމާރާތުގެ ތެރެއިން އަންހެންކުއްޖަކު ދުވެފައި ނިކުތެވެ. ހުސްފަޔާހުރި އެއަންހެންކުއްޖާގެ ހެދުން ވީދި ހަށިގަނޑުން ބޮޑުބައެއް ކަޝްފުވެފައިވެއެވެ. ބޮލުގެ އިސްތަށިގަނޑު ތަރުތީބެއްނެތި ވިނެވިފައިވާއިރު އެ ހަށިގަނޑުން ލޭކޮށެވިފައިވެެއެވެ. މޫނުމަތިން ދުޅަވެ ނޫފައިގަނެފާއިވާއިރު ޒަހަމްތަކުން އަންނަމުންދިޔަ ލޭތައް ވާރޭއާއި ދޮވެވެމުންދިޔައެވެ. ހަށިގަނޑުގައި ކުރިއަށްދާނޭ ހިތްވަރެއް ނެތިފައި ހުރެވެސް އެއަންހެންކުއްޖާ ކުރިއަށް ދުއްވައިގަތެވެ.

ހެނދުމުގެ މެޔާއި ދިމާލުން ވީދައިގެން ގޮސްފައިވާ ބައިގައި އަތްއަޅާ ބާރުކޮށްލައިގެން ހުރެ ހުސްފަޔާ ދުވަމުންދިޔައިރު ދޭތެރެއަކުން ފަސްއެނބުރި އޭނަ ނިކުމެގެން އައި އިމާރާތާއި ދިމާލަށް ބަލާލަނީ ޖެހިލުންވެހުރެއެވެ. އޭނަގެ ފަހަތުން އަތުލައިގަންނަން މީހަކު އަންނަކަމުގެ ވަހުމާއިއެކުގައެވެ. އެ ހަށިގަނޑުގެ ކޮންމެ ޒަހަމެއްގައި އަޅަމުންދާ ވޭންތަކުން ލިބޭ ރިހުމަށްވުރެ އެ ހިތުގައި އެހެން އިހުސާސެއް ގަދަވެގަނެފައިވެއެވެ. މަންޒަރުތައް ފުސްކޮށްލަމުންދިޔަ ވާރޭތެރޭ ވަރުބަލިކަމާއިއެކުވެސް މިސްރާބެއްނެތި އެ ކުއްޖާ ދުވަމުންދިޔައީ ދެވޭ ނުުދޭވޭ ތަނެއް ނޭނގޭ ހާލުގައެވެ.

އިމާރާތް ލޮލުކޮޅަށް އޮބާހާ ދުރަށް ގޮސްފައި އެއަންހެންކުއްޖާގެ ފިޔަވަޅުތައް މަޑުޖެހުނެވެ. ދެއަތްއުފުލާލައި ބޮލުގައި އަތްއަޅާލިއެވެ. އެއާއިއެކު ރަތްވެފައިވާ ދެލޯމެރި އެ ލުއި ލުއި ހަށިގަނޑު އެއްފަރާތަކަށް އަރިއަޅާލިއެވެ. ހުއްޓުމެއްނެތި ތިރިވަމުން އައި ހަށިގަނޑު މަގުމަތީގައި ދުވެފައިވާ ފެންގަނޑުގައި ޖެހުމާއިއެކު ދެފަރާތަށް ފެންތައް ބުރުއްސައިގެންދިޔައެވެ.

*** *** *** *** *** ***

މެންދުރުގެ ހޫނުން ދުނިޔެ މާލަމުންދިޔަވަގުތު އިރުގެ ރަންދޯދިތަކުން ވޮށެއްފަދައިން ދުނިޔެ ދިއްލާ އަޅާލައިފައިވެއެވެ. ބޮޑެތި ކަފަވިލާކޮޅުތައްވެސް ނަލަ ނަލަ ދުވަހަކަށް ނިވާއަޅަމުން އުޑުމަތީ ދުވަމުންދިޔައެވެ. ޖެހޭ ފިނިރޯޅިތަކުން ހިތަށް ފިނިކަން ލިއްބައިދެއެވެ.

އެއްއަތުން ކޮފީ ތަށި ހިފަހައްޓާލައިގެން މަޔާން ހުރިއިރު އެ ރީތި މޫނުވަނީ އޭނަގެ ކުރިމައްޗަށްވާގޮތަށް ހުރި ބިއްލޫރިގަނޑުގައި ޖައްސާލެވިފައެވެ. ލޯމަރާލައިގެން ހިިނިތުންވެލައިގެން މަޔާން ހުރީ ދުވަހުގެ ހިތް ފަސޭހަކަން ލިބިގަންނާށެވެ. މަރާލެވިފައިވާ ލޮލުގެ ތެރޭ އޭނަ ކުރަހަމުންދާ ތަސްވީރާއިއެކު ތުންފަތްމަތީވީ ހިނިތުންވުން ފުންވަމުންދިޔައެވެ.

“ޔާން… ޔާން…. ޔާން…” ދިގު ހޯލްވޭގެ ކޮޅުން އައިޒާން ދުވެލައިފައި އައީ އަޑުހުރި ބާރަށް މަޔާންއަށް ގޮވަމުންނެވެ. ހުވަފެނީ ދުނިޔެއެއްގައި ހުރެފައި މަޔާން ލޯހުޅުވާލަމުން އަޑުއައި ދިމާލަށް ބަލާލިއެވެ. އެއާއިއެކު އަނގަޔަށް ގޮތެއްހަދާލެވުނީ އެންމެންގެ ނަޒަރު އޭނަގެ މޫނަށް އަމާޒުވެފައިވާތަން ފެނުމުންނެވެ. ހިތާހިތުން އައިޒާންއާއި ދިމާލަށް ކުދިިކިޔައިގަނެވުނެވެ.

“ސާބަހޭ… ފަޔަރ ލޮރީއެއްހެން އެލާރމް އަޅަމުން ނަޔަކަސް އަހަންނަށް އަޑުއިވެޔޭ…” މަޔާން ވާހަކަދައްކަމުން އަނގަޔަށް ވައްތަރެއް ޖައްސާލިއެވެ. އެހެންފަހަރުތަކުގައި އޭނަ އެއްޗެކޭ ނުބުނެގެން ހުންނަ އައިޒާންގެ ފަރާތުން ރައްދެއް ނުލިބުނެވެ.

“ޔާން… ވޮޗް ދިސް…” އައިޒާން އޭނަގެ ފޯނު މަޔާންއާއި ދިމާލަށް ދިއްކޮށްލިއެވެ. އެ ފޯނުގައި ނުހިފާހުރެ މަޔާން އައިޒާންގެ މޫނަށް ނަޒަރުހުއްޓާލިއިރު އެ މޫނުމަތީ ފެނިލީ ސީރިޔަސްކަމެވެ. ފޯނުން ޕްލޭވަމުންދިޔަ ވީޑިއޯއަށް މަޔާންއަށް ނަޒަރެއްދެވުނީ ދެނެވެ. ވަގުތުން އެ މޫނުމަތީވީ ލާނެތް ކުލަވަރު ފިލައިގެންދިޔައެވެ.

ފުލުހުންގެ ޓީމަކާއިއެކު ޕްރޮސެކިއުޓަރުންތަކެއް ސިލްކުގެ މައި އޮފީސްތެރެއަށް ވަދެ ސިލްކުގެ ސީއީއޯ ރައިހާން އައްމާރު ހައްޔަރުކުރާ މަންޒަރު ފެންނަ ވީޑިއޯ މުޅި މީސްމިޑިއާގައި ވައިރަލްވެފައިވެއެވެ. ނޫސްތަކުގައި ފަލައަކުރުން އެ ހަބަރު ފެވިފައިވެއެވެ. އަންހެންކުއްޖަކު ރޭޕްކުރުމުގެ ތުހުމަތުގައި ރައިހާން ހައްުޔަރުކުރެވިގެންދިޔަ ހަބަރު ޓީވީ ތަކުންވެސް ގެނެސްދެމުންދިޔައެވެ.

“ރީތިގޮތަކަށް މިކަން ނިމޭނެހެން ހީވޭ… މިއީވެސް އައްމާރާއިހެދި އަހަރެމެންނަށް އަތުނުވެގެން އުޅޭއެކަކު… މިކަހަލަ މީހުންނާއި ހެދި މީހުންގެ ދިރިއުޅުން ހަލާކުވަނީ… ކާކުތަ މިކޭސްއާއި މިކޮޅުން ހަވާލުވަނީ…” މަޔާން ވާހަކަދެއްކިއިރު އެ މޫނުމަތިން ތަފާތު ކުލަވަރެއް ދައްކައެއްނުލިއެވެ. ކުށްވެެރިންނަށް ހަމްދަރުދީ ފާޅުކުރުމަކީ އޭނަ ހަމަހޭގައި ހުރެގެން ނުކުރާނޭކަމެކެވެ. އަމުދުން އައްމާރާއި އޭނައާއި ގުޅުންހުރި މީހަކަށެވެ.

“ނޭނގެ.. ހީވަނީ ޕްރޮސިކިއުޓަރ ޔާޝަން… ނިކްހަތް ނޫނީ މިންހާ މޭމްހެން ހަވާލުވާނީ… މިކަހަލަ މައްސަލަތައް ނަގާ ޓީމްއަކީ އެއީއެއްނު… ޔާން ކިހިނެތްދެން އޮތީ… ހައްޔަރުކުރަންޖެހޭ މީހުން ހައްޔަރުކުރަން ބޭނުންވާ ވާހަކަ ބުނީމެއްނު…” އައިޒާން އޮޅުންފިލުވަންވެގެން ސުވާލުކުރިއެވެ.

“ކޯޓް އަމުރަށް އެދިފައި އޮންނާނީ… ލިބުނުހާ އަވަހަކަށް އުޅެންވީ އެކަމާ… އެކަކު ހައްޔަރުކޮށްގެން ދެންތިިިބި މީހުން އަތުވާނީ… ހިތަށްއަރަނީ ކާކުބާވައޭ ވެޕަން އަހަރެމެންނާއި ހަމަޔަށް ފޮނުވީ… އެމީހަކާއި ބައްދަލުވާނެނަމައޭ… ހަމައެކަނި ފޮރިންސިކްސްއިން ސާބިތުކޮށްދޭން އުނދަގޫވާނެ… ހެކިބަހާއިނުލާ ވާނެހެނެއް ހިޔެއްނުވޭ…” މަޔާން ވާހަކަދައްކަމުން އިސްތަށިގަނޑަށް އަތްމަހާލިއެވެ. އޭނަ ހާސްވާ ސަބަބަކީ އެެއީއެވެ. ފޮރިންސިކް ރިޕޯޓުން ކޯޓު މަރުހަލާގައި ހުރިހާކަމެއް ސާބިތުކޮށްނުދެވޭނެކަން އިނގެެއެވެ. ދެރައީ އެމީހުންނަށް އެހީވި މީހަކު އެއީ ކާކުކަން އިނގޭފަދަ އެއްވެސް މައުލޫމާތެއް ނުދިނީތީއެވެ. މަޔާން އުއްމީދުކުރަނީ ރަނގަޅުގޮތެއް ވާނޭކަމަށެވެ. އެހެންނޫންނަސް އޭނަ ހުރީ އޭނައަށް ވީގޮތަކުން މިމައްސަލަ ކާމިޔާބުކުރަން އަމާޒު ހިފައިގެންނެވެ.

*** *** *** *** *** ***

ރޭގަނޑުގެ ވަގުތު ހައިޒަލް ބްލޫސްގެ އިމާރާތާއި ތަންކޮޅެއް ދުރުގައި ކާރު މަޑުކޮށްލައިގެން އިންއިރު އެ ނަޒަރު ހުސްކޮށްލެވިފައިވީ އެ ފަނަރަބުރީގެ އިމާރާތެވެ. އެހާ ދުރުން އެ އިމާރާތް ފެންނަނީ އަލިގަނޑެއްގެ ސިފައިގައެވެ.  ކިރިޔާ ބްލޫސް ލޮލުގެ ކޮޅަށް ފެންނަހިސާބުގައި ހައިޒަލް އިންއިރު ބްލޫސްއަށް ވަނުމުގެ ހިޔާލެއް ހައިޒަލްގެ ނެތީހެން ހީވެއެވެ. އޭނަ ދެން ބްލޫސްއަށް ވަންނަ ދުވަހެއްވާނީ އަލްހާންއާއި ރިހާނާ ބްލޫސްގެ އިމާރާތުން އަބަދަށްޓަކައި ނެރޭ ދުވަހަށެވެ. އެއީ ހައިޒަލް އަމިއްލަ ނަފްސަށް ވެފައިވާ ވައުދެކެވެ. އޭގެ ކުރީން ވިންޓަރ ބްރީޒްއަށް ވަނުންވެސް ހައިޒަލް އޭނަގެ އަމިއްލަ ނަފްސަށް މަނާކޮށްފައިވެއެވެ. އެދުވަހުގެ ފަހުން އޭނަ އެގޭތެރެއަށް ފިޔަވަޅެއްވެސް އަޅާލައިފައެއްނުވެއެވެ.

އިރުކޮޅެއްވާންދެން އޭނަގެ ބައްޕަގެ ރަމްޒުކަމުގައިވާ އެ އިމާރާތަށް ބަލަހައްޓައިގެން އިނދެފައި ހައިޒަލް ކާރު ދުއްވާލިއެވެ. ބޮޑެތި އިމާރާތްތައް ފަހަނައަޅަމުންގޮސް ހައިޒަލް ކާރު ހުއްޓާލީ ފެންވަރު ރަނގަޅު ރެސްޓޯރެންޓެއްގެ ކުރިމައްޗަށެވެ. ރޭގަނޑު ހަލަބޮލިކުރަމުންދާ މީހުންގެ ތެރެއިން ފުރޭނިގެން ގޮސް ހައިޒަލް ރެސްޓޯރެންޓް ތެރެއަށް ވަނެވެ.

އެއްފަރާތުގައި ސިޑިން އަރައިގެންދަނިކޮށް ސިޑިމަތިން ދުވެފައި އައި ކުއްޖަކު ހައިޒަލްގެ ގައިގައި ޖެހިފައި އެ ކުއްޖާ ނުވެއްޓުނީ ހައިޒަލް ހުށިޔާރުވެ އެ ކުއްޖާ ހިފަހެއްޓެމުންނެވެ. އެ ކުޑަ ފިރިހެންކުއްޖާ އާއި އެއްހަމަޔަކަށް ހައިޒަލް ތިރިވެލަމުން އެ ކުއްޖާގެ އަތުގައި ހިފާލިއެވެ. އެވަގުތު ގާތްވަމުން އައި ފިޔަވަޅުގެ އަޑާއިއެކު ހައިޒަލް އިސްއުފުލާ ބަލާލިއެވެ. އޭރު ހައިޒަލްމެން އުމުރުގެ ޒުވާނެއް ސިޑިން ފައިބައިގެން އަންނަނީއެވެ. އެ ޒުވާނާގެ ކޮނޑުމަތީ އެއްއުމުރެއްގެ ދެ ފިރިހެންކުދިން އިށީދެލައިގެން ތިއްބެވެ.

“ތިއްތި… ޑެޑީ ތިއްތި ކައިރީ ބުނީމެއްނު ބޮޑައެއްނުހާކާނެއޭ…” ކޮނޑުމަތީތިބި ދެކުދީންގެ ގައިގައި ހިފަހައްޓާލައިގެން ހުރެ ފިޔަވަޅުތަކަށް ފަރުވާތެރިވެ ހުރެ ސިޑިން ފައިބަމުން އެ ޒުވާނާ ވާހަކަދެއްކިއެވެ. އެވަގުތު ހައިޒަލްއާއި ދިމާލަށް އެޒުވާނާ ބަލާލަމުން ހިނިތުންވެލިއެވެ. އޭރު އެ ފިރިހެންކުއްޖާ ހުރީ މޫނު ހަދާލައިގެންނެވެ.

“ދާނިޔަލް… ދާން….” ހައިޒަލްގެ އަތުތެރެއިން ލޫދިގަނެގެން އެ ކުއްޖާ ދޮރާއި ދިމާލަށް ދުއްވައިގަތުމާއިއެކު އެ ޒުވާނާ އަޑުހަރުކޮށް އެކުއްޖާގެ ނަމުން ގޮވާލިއެވެ. ހައިޒަލް އެ ޒުވާނާއަށް ނަޒަރެއްދީފައި އެ ކުއްޖާ އަތުކުރަން ހަލުވި ފިޔަވަޅުތަކެއްގައި ދުއްވައިގަތެވެ. އެވަގުތު ސިޑިމައްޗަށް ވަރަށް ބާރަށް އެއްޗެއް ވެއްޓުނުއަޑާއިއެކު ދޮރާއި ހަމަޔަށް ގޮސްފައިވެސް ހައިޒަލްއަށް އެނބުރިބަލާލެވުނެވެ. ފެނުނު މަންޒަރަކުން ހައިޒަލްގެ ބޮލަށް އެނބުރުންގަނޑެއް އެރިއެވެ. ނޭވާ ކަރުތެރޭ ހާސްވިއިރު ދެލޯ ތަންމިނަށް ހުޅުވުނެވެ.

“ޑޭޑީ.. ޔާޒް…” ހައަހަރުގެ ދާނިޔާލްވެސް ހުއްޓުން އަރާފައިހުރެ ރޮއެގަންނަމުން ސިޑިއާއި ދިމާލަށް ދުއްވައިގަތެވެ. އޭރު ޔާޒް ވެއްޓި ބޯޖެހުނު ތަނުން ލޭގެ ކޯރެއް ދަމާލިއެވެ. ރެސްޓޯރެންޓްގެ މުއައްޒިފުން އެ ޒުވާނާއަށް އެހީވާން އަވަސްވެގަތެވެ. އޭރު ހައިޒަލް ހުރީ ބޮލުގައި އަތްއެޅިގޮތަށް ގަނބުއަރާފައެވެ. އޭނަގެ ސިކުނޑިއަށް ނޭނގޭ ބާރުގަނޑެއް އަރާ ސިކުނޑި ފިސްފިސްވެ އެތިކޮޅުތަކަކަށްވާން އުޅޭފަދައެވެ. ނިއްކުރިއާއި ދިމާލުން ބޮލަށް ވާންވެ ލޯމައްޗަށް ފުސްވެގެންދިޔައިރު ލޯމަތީން ފެންނަމުންދިޔަ މަންޒަރު ބަދަލުވެގެންދިޔައީ އެސްފިޔަޖަހާލާ ކުޑަ ހިނދުކޮޅެއްގެ ތެރޭގައެވެ.

*** *** *** *** *** ***

ހަވީރުގެ ހިތްފަސޭހަ ވަގުތު މާލޭގެ ނަންމަޝްހޫރު އެ ރެސްޓޯރެންޓްތެރެ ގުގުމާލައިފައިވަނީ ޒުވާން ކުދިންގެ ހުނުންތަކާއި މައްލަވަކުރުންތަކުންނެވެ. ލުއިލުއި ހުނުންތަކާއިއެކު މާހައުލުގެ އުފާވެރިކަން އެތައްުގުނައަކަށް އިތުރުވެ، އެތަނަށް ދިރުމެއް ގެނެސްދޭފަދައެވެ. މިޙުރާންގެ އާއިލާއާއިއެކު ބޭއްވުނު އާއިލީ ބޭއްވުމާއިއެކު އިރުއޮއްސުމުގެ ކުރީން ގެއަށްދިނުމުގެ ބޭނުމުގައި ތިބި މޭޒުދޮށުން ތެދުވެ އަޒްހާންއާއި މިޙުރާންގެ ދެމަފިރިން ކުދިވެރިން ގޮވައިގެން ސިޑިން ފައިބަންފެށިއެވެ. ސަމާސާ ވާހަކަތަކެއްގައި ތިބި ދެއެކުވެރިން ސިޑިން ފައިބަންފެށީ ކުދިވެރިންގެ އަތުގައި ހިފައިލައިގެން ތިއްބެވެ. އޭރު ހައިލާއާއި މިލީނާ ތިބީ އަމިއްލަ ވާހަކައެއްގައި ޖެހިފައެވެ.

“ސާބަސް… މިލީއާއި ޖެހުނީމަ ހައިގެ ވާހަކަ ނުހުއްޓޭދޯ… އަހަންނާއި ދައްކަންވެސް ބައެއް ވާހަކަ ބަހައްޓަންވާނެެއެއްނު…” އާދައިގެ މަތީން އަޒްހާން އޭނަގެ އަންހެނުންނާއި ސަމާސާކޮށްލިއެވެ.

“ޑެޑީ ޒެލްއަކަށް ނުހިނގޭނެ… ޑެޑީގެ ކޮނޑަށް އަރަން…” މަތީބުރިއަށް އަރާ ހާއްސަކޮށްފައި ސިޑިބަރި ފެނުމާއިއެކު ޒެލް އުޒުރެއް ދައްކާލަމުން އަޒްހާންގެ ފައިގައި ހިފަހައްޓާލިއެވެ.

“ނޫން ސްވީޓްހާރޓް… މަންމީއާއިއެކީ ހިނގާލައިފައިދޯ ދަރިފުޅު ފައިބާނީ… ބަލާލަ ތުއްތުވެސް އެދަނީ ހިނގާފައެއްނު…” ޒެލް ހިނގަން މަސައްކަތަށް ބަހަނާއެއް ހޯދީކަން އިނގިގެން ހައިލާ ވަގުތުން ދެކޮޅުހެދިއެވެ.

“އޯކޭވާނޭ ހައި… މިފަހަރު ދާނީ ޑެޑީގެ ކޮނޑުގައި އިނދެގެންދޯ…” އަޒްހާން ޒެލް އުފުލާލިގޮތަށް ކޮނޑަށް ލިއެވެ. ޒެލްގެ އެއްވެސް ކަމެއްގައި އަޒްހާންގެ ދުލުން “ނޫން” އެލަފްޒު ބޭރުނުވާނޭކަން ހައިިލާއަށް މާކުރިންވެސް އިނގެއެވެ. ހައިލާ ކަންބޮޑުވަނީ މިހާރު ޒެލް ބުނާހާކަމެއްކޮށްދީގެން ފަހުން ޒެލްއަކީ ގޮތްދޫނުކުރާ ކުއްޖަކަށް ވެދާނެތީއެވެ.

އަޒްހާންއަށް ހަމައެކަނި ޒެލް ކޮނޑަށް ލައިގެން ސަލާމަތެއްނުވިއެވެ. މަޔާން އެދުމުން އޭނައަށް ޖެހުނީ މަޔާންވެސް ކޮނޑުމައްޗަށް ލާށެވެ. އެއާއިއެކު ޒެލްއާއި މަޔާންގެ ކުޅިވަރުވަކީން ގަދަވިއެވެ. އެއްކުއްޖަކު އަނެއްކުއްޖަކަށް ވާދަކިޔަމުން ކޮނޑުގައި އަތްއަޅާކޮއްޕަން ފެށިއެވެ. އެއީ ދެކުދީން ނުހަނު ގިނައިން ކުރާކަމެކެވެ. ޒެލް އަބަދުވެސް ބޭނުންވާނީ މަޔާންއަށް ގަދަވިޔަނުދީ އަޒްހާން އަމިއްލަކޮށްލައިގެން އޮންނާށެވެ. އަނެއްކޮޅުން މަޔާން ބޭނުންވާނީ ގަދަހިފުމަކަށް ގޮސްގެންވިޔަސް ޒެލްއަށްވުރެ ކުރިހޯދާށެވެ.

“މަންމީ…” ސިޑިބަރިމަތީގައި މަޔާންގެ ހަށިގަނޑުގައި ޖެހުނު އަޑާއިއެކު މަންމާއޭ ކިޔާ ރޮއެގަތްއަޑުއިިވިފައި މާދުރުގައި ހުރެފައިވެސް މިލީނާއަށް އެދިމާލަށް ދުއްވައިގަނެވުނެވެ. އޭރު މަޔާން އޮތީ ސިޑިބަރިމައްޗަށް ވެއްޓުނުގޮތަށް އަތެއް ފައެއްވެސް ތަޅުވައިނުލައެވެ. ބޯފަޅައިގެން ގޮސް އޮހިގަތް ލޭތަކުން މަޔާން ލައިގެން އޮތް ޓީޝާޓް ރަތްވަމުންދިޔައެވެ.

“މަގޭ ދަރިފުޅާ.. މަންމަގެ ޔާން…” މިލީނާއަށް ހަޅޭލަވައިގަނެފައި މަޔާންގެ ހަށިގަނޑު ކައިރިއަށް ތިރިވިއެވެ. ވަގުުތުން އެންމެން މަޔާންގެ ކައިރިއަށް ބޮޑިވެލިއިރު ކައިރިވާން ނުކެރިފައި ދުރުގައި ހުރީ ޒެލްއެވެ. އެބޮޑު ދެލޯ ކަރުނުން ފުރާލައިގެން ހުރިއިރު އެލޮލުގައިވީ ކުށްވެރިކަމެވެ. ޔާން ވެއްޓުނީ އޭނަގެ ދެއަތުން ޔާންގެ މޭގައި އަތްއަޅާ ކޮއްޕާލުމުންނެވެ. އޭނައަކީ ބަސްނާހާ ގޯސްކުއްޖެކެވެ. ޔާން ދުވަހަކު ދެން ޒެލްއަކާއި ވާހަކައެއްނުދައްކާނެއެވެ.

ހަބަރުހުސްވެފައި އޮތް ޔާން އަތްމަތީ ބާއްވާލައިގެން މިޙުރާން ތެދުވިއިރު އޭނަގެ ނަޒަރު ސީދާވީ ދުރުގައި ބާކީވެގެން ހުރި ޒެލްއަށެވެ. އަޒްހާންގެ އަތުތެރެއަށް މަޔާން ލަމުން މިޙުރާން ޒެލްއާއި ގާތްވެ އެ ތުއްތު ހަށިގަނޑު މޭގައި ޖައްސާލިއެވެ.

“ރާން އަންކަލް އައިމް ސޮރީ…” ޒެލް ތުން ފިއްތާލައިގެން ހުރެފައި ރޯންފެއްޓިއެވެ. އެއާއިއެކު މިޙުރާން ދެފަރާތަށް ބޯހޫރާލަމުން ޒެލްގެ ލޮލުން ބަނޑުންވަމުންދިޔަ ކަރުނަތައް ފުހެލަދިނެވެ.

“އިޓްސް އޯކޭއޭ ދަރިފުޅާ… ޒެލް ގަސްތަކު ނޫނެއްނު… ރާން އަންކަލް އިޒް ނޮޓް އެންގްރީއޭ…” މިޙުރާން ޒެލް މެޔާލައި ފިއްތާލިއެވެ. އިސްތަށިކޮޅުގައި ފިރުމާލިއެވެ. އެއާއިއެކު ޒެލްގެ ރުއިމުގެ އަޑު ބާރުވިއެވެ.

*** *** *** *** *** ***

ބޮލަށް އެރި ރިހުންގަނޑު ބާރުވެ ސިކުނޑި ފިތެމުންދާހެން ހީވުމާއިއެކު ބޮލުގައި ޖައްސާލެވިފައިވާ އަތަށް ބާރުކޮށްލަމުން ހައިޒަލް ފާރުގައި އަތްވިއްދާލިއެވެ. މެޔާއިދިމާލުން ކަށިތައް ފިތި މޭމައްޗަށް ވާންވަމުންދިޔަކަން އިހުސާސްވުމާއިއެކު ހައިޒަލް ލޯމަރާލަމުން ފުންނޭވާއެއްދޫކޮށްލިއެވެ. ދެތިން ފަހަރަކު ތަކުރާރުކޮށްލިތަނާ ބޮލުގައި ހުރި ރިހުން މަޑުމަޑުން ފިލަމުން ގޮސް އެކީހެން ފިލައިގެން ހިނގައްޖެއެވެ. ހައިޒަލްގެ ތުންފަތްމަތީ ހިނިތުންވުމެއް ކުޅެލިއެވެ. އޭނަގެ ހަނދާނުގެ މައްޗަށް އަމިއްލަ ނަފްސަށް ގަދަވެވުނުކަމުގެ އިހުސާސް އެންމެ ބޮޑަށް ކުރެވުނު ވަގުތުކޮޅަކީ އެއީއެވެ.

“ރާން… މިޙުރާން އަންކަލް…” އެހެންފަހަރުތަކަކާއި ހިލާފަށް ސިކުނޑި މިފަހަރު ހުރިހާކަމެއް ނަގައިގަތީ ނުހަނު ފުރިހަމައަށެވެ. އޭނަވެސް ހައިރާންވާ ދަރަޖައަށެވެ. ސިކުނޑިއަށް ބާރުލުމާއިއެކު ހަނދާންތައް އޭނަވަށާލިފަދައެވެ. ހަނދާނުގެ އެތިކޮޅުތައް ގުޅިގެންދިޔައީ ހައިޒަލްއަށް ނުހަނު ބޮޑުކަމެއް ފަހުމްކޮށްދީފައެވެ. އޭނަގެ ހިތުގައި އެތަށްދުވަހެއްވާންދެން އުފެދިފައި ހުރި ސުވާލުތަކަކަށް ޖަވާބުދީފައެވެ.

*** *** *** *** *** ***

ސައިރެން އަޅަމުން އައި ފުލުހުންގެ ވެހިކަލްތައް ހުއްޓީ ބްލޫސްގެ މައި އިމާރާތުގެ ކުރިމައްޗަށްވާ ގޮތަށެވެ. އެއާއިއެކު ވެހިކަލްތަކުން ފުލުފުލުން ފޭބި ފުލުހުންތަކުން މަގުމަތި އެކީހެން ފުރާލިއެވެ. ނޫކުލައިގެ ފުލުސް ޖިޕްގެ ފަހަތުން އައިސް މަޑުކޮށްލި ކަޅު ކާރުން މަޔާން ފޭބިއެވެ. އަޅި ކޯޓްފަޓްލޫންގައި އޭނަ ހުރީ ނުހަނު ރަސްމީކޮށެވެ. ކުރިމަތީން ފެންނަމުންދާ އިމާރާތަށް ނަޒަރެއް ދިނުމަށްފަހު ކާރުން ފޭބި އައިޒާންއާއި ދިމާލަށް ބަލާލަމުން މަޔާން ހިނިތުންވެލިއެވެ. އެއާއިއެކު އިމާރާތުގެ ތެރެއަށް ވަންނަން ހިނގައިގަތެވެ. އޭރު މަޔާންގެ އަމުރާއިއެކު އޭނައާއި އެކު ހަރަކާތްތެރިވާ ފުލުހުންގެ ޓީމް ސަފުތައް ރުކުވާލައިގެން އިމާރާތުގެ ތެރެއަށް ވަދެގަނެފިއެވެ.

އިމާރާތުގެ ތެރެއަށް ވަދެގެން އައި ފުލުހުންގެ ފައުޖު ފެނުމާއިއެކު އެމީހަކު ކުރަން ހުރި މަސައްކަތްމަތީންވެސް ހަނދާން ނެތުނުފަދައެވެ. ދެލޯބޮޑުކޮށްލައިގެން ބަލަން ތިބެވުނީ ހަރަކާތެއް ގެންނަން ނުކުޅެދިފައެވެ. ގްރައުޑް ފްލޯރގެ މުވައްޒަފުން ކުރިމަތިން އަޅައިގެން ކުރިއަށްދާން ފެށުމާއިއެކު އެވަގުތު ތިރީގައި ތިބި ސެކިއުރިޓީ ޑިޕާރޓްމެންޓްގެ މުއައްޒަފުން ފުލުހުންނަށް ހުރަސްއަޅަން މަސައްކަތްކުރިއެވެ. ނަމަވެސް ލޯމައްޗަށް ހުރަސްވި ކޯޓު އަމުރާއިއެކު އެ މުވައްޒަފުންނަށްވެސް މަޖުބޫރުވީ އެ ބޭފުޅުންނަށް ތަންދެމުން އެއްފަރާތްވާށެވެ. ތިރީގައި ތިބި މުވައްޒަފުންނަށް ނަޒަރެއް ދެމުން އެބޭފުޅުން މިސްރާބުޖެހީ ސާދަވަނަ ފަންގިފިލާއަށެވެ.

އިޒުނައަކާއި ނުލާ ކެބިންގެ ދޮރުހުޅުވިގެންދިޔަ އަޑާއިއެކު ގޮނޑީގެ ތެރެއަށް ހަށިގަނޑު ދޫކޮށްލައްވައިގެން ނިއްމަތީ އަތްތިލަ ބާއްވަވައިގެން އޮންނަވާފައި އަލްހާން މަޑުމަޑުން ލޯހުޅުވާލެއްވިއެވެ. ކުރިމަތީގައި ނޫ ޔުނިފޯރމްގައި ތިިބި ފުލުހުން ފެނިފައި އަލްހާންއަށް ފުންމައިގެން ގޮނޑިން ތެދުވެވުނުގޮތުން ގޮނޑިވެސް ފަހަތަށް ވެއްޓުނެވެ. ހަށިގަނޑު ފަހަތަށް ދޫވެދާނެތީ އޭނައަށް މޭޒުގެ ކަނުގައި އަތްއަޅާބާރުކޮށްލެވުނެވެ. އަލްހާންއަށް ދިރިހުއްޓާ ލޯމަތީން އޭނަގެ މަރުފެނުނުފަދައެވެ. ލޯމައްޗަށް ސިފަވެގެންދިޔައީ ޖަލުގެ ތޭރިތަކުގެ ތެރޭ އޭނަ ގަނަތެޅޭނޭ މަންޒަރެވެ. އެ ހިޔާލުން އެކަނިވެސް އަލްހާންގެ ހަށިގަނޑު ހަރުކަށިވެގެންދިޔައިރު ދެފަރާތަށް ބޯހޫރައިގަތެވެ.

“ބްލޫސް ކޮމްޕެނީގެެ ޗެއަރމަން އަލްހާން ސުލްތާން…. 1998 ވަނަ އަހަރު އޭ.އެޗް.އިންޑަސްޓްރީޒްގައި ހިނގާދިޔަ އަލިފާނުގެ ހާދިސާގައި ނިޔާވި ކުންފުނީގެ ޗެއަރމަން އަޒްހާން ސުލްތާންއާއި އަންހެނުން މަރިޔަމް ހައިލާގެ މަރު ފަހަތުގައި ތިބޭފުޅާގެ އަތެއްވާކަމަށް އަޅުގަނޑުމެންގެ ތަހުޤީގުން ސާބިތުވެފައިވާތީ އަޅުގަނޑުމެން މިއައީ ކޯޓް އަމުރުގެ ދަށުން ދައުވާ ލިބޭ ފަރާތް ހައްޔަރުކުރުމަށްޓަކައި…” ފުލުހުންތަކުގެ ތެރެއިން އާދައިގެ ހެދުމުގައި ހުރި މަޔާން ކުރިއަށްޖެހިލަމުން ދިއްކޮށްލީ ކޯޓް އަމުރެވެ. ގަނޑުގެ މަތީގައި ބޮޑުއަކުރުން ފަވާފައި އަކުރުތައް ލޮލުގައި އަޅައިގަތުމާއިއެކު އަލްހާންގެ ދެލޯބޮޑުވެ އަނބުރައިގަނެދާނެހެން ހީވިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.