އެރޭ ލިބުނު ފިނިފެންމާ

ހޭވެރިކަން ވީ އިރު ނާލީ އަށް އޮވެވުނީ ގޭގެ ބަދިގެ ތެރޭގައެވެ. ހޭވެރިކަން ވި ނަމަވެސް އަދިވެސް ބޮލަށް އަރާފަ ހުރި އެނބުރުކަމަށް ބަދަލެއް ނާދެއެވެ. އެހެން ނަމަވެސް ވަރަށް ހިތްވަރު ކުރުމަށްފަހު ތެދުވެވޭތޯ މަސައްކަތް ކުރަމުން ނާލީ ދިޔައެވެ. އެންމެ ކައިރިއަށް ހުރި މޭޒުގެ ފައިގަ ހިފަހައްޓާލުމަށްފަހު ކޮޅަށް ތެދުވެވޭތޯ ކުރި މަސައްކަތުން ނާލީ އަށް ކޮޅަށް ތެދުވެވުނެވެ. ނަމަވެސް އަނެއްކާވެސް ވެއްޓެން އުޅޭހެން ހީވުމާއެކު ހިތްވަރު ކޮށްލާފަ މޭޒުކައިރި ހުރި ގޮނޑީގަ އިށީނދެލިއެވެ. ނިތްކުރި މަތިން ދުޅަވެ އަރާފަ ހުރި ތަނުގަ އަތްހާކާލިއެވެ. ޖަގުން ފެންތައްޓެއް އަޅާލުމަށްފަހު ފެންފޮދެއް އަރުތެރެއަށް ލުމަށްޓަކާ ނެގި ތަށި ނާލީ އަތުން ދޫވެގެން ވެއްޓުނެވެ.
ވެއްޓުނު ތައްޓާ ދިމާލަށް ބަލާލުމަށް ތިރިވި ނާލީގެ ނަޒަރު އެއަށްވުރެ އަވަހަށް އަމާޒުވީ ކުރިމަތީ ހުރި ހާނިސާ އަށެވެ. އަވަސް އަވަހަށް އިންތަނުން ތެދުވެވޭތޯ ނާލީ މަސައްކަތް ކުރިއެވެ. އެކަމަކު އެހާ ހިތްވަރެއް ނާލީ އަކަށް ނުކުރެވުނެވެ.
” ދެންވެސް ތިތާ އިންނާނީތަ.. ނޫނީ އަހަރެން އުރާލައިގެން ކޮޓަރިއަށް ގެންދަންވީތަ؟” ހާނިސާގެ ވިހަ ބަސްތަކުން ނާލީގެ ހިތްތޮރުފާލި ކަހަލަ އެވެ. އެހެން ކަމަށްވިޔަސް ހާނިސާގެ ހިތަސް ނިކަމެތި ނާލީ އާ ދޭތެރޭ އެއްވެސް އެއްޗެއް ނާރާ ކަހަލައެވެ.
އެހެންނޫންނަމަ އަރިއަޅަމުން ކޮރުޖަހަމުން ކަހަލަ ގޮތަކަށް ހިނގަމުން ދިޔަ ނާލީ އާ ދިމާލަށް އެގޮތަށް ބަލަން ހުންނާކަށް ހާނިސާ އަކަށް ނުކެރުނީހެވެ.
ކޮޓަރިއަށް ވަދެވުމާއެކު އެތެރެއިން އަވަސް އަވަހަށް ނާލީ ދޮރުތަޅުލީ އެތެރެއަށް އެހެން މީހަކު ވަދެފާނެތީ އުޅޭތީ ބިރުން އުޅޭ ހެންނެވެ. ހުރިގޮތަށް ހުރެ ގޮސް ފާހާނާ އަށްވަދެ ޝަވަރު ދަށުގަ އިށީނީ ލައިގެން ހުރި ހެދުމާވެސް އެކުގައެވެ. ނާލީ އަށް އެހެން ކަމެއްގެ އިހުސާސް ނުކުރެވޭ ކަހަލަ އެވެ.
ޝަވަރު ދޮށުގައި އިނދެ ހިތްފުރޭ ވަރު ވުމުން ނާލީ ފާހާނާ އިން ނުކުމެ ހެނދުން ބަދަލު ކޮށްލިއެވެ. ނިދާލެވޭތޯ އޮށޯތްނަމަވެސް އެއްގޮތަކަށްވެސް ނާލީ ގެ ލޮލަކަށް ނިންޖެއް ނައެވެ. ނިދޭތޯ ކުރަމުން ދިޔަ ހުރިހާ މަސައްކަތެއް ދިޔައީ ބޭކާރު ވަމުންނެވެ. އެހެންކަމުން އިތުރަށް އެކަމާ އުޅެން ނަހަދާ ފާހާނާ އަށް ވަދެ ވުޟޫ ކޮށްލައިގެން ނުކުތީ އިޝާ ނަމާދު ނުކޮށް އޮށޯވެވުނީ ތީ އެވެ. އިޝާ ނަމާދުކޮށްލައިގެން ހަތިމް ހިފައިގެން އިށީނދެލީ ކޮންމެވެސް ވަރަކަށް ޤުރުއާން ކިޔަވާ ލުމަށެވެ. އެކަމުގެ ސަބަބުން އަބަދުވެސް ނާލީގެ ހިތަށް ހަމަޖެހުން ލިބޭތީ އެވެ.
ނާލީ އަކީ ފަރުވާތެރިކަމާއެކު ހުރިހާ ނަމާދެއްކުރާ ދީނީ ކަންތަކަށް ސަމާލުކަން ދޭ އަންހެން ކުއްޖެކެވެ. ކޮންމެ ނަމާދަކަށްފަހު ވެސް އުއްމީދާއެކު އަބަދުވެސް އުފާވެރި ދިރިއުޅުމަކަށް އެދި ދުއާ ކުރުމަކީ ނާލީ ކުރާ ކަމެކެވެ. ދިރިއުޅުން މަތިން ކިތަންމެ ފޫހިވީ ނަމަވެސް އަބަދުވެސް ނާލީ ގެ އުއްމީދަކީ ހުރިހާ ކަމަކަށްވެސް ކުޅަދުންވަންތަ މާތްﷲ ނާލީ ނިކަމެތި ކޮށްނުލާނެ ކަމެވެ.
ނާލީ ގެ އުމުރުން އަދި މިވީ އެންމެ ނަވާރަ އަހަރެވެ. ނާލީ އުމުރުގެ ކުދިން އުފަލާ މަޖަލުގަ ދުވަސްތައް ހޭދަ ކުރަމުން ދާއިރު ނިކަމެތި ނާލީ މިވަނީ އެހުރިހާ އުފަލަކުން މަހުރޫމް ވެފައެވެ. އުމުރުން ހަތަރު އަހަރު ފުރުނު އިރު މަންމަ ވަނީ ނިޔާވެފައެވެ. އޭގެ ދެތިން އަހަރު ފަހުން ބައްޕަވެސް ނާލީ އާ ވަކިވެގެން ދިއުން ވީ ނިކަމެތި ނާލީ އަށް ބަރުދާސްތު ނުކުރެވޭވަރުގެ ކަމަކަށެވެ.
ނާލީ މިހާރު ދިރިއުޅެމުން ދަނީ މާލޭގަ ކަމުގަވިޔަސް ނާލީއަކީ މާލޭ ކުއްޖެއްނޫނެވެ. ނާލީގެ އުމުރުން ދިހަ އަހަރުވަންދެން ނާލީ ދިރިއުޅުން ހޭދަކުރީ އުފަންރަށް ކަމަށްވާ ޅ.ނައިފަރު ގައެވެ. މަންމަ އާ ބައްޕަ ނިޔާވުމަށްފަހު ބައްޕައާ އެއްބަނޑު ހުރި ހަމައެކަނި ފިރިހެންމީހާ ހާލިދު ކައިރީ ގައެވެ. ހާލިދު އާ ހާލިދުގެ އަންހެނުން ނާލީ އެގޭގަ ބަހައްޓައިގެން ބަލަމުން ދަނިކޮށް ނާލީގެ އުމުރުން ދިހަ އަހަރަށް އޮއްވާ ދަތުރުވަރެއްގަ ހާނިސާ ހާލިދު މެންގެއަށް ދިޔައެވެ. އެދަތުރު ވެގެން ދިޔައީ ހާލިދު މެންނަށް ނާލީ ގެ ހުރިހާ ކަމަކުން ސަލާމަތް ވެވުނު ފަހަރަށެވެ.
އެދުވަހަކީ ނާލީ އަށް ހިތްދަތި އަސަރުތަކެއް ކުރުވި ދުވަހެކެވެ. މައިންބަފައިން ނިޔާވުމަށްފަހު ނާލީ ދެކުނީ ހާލިދުމެންނަކީ ވެސް ނާލީގެ މައިންބަފައިން ކަމުގައެވެ. އެކަމަކު ހާނިސާގެ އެންމެ އެދުމަކަށް ހާލިދު އެހާ ފަސޭހައިން ނާލީ އެއްކޮށް ހާނިސާ އާ ހަވާލު ކުރުމުން ނާލީ އަށް ހުރިހާ ކަމެއްވެސް ވިސްނުނެވެ. ކިތަންމެ ކުޑަ ނަމަވެސް ހާލިދު މެންގެ ހިތުގައި ނާލީ އާ މެދު އެއްވެސް ލޯތްބެއް ނުވާކަން ނާލީ އަށް އެނގުނެވެ. އެހެންކަމުން އެއްވެސް ދެކޮޅު ހެދުމެއްނެތި ދުވަހަކުވެސް ނުވެސް ދަންނަ ނާލީ އަށް މުޅިން ބީރައްޓެހި ހާނިސާ އާ އެކު މާލެ އައީ އެވެ.
ހާނިސާ އަކީ ވެސް ދުވަސްވީ މީހެއްނޫނެވެ. އެހެންކަމުން ހާނިސާ ވިސްނީ ނާލީ ގެނެސް ގޭގަ ބެހެއްޓުމަކުން އެކަމުން ހާނިސާ އަށް ގެއްލުމެއް ނުވާނެ ކަމަކަށެވެ. އުމުރުން ދިހަ އަހަރު ނަމަވެސް ނާލީ އަށް ގޭތެރޭގެ ގިނަ މަސައްކަތްތައް ކުރަން އިނގެއެވެ. ނާލީ ގެނެސް ސްކޫލަށް ވެއްދުމުގެ ހުރިހާ ކަމެއް ހާނިސާ ހަމަޖައްސައިދިނެވެ. އެކަމަކު ސަބަބުން ނާލީ އަށް ލިބުނު އުފާވެރިކަން އެއީ ނާލީ އަދިވެސް ހަނދާން ނެތޭ ކަމެއްނޫނެވެ. އެކަމުގެ ސަބަބުން ނާލީ ހިތާހިތުން ހާނިސާ އަށް ޝުކުރުވެރި ވެއެވެ. ރަށުންވެސް ނާލީ އައީ ގްރޭޑް ހަތަރަކާ ހަމައަށް ކިޔަވާފަ ކަމުން ނާލީ އަށް އުނދަގުލަކާ ނުލާ ގުރޭޑް ފަހަކުން ޖާގަ ލިބުނެވެ.
ހާނިސާގެ ގެ ހުންނަ ތަނުގެ ގޮތުން ނާލީ އަށް އެކަނިވެސް ސްކޫލަށް ދެވޭހާ ކައިރިއެވެ. އެހެންކަމުން އެކަމާވެސް ހާނިސާ ހާސްވާކަށް އުނދަގުލަކާ ކުރިމަތި ލާކަށް ނުޖެހުނެވެ.
އުމުރުން ސޯޅަ އަހަރު ފުރުނުއިރު ނާލީ އޯލެވެލް ނިންމިއެވެ. ކިޔަވަމުން ދިޔަ ދުވަސްވަރު ނާލީ އަމިއްލައަށް ފެނިގެން ގޭތެރޭގެ ކަންތައް ތައް ކުރަމުން ދިޔައެވެ. ހާނިސާ އާ ނާލީ އާ އެކު އެއްފުރާޅެއްގެ ދަށުގަ ހައަހަރު ދުވަހު އުޅެވުނު އިރުވެސް މާގާތް ގުޅުމެއް އެދެމެދަކު ނުވެއެވެ. ކޮންމެހެން ދައްކަން ޖެހޭ ވާހަކައެއް ފިޔަވާ އިތުރު ވާހަކައެއް ހާނިސާ ނާލީ އާ ދައްކައެއް ނޫޅެއެވެ. ކިޔަވާ ނިމިގެން ރަނގަޅު ނަތީޖާއެއް ނާލީ އަށް ލިބުނު ނަމަވެސް އިތުރަށް ކިޔަވަން ބުނާކަށްވެސް ނާލީ އަކަށް ނުކެރުނެވެ. ނާލީ ހީކުރީ ހާނިސާ އެވާހަކަ ދައްކާނެ ކަމަށެވެ. އެކަމަކު އެންމެ ކުޑަމިނުން ފާސްވިތޯ އަހާލުން ފިޔަވާ ހާނިސާ އިތުރު އެއްޗެއް ނާހައެވެ.
ކިޔަވާ ނިމުނު ފަހުން ނާލީ ގެ ކަމަކީ ގޭތެރޭގެ މަސައްކަތްތައް ކުރުން އެކަނިއެވެ. ހާނިސާ ކައިވެނިކޮށްގެން އުޅުނު ނަމަވެސް ހާނިސާގެ ފިރިމީހާ މާލޭގަ ހުންނަނީ މަދު ދުވަސްކޮޅަކު އެވެ. އަހަރުގެ ބޮޑުބައި ނާފިޒު ހޭދަކުރަނީ ރާއްޖެއިން ބޭރުގައެވެ. މާލޭގަ ނާފިޒު ގެ ވިޔަފާރި ކޮންމެވެސް ވަރަކަށް އޮތް ނަމަވެސް އެކަން ބަލަހައްޓަނީ ނާފިޒު ގެ އެންމެގާތް އެކުވެރިޔާ އެވެ.
ހާނިސާ ނާފިޒު އާ ކައިވެނި ކުރީ ނާލީ ގުރޭޑް އަށެއްގަ ކިޔަވަމުން ދަނިކޮށެވެ. އޭގެފަހުން މިހާރު ހައަހަރު ފާއިތުވެ ދިޔައީ އެވެ. ހާނިސާ ކައިވެނި ކޮށްގެން އުޅުނު ނަމަވެސް އެދެމަފިރިންނަށް އަދިވެސް ކުއްޖަކު ނުލިބެއެވެ.
ނާލީ ގެ ހިޔާލުތަކަށް ނިމުމެއް އައީ ހާނިސާ ދޮރުގަ ތަޅާ ގޮވާ އަޑަށެވެ.
” ނާލީ.. ނާލީ ތަށިތަކާ އެއްޗިހި ނަގާ ރިހަކޮޅު ހޫނުކޮށްފަ ނިދަން އޮވެބަލަ. އެކަން ކުރަންވީ އަހަރެންތަ.” ނާލީ ހަގީގަތުގަ އެކަން މަތިން ހަނދާން ނެތުނީ އެވެ. ކުޑަކޮށް އަރާމް ކޮށްލުމުގެ ސަބަބުން ބޮލަށް އަރާފަ ހުރި އެނބުރުން ވެސް މިހާރު ރަނގަޅެވެ. އެކަމަކު އަދިވެސް ބޮލުގަ ހުރި ރިހުމަށް މާބޮޑު ބަދަލެއް ނާދެއެވެ.
މަޑުމަޑުން ހިނގާލާފަ ގޮސް ބަދިގެ އަށް ވަންއިރު ނާލީ ބަދިގެއިން ނުކުތްއިރު ވެއްޓުނު ތަށި ވެސް އޮތްތަނުގަ އޮތެވެ. ފުރަތަމަ ކަމަކަށް އެތަން ނާލީ ސާފުކޮށްލިއެވެ. އެއަށްފަހު ރިހަކޮޅު ހޫނު ކޮށްލުމަށްފަހު އަނބުރާ ކޮޓަރިއަށް ދިޔައެވެ.
އެތައް ވަގުތެއް ނިންޖާ ހަނގުރާމަ ކުރުމަށްފަހު ނާލީ އަށް ނިދުނީ ދަންވަރު ދޭއްވެސް ޖެހި ފަހުންނެވެ.
ނާލީ އަށް ނިދުނު ނަމަވެސް ހާނިސާގެ ދެފައި އެއްތާކު ނުޖެހެއެވެ. ކޮޓަރި ތެރޭ ހުރެ ދެކޮޅަށް ހިނގަމުން ދިޔައެވެ. އަރާމް ތަންމަތި ދޫކޮށް ކޮޅަށް ހުންނަން ހާނިސާ އަށް މަޖުބޫރު ކޮށްފައިވަނީ ކިހާ ވަރެއްގެ ކަމެއް ބާވައެވެ. ހާނިސާގެ އަށް އެވަރަށް ވިސްނުމަށް އެހާ މަޖުބޫރު ކުރުވާފައި އެވަނީ ކޮންކަމަކަށް ބާވައެވެ.
ފޯނު ނަގާ ނާފިޒު ގެ ނަންބަރަށް ގުޅާލިއެވެ.
ދެތިން ފަހަރަކު ރިންގު ވުމާއެކު އެކޮޅުން ފޯނު ނެގިއެވެ.
” މަބުނިން ދޯ އަހަރެން އެދޭ ކަންތައް ހަމަޖެހުމުން ނޫނީ މަށަށް ގުޅައިގެން ނުވާނެޔޭ ” ހާނިސާ އަށް އުއްމީދު ކުރެވުނީވެސް އެފަދަ ޖަވާބަކަށެވެ. އެއްވެސް ހިފެހެއްޓުމެއްނެތި ހާނިސާގެ ވިދާ ބަބުޅާ ދެލޮލަށް ކަރުނަ ޖަމާވިއެވެ. އަތުގެ ނުފުށުން ކަރުނަތައް ފޮހެލީ ގޮތް ހުސްވެފައިވާ މީހަކު ފަދައިންނެވެ.
( ނުނިމޭ )