ހައްވާ – 2

ކުޑަވަރެއްގެ ދޯނިގަނޑެކެވެ. ދޯނީގެ ތެރޭގައިވަނީ ފަޅުކަމެވެ. ދޯނި އޮތީ ފަރެއްގެ ބޭރަށް އަރާ ހިކިފައެވެ. ދޭތެރެ ދޭތެރެއިން ދޯނީގެ ތެރެއަށް ބިޔަ ރާޅުތައް ބިންދާލައެވެ. ބިންދާލާ ކޮންމެ ރާޅަކަށް ދޯނީގެ ކުރީކޮޅުގައި ހަދާފައިހުރި ގެގަޑު މަތީގައި ތިބި މެހިތައް އުދުއްސާ ގަންނާތީ ފެނެއެވެ. އެއީ އާދަޔާ ހިލާފަށް ބޮޑެތި މެހިތަކެއް ކަމަށް ލަފާކުރެވެއެވެ. އެ ގެގަޑު މަތީގައި ލޭގެ ކޯރެއް ހެދިފައި އޮތެވެ. މެހިތައް އިށީދެގެންތިބީ އެލޭގެ ކޯރުތެރޭގައި އޮތް އެއްޗެއްގެ މަތީގައެވެ. އެ ކޯންޗެއް ބާވައެވެ؟

ކުއްލިއަކަށް މުގުރާލި ބިޔަ ރާޅަކާއެކު މެހިތައް ތިބިތަނުން އުދުއްސައިގަތެވެ. އެ ކޯންޗެއްކަން ސާފުވެއްޖެއެވެ. އެއީ ހިތެކެވެ. އާދަމުގެ ދަރިއެއްގެ ހިތެކެވެ. ފެންނަ ފެނުމަށް އެ ހިތުން އަދިވެސް ވިންދު އެބަޖަހައެވެ. އެއީ ކާކުގެ ހިތެއްބާވައެވެ. އަހަރެންގެ ހިތްބާވައެވެ. މޭގާ އަތް ޖައްސާލެވުނެވެ. ނޫނެކެވެ. އަހަރެންގެ ހިތް އެބައޮތެވެ. އެ ހިތް ބާރުބާރަށް ތެޅެމުން ދިޔައެވެ. އަނެއްކާވެސް ދޯނީގެ ތެރެއަށް ރާޅެއް ބިންދާލިއެވެ. އެއާ އެކު މީހަކު ކުކުރާލިހެން ހީވިއެވެ. ވަށައި ހޯދާ ބަލައިލީމެވެ

ދޯނީގެ ފަހަތުގައި ފުރަގަސްދީގެން މީހަކު އިނެވެ. އިރު އިރުކޮޅުން އެމީހާ ކަނޑުގެ ލޮނުގަނޑާ ދިމާލަށް ގުދުވާތީ ފެނެއެވެ. ހީވާގޮތުން އެމީހާ ކޮންމެވެސް އެއްޗެއް ނަގަނީއެވެ. އެމީހާއަށް ގޮވާލަންވީތާއެވެ. އަހަރެން އެކިފަހަރު އެކި ދޯނީގައި މިކުރާ ކަމެއް އަހަރެނަށް ނޭގުނަސް އެމީހާއަށް އެނގިދާނެއެވެ

‘ބޭބޭ……………’ ގޮވާލީމެވެ. އެހެނަސް އަޑެއްނައެވެ. އަނެއްކާވެސް ގޮވާލީމެވެ. މިފަހަރުވެސް އަޑެއްނެތެވެ. އަހަރެންގެ އަޑަށް މިވީ ކިހިނެއްބާވައެވެ. ދެތިންފަހަރު ކަރުވެސް ކެހިލީމެވެ. އެހެނަސް އަޑެއްނެތެވެ. ކުއްލިއަކަށް ކަނޑުގެ ލޮނުގަނޑުން އެއްޗެއް ފުންމައިގަންތަން ފެނުނެވެ. އެމީހާ އިން ދިމާލުންނެވެ. އެ އެއްޗެއް ފައިބައިގެން ދިޔަލެއް އަވަސްކަމުން ކޯންޗެއް ކަމެއް ނޭނގުނެވެ. އަހަރެންނަށް ބަލާލެވުނީ އެމީހާއާ ދިމާލަށެވެ. އޭރު އެމީހާގެ ކަނދުރާ މައްޗަށް ލޭ ބޮކިޖަހާފައި ފައިބަމުން ދިޔައެވެ. އެމީހާގެ ބޮލެއްނެތެވެ. ބާރު ބާރަށް ހަޅޭލައި ގަނެވުނެވެ. އަޑާއެކީގައެވެ

ސިއްސައިގެންގޮސް ހޭލެވުނެވެ. މީހާވަނީ ކޮޅަށްޖެހިފައެވެ. ގައިންވަނީ އޮއްދާ ހިއްލާފައެވެ. ވަށައިގެންވަނީ އަނދިރިކަމެވެ. ހަމަހިމޭންކަމެވެ. ފެތުރިފައިވާ ހިމޭންކަމުގެ ތެރޭން އަހަރެންގެ ހިތް ބާރުބާރަށް ތެޅެމުންދިޔަ އަޑުއިވުނެވެ. އަހަރެންމިވަނީ ކޮންތާކުބާވަޢެވެ. މިއީވެސް ދޯންޏެއް ބާވައެވެ. އަނދިރިކަން ސާފުވާ ވަރެއް އަދިވެސް ނުވެއެވެ

އަހަރެން ލޯ ބޮޑުކޮށްލީމެވެ. އަނދިރިކަމުގެ ތެރެއިން އެއްޗެއް ސާފުވެދާނެ ކަމުގެ އުއްމީދުގައެވެ. އެތައް އިރަކު މަސައްކަތްކުރެވިއްޖެއެވެ. އަނެއްކާ އަހަރެންގެ ލޯ އަނދިރިވީބާވައެވެ. އެހެންވެގެން ނުވާނެއެވެ. އަހަރެން ނިދަން އޮށޯތްއިރު އަހަރެންނަށް ސާފުކޮށް ފެނެއެވެ. ލޯ އުގުޅާލީމެވެ. އެއާކު ގަދަރިހުމެއް ލޮލަށް ވެެރިވެ ގަތެވެ. ކުރެވުނީ ބޭކާރު މަސައްކަތެކެވެ. ހަމަޖެހިލާފައި ހިއްލާފައިވާ ދާތައް ފޮހެލީމެވެ. ފެނުނު ހުވަފެނާމެދު ވިސްނާލީމެވެ

އަނެއްކާވެސް ބޭކާރު މަސައްކަތެކެވެ. މިވީ ކިހިނެއްބާވައެވެ. ދެންމެ ފެނުނު ހުވަފެނެކެވެ. އެކައްޗެއްވެސް ހަނދާނަކަށްނައެވެ. އެކީއްވެ ބާވައެވެ. އަހަރެން ހަނދާންވަނީ ކުޑަ ދޯންޏެއްގެ މަތިންނެވެ. އެދޯނީގައި ހުރީ އަހަރެން އެކަންޏެވެ. އެއީ އަބަދުވެސް އަހަރެންނަށް ފެންނަ ދޯންޏެވެ. އަބަދުވެސް ފެންނަ ދޯންޏެވެ. އޭގެންދޭ މެސެޖެއް އަހަރެންނަކަށް ވިސްނާ ވިސްނާވެސް ނޭނގުނެވެ. އެނގޭހާވެސް އެއްޗަކީ އަހަރެންނަށް އެކައްޗެއްވެސް ހަނދާން ނުވިކަމެވެ. އަނެއްކާ އަހަރެންގެ ހަނދާނުގައި މައްސަލައެއް……….. އެހެނެއް ނުވާނެއެވެ. އަހަރެން ހަނދާން ވޭބައެވެ. އެއީ މީގެ 12 ވަރަކަށް އަހަރާއި ހަމަސް ކުރިއެވެ

އަހަރެންނަށް ކުރެވުނު ފާފައިގެ އަދަބެއްގެ ގޮތުން އަހަރެން އަރުވާލެވުނެވެ. އުފަން ފަސްގަނޑާ އެތަކެއް މޭލެއްގެ ދުރަށެވެ. ގާޒީ ބުނިގޮތުންނަމަ އެއީ 5 އަހަރަށެވެ. އަހަރެން އެރަށަށް ދިޔައީ ވަރުގަދަ އަޒުމެއްގައެވެ. އިސްލާހްވެގެން ރަނގަޅު މީހެއްގެ ގޮތުގައި އައުމަށެވެ. ހައްވާގެ ހަނދާންތަކާއި ދުރުވެ މުޅިން އައު ދިރިއުޅުމެއް ފަށާށެވެ. ފުރަތަމަ ކޮޅު އަހަރެންގެ އަޒުމާއި އަގީދާ ވަރަށް ވަރުގަދައެވެ. ބަރާބަރަށް ނަމާދުކުރަމެވެ. ގިނަވަގުތު އަހަރެން ހޭދަކުރަނީ އަޅުކަމުގައެވެ. އަހަރެންގެ އަމަލުތައް ހުރި ގޮތުން އަހަރެންނަށް ރަށުމީހުންގެ އިތުބާރު ލިބުނެވެ. ނަމަވެސް އަހަރެންގެ އަގީދާގައި ހިފަހައްޓާލެވުނީ އަހަރެއްހާ ދުވަހުއެވެ

އާމްދަނީއެއް ހޯދުމަށް އަހަރެން އެރަށުގައި ރުކުއަޅައި އުޅުނީމެވެ. ހުރިހާ ކަމެއް ގޯސްވީ ރުކުއެޅުމުގެ ތެރެއިންނެވެ. ރުކުއަޅަން އޮވެފައި ޖެހިގެން ހުރިގޭ ގިފިއްޔަށް ބަލާނުލެވުނު ނަމައޭ އަހަރެންގެ ހިތަށް އަރައެވެ. އެދުވަހު ގިފިލިތެރޭން ފެނުނު އަންހެންކުއްޖާ ފެނިފައި އަހަރެންގެ ހަނދާނުން ގާތްގަނޑަކަށް ފޮހެލެވިފައިވާ ހައްވާ ގެ ހަނދާންތައް އާވާން ފެށިއެވެ. އަހަރެންގެ ހަވާނަފުސު އަހަރެންގެ މައްޗަށް އަތްގަދަ ކުރަން ފެށިއެވެ. ގޭގޭ ގިފިލި ފުޅަށްމަތިން ބޯދިއްކުރެވެން ފެށުނެވެ. ރޭގަނޑު ދަމު ހިނގަންފެށުނެވެ. ފާފައަކަށް ފަހު ފާފައެއް އަހަރެންނަށް ކުރެވެމުން ދިޔައެވެ

އެކަންތަކުން ސަލާމަތްވާނޭ ހިތާ އަހަރެން އެރަށުން މީހަކާ އިނީމެވެ. ކަންތައްވީ އަހަރެން ހީކުރިގޮތާއި މުޅިން ހިލާފަށެވެ. އަހަރެންގެ އަންހެނުންގެ ހުސްއަރިބައި ދައްތައެއް ހުރެއެވެ. އޭނާ ފެންވަރަން ހުއްޓާ ގިފިއްޔަށް ވަދެވުނު ދުވަސްވީ އަހަރެންގެ ހަޔާތުގެ އާ ބާބެއް ހުޅުވުނު ދުވަހަކަށެވެ. އޭނާއަށް އަހަރެން ގިފިލި ތެރެއިން ފެނުމުން އޭނާ އަހަރެންނަށް މަރުހަބާކިޔެވެ. އެކަންވީ އަހަރެމެން ދެމީހުންގެ ސިއްރު ގުޅުމަކަށެވެ. ދެބެންގެ ފަރާތުން އަރާމާއި އުފާ ހޯދަމުން ދިޔައިރު އަހަރެންގެ އަންހެނުންނަށް އެކައްޗެއްވެސް ރާކާނުލައެވެ. އަހަރެންގެ ފަރާތުން އޭނާއަށް އުފަލާ އަރާމު ލިބެމުންދިޔައީ ހިތްފުރި ބަންޑުން ވާވަރަށެވެ. ޝައްކެއް ކުރާނޭ ޖާގައެއް ނެތިއެވެ

ހިތްނުފުރުނީ އަހަރެންގެއެވެ. އެ އަރާމާއި އުފާ އިތުރަށް ހޯދަން އަހަރެން ބޭނުންވިއެވެ. ރޭގަނޑު ދަންވަރު ގޭގައަށް ވަންނަންފެށުނީ އެހިސާބުންނެވެ. ފުރަތަމަކޮޅު އަހަރެން ގޭގެއަށްވަދެ އުޅުނީ ވަރަށް ބަލައިގެންނެވެ. ފިރިމީހާ ރަށުގައި ނެތް މީހުން ހޯދައިގެންނެވެ. މީހަކަށް ފަޅާނާރާނެ ހެންނެވެ. ނަމަވެސް އެ ހުރިހާކަމެއް ބަދަލުވީ އަހަރެންގެ ޝަހުވާނީ އެދުން ތަކުގެ ވަރުގަދަކަމުންނެވެ. ހަމައެއް ލަމައެއް ނެތި މީހުންގެ ކައިރިއަށް ވަންނަންފެށުނެވެ

ގޭގެއަށް ދަންގަޑީ ވަދެއުޅޭމީހަކު ރަށުތެރޭ އުޅޭވާހަކަ ފެތުރެން މާ ގިނަދުވަހެއް ނުނެގިއެވެ. އަހަރެން އެކަމަކާ ފަރުވާލެއް ނުބަހައްޓަމެވެ. ރަށު ރައްޔިތުން އަހަރެންނަށް ޝައްކެއް ނުކުރާނެ ކަން ގައިމެވެ. އަހަރެންމީ އެއަށްވުރެ ސާލިހު މީހެކެވެ. ނަމަވެސް އަހަރެންނަށް ހަނދާންނުބެހެއްޓުނީ އެންމެ ކަމެކެވެ. ބަޔަކު، އެމީހަކު ހޯދަން މަސައްކަތް ކޮށްފާނެކަމެވެ. އަހަރެން އަތުލައިގަތްރޭ އަހަރެންނަށް ދެއްކޭނެ މާ ބައިވަރު އުޒުރެއްނެތެވެ. އަހަރެން އެރޭ އޮތްހާލަތާ ކުރަން ހުރި ކަންތައް ފެނިފައި ކިރުބޯ ޅަކުއްޖާއަށްވެސް އެމީހަކީ އަހަރެންކަން ކަޑައަޅާ ބުނަންއެނގޭނެއެވެ

އެރޭ ރަށުރައްޔިތުން އަހަރެންނަށް ވަރަށް އަނިޔާކުރިއެވެ. މަރުނުވީ ކިރިޔާއެވެ. މަރުވިނަމައޭ ހިތަށްއަރައެވެ. އެމީހުންގެ އަނިޔާތަކަށްފަހު އަހަރެން އެއްލާލާފާ އޮތީ ރަށުގެ ފަރުބޭރުގައި އަޅާފައި އޮތްކުޑަދޯންޏަކަށެވެ. އަހަންނަކަށް ވީގޮތެއް މާ ސާފެއްނޫނެވެ. އިގޭހާވެސް އެއްޗަކީ އަހަރެން އެދޯނިން ނަގައިގެން އެހެން ރަށަކަށް ގެންދިޔައީ އަހަރެންގެ ބައްޕާކަމެވެ

އެރަށުގައި އަހަރެންނަކީ ރާވެރިއެކެވެ. ރެއަކާ ދުވާލު 31 ރުކުން އަހަރެން ރާ ބާލަމެވެ. އަގަކަށް ނޫނެވެ. އާމްދަނީ ހޯދާކަށްވެސް ނޫނެވެ. ކާ އެތި ކޮޅަކަށެވެ. އެރަށުގައި އަހަރެން ހުރީ އަހަރެންގެ ބައްޕަ ރައްޓެއްސެއްގެ ބެލުމުގެ ދަށުގައެވެ. އެއީ މުސްކުޅި އުމުރުގެ މީހެކެވެ. 60 އަހަރޭ ބުނީތީ އަޑުއެހީމެވެ. ކަންދިމާކުރިގޮތުން އެއީ އެރަށު ކަތީބެވެ. މީހުން ބުނެއެވެ. ނަސީބަކީ ކަތީބަކު ދޭ އެއްޗެއް ނޫނެވެ. އެކަމު އަހަރެންދެކުނީ އޭގެ އިދިކޮޅަށެވެ. އަހަރެންނަށް ހުރިހާ ނަސީބު ވެރި ގޮތްތަކެއް ދިމާވީ ހަމަ އެކަތީބުގެ ފުށުންނެވެ. އެކަން އެންމެ ރަނގަޅަށް ދަންނާނީ އެކަތީބުގެ ޒުވާން އަނބިމީހާއެވެ

އެއީ ރީތި އަންހެނެކެވެ. އެހެންމީހުންނަށް ރީތިވާހާ ގޮތަކަށް އަންހެނުންގެ ސިފަތައް ކިޔާދޭކަށް އަހަރެންނަކަށް ދަސްވެފައެއްނެތެވެ. އަހަރެންނަށް ރީތިވަނިކޮށް އަހަރެންނަށް ފުދެއެވެ. އެރަށުގައި އަހަރެން ހޭދަކުރި ދުވަސްތަކުގައި އަހަރެންގެ އެކަނިވެރިކަން ފިލުވައިދިނީ ކަތީބުގެ އެ ޒުވާން އަނބިމީހާއެވެ. އެކަން ދަންނަނީ ކިތައް މީހުންތޯ އަހަރެން ނުބަލަމެވެ. އެނގޭހާވެސް އެއްޗަކީ އަހަރެން ދިރިއުޅުމެއް ނުފަށާތީ ރަށުގެ ކަމުވޮށިގެންވާ މީހުން ސުވާލު ކުރަމުން ދިޔަ ކަމެވެ. އެމީހުންގެ މަގުސަދެއް ނޭނގެއެވެ. ކިޔާ އެއްޗެއް ކިޔާފާނެއެވެ. އަހަރެން އަޅައެއް ނުލަމެވެ

އަހަރެން އެރަށަށްއެރީ މާތް މަގުސަދެއްގައެވެ. ރަނގަޅުމީހެއްގެ ގޮތުގައި އަހަރެންގެ ރަށަށް ދިޔުމަށެވެ. ވެދިޔަކަންތައް ހިތުން ފިލުވާލުމަށްފަހު އަނެއްކާވެސް އިސްލާހުވުމަށެވެ. ކަތީބުގެ ޒުވާން އަނބިމީހާގެ ބޭނުމުގައެއް ނޫނެވެ. އޭނާ ކިތަންމެ ރީއްޗަސް އަހަރެންގެ ޝައުގެއް އޭނާއަކަށް ފުރަތަމަ ކޮޅުނެތެވެ. ވިދާހާ ކޮންމެ އެއްޗަކީ ރަނެއް ނޫންކަށް އަހަރެން ދަންނަމެވެ. އޭނާގެ ފަރާތުން ލިބެމުން ދިޔަ ދައުވަތުތަކަށް އަހަރެންނަށް އިންކާރުކުރެވުނީ އެހެންވެގެނެވެ. އަދި އަހަރެންގެ ސާހިބުމީހާ އަށް ވަފާތެރި ވުމުގެ މަގުސަދުގައެވެ. ކާންދޭ އަތުގައި ދަތް ނާޅާށޭ މީހުން ބުނޭ ނޫން ހެއްޔެވެ؟

އޭނާގެ ވަޒީފާއަކީ އަހަރެންނަށް ކާން ހަދާދީ އެއްޗެހި ދޮވެދިނުމެވެ. އެއީ ކަތީބުބެ އޭނާއަށް އަންގާފައި އޮތްގޮތެވެ. ދުވާލުތިން އިރު އަހަރެން އެގެއަށް ކާންދަމެވެ. އެދާ ކޮންމެ ވަގުތެއްގައި އަހަރެންނަށް ކަތީބުގެ އަންހެނުންގެ ފަރާތުން ދައުވަތުތައް ލިބެމުން ދިޔައެވެ. އަހަރެން އިންކާރުކުރަމުން ދިޔައީމެވެ. ހިތަށްއަރައެވެ. އޭނާ އެހުރީ ޖިންނި މޮޔަވެފަބާވައެވެ. ނޫނީ ކަތީބުބެގެ ފަރާތުން ވާވަރަށް އުފަލާ އަރާމު ނުލިބެނީ ބާވައެވެ. ނޫނީ އުފެދުމުގައިވެސް ހުރިގޮތެއްބާވައެވެ

ކެތްވާނީވެސް ވަކިވަރަކަށްތާއެވެ. އެންމެ ފަހަރަކު ނަމަވެސް އަޖުމަ ބަލައިލަން އަހަރެންގެ ހިތަށް އެރިއެވެ. އޭނާގެ ދައުވަތު ގަބޫލުކުރީމެވެ. އެއީ އަހަރެން އެންމެ ހިތްހަމަޖެހުނު ރެއޭ އަހަރެންނަށް ބުނެވިދާނެ ބާވައެވެ؟ ނޭނގެއެވެ. އެނގޭހާވެސް އެއްޗަކީ އަހަރެންނަށް އެރޭ ވަރަށްބޮޑު އެއްޗެއް ވިސްނުނުކަމެވެ. އެއްޗެއްގެ ފުރިހަމަކަމާއި ރީތިކަން ބޭރުފުށުން ހޯދައެއް ނުގަނެވޭނެއެވެ. ރީތިކަމާއި ފުރިހަމަކަން ފެންނާނީ އަޖުމަ ބަލައިލުމުންނެވެ

އެރޭގެ ފަހުން އޭނާގެ މައްޗަށް އަހަރެންގެ ހިތް ޖެހުނެވެ. އޭނަގެ ކޮންމެ ގޮވާލުމަކަށް އަހަރެން އިޖާބަދެމުން ދިޔައީމެވެ. އަހަރެންނަކީ ޖެހިލުންކުޑަ މީހަކީމެވެ. ބިރުގަންނަންވީ އެއްވެސް ކަމެއް އަހަރެމެންގެ ކުރިމަތީގައި ނެތެވެ. ހުރިހާ ކަމެއްހެންވަނީ މަގުފަހިވެފައެވެ. އަހަރެންގެ ފަޅުގެއަކީ ކަތީބުގެ ބޮޑު ގޯތީގެ އެއްކަނެވެ. އެހެންކަމުން އަހަރެމެންގެ ދެމީހުންގެ ދެމެދުގައިވާ ދުރުމިންކުރެވެ. ކަތީބު ނިދުމަށްފަހު ރޭ ގަނޑުގެ ބާކީބައިގައި އެޒުވާން އަނބިމީހަ އެއީ އަހަރެންގެ މީހެކެވެ. އަނެއްކޮޅުން ޝައްކު ކުރާނޭ މީހަކުނެތެވެ. ކަތީބުގެ ފުރިހަމަ އިތުބާރު އަހަރެންނަށް ވަނި ލިބިފައެވެ. އެކަން އަހަރެންނަށް ޔަގީންވީ ކަތީބުގެ އަންހެނުން އަހަރެންގެ ދަރިޔަކަށް ބަލިވެ އިނދެ ވިހެއުމުން ކަތީބުގެ ދަރިއެއްގެ ގޮތުގައި އެކުއްޖާ ބަލައިގަތުމުންނެވެ

އަހަރެން އެރަށަށް ގެނެވުނީ ހުކުމުގެ ބާކީބައި ފުރިހަމަ ކުރުމަށެވެ. ނަމަވެސް އަހަރެން ގަސްދުކުރީ މުޅި އުމުރު އެރަށުގައި ހޭދަކުރުމަށެވެ. ލިބެމުންދިޔަ އުފަލުގެ ބޭނުމުގައެއް ނޫނެވެ. ފަސޭހަ ދިރިއުޅުމުގެ ބޭނުމުގައެއްވެސް ނޫނެވެ. އަހަރެން އެރަށަށްފޭބިތާ ފަސްއަހަރަށްއެޅިއިރު ކަތީބުބެ ވަރަށް ބައްޔެވެ. އޭނަގެ ޒުވާން އަނބިމީހާ އިނީ އަހަރެންގެ ދެވަނަ ދަރިޔަކަށް ބަލިވެއެވެ. ހުރިހާ ޒިންމާއެއް އުފަލަން ހުރީ އަހަރެނެވެ. އެހާލަށް އެމީހުން ދޫކޮށްފައި ދާކަށްއަހަރެންގެ ހިތެއް ނުރުހުނެވެ. ކަތީބުބެ މިއަދު ލޯ މަރާލިޔަސް އެ ޒުވާން އަނބިމީހާ އެކަނިވާނެއެވެ. އަހަރެންގެ ތުއްތު ދެކުދިންނާއެކު މުޅިރަށަށް ގިނަވާނެއެވެ. އެ ހުރިހާ ދުވަހު އަހަރެންގެ މުހުތާދު ފުއްދައިދިން މީހަކު ދޫކޮށްފައިދާން އަހަރެންގެ ހިތް ރުހެންވީ އެއްވެސް ސަބަބެއްނެތެވެ

އަހަރެން އެރަށުގައި އުޅޭތާ ހަތް އަހަރަށް އަޅާލިތަނާހެން ކަތީބުބެ މި ދުނިޔެ ދޫކޮށްފިއެވެ. އަހަރެންނަށް އޭނާގެ އަނބިމީހާއާ އިނުމަށް ވަސިއްޔަތް ކޮށްފައެވެ. އެކަން އެރަށު ރައްޔިތުން ދަންނާނެތެވެ. ހުރިހާ މުދަލެއްވަނީ އަހަރެނަށާ އަނބިމީހާއަށް ލިޔެދީފައެވެ. އަހަރެން ކަތީބުބެގެ ވަސިއްޔަތް ފުރިހަމަކުރީމެވެ. ހިތުން ރުހުމުންނެވެ. އަދި އެގޮތުގައި އަހަރެން މިހާތަނާ ޖެހެންދެން ދެމި މިހުރީއެވެ. ބަދަލުވުމެއް ނެތިއެވެ

މަޑުމަޑުން އަލިކަން ތަނަށް ވެރިވާން ފަށާފިއެވެ. އަހަރެންނަށް ތަންތަން ވަކިވާން ފަށައިފިއެވެ. މީ ކޮންތަނެއް ބާވައެވެ. މީ އަހަރެންގެ ގެއެއް ނޫނެވެ. މީގެ އެތަކެއް އަހަރު ކުރިން އަހަރެން އުޅުނު ފަޅުގެއެއްވެސް ނޫނެވެ. އަދި އަހަރެންނަށް ކޮންމެ ރެއަކު ފެންނަ ދޯންޏެއްވެސް ނޫނެވެ. މީ މުޅިން އާ ތަނެކެވެ. އަހަރެން…….

ކުއްލި ބަރުކަމެއް އަހަރެންގެ ބޮލަށް އިހުސާސްވިއެވެ. ބައިވަރު އުދަނގޫތަކެއް ވާންފެށިއެވެ. ބުނެދޭން ، ބަޔާންކޮށްދޭން ދަތި އުދަނގޫތަކެކެވެ. އަހަރެން އޮށޯތީމެވެ. ލުޔެއް އެދިގެން ލޯ މަރާލީމެވެ. ވަގުތުން އަހަރެންނަށް ލުއިކަން އިހުސާސް ވިއެވެ، ފުން ނިންޖަކަށް މަރުހަބާ ކިޔަމުންނެވެ

އައު ބަޔަކަށް އިންތިޒާރު ކޮށްލައްވާ