އެނގުމެއްނެތި…5

ހަމަޖެހުމުގެ ނޭވާއެއް ދޫކޮށްލުމަށްފަހު އަލީޝާ އިތުރަށް ގޭގެ އެތެރެއިން ވަދެވެން ހުރި ބަޔަށް ވަނެވެ. ދޮރެއް ނެތްނަމަވެސް ވަކި ކޮޓަރިއެކެވެ. އެތެރެއަށް ރަނގަޅަށް ބަލައިނުލެވުގެން އުޅެނިކޮށް އަތުން ދޫވެގެން ފޯނުވެއްޓިއްޖެއެވެ. ގޮވީ ވެލިގަނޑުގައި އެއްޗެއް ޖެހުމުން ގޮވާކަހަލަ އަޑެއް ނޫނެވެ. ލޯ އަޑެކެވެ. ފޯނު ވެއްޓިފައި އޮތީ ދަގަނޑު ވަށް ޖަންގްޝަން މަތިގަނޑެއް ކަހަލަ މަތިގަނޑެއް މައްޗަށެވެ.

“ސަލާމަތްކޮށްދީ!” ފޯނު ނަގަން ގުދުވި އަލީޝާއަށް އަޑިން މީހަކު ގޮވައިލި އަޑުއިވުނެވެ.

**************************

-އެއް ގަޑިއިރު ކުރި-

މިރޭ ކޮންމެހެންވެސް އަލީޝާ ބިރުގަންނަވާލަން ނިންމައިގެން އެކަމަށް ރަނގަޅު ޖާގައެއް ހޯދަން ނުކުތް އީތަންއަށް ގަސް ބޯ ވަލުތެރެއިންލާފައި ނުކުމެވުނީ ފަޅު ގެއެއްގެ ކުރިމައްޗަށެވެ. އަލީޝާ އެކުވެރިންނާއިއެކު ރޭގަނޑު ފިލާކުޅެން އެ ހިސާބަށް އަންނަން ހަމަޖެއްސި އަޑު އީތަންއަށް ވަނީ އިވިފައެވެ. އެ ގެގަނޑު ވީ އޭނާގެ ރޭވުމަށް އެންމެ ގުޅޭ ތަަނަށެވެ. އެތެރެއަށް ވަދެގެންދިޔައިރު ބާ އައްޓަކާއި އަލަމާރިއެއް ފިޔަވާ އެ ގޭގައި ހުރީ ހުސް މަކުނުވަލެވެ. މަކުނުވާތައް ފޮޅަމުން އެތެރެ ކޮޓަރިއަށް ވަދެ ދެތިން ފިޔަވަޅު ކުރިއަށް އަޅައިލިތަނާ ހުރިގޮތަށް އީތަން ވެއްޓުނީ ވަޅުގަނޑަކަށެވެ. ވެއްޓެންދިޔަ މަގުމަތީ އަތް ދަމާލައިފައި ހިފުނީ މައްޗަށް ވާގޮތަށް ހުޅުވާފައި ހުރި އެ ވަޅުގެ މަތިގަނޑުގައެވެ. ދަމާބާރަށްވުރެ ވަރުގަދައެއް ނުވެވުނެވެ. އީތަންއާއިއެކު އައި ދަގަނޑު މަތިގަނޑު ބަންލާފައި ލެއްޕުނެވެ. އަލުން މަތި ހުޅުވަން، ފުންމައިގެންވެސް އެ ހިސާބަކަށް އަތެއް ނުފޯރިއެވެ. އަނދިރިކަމުން މީހަކު ލޮލަށް އިނގިލި ކޮށްޕައިިލިޔަސް ނޭންގޭނެއެވެ. އެވެސް އަދި އެހެން މީހަކަށް އެ ހަނި ވަޅަށް އެރެވިގެންތާއެވެ. ވަށައިގެން އަތް ކާއްތަައިލިއިރު ނުކުމެވޭނެ އެހެން ރާސްތާއެއްވެސް ނެތެވެ. ހަނިކަމުން ރަނގަޅަށް ގުދުވާނެ ޖާގަވެސް ނެތް އިރު އީތަން އަރިވެލާފައި ބިންމަތީ އަތް ކާއްތައިލީ އޭނާ އަތުގައި ހިނދުކޮޅެއް ކުރިން ޓޯޗެއްގެގޮތުގައި ގެންގުޅުން ފޯނު އަތުޖެހޭތޯއެވެ. ފޯނު އަތުޖެހިއްޖެއެވެ. ނަމަވެސް ސްކްރީނުގައި އަތް ޖެހުނުއިރު ތަޅައިގެންގޮއްސައެވެ. އަރިމަތީ ފިތަށް ފިތާ ފިތާ ހުޅުވެން ހިތަށްވެސް ނޭރިއެވެ. ރުޅި އަަރައިގަނެގެން ބިންމައްޗަށް ފޯނު ޖެހުންއިރު އީތަން ހުރީ ނޭވާ ހާސްވެފައެވެ.

“މީހެކޭ! ސަލާމަތްކޮށްދީ!” އަޑުގެ ނެތްތަނަށް އީތަން ގޮވަންފެށިއެވެ. އޭނާއަކީ ކުޑައިރުންސުރެވެސް ހަނި ތަންތަނުގައި ހުންނަން ބިރުގަންނަަ ކުއްޖެކެވެ. ސިއްހީގޮތުން ބުނާނަމަ ނަފްސާނީ ބިރެއްކަމުގައިވާ ކްލޮސްޓްރޮފޯބިއާ ހުންނަ ކުއްޖެކެވެ. އެ އަނދިރިކަމާއި ހާސްބޮޑުކަން އޭނާގެ ހިތުގެ ތެޅުން ދެގުނަކޮށްލިއެވެ. ދާހިތްލާ ފޯވެފައި ހުރި އީތަންއަށް ނޭވާލާން ދަތިވެ، ބޯ އަނބުރާގޮތްވުމުން މައްޗަށް އަތްފޯރާތޯ ކުރި މަސައްކަތާއި، ސަލާމަތަށް އެދި ގޮވި ގޮވުން ހުއްޓައިލަންޖެހުނެވެ. ގައިގައި ހުރިހާ ބާރެއް އެކީ ނެތިދާން ފެށިހެން ހީވުމުން އޭނާ ފާރުގައި ލެނގިލިއެވެ.

ވަޅުތެރޭ ހޭދަކުރެވުނު އަޒާބުދެނިވި އެއް ގަޑިއިރަށްފަހު މަތިން އަޑެެއްކީ އަޑަށް އީތަން އިސްއުފުލައިލިއެވެ. މަތީގައި މީހަކު އުޅޭކަން އިނގުމުން އީތަންއަށް ލިބުނީ އާ ހިތްވަރެކެވެ.

“ސަލާމަތްކޮށްދީ!” ގައިގައި ބާކީ ހުރި ބާރެއްލާފައި ނެރެވުނު ކުރަކި އަޑުން އީތަން ގޮވައިލިއެވެ.

އަލީޝާއަށް މަތި ހިއްލައިލެވުނީ ވަރަށް ހާލުންނެވެ. އެތެރެއަށް އަލިކޮށްލިއިރު ވަޅު ތެރޭގައި ތާށިވެފައި ހުރި އީތަން އޭނާއަށް ފެނުނެވެ. އަވަހަށް އެހީއަށް އެދި މީހަކަށް ގުޅަން ފޯނު ބަލައިލިތަނާހެން ޗާޖު ހުސްވެގެން ފޯނު ނިވިއްޖެއެވެ. އައި ރުޅިން ބިންމައްޗަށް ފޯނު ނުޖެހުނީ ކިރިޔާއެވެ. އަނދިރިކަމަށް ފުދޭވަރަކަށް ލޯ ހޭނުނުކަން ނަސީބެކެވެ. އީތަން އެތާނގައި އެކަނި ބަހައްޓާފައި މީހަކަށް ގޮވަން ދާކަށްވެސް ނުކެރުނެވެ.

“މި ނަގައިދެނީ އިނގޭ!” އަލީޝާ ގޮވައިލިއެވެ. ކޮޓަރިތެރޭ އަތްފުނާއަޅައިލިއިރު އަތުޖެހުނު ފަލަ ވާގަނޑު އެއީ އެ ކުދިންގެ ނަސީބެވެ. ވާގަނޑުގެ އެއްކޮޅު ދަގަނޑު މަތިގަނޑުގައި އެއްސުމަށްފަހު އަނެއްކޮޅު ވަޅު ތެރެއަށް ބޭލިއެވެ. އެ ވަގުތު އަލީޝާގެ އެންމެ ބޮޑު ހަތުރަކަށްވީ އަނދިރިކަމެވެ. އީތަންގެ ބަަރުމިނަށް ލެއްޕުނަ ނުދޭން މަތިގަނޑުގައި ބާރަށް އެއްފައި ވިއްދުމަށްފަހު އަލީޝާ އީތަންއަށް ވާގަނޑުގެ އެހީގައި އެރުމަށް ގޮވައިލިއެވެ. ދެއަތުން ލެވުނު ބާރަކުން ވާގަނޑަށް އަލީޝާ ދެމިނަމަވެސް މައްޗަށް އަރަން އީތަންއަށް އުޅެންޖެހުނު ހާލުބޮޑެވެ.

މައްޗަށް އެރެވުމާއިއެކު އަލީޝާ ސިހުނީ އީތަން އޭނާގެ ގައިގައި ބައްދައިގަތުމުންނެވެ. އީތަން ބިރުގަތްފަައި އިން ވަރުން މަލާމަތްކޮށްލާނަމޭ ހިތަށްއެރިނަަމަވެސް އެ ހަށިގަނޑުގައިވީ މަޑު ތުރުތުރުލުން އަލީޝާއަށް އިހުސާސުވެ މިޖާޒު ބަދަލުކޮށްލަން ޖެހުނެެވެ. އެއްއަތުން އީތަންގެ ބުރަކަށީގައި ހިފަހައްޓައިލަމުން އަނެއްއަތުން އޭނާގެ ކޮނޑުގައި އަޅާފައި އޮތް ބޮލުގައި އަލީޝާ ފިރުމައިލީ ހިތަށް ވަތް ހަމްދަރުދީއިންނެވެ. އަލީޝާގެ ގައިގައި ވަށައިލެވިފައިވީ ދެއަތުން އިތުރަށް ބާރަށް އީތަންއަށް ހިފަހައްޓައިލެވުނީ އިހުތިޔާރަކާއިނުލައެވެ. މިއޮއްހާއިރު އައްޔެއް ވައްދަން ނޭންގުނު ފެން ލައިޓުން އެތާ ތެރެއަށް ހަނދުވަރުގެ އަލި ރޮއްޖެއް ވައްދައިލީ މަންޒަރު ރީތިކޮށްލުމަށްހެން ހީވިއެވެ. ފިލްމުތަކުގައި އާންމުކަމެކެވެ.

މި އިނދެވުނު ހާލަތު ރޭކައިލަން އީތަންއަށް ފަސްވަރަކަށް މިނެޓު ނެގިއެވެ. ކުއްލިއަކަށް އަލީޝާ ގައިން އަތް ދޫކޮށްލާފައި ދުރަށްޖެހުނީ ބިރެއް ފެނުނުހެންނެވެ. ހަނދުވަރުގެ އަލީގައި، އެއްވެސް އަސަރެއް ނެތް މޫނަކުން އަލީޝާ އީތަންއަށް ބަލައިލިއެވެ. ހަތަރުކަޅި ހަމަވީހިނދު އަނެއްފަޅިއަށް މޫނު އަނބުރައިލި އީތަން، ބާރުބާރަށް އެތަނުން ނުކުމެގެން ދިޔައެވެ. އެ ހިތުގައި ވީ ކޮންކަހަލަ އިހުސާސުތަކެއްކަމެއް ނޭންގެއެވެ. އިތުރު މީހަކަށް މިފަދަ ލަނޑެއް ނުލިބޭނެގޮތަށް ވަޅުގެ މަތިގަނޑު ލެއްޕުމަށްފަހު އަލީޝާ ކޮޅަށް ތެދުވިއެވެ. ނަމަވެސް ބިންމަތީ ފައި ޖައްސައިލުމާއިއެކު ފައިތިލައަށް އެރި ތޫނު ތަދުން އަރިއަޅައިލިއެވެ. އަމިއްލައަށް ވެއްޓުނަނުދީ އަނެއްފައި ބިމުގައި ހަރުކޮށްލާފައި، ފައިވާން ބާލައި، ކަނާތުފައިގެ ދަށްފުށް އޭނާ ބަލައިލިއެެވެ. އޮތީ ހިސާބަކަށް ދުޅަވެފައެެވެ. ފައިވާނަށް އަރައިގެން ހިތްވަރުކޮށްފައި އަލީޝާ ހިނގައިގަތީ ކުރިއަށްވުރެ ބޮޑަށް ކޮރުޖަހަމުންނެވެ.

އިރު އޭގެ ވާޖިބު އަދާކުރުމަށްފަހު ކަނޑުގެ އުދަރެސްމަތިން ގެއްލެމުންދިޔައެވެ. ފަޅުރަށުގެ އައްސޭރިއަށް މަޑުކޮށްފައި އޮތް ދޯންޏަށް އެރި އަލީޝާ، ދޯނީގެ ކަނެއްގައި ކުޑަދޮރުން ބޭރަށް ބަލަން އިން އީތަންއަށް ބަލައިލިއެވެ. ހެނދުނު ހޭލިއިރު ކަނާތު ފައިތިލައިގެ ދަށްފުށް ދުޅަވެ އަރާފައި އޮތުމުން މުޅި ދުވަހު ޓެންޓުގައި އިންނަންޖެހުނު އަލީޝާއަށް އެދުވަހު އީތަން ފެނުނު އެއީ ފުރަތަމަ ފަހަރެވެ. ހުރިހާ ކުދިން އަރައި ހަމަވުމުން ދޯނި އަނބުރާ އެކުދިންގެ ރަށާއި ދިމާއަށް ދުއްވައިލިއެވެ. އީތަން އިން ފަޅި ނޫން އަނެއްފަޅީގައި ހުރި ސީޓެއްގައި އިށީން އަލީޝާއަށް އިރުއިރުކޮޅައި އީތަންއަށް ކަޅި އެއްލެއެވެ. ނަމަވެސް އެންމެ ފަހަރަކުވެސް އީތަންގެ ލޮލާއި ލޯ ބައްދަލުވާގޮތެއްނުވިއެވެ. އީތަން އެކަމަށް ވިސްނައިގެން އިން ކަހަލައެވެ. އެންމެ ފަހަރަކުވެސް އަލީޝާއަށް އޭނާ ބަލައިނުލިއެވެ.

އާދިއްތަ ދުވަހު ސްކޫލު ހުޅުވުންއިރު ދެ ދުޝްމަނުންގެ ދެމެދަށްވަނީ ބީރައްޓެހިކަން ވެރިވެފައެވެ. އަލީޝާ ހުރީ އީތަން ވާހަކަ ދައްކާތޯ ބަލަބަލައެވެ. ނަމަވެސް އީތަންގެ ލޮލަށް އަލީޝާ ނުފެންނަކަހަލައެވެ. އެ ސިކުނޑީގައި ވީ ކޮން ހާސަރުގަނޑެއްކަމެއް އަލީޝާ ނުދެނަހުއްޓެވެ.

އިންޓަވަލް ގަޑީގައި ކުލާހުގައި ފިލާވަޅު ހަދަން އިން އަލީޝާއަށް، ފަހަތުގައި އިން އީތަން ބަލައިލިއެވެ. ނުފެންނަކަމަށް ހަދައިގެން އުޅެއުޅެފައި އެއީ އޭނާ އެ ދުވަހު އަލީޝާއަށް ބަަަލައިލި ފުރަތަމަ ފަހަރެވެ. ބަދަލުހިފަން ބޭނުންވާ ދުޝްމަނަށް ނިކަމެތި ސިފައެއް ދައްކައި، އެހީއަށް އެދި ގައިގައި ހިފަހައްޓައިލެވުމުން ދެން ދައްކަންވީ މޫނެއް އީތަންއަކަށް ނުވިސްނުނެވެ. ޝުކުރުއަދާކޮށްފައި މިއޮށްހާދުވަހު ކުރަމުން އައި ނަފްރަތު ހިތުން ފޮހެލަންވީ ހެއްޔެވެ؟ އެގޮތާއި އޭނާގެ ހިތް ދެކޮޅުހެދިއެވެ. އެހާ ފަސޭހައިން ދަށްވާކަށް އޭނާގެ ގޮތްދޫނުކުރާ މިޖާޒު ގަބޫލެއްނުކުރިއެވެ. ދެން ކަންތައްކުރަންވީ ގޮތް ނޭންގިފައި އީތަން އިނެވެ.

ޓީޗަރެއްގެ އެދުމުގެމަތިން ބްރޯޑްކާސްޓިންގ ރޫމުގައި ހުރި ފޮތްކޮޅެއް ބަލައި ދިޔަ ތޫބާގެ ލޮލުގައި އަޅައިގަތީ މޭޒު ދަށުން އެއްޗެއް ދިއްލޭތަން ފެނުމުންނެވެ. ގުދުވެފައި ނަގައި ބަލައިލިއިރު ޕެން ޑްރައިވްއެކެވެ. ދިއްލުނުހެން ހީވީ އޭގައި އެލުވާފައި އިން ދަގަނޑު އެތިކޮޅެވެ. ތޫބާގެ ހަނދާނަށް އައީ ޓެސްޓު ޕޭޕަރު ގެއްލިިގެން ދަބަސް ފާސްކުރި ދުވަހު ކުލާސް އަންހެންކުއްޖެއް، ވަގަށް ގެނައި ޕެން ޑްރައިވްއެއް ފެނިދާނެތީ ބިރުން އުޅުނު ހަނދާނެވެ. އެ ގޮތަށް ކުއްޖަކު ވަގަށް ގެނައި އެއްޗަކަށް ވެދާނެތީ ޓީޗަރަކާއި ހަވާލުކޮށްގެން މައްސަލަގަނޑެއްގެ ތެރެއަށް ވަންނާކަށް ތޫބާ ބޭނުމެއްނުވިއެވެ. ޕެން ޑްރައިވް މުށުތެރެއަށް ލައި ފޮރުވައިލާފައި އަނެއް އަތުން ފޮތްކޮޅު ހިފައިގެން ނުކުތް ތޫބާއަށް، އެއީ ތީޗަރެއްގެ އެއްޗަކަށް ވެދާނޭވެސް ހިތަށްނޭރިއެވެ. ނުވަތަ އެއީ އޭނާ ހީކުރިގޮތަށް ކުއްޖެއްގެ އެއްޗެއްނަމަވެސް ރީތިކޮށް މޭޒުމަތީ ބާއްވާފައި ނުކުތްނަމަ ޖެހޭ މައްސަލައެއްގެ ތެރެއަކަށް އޭނާ ނުވަންނާނެއެންނޫންހެއްޔެވެ. އެ ހުރިހާ އާދައިގެ ކަންތަކެއް ނުވިސްނި ތޫބާއަށް މިފަހަރު ވިސްނުނީ މާ ފުންކޮށެވެ.

ގެއަށް ގޮސް ފިލާވަޅު ހަދަން ފޮތްތައް ނެގިއިރު ދަބަހުން ވެއްޓުނު ޕެން ޑްރައިވް ފެނިފައި ތޫބާ، އޭގައި ހުރި އެއްޗެއް ބަލައިލާ ހިތްޖެހިއްޖެއެވެ. ކޮންޕިއުޓަރު ހުޅުވައިލުމަށްފަހު ސީޕީޔޫއަށް ޕެން ޑްރައިވް ޖަހައިލުމުން ސްކްރީނުން ދެއްކިއެވެ.

“އަލީޝާ؟!…” ޕެން ޑްރައިވްގެ ނަމަކަށް ޖަހާފައި އިން އެތި ފެނުމުން ތޫބާގެ ލޯ ބޮޑުކޮށްލެވުނެވެ. އެތެރެ ބަލައިލުމަށް އޮތް ޝައުގުވެރިކަން ވީ ހައްތަހާ އިތުރެވެ. ހުޅުވާފައި ބަލައިލިއިރު އޭގައި އިނީ ވީޑިއޯއަކާއި އޯޑިއޯއެކެވެ. ތޫބާ ފުރަތަމަ ހުޅުވައިލީ ވީޑިއޯއެވެ. އޭގައި ފެންނަން ތިބީ އަމީނާއާއި ރާއިދާއެވެ. އެއީ އަލީޝާ ލޫއްވަގަނޑު ދޭތެރެއިން ސިއްރުން ނެގި ވީޑިއޯއެވެ. ހިތާމަވެރިކަމާއިއެކު އަމީނާ ރާއިދާއަށް ކިޔައިދިން ވާހަކަތައް ސާފުކޮށް ހުއްޓެވެ.

“މިއީ ދޯ އެ ދުވަހު ސްކޫލުގަަ އެޅުވި އެތި.” ލައިބްރަރީގައި އިނދެވުނީތީ ތޫބާއަށް އެ ދުވަހު އަޑު ނީވުނީއެވެ. ވީޑިއޯ ނިމުމުން ދެން އިނީ އޯޑިއޯއެވެ. އެއީ ލައުޑް ސްޕީކަރުގައި އެޅުވުމަށްޓަކައި އެ ވީޑިއޯގައި ދައްކާފައި ހުރި ވާހަކަތައް އޯޑިއޯއަކަށް ހަދާފައެވެ. ދެވަނަ ފަހަރަށްވެސް އަމީނާގެ ވާހަކަތައް ތޫބާ އަޑުއެހިއެވެ. “މީ ތެދު ވާހަކަތަކެއްވެއްޖިއްޔާ ދެން އަހަންނަށް ލޯބިވެވުން އީތަންއަކީ އޭނަގެ ހަގީގީ ސިފައެއްނޫންތަ؟… އީތަންއަށް އަލީޝާ އުނދަގޫކުރަނީކީ ނޫން… އީތަން އަލީޝާއަށް އުނދަގޫކުރަަނީ؟…” ތޫބާ އިނީ ރަނގަޅަށްވެސް އޮޅުންބޮޅުން ވެފައެވެ. ގަބޫލުކުރަންވީ އޭނާގެ ހަމަ ލޮލަށް ފެނުން އެއްޗެހިތޯ، ނުވަތަ މި ވީޑިއޯތޯ ނުވިސްނިފައެވެ.

“އީތަން…” ލުއި އަޑަކުން އޭނާއަށް ގޮވަައިލި އަޑަށް އީތަަންއަށް ބަލައިލެވުނެވެ. ކައިރީގައި އިސްޖަހައިގެން ހުރީ ތޫބާއެވެ. އަލީޝާއާއި ދޭތެރޭ ކަންތައްކުރާނެ ގޮތެއް ނުވިސްނި މިޖާޒު ހަރާބުވެފައި ހުރި އީތަން ހުރީ ވާހަކަދައްކާ ހިތަކުން ނޫނެވެ. ނަމަވެސް ކީއްވިހޭ އަހައިލިއެވެ.

“އީތަން… އަލީޝާއަށް އުނދަގޫކުރާކަން އެއީ ތެދެއްތަ؟” ލެވުނު އެންމެ ގަދަ ހިތްވަރުލާފައި ތޫބާ ސުވާލުކޮށްލިއެވެ. ލޯބިވާ ކުއްޖާއަށް އެންމެ ފުރަތަމަ ބުނާ ޖުމުލައަކަށް މިވީ އެހެން އަންހެންކުއްޖެއްގެ ވާހަކައެވެ. ތޫބާގެ ސުވާލުން އިތަން ހުރީ ހައިރާންވާންވެސް ނޭންގިފައެވެ. އިރުކޮޅަކު ބަަލަހައްޓައިގެން ހުރުމަށްފަހު އޭނާއަށް ފެށުނީ ހޭންށެވެ. އެހާ ސީރިއަސްވެފައި ތުބާ އެހީތީއެވެ.

“އަލީޝާ ބުނީތަ މަ އޭނައަށް އުނދަގޫކުރަނީއޭ؟” ޖަވާބު ދިނުމުގެ ބަދަލުގައި އީތަންވެސް ކޮށްލީ ސުވާލެކެވެ. ހަމަ ހަގީގަތުގައިވެސް އަލީޝާ ތޫބާގާތު އެއްޗެއް ކީތޯ ބަލައިލަން އޭނާހުރީ ބޭނުންވެފައެވެ. ތޫބާ ނޫނެކޭ ބުނުމުގެގޮތުން ބޯ ހަލުވައިލިއެވެ. “ދެން ކީއްވެ ތިހެން ތި އެހީ؟ އަހަރުން މީ ބްރޯސް އޭ މިހާރު ބުނެވިއްޖެއެންނު އެންމެން ކުރިމަތީ.” އީތަން އެއްސެވެ. އަނގައިން ޖަވާބެއް ދިނުމަކާއި ނުލައި ފޯނު ހުޅުވާފައި ތޫބާ ދައްކައިލީ އެއްކަލަ ވިޑިއޯއެވެ. ދެން ވާނެ ގޮތަކާއިމެދު ވިސްނައިލުމެއްނެތިއެވެ. އެއަށްވުރެ އޭނާ ހުރީ ހަގީގަތް ދެނެގަތުމަށް ކެތްމަދުވެފައެވެ.

އަރައިގަތް ރުޅިން އީތަންގެ މޫނު ރަތްވިއެވެ. ނަމަވެސް ފުން ނޭވާއެއް ދޫކޮށްލާފައި ދަތްކުނޑިވިކައިލަމުން އޭނާ މަސައްކަތްކުރީ އެކަން ފޮރުވޭތޯއެވެ. އަލީޝާގެ ކިބައިން ބަދަލުހިފުމަށް ބަދަލުކުރި އޭނާގެ ދިރިއުޅުން ބަރުބާދުވާން ނޭދޭތީއެވެ.

“ތީ މަންމައަށް ހީވިގޮތެއް.” އީތަން ހިތާމަވެރިގޮތަކަށް ހިނިތުންވެލިއެވެ. “ތޫބާ… ތި ވީޑިއޯ ޑިލީޓުކޮށްލަދީފާނަންތަ؟ ތި ފެނިއްޖިއްޔާ އެންމެން އަނެއްކާ މަދެކެ ރުޅިއަންނަން ފަށާނެ. އެހެން ވިޔަ ނުދީ! މަ މިއޮއްވަރަށް ރަނގަޅަށް އުޅެން މަސައްކަތްކުރާއިރުވެސް އަމިއްލަ މަންމައަކަށްވެސް ގަބޫލެއް ނުކުރެވޭ. ވިސްނާލަބަލަ މަ ވާނެ ދެރަ. ޕްލީޒް! ތި ޑިލީޓުކޮށްލަދީ.” އަނގަމައްޗަށް އަތް ހުރަސްކޮށްލާފައި އީތަން ޖައްސައިލި ހިތާމަވެރި އެކްޓުގަނޑުން ތޫބާގެ ހިތް ކަފަކޮޅަކަށް ވެއްޖެއެވެ. ވަށްކަޅިން ބަލައިލި އީތަންއަށް، އިސްޖަހައިގެން ހުރި ތުބާގެ ކުލަވަރު އޭނާ ބޭނުންވާގޮތަށް ބަދަލުވާތަން ފެނުމުން ކިބުރުވެރި ގޮތަކަށް ހީލެވުނެވެ. “ދެން އެހެން އެއްޗެއްގަ ނީންނާނެތަ؟…” ތޫބާ ފޯނުން ވީޑިއޯ ޑިލީޓުކޮށްލުމުން އީތަން އަހައިލިއެވެ.

“އަލީޝާގެ ޕެން ޑްރައިވްގަ…” ތުބާ ކިޔައިލިއެވެ.

“އެ ޕެން އެބައޮތްތަ؟ މަށަށް ގެނެސްދީ އިނގޭ. މަ އޭތި ޑިލީޓުކޮށްލާފަ އަލީޝާއަށް އަނބުރާ ދޭނަން.” އީތަންގެ ބަހަށް ތުބާ ބޯ ޖަހައިލިއެވެ.

“އަލީޝާ ދޯ އީތަންއަށް އުނދަގޫކުރަނީ؟” ތޫބާ މައުސޫމުގޮތަކަށް ބަަލައިލަމުން އެއްސެވެ. ޖަވާބުދިނުމުގެ ބަދަލުގައި އީތަން، ހިތަށްއެރި އެއްޗެއް ޔަގީންކޮށްލުމަށް ތޫބާއާއި ގާތްވެލިއެވެ. ކައިވަތަކަށްވުރެ ތޫބާގެ މޫނާއި އީތަންގެ މޫނު ގާތްކޮށްލެވުންއިރު ރަތްއަރަމުންދިޔަ ތޫބާގެ ދެ ކަންފަތާއި މޫނު ފެނިފައި އީތަންއަށް ހިތުތެރެއިން އުފާފާޅުކުރެވުނެވެ. ކުއްލިއަކަށް އީތަން އަތުގައި ހިފައިލުމުން ތޫބާއަށް ހީވީ ކަރަންޓު ޝޮކެއް ޖެހުންހެންނެވެ.

“އާނ… އެކަމަކު އެއްވެސް މީހެއް ކައިރީ ނުބުނާތި އިނގޭ. އޭރަށް އެންމެން އަލީޝާދެކެ ރުޅިއަންނަން ފަށާނީ.” އީތަން ވަރަށް ހެޔޮވެފައި ބުންޏެވެ. ތޫބާ އަވަސްއަވަހަށް ބޯ ޖަހައިލިއިިރު އޭނާގެ ހިތް އޮބިނޯންނަވަރަށް ތެޅެމުންދިޔައެވެ. ހިނިތުންވުމެއް ރައްދުކޮށްލުމަށްފަހު ތޫބާގެ އަތުން އަތް ދޫކޮށްލާފައި އީތަން ސިޑިއާއި ދިމާާއަށް ހިނގައިގަތެވެ. އޭނާގެ ތުންފަތުގައި ވީ އާދައިގެމަތިން ކިބުރުވެރި ހިނިތުންވުމެކެވެ.

(ނުނިމޭ)